དེ་རིང་ཐེ་ཝན་གྱི་རྒྱལ་ས་ཐེ་པེ་དུ་ཉེ་ཆར་རྒྱ་ནག་ནང་ཤོག་བུ་དཀར་པོའི་ལས་འགུལ་སྤེལ་བའི་ཁྲོད་འཛིན་བཟུང་བྱས་པའི་མི་སྣ་དང་སྤྱིར་རྒྱ་ནག་དམར་ཤོག་ཚོགས་པའི་སྲིད་གཞུང་གིས་བཙོན་འཇུག་འོག་ཡོད་པའི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་དགོས་པའི་ལས་འགུལ་ཞིག་སྤེལ་ཡོད།
དེ་རིང་ཐེ་ཝན་རྒྱལ་སྤྱིའི་ཉེས་ཡངས་ཚོགས་པའི་གོ་སྒྲིགས་འོག་སྔ་དྲོ་ཕྱག་ཚོད་ ༡༠་༣༠ ཐོག་ཐེ་ཝན་གྱི་རྒྱལ་ས་ཐེ་པེར་གསར་་འགོད་ལྷན་ཚོགས་ གནང་སྟེ་བོད་དང་ཐེ་ཝན་འགྲོ་བ་མིའི་ཐོབ་ཐང་ཚོགས་པ་གཙོས་ཐེ་ཝན་ནང་གི་གཞུང་འབྲེལ་མིན་པའི་ཚོགས་པ་ཁག་དང་འགྲོ་བ་མིའི་ཐོབ་ཐང་ཁྲིམས་རྩོད་པ་བཅས་མཉམ་ཞུགས་གནང་འདུག་པ་དང་། སྐབས་དེར་ཉེ་ཆར་རྒྱ་ནག་ཏུ་མང་ཚོགས་ཀྱིས་གཉན་རིམས་ཀླད་ཀོར་གྱི་སྲིད་བྱུས་ལ་ངོ་རྒོལ་གནང་སྟེ་ཤོག་བུ་དཀར་པོའི་ལས་འགུལ་སྤེལ་བའི་ཁྲོད་འཛིན་བཟུང་བྱས་པའི་མི་སྣ་དང་སྤྱིར་རྒྱ་ནག་དམར་ཤོག་ཚོགས་པའི་སྲིད་གཞུང་གིས་བཙོན་འཇུག་འོག་ཡོད་པའི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་དགོས་པའི་གཏམ་བཤད་དང་གོ་རྟོགས་ཀྱི་ལས་འགུལ་ཞིག་སྤེལ་ཡོད་པ་རེད།
བོད་དང་ཐེ་ཝན་འགྲོ་བ་མིའི་ཐོབ་ཐང་ཚོགས་པ་གསར་འཛུགས་གནང་མཁན་དང་ཚོགས་གཙོ་གཞོན་པ་བཀྲིས་ཚེ་རིང་ལགས་ཀྱིས་གསར་འགོད་ལྷན་ཚོགས་ཐོག་བོད་མི་རྣམས་ཀྱིས་ལོ་ངོ་ ༦༠ ལྷག་གི་རིང་བོད་ཕྱི་ནང་གཉིས་སུ་བོད་ཀྱི་རྩ་དོན་སླད་སྙིང་སྟོབས་ཞུམ་པ་མེད་པར་མུ་མཐུད་ནས་ ལས་འགུལ་སྤེལ་བཞིན་ཡོད་པ་དང་། དེ་བཞིན་ཡུ་གུར་དང་ཧོང་ཀོང་མང་ཚོགས་ཚོས་ཀྱང་དེ་ལྟར་གནང་བཞིན་ཡོད་སྐོར་གསུངས་པ་དང་ཆབས་ཅིག རྒྱ་ནག་ནང་མང་གཙོའི་བཅོས་བསྒྱུར་ཡོང་བར་ཚང་མར་འགན་གཅིག་མཚུངས་ཡོད་ཅེས་གཏམ་བཤད་གནང་འདུག
འདས་ལོར་རྒྱ་ནག་ཏུ་ཏོག་དབྱིབས་གཉན་རིམས་ ༡༩ པའི་གཉན་སྲིན་གསར་པ་ཁྱབ་གདལ་འོག སྲིད་གཞུང་གིས་གཉན་རིམས་ཀླད་ཀོར་ཞེས་པའི་སྲིད་བྱུས་རྐྱེན་གྱིས་མང་ཚོགས་རྣམས་ལ་གཉན་རིམས་ལས་ཆེས་ངལ་བ་འཕྲད་པའི་ཁྲོད་ཕྱི་ཟླ་ ༡༡ ཚེས་ ༢༤ ཉིན་ཤིན་ཅང་གི་རྒྱལ་ས་ Urumqi ནང་ཁང་རྩིག་ཞིག་ལ་མེ་སྐྱོན་ཕོག་པའི་དབང་གིས་མི་མང་པོའི་ཚེ་སྲོག་ཤོར་བ་དང་འབྲེལ་ཏེ་ཤིན་ཅང་ནས་ཐོག་མར་དབུ་འཛུགས་ཀྱིས་རིམ་བཞིན་རྒྱ་ནག་གི་གྲོང་ཁྱེར་ཆེ་ཁག་འདྲ་མིན་ནང་མང་ཚོགས་ཀྱིས་གཞུང་གི་གཉན་རིམས་ཀླད་ཀོར་གྱི་སྲིད་བྱུས་ལ་ངོ་རྒོལ་གྱི་ལས་འགུལ་མང་དག་ཅིག་སྤེལ་ཡོད་པ་ལྟར་རྒྱ་ནག་དམར་པོའི་སྲིད་གཞུང་འོག་མང་ཚོགས་ལ་སྨྲ་བརྗོད་དང་བསམ་བློའི་རང་དབང་ལ་དམ་བསྒྲགས་གང་བྱས་མངོན་གསལ་དང་སྦྲགས་ནས་ཤོག་བུ་དཀར་པོའི་ལས་འགུལ་སྤེལ་ཡོད་པ་རེད། ཕྱི་ཟླ་ ༡༢ ཚེས་ ༨ ནས་གཉན་རིམས་ཀླད་ཀོར་གྱི་སྲིད་བྱུས་ཡོངས་རྫོགས་ཕྱིར་བསྡུ་བྱས་ཡོད་པ་དེ་ལྟར་ཡང་། ལས་འགུལ་སྤེལ་སྐབས་སུ་མང་ཚོགས་མང་དག་ཅིག་འཛིན་བཟུང་བྱས་ཡོད་པར་མ་ཟད་དུས་ད་ལྟའང་ལས་འགུལ་དེར་མཉམ་ཞུགས་གནང་མཁན་དང་འབྲེལ་བ་ཡོད་མཁན་རྣམས་ལ་འདྲི་རྩད་ཀྱིས་དམ་བསྒྲགས་བྱེད་མུས་ཡིན་པ་རེད།
