བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ནིའུ་ཡོག་ནང་རྟེན་གཞི་བྱས་པའི་ཞབས་པུས་ཀྱི་སྨན་ཁང་རྩེ་ཕུད་ Hospital of Special Surgery ནང་ཞབས་པུས་གཤག་བཅོས་ཀྱི་སྨན་བཅོས་ལེགས་གྲུབ་བྱུང་སྟེ། ཁ་ཉིན་ཕྱི་ཚེས་ ༢༩ ཉིན་སྨན་ཁང་ནས་ཕྱིར་བཞུགས་གནས་གསོལ་མགྲོན་ཁང་དུ་ཆིབས་བསྒྱུར་མཛད་ཡོད་པ་རེད།
༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་༸སྐུའི་ཞབས་པུས་ཀྱི་འཕྲོད་བཞེས་ལེགས་གྲུབ་དང་འབྲེལ་བརྙན་ཐུང་ཞིག་འདོན་སྤེལ་གནང་བའི་ནང་། ཨ་རིར་༸གོང་ས་མཆོག་དང་ལྷན་བཅར་ཞུས་པའི་༸སྐུའི་ཕྱི་ལུགས་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས་ཕྱི་ཟླ་ ༦ པའི་ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ནིའུ་ཡོག་ནང་རྟེན་གཞི་བྱས་པའི་ཞབས་པུས་ཀྱི་སྨན་ཁང་རྩེ་ཕུད་ Hospital of special surgery ནང་༸སྐུའི་ཞབས་པུས་བརྗེ་འགྱུར་གྱི་གཤག་བཅོས་གནང་སྟེ། ཞབས་པུས་སྨན་བཅོས་དེ་ཉིད་ལེགས་གྲུབ་བྱུང་ཡོད་སྐོར་གསུངས་པ་དང་སྦྲགས། ཕྱི་ཚེས་ ༢༩ ཉིན་མགོན་པོ་༸གང་ཉིད་མཆོག་སྨན་ཁང་ནས་ཕྱིར་ཨ་རིའི་གཞུང་གི་གྲ་སྒྲིག་ཞུས་པའི་༸རྒྱལ་བའི་བཞུགས་གནས་ Park Hyatt New York གསོལ་མགྲོན་ཁང་དུ་ཆིབས་ཐོན་མཛད་རྒྱུ་ཡིན་པ་ཙམ་མ་ཟད། སྨན་ཁང་དེའི་སྨན་པ་དང་འབྲེལ་ཡོད་ལས་བྱེད་ཚོས་ལྷག་བསམ་རྣམ་དག་ཐོག་ནས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་སྤྱི་ཡོངས་ཀྱི་ཐོག་ལ་ཧུར་ཐག་གནང་གི་ཡོད་སྟབས། བོད་གཞིས་བྱེས་གཉིས་ཀྱི་བོད་མི་རྣམས་ལ་ཐུགས་བློ་བདེ་བོ་གནང་རོགས་ཞེས་གསུངས་འདུག
ཕྱོགས་མཚུངས་ Hospital of special surgery སྨན་ཁང་གིས་དྲ་གནས་ཐོག་༸སྐུའི་ཞབས་པུས་སྨན་བཅོས་དང་འབྲེལ་བའི་གནས་ཚུལ་སྤེལ་བའི་ནང་། ཕྱི་ཚེས་ ༢༨ ཉིན་གྱི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཞབས་པུས་བརྗེ་འགྱུར་གྱི་གཤག་བཅོས་ལེགས་འགྲུབ་བྱུང་སྟེ། ཕྱི་ཚེས་ ༢༩ ཉིན་གྱི་སྔ་དྲོར་མགོན་པོ་༸གང་ཉིད་མཆོག་སྨན་ཁང་ནས་ཕྱིར་བཞུགས་གནས་གསོལ་མགྲོན་ཁང་དུ་ཆིབས་ཐོན་མཛད་ཡོད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་བླ་སྨན་པ་དང་༸དགའ་ལྡན་ཕོ་བྲང་ཡིག་ཚང་ལྷན་དུ་འབྲེལ་ལམ་ཡག་པོ་ཡོད་སྐོར་གསུངས་པ་མ་ཟད། ད་ལེན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐེངས་འདིར་༸སྐུའི་ཞབས་པུས་སྨན་བཅོས་སླད་དུ་སྨན་ཁང་འདིར་ཆིབས་བསྒྱུར་མཛད་པར་བཀའ་དྲིན་ཆེ་ཞེས་ཞུས་འདུག
རྩ་བའི་༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་༸སྐུའི་ཞབས་པུས་བརྗེ་འགྱུར་གྱི་གཤག་བཅོས་དེ་ཉིད་ལེགས་གྲུབ་བྱུང་བའི་གསལ་བསྒྲགས་སྤེལ་བ་དང་བསྟུན། ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ Uzra Zeya མཆོག་གི་གཙོས་གནད་ཡོད་མི་སྣ་མང་པོས་མགོན་པོ་༸གང་ཉིད་མཆོག་གི་ཞབས་པུས་སྨན་བཅོས་ལེགས་འགྲུབ་བྱུང་བར་དགའ་བསུའི་འཚམས་འདྲི་གནང་དང་གནང་མུས་ཡིན་པ་རེད།
ལྕམ་སྐུ་ Uzra Zeya མཆོག་གིས་རང་ཉིད་ཀྱི་སྤྱི་ཚོགས་དྲ་ལམ་ X ཐོག་མགོན་པོ་མཆོག་གི་༸སྐུའི་འཕྲོད་བཞེས་གང་མྱུར་དྲག་སྐྱེད་ཡོང་བའི་ཐུགས་རེ་གནང་ཡོད་པ་དང་། རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་མགོན་པོ་༸གང་ཉིད་མཆོག་གི་ཞབས་པུས་སྨན་བཅོས་ལེགས་གྲུབ་བྱུང་བར་དགའ་བསུའི་འཚམས་འདྲི་གནང་བ་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བརྩེ་དང་མཛད་སྤྱོད་བཟང་པོ་ལས་འཛམ་གླིང་ནང་འོད་ཟེར་ཁྱབ་བཞིན་ཡོད་པ་དང་། མགོན་པོ་༸གང་ཉིད་མཆོག་སྐུའི་འཕྲོད་བཞེས་བཟང་པོ་དང་མུ་མཐུད་མཛད་རྗེས་སྐྱོང་ཐུབ་པའི་སྨོན་འདུན་ཞུས་འདུག
གཞི་རྩའི་ད་ལྟའི་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་གཞུང་གི་གྲ་སྒྲིག་ཞུས་པའི་༸རྒྱལ་བའི་བཞུགས་གནས་ Park Hyatt New York གསོལ་མགྲོན་ཁང་དུ་༸སྐུ་ངལ་གསོ་བཞུགས་མཛད་མུས་ཡིན་པ་དང་། ལྷག་པར་ད་ཐེངས་༸གོང་ས་མཆོག་ཨ་རིར་ཆིབས་བསྒྱུར་བསྐྱང་པ་དེ་ནི་ལོ་བདུན་ནང་ཐེངས་དང་པོ་དེ་ཆགས་ཀྱི་ཡོད་སྟབས། ཁུལ་དེར་ཡོད་པའི་ས་གནས་བོད་མི་ཚོས་ཐུགས་ཚོར་ཆེན་པོས་༧གོང་ས་མཆོག་བཞུགས་གནས་མགྲོན་ཁང་དུ་ཕྱག་བསྐོར་གནང་དང་གནང་མུས་ཡིན་པ་རེད་འདུག
