ཁ་སང་ཕྱི་ཟླ་ ༣ ཚེས་ ༣༡ ཉིན་མོ་དེ་ནི་ཕྱི་ལོ་ ༡༩༥༩ ལོར་བོད་ལ་དུས་འགྱུར་བྱུང་རྗེས་༸གོང་ས་མཆོག་གིས་དབུས་པའི་༸སྐུ་འཁོར་ལྷན་རྒྱས་ནོར་བུ་གླིང་ཁ་ནས་ཉིན་མཚན་ལྟོས་མེད་བྲོས་བྱོལ་ལ་ཆིབས་བསྒྱུར་གྱིས་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ནང་ཆགས་པའི་འཕགས་བོད་ས་མཚམས་སྐས་འཛེགས་མ་ཎིའི་ Ke-Dze-Mani བརྒྱུད་མོན་སྦས་ཡུལ་སྐྱིད་མོ་ལྗོངས་སུ་ཐེངས་དང་པོ་ཞབས་སོར་འཁོད་པའི་ཉིན་མོ་འཁེལ་གྱི་ཡོད་པ་ལྟར། ཁ་སང་མོན་པའི་དད་ལྡན་པ་ ༣༠༠ ལྷག་སྐས་འཛེགས་མ་ཎིར་མཉམ་འཛོམས་དང་འབྲེལ། ༸གོང་ས་མཆོག་བོད་ནས་རྒྱ་གར་ལ་བྲོས་བྱོལ་དུ་ཕེབས་སའི་ལོ་རྒྱུས་ཀྱི་རང་བཞིན་ལྡན་པའི་འགྲུལ་བཞུད་དེ་ཉིད་དྲན་གསོ་ཞུ་ཆེད་སྐས་འཛེགས་མ་ཎི་ནས་མོན་རྟ་དབང་དབར་ Freedom Trail of His Holiness the 14th Dalai Lama ཞེས་པའི་གོམ་བགྲོད་ཀྱི་ལས་འགུལ་ཐེངས་གཉིས་པ་དབུ་འཛུགས་གནང་འདུག
དེ་ཡང་ས་གནས་ཀྱི་བརྒྱུད་ལམ་ཐོག་གནས་ཚུལ་ཐོན་པར་གཞིགས་ན། རྟ་དབང་རྫོང་གི་གོ་སྒྲིག་གནང་བའི་ཉིན་དྲུག་གི་གོམ་བགྲོད་ལས་འགུལ་དབུ་འབྱེད་ཀྱི་མཛད་སྒོའི་ཐོག མངའ་སྡེའི་གྲོས་ཚོགས་འཐུས་མི་ཚེ་རིང་ལྷ་མོ་ལགས་དང་། རྟ་དབང་རྫོང་གི་སྤྱི་ཁྱབ་འགན་འཛིན་ Leki Gombu ལགས། རྟ་དབང་དགོན་པའི་མཁན་པོ་དང་ལུང་གླ་རྫོང་གི་ཉེན་རྟོག་སྤྱི་ཁྱབ་འགན་འཛིན་བཀྲ་ཤིས་དོན་གྲུབ་ལགས་གཙོས་པའི་མོན་པའི་སྐྱ་སེར་ཕོ་མོ་ ༣༠༠ ཙམ་མཉམ་ཞུགས་གནང་བ་དང་འབྲེལ། གོམ་བགྲོད་པ་རྣམས་ཀྱིས་ཕྱག་ཏུ་༸གོང་ས་མཆོག་གི་སྐུ་པར་དང་བོད་ཀྱི་རྒྱལ་དར། ནང་པའི་ཆོས་དར་སོགས་བསྣམས་ཏེ་༸གོང་ས་མཆོག་སྐུ་ཚེ་ཁྲི་ལོར་བརྟན་པའི་གསོལ་འདེབས་སྨོན་ལམ་འདོན་པ་དང་སྦྲགས་ལས་འགུལ་དབུ་འཛུགས་ཀྱིས། ཁ་སང་ཉིན་དང་པོར་ཆུ་དྭངས་མོ་བར་སྤྱི་ལེ་གསུམ་གྱི་གོམ་བགྲོད་གནང་འདུག
མངའ་སྡེའི་གྲོས་ཚོགས་འཐུས་མི་ཚེ་རིང་ལྷ་མོ་ལགས་ཀྱིས་སྐབས་དེར་༸གོང་ས་མཆོག་མོན་ཡུལ་བརྒྱུད་རྒྱ་གར་ལ་ཐེངས་དང་པོ་ཞབས་སོར་འཁོད་སྐབས་གནས་སྟངས་ཧ་ཅང་ཛ་དྲག་པོ་ཡིན་ཀྱང་། ལོ་རྒྱུས་ཀྱི་རང་བཞིན་ལྡན་པའི་འགྲུལ་བཞུད་དེ་ད་ཆ་མཐུན་སྒྲིལ་དང་དྲན་གསོ། རིག་གཞུང་གི་སྤོབས་པ་བཅས་ཀྱི་མཚོན་རྟགས་སུ་གྱུར་ཡོད་སྐོར་གསུངས་པ་དང་ཆབས་ཅིག ཐེངས་འདིའི་གོམ་བགྲོད་དེ་ནི་༸གོང་ས་མཆོག་གི་མཛད་རྗེས་རླབས་ཆེན་ཁག་ལ་རྗེས་དྲན་དང་། ལྷག་དོན་མོན་པ་དང་བོད་མི་དབར་གྱི་ཐུན་མོང་མ་ཡིན་པའི་འབྲེལ་ལམ་གྱི་མཚོན་དོན་གལ་ཆེ་ཞིག་ཡིན་པ་གསུངས་འདུག
མ་ཟད། ཁོང་གིས་ལས་འགུལ་དེ་བཞིན་འདི་ཚེས་ ༣༡ ཉིན་ནས་འཕགས་བོད་ས་མཚམས་སྐས་འཛེགས་མ་ཎི་ནས་འགོ་འཛུགས་ཀྱིས་རིམ་པས་ Gorsam དང་། Jeymeythang Shakti Lungla, དེ་བཞིན་ Thonglek བཅས་བརྒྱུད་དེ་མཐར་ཕྱི་ཟླ་ ༤ པའི་ཚེས་ ༥ ཉིན་མོན་རྟ་དབང་དུ་འབྱོར་ཏེ་མཇུག་སྒྲིལ་གནང་རྒྱུ་ཡིན་པ་དང་། གོམ་བགྲོད་ཁྲོད་དེ་སྔ་༸གོང་ས་མཆོག་བྲོས་བྱོལ་དུ་ཕེབས་པའི་སྐབས་༸མགོན་པོ་མཆོག་གི་སྐུ་ལྷོད་བཞུགས་མཛད་ཡུལ་ཁག་ཏུ་གོམ་བགྲོད་བར་མཚམས་འཇོག་ཏེ་གནད་ཆེ་བའི་ལོ་རྒྱུས་ཀྱི་ས་ཚིགས་ཁག་ལ་གནས་མཇལ་གནང་རྒྱུ་དང་ཆབས་ཅིག ལྷག་པར་༸རྒྱལ་བའི་དྲན་རྟེན་ཆེད་ཕྱི་ལོ་ ༢༠༢༢ ལོར་རླུང་ལ་ས་གནས་སུ་གསར་རྒྱག་གནང་བའི་ཐར་འདོད་ནོར་བུ་གླིང་གི་ཕོ་བྲང་སོགས་༸གོང་ས་མཆོག་རྒྱ་གར་ལ་བཙན་བྱོལ་དུ་ཕེབས་སྐབས་ཁུལ་དེར་༸ཞབས་སོར་འཁོད་ཡུལ་ས་གནས་ཁག་ལ་མཆོད་རྟེན་དང་། འགྲེམས་སྟོན་ཁང་། དེ་བཞིན་དགོན་པ་ལ་སོགས་པར་གནས་མཇལ་གནང་གི་ཡོད་པ་གསུངས་འདུག
དེ་འབྲེལ་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་ X སྤྱི་ཚོགས་དྲྭ་ལམ་ཐོག ༸གོང་ས་མཆོག་མོན་ཡུལ་བརྒྱུད་རྒྱ་གར་ལ་ཐེངས་དང་པོ་ཞབས་སོར་འཁོད་པའི་ལོ་རྒྱུས་ཀྱི་རང་བཞིན་ལྡན་པའི་འགྲུལ་བཞུད་ཀྱི་གལ་གནད་ངོ་སྤྲོད་དང་འབྲེལ། ཐེངས་འདིའི་གོམ་བགྲོད་དེ་ནི་༸གོང་ས་མཆོག་བོད་ནས་རྒྱ་གར་ལ་བྲོས་བྱོལ་དུ་ཕེབས་པའི་འགྲུལ་བཞུད་དེ་ཉིད་དྲན་གསོ་ཞུ་ཆེད་ཙམ་མ་ཡིན་པར་དེ་ནི་ཞི་བདེ་དང་། སྙིང་རྗེ། བཟོད་བསྲན། མི་རིགས་ཀྱི་སྙིང་སྟོབས་བཅས་ལ་ཆེ་བསྟོད་ཞུ་བ་ཞིག་ཀྱང་རེད་ཅེས་གསུངས་འདུག
མ་ཟད། གོམ་བགྲོད་དེ་ཉིད་བརྒྱུད་༸གང་ཉིད་མཆོག་གིས་འཚེ་མེད་ཞི་བ་དང་བྱམས་བརྩེའི་ཉམས་ལེན་སྐོར་བཀའ་སློབ་སྩལ་བ་དེ་དག་གཙོས་པའི་མཉམ་གནས་ཀྱི་རིན་ཐང་ལ་ང་ཚོའི་དམ་བཅའ་བསྐྱར་ནན་འཛིན་གྱི་ཡོད་པའི་རྣམ་པ་མཚོན་གྱི་ཡོད་པ་གསུངས་འདུག
གཞི་རྩའི་སྔ་ལོར་སྐས་འཛེགས་མ་ཎི་ནས་མོན་རྟ་དབང་བར་ Freedom Trail of His Holiness the 14th Dalai Lama ཞེས་པའི་ཉིན་དྲུག་རིང་གི་གོམ་བགྲོད་དང་པོ་དང་འབྲེལ་༸གོང་ས་༸སྐྱབས་མགོན་ཆེན་པོ་མཆོག་གིས་གོམ་བགྲོད་པ་ཡོངས་ལ་ཐུགས་རྗེ་ཆེ་ཞུའི་གསུང་འཕྲིན་སྩལ་ཡོད་པའི་ནང་། ངོས་ཀྱི་གོམ་འགྲོད་འདི་ནས་བཟུང་ནས་ད་བར་རྒྱ་གར་འཕགས་པའི་ཡུལ་དེ་བཞིན་ངའི་ནང་གཉིས་པ་ལྟ་བུར་ཆགས་ཡོད་པ་དང་། ངོས་ནས་རྒྱལ་ཁབ་དེའི་ནང་སྡོད་པའི་རིང་རང་གི་རྒྱལ་ཁབ་ཤོར་བའི་གོད་ཆགས་ལྟ་བུ་ནི་ཕམ་ཁ་ལས་ལྷག་པའི་སྙིང་སྟོབས་ཅན་དུ་གྱུར་ཡོད་པ་དང་། གཞན་ལ་རོགས་རམ་བྱེད་པའི་ང་ཚོའི་ཆོད་སེམས་བསྐྱར་བཟོ་བྱེད་པའི་གོ་སྐབས་ཤིག་ཏུ་གྱུར་ཡོད་ཅེས་བཀའ་སྩལ་ཡོད་པ་རེད།
