དེང་སྐབས་རྒྱ་གར་གྱི་ས་ཁུལ་འདྲ་མིན་ནང་ཆར་ཞོད་ཀྱི་གོ་ཆག་འོག་མི་རྒྱུ་གཉིས་ཀར་དཀའ་ངལ་ཧ་ཅང་ཆེན་པོ་འཕྲད་བཞིན་པའི་དུས་སྐབས་འདིར་ཧི་མཱ་ཅལ་མངའ་སྡེའི་ཤིམ་ཁུལ་དུ་ཁ་སང་སླར་ཡང་ཆར་ཞོད་ཀྱི་གོ་ཆག་ཤུགས་ཆེར་ཕོག་པའི་འོག་མི་གྲངས་ ༥༠ ཙམ་གྱི་ཚེ་སྲོག་ཤོར་བའི་གནས་ཚུལ་ཐོན་ཡོད་སྟབས། དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཞི་བའི་ཚལ་གྱི་ཕོ་བྲང་དགེ་འཕེལ་གླིང་ནས་ཧི་མཱ་ཅལ་མངའ་སྡེའི་བློན་ཆེན་མཆོག་གི་མཚན་ཐོག་ཏུ་སླར་ཐུགས་གསོའི་གསུང་འཕྲིན་ཞིག་སྩལ་འདུག
གསུང་འཕྲིན་དེའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༦༠ ནས་བཟུང་སྟེ་མགོན་པོ་༸གང་ཉིད་མཆོག་ཧི་མཱ་ཅལ་མངའ་སྡེ་ནང་དུ་ཐུགས་དགྱེས་ཚོར་ཆེན་པོའི་ཐོག་ནས་ལོ་བཅུ་ཕྲག་དྲུག་ལྷག་གི་རིང་ལ་༸སྐུ་བཞུགས་མཛད་ཀྱི་ཡོད་སྟབས་ མངའ་སྡེ་འདིའི་མང་ཚོགས་རྣམས་དང་དམིགས་བསལ་གྱི་མཛའ་འབྲེལ་ཟབ་པོ་ཡོད་ཅེས་བཀའ་སྩལ་བསྐྱར་ནན་མཛད་འདུག
མགོན་པོ་༸གང་ཉིད་མཆོག་གིས་ཆར་ཞོད་ཀྱི་གོད་ཆག་འོག་མང་ཚོགས་ཚོའི་ཚེ་སྲོག་ཤོར་བ་སོགས་འབྱུང་བའི་གནོད་འཚེ་ཕོག་པར་ཐུགས་ཕམ་ཆེན་པོས་ཤུལ་ལུས་ནང་མི་སྤུན་མཆེད་དང་མངའ་སྡེའི་མི་མང་ཡོངས་ལ་ཐུགས་གསོ་དང་ཐུགས་སྨོན་མཛད་འདུག
༸གོང་ས་༸སྐྱབས་མགོན་ཆེན་པོ་མཆོག་གིས་མངའ་སྡེ་གཞུང་དང་སྒྲིག་འཛུགས་ཁག་གིས་ཀྱང་ས་གནས་ཁག་ཏུ་ཛ་དྲག་ཉེན་སྐྱོབ་དང་ངལ་སེལ་གྱི་ལས་གཞི་ཚགས་ཚུད་ངང་སྤེལ་བཞིན་ཡོད་པ་མཁྱེན་རྟོགས་ཡོད་ཅེས་བཀའ་སྩལ་བ་དང་ཆབས་ཅིག ཧི་མཱ་ཅལ་མངའ་སྡེའི་མང་ཚོགས་རྣམས་ལ་གདུང་སེམས་མཉམ་བསྐྱེད་མཚོན་ཕྱིར་ཏཱ་ལའི་བླ་མའི་དགེ་རྩ་ནས་ངལ་སེལ་རོགས་དངུལ་གསོལ་སྩལ་མཛད་རྒྱུའི་བཀའ་སྩལ་དང་བཅས་ཐུགས་སྨོན་མཚམས་སྦྱོར་མཛད་འདུག
