Monthly Archives: June, 2017

རྒྱལ་སྤྱིའི་མནར་གཅོད་བཀག་འགོག་ཉིན་མོ་དང་སྟབས་བསྟུན། བཞུགས་སྒར་དུ་རྟེན་གཞི་བྱས་པའི་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་གོ་སྒྲིག་འོག་དེ་རིང་སྔ་དྲོ་མེག་གྷན་ཉིན་སློབ་ཏུ་ International Day in Support of Victims of Torture ཞེས་རྒྱལ་སྤྱིའི་མནར་གཅོད་འོག་ལྷུང་པ་རྣམས་ལ་རྒྱབ་སྐྱོར་གྱི་ཉིན་མོ་ཞེས་སྲུང་བརྩི་ཞུས་སོང་། ཚོགས་པ་དེའི་ངོས་ནས་དེ་སྔ་དང་མི་འདྲ་བར་གཙོ་བོ་བོད་ཀྱི་མི་རབས་གསར་པ་རྣམས་ཀྱི་ཁྲོད་དུ་བོད་ནང་གི་གནས་སྟངས་ཐད་ལ་གོ་རྟོགས་དང་འཆར་སྣང་ཇི་འདྲ་ཡོད་མེད་ཤེས་རྟོགས་ཐུབ་རྒྱུ་དང་། བོད་ནང་གི་ཆབ་སྲིད་བཙོན་པའི་གནས་སྟངས་དང་འདི་བཞིན་ད་ལྟའི་བོད་ཀྱི་གནས་སྟངས་རྣམས་གསལ་བཤད་ཐུབ་ཐབས་སོགས་ལ་ཆེད་དམིགས་ཀྱིས་དེ་རིང་ཟླ་ ༦ ཚེས་ ༢༦ ཉིན་སྔ་དྲོ་ཚོུད་ ༩།༣༠ སྟེང་བོད་ཀྱི་དཔའ་བོ་དྲན་པ། མི་རབས་གསར་པའི་སེམས་ཁམས་ཀྱི་འཆར་སྣང་ཞེས་པའི་བརྗོད་གཞིའི་ཐོག་ལ་རི་མོ་འགྲན་སྡུར་གྱི་ལམ་ནས་སྲུང་བརྩི་ཞུས་སོང་པ་དང་། ལས་འགུལ་དེའི་ནང་ཉིན་མོ་སློབ་གྲྭའི་འཛིན་རིམ་བཞི་པ་དང་ལྔ་པ། དཔེ་སྟོན་སློབ་གྲྭའི་འཛིན་རིམ་དྲུག་པ་ནས་བརྒྱད་པ་བཅས་ཀྱི་སློབ་ཕྲུག་བརྒྱ་སྐོར་ཙམ་ཞིག་ནས་མཉམ་ཞུགས་གནང་འདུག དེ་རིང་སློབ་མ་རྣམས་ནས་རང་ཉིད་ཀྱི་འཆར་སྣང་གང་ཡོད་ཐོག་བྲིས་པའི་བོད་ཀྱི་རྣམ་པ་དང་འབྲེལ་བའི་པར་རིས་དེ་དག་ཁྲོད་ནས་ཡག་ཤོས་གསུམ་ལ་ལེགས་གསོའི་བྱ་དགའ་དང་། དེ་བཞིན་པར་རིས་རྣམས་མང་ཚོགས་ལ་འགྲེམས་སྟོན་ཡོད་པ་མ་ཟད། པར་རིས་ཁག་ཅིག་ཚོགས་པ་དེས་འདོན་སྤེལ་བྱེད་བཞིན་པའི་སྟོད་ཐུང་སོགས་ཀྱི་སྟེང་ལ་བཀོད་གནང་རྒྱུ་རེད་འདུག གཞི་རྩའི་རི་མོ་འགྲན་སྡུར་གྱི་ལས་རིམ་དེ་འགོ་འཛུགས་མ་གནང་པའི་གོང་དུ་སློབ་མ་རྣམས་ལ་བོད་ཀྱི་ཆབ་སྲིད་བཙོན་པའི་གནས་སྟངས་ཤེས་རྟོགས་ཆེད་དུ་བོད་ཀྱི་ཆབ་སྲིད་བཙོན་ཟུར་ཚེ་རིང་བསམ་གྲུབ་ལགས་དང་བསྟན་འཛིན་རྣམ་རྒྱལ་ལགས། དེ་བཞིན་ཕུན་ཚོགས་ལམ་སྒྲོན་ལགས་བཅས་ཀྱི་མི་ཚེ་ལོ་རྒྱུས་དང་འབྲེལ་བའི་བརྙན་ཐུང་ཁག་ཅིག་གཟིགས་འབུལ་ཞུས་ཡོད་པ་རེད། རྩ་བའི་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་འཕེལ་ལྟེ་གནས་ཁང་གིས་འདོན་སྤེལ་གནང་པའི་བོད་མི་གང་བྱུང་འཛིན་བཟུང་དང་བཀག་ཉར་ཐད་ཀྱི་དམིགས་བསལ་སྙན་ཐོ་དང་ལྟེ་གནས་ཁང་གི་ཕྱི་ལོ་ ༢༠༡༦ ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་ལོ་འཁོར་སྙན་ཐོ་བཅས་ལ་གཞིགས་ཚེ་རྒྱ་ནག་གཞུང་གིས་ད་བར་བོད་མི་ ༡༣༠༠ བརྒལ་བར་ཁྲིམས་མཐུན་མིན་པའི་ཐོག་ནས་གང་བྱུང་འཛིན་བཟུང་བཙན་འཁྲིད་བྱས་ཡོད་པ་དང་། དེ་དག་གི་ཁྲོད་ནས་ཁག་ཅིག་ལ་མི་སྤྱོད་ལས་འདས་པའི་རྡུང་རྡེག་དང་བཙན་ཤེད་བྱས་ཏེ་ནག་ཉེས་ཁས་ལེན་བྱེད་དུ་བཅུག་བཞིན་ཡོད་པ་མ་ཟད། ཕྱི་ལོ་ ༡༩༩༡ ནས་ད་བར་གྱི་བོད་མི་ཆབ་སྲིད་བཙོན་པའི་གྲངས་ཚད་དེ་བཞིན་ ༥༠༠༠ ལྷག་ཆགས་ཡོད་པ་དང། འདས་པའི་ཕྱི་ལོ་ ༢༠༡༥ དང་༢༠༡༦ ནང་དུ་རྒྱ་གཞུང་གིས་བོད་མི་ ༡༤༡ འཛིན་བཟུང་གིས་ཟླ་བ་རེ་རེར་བོད་མི་ལྔ་ལྷག་འཛིན་བཟུང་བྱེད་བཞིན་པའི་གནས་སྟངས་སུ་འགྱུར་ཡོད་པ་རེད། བོད་ཀྱི་དགུ་བཅུ་གསུམ་ལས་འགུལ་ཚོགས་པས་དེ་རིང་རྒྱལ་སྤྱིའི་མནར་གཅོད་འོག་ལྷུང་པ་རྣམས་ལ་རྒྱབ་སྐྱོར་གྱི་ཉིན་མོ་སྲུང་བརྩི་ཞུས་པ་དང་སྦྲགས་ཏེ། བོད་ནང་གི་ཆབ་སྲིད་བཙོན་པ་རྣམས་ལ་གདུང་སེམས་མཉམ་བསྐྱེད་མཚོན་ཆེད་དང་། རྒྱ་གཞུང་གིས་བོད་ནང་དྲག་པོའི་སྲིད་བྱུས་མུ་མཐུད་ལག་བསྟར་བྱེད་བཞིན་པར་ངོ་རྒོལ་སླད་མེག་གྷན་ཁྲོམ་གཞུང་ནས་ཐེག་ཆེན་ཆོས་གླིང་གཙུག་ལག་ཁང་གི་ཉེ་འདབས་སུ་ཡོད་པའི་དཔའ་བོའི་རྡོ་རིང་བར་མར་མེ་ཁྲོམ་སྐོར་ཞིག་ཀྱང་གནང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རི་མི་ནེ་སོ་ཊ་མངའ་སྡེའི་ནང་གི་མཛད་འཕྲིན་ཁག་ལེགས་པར་གྲུབ་ཏེ་ཁ་སང་ཚེས་པ་ ༢༥ ཉིན་བོས་ཊོན་གྲོང་ཁྱེར་ནང་ཆིབས་སྒྱུར་གྱིས་ས་གནས་བོད་མི་ཚོར་ང་ཚོ་རྒྱ་གཞུང་གི་སྒྲོམ་གཞི་འོག་དཔུང་པ་མཉམ་གཤིབ་ཐོག་འགྲོ་ཐུབ་ཚེ་དགེ་མཚན་ཆེ་བར་གཟིགས་ཀྱི་འདུག་ཅེས་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ནང་ཨ་རིའི་མངའ་སྡེ་ཁག་གསུམ་གྱི་ནང་ཉིན་གྲངས་བཅུའི་རིང་མཛད་རིམ་བསྐྱངས་པའི་ཁྲོད། ཁ་སང་བོས་ཊོན་གྲོང་ཁྱེར་ནང་༸ཞབས་སོར་འཁོད་བསྟུན་ས་གནས་བོད་རིགས་གཙོ་བོར་གྱུར་པའི་བོད་མི་བརྒྱ་ཕྲག་ཁ་ཤས་ཀྱིས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས་པ་མ་ཟད། སྐབས་དེར་མགོན་པོ་མཆོག་གི་བཞུགས་གནས་གསོལ་མགྲོན་ཁང་དུ་༸ཞབས་སོར་འཁོད་མཚམས་སུ་ཨ་རིའི་ Massachusetts མངའ་སྡེའི་སྤྱི་ཁྱབ་པའི་སྐུ་ཚབ་དང་ས་གནས་ Boston གྲོང་ཁྱེར་སྤྱི་ཁྱབ་པ་བཅས་ནས་གཞུང་འབྲེལ་གྱི་ཕེབས་བསུ་ཞུས་འདུག ཁ་སང་སྔ་དྲོ་༸གོང་ས་མཆོག་ནས་བོས་ཊོན་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་གྲོང་ཁྱེར་དེའི་ Sheraton མགྲོན་ཁང་དུ་ས་གནས་བོད་རིགས་དང་དེ་བཞིན་ཁུལ་གཞན་ནས་ཕེབས་པའི་མི་གྲངས་ ༢༠༠༠ ཙམ་ལ་དམིགས་བསལ་མཇལ་ཁ་དང་བཀའ་སློབ་བསྩལ་པའི་ཁྲོད། མགོན་པོ་༸གང་ཉིད་མཆོག་གིས་ང་ཚོ་ད་བར་ལོ་ངོ་ ༥༨ རིང་ལ་བོད་མི་རིགས་ཀྱི་རིག་གཞུང་དང་བཅས་པ་ཛ་དྲག་ཆེ་བའི་གནས་སྟངས་ཤིག་གི་འོག་ཏུ་ལྷུང་བའི་དུས་ཡུན་འདིའི་ཁྲོད་གཙོ་བོ་གཞིས་ལུས་རྒྱ་ཆེ་མང་ཚོགས་ཀྱི་ལྷག་བསམ་དང་མི་རིགས་ཀྱི་ཞེན་ཁོག་གཡོ་བ་མེད་པ་དང་། དེ་བཞིན་བཙན་བྱོལ་ནང་དུའང་བོད་མི་ཚོས་རང་ཉིད་བོད་པ་ཞིག་ཡིན་པའི་འདུ་ཤེས་འགྱུར་མེད་གནས་པར་བསྔགས་བརྗོད་མཛད་པ་དང་ཆབས་ཅིག ང་ཚོ་མི་རབས་གསར་པ་ཚོས་བོད་གཞིས་ལུས་རྒྱ་ཆེ་མི་མང་གི་སེམས་ཤུགས་འཁྱེར་བའི་ཐོག་ནས་བོད་ཀྱི་ཆོས་དང་རིག་གཞུང་། སྐད་ཡིག་བཅས་པར་དང་དོད་གནང་རྒྱུ་གནད་ཆེ་རེད་ཅེས་ལམ་སྟོན་མཛད་འདུག ལྷག་དོན་མགོན་པོ་༸གང་ཉིད་མཆོག་གིས་ད་ལྟ་འཛམ་གླིང་འདི་འགྱུར་བ་འགྲོ་བཞིན་ཡོད་པས་མ་འོངས་པར་འཛམ་གླིང་གི་མདུན་ལམ་འདི་ཕན་ཚུན་མཉམ་རུབ་བྱེད་ནས་འགྲོ་དགོས་པ་མ་གཏོགས་ཕན་ཚུན་ཁ་གྱེས་ན་ཕན་ཐོགས་གང་ཡང་ཡོད་མ་རེད་ཅེས་བཀའ་བསྩལ་བ་དང་སྦྲགས།  བོད་མི་ཚང་མས་གངས་ཅན་པ་གཅིག་གྱུར་གྱི་འདུ་ཤེས་འཛིན་པའི་ཐོག་ནས་སྐྱིད་སྡུག་དང་ལེགས་ངན་གང་ཞིག་བྱུང་རུང་ཆོས་ཁ་གསུམ་པོ་གཅིག་སྒྲིལ་དགོས་གལ་ཡིན་པ་བཀའ་བསྩལ་འདུག ཁྱད་པར་དུ་ང་ཚོའི་ཁྲོད་ཁག་ཅིག་གིས་རང་བཙན་རྩོད་རྒྱུ་དེས་བོད་མི་དུམ་བུ་གཅིག་ལ་ཁེ་ཕན་བསྐྲུན་པ་མ་གཏོགས་བོད་ཡོངས་རྫོགས་གཅིག་ཏུ་སྒྲིལ་རྒྱུར་དཀའ་ལས་ཁག་པོ་ཡིན་པར་བརྟེན་བོད་མི་རྣམས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྒྲོམ་གཞི་འོག་ཞུགས་ཏེ་བོད་ཆོལ་ཁ་གསུམ་པོ་དཔུང་པ་མཉམ་གཤིབ་ཐོག་འགྲོ་ཐུབ་ཚེ་དགེ་མཚན་ཆེ་བར་གཟིགས་ཀྱི་འདུག་ཅེས་བཀའ་བསྩལ་འདུག ༸གོང་ས་མཆོག་ནས་ Boston ནང་དུ་བོད་མི་ཚོར་བཀའ་སློབ་བསྩལ་རྗེས་གྲོང་ཁྱེར་དེའི་ནང་རྟེན་གཞི་བྱས་པའི་ Healthy mind ལྟེ་གནས་ཁང་དུ་ཚན་རིག་པ་དང་མཁས་པ་ཁག་ཅིག་གི་ལྷན་དུ་བྱམས་པ་དང་སྙིང་རྗེ། བཟང་སྤྱོད་གོང་འཕེལ་གཏོང་ཕྱོགས་སྐོར་གྱི་ཚོགས་འདུར་དབུ་བཞུགས་མཛད་ཡོད་པ་རེད། རྩ་བའི་མགོན་པོ་༸གང་ཉིད་མཆོག་ནས་བོས་ཊོན་ནང་ཆིབས་བསྒྱུར་མ་བསྐྱང་གོང་སྟེ་ཕྱི་ཚེས་ ༢༡ ཉིན་Minnesota མངའ་སྡེའི་ Minneapolis གྲོང་ཁྱེར་ནང་ཆིབས་སྒྱུར་གྱིས་ཁུལ་དེར་རྟེན་གཞི་བྱས་པའི་Starkey Hearing བཟོ་ཁང་ཁང་དུ་ཆིབས་བསྒྱུར་གྱིས་བཟོ་ཚོང་ཁང་དེའི་ལས་བྱེད་ཚོར་བཀའ་སློབ་དང་དེ་ནས་ཚེས་པ་ ༢༤ ཉིན་མི་ནེ་སོ་ཊ་མངའ་ཁུལ་གྱི་བོད་མི་ཚོར་བཀའ་སློབ་བསྩལ་བ་སོགས་ཀྱི་མཛད་འཕྲིན་ཁག་ཅིག་བསྐྱངས་ཡོད་པ་རེད། མཛད་འཆར་ལྟར་ན། དེ་རིང་ཕྱི་དྲོ་༸གོང་ས་མཆོག་ཨ་རི་ Boston ནས་ Frankfurt བརྒྱུད་རྒྱ་གར་ཕྱོགས་སུ་ཆིབས་ཐོན་གནང་གི་ཡོད་པ་དང་། ཚེས་ ༢༨ ཉིན་རྒྱ་གར་བྱང་ཕྱོགས་ཇཱ་མུ་དང་ཀཤྨིར་མངའ་སྡེའི་ལ་དྭགས་ས་གནས་སུ་ཆིབས་བསྒྱུར་བསྐྱང་སྟེ་ཆོས་འབྲེལ་གྱི་མཛད་འཆར་ཁག་ཅིག་ཐུགས་གཏན་འཁེལ་ཡོད་པ་མ་ཟད། ཁུལ་དེར་མགོན་པོ་༸གང་ཉིད་མཆོག་དབུ་བཞུགས་ཐོག་ལ་དྭགས་མི་དམངས་དང་ས་གནས་བོད་མི་རྣམས་ནས་༸སྐུའི་འཁྲུངས་སྐར་དུས་ཆེན་རྒྱས་པ་སྲུང་བརྩི་ཞུ་རྒྱུ་རེད་འདུག

ཉན་པ།: Listen ཕབ་ལེན། Download ༸གོང་ས་མཆོག་གིས་རྒྱ་ནག་མཉམ་དུ་དཔུང་པ་མཉམ་གཤིབ་ཐོག་བསྐྱོད་ཐུབ་ཚེ་དགེ་མཚན་ཆེ་བར་གཟིགས་ཀྱི་ཡོད་པ་བཀའ་བསྩལ་འདུག བཞུགས་སྒར་དུ་རྒྱལ་སྤྱིའི་མནར་གཅོད་འོག་ལྷུང་བ་རྣམས་ལ་རྒྱབ་སྐྱོར་གྱི་ཉིན་མོ་སྲུང་བརྩི། སྐུ་ཞབས་ Liu Xiaobo ལགས་ལ་འབྲས་ནད་ཕོག་པའི་འོག་བཙོན་གྲོལ་བཏང་འདུག བྱང་རྩེ་ཆོས་རྗེ་རིན་པོ་ཆེ་མཆོག་དགའ་ལྡན་ཁྲི་ཐོག་ ༡༠༤ པར་བསྐོ་གཞག་མཛད་པ། བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་མགྲིན་ཚབ་པ་དང་གསར་འགོད་འབྲེལ་མཐུད་པའི་ཚོགས་འདུ། དཔལ་༸རྒྱལ་དབང་ཀརྨ་པ་རིན་པོ་ཆེའི་འཁྲུངས་སྐར་སྲུང་བརྩི། བཞུགས་སྒར་དུ་རྒྱལ་སྤྱིའི་སྨྱོ་རྫས་ངན་གོམས་ཉིན་མོ་སྲུང་བརྩི་ཞུས་པ། Monday 26/06/2017 Dalai Lama address a gathering of 2000 Tibetans at Boston Exile Tibetans express solidarity to torture victims in Tibet Jailed Nobel laureate Liu Xiaobo granted parole after terminal cancer diagnosis Jangtse Choejey Jetsun Lobsang Tenzin Palsangpo appointed 104th Gaden Tripa CTA holds media coordinators’ meet Karmapa’s birthday celebrated at Kagyu Monastery in South India Dharamsala marks International day against drug abuse with marathon

དེ་རིང་ཟླ་ ༦ ཚེས་ ༢༦ ཉིན་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པར་གཞིགས་ན། རྒྱ་ནག་གཞུང་གིས་འགྲོ་བ་མིའི་ཐོབ་ཐང་འཐབ་རྩོད་པ་དང་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་ལ་སྨན་བཅོས་ཀྱི་ཐོབ་ཐང་འོག་བཙོན་ཁང་ནས་གློད་བཀྲོལ་བཏང་འདུག ཁོང་གི་གཅེན་པོ་ Liu Xiaoguang ལགས་དང་ཁྲིམས་རྩོད་པ་ Mo Shaoping ལགས་རྣམ་གཉིས་ཀྱིས་གསར་ཁང་ཁག་ཏུ་འགྲེལ་བརྗོད་གནང་དོན། ཟླ་བ་སྔོན་མའི་ཕྱི་ཚེས་ ༢༣ ཉིན་སྐུ་ཞབས་ Liu Xiaobo ལགས་ལ་མཆིན་པའི་འབྲས་ནད་ཕོག་ཡོད་པ་ཤེས་གཏོགས་ཐུབ་རྗེས། ཁོང་གི་སྨན་བཅོས་དེ་བཞིན་རྒྱ་གཞུང་གི་བཙོན་ཁང་ནང་དུ་གནང་པ་མ་ཡིན་པར་ཕྱི་ཕྱོགས་སུ་བྱ་རྒྱུའི་འབོད་སྐུལ་ཞུས་པ་ལྟར། རྒྱ་གཞུང་གིས་ཁོང་ལ་སྨན་བཅོས་ཀྱི་ཐོབ་ཐང་འོག་གློད་བཀྲོལ་བཏང་དོན་ལྟར་ད་ལྟའི་ཆར་ཁོང་རྒྱ་ནག་གི་ Liaoning ཞིང་ཆེན་གྱི་གྲོང་ཁྱེར་ Shenyang ནང་དུ་སྨན་བཅོས་གནང་བཞིན་ཡོད་པ་རེད་འདུག དེ་རིང་སྐུ་ཞབས་ Liu Xiaobo ལགས་ལ་མཆིན་པའི་འབྲས་ནད་ཕོག་པའི་གནས་ཚུལ་ཕྱིར་གྱར་བྱུང་མ་ཐག་དབྱིན་ཡུལ་ནང་རྟེན་གཞི་བྱས་པའི་རྒྱལ་སྤྱིའི་ཉེས་ཡངས་ཚོགས་པའི་ངོས་ནས་རྒྱ་ནག་གཞུང་གིས་སྐུ་ཞབས་ Liu Xiaobo ལགས་ལ་སྨན་བཅོས་གནང་དགོས་པའི་ཐད་ལ་དགོས་ངེས་ཀྱི་མཐུན་རྐྱེན་དང་རོགས་རམ་ཁག་གནང་དགོས་པ་མ་ཟད། ད་ལྟ་རྒྱ་གཞུང་གི་བཙོན་ཁང་ནང་ཡོད་པའི་འགྲོ་བ་མིའི་ཐོབ་ཐང་སྲུང་སྐྱོབ་པ་རྣམས་ཆ་རྐྱེན་གང་ཡང་མེད་པར་གློད་བཀྲོལ་ཐོངས་དགོས་ཞེས་གསུངས་འདུག གཞི་རྩའི་སྐུ་ཞབས་ Liu Xiaobo ལགས་ནི་རྒྱ་ནག་ནང་འགྲོ་བ་མིའི་ཐོབ་ཐང་དང་མང་གཙོ་སོགས་ཀྱི་ཐད་ལ་ཕྱག་ལས་བསྟུད་མར་གནང་སྟབས། རྒྱ་གཞུང་གིས་ ༢༠༠༩ ལོར་ཁོང་རྒྱལ་ཁབ་ཀྱི་སྲིད་དབང་མགོ་རྟིང་སློག་ཐབས་བྱས་པའི་ནག་ཉེས་འོག་ལོ་ངོ་བཅུ་གཅིག་རིང་བརྩོན་འཇུག་གི་ཁྲིམ་ཐག་བཅད་ཡོད་པ་དང་། ཕྱི་ལོ་ ༢༠༡༠ ལོར་ཁོང་གིས་གནང་ཁག་ལ་རྒྱལ་སྤྱའི་ཐོག་ནས་ཆེ་བསྟོད་དང་སྦྲགས་ནོ་སྦེལ་ཞི་བདེའི་གཟེངས་སྟགས་ཕུལ་ཡོད་པ་རེད། དེ་བཞིན་ཕྱི་ལོ་ ༢༠༠༨ ལོར་བོད་ཆོལ་ཁ་གསུམ་པོ་ཁྱོན་ཡོངས་ནས་རྒྱ་གཞུང་ལ་ཞི་རྒོལ་གནང་རྗེས། ཁོང་གིས་རྒྱ་གཞུང་ནས་བོད་ཐོག་འཛིན་པའི་སྲིད་བྱུས་ལ་སྐྱོན་བརྗོད་དང་༸གོང་ས་མཆོག་གིས་འདོན་གནང་མཛད་པའི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཡང་གནང་མྱོང་ཡོད་པ་མ་ཟད། ༸གོང་ས་མཆོག་ནས་ཀྱང་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་མི་སྣ་གཞན་ཁག་ཅིག་དང་ལྷན་དུ་ཁོང་བཙོན་ཁང་ནས་མགྱོགས་མྱུར་གློད་བཀྲོལ་དགོས་པའི་འབོད་སྐུལ་གནང་མྱོང་ཡོད་པ་རེད།  

བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་མགྲིན་ཚབ་པ་དང་གསར་འགོད་འབྲེལ་མཐུད་པའི་ཚོགས་འདུའི་ཐོག་ལ་སྲིད་སྐྱོང་བློ་བཟང་སེང་གེ་མཆོག་གིས་བོད་མིའི་སྒྲིག་འཛུགས་ཀྱི་ལས་དོན་ཁག་བོད་ཕྱི་ནང་གཉིས་ཀྱི་མང་ཚོགས་དང་རྒྱལ་སྤྱིའི་ཁྲོད་ལ་སྟོན་ཐུབ་པ་ཞིག་བཟོ་དགོས་ཞེས་གསུངས་སོང་། དེ་རིང་ཟླ་ ༦ ཚེས་ ༢༦ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་མགྲིན་ཚབ་པ་དང་གསར་འགོད་འབྲེལ་མཐུད་པ་རྣམས་ཀྱི་ལས་དོན་ནུས་པ་ལྡན་པ་དང་སྒྲིག་འཛུགས་ཀྱི་ལས་དོན་ཁག་སྤུས་ཚད་ལྡན་པའི་ཐོག་བརྒྱུད་ལམ་སྟེང་ཕྱིར་བསྒྲགས་ཡོང་ཐབས་དང་འབྲེལ་ཚོགས་འདུ་དང་ཟབ་ཁྲིད་ཀྱི་ལས་རིམ་ཞིག་ཚོགས་ཡོད་པ་རེད། བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་དང་སྲིད་སྐྱོང་གཅིག་ལྕོགས་བློ་བཟང་སེང་གེ་མཆོག་གིས་རིང་མིན་བོད་མིའི་སྒྲིག་འཛུགས་ཀྱི་གསར་འགྱུར་བརྒྱུད་ལམ་ཁག་རྒྱ་སྐྱེད་གཏོང་རྒྱུ་སྤྱི་དང། བོད་མིའི་སྒྲིག་འཛུགས་ཀྱི་བརྙན་འཕྲིན་ཚན་པ་དེ་ཡང་བཙན་བྱོལ་ནང་གི་བརྙན་འཕྲིན་གསར་འགྱུར་ཚན་པ་ཆེ་ཤོས་ཤིག་བཟོ་རྒྱུ་ཡིན་པ་མ་ཟད། ཚན་པ་དེའང་ཚོུད་ ༢༤ རིང་སྟོན་ཐུབ་པ་ཞིག་བཟོ་རྒྱུ་ཡིན་ཞེས་གསུངས་པ་དང་ཆབས་ཅིག འབྲེལ་ཡོད་ཚང་མའི་ངོས་ནས་ནུས་པ་མཉམ་སྤུངས་ཀྱིས་སྤུས་ཚད་ལྡན་པའི་གསར་འགྱུར་འགོད་སྤེལ་བྱུ་རྒྱུ་ནི་ཆེས་གལ་ཆེ་ཞིག་ཆགས་ཡོད་པ་གསུངས་སོང་། ལྷག་པར་དུ་ད་ལྟའི་ཆར་རྒྱ་ནག་གཞུང་གི་ངོས་ནས་རྒྱལ་སྤྱིའི་ཐོག་ལ་གསར་འགྱུར་བརྒྱུད་ལམ་སྟེང་ནས་ཚགས་ཚུད་པོས་སྤེལ་བཞིན་པའི་འཁྱོག་བཤད་ཁག་ལ་གདོང་ལེན་བྱ་ཕྱིར་བོད་མིའི་སྒྲིག་འཛུགས་ཀྱི་ངོས་ནས་སྒྲིག་འཛུགས་ཀྱི་ངོ་བོ་དང་དེ་བཞིན་བཙན་བྱོལ་ནང་གི་མང་ཚོགས་རྣམས་ལ་སྤེལ་བཞིན་པའི་ཤེས་ཡོན་དང་འཕྲོད་བསྟེན། མང་ཚོགས་ཀྱི་བདེ་སྡུག གཞན་ཡང་ཆབ་སྲིད་སོགས་ཀྱི་ལས་དོན་ཁག་བོད་ཕྱི་ནང་གཉིས་ཀྱི་མང་ཚོགས་དང་རྒྱལ་སྤྱིའི་ཁྲོད་ལ་སྤུས་ཚད་ལྡན་པ་ཞིག་དང་ངོས་འཛིན་ཐུབ་པ་ཞིག་བཟོ་དགོས་གལ་ཡིན་པ་གསུངས་ཡོད་པ་རེད། ད་རེས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་གོ་སྒྲིག་ཞུས་པའི་ཉིན་གཅིག་གི་ཟབ་ཁྲིད་དེའི་ཐོག་ལ་རྒྱ་གར་གྱི་ Times of India དང་། Wire གསར་ཁང་གི་གསར་འགོད་པ་ཤོ་བྷན་སག་སེ་ན་མཆོག་དང་འདི་ལས་ནོར་ཝེ་བོད་ཀྱི་རླུང་འཕྲིན་ཁང་གི་སྤྱི་ཁྱབ་རྩོམ་སྒྲིག་པ་བསྟན་འཛིན་དཔལ་སྒྲོན་ལགས། གཞན་ཡང་བོད་མིའི་སྒྲིག་འཛུགས་ཕྱི་དྲིལ་གསར་འགྱུར་ཚན་པའི་འགན་འཛིན་སོགས་ནས་ལྷན་ཁང་ཁག་གི་མགྲིན་ཚབ་པ་དང་། གསར་འགོད་འབྲེལ་མཐུད་པ་ཚོར་གནས་ཚུལ་ཁྱབ་སྤེལ་བྱེད་ཕྱོགས་དང། སྒྲིག་འཛུགས་དང་བརྒྱུད་ལམ་ཁག་གི་འབྲེལ་བ། དྲ་རྒྱ་དང་སྤྱི་ཚོགས་འབྲེལ་མཐུན་བརྒྱུད་ནས་གནས་ཚུལ་འགོད་སྤེལ་བྱེད་ཐབས་སོགས་ཀྱི་སྐོར་ཟབ་ཁྲིད་དང་གོ་བསྡུར་གནང་ཡོད་པ་རེད། འདི་ག་རླུང་འཕྲིན་ཁང་ནས་དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས་སུ་བཅར་འདྲི་ཞུས་པར་ཁོང་གིས་བརྒྱུད་ལམ་ཐོག་གནས་ཚུལ་འགོད་སྤེལ་བྱ་རྒྱུའི་ཐབས་བྱུས་བསྐྱར་བཟོ་དང་སྤྱི་ཚོགས་དྲ་རྒྱའི་དུས་སྐབས་འདིར་སྒྲིག་འཛུགས་ཀྱི་ངོས་ནས་གནས་ཚུལ་ཁག་མང་ཚོགས་ལ་དུས་ཐོག་ཏུ་གནང་ཐུབ་པ་བྱེད་ཡག་ལ་ཚོགས་འདུ་འདི་ལྟ་བུ་ཚོགས་གལ་ཡིན་པ་གསུངས་སོང་། རྩ་བའི་དེ་སྔ་བོད་མིའི་སྒྲིག་འཛུགས་ཀྱི་ལྷན་ཁང་ཁག་སོ་སོའི་ལས་དོན་དང་འབྲེལ་བའི་མགྲིན་ཚབ་པ་དང་གསར་འགོད་འབྲེལ་མཐུད་པ་ཡོད་པ་དང་།  ད་རེས་མགྲིན་ཚབ་པ་དང་ལྷན་ཁང་ཁག་གི་སྐུ་ཚབ་རྣམས་མཉམ་འཛོམས་ཀྱིས་ཕན་ཚུན་དབར་གྲོས་བསྡུར་དང་ཟབ་ཁྲིད་གནང་པ་དེ་ཆེས་ཐོག་མ་ཆགས་ཀྱི་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་ ༦ ཚེས་ ༡༢ ཉིན་བྱང་རྩེ་ཆོས་རྗེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དགའ་ལྡན་ཁྲི་ཐོག་ ༡༠༤ པར་བསྐོ་གཞག་མཛད་འདུག ༸གོང་ས་མཆོག་ནས་ཟླ་བ་འདིའི་ཚེས་ ༡༢ ཉིན་དགའ་ལྡན་ཁྲི་ཐོག་ཁང་དུ་རིན་པོ་ཆེ་མཆོག་དགའ་ལྡན་ཁྲི་ཐོག་ ༡༠༤ པར་བསྐོ་གཞག་མཛད་པའི་བཀའ་ཡིག་ཕྱག་རྟགས་དངོས་སུ་བསྩལ་ཡོད་པ་དང་། དགའ་ལྡན་ཁྲི་ཐོག་ཁང་གིས་ཟླ་བ་འདིའི་ཚེས་ ༢༤ ཉིན་གནས་ཚུལ་དེ་ཡོངས་ཁྱབ་གསལ་བསྒྲགས་གནང་ཡོད་པ་རེད། འདི་ལོ་ཕྱི་ཟླ་ ༨ ཚེས་ ༤ སྟེ་བོད་ཟླ་ ༦ ཚེས་ ༡༢ ཉིན་དངོས་སུ་དགའ་ལྡན་ཁྲི་པའི་གསེར་ཁྲི་མངའ་གསོལ་གྱི་མཛད་སྒོ་ཚོགས་ཐུགས་གཏན་འཁེལ་འདུག འདི་ག་རླུང་འཕྲིན་ཁང་གི་གསར་འགོད་པར་བྱང་རྩེ་ཆོས་རྗེ་རྗེ་བཙུན་བློ་བཟང་བསྟན་འཛིན་མཆོག་གི་དགེ་ཕྲུག་དགེ་བཤེས་བློ་བཟང་ཐབས་མཁས་ལགས་ཀྱིས་རིན་པོ་ཆེ་མཆོག་དགའ་ལྡན་ཁྲི་ཐོག་ ༡༠༤ པར་བསྐོ་གཞག་མཛད་ཚུལ་དང་འདི་བཞིན་རིན་པོ་ཆེ་མཆོག་ནས་རྣམ་ཀུན་ཉམས་བཞེས་གནང་ཕྱོགས་སོགས་ཀྱི་སྐོར་འགྲེལ་བརྗོད་གནང་སོང་། རྩ་བའི་བྱང་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་བསྟན་འཛིན་མཆོག་ནི། ༡༩༣༥ ལོར་བོད་གཙང་སྟོད་ལྷ་རྩེ་ཁུལ་དུ་སྐུ་འཁྲུངས་པ་དང་། དགུང་ལོ་བཅུའི་སྐབས་༸གོང་ས་ལྔ་པ་ཆེན་པོས་ཕྱག་བཏབ་པའི་ལྷ་རྩེ་ཆོས་སྡེ་དགོན་དུ་སྒྲིག་ཞུགས་ཀྱིས་མཁན་ཆེན་བསྟན་འཛིན་རྒྱ་མཚོའི་དྲུང་ལས་ཚིགས་སྔ་མ་དགེ་ཚུལ་གྱི་སྡོམ་པ་བཞེས། དེ་ནས་དགོན་པའི་སྒྲིག་སྲོལ་ལྟར་ཆོས་སྤྱོད་རབ་གསལ་དང་རྒྱན་འཇུག་གཉིས་སོགས་ཐུགས་འཛིན་གནང་ནས་ཚོགས་རྒྱུགས་ཕུལ་ཏེ་སློབ་གཉེར་པའི་གྲལ་དུ་ཚུད། དེར་བློ་རྟགས་སོགས་ལ་སྦྱང་བརྩོན་གནང་བར་མ་ཟད། ༸གོང་ས་ལྔ་པ་ཆེན་པོས་མཛད་པའི་ཕར་ཕྱིན་དང་། དབུ་མ། འདུལ་མཛོད་བཅས་ཀྱི་རང་ལུགས་གང་ཡིན་ཐུགས་འཛིན་གནང་སྟེ་འདུས་མང་དབུས་སུ་ཚོགས་རྒྱུགས་ཕུལ་གནང་འདུག དགུང་ལོ་བཅུ་དྲུག་གི་སྐབས་སེར་བྱེས་གྲྭ་ཚང་དུ་སྒྲིག་ཞུགས་གནང་སྟེ་སེར་བྱེས་མཁན་ཟུར་ལྷུན་གྲུབ་ཐབས་མཁས་མཆོག་དང་དགེ་བཤེས་ངག་དབང་དགེ་འདུན་རྣམ་གཉིས་ཀྱིས་གཙོས་པའི་བཤེས་གཉེན་དུ་མའི་དྲུང་ནས་གཞུང་ཆེན་དག་ལ་བསླབ་པ་སློབ་གཉེར་གནང་འདུག ཕྱི་ལོ་ ༡༩༦༠ ལོར་བཙན་བྱོལ་དུ་ཕེབས་ནས་སྦག་ས་ཆོས་སྒར་དུ་མུ་མཐུད་སློབ་གཉེར་གནང་པ་དང་། དེ་རྗེས་སྦེལ་ཀོབ་བོད་མིའི་གཞིས་ཆགས་སུ་གནས་སྤོས་ཀྱིས་༸གོང་ས་མཆོག་གིས་བཀའ་འབྲེལ་ལྟར་སེར་བྱེས་གྲྭ་ཚང་གི་སྒྲིག་ཁོངས་སུ་ཞུགས་ནས་མུ་མཐུད་སློབ་གཉེར་གནང་པ་མ་ཟད། སྔ་ཕྱིར་གྲྭ་ཚང་གི་དཔེ་ཁྲིད་དགེ་རྒན་དང་མཁན་ཁྲིར་ཕེབས་པ་སོགས་ལས་གནས་མང་དག་གི་ཐུགས་འགན་བཞེས་མྱོང་ཡོད་པ་རེད། ༡༩༧༨ ལོར་དགེ་བཤེས་ལྷ་རམས་པའི་མཚན་རྟགས་བཞེས་པ་དང་། ༸གོང་ས་མཆོག་གི་བཀའ་བཞིན་དཔལ་ལྡན་སྨད་རྒྱུད་གྲྭ་ཚང་དུ་ཞུགས་ཏེ་གསང་སྔགས་རྡོ་རྗེ་ཐེག་པའི་ཟབ་ཆོས་དུ་མ་གསན་བཞེས་མཛད་འདུག ཕྱི་ལོ་ ༡༩༨༡ ལོར་༸གོང་ས་མཆོག་གིས་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་བོར་ཕེབས་པ་དང་། ཕྱི་ལོ་ ༡༩༨༤ ལོར་དཔལ་ལྡན་སྨད་རྒྱུད་གྲྭ་ཚང་གི་མཁན་ཁྲིར་ཕེབས་ཡོད་པ་རེད། ༢༠༡༠ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་བྱང་རྩེ་ཆོས་རྗེའི་མཚན་གནས་བསྩལ་འདུག་པ་དང་། འདི་ལོའི་ཟླ་ ༦ ཚེས་ ༡༢ ཉིན་༸གོང་ས་མཆོག་ནས་དགའ་ལྡན་ཁྲི་ཐོག་ཁང་དུ་རིན་པོ་ཆེ་མཆོག་དགའ་ལྡན་ཁྲི་ཐོག་ ༡༠༤ པར་བསྐོ་གཞག་མཛད་པའི་བཀའ་ཡིག་ཕྱག་རྟགས་དངོས་སུ་བསྩལ་ཡོད་པ་རེད།  

ཉན་པ།: Listen ཕབ་ལེན། Download ༸གོང་ས་མཆོག་གིས་བྱང་ཨ་རིའི་ནང་གི་མཛད་འཕྲིན་སྐོར་བསྐྱར་ཞིབ་ཆེད་སྒྲིག་ཞུས་པ། འདས་པའི་བདུན་ཕྲག་གཅིག་ནང་གི་གལ་ཆེའི་གསར་འགྱུར་ཁག་ལ་བསྐྱར་ཞིབ། Sunday 25/06/2017 A look back at His Holiness the Dalai Lama’s North America tour Week Review

ཉན་པ།: Listen ཕབ་ལེན། Download བོད་ཀྱི་བེུད། ༢༠༡༧ ལོའི་བོད་ཀྱི་མཛངས་མ་བསྟན་འཛིན་དཔལ་སྒྲོན་ལགས། Saturday 24/06/2017 Women of Tibet: Tenzin Paldon, Miss Tibet 2017