དྷ་ས་ས་གནས་འགོ་འཛིན་གྱི་དངོས་གཞིའི་འོས་བསྡུ་ཟླ་བ་སྔོན་མའི་ཚེས་ ༢༤ ཉིན་དང་ཐོག་གནང་གཏན་འཁེལ་བའི་གསལ་བསྒྲགས་སྤེལ་ཡོད་ཀྱང་། ཕྱི་ཟླ་ ༥ ཚེས་ ༢༣ ཉིན་དྷ་ས་ས་གནས་འོས་བསྡུ་ཚོགས་ཆུང་གིས་ས་གནས་འགོ་འཛིན་གྱི་དངོས་གཞི་འོས་བསྡུ་གྲ་སྒྲིག་ཞུ་ཕྱོགས་ཚགས་ཚུད་ཡོང་སླད་དངོས་གཞིའི་འོས་བསྡུ་ཉིན་གྲངས་ ༡༠ རིང་འཕར་འགྱངས་གནང་སྟེ་ཕྱི་ཟླ་ ༦ ཚེས་ ༣ ཉིན་གནང་རྒྱུའི་གསལ་བསྒྲགས་སྤེལ་དོན་ལྟར། དེ་རིང་བཞུགས་སྒར་ཁུལ་དུ་སྐབས་ ༢༣ པའི་རྡ་ས་ས་གནས་འགོ་འཛིན་གྱི་དངོས་གཞི་འོས་བསྡུ་ལས་རིམ་དེ་གནང་ཡོད་པ་རེད།
རྩ་བའི་དྷ་ས་ས་གནས་འགོ་འཛིན་གྱི་སྔོན་འགྲོའི་འོས་བསྡུའི་ནང་དང་དུ་བླངས་ནས་བཞེངས་མཁན་མི་སྣ་ལྔ་བྱུང་བའི་ཁྲོད་དྷ་ས་ས་གནས་འོས་བསྡུ་ཚོགས་ཆུང་ནས་འོས་བསྡུའི་གྲུབ་འབྲས་གསལ་བསྒྲགས་གནང་བར་འོས་གྲངས་མང་ཤོས་སོན་པ་དཀོན་མཆོག་མིག་དམར་དམར་ལགས་དང་དྷ་ས་ས་གནས་འགོ་འཛིན་ལས་ཐོག་ཀུན་དགའ་ཚེ་རིང་ལགས་རྣམ་གཉིས་དངོས་གཞིའི་འོས་བསྡུའི་ནང་ཕེབས་ཡོད།
དྷ་ས་ས་གནས་འོས་བསྡུ་ལས་ཁང་གིས་དངོས་གཞིའི་འོས་མིའི་མཚན་གསལ་བསྒྲགས་གནང་བའི་རྗེས་ཟླ་བ་སྔོན་མའི་ཚེས་ ༡༦ ཉིན་དྷ་ས་ས་གནས་འགོ་འཛིན་ལས་ཁུངས་ཀྱི་ཁོར་ཡུག་ཚན་པའི་འབྲེལ་མཐུད་པས་དྷ་ས་ས་གནས་འཐུས་ཚོགས་དང་བོད་མིའི་སྒྲིག་འཛུགས་སྲིད་ལས་ཁུངས་ཀྱི་དྲུང་ཆེའི་མཚན་ཐོག་ལ་ས་གནས་འགོ་འཛིན་ལས་ཐོག་གི་ངོས་ནས་དོན་ཚན་གསུམ་གྱི་སྒོ་ནས་དྲང་བདེན་དང་ཕྱི་གསལ་ནང་གསལ་གནང་མེད་པའི་ཞུ་སྙན་ཞིག་ཕུལ་ཡོད་པ་ལྟར་ས་གནས་འོས་བསྡུ་ལས་ཁང་ནས་དངོས་གཞིའི་འོས་བསྡུ་ཉིན་བཅུ་རིང་འཕར་འགྱངས་གནང་ཡོད།
འོན་ཀྱང་ཕྱི་ཟླ་ ༥ ཚེས་ ༢༤ འཁོད་དྷ་ས་ས་གནས་འཐུས་ཚོགས་ནས་སྤྱི་མོས་ཀྱི་གྲོས་ཆོད་ཡིག་ཚགས་ཞིག་ཕྱིར་འགྱར་བྱུང་བའི་ནང་ས་གནས་འགོ་འཛིན་ལས་ཐོག་གི་རྙོག་གླེང་དང་འབྲེལ་ནས་གྲོས་ཆོད་དོན་ཚན་གསུམ་བཀོད་ཡོད་པ་ལྟར། རླུང་འཕྲིན་ཁང་ནས་དེ་རིང་དྷ་ས་ས་གནས་འཐུས་ཚོགས་ཀྱི་ཚོགས་གཙོ་ཟླ་བ་ཚེ་རིང་ལགས་སུ་ཞལ་པར་བརྒྱུད་འཐུས་ཚོགས་ཀྱིས་བཞག་པའི་གྲོས་ཆོད་དང་ས་གནས་འགོ་འཛིན་གྱི་དངོས་གཞིའི་འོས་བསྡུ་དེ་དུས་ཐོག་གནང་མ་ཐུབ་པར་འཕར་འགྱངས་གནང་དོན། དེ་བཞིན་སྤྱི་ཚོགས་ཁྲོད་གླེང་སློང་ཤུགས་ཆེར་གནང་བའི་རྙོག་གླེང་དེ་སེལ་ཡོད་མེད་སྐོར་བཅར་འདྲི་ཞུས་ཡོད།
གང་ལྟར་ས་གནས་འོས་བསྡུ་འགན་འཛིན་ལ་ས་གནས་འཐུས་ཚོགས་ནས་ད་ཡོད་ས་གནས་འགོ་འཛིན་དང་འབྲེལ་བའི་རྙོག་གྲར་དཔྱད་ཞིབ་ཀྱིས་གྲོས་ཆོད་ཀྱི་ལམ་ནས་གཙང་སེལ་བྱས་ཡོད་པ་དང་དངོས་གཞིའི་འོས་བསྡུའི་ལས་རིམ་བསྐྱང་ན་འགྲིག་གི་ཡོད་པར་བཀའ་ཕེབས་སོང་ཞེས་ས་གནས་འོས་བསྡུའི་འགན་འཛིན་ནས་སྤྱི་ཚོགས་དྲྭ་ལམ་བརྒྱུད་གསུངས་དོན་ལྟར། དེ་རིང་སྐབས་ ༢༣ པའི་དྷ་ས་ས་གནས་འགོ་འཛིན་གྱི་དངོས་གཞིའི་འོས་བསྡུ་ལས་རིམ་དེ་བསྐྱངས་ཡོད། དངོས་གཞིའི་འོས་མི་དཀོན་མཆོག་མིག་དམར་ལགས་ས་གནས་འགོ་འཛིན་སྐབས་མི་འདྲ་བ་གཉིས་ཀྱི་འོག་ཕྱག་ལས་གནང་མྱོང་ཡོད་པ་དང་། འོས་མི་ཀུན་དགའ་ཚེ་རིང་ལགས་ནི་སྐབས ༢༢ པའི་དྷ་ས་ས་གནས་འགོ་འཛིན་ཡིན་པ་རེད།
