ཕྱི་ཟླ་ ༨ ཚེས་ ༡༠ ཉིན་མོར་རྒྱལ་སྤྱིའི་བཙོན་པའི་དྲང་བདེན་གྱི་ཉིན་མོ་ཞེས་སྲུང་བརྩི་ཞུ་སྲོལ་ཡོད་པ་ལྟར་དབུས་ས་གཉིས་ཀྱི་བུད་མེད་ལྷན་ཚོགས་ཀྱིས་བོད་ཀྱི་བུད་མེད་བཙོན་པ་རྣམས་ཀྱི་གནས་སྟངས་འགྲེམས་སྟོན་གྱི་ལམ་ནས་མངོན་གསལ་གནང་སྟེ་རྒྱལ་སྤྱིའི་བཙོན་པའི་དྲང་བདེན་གྱི་ཉིན་མོ་སྲུང་བརྩི་ཞུས་སོང་།
དེ་རིང་སྔ་དྲོ་ཕྱག་ཚོད་ ༡༠ པ་ཡོལ་ཙམ་ལ་བཞུགས་སྒར་མེག་གྷན་དུ་དབུས་ས་གཉིས་ཀྱི་བོད་ཀྱི་བུད་མེད་ལྷན་ཚོགས་ཀྱིས་རྒྱ་ནག་གཞུང་གིས་བོད་ནང་གི་བུད་མེད་བཙོན་པ་ཚོར་སྡུག་སྦྱོང་མནར་གཅོད་ཇི་ལྟར་གཏོང་ཚུལ་གྱི་པར་རིས་འགྲེམས་སྟོན་བརྒྱུད་ནས་བུད་མེད་བཙོན་པ་རྣམས་ཀྱི་གནས་སྟངས་ཐེར་འདོན་གནང་སོང་།
བུད་མེད་ལྷན་ཚོགས་ཀྱིས་དེ་རིང་རྒྱལ་སྤྱིའི་བཙོན་པའི་དྲང་བདེན་གྱི་ཉིན་མོ་དང་བསྟུན་གསར་འགོད་བསྒྲགས་གཏམ་ཞིག་སྤེལ་བར་༸པཎ་ཆེན་སྐུ་ཕྲེང་བཅུ་གཅིག་པ་མཆོག་གིས་དབུས་པའི་ཉེ་ལམ་བོད་མི་ཚོང་པ་བསྟན་འཛིན་ཐར་པ་ལགས་སུ་བཙོན་འཇུག་ཁྲིམས་ཆད་བཏང་བ་སོགས་ཀྱི་གནད་དོན་ཐེར་འདོན་གྱིས་བོད་ནང་གི་བོད་མི་རྣམས་ནི་ལོ་མང་རིང་ནས་རྒྱ་གཞུང་གི་དྲག་གནོན་སྲིད་བྱུས་འོག་མནར་གཅོད་ཚད་མེད་མྱངས་དང་མྱོང་བཞིན་ཡོད་པ་དང་། ལྷག་པར་བུད་མེད་བཙོན་པ་ཚོར་བཙན་གཡེམ་དང་བཙན་གྱིས་མངལ་དབྱུང་བཏང་བ། སྐྱེ་སྒོ་བཀག་པ་སོགས་མི་སྤྱོད་ལས་འདས་པའི་སྲིད་བྱུས་ལག་བསྟར་བྱེད་བཞིན་ཡོད་སྟབས། རྒྱལ་ཚོགས་དང་འགྲོ་བ་མིའི་ཐོབ་ཐང་གི་ཚོགས་སྡེ་ཁག་ནས་རྒྱ་གཞུང་གིས་བོད་མི་གང་བྱུང་དུ་འཛིན་བཟུང་མཚམས་འཇོག་དགོས་པ་དང་། བོད་མི་བཙོན་པ་རྣམས་ལ་ཁྲིམས་ཞིབ་ཀྱི་རང་དབང་སྤྲོད་དགོས་པ། བོད་མི་བཙོན་པ་སྤྱི་དང་སྒོས་བུད་མེད་བཙོན་པ་རྣམས་ཀྱི་གནས་སྟངས་ལ་རྟོག་ཞིབ་དགོས་པའི་ཤུགས་སྣོན་རྒྱག་དགོས་པའི་གཞེན་སྐུལ་གནང་ཡོད།
གསར་འགོད་པས་དྷ་ས་ས་གནས་བུད་མེད་ལྷན་ཚོགས་ཀྱི་ཚོགས་གཞོན་མཚོ་མོ་ལགས་སུ་བཅར་འདྲི་ཞུས་སྐབས་ཁོང་གིས་བོད་ནང་གི་གཞིས་ལུས་རྒྱ་ཆེ་མང་ཚོགས་རྣམས་ལ་ཆ་མཚོན་ན་རྒྱ་གཞུང་གིས་བཙན་གནོན་འོག་རང་དབང་དང་ཐོབ་ཐང་མེད་སྟབས་རྒྱལ་ཚོགས་དང་རྒྱལ་སྤྱིའི་ཚོགས་སྡེ་ཁག་ནས་བོད་དོན་ལ་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་སོང་བ་དང་ཆབས་ཅིག ཁོང་རང་ཉིད་བོད་ནས་རྒྱ་གར་ལ་བྲོས་བྱོལ་དུ་ཡོང་བ་ཞིག་ཆགས་ཡོད་སྟབས་རྒྱ་གཞུང་གིས་ཁོང་གི་ཕ་མར་ཁོང་ཕྱིར་ལོག་དགོས་པའི་བཙན་ཤེད་བཏང་མྱོང་ཡོད་སྐོར་དངོས་ཀྱི་མྱོང་བ་དྲན་གསོ་དང་འབྲེལ་ཏེ། བོད་ཀྱི་བཙོན་པ་རྣམས་གློད་བཀྲོལ་དགོས་པའི་འབོད་སྐུལ་ཞུས་སོང་།
དེ་བཞིན་དབུས་བུད་མེད་ལྷན་ཚོགས་ཀྱི་ལས་འཆར་འགན་འཛིན་བསྟན་འཛིན་དབྱིངས་གསལ་ལགས་ཀྱིས་རྒྱ་གཞུང་གིས་ཆེས་དམ་དྲག་བྱས་དང་བྱེད་བཞིན་རྐྱེན་བོད་ནང་གི་བཙོན་པའི་གྲངས་འབོར་ཤེས་རྟོགས་དཀའ་བར་བརྟེན་རྒྱལ་ཚོགས་ཀྱི་སྐུ་ཚབ་དང་རྒྱལ་སྤྱིས་རྒྱ་གཞུང་ནས་ཁྲིམས་མེད་ལུགས་མེད་ཐོག་བོད་མི་འཛིན་བཟུང་དང་བཀག་སྐྱིལ་གྱི་གནད་དོན་ཁག་འཕྲལ་མར་མཚམས་འཇོག་ཡོང་བར་གནོན་ཤུགས་སྤྲོད་དགོས་པ་གསུངས་ཡོད།
