དེ་རིང་རེས་གཟའ་ཉི་མའི་ཞོགས་པར་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རིན་པོ་ཆེ་མཆོག་གིས་ཨ་རིའི་མང་གཙོ་ཚོགས་པའི་འོས་མི་སྐུ་ཞབས་ Joseph Robinette Biden Jr མཆོག་འདི་ལོའི་ཨ་རིའི་སྲིད་འཛིན་དུ་བདམས་ཐོན་བྱུང་བར་དྲྭ་ཐོག་བརྒྱུད་ནས་འཚམས་འཕྲིན་ཞིག་སྩལ་ཏེ། བདམས་ཐོན་སྲིད་འཛིན་མཆོག་གིས་མི་མང་གི་མངོན་འདོད་སྒྲུབ་རྒྱུའི་བྱ་བཞག་དང་ཞི་བདེ། འཆམ་མཐུན་སྐྲུན་རྒྱུར་འགེག་བར་ཆད་མེད་པར་བྱ་བཞག་ལམ་ལྷོང་ཡོང་བའི་སྨོན་འདུན་དང་གསོལ་འདེབས་ཞུ་རྒྱུ་ཡིན་ཞེས་བཀའ་སྩལ་འདུག
༸གོང་ས་མཆོག་གིས་མགོན་པོ་༸གང་ཉིད་མཆོག་ནི་དུས་རྒྱུན་ནས་ཨ་རིའི་རང་དབང་དང་མང་གཙོ། དེ་བཞིན་ཆོས་ལུགས་རང་དབང་དང་ཁྲིམས་ཀྱི་དབང་བསྒྱུར་བཅས་ལ་ཡི་རངས་གནང་མཁན་ཞིག་ཡིན་པ་དང་། འགྲོ་བ་མིའི་རིགས་ཀྱིས་ཨ་རིའི་མང་གཙོའི་ཕུགས་བསམ་དང་དབུ་ཁྲིད་ལ་རེ་བ་ཆེན་པོ་བཅོལ་བཞིན་ཡོད་སྐོར་བཀའ་འབྲེལ་དང་བསྦྲགས། དམིགས་བསལ་གྱི་དཀའ་སྡུག་ཆེ་བའི་དེང་གི་དུས་འདིར་སྲིད་འཛིན་མཆོག་གི་དབུ་ཁྲིད་ཀྱི་ལམ་ནས་མི་མང་གི་དབུལ་ཕོངས་ཀྱི་དཀའ་ངལ་སེལ་ཞིང་དྲང་བདེན་མ་ཡིན་པའི་གནས་ཚུལ་ཡོད་ཚད་ཞི་འཇགས་བྱུང་སྟེ་ཞི་བདེ་རང་བཞིན་གྱི་གོ་ལ་ཞིག་བསྐྲུན་རྒྱུ་དང་དེང་དུས་ཀྱི་ཁོར་ཡུག་གི་འགྱུར་ལྡོག་སོགས་ལ་ཕན་ནུས་ཐོན་པར་ཐུགས་རེ་ཡོད་སྐོར་བཀའ་སྩལ་བར་མ་ཟད། མགོན་པོ་༸གང་ཉིད་མཆོག་གིས་ཇོ་བྷ་ཌན་མཆོག་མས་ལྕམ་སྐུ་ Kamala Harris མཆོག་སྲིད་འཛིན་གཞོན་པར་བདམས་པར་བསྔགས་བརྗོད་ཡོད་ཅེས་བཀའ་སྩལ་འདུག
དེ་བཞིན་མགོན་པོ་༸གང་ཉིད་མཆོག་གིས་བོད་ཀྱི་བྱ་བཞག་དང་འབྲེལ་བའི་ཆབ་སྲིད་ཀྱི་སྐུ་དབང་ཡོངས་རྫོགས་བཙན་བྱོལ་ནང་གི་མང་གཙོའི་ལམ་ནས་འོས་འདེམས་བྱུང་བའི་འགོ་ཁྲིད་ལ་རྩིས་སྤྲོད་གནང་བ་ནས་བཟུང་མགོན་པོ་མཆོག་གིས་རྩ་ཆེ་བའི་དུས་ཚོད་ཡོངས་རྫོགས་འགྲོ་བ་མིའི་གཅིག་གྱུར་གྱི་རིན་ཐང་གོང་འཕེལ་དང་ཆོས་ལུགས་མཐུན་སྒྲིལ། འཚེ་མེད་ཞི་བའི་རྩ་འཛིན་དང་སྙིང་རྗེ་སོགས་གོང་འཕེལ་སླད་དུ་དགོངས་བཞེས་མཛད་བཞིན་ཡོད་པར་བཀའ་སྩལ་བ་དང་ཆབས་ཅིག གནད་དོན་དེ་དག་ནི་དེང་གི་འཛམ་གླིང་འདིའི་ནང་ཧ་ཅང་དགོས་ངེས་ཤིག་ཆགས་ཡོད་པར་བཀའ་སྩལ་འདུག
མགོན་པོ་༸གང་ཉིད་མཆོག་གིས་བདམས་ཐོན་བྱུང་བའི་སྲིད་འཛིན་མཆོག་གིས་སྔོན་ཆད་ཀྱང་བོད་དོན་ལ་རྒྱབ་སྐྱོར་གནང་བར་མ་ཟད། འདི་ལོའི་སྤྱི་ཟླ་བཅུ་བའི་ནང་གི་བསྒྲགས་གཏམ་གྱི་ནང་དུ་ཡང་བོད་དོན་ལ་རྒྱབ་སྐྱོར་གནང་རྒྱུ་ཡིན་པར་འཁོད་ཡོད་པ་བཅས་ལ་ཐུགས་རྗེ་ཆེ་ཞུས་གནང་སྟེ་ཨ་རིའི་མི་མང་སྤྱི་དང་དེ་བཞིན་བཀུར་འོས་ཀྱི་སྲིད་འཛིན་རྣམས་ཀྱིས་ཀྱང་དུས་ཡུན་རིང་པོར་ཞི་བདེ་དང་འཚེ་མེད་རང་བཞིན་གྱི་བྱམས་བརྩེ་བཅས་གཞི་རྩར་བཟུང་བའི་བོད་བརྒྱུད་ནང་བསྟན་གྱི་ཐུན་མོང་མ་ཡིན་པའི་རིག་གནས་རྒྱུན་འཛིན་ཡོང་བར་རྒྱབ་སྐྱོར་དང་སྐུལ་ལྕག་བྱས་ཡོད་པ་ནི་བོད་མི་ཡོངས་ཀྱི་བསོད་སྐལ་ཡིན་པ་དང་། རིག་གནས་དེ་ནི་འཛམ་གླིང་ཡོངས་ལ་ཕན་རླབས་སྐྲུན་རྒྱུའི་ནུས་པ་ཡོད་པ་ཞིག་ཡིན་ཞེས་བཀའ་སྩལ་བ་དང་འབྲེལ་མགོན་པོ་༸གང་ཉིད་མཆོག་གིས་བོད་མི་ཡོངས་ཀྱི་ཚབ་མཛད་ནས་སླར་ཡང་ཨ་རིའི་བོད་དོན་རྒྱབ་སྐྱོར་ལ་ཐུགས་རྗེ་ཆེ་ཞེས་བཀའ་སྩལ་ཡོད་པ་རེད།
བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་མིའི་སྒྲིག་འཛུགས་དང་བོད་མི་སྤྱི་བོ་གནམ་བསྟན་ཡོངས་ཀྱི་ཚབ་ཞུས་ཏེ་བདམས་ཐོན་བྱུང་བའི་ཨ་རིའི་སྲིད་འཛིན་སྐུ་ཞབས་ཇོ་བྷ་ཌན་མཆོག་ལ་དགའ་བསུ་འཚམས་འདྲི་གནང་བ་དང་སྦྲགས། ཨ་རི་ངོས་ནས་ལོ་ངོ་བཅུ་ཕྲག་མང་པོའི་རིང་བོད་དོན་གྱི་གནད་དོན་ལ་རྒྱབ་སྐྱོར་གནང་ཡོད་པར་ཐུགས་རྗེ་ཆེ་ཞུས་འདུག 
དེ་བཞིན་ཉེ་ལམ་སྐུ་ཞབས་བྷ་ཌན་མཆོག་གིས་༸གོང་ས་མཆོག་དང་མཇལ་འཕྲད་གནང་རྒྱུར་ཞལ་བཞེས་གནང་བ་དང་། བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྒྱ་གཞུང་གི་འབྲེལ་ཡོད་དཔོན་རིགས་ཚོར་ཁྲིམས་ཀྱི་ཉེས་ཆད་བཀལ་རྒྱུ་ཡིན་པར་གསུངས་པར་དགའ་བསུ་ཞུས་པ་མ་ཟད། རིང་མིན་སྐུ་ཞབས་ཁོང་གི་དབུ་ཁྲིད་འོག་བོད་དོན་རྒྱབ་སྐྱོར་གྱི་བསྐྱར་ཞིབ་ཁྲིམས་འཆར་གསར་པ་གཏན་འབེབས་དང་བོད་དོན་རྒྱབ་སྐྱོར་སྔར་ལྷག་གནང་བའི་རེ་སྐུལ་ཞུས་འདུག
སྲིད་སྐྱོང་མཆོག་གིས་ལྕམ་སྐུ་ Kamala Harris མཆོག་སྲིད་འཛིན་གཞོན་པར་བདམས་ཐོན་བྱུང་བར་འཚམས་འདྲི་དང་ཁོང་ད་ལན་ཨ་རིའི་ལོ་རྒྱུས་ནང་གནས་རིམ་མཐོ་ཤོས་གཉིས་པར་བདེམས་ཐོན་བྱུང་བ་བུད་མེད་ཐོག་མ་ཞིག་ཡིན་སྟབས། ཁོང་བདམས་ཐོན་བྱུང་བ་དེས་རྒྱལ་སྤྱིའི་ཆབ་སྲིད་དང་འགོ་ཁྲིད་ཀྱི་ཁྲོད་བུད་མེད་སྤྱི་ཡོངས་ལ་དུས་རབས་གསར་པ་ཞིག་སྐྲུན་ཡོད་པ་མ་ཟད། ལྕམ་སྐུ་མཆོག་ནས་འགྲོ་བ་མིའི་ཐོབ་ཐང་དང་འདྲ་མཉམ། དེ་བཞིན་གནམ་གཤིས་འགྱུར་ལྡོག་སླད་ཕྱག་ལས་གནང་སྐབས་བོད་དོན་གླེང་སློང་དང་ཨ་རི་དང་བོད་གཉིས་ཀྱི་འབྲེལ་ལམ་ཤུགས་ཆེ་རུ་གཏོང་ཐུབ་པའི་རེ་འདུན་ཞུས་གནང་འདུག
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་སྐུ་ཞབས་ཇོ་བྷ་ཌན་མཆོག་དང་ལྕམ་སྐུ་ Kamala Harris མཆོག་རྣམ་གཉིས་ལ་འཚམས་འདྲི་དང་སྦྲགས། ཨ་རི་གཞུང་མང་གཉིས་ནས་བོད་ཀྱི་གནད་དོན་ཐད་བསྟུད་མར་རྒྱབ་སྐྱོར་གནང་བར་བོད་ཕྱི་ནང་གཉིས་ཀྱི་བོད་མིའི་ཚབ་ཞུས་ཏེ་ཐུགས་རྗེ་ཆེ་ཞུས་པ་དང་འབྲེལ། གཞིས་བཞུགས་བོད་མི་རྣམས་ནས་རྒྱ་གཞུང་གི་དྲག་གནོན་ཅན་གྱི་སྲིད་བྱུས་འོག་མུ་མཐུད་མནར་གཅོད་མྱོང་བཞིན་ཡོད་སྟབས་བོད་ཀྱི་གནད་དོན་སེལ་བར་ང་ཚོའི་ངོས་ནས་རྒྱ་ནག་གཞུང་དང་མཉམ་དུ་ཞི་བའི་གྲོས་མོལ་ཡོང་ཐབས་སུ་ནུས་པ་གང་ཐུབ་འདོན་ཀྱང་ད་བར་རྒྱ་གཞུང་ཕྱོགས་ནས་བཟང་ལན་གང་ཡང་བྱུང་མེད་པར་བརྟེན་ད་ལན་སྐུ་ཞབས་བྷ་ཌན་མཆོག་གིས་དབུ་ཁྲིད་འོག་བོད་རྒྱ་གྲོས་མོལ་བསྐྱར་གསོ་སླད་རོགས་འདེགས་གནང་བ་དང་ཕྱོགས་མཚུངས། སྐུ་ཞབས་བྷ་ཌན་མཆོག་གིས་༸གོང་ས་མཆོག་དང་མཇལ་འཕྲད་གནང་རྒྱུར་ཞལ་བཞེས་གནང་བ་བཞིན་དེ་ལྟར་གནང་རྒྱུར་རེ་བ་ཡོད་པ་གསུངས་འདུག
གཞི་རྩའི་ཨ་རིའི་སྲིད་འཛིན་བདེམས་ཐོན་བྱུང་བར་ཨ་རིའི་མངའ་སྡེ་ཆེ་ཆུང་ལ་གཞིགས་ཏེ་འདེམས་འཐུས་ལྷན་ཚོགས་ཁྱོན་ ༥༣༨ ཡོད་པའི་ཁོངས་ནས་འདེམས་འཐུས་ལྷན་ཚོགས་ཀྱི་འོས་ཤོག་ ༢༧༠ ཐོབ་དགོས་པ་དང་། ད་ལན་ཕྱི་ལོ་ ༢༠༢༠ ལོའི་ཨ་རིའི་རྒྱལ་ཡོངས་ཀྱི་འོས་བསྡུ་ཆེན་མོ་དེའི་ཁྲོད་སྐུ་ཞབས་ Donald Trump མཆོག་ལ་འདེམས་འཐུས་ལྷན་ཚོགས་ཀྱི་འོས་ཤོག་ ༢༡༤ དང་སྐུ་ཞབས་་བྷ་ཌན་མཆོག་ལ་འོས་ཤོག་ ༢༩༠ ཐོབ་པའི་ཐོག་སྐུ་ཞབས་་བྷ་ཌན་མཆོག་ཨ་རིའི་སྲིད་འཛིན་ཐེངས་ ༤༦ པར་འདེམས་ཐོན་བྱུང་ཡོད་པ་རེད།
