རྒྱལ་སྤྱི།

ཉི་ཧོང་གི་ Hokkaido Shimizu ཧོཀ་ཀེའི་ཌོ་ཤི་མི་ཛུ་གྲོང་སྡེའི་སྤྱི་ཁྱབ་པ་ Yasuhiro Tsuji ཡ་སུ་ཧི་རོ་ཚུ་ཇི་མཆོག་གིས་སྣེ་ཁྲིད་པའི་སྐུ་ཚབ་ཚོ་ཁག་ཞིག་ཉེ་ལམ་ཉི་ཧོང་བོད་ཀྱི་སྐུ་ཚབ་དོན་གཅོད་གསར་པ་བློ་བཟང་ཆོས་གྲགས་ལགས་དང་མཇལ་འཕྲད་ཀྱིས་ཁུལ་དེའི་ཞིང་པ་ཚོའི་ཚབ་བྱས་ཏེ་ས་གནས་ཀྱི་ལོ་ཏོག་ཐོན་སྐྱེད་ཐོག་མ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་བཞེས་གནང་འདུག དེ་ཡང་བོད་མིའི་སྒྲིག་འཛུགས་ཀྱི་དྲྭ་གནས་ཐོག་སྤེལ་བའི་གནས་ཚུལ་ནང་གསལ་ལྟར་ན།  སྟོན་ཐོག་འབུལ་བཞེས་ཀྱི་ལས་རིམ་དེ་བཞིན་གཟའ་འཁོར་སྔོན་མའི་རེས་གཟའ་ལྷག་པའི་ཉིན་ཉི་ཧོང་བོད་ཀྱི་སྐུ་ཚབ་དོན་ཁང་དུ་གནང་ཡོད་པ་དང་།  སྐབས་དེར་ཉི་ཧོང་གི་ཧོཀ་ཀེའི་ཌོ་ཤི་མི་ཛུ་གྲོང་སྡེའི་སྤྱི་ཁྱབ་པ་ཡ་སུ་ཧི་རོ་ཚུ་ཇི་ལགས་དང་ལྷན་དུ་ Shimizu JA Agriculture Cooperative ཤི་མི་ཛུ་སོ་ནམ་མཉམ་འབྲེལ་གྱི་ཚོགས་གཙོ་ Noriyuki Konno ནཱོ་རི་ཡུ་ཀི་ཀོན་ནཱོ་ལགས་དང་།  སོ་ནམ་སློབ་སྟོན་པ་ Kazuyuki Togashi ཀ་ཛུ་ཡུ་ཀི་ཏོ་ག་ཤི་ལགས།  སོ་ནམ་དང་ནགས་ཚལ་སྡེ་ཚན་གྱི་འགན་འཛིན་ Sato Kazunari ས་ཏོ་ཀ་ཛུ་ནཱ་རི་ལགས་བཅས་ཆེད་ཕེབས་ཀྱིས།  ཁུལ་དེའི་གྲོ་དང་སྒོག་པའི་ལོ་ཏོག་ཐོན་སྐྱེད་ཐོག་མ་སྲོལ་རྒྱུན་གྱི་ཤིང་སྒམ་དང་རས་ཀྱི་ནང་བཏུམས་ཏེ་ཉི་ཧོང་བོད་ཀྱི་སྐུ་ཚབ་དོན་གཅོད་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་འབུལ་བཞེས་གནང་འདུག ཉི་ཧོང་བོད་ཀྱི་སྐུ་ཚབ་དོན་གཅོད་བློ་བཟང་ཆོས་གྲགས་ལགས་ཀྱིས།  ཧོཀ་ཀེའི་ཌོ་ཤི་མི་ཛུ་གྲོང་སྡེའི་ས་གནས་ཞིང་པ་ཚོའི་འབུལ་བ་རྣམས་བཞེས་ཏེ་ཁོང་རྣམ་པར་ཐུགས་རྗེ་ཆེ་ཞུ་དང་འབྲེལ།  མགོན་པོ་༸གང་ཉིད་མཆོག་གི་སྐུའི་འཕྲོད་བཞེས་གསལ་ཐང་ཡིན་པ་སྙན་སེང་ཞུས་ཏེ།  ས་གནས་ཞིང་པ་ཚོའི་སྟོན་ཐོག་འབུལ་བ་རྣམས་༸གོང་ས་༸སྐྱབས་མོགན་ཆེན་པོ་མཆོག་ལ་མགྱོགས་མྱུར་འབུལ་ཐུབ་པ་གནང་རྒྱུའི་ཁས་ལེན་ཞུས་པ་དང་ཆབས་ཅིག  །སྐུ་ཚབ་ཚོ་ཁག་རྣམས་ལ་ད་ལྟའི་བོད་ནང་གི་ཛ་དྲག་གི་གནས་སྟངས་སྐོར་ངོ་སྤྲོད་གནང་བ་དང་།  དེ་བཞིན་ཉི་ཧོང་གི་སྐད་དུ་ཡིག་བསྒྱུར་ཟིན་པའི་༸གང་ཉིད་མཆོག་གི་ལྗགས་རྩོམ་གནང་བའི་ཕྱག་དེབ་ Voice for the Voiceless  བོད་དང་བོད་མིའི་མགྲིན་ཚབ་ཞེས་པ་དེ་རེ་རེ་བཞིན་ཕུལ་འདུག  །འདི་ག་རླུང་འཕྲིན་ཁང་གི་ཉི་ཧོང་བོད་ཀྱི་སྐུ་ཚབ་དོན་གཅོད་བློ་བཟང་ཆོས་གྲགས་ལགས་སུ་བཀའ་འདྲི་ཞུས་ཡོད། རྩ་བའི་སྔ་ལོ་ཕྱི་ཟླ་ ༡༠ ཚེས་ ༣༠ ཉིན་ཡང་ཧོཀ་ཀེའི་ཌོ་ཤི་མི་ཛུ་གྲོང་སྡེའི་སྤྱི་ཁྱབ་པ་ Yasuhiro Tsuji ཡ་སུ་ཧི་རོ་ཚུ་ཇི་མཆོག་གིས་སྣེ་ཁྲིད་པའི་སྐུ་ཚབ་ཚོ་ཁག་ཞིག་ནས་སྐབས་དེའི་ཉི་ཧོང་བོད་ཀྱི་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་མཇལ་འཕྲད་ཀྱིས།  ༸སྐུའི་གོ་སྟོན་ལ་རྟེན་འབྲེལ་ཞུ་ཆེད་ས་གནས་ཀྱི་ཐོན་སྐྱེད་སྲན་མ་སྣ་ག་མི་འདྲ་བ་ཁག་གཅིག་འབུལ་བ་ཚུལ་དུ་སྐུ་ཚབ་དོན་གཅོད་བརྒྱུད་༸གང་ཉིད་མཆོག་ལ་ཕུལ་ཡོད་པ་མ་ཟད།   སྐབས་དེ་དུས་དམིགས་བསལ་གྱི་གོ་སྟོན་ལས་རིམ་དང་འབྲེལ་ནས། ཤི་མི་ཛུ་གྲོང་སྡེའི་བྱིས་པ་ཚོས་བྲིས་པའི་༸སྐུའི་འཁུངས་སྐར་གྱི་འཚམས་འདྲིའི་ཡིག་འཕྲིན་ཡང་མཉམ་དུ་ཕུལ་ཡོད་པ་རེད།  ལྷག་པར་དུ་སྔ་ལོ་ཕྱི་ཟླ་ ༥ པའི་ཚེས་ ༤ ཉིན་ཉི་ཧོང་བོད་ཀྱི་སྐུ་ཚབ་དོན་ཁང་ནས་ཤི་མི་ཛུ་གྲོང་སྡེ་དང་ཁུལ་དེའི་བོད་དོན་རྒྱབ་སྐྱོར་ཚོགས་པ་བཅས་དང་ལྷན་དུ་མཉམ་རུབ་ཐོག་༸སྐུའི་གོ་སྟོན་སྲུང་བརྩིའི་ལས་རིམ་གྱི་ཆ་ཤས་སུ་ཤི་མི་ཛུ་གྲོང་སྡེའི་སྐྱེད་ཚལ་ནང་ Cherry Trees སེའུ་སྡོང་པོ་ ༡༡༣ འདེབས་འཛུགས་གནང་ཡོད་པ་དང་།  སྐབས་དེར་ཤི་མི་ཛུ་གྲོང་སྡེའི་སྤྱི་ཁྱབ་པ་ Yasuhiro Tsuji ཡ་སུ་ཧི་རོ་ཚུ་ཇི་མཆོག་གིས།  སེའུ་སྡོང་པོ་ ༡༡༣ འདེབས་འཛུགས་བྱས་པ་དེས་ཉི་ཧོང་དང་བོད་མི་རིགས་དབར་གྱི་མཛའ་མཐུན་གྱི་འབྲེལ་བ་དུས་རྟུག་གནས་རྒྱུའི་མཚོན་རྟགས་ཡིན་པ་མ་ཟད།  དེས་༸གོང་ས་༸སྐྱབས་མགོན་ཆེན་པོ་མཆོག་གི་ཞི་བདེ་དང་།  བྱམས་སྙིང་རྗེ།  འཚེ་བ་མེད་པའི་བཀའ་སློབ་ཁྱབ་སྤེལ་འགྲོ་བར་སྐུལ་འདེད་ཅིག་ཏུ་འགྱུར་བའི་རེ་བ་ཡོད་པ་གསུངས་ཡོད་པ་རེད། སྤྱིར་ཉི་ཧོང་ཤི་མི་ཛུ་གྲོང་སྡེའི་སྤྱི་ཁྱབ་པ་ Yasuhiro Tsuji ཡ་སུ་ཧི་རོ་ཚུ་ཇི་མཆོག་གིས་ས་གནས་ཀྱི་ལོ་ཏོག་ཐོན་སྐྱེད་འབུལ་བཞེས་ཀྱི་ཐོག་མའི་དམིགས་ཡུལ་དེ།  ཁུལ་དེའི་སོ་ནམ་ཞིང་ལས་པ་ཚོའི་སྤུས་ཚད་ལྡན་པའི་ལོ་ཏོག་ཐོན་སྐྱེད་རྒྱལ་སྤྱིའི་ཁྲོད་དྲིལ་བསྒྲགས་ཡོང་ཆེད་དང་།  ཕྱོགས་ཕན་ཚུན་འབྲེལ་ལམ་གོང་མཐོར་གཏོང་རྒྱུ།  དེ་བཞིན་ཤི་མི་ཛུ་གྲོང་སྡེའི་སྟོན་ཐོག་གི་ཚོང་འབྲེལ་ཡར་རྒྱས་གཏོང་རྒྱུ་སོགས་ཡིན་པ་དང་།  སྔ་ལོར་འགོ་འཛུགས་གནང་བའི་སྟོན་ཐོག་འབུལ་བཞེས་ཀྱི་ཐོག་མའི་འབུལ་ཡུལ་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཡེ་ཤུའི་བླ་ཆེན་ Pope གཉིས་ཡིན་པ་རེད། 

རྒྱ་ནག་གི་ཆེད་དུ་ཨ་རི་ནས་དམག་གི་མཚོན་ཆ་སོགས་ཉོ་ཐབས་བྱས་པའི་ཉེས་འཛུགས་འོག་སྔ་ལོ་ Belgrade ནང་འཛིན་བཟུང་བྱས་པའི་དབྱིན་ཡུལ་གྱི་ཚོང་པ་ཞིག་གིས་ཡུལ་དེའི་སོ་མྱུལ་བ་གླ་གཡར་བརྒྱུད་དབྱིན་ཡུལ་གྲོས་ཚོགས་འཐུས་མི་༧ ལ་གསང་ཉུལ་བྱས་པའི་གནས་ཚུལ་གསར་དུ་ཐོན་འདུག དབྱིན་ཡུལ་མི་སེར་ཡིན་པ་ཚོང་པ་ John Miller དང་ཁོང་ལ་མཉམ་རོགས་བྱེད་མཁན་རྒྱ་ནག་མི་སེར་ཡིན་པ་ Cui Guanghai གཉིས་ནི་རྒྱ་ནག་བཅིང་དཀྲོལ་དམག་སྡེ་ཆེད་དུ་ཨ་རིའི་དམག་གི་མཚོན་ཆ་ Missile Launcher དང་ Radar Units དེ་བཞིན་ Drones བཅས་ཉོ་ཐབས་བྱས་པའི་ཉེས་འཛུགས་འོག་སྔ་ལོའི་ཕྱི་ཟླ་ ༤ པའི་ནང་ Serbia གྱི་རྒྱལ་ས་Belgrade ནས་འཛིན་བཟུང་གིས་ཨ་རིར་རྩིས་སྤྲོད་ཆེད་དུ་བཟང་བཙོན་དུ་བཞག་ཀྱང་། ཁོང་གཉིས་བཟང་བཙོན་ནས་བྲོས་ཏེ་སྒེར་བདག་གནམ་གྲུ་བརྒྱུད་རྒྱ་ནག་གི་རྒྱལ་ས་པེ་ཅིང་དུ་ཕྱིན་པའི་རྗེས་ནས་བཟུང་ད་བར་གར་སོང་ཆ་མེད་ལྟ་བུར་གྱུར་ཡོད་པ་རེད། ཁ་སང་ Daily mail གསར་ཁང་གི་དྲྭ་གནས་ཐོག་གསར་དུ་ཐོན་པའི་གནས་ཚུལ་ནང་གསལ་ལྟར་ན། John Miller གྱིས་དེ་སྔ་ Scotland Yard དེ་དབྱིན་ཡུལ་གྱི་དབུས་ཉེན་རྟོག་ལས་ཁུངས་ཀྱི་སོ་མྱུལ་བ་ཟུར་པ་ Keith Hunter ཞུ་བ་ཁོང་གི་རོགས་པ་བླངས་ཏེ་རྒྱུན་དུ་རྒྱ་ནག་ལ་སྐྱོན་བརྗོད་ཤུགས་ཆེ་བྱེད་མཁན་ཡུལ་དེའི་གྲོས་ཚོགས་འཐུས་མི་བདུན་དང་འབྲེལ་བའི་གསང་བའི་གནས་ཚུལ་བསྡུ་རུབ་བྱས་ཡོད་པ་རེད་འདུག རྒྱ་ནག་གིས་དབྱིན་ཡུལ་གྲོས་ཚོགས་འཐུས་མི་ Tom Tugendhat ལགས་དང་ Sir Iain Duncan Smith ལགས། Nusrat Ghani ལགས།  Neil O'Brien ལགས།  Tim Loughton ལགས།  དེ་བཞིན་ Lord Alton དང་ Baroness Kennedy ལགས་བཅས་ནི་ཤར་ཏུ་ཀི་སི་ཐན་ནང་གི་ཡུ་གུར་མི་རིགས་ཀྱི་ཡ་ང་བའི་གནས་སྟངས་ལ་སྐྱོན་བརྗོད་ཙམ་མ་ཟད། གནད་དོན་དེ་རྒྱལ་སྤྱིའི་གདེང་ཆའི་ཐོག་གླེང་སློང་གནང་བའི་རྐྱེན་གྱིས་རྒྱ་ནག་གཞུང་གིས་སྲིད་དོན་ཉེས་ཆད་བཀལ་བ་ཤ་སྟག་ཡིན་པ་རེད། དབྱིན་ཡུལ་མི་སེར་ཡིན་པ་ John Miller དང་ཉེན་རྟོག་པ་ཟུར་པ་ Keith Hunter གཉིས་ཀྱི་ཕན་ཚུན་འབྲེལ་བ་བྱས་པའི་འཕྲིན་ཐུང་ནས་ཤེས་རྟོགས་བྱུང་བར་གཞིགས་ན། ཁོང་གཉིས་པོའི་གསང་མྱུལ་གྱི་ལས་གཞི་དེ་ནི་རྒྱ་ནག་སྤྱི་བདེ་ལས་ཁུངས་ཀྱི་དཔོན་རིགས་མཐོ་གྲས་ Cui Guanghai གྱིས་ཧོང་ཀོང་ནང་བདག་གཉེར་བྱེད་བཞིན་པའི་འཕྲུལ་ཆས་ཀྱི་ཁེ་ལས་ཁང་ Fise Technology གྱི་བཀོད་སྒྲིག་བྱས་པ་ཞིག་ཡིན་པ་དང་། ལས་གཞི་དེའི་འོག་སྐབས་དེའི་དུས་ཀྱི་གྲོས་ཚོགས་ཀྱི་ཕྱི་འབྲེལ་ཚོགས་ཆུང་གི་ཚོགས་གཙོ་ཡིན་པའི་སྐུ་ཞབས་ Tom Tugendhat ལགས་དབུས་པའི་གྲོས་ཚོགས་འཐུས་མི་དེ་དག་ལ་ཞིབ་འཇུག་བྱས་པ་མ་ཟད། གྲོས་ཚོགས་འཐུས་མི་Tugendhat ལགས་དང་གྲོས་ཚོགས་འཐུས་མི་ Sir Iain གཉིས་ཀྱི་དཔལ་འབྱོར་དང་ཁ་པར་ནང་གི་ཞིབ་ཕྲའི་གནས་ཚུལ་སོགས་ Fise Technology ཁེ་ལས་ཁང་ལ་སྤྲད་ཡོད་པ་རེད་འདུག གནད་དོན་དེ་དང་འབྲེལ་གྲོས་ཚོགས་འཐུས་མི་ Sir Iain ལགས་ཀྱིས་ Daily mail གསར་ཁང་ལ་ཁོང་ཧ་ལས་སོང་ཞེས་གསུངས་པ་མ་ཟད། ཁོང་ལ་འདི་ལྟ་བུའི་གསང་མྱུལ་འབྱུང་བཞིན་པ་དེ་སུས་ཀྱང་བཤད་མེད་པ་དང་། ད་ཆ་རྒྱ་མིའི་གསང་མྱུལ་བ་དེ་རྒྱལ་ཁབ་ནས་བྲོས་ཚར་བའི་གནས་སྟངས་སོགས་འགྲེལ་བརྗོད་གནང་འདུག Daily mail གསར་ཁང་གིས་སྤེལ་བའི་ཐེངས་འདིའི་གནས་ཚུལ་ལ་གཞིགས་ན། དེ་སྔ་ཁེ་ན་ཊའི་གསར་འགོད་པ་དང་རྗེས་སུ་ཨ་རིའི་གསང་བའི་ལས་ཁུངས་ཆེད་ཕྱག་ལས་གནང་མྱོང་མཁན་ James DiFiore ལགས་ཀྱིས་ John Miller དང་ཁོང་གི་འབྲེལ་བ་ཡོད་པའི་མི་སྣ་ཁག་ཅིག་གི་དབར་ཕན་ཚུན་བཏང་རེས་བྱས་པའི་འཕྲིན་ཐུང་ ༩༠༠༠ ལྷག་གསར་ཁང་དེར་བཏང་འབྱོར་བྱུང་ཡོད་པ་དང་། James DiFiore ལགས་ནི་དེ་སྔ་ John Miller གྱིས་རྒྱ་ནག་གི་ལྟད་མོ་བ་ཚོར་དམིགས་དབེན་དུ་བཟུང་ནས་ཨ་རིར་ངོ་རྒོལ་གྱི་རྩོམ་ཡིག་དང་ Podcast གཏམ་གླེང་བརྒྱུད་ཨ་རི་ནག་པོ་བཟོ་དགོས་པའི་སྐུལ་མ་བཏང་མྱོང་མཁན་ཞིག་ཡིན་པ་རེད་འདུག

ཨ་རིའི་ཨེན་ཝི་ཊི་ཡ་ (Nvidia) འཕྲུལ་ལས་ཁང་གི་སྤྱི་ཁྱབ་འགན་འཛིན་ཇེན་སེན་ཧུ་ཧང་ (Jensen Huang)གིས་དོགས་གཞི་ཅན་གྱི་རྒྱ་ནག་གི་སོ་ཉུལ་བ་དང་ནང་འབྲེལ་བྱུང་བའི་གནས་ཚུལ་ཁས་ལེན་བྱས་པར། Nvidia འཕྲུལ་ལས་ཁང་གི་འགན་འཛིན་ལྷན་ཚོགས་ནས་ཇེན་སེན་ཧུ་ཧང་གི་བྱེད་ལས་ལ་ཞིབ་བཤེར་བྱ་རྒྱུ་ཡིན་པ་བསྒྲགས་འདུག དེ་ཡང་ཨ་རིའི་ཚད་མཐོའི་འཕྲུལ་ཆས་ཉིང་ལྷེབ་(chip)གི་ཁེ་ལས་ཁང་ཨེན་ཝི་ཊི་ཡ་(Nvidia)ཡི་སྤྱི་ཁྱབ་འགན་འཛིན་ཇེན་སེན་ཧུ་ཧང་གིས། སིངྒ་པུར་ནང་རྟེན་གཞི་བྱས་པའི་མེ་ག་ཨིས་པིཊ་(Megaspeed) ཞེས་པའི་ཁེ་ལས་ཁང་གི་འགན་འཛིན་ཟུར་པ་རྒྱ་རིགས་བུད་མེད་ཨེ་ལེ་སི་ཧུ་ཧང་ (Alice Huang) དང་འབྲེལ་བ་ཡོད་ཚུལ་གྱི་གནས་ཚུལ་ཐོན་པར། ཁ་སང་ཇེན་སེན་ཧུ་ཧང་གིས་ཁེ་ལས་ཁང་གི་ལས་རོགས་རྣམས་ལ་བཏང་བའི་གློག་འཕྲིན་ནང་དུ། ཁོས་རྒྱ་རིགས་བུད་མེད་ཨེ་ལེ་སི་ཧུ་ཧང་དང་མཉམ་དུ་ནང་འབྲེལ་བྱུང་ཡོད་པའི་གནས་ཚུལ་ཁས་ལེན་དང་སྦྲགས། ཁོས་རང་གི་བཟའ་ཟླ་དང་། ལས་རོགས་ཡོངས་ལ་དགོངས་སེལ་ཞུས་འདུག འཕྲུལ་ཆས་སྙིང་ལེབ་ཁེ་ལས་ཁང་གི་འགན་འཛིན་གྱིས་དོགས་གཞི་ཅན་གྱི་རྒྱ་རིགས་སོ་ཉུལ་བ་དང་ནང་འབྲེལ་བྱུང་བའི་གནས་ཚུལ་ཁས་ལེན་བྱས་པའི་རྗེས། Nvidia ཁེ་ལས་ཁང་གི་འགན་འཛིན་ལྷན་ཚོགས་ནས་ཟླ་འདིའི་ཚེས་ ༨ ཉིན་ཁེ་ལས་ཁང་དེའི་འགན་འཛིན་གསར་འགྱུར་ནང་ཐོན་པ་བཞིན་ཕྱིའི་གསང་ཉུལ་བའི་མགོ་སྐོར་འོག་འཚུད་ཡོད་མེད་རང་དབང་ལྡན་པའི་སྒོ་ནས་ཞིབ་འཇུག་བྱ་རྒྱུ་ཡིན་པ་བསྒྲགས་ཡོད་པ་དང་། དེ་ལ་ཇེན་སེང་ཧུ་ཧང་གི་ངོས་ནས་རྒྱབ་སྐྱོར་ཆ་ཚང་བྱ་རྒྱུ་ཡིན་ཞེས་བཤད་འདུག དེ་བཞིན་འགན་འཛིན་ལྷན་ཚོགས་ནས་ཨ་རིའི་རྒྱལ་ཁབ་དང་དཔལ་འབྱོར་གྱི་བདེ་འཇགས་དེ་གལ་ཆེ་ཤོས་སུ་བརྩི་གི་ཡོད་པ་དང་། དེ་ཉིད་ Nvidia ཁེ་ལས་ཁང་དང་དེའི་ཤེར་བདག་ཚོའི་ཁེ་ཕན་ཆེད་དུའང་གནད་འགག་ཆེན་པོ་ཆགས་ཀྱི་ཡོད་སྐོར་བརྗོད་པའི་ཐོག འགན་འཛིན་ལྷན་ཚོགས་ངོས་ནས་ད་ལྟ་བར་དུ་གནད་དོན་དེ་བརྒྱུད་ནས་རྒྱལ་ཁབ་ཀྱི་བདེ་འཇགས་དང་། ཁེ་ལས་ཁང་གི་གསང་བ་ཤོར་ཡོད་པའི་དཔང་རྟགས་རྙེད་མེད་ནའང་། ལྷན་ཚོགས་ངོས་ནས་གནས་ཚུལ་ཚང་མར་ཞིབ་བཤེར་བྱ་རྒྱུ་ཡིན་པ་བརྗོད་འདུག རྩ་བའི་ཉེ་སྔོན་ནིའུ་ཡོག་དུས་བབ་ཀྱིས་གནས་ཚུལ་སྤེལ་བ་ལྟར་ན། ཨ་རིའི་འབྲེལ་ཡོད་གསང་བའི་ལས་ཁུངས་ནས་ཇེན་སེན་ཧུ་ཧང་དང་འབྲེལ་བ་ཉེ་བའི་རྒྱ་རིགས་ཨ་ལི་སི་ཧུ་ཧང་སྐོར་རྩད་ཞིབ་བྱས་པའི་རྗེས་སུ། མོ་རང་རྒྱ་ནག་གཞུང་གི་ཆེད་གནས་ཚུལ་མཁོ་སྒྲུབ་བྱེད་མཁན་སོ་བ་ཡིན་པ་བརྗོད་ཡོད། འོན་ཀྱང་། སྐབས་དེར་རྒྱ་ནག་གཞུང་གིས་གནས་ཚུལ་དེ་ནི་གཞི་རྩ་མེད་པ་དང་། རྒྱ་ནག་ལ་མིང་ཆད་བཟོ་རྒྱུའི་འབད་རྩོལ་ཡིན་ལུགས་བཤད་ནས་ངོས་ལེན་བྱས་མེད། ད་ལྟའི་ཆར་དོགས་གཞི་ཅན་གྱི་རྒྱ་མིའི་སོ་བ་ཨེ་ལེ་སི་ཧུ་ཧང་གིས། རྒྱ་ནག་གཞུང་ལ་གསང་བའི་གནས་ཚུལ་གང་སྤྲད་ཡོད་པ་དང་། ག་དུས་ནས་སྤྲོད་འགོ་བཙུགས་ཡོད་པ་གསལ་པོ་མེད། གནད་དོན་དེ་དང་འབྲེལ་ཏེ་ཨ་རིའི་ཆབ་སྲིད་ཚོགས་པ་གཉིས་ཀའི་གྲོས་ཚོགས་འཐུས་མི་ཚོས་གྲོས་ཚོགས་ནས་དེ་དོན་ཞིབ་འཇུག་བྱེད་དགོས་པའི་འབོད་སྐུལ་གནང་གི་ཡོད་པ་མ་ཚད། གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དང་། རྒྱ་ནག་ལས་དོན་ཚོགས་ཆུང་། གསང་བའི་ལས་དོན་ཚོགས་ཆུང་ནས་ Nvidia ཁེ་ལས་ཁང་གི་འགན་འཛིན་ཇེན་སེན་ཧུ་ཧུང་གི་མིང་ཐོག་ལ་ཡིག་འབྲེལ་བཏང་སྟེ། ཟླ་བ་ ༡༡ ཚེས་ ༡༨ ཉིན་ཁོ་ཉིད་གྲོས་ཚོགས་སུ་འདྲི་རྩད་ཆེད་ཡོང་དགོས་པའི་བརྡ་ལན་བཏང་འདུག གཞི་རྩའི་ཨ་རི་དང་རྒྱ་ནག་བར་གྱི་འཕྲུལ་རིག་ཐོག་གི་འགྲན་རྩོད་ནང་། ཨ་རི་གཞུང་གིས་མི་བཟོས་རིག་ནུས་བཟོ་སྐྲུན་ལ་དགོས་གལ་ཆེ་བའི་ཚད་མཐོའི་འཕྲུལ་ཆས་ཉིང་ལྷེབ་རྒྱ་ནག་ལ་ཚོང་སྒྱུར་བྱ་རྒྱུར་དམ་དོན་བྱེད་ཀྱི་ཡོད་པ་དང་། དམིགས་བསལ་ཕྱི་ལོ་ ༢༠༢༢ ནས་བཟུང་ཨ་རི་གཞུང་གིས་རྒྱལ་ཁབ་ཀྱི་བདེ་འཇགས་དང་། འཕྲུལ་རིག་དེས་རྒྱ་ནག་གི་དམག་དོན་ནུས་ཤུགས་ཆེ་རུ་གཏོང་སྲིད་པའི་སེམས་འཚབ་འོག  Nvidia ཁེ་ལས་ཁང་གིས་བཟོ་སྐྲུན་བྱས་པའི་ཚད་མཐོའི་ཉིང་ལྷེབ་ཕལ་ཆེ་བ་རྒྱ་ནག་ལ་ཚོང་སྒྱུར་བྱ་རྒྱུར་དམ་བསྒྲགས་བྱས་ཡོད། Nvidia ནི་ད་ལྟའི་ཆར་མི་བཟོས་རིག་ནུས་བཟོ་སྐྲུན་ལས་དོན་ཐད་དགོས་གལ་ཆེ་བའི་ཁེ་ལས་ཁང་ཞིག་ཡིན་པ་དང་། ཁེ་ལས་ཁང་དེས་མི་བཟོས་རིག་ནུས་བཟོ་སྐྲུན་པ་ Open AI དང་།  Metta སོགས་ལ་འཕྲུལ་ཆས་ཉིང་ལྷེབ་མཁོ་སྤྲོད་ཚོང་སྒྱུར་བྱེད་ཀྱི་ཡོད་པ་རེད། །

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ནི་དར་ལེནྜ་གྲོང་ཁྱེར་ཧེག་ནང་སྐོང་འཚོགས་གནང་བའི་ IPAC འམ་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ལོ་འཁོར་ལྷན་ཚོགས་ཐེངས་ ༦ པའི་ཐོག་མཉམ་ཞུགས་དང་འབྲེལ། ལྷན་ཚོགས་ཐོག་རྒྱལ་སྤྱིའི་གྲོས་ཚོགས་འཐུས་མི་རྣམས་ནས་བོད་དོན་ཐོག་རྒྱབ་སྐྱོར་རྒྱུན་སྐྱོང་དང་། ལྷག་པར་རྒྱ་ནག་གིས་རང་གི་འདོད་ཕྱོགས་ལྟར་རྒྱལ་སྤྱིའི་ཆབ་དཔལ་རིག་གསུམ་གྱི་སྒྲོམ་གཞིར་བསྒྱུར་བ་གཏོང་བཞིན་པའི་དམིགས་ཡུལ་དང་མཇུག་འབྲས། དེ་བཞིན་དེའི་ཤུགས་རྐྱེན་ཇི་ཐེབས་བཅས་ཀྱི་ཐོག་ཞིབ་འཇུག་གིས་དེ་འབྲེལ་མཉམ་ལས་ཐོག་གདོང་ལེན་གནང་དགོས་པ་གསུངས་འདུག གཞི་རྩའི་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ནི་དར་ལེནྜ་ནང་གི་འཚམས་གཟིགས་དང་འབྲེལ། ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་ནི་དར་ལེནྜ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་ལ་གཞུང་འབྲེལ་ཡི་གེ་ཞིག་གཏོང་བའི་བརྒྱུད། གྲོས་ཚོགས་འཐུས་མི་རྣམས་ནས་སྲིད་སྐྱོང་མཆོག་དང་མཇལ་འཕྲད་གནང་རྒྱུ་མེད་པའི་སྡིགས་ར་བསྐུལ་ཡོད་པ་མ་ཟད། བོད་ཀྱི་གནད་དོན་དེ་བཞིན་རྒྱ་ནག་རྒྱལ་ནང་གི་གནད་དོན་ཡིན་པས་དེ་འབྲེལ་ཕྱིའི་ཐེ་བྱུས་རིགས་ལ་རྒྱ་ནག་གཞུང་ཕྱོགས་ནས་མཐའ་གཅིག་ཏུ་ངོ་རྒོལ་ཡོད་ཅེས་བརྗོད་འདུག་པར། སྤྱི་ཚོགས་དྲྭ་ལམ་ཐོག་བོད་མི་གཙོས་བོད་དོན་རྒྱབ་སྐྱོར་བ་རྣམས་ནས་རྒྱ་གཞུང་གི་བྱེད་བབ་དེར་སྐྱོན་བརྗོད་ནན་པོ་དང་འབྲེལ། དེ་ནི་རྒྱ་ནག་གིས་བོད་དེ་བཞིན་འཆར་གཞི་ལྡན་པའི་ཐོག་ནས་རྒྱལ་སྤྱིའི་གཞུང་དང་ཚོགས་སྡེ་ཁག་ནས་ཁ་བྲལ་གཏང་རྒྱུར་དམིགས་པའི་ཐབས་ཤེས་ཤིག་ཡིན་པ་མ་ཟད། རྒྱལ་ཁབ་གཞན་གྱི་གྲོས་ཚོགས་འཐུས་མི་རྣམས་ནས་སུ་དང་མཇལ་འཕྲད་གནང་དགོས་མིན་ཐད་རྒྱ་གཞུང་ལ་དབང་ཆ་མེད་སྐོར་དང་ཆབས་ཅིག །འདི་ལྟ་བུའི་ཐེ་གཏོགས་བྱས་པ་ནི་ཧ་ཅང་གི་ཉེས་སྤྱོད་ཚབས་ཆེན་ཞིག་ཡིན་པ་སོགས་ཀྱི་མཆན་སྐྱོན་བཞིན་འདུག ད་དུང་ཁག་གཅིག་གིས་རྒྱ་གཞུང་གི་དྲག་གནོན་ལ་ལྟོས་མེད་ནི་དར་ལེནྜ་རྒྱལ་ཁབ་ཀྱི་གྲོས་ཚོགས་འཐུས་མི་རྣམས་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་མཇལ་འཕྲད་གནང་བར་དགའ་བསུའི་མཚམས་འདྲི་ཡང་ཞུ་བཞིན་འདུག དེ་དོན་བོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། རྒྱ་གཞུང་གི་དྲག་གནོན་ལ་ལྟོས་མེད། ཁ་སང་ནི་དར་ལེནྜ་གྲོང་ཁྱེར་ཧེག་ (Hague) དུ་སྐོང་འཚོགས་གནང་བའི་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ལོ་འཁོར་ལྷན་ཚོགས་ཐེངས་ ༦ པའི་ཐོག་གླིང་ཆེན་དྲུག་གི་རྒྱལ་ཁབ་ ༣༠ ནས་གྲོས་ཚོགས་འཐུས་མི་ ༥༢ མཉམ་ཞུགས་ཀྱིས་གཙོ་བོ་རྒྱ་གཞུང་གིས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐང་རྡོག་རོལ་གཙོས་མང་གཙོ་དང་བདེ་འཇགས། རང་དབང་། དེ་བཞིན་གོ་ལའི་ཆབ་དཔལ་རིག་གསུམ་གྱི་སྒྲོམ་གཞིར་རང་སྣང་གང་དྲན་གྱིས་བསྒྱུར་བ་གཏོང་བཞིན་པའི་གནད་དོན་དག་གོ་བསྡུར་གྱིས། དེ་འབྲེལ་མཉམ་ལས་ཐོག་རྒྱ་གཞུང་ལ་གདོང་ལེན་ཇི་བྱས་ཐོག་བསམ་ཚུལ་བརྗེ་ལེན་དང་། དེ་བཞིན་རྒྱ་ནག་དམར་གཞུང་གིས་རྒྱ་སྐྱེད་རིང་ལུགས་ཀྱི་སྲིད་བྱུས་ཐོག་ནས་རྒྱལ་སྤྱིའི་ནང་ཉེན་ཁ་འདྲ་མིན་བཟོས་དང་བཟོ་བཞིན་པར་གདོང་ལེན་བྱེད་ཕྱོགས་ཀྱི་ཐབས་བྱུས་ཐོག་བགྲོ་གླེང་གནང་ཡོད་འདུག སྐབས་དེར་སྲིད་སྐྱོང་མཆོག་གི་གསུང་བཤད་གནང་བའི་ཁྲོད། གྲོས་ཚོགས་འཐུས་མི་རྣམས་ནས་བོད་ཀྱི་ལོ་རྒྱུས་དེ་བཞིན་རྒྱ་གཞུང་གི་འཁྱོག་བཤད་ལ་མི་བརྟེན་པར་ཁུང་ལུང་ལྡན་པའི་ལོ་རྒྱུས་ཡིག་ཆ་དང་ཁྲིམས་ལུགས་ཀྱི་ལྟ་ཚུལ་ཐོག་ནས་གཟིགས་གལ་ཆེ་བའི་ཐོག །བོད་པའི་ལོ་རྒྱུས་དང་ཆབ་སྲིད་ཀྱི་གནས་བབ་ཐོག་ཡིད་རྟོན་རུང་བའི་གོ་རྟོགས་གོང་འཕེལ་གཏོང་དགོས་པའི་འབོད་སྐུལ་ཙམ་མ་ཟད། རྒྱ་ནག་གིས་རང་གི་འདོད་ཕྱོགས་ལྟར་རྒྱལ་སྤྱིའི་ཆབ་དཔལ་རིག་གསུམ་གྱི་སྒྲོམ་གཞིར་བསྒྱུར་བ་གཏོང་བཞིན་པའི་དམིགས་ཡུལ་དང་མཇུག་འབྲས། དེ་བཞིན་དེའི་ཤུགས་རྐྱེན་ཇི་ཐེབས་བཅས་ཀྱི་ཐོག་ཞིབ་འཇུག་གིས་ནུས་པ་མཉམ་སྤུངས་ཐོག་གདོང་ལེན་གནང་དགོས་པ་གསུངས་འདུག མ་ཟད། རྒྱ་ནག་གིས་བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་གནད་དོན་ཐོག་ཐེ་བྱུས་བྱེད་ཤུགས་ཆེ་རུ་འགྲོ་བཞིན་པ་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་བརྒྱུད་ནང་བསྟན་གྱི་བླ་ཆེན་ཁག་གི་ཡང་སྲིད་ངོས་འཛིན་གྱི་བརྒྱུད་རིམ་འདི་ཉིད་ཚོད་འཛིན་བྱེད་ཐབས་བྱེད་བཞིན་པར་ཐུགས་འཚབ་གསལ་སྟོན་དང་སྦྲགས། གྲོས་ཚོགས་འཐུས་མི་རྣམས་ནས་ཐེ་བྱུས་དེ་དག་ལ་མཐའ་གཅིག་ཏུ་ངོ་རྒོལ་དང་། དེ་འབྲེལ་དེ་སྔ་ཨ་རི་གཞུང་དང་། ཨིན་ཡུལ། འཇར་མ་ནི། ཧྥ་རན་སི། ནི་དར་ལེཎྜ། ཨཱ་ཨིས་ལེནྜ། ལི་ཐུ་ནི་ཡཱ། ཨི་སི་ཏོ་ནི་ཡ་བཅས་ཚུད་པའི་ཡུ་རོབ་ཀྱི་རྒྱལ་ཁབ་དྲུག་ནས་བོད་བརྒྱུད་ནང་བསྟན་གྱི་ཆོས་ལུགས་ཐོབ་ཐང་ལ་རྒྱབ་སྐྱོར་དང་། རྒྱ་ནག་གཞུང་གིས་ཡང་སྲིད་ངོས་འཛིན་གྱི་བརྒྱུད་རིམ་ལ་ངོ་རྒོལ་བྱེད་པའི་གྲོས་ཆོད་གཏན་འབེབས་གནང་དོན་ལྟར། རྒྱལ་ཁབ་གཞན་ཚོས་ཀྱང་དེ་ལྟར་གནང་སྐྱོང་ཡོང་བའི་ཞུ་སྐུལ་གནང་འདུག དེ་བཞིན་རྒྱ་གཞུང་གིས་འདས་པའི་ལོ་བཅུ་ཕྲག་ཁ་ཤས་རིང་བོད་ནང་དུ་ཆེས་གདུག་རྩུབ་ཅན་གྱི་སྲིད་བྱུས་ལག་བསྟར་ཁྲོད།  ད་ལྟའི་ཆར་བོད་ལྟ་བུར་མཚོན་ན་འཛམ་གླིང་ནང་རང་དབང་ཆུང་ཤོས་ཀྱི་རྒྱལ་ཁབ་ཤིག་ཏུ་ངོས་འཛིན་གནང་གི་ཡོད་པ་མངོན་གསལ་དང་འབྲེལ།  རྒྱ་གཞུང་གི་གཏན་འཇགས་སློབ་གྲྭར་བོད་པའི་བྱིས་པ་རྣམས་བཙན་དབང་གིས་བཅུག་ནས་བོད་མི་རིགས་ཀྱི་ངོ་བོ་རྩ་མེད་བཟོ་ཐབས་བྱེད་བཞིན་པ་དང་། ལྷག་པར་བོད་ཀྱི་ཁོར་ཡུག་གཏོར་བཤིག་ཁྲོད་བོད་ནང་གང་བྱུང་གཏེར་ཁ་སྔོག་འདོན་དང་ཆུ་མཛོད་སོགས་ཀྱི་འཛུགས་བསྐྱུན་ལས་གཞི་རྒྱ་ཆེ་སྤེལ་བ་དག་གིས་བོད་ཙམ་མ་ཡིན་པར་འཛམ་གླིང་སྤྱིའི་ཁོར་ཡུག་གནས་སྟངས་ལ་བསྒྱུར་བ་གཏོང་ཉེན་ཡིན་པའི་དེ་འབྲེལ་ཡིད་གཟབ་གནང་དགོས་གལ་དང་ཆབས་ཅིག །འདི་ལྟ་བུའི་ལས་གཞི་འཕྲལ་མར་མཚམས་འཇོག་ཡོང་ཐབས་སུ་རྒྱ་ནག་གཞུང་ལ་གནོན་ཤུགས་ཆེས་ཆེར་སྤྲོད་དགོས་པའི་ཞུ་སྐུལ་གནང་འདུག གཞི་རྩའི་སྲིད་སྐྱོང་མཆོག་གི་ཚོགས་འདུའི་ཞོར་དུ་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ཟུང་སྦྲེལ་ཚོགས་གཙོ་དང་བོད་དོན་ཐོག་ཡུན་རིང་རྒྱབ་སྐྱོར་གནང་མཁན་སྐུ་ཞབས་ (Jan Paternotte) ལགས་གཙོས་པའི་པ་ན་མ་དང་། ཉི་འོང་། ཐེ་ཝན། ཨིན་ཡུལ། ཪོ་མ་ནི་ཡ་སོགས་ཀྱི་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་ཙམ་མ་ཟད། དེ་བཞིན་གསར་འགྱུར་བརྒྱུད་ལམ་ཁག་གཅིག་གི་བཅར་འདྲིར་དང་ལེན་གནང་ཡོད་པ་རེད།

དཔལ་༸རྒྱལ་དབང་ཀརྨ་པ་རིན་པོ་ཆེ་མཆོག་གིས་དེ་རིང་ཕྱི་ཟླ་ ༡༡ ཚེས་ ༦ ཉིན་འབྲུག་ཐིམ་ཕུག་ཏུ་རྟེན་གཞི་བྱས་པའི་རྒྱལ་ཡོངས་རྩེད་ཐང་ Changlimithang དུ་མང་ཚོགས་དད་ལྡན་ཁྲི་ཚོ་བརྒལ་བར་ཚེ་དཔག་མེད་རྩ་གསུམ་དྲིལ་སྒྲུབ་ཀྱི་བཀའ་དབང་སྩལ་བ་དང་འབྲེལ།  འཛམ་གླིང་འདིའི་ནང་རྒྱལ་ཁབ་ ༡༩༥ ཡས་མས་ཡོད་པའི་ཁོངས་ནས་སྤྱིར་ཐེག་པ་ཆེན་པོ་དང་ཡང་སྒོས་སུ་གསང་སྔགས་རྡོ་རྗེ་ཐེག་པའི་བསྟན་པ་དར་སའི་རྒྱལ་ཁབ་རང་དབང་རང་བཙན་ལྡན་པ་དེ་འབྲུག་རྒྱལ་ཁབ་ཁོ་ན་ཡིན་པ་བཀའ་སྩལ་འདུག ཚེ་དཔག་མེད་རྩ་གསུམ་དྲིལ་སྒྲུབ་ཀྱི་བཀའ་དབང་མ་སྩལ་གོང་དུ་དཔལ་༸རྒྱལ་དབང་ཀརྨ་པ་རིན་པོ་ཆེ་མཆོག་གིས།  འབྲུག་རྒྱལ་ཁབ་འདི་ནི་འགྲོ་མགོན་དག་པོའི་བཀའ་བརྒྱུད་ལས་དཔལ་ལྡན་འབྲུག་པ་བཀའ་བརྒྱུད་ཀྱི་རྒྱལ་ཁབ་ཅིག་ཡིན་པར།  ཁྱད་པར་དུ་འཕགས་པའི་ཡུལ་འདིར་འདུ་འཛོམས་བྱུང་ཐུབ་པ་དེ་ཚང་མས་སྤོབས་པ་བྱེད་འོས་པ་ཞིག་དང་།  རྒྱལ་ཁབ་འདིར་སྐྱེས་པ་ཙམ་གྱི་དལ་འབྱོར་མི་ལུས་ཀྱི་མཐུན་རྐྱེན་ཚང་གི་ཡོད་པར་སྐལ་པ་བཟང་པོ་ཡིན་པ་བཀའ་སྩལ་འདུག  །མ་ཟད་རིན་པོ་ཆེ་མཆོག་གིས་དཔལ་༸རྒྱལ་དབང་ཀརྨ་པ་དང་འབྲུག་རྒྱལ་ཁབ་བར་དམ་ཚིག་གི་འབྲེལ་བའི་སྐོར་དང་འབྲེལ།  འབྲུག་པ་བཀའ་བརྒྱུད་ལ་འབྲུག་པ་ཞེས་པའི་མཚན་ཐོགས་པ་དེ་ཡང་གཙོ་བོ་འགྲོ་མགོན་གཙང་པ་རྒྱ་རས་ཀྱིས་འབྲུག་གི་གདན་ས་ཕྱག་བཏབ་པ་ལ་བརྟེན་ནས་བྱུང་བ་ཡིན་པ་སོགས་བཀའ་སྩལ་བ་དང་།  དེ་བཞིན་༸རྒྱལ་དབང་ཀརྨ་པ་སྐུ་ཕྲེང་གོང་མ་ཁག་གཅིག་གི་མཛད་པ་འཕྲིན་ལས་དང་སྐབས་དེའི་ཚེ་དེའི་དུས་སུ་སྐུ་ངལ་ཇི་བྱུང་བའི་ལོ་རྒྱུས་སྐོར་དང་།  ལྷག་པར་དུ་༸སྐུ་ཉིད་ངོས་ནས་ཀྱང་ལོ་ངོ་བཅུ་ཕྲག་འགའ་ཤས་རིང་འབྲུག་རྒྱལ་ཁབ་ཏུ་ཆིབས་བསྒྱུར་བསྐྱང་རྒྱུའི་ཐུགས་རེ་མཛད་བཞིན་པ་ལྟར།  ད་རེས་དགུང་ལོ་བཞི་བཅུ་ཞེ་གྲངས་ནང་ཕེབས་སྐབས་གཞི་ནས་ཡུལ་འདིར་ཆིབས་བསྒྱུར་བསྐྱངས་ཐུབ་པར་ཐུགས་དགྱེས་ཚོར་ཆེན་པོ་བྱུང་ཅེས་དང་།  དེ་ཡང་འབྲུག་མངའ་བདག་རྒྱལ་པོ་ཡབ་སྲས་སྐུ་འཁོར་དང་བཅས་པའི་བཀའ་དྲིན་ལ་བརྟེན་ནས་བྱུང་བར་ཐུགས་རྗེ་ཆེ་ཞུ་མཛད་འདུག  ལྷག་པར་ད་རེས་མངའ་བདག་རྒྱལ་པོའི་ཐུགས་སྐྱེད་དང་འབྲུག་མི་ཡོངས་ཀྱི་བསོད་ནམས་ལ་བརྟེན་ནས་འབྲུག་དགེ་ལེགས་ཕུག་ཏུ་ཉིན་ཞག་གཅིག་གི་ནང་མཆོད་རྟེན་ ༡༠༨ བཞེངས་ཐུབ་པ་དེ་འཛམ་གླིང་ཁྲོད་ཀྱི་ལོ་རྒྱུས་ནང་ད་བར་བྱུང་མྱོང་མེད་པ་མ་ཟད།  དེའི་ཐོག་འབྲུག་མི་ཡོངས་ཀྱི་སྐྱབས་གནས་དང་དེ་བཞིན་ནང་པ་སངས་རྒྱས་པའི་ཆོས་བརྒྱུད་རིས་མེད་ཀྱི་བླ་ཆེན་དང་དགེ་བའི་བཤེས་གཉེན་མང་པོ་ཞིག་དུས་གཅིག་ཏུ་འདུ་འཛོམས་བྱུང་བས་སྐལ་བཟང་གི་ཉི་མ་ཤར་བ་དེས་མ་འོངས་པར་འབྲུག་རྒྱལ་ཁབ་དེ་སྔར་ལས་ཀྱང་དར་ཞིང་རྒྱས་པ་དང་བདེ་སྐྱིད་ཕུན་སུམ་ཚོགས་པ་ཡོང་བའི་རྟེན་འབྲེལ་བཟང་པོ་ཡོད་པ་བཀའ་སྩལ་འདུག  རྩ་བའི་ཐེངས་འདིར་དཔལ་༸རྒྱལ་དབང་ཀརྨ་པ་རིན་པོ་ཆེ་མཆོག་གིས་འབྲུག་ཐིམ་ཕུག་ཏུ་མང་ཚོགས་ཁྲི་ཚོ་བརྒལ་བར་ཚེ་དཔག་མེད་རྩ་གསུམ་དྲིལ་སྒྲུབ་ཀྱི་བཀའ་དབང་སྩལ་བའི་འདུ་འཛོམས་ཐོག་འབྲུག་མངའ་བདག་རྒྱལ་པོ་ཡབ་སྲས་སྐུ་འཁོར་དང་བཅས་པ་གཙོས་པའི་མང་ཚོགས་དད་ལྡན་ཁྲི་ཚོ་བརྒལ་བ་ནས་མཉམ་ཞུགས་གནང་འདུག

༢༠༢༦ ལོའི་ཟླ་ ༧ པ་ནས་ ༩ པའི་བར་རྒྱ་ནག་ནང་གཞུང་ལ་ངོ་རྒོལ་གྱི་རྣམ་པ་འདྲ་མིན་ཁྱོན་ ༩༤༨ ལྷག་བྱུང་ཡོད་པ་མ་ཟད། དེ་དག་ནི་གཙོ་བོ་གླ་ཆ་མ་སྤྲད་པའི་དཀའ་ངལ་དང་། ས་ཆ་བཙན་འཕྲོག །བཙན་ཤེད་ཀྱིས་གནས་སྤོ་བྱས་པའི་གནད་དོན་སོགས་དང་འབྲེལ་བ་ཆགས་ཡོད་པ་མངོན་གསལ་གནང་འདུག དེའང་ཨ་རིར་རྟེན་གཞི་བྱས་པའི་ Freedom House འམ་རང་དབང་ཁང་པའི་ཁྱབ་ཁོངས་ China Dissent Monitor ཞེས་རྒྱ་ནག་ནང་ཞི་རྒོལ་གྱི་གནས་ཚུལ་མཁོ་སྒྲུབ་བྱེད་མཁན་གྱི་སྡེ་ཚན་ནས་སྙན་ཐོ་ཞིག་འདོན་སྤེལ་གནང་བའི་ནང་། འདི་ལོའི་ཕྱི་ཟླ་ ༧ པ་ནས་ ༩ པའི་བར་ཟླ་བ་གསུམ་རིང་རྒྱ་ནག་ཏུ་དམར་ཤོག་ཚོགས་པའི་དབང་བསྒྱུར་འོག་གཞུང་ལ་ངོ་རྒོལ་གྱི་རྣམ་པ་འདྲ་མིན་བྱུང་བའི་ཁྲོད་དུ་ལས་མི་ཚོས་ཆ་ཤས་མང་ཤོས་བཟུང་ཡོད་ཅིང་། དེས་ཐོ་འགོད་བྱས་པའི་ངོ་རྒོལ་ཡོངས་ཀྱི་བརྒྱ་ཆ་ ༤༤ ཟིན་ཡོད་པ་དང་དེའི་རྗེས་སུ་ཁྱིམ་བདག་ཚོས་བརྒྱ་ཆ་ ༢༧ དང་གྲོང་གསེབ་ཀྱི་མི་སེར་ཚོས་བརྒྱ་ཆ་ ༩ ཟིན་ཡོད་པ་མ་ཟད། ངོ་རྒོལ་ཁྲོད་མཉམ་ཞུགས་བྱེད་མཁན་གཞན་དག་ནི་ཚོང་པ་ཆུང་ངུ་དང་ཉོ་མཁན་མང་ཚོགས། ཕ་མ་དང་སློབ་མ། མ་འཛུགས་བྱེད་མཁན་དང་ཞུ་གཏུག་པ། དེ་བཞིན་ལས་འགུལ་བ་བཅས་ཡིན་པ་བཀོད་འདུག དེབཞིན་གོང་གསལ་ཟླ་བ་གསུམ་དེའི་རིང་ལ་ Guangdong ཞིང་ཆེན་ནང་ངོ་རྒོལ་གྱི་གྲངས་ཚད་མཐོ་ཤོས་ཐོ་འགོད་བྱས་ཡོད་ཅིང་། དེས་ངོ་རྒོལ་ཡོངས་ཀྱི་བརྒྱ་ཆ་བཅུ་གསུམ་བཟུང་ཡོད་པ་མ་ཟད།  དེའི་རྗེས་སུ་ (Henan, Shaanxi, Hebei and Shandong.) ཧ་ནན། ཤན་ཞི། ཧྲུ་པེ་དང་ཤན་ཏུང་ཞིང་ཆེན་བཅས་ཡིན་པ་དང་། ལྷག་པར་དུ་ཡིག་ཆར་འཁོད་པའི་ངོ་རྒོལ་གྱི་གྲངས་འབོར་དེ་ ༢༠༢༥ ལོའི་དུས་ཚིགས་དེ་ག་དང་བསྡུར་ན་བརྒྱ་ཆ་ ༣༣ ཆག་ཡོད་ཀྱང་། འདིས་མང་ཚོགས་ཀྱིས་སྲིད་གཞུང་ལ་ངོ་རྒོལ་ཉུང་དུ་ཕྱིན་པ་ཞིག་མཚོན་གྱི་མེད་ཅིང་། དེའི་ཚབ་ཏུ་རྒྱ་ནག་ནང་དམ་དྲག་དང་ཞིབ་བཤེར་ཤུགས་ཆེ་རུ་བཏང་བས་ངོ་རྒོལ་ལས་འགུལ་རྣམས་ཡིག་ཆར་འགོད་རྒྱུ་ཁག་པོ་བཟོས་ཡོད་པ་ཐེར་འདོན་གནང་འདུག དེ་བཞིན་ China Dissent Monitor ངོས་ནས་སྙན་ཐོའི་ནང་ས་ཆ་བཙན་ལེན་དང་བཙན་དབང་གིས་གནས་སྤོ་བྱེད་པ་ནི་ད་དུང་མང་ཚོགས་ཀྱི་མ་དགའ་བའི་རྒྱུ་རྐྱེན་གཙོ་བོ་ཞིག་ཏུ་གྱུར་ཡོད་པ་བསྐྱར་བཤད་དང་སྦྲགས། ༢༠༢༢ ཟླ་ ༦ ནས་བཟུང་ཚོགས་པ་དེས་ས་ཆ་འཕྲོག་བཅོམ་དང་བཙན་གྱིས་གནས་སྤོ་བྱེད་བཅུག་པ་དང་འབྲེལ་བའི་ངོ་རྒོལ་གྱི་དོན་རྐྱེན་ ༡,༡༤༦ ཡིག་ཆར་འགོད་ཡོད་ཅིང་། དེའི་ནང་ས་ཆ་བདག་བཟུང་བྱེད་རྒྱུ་མཚམས་འཇོག་དགོས་པའི་རེ་འདུན་འདོན་མཁན་གྱི་ས་གནས་མི་མང་དང་གཏོར་བཤིག་ལ་ངོ་རྒོལ་བྱེད་མཁན། གུན་གསབ་བམ་ཁས་ལེན་བྱས་པའི་གནས་སྤོ་ཁང་པ་རག་ཐབས་བྱེད་མཁན་བཅས་ཚུད་ཡོད། གནད་དོན་འདི་དག་གི་ཁྲོད་ནས་ ༥༥༨ ནི་གཞུང་གིས་ངོ་རྒོལ་བྱེད་མཁན་ཚོར་དམ་དྲག་བྱས་པ་དང་འབྲེལ་བ་ཆགས་ཡོད་པ་མ་ཟད། མི་ཁ་ཤས་ཀྱིས་རང་གི་ཁང་པ་གཏོར་བཤིག་བཏང་ནས་ལོ་མང་སོང་ཡང་མུ་མཐུད་ངོ་རྒལ་བྱས་ཡོད་ཅིང་། ཉུང་མཐར་གནད་དོན་ ༡༨ ཁྲོད་ཡུལ་མི་རྣམས་ཀྱིས་ལོ་ ༥ ལྷག་གི་རིང་ལ་ངོ་རྒོལ་བྱས་ཡོད་པ་དང་། གཞན་ཡང་ཀྭང་ཀྲོའུ་ (Guangzhou) ཡི་རྩོད་གཞི་གཅིག་ནི་ལོ་ངོ་ ༢༠ རིང་མུ་མཐུད་བྱུང་ཞིང་། ས་གནས་མི་མང་གིས་ད་དུང་ཡང་གུན་གསབ་དང་ཁང་པ་གསར་པ་དགོས་པའི་རེ་འདུན་འདོན་བཞིན་ཡོད་པ་གསུངས་འདུག སྙན་ཐོ་དེས་རྒྱ་ནག་གི་རྒྱུན་རིང་བའི་ས་ཁང་ཉམས་རྒུད་དང་དཔལ་འབྱོར་བསྐྱར་གསོ་སྙོམས་པོ་མ་བྱུང་བའི་ཁྲོད་ལས་མིའི་འཁྲུག་ཆ་དང་ངོ་རྒོལ་ཇེ་མང་དུ་འགྲོ་བཞིན་ཡོད་པ་ཡང་གསལ་བཏོན་བྱས་ཡོད་པ་མ་ཟད། ས་ཁང་འཛུགས་སྐྲུན་བྱེད་མཁན་དང་ཨར་ལས་གན་རྒྱ་འཇོག་མཁན་ཚོར་དཔལ་འབྱོར་གྱི་དཀའ་ངལ་འཕྲད་པ་དེས་ལས་མི་མང་པོ་ཞིག་ལ་གླ་ཆ་མ་སྤྲོད་པར་ལུས་ཡོད་འདུག དེ་དང་ཆབས་ཅིག China Dissent Monitor གིས་རྒྱ་ནག་ནང་གཞུང་ལ་ངོ་རྒོལ་བྱེད་མཁན་རྣམས་ནི་རྒྱུན་དུ་མི་ཚོགས་གཅིག་པ་ཡིན་པ་ཤེས་རྟོགས་བྱུང་ཡོད་པ་དང་། ལས་གཞི་འདིའི་ཆེད་ཕྱི་ལོ་ ༢༠༢༢ ལོའི་ཟླ་ ༦ པ་ནས་གནས་ཚུལ་བསྡུ་རུབ་བྱེད་འགོ་བཙུགས་པ་ནས་བཟུང་། ངོ་རྒོལ་གྱི་དོན་རྐྱེན་ ༡༦,༨༤༥ ཐོ་འགོད་བྱས་པའི་ཁྲོད་ནས། ཉུང་མཐར་ཡང་ ༡,༣༥༩ ནི་ངོ་རྒོལ་གྱི་གནད་དོན་གཞན་དང་འབྲེལ་བ་ཡོད་པ་ཐེར་འདོན་གནང་འདུག དེ་མིན་སྙན་ཐོའི་ནང་གྲོང་གསེབ་ཀྱི་ཡུལ་མི་དང་དངུལ་རྩིས་ཀྱི་ཚོང་ཤག་རྣམས་ནི་རྒྱུན་མཐུད་ཀྱི་ངོ་རྒོལ་ལས་འགུལ་ནང་མཉམ་ཞུགས་བྱེད་མཁན་གཙོ་བོ་ཡིན་པ་དང་། དེ་དག་ནི་ས་ཆ་བཙན་འཕྲོག་དང་། གུན་གསབ། དངུལ་རྩིས་ཀྱི་གྱོང་གུད་བཅས་དང་འབྲེལ་བའི་རྩོད་གཞི་རིང་པོ་དག་ལས་བྱུང་བ་ཡིན་པར་བཤད་འདུག གཞི་རྩའི་རང་དབང་ཁང་པའི་ཁྱབ་ཁོངས་ China Dissent Monitor ཞེས་རྒྱ་ནག་ནང་ཞི་རྒོལ་གྱི་གནས་ཚུལ་མཁོ་སྒྲུབ་བྱེད་མཁན་གྱི་སྡེ་ཚན་ནས་འདི་ལོའི་ཟླ་ ༡ འགོ་སྟོད་དུའང་སྙན་ཐོ་ཞིག་འདོན་སྤེལ་གནང་བའི་ནང་། རྒྱ་ནག་ཏུ་དམར་ཤོག་ཚོགས་པའི་དབང་བསྒྱུར་འོག་གཞུང་ལ་ངོ་རྒོལ་གྱི་ལས་འགུལ་རིགས་སྤེལ་རྒྱུར་ཧ་ཅང་ཉེན་ཁ་ཆེ་བ་དེ་ལྟར་ཡང་། འདས་པའི་ཕྱི་ལོ་ ༢༠༢༥ ལོའི་ནང་རྒྱ་ནག་མང་ཚོགས་ཀྱིས་སྲིད་གཞུང་ལ་ངོ་རྒོལ་དོན་རྐྱེན་ཁྱོན་ ༥༠༠༠ ལྷག་བྱུང་ཡོད་པ་དེ་ནི་དེ་སྔའི་ལོ་དང་བསྡུར་ན་བརྒྱ་ཆ་ ༤༨ ཀྱིས་འཕར་ཡོད་སྐོར་བཀོད་འདུག མ་ཟད་ཕྱི་ལོ་ ༢༠༢༥ ལོའི་རྒྱ་ནག་གི་ངོ་རྒོལ་རླབས་རྒྱུན་ནི་སྲིད་དབང་གི་ཞན་ཆ་མངོན་གསལ་བྱས་པའི་བརྡ་མཚོན་ཞིག་ཡིན་པ་དང་། སྲིད་འཛིན་ཞི་ཅིན་ཕིང་གིས་དབང་ཆ་སྒྲིལ་བཞིན་པའི་སྐབས་འདིར། གནད་དོན་འདི་དག་གལ་ཏེ་སྣང་མེད་སྐྱུར་འཇོག་བྱེད་ན། དམར་ཤོག་ཚོགས་པས་ད་བར་འཇིགས་སྣང་ཆེན་པོ་བྱེད་བཞིན་པ་སྟེ། རྒྱལ་ཁབ་ཀྱི་བརྟན་ལྷིང་མེད་པར་འགྱུར་རྒྱུར་སྐུལ་འདེད་གཏོང་གི་རེད་ཅེས་གསུངས་ཡོད་པ་རེད།

དབྱིན་ཡུལ་གྲོས་ཚོགས་ཀྱི་ཚོགས་ཆུང་ཞིག་ནས་རྒྱ་ནག་དང་དབྱིན་ཡུལ་གྱི་དཔལ་འབྱོར་འབྲེལ་ལམ་སྐོར་གྱི་སྙན་ཐོ་ཞིག་འདོན་སྤེལ་བརྒྱུད།  ཡུལ་དེའི་སྲིད་གཞུང་ནས་ད་བར་རྒྱ་ནག་ཐོག་འཐབ་ཇུས་ལྡན་པའི་ཡུན་རིང་གི་སྲིད་བྱུས་གཏན་འབེབས་བྱེད་རྒྱུའི་དེ་སྔའི་ཁས་ལེན་ལག་བསྟར་བྱས་མེད་པར་སྐྱོན་བརྗོད་དང་འབྲེལ།  གནས་སྟངས་དེས་དབྱིན་ཡུལ་གྱི་དཔལ་འབྱོར་དང་རྒྱལ་ཁབ་ཀྱི་བདེ་འཇགས་ཉེན་ཁའི་ནང་ལྷུང་སྲིད་པའི་ཉེན་བརྡ་བཏང་འདུག དེ་ཡང་ཉེ་ལམ་ཕྱི་ཚེས་ ༢ ཉིན་དབྱིན་ཡུལ་གྲོས་ཚོགས་འོག་མའི་བསྐོ་བཞག་བྱས་པའི་ The Business, Innovation, Science and Trade Committee (BIST) ཞེས་དབྱིན་ཡུལ་གྱི་ཚོང་ལས་དང་། གསར་གཏོད། ཚན་རིག །ཚོང་དོན་ལྷན་ཁང་དང་དེའི་འབྲེལ་ཡོད་གཞུང་གི་ལས་ཁུངས་ཁག་གི་འགྲོ་གྲོན་དང་འཛིན་སྐྱོང་། སྲིད་བྱུས་བཅས་ལ་ཞིབ་འཇུག་གནང་མཁན་ཚོགས་ཆུང་གི་ངོས་ནས་རང་གི་དྲྭ་གནས་ཐོག་ China and the UK economy: the case for risk-managed growth ཞེས་རྒྱ་ནག་དང་དབྱིན་ཡུལ་གྱི་དཔལ་འབྱོར་གྱི་ཉེན་ཁ་དོ་དམ་བྱས་པའི་འཕེལ་རྒྱས་ཀྱི་གནད་དོན་སྐོར་སྙན་ཐོ་ཞིག་འདོན་སྤེལ་གྱིས།  ཡུལ་དེའི་སྲིད་གཞུང་ངོས་ནས་དེ་སྔ་ཕྱི་ལོ་ ༢༠༢༤ ལོར་རྒྱ་ནག་ཐོག་ཚོང་དོན་དང་འབྲེལ་བའི་དགོས་ངེས་ཀྱི་ཉེན་ཁའི་དཔྱད་ཞིབ་དང་གདོང་ལེན་གྱི་འཐབ་ཇུས་ཆ་ཚང་བ་གསལ་པོར་བཏོན་རྒྱུའི་ཁས་ལེན་བྱས་པ་དེ་མཇུག་སྐྱོང་མེད་པའི་གནས་སྟངས་འོག་ད་དུང་རྒྱ་ནག་དང་དཔལ་འབྱོར་གྱི་འབྲེལ་བ་བསྐྱར་གསོ་བྱས་ཏེ་ཚོང་དོན་འབྲེལ་ལམ་ཟབ་ཏུ་གཏོང་བཞིན་པར་སྐྱོན་བརྗོད་བྱས་འདུག་པ་མ་ཟད།  སྲིད་གཞུང་གི་ཐག་ཆོད་གནང་སྟངས་དེས་དབྱིན་ཡུལ་རྒྱལ་ཁབ་ཀྱི་བདེ་འཇགས་དང་དཔལ་འབྱོར་བརྟན་ལྷིང་སྲུང་སྐྱོབ་ལ་ཉེན་ཁ་ཆེན་པོ་ཆགས་སྲིད་པ་གསུངས་འདུག གྲོས་ཚོགས་ཚོགས་ཆུང་གིས་འདོན་སྤེལ་གནང་བའི་སྙན་ཐོའི་ནང་དུ་གཙོ་བོ་གནད་དོན་གཉིས་ཀྱི་སྐོར་གླེང་སློང་བྱས་ཡོད་པ་སྟེ། གཅིག་ནི།  དབྱིན་ཡུལ་སྲིད་གཞུང་གིས་རྒྱ་ནག་གི་གློག་འདོན་རླུང་འཁོར་བཟོ་སྐྲུན་བྱེད་མཁན་གྱི་ཁེ་ལས་ Ming Yang གི་དབྱིན་སྒོར་ཐེར་འབུམ་ ༡.༥ ཡི་མ་དངུལ་བཏང་ནས་ Scotland སི་ཀོཊ་ལེནྜ་དུ་བཟོ་གྲྭ་འཛུགས་རྒྱུའི་ཐག་གཅོད་མཐའ་མའི་དུས་སུ་རྒྱལ་ཁབ་བདེ་འཇགས་ཀྱི་རྒྱུ་མཚན་དུ་བྱས་ནས་བཀག་འགོག་བྱས་པའི་གནད་དོན་དང་།  དེ་བཞིན་གཉིས་པ།  སྲིད་གཞུང་གིས་དབྱིན་ཡུལ་ལྕགས་བཟོ་ཁེ་ལས་ British Steel ཞེས་པ་དེ་རྒྱ་ནག་གི་ཚོང་བདག་ཚོའི་ལག་ནས་ཛ་དྲག་གིས་བླངས་པའི་ཐག་ཆོད་དེ་དག་གིས་དབྱིན་ཡུལ་ནང་ཚོང་ལས་ངེས་གཏན་མེད་པའི་གནས་སྟངས་བཟོས་ཡོད་པ་མ་ཟད།  དབྱིན་ཡུལ་གྱི་བཟོ་གྲྭ་ཁག་གིས་རྒྱ་ནག་དང་འབྲེལ་བའི་མ་འཛུགས་དང་ཚོང་ལས་ཀྱི་བྱེད་སྒོ་སྤེལ་རྒྱུའི་འཆར་གཞི་འགོད་རྒྱུར་དཀའ་ངལ་བཟོས་ཡོད་པ་གསུངས་འདུག དབྱིན་ཡུལ་གྲོས་ཚོགས་འོག་མའི་ཚོགས་ཆུང་གི་ཚོགས་གཙོ་ Liam Byrne མཆོག་གིས།  དབྱིན་ཡུལ་སྲིད་གཞུང་ངོས་ནས་གལ་ཏེ་ལམ་སྟོན་གསལ་པོ་མེད་པའི་ཐོག་དུས་ནས་དུས་སུ་རྒྱ་ནག་ཐོག་གི་སྲིད་བྱུས་ལ་འགྱུར་བ་གཏང་ན།  ཡུལ་དེའི་ཚོང་ལས་ཁང་ཚོས་མ་འོངས་པར་འཆར་འགོད་བྱེད་ཐུབ་ཀྱི་མེད་པ་བརྗོད་འདུག་ལ།  རྩ་བའི་དབྱིན་ཡུལ་གྱི་བློན་ཆེན་ཚོས་གསལ་ཁ་དང་བརྟན་ལྷིང་གི་གནས་སྟངས་བསྐྲུན་རྒྱུའི་ཁས་ལེན་བྱས་ཡོད་ཀྱང་།  དོན་དངོས་ཐོག་ཡུལ་དེའི་ཚོང་དོན་གྱི་གོ་སྐབས་ཤོར་དུ་བཅུག་པ་མ་ཟད།  ཉེན་ཁ་དོ་དམ་མ་བྱས་པར་ལྷུང་དུ་བཅུག་ཡོད་པ་གསུངས་འདུག སྤྱིར་ཚོགས་ཆུང་ངོས་ནས་རྒྱ་ནག་ནི་ད་ལྟའང་དབྱིན་ཡུལ་གྱི་དཔལ་འབྱོར་གྱི་མཉམ་ལས་རོགས་པ་གལ་ཆེན་ཞིག་ཡིན་པ་ངོས་འཛིན་བྱས་ཡོད་པ་དེ་ལྟར་ཡང་།  ཚོང་དོན་འབྲེལ་ལམ་དམ་ཟབ་ཏུ་གཏོང་བ་དེས་ཕན་ཚུན་མི་འོས་པའི་འགྲན་རྩོད་བྱེད་པ་དང་།  རྒྱ་ནག་གི་མཁོ་སྤྲོད་གཅིག་པུར་བརྟེན་དགོས་པ།  གསང་བའི་འཕྲུལ་རིག་དང་གནས་ཚུལ་བཤུ་ལེན།  བཙན་ཤེད་ངལ་རྩོལ་གྱིས་བཟོས་པའི་དངོས་ཟོག་ནང་འདྲེན་བྱེད་པ་སོགས་ཀྱི་ཉེན་ཁ་ཡོད་པ་གསུངས་འདུག ལྷག་པར་དུ་སྙན་ཐོའི་ནང་དབྱིན་ཡུལ་སྲིད་གཞུང་ངོས་ནས་རྒྱ་ནག་གི་ཚོང་འབྲེལ་དང་མ་འཇོག་ལ་ཚོད་འཛིན་བྱེད་དགོས་པའི་ལས་རིགས་གང་དང་གང་ཡིན་པ།  དེ་བཞིན་སྲུང་སྐྱོབ་འོས་འཚམ་འོག་མུ་མཐུད་ཚོང་དོན་གྱི་འབྲེལ་བ་བྱེད་ཆོག་པའི་ཁྱབ་ཁོངས་དང་ཚོང་འབྲེལ་སྐུལ་འདེད་གཏོང་དགོས་པའི་ལས་རིགས་གང་དང་གང་ཡིན་པ་བཅས་གསལ་པོར་ངོས་འཛིན་བྱེད་པའི་ཐོག་སྒྲིག་གཞི་གཏན་འབེབས་དགོས་པའི་སྐུལ་མ་གནང་འདུག

ཁ་སང་ཕྱི་ལོ་ ༢༠༢༦ ཕྱི་ཟླ་ ༡༠ ཚེས་ ༣༡ ཉིན་བོད་དོན་ལ་ཡུན་རིང་ནས་རྒྱབ་སྐྱོར་གནང་མཁན་ ICT རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ Richard Gere ལགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་འདུག མཇལ་ཁ་གྲུབ་མཚམས་སྐུ་ཞབས་ཁོང་གིས་གསར་འགོད་པའི་དྲི་བར་ལན་འདེབས་ཁྲོད། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་གསར་དེ་མི་རིགས་མཐུན་སྒྲིལ་གྱི་ཁྲིམས་ཞིག་མ་ཡིན་པར་དེ་ནི་རྒྱ་ནག་གི་བཙན་དབང་འོག་ཡོད་པའི་གྲངས་ཉུང་མི་རིགས་ཚང་མའི་ངོ་བོ་རྩ་མེད་གཏོང་ཆེད་ཀྱི་ཁྲིམས་ཞིག་ཡིན་པར་སྐྱོན་བརྗོད་དང་འབྲེལ། རྒྱ་ནག་དམར་ཤོག་ཚོགས་པ་ཐོག་མ་འགོ་འཛུགས་སྐབས་མའོ་ཙེ་ཏུང་ཁོ་རང་ཡིནའང་རྒྱ་ནག་གི་སྒྲོམ་གཞིའི་འོག་གྲགས་ཉུང་མི་རིགས་ཚོས་རང་གི་རིག་གཞུང་སྲུང་སྐྱོབ་བྱེད་ཆོག་པར་ངོས་ལེན་བྱེད་ཀྱི་ཡོད་པ་དེ་ལྟར་ཡང་། ད་ཆ་རྒྱ་ནག་གཞུང་གི་བྱེད་སྟངས་དེ་དག་གྲངས་ཉུང་མི་རིགས་ཡོངས་སུ་རྫོགས་པ་རྩ་མེད་གཏོར་བཤིག་གཏོང་གི་ཡོད་པ་ཐེེར་འདོན་གནང་འདུག སྐུ་ཞབས་ཁོང་གིས་ད་དུང་། གཞིས་བཞུགས་བོད་མི་ཚོར་བརྡ་ལན་དུ། ཁྱེད་རྣམས་བོད་ནང་ཡོད་པ་དུས་ནམ་ཡང་བརྗེད་མེད་ཅེས་དང་། བཙན་བྱོལ་དུ་ང་ཚོས་ནུས་པ་གང་ཡོང་དང་གོ་སྐབས་ནམ་ཡིན་ལ་བོད་དོན་ཐོག་ཕྱག་ལས་མུ་མཐུད་གནང་བཞིན་ཡོད་པ་མ་ཟད། སྐུ་ཞབས་ཁོང་སྒེར་ལ་མཚོན་ནའང་སྐུ་ཚེ་ཧྲིལ་པོ་བོད་མི་ཚོར་རྒྱབ་སྐྱོར་གནང་དང་གནས་མུས་ཡིན་པ་གསུངས་འདུག རྩ་བའི་ཁ་སང་བཞུགས་སྒར་༸རྒྱལ་བའི་ཕོ་བྲང་དུ་ Richard Gere ལགས་དང་ལྷན་དུ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་ནས་ཀྱང་མཇལ་བཅར་ཞུས་འདུག་པ་དང་། ཁ་ཉིན་ཕྱི་ཚེས་ ༣༠ ཉིན་རྣམ་པ་ཁོང་གཉིས་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཐུག་འཕྲད་གནང་ཡོད་པ་མ་ཟད། དེ་རིང་ཕྱི་ཚེས་ ༡ ཉིན་བཞུགས་སྒར་དུ་འཚོག་བཞིན་པའི་རྡ་རམ་ས་ལ་རྒྱལ་སྤྱིའི་གློག་བརྙན་དུས་སྟོན་ཐོག་གསུང་བཤད་ཅིག་ཀྱང་གནང་ཡོད་པ་རེད། 

དབྱིན་ཡུལ་གྲོས་ཚོགས་འཐུས་མི་ཞིག་གིས་ཡུལ་དེའི་བློན་ཆེན་དང་བློན་ཆེན་གཞོན་པར་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་གསར་པ་དེ་དབྱིན་ཇིའི་རྒྱལ་ཁབ་ནང་ལག་བསྟར་བྱེད་མི་ཐུབ་པའི་འགན་ལེན་དང་རྒྱ་ནག་གཞུང་ཚབ་ལ་རྒྱལ་མཚམས་ལས་བརྒལ་བའི་དྲག་གནོན་ལ་བཟོད་བསྲན་བྱེད་རྒྱུ་མིན་པའི་ཉེན་བརྡ་གཏོང་དགོས་པའི་འབོད་སྐུལ་ཞུས་འདུག དེ་ཡང་ཟླ་འདིའི་ཚེས་ ༢༠ ཉིན་དབྱིན་ཇིའི་རྒྱལ་སྲུང་བློན་ཆེན་སྐུ་ཞབས་ Dan Jarvis ལགས་དང་དེ་བཞིན་དབྱིན་ཇིའི་གཞུང་གིས་རྒྱ་གར་དང་ཞི་བདེ་རྒྱ་མཚོ་མངའ་ཁུལ་གྱི་ལས་དོན་ཐོག་ཕྱག་ལས་གནང་མཁན་བློན་ཆེན་གཞོན་པ་ལྕམ་སྐུ།  Baroness Winterton of Doncaster གཉིས་ལ་དབྱིན་ཇིའི་གྲོས་ཚོགས་འཐུས་མི་ལྕམ་ Alicia Kearns ལགས་ཀྱིས་ཕུལ་བའི་ཞུ་ཡིག་དེའི་ནང་། ཁོང་ནས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་གཞི་གསར་པ་དེར་སེམས་འཚབ་གནང་གི་ཡོད་པ་དང་ཁྲིམས་གཞི་དེས་རྒྱ་ནག་དམར་ཤོག་ཚོགས་པའི་སྟངས་འཛིན་དེ་མི་རིགས་གྲངས་ཉུང་དང་སྐྱོན་བརྗོད་བྱེད་མཁན་ཚོར་མཐའ་མཚམས་ལས་བརྒལ་ནས་རྒྱ་སྐྱེད་གཏོང་ཐབས་བྱེད་ཀྱི་ཡོད་པ་གསུངས་ཏེ་དབྱིན་ཇིའི་གཞུང་ལ་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་དེ་དབྱིན་ཇིའི་རྒྱལ་ཁབ་ནང་ལག་བསྟར་མི་བྱེད་པའི་འགན་ལེན་དང་རྒྱ་ནག་གཞུང་ཚབ་ལ་རྒྱལ་མཚམས་ལས་བརྒལ་བའི་དྲག་གནོན་ལ་བཟོད་བསྲན་བྱེད་རྒྱུ་མིན་པའི་ཉེན་བརྡ་གཏོང་དགོས་པའི་ནན་བརྗོད་གནང་འདུག དེ་བཞིན་ལྕམ་སྐུ་ཉིད་ཀྱིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་རྒྱ་ནག་གི་མི་རིགས་མཐུན་སྒྲིལ་ཁྲིམས་ཡིག་ཞེས་པ་ལག་བསྟར་བྱས་ཏེ། བོད་པ་དང་། ཡུ་གུར་བ། སོག་པོ་ལྟ་བུའི་མི་རིགས་ཉུང་ཤས་ཀྱི་རྒྱ་རིགས་མ་ཡིན་པའི་རང་མི་རིགས་ཀྱི་ཁྱད་ཆོས་མཚོན་པའི་རྣམ་འགྱུར་སྟོན་རྒྱུ་དེ་ནག་ཉེས་སུ་རྩིས་ཡོད་པ་མ་ཟད། རྒྱ་ནག་དམར་ཤོག་ཚོགས་པར་ངོ་རྒོལ་བྱེད་མཁན་ཧོང་ཀོང་གི་མི་སེར་རྣམས་ལ་ཡང་ཁྲིམས་ཐོག་ནས་དཀའ་ངལ་གསར་པ་བཟོས་ཡོད་པ་གསུངས་འདུག ལྷག་པར་དུ་ཁྲིམས་གསར་པ་འདིའི་ནང་མི་རིགས་མཐུན་སྒྲིལ་ཡར་ཐོན་ལ་གནོད་སྐྱོན་གཏོང་བར་བཀག་སྡོམ་བྱེད་པའི་ཆ་རྐྱེན་འཁོད་ཡོད་ཅིང་།  དོན་ཚན་ ༦༣ པའི་ནང་དུ་ཁྲིམས་ཀྱི་འགན་འཁྲི་དེ་རྒྱ་ནག་གི་ཕྱི་ཕྱོགས་སུ་ཡོད་པའི་མི་སྒེར་དང་མི་སེར་ཚོར་ཡང་ཁྱབ་པར་བཟོས་འདུག་པ་མ་ཟད། རྒྱ་ནག་དམར་ཤོག་ཚོགས་པས་དོན་དངོས་ཐོག་འཛམ་གླིང་གི་ས་གནས་གང་སར་ཡོད་པའི་མི་སུ་འདྲ་ཞིག་ཡིན་རུང་། ཚོགས་པའི་སྣེ་ཁྲིད་འོག་གཅིག་གྱུར་བཟོ་བའི་ལས་གཞིར་ངོ་རྒོལ་བྱེད་མཁན་ཚང་མ་ནག་ཉེས་ཅན་དུ་སྒྱུར་ཐབས་བྱེད་བཞིན་ཡོད་པ་གསལ་སྟོན་གནང་འདུག ད་དུང་ཁྲིམས་འདིས་མི་རྣམས་རྒྱལ་ཁབ་གཞན་དུ་གནས་སྡོད་བྱེད་བཞིན་པའི་སྐབས་སུའང་ཤུགས་རྐྱེན་ཐེབས་ཐུབ་པ་སྟེ། དཔེར་ན་ཧོང་ཀོང་གི་རྒྱལ་ཁབ་བདེ་འཇགས་ཁྲིམས་ལུགས་ལྟ་བུ་རེད་ཅེས་དང་ལྷག་པར་དུ་དབྱིན་ཡུལ་ནང་གནས་སྡོད་བྱེད་བཞིན་པའི་ཧོང་ཀོང་བ་མང་པོ་ཞིག་གིས་རྒྱ་ནག་གཞུང་གི་སྲིད་བྱུས་ལ་ངོ་རྒོལ་བྱས་པའི་རྐྱེན་གྱིས་འཇིགས་སྐུལ་དང་འཇིགས་སྣང་གི་གནས་ཚུལ་འཕྲད་བཞིན་ཡོད་པ་མ་ཟད། ཧོང་ཀོང་གི་མང་གཙོའི་དོན་གཉེར་བ་ཁག་ཅིག་བཟུང་ནས་རྒྱ་ནག་གཞུང་ལ་རྩིས་སྤྲོད་བྱེད་མཁན་ལ་བྱ་དགའི་དངུལ་སྤྲོད་རྒྱུའི་ཁྱབ་བསྒྲགས་བྱས་ཡོད་པ་དང་དེ་བཞིན་ཁོ་ཚོ་བཙན་འཕྲོག་གིས་རྒྱ་ནག་གཞུང་ཚབ་ཁང་དུ་འཁྲིད་མཁན་ལའང་དངུལ་སྤྲོད་རྒྱུའི་གནས་ཚུལ་ཡང་ཐོན་ཡོད་པ་ལུང་འདྲེན་གནང་སྟེ་རྒྱ་ནག་དམར་ཤོག་ཚོགས་པའི་འཇིགས་སྐུལ་གྱི་ཁྲིམས་འདི་དབྱིན་ཡུལ་ནང་ལག་བསྟར་མི་བྱེད་པའི་ཆེད་དུ། གཞུང་གིས་གོམ་པ་གང་ཞིག་སྤོས་ཡོད་དམ་ཞེས་པའི་འདྲི་བ་བཏང་འདུག མ་ཟད་གྲོས་ཚོགས་འཐུས་མི་ཁོང་ནས་མི་མང་པོ་ཞིག་གིས་བོད་ཀྱི་ཆོས་ལུགས་ཉམས་ལེན་བྱེད་པའམ་ཡུ་གུར་གྱི་རིག་གནས་སྲོལ་རྒྱུན་ལ་བསྟེན་པ་ཙམ་གྱིས་ཀྱང་། རང་ཉིད་དམ་རང་གི་ནང་མི་ཚོར་དམིགས་འབེན་བཟུང་ཡོང་སྙམ་པའི་སེམས་འཚབ་གནང་བཞིན་ཡོད་པ་དང་། ལྷག་པར་དུ་དབྱིན་ཇིའི་ཕྱི་སྲིད་དང་འཕེལ་རྒྱས་ལས་ཁུངས་ནས་རྒྱ་ནག་གཞུང་ཚབ་ཁང་ལ། དབྱིན་ཇིའི་ས་ཐོག་ཏུ་རྒྱལ་མཚམས་ལས་བརྒལ་བའི་དྲག་གནོན་ནམ་ཁྲིམས་ལུགས་འདི་ཉིད་ལག་བསྟར་བྱེད་རྩིས་བྱེད་པར་དབྱིན་གཞུང་གིས་བཟོད་བསྲན་མེད་པའི་བརྡ་ལན་སྤྲད་ཡོད་དམ་ཞེས་པའི་འདྲི་བ་བཏང་བ་དང་ཆབས་ཅིག །ཁྲིམས་འདི་ནི་རྒྱ་ནག་དམར་ཤོག་ཚོས་པས་རང་གི་སྒེར་གཅོད་དབང་སྒྱུར་དེ་རྒྱལ་སྤྱིའི་ཐོག་རྒྱ་སྐྱེད་གཏོང་བའི་གོམ་སྟོབས་གཞན་ཞིག་ཡིན་པ་དང་གལ་ཏེ་སྔོན་འགྲོའི་གྲ་སྒྲིག་དང་ཟློག་ཐབས་རན་པོ་མ་བྱས་ན། རང་གི་མི་རིགས་ཀྱི་རྒྱབ་ལྗོངས་དང་རྒྱ་ནག་དམར་ཤོག་ཚོགས་པའི་རེ་བ་ལྟར་མ་བྱས་པའི་རྐྱེན་གྱིས་ཉེས་མེད་མི་སེར་ཚོ་ལ་ཆད་པ་ཕོག་སྲིད་པར་ནན་བརྗོད་གནང་འདུག