༸གོང་ས་མཆོག
༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོར་༸ཞབས་སོར་བདེ་བར་འཁོད་གནང་མཛད་པ།
དེ་རིང་ཟླ་ ༧ ཕྱི་ཚེས་ ༡ ཉིན་གྱི་སྔ་དྲོ་ཚོུད་ ༩།༣༠ ཐོག་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་ཀར་བར་རྫོང་ནས་མོན་གྷོ་འདོད་གླིང་འབྲས་སྤུངས་དགའ་ལྡན་ཕོ་བྲང་དུ་༸ཞབས་སོར་བདེ་བར་འཁོད་པ་དང་བསྟུན། ཕྱོགས་བཞུགས་སྤྱི་འཐུས་རྣམ་པ་དང་། དགེ་ལུགས་ཡོངས་ཀྱི་རྒྱལ་བའི་བཀའ་དྲིན་རྗེས་དྲན་གྱི་ཚོགས་གཙོ། གདན་ས་ཁག་གི་མཁན་པོ་རྣམ་པ། ས་འཐུས་ཚོགས་གཙོ། མཉམ་འབྲེལ་ཚོགས་གཙོ་བཅས་ཀར་བར་རྫོང་དུ་ཕེབས་བསུར་ཆེད་བཅར་ཞུས་ཡོད་པ་རེད།
༸གོང་ས་མཆོག་གིས་ཐོག་མར་བླ་སྤྱིར་གནས་གཟིགས་གནང་པ་དང་དེ་རྗེས་བཞུགས་ཁྲིར་ཞབས་སོར་བདེ་བར་འཁོད་མཚམས་དགའ་ལྡན་ཁྲི་རིན་པོ་ཆེ་མཆོག་ནས་མཎ་དྲལ་རྟེན་གསུམ་འདེགས་འབུལ་ཞུས་ཡོད་པ་རེད།
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་༸གང་ཉིད་གནས་དེར་ཆིབས་སྒྱུར་མཛད་དོན་གང་ཡིན་སྐོར་བཀའ་བསྩལ་དང་འབྲེལ་དད་ལྡན་སེར་སྐྱ་ཀུན་ལ་འཚམས་འདྲི་གནང་སོང་།
༸གང་ཉིད་མཆོག་གིས་མུ་མཐུད་དཔལ་ནཱ་ལེནྡྲ་ནས་བརྒྱུད་པའི་སེམས་ཁམས་རིག་པ་དང་འབྲེལ་བའི་ཆོས་བརྒྱུད་དེ་དག་ལོ་ངོ་སྟོང་ཕྲག་རིང་ང་ཚོ་བོད་པ་ཚོས་མི་རབས་ནས་མི་རབས་བར་རྒྱུན་འཛིན་བྱས་ཡོད་པ་དང་། ད་ཆ་འཛམ་གླིང་འདིར་ང་ཚོའི་ངོས་ནས་ཞབས་འདེགས་བསྒྲུབ་པའི་དུས་ལ་བབ་ཡོད་སྐོར་བཀའ་སྩལ་མཛད་སོང་བ་དང་། ད་དུང་མགོན་པོ་མཆོག་གིས་དེང་སྐབས་ཨ་རིའི་ནང་ལའང་བྱམས་བརྩེའི་ཉམས་ལེན་ཐོག་དོ་སྣང་ཆེན་པོ་བྱེད་བཞིན་པ་མ་ཟད། ལྷག་པར་དུ་ཨ་རིའི་གྲོང་ཁྱེར་གཉིས་ཙམ་གྱི་མིང་ཡང་སྙིང་རྗེའི་གྲོང་ཁྱེར་ཞེས་མིང་བཏགས་ཡོད་པ་དང་། གྲོང་ཁྱེར་དེ་དག་ནང་བྱམས་བརྩེ་དང་འབྲེལ་བའི་བགྲོ་གླེང་དང་དེ་དག་བརྒྱུད་འཁྲུག་རྩོད་རིགས་ཀྱང་ཇི་ཉུང་དུ་སོང་བ་སོགས་དངོས་སུ་ཕན་ཐོགས་བྱུང་སྐོར་ལུང་འདྲེན་དང་འབྲེལ་ཉེ་ལམ་༸གོང་ས་མཆོག་ཨ་རིར་ཕེབས་སྐབས་གྲོང་ཁྱེར་སྤྱི་ཁྱབ་པ་ ༢༠༠ ཙམ་གྱི་ལྷན་འཛོམས་སྐབས་ཁོང་རྣམས་པས་ཀྱང་དེའི་ཐད་ཐུགས་སྣང་གནང་བཞིན་པ་སོགས་ངོ་སྤྲོད་སོགས་མཛད་ཡོད།
ལྷག་དོན་༸གང་ཉིད་མཆོག་གིས་ཆོས་ལུགས་དང་མ་འབྲེལ་བའི་བཟང་སྤྱོད་གོང་འཕེལ་གྱི་སློབ་གསོའི་སློབ་དེབ་ཞིག་ཀྱང་རྩོམ་སྒྲིག་བྱེད་བཞིན་པ་དང་ཟླ་ཤས་ནང་གཏན་འབེབས་ཟིན་གྱི་ཡོད་སྐོར་སོགས་བཀའ་སྩལ་གནང་སོང་།
གཞན་ཡང་༸གོང་ས་༸སྐྱབས་མགོན་ཆེན་པོ་མཆོག་ནས་མུ་མཐུད་རྒྱ་ནག་ནང་ནང་པའི་གྲངས་འབོར་དེ་ས་ཡ་ ༤༠༠ ཙམ་ཡོད་ཅིང་དེང་སྐབས་བོད་རྒྱུད་ནང་བསྟན་ལའང་དོ་སྣང་ཇི་ཆེར་འགྲོ་བཞིན་ཡོད་སྟབས། ང་ཚོས་ཕྱི་རང་དབང་ལུང་པར་བཟང་སྤྱོད་དང་འབྲེལ་བའི་ལས་འགུལ་ཞིག་སྤེལ་ཐུབ་ཚེ་རྒྱ་ནག་ནང་གཏན་གཏན་ཤུགས་རྐྱེན་ཐེབས་ངེས་ཡིན་པ་དང་དེའི་ཐོག་ནས་བོད་དོན་ཐོག་ལ་ཡང་ཕན་ཐོགས་ཡོང་གི་རེད་ཅེས་གསུངས་ཡོད་པ་རེད།
དེ་རྗེས་༸གོང་ས་མཆོག་གིས་ས་གནས་རྒན་གསོ་ཁང་དང་འཕྲོད་བསྟེན་སྨན་ཁང་གཉིས་ཀྱི་གནས་སྟངས་དང་འབྲེལ་བའི་འཕྲོད་བསྟེན་སྨན་ཁང་ལ་སྨན་པ་མེད་དོན་གང་ཡིན་དང་། ས་གནས་སུ་ཉལ་ཐ་འཐེན་མཁན་ཡོད་མེད་སོགས་ཀྱི་གནད་དོན་མང་དག་ཞིག་གི་ཐད་བཀའ་རྩད་གནང་པར་ས་འགོ་མཆོག་གིས་བཀའ་ལན་ཕུལ་ཡོད་པ་རེད།
མཛད་འཆར་ལྟར་ན། སང་ཉིན་ཕྱི་ཚེས་ ༢ ནས་ ༥ བར་གདན་ས་ཆེན་པོ་གསུམ་དང་རྭ་སྟོད་གྲྭ་ཚང་། རྒྱུད་གྲྭ་སྟོད་སྨད་གཉིས། དེ་བཞིན་བཀྲ་ཤིས་ལྷུན་པོ་བཅས་ཀྱི་དགེ་འདུན་པ་རྣམས་ལས་ཉིན་རེར་དགེ་འདུན་གྲངས་ ༦༠ ལ་བསྙེན་རྫོགས་ཀྱི་སྡོམ་པ་འབོགས་ཆོག་མཛད་རྒྱུ་ཡིན་པ་དང་། དེ་བཞིན་ཕྱི་ཚེས་ ༦ ཉིན་༸སྐུའི་འཁྲུངས་སྐར་འཁེལ་གྱི་ཡོད་སྟབས། དེ་ཉིན་དྲོར་འབྲས་སྤུངས་དགའ་ལྡན་པོ་བྲང་བླ་སྤྱིའི་མདུན་ཐང་དུ་སྲུང་བརྩི་ཞུ་རྒྱུ་དང་འདི་བཞིན་དགེ་ལུགས་ཡོངས་ཀྱི་ངོས་ནས་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་གནང་གི་ཡོད་པ་དང་། དེ་མཚུངས་སུ་མོན་གྷོ་སེར་སྐྱ་མི་མང་ཡོངས་ནས་ཀྱང་འདི་ལོ་མོན་གྷོ་འདོད་རྒུ་གླིང་བོད་མིའི་གཞིས་ཆགས་དབུ་བརྙེས་ནས་ལོ་ངོ་ ༥༠ ཐམ་པ་ཧྲིལ་པོ་འཁོར་བའི་དུས་དྲན་སྲུང་བརྩི་དང་འབྲེལ་༸གོང་ས་མཆོག་ལ་བཀའ་དྲིན་རྗེས་དྲན་གྱི་གསེར་གྱི་གཟེངས་རྟགས་འབུལ་བཞེས་དང་འདི་བཞིན་བརྟན་བཞུགས་རྒྱས་པ་ཞིག་ཀྱང་བསྟར་འབུལ་ཞུ་རྒྱུ་རེད་འདུགདང་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་སེར་སྐྱ་མི་མང་ཡོངས་ནས་བརྟན་བཞུགས་བསྟར་འབུལ་ཞུ་རྒྱུ་དང་། དེ་རྗེས་ཕྱི་ཚེས་ ༧ ཉིན་འབྲས་སྤུངས་བློ་གསལ་གླིང་གི་ཆོས་ར་གསར་པ་དབུ་འབྱེད་རབ་གནས་མཛད་རྒྱུ་སོགས་ཀྱི་མཛད་འཆར་ཁག་ཅིག་ཐུགས་གཏན་ཁེལ་ཡོད་པ་རེད།
༸སྐུའི་འཁྲུངས་སྐར་གྱི་མཛད་སྒོར་༸གང་ཉིད་མཆོག་དབུ་བཞུགས་ཀྱིས་གཙོས་ཀར་ན་ཊ་ཀ་མངའ་སྡེའི་བློན་ཆེན་གཞོན་པ་མཆོག་དང་། དེ་སྔོན་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཚུགས་རྒྱུར་མཐུན་གྱུར་དང་རྒྱབ་སྐྱོར་ཤུགས་ཆེ་གནང་མཁན་ཀ་ན་ཊ་ཀ་མངའ་སྡེའི་བློན་ཆེན་འདས་པོ་སྐུ་ཞབས་ནི་ཇ་ལིང་གཱ་པ་མཆོག་གི་བཀྲིན་རྗེས་དྲན་ཞུ་ཕྱིར་ཁོང་གི་སྐུ་ཚ་ཞིག་ཀྱང་གདན་ཞུ་གནང་པ་དང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་གསུམ་སོགས་ཕྱི་ནང་གི་སྐུ་མགྲོན་མང་དག་ཞིག་གདན་ཞུ་གནང་ཡོད་པ་རེད་འདུག
༸གོང་ས་མཆོག་གིས་བྱམས་བརྩེ་ལྡན་པའི་འཛམ་བུ་གླིང་བསྐྲུན་ཆེད་ཨ་རིས་ངེས་པར་དུ་སྣེ་འཁྲིད་དགོས་པ་བཀའ་སྩལ་འདུག
བོད་ཀྱི་བླ་ན་མེད་པའི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཕྱི་ཚེས་༡༣ ནས་ཨ་རིའི་རྒྱལ་ས་ Washington DC གཙོས་Utah དང་ California དེ་བཞིན་Colorado མངའ་སྡེ་བཅས་སུ་མང་ཚོགས་ལ་བཀའ་སློབ་དང་ཆོས་འབྲེལ་བཀྲིན་བསྩལ་བ་དུས་མཚུངས། ཨ་རིའི་སྲིད་འཛིན་ Obama མཆོག་གིས་དབུས་པའི་གྲོས་ཚོགས་འཐུས་མི་དང་། གྲོང་ཁྱེར་གྱི་སྲིད་སྐྱོང་སོགས་དང་མཇལ་འཕྲད་ཀྱིས་མཛད་འཕྲིན་ཁག་ཅིག་གྲུབ་རྗེས། ཁ་སང་མགོན་པོ་༸གང་ཉིད་མཆོག་ནས་ཨ་མི་རི་ཀའི་ Indiana མངའ་སྡེའི་རྒྱལ་ས་ Indianapolis ནང་ཚོགས་པའི་ཨ་མི་རི་ཀའི་གྲོང་སྡེ་སྤྱི་ཁྱབ་པའི་ཚོགས་ཆེན་ཐེངས་༨༤ པའི་ཐོག་དབུ་བཞུགས་མཛད་པ་མ་ཟད། གྲོང་ཁྱེར་སྤྱི་ཁྱབ་ཉིས་བརྒྱ་ལྷག་ལ་བྱམས་བརྩེ་ལྡན་པའི་གྲོང་ཁྱེར་བསྐྲུན་ཐབས་ཞེས་པའི་བརྗོད་གཞི་ཐོག་བཀའ་སློབ་བཀའ་དྲིན་སྩལ་འདུག
ཚོགས་ཆེན་དེའི་ཐོག་༸གོང་ས་སྐྱབས་མགོན་ཆེན་པོ་མཆོག་གིས་ཨ་རི་ནི་འཛམ་གླིང་སྟེང་གི་རང་དབང་དང་མང་གཙོ། དེ་བཞིན་འདྲ་མཉམ་སོགས་ལ་བརྩི་སྲུང་གནང་མཁན་གྱི་རྒྱལ་ཁབ་གཙོ་གྲས་ཤིག་ཏུ་ངོས་འཛིན་གནང་བཞིན་ཡོད་སྐོར་བཀའ་སྩལ་དང་འབྲེལ། ད་བར་ཨ་རིའི་ངོས་ནས་རྒྱལ་སྤྱིའི་ཐོག་འཕྲུལ་ཆས་སོགས་ཕྱི་དངོས་པོའི་རིག་གནས་ཐོག་ཞབས་འདེགས་རླབས་ཆེན་སྒྲུབ་ཡོད་པ་ལྟར། མ་འོངས་འཛམ་གླིང་དེ་བཞིན་བྱམས་བརྩེ་ལྡན་པ་ཞིག་ཏུ་བསྐྲུན་ཆེད་ཨ་རིས་ངེས་པར་དུ་སྣེ་འཁྲིད་གནང་རྒྱུའི་འགན་ཡོད་བཀའ་སྩལ་འདུག
ལྷག་པར་དུ་ཁ་སང་གི་མཛད་འཆར་དེའི་ཁྲོད་༸གོང་ས་མཆོག་གིས་རྒྱལ་སྤྱིའི་མང་ཚོགས་ས་ཡ་མང་པོས་དགའ་མོས་ཞུ་ཡུལ་ཨ་རིའི་གཞས་མ་གྲགས་ཅན་Lady Gaga ལགས་དང་མཇལ་འཕྲད་དང་དྲི་བ་དྲི་ལན་གྱི་མཛད་རིམ་ཞིག་ཀྱང་གནང་འདུག
༸གོང་ས་མཆོག་གིས་རྒྱ་གཞུང་ནས་༸གང་ཉིད་ལ་སྐྱོན་བརྗོད་བྱེད་བཞིན་པ་དེར་རྒྱ་ནག་མི་མང་ནས་ངོས་ལན་བྱེད་མིན་ཐེ་ཚོམ་རེད་ཅེས་བཀའ་སྩལ་འདུག
བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་གཞུང་ནས་མགོན་པོ་༸གང་ཉིད་མཆོག་རྒྱལ་སྤྱིའི་དབུ་འཁྲིད་རྣམས་དང་མཇལ་འཕྲད་གནང་སྐབས་སྐྱོན་བརྗོད་བྱེད་བཞིན་པར་རྒྱ་ནག་མི་མང་ཐེར་འབུམ་གཅིག་དང་ཕྱེད་ཀ་ཙམ་ཡོད་པ་དེ་དག་ལ་བཀའ་འདྲི་ཞུས་ན་ངོས་ལན་བྱེད་མིན་ཐེ་ཚོམ་རེད་ཅེས་བཀའ་སྩལ་འདུག
དེ་ཡང་ཁ་ཉིན་ཕྱི་ཚེས་ ༡༥ ཉིན་མགོན་པོ་མཆོག་དང་ཨ་མི་རིའི་སྲིད་འཛིན་བྷ་རག་ཨོ་བྷ་མ་མཆོག་རྣམ་པ་གཉིས་ཕོ་བྲང་དཀར་པོའི་ནང་གྱི་མཇལ་འཕྲད་གྲུབ་པའི་དགོང་མཚམས་དེར། ཁུལ་དེར་རྟེན་གཞི་བྱས་པའི་ Fox གསར་ཁང་གི་ཆབ་སྲིད་གསར་འགོད་པའི་གཙོ་འཛིན་སྐུ་ཞབས་ Bret Bair ལགས་ནས་༸གོང་ས་མཆོག་ལ་ད་ལྟའི་བོད་དང་རྒྱ་ནག་གི་གནས་སྟངས། དེ་བཞིན་སྲིད་འཛིན་ཨོ་བྷ་མ་མཆོག་དང་མཇལ་འཕྲད་གནང་པའི་སྐོར་དང་འབྲེལ་བའི་བཀའ་འདྲི་ཁག་ཅིག་ཞུས་འདུག
སྐབས་དེར་སྐུ་ཞབས་ Bret Bair ལགས་ནས་མགོན་པོ་མཆོག་ལ་ད་རེས་ཀྱི་མཇལ་འཕྲད་དེ་གང་འདྲ་བྱུང་ཞེས་བཀའ་དྲི་ཞུ་སྐབས། ༸གོང་ས་མཆོག་ནས་ད་རེས་ཀྱི་མཇལ་འཕྲད་དེ་རང་ཉིད་ཀྱི་གྲོགས་པོ་ལྷན་དུ་བསྐྱར་འཛོམས་བྱུང་བའི་ཚོར་བ་ཞིག་བྱུང་ཞེས་བཀའ་བསྩལ་གནང་པ་དང་། སྲིད་འཛིན་ཨོ་བྷ་མ་ལྷན་དུ་ད་ལྟའི་བོད་དང་རྒྱ་ནག་ནང་གི་གནས་སྟངས། དེ་བཞིན་མགོན་པོ་༸གང་ཉིད་མཆོག་གི་ཐུགས་འཁུར་གསུམ་ལས་ཤེས་ཡོན་སློབ་གསོ་བརྒྱུད་འགྲོ་བ་མིའི་རིང་ཐང་གོང་མཐོར་གཏོང་ཐབས་སྐོར་ལ་གྲོས་མོལ་གནང་ཡོད་སྐོར་བཀའ་ལན་མཛད་འདུག
དེ་བཞིན་ཁོང་གིས་༸གང་ཉིད་མཆོག་དང་ཨ་རིའི་སྲིད་འཛིན་རྣམ་གཉིས་མཇལ་འཕྲད་མ་གནང་གོང་དུ་རྒྱ་ནག་ཕྱི་སྲིད་ལས་ཁུངས་ཀྱི་དྲུང་ཆེ་ Lu Kang ནས་༸གོང་ས་མཆོག་ལ་སྐྱོན་བརྗོད་དང་འབྲེལ་རྒྱལ་སྤྱིའི་གཞུང་ནས་༸གང་ཉིད་མཆོག་དང་མཇལ་འཕྲད་གནང་ན་ཕྱོགས་གཉིས་ཀྱི་འབྲེལ་ལམ་ལ་དོ་ཕོག་ཐེབས་སྲིད་པ་མ་ཟད། རྒྱ་ནག་མི་མང་ཐེར་འབུམ་གཅིག་དང་ཕྱེ་ཀ་ཙམ་གྱི་སེམས་ཚོར་ལ་གནོད་ཀྱི་རེད་ཅེས་གནོན་ཤུགས་སྤྲད་པ་ལུང་འགྲེན་དང་སྦྲགས། ༸གོང་ས་མཆོག་གི་དགོངས་ཚུལ་བཀའ་འདྲི་ཞུ་སྐབས། ༸གོང་ས་༸སྐྱབས་མགོན་ཆེན་པོ་མཆོག་ནས་རྒྱ་གཞུང་གིས་༸གང་ཉིད་མཆོག་ལ་སྐྱོན་བརྗོད་དང་རྒྱལ་སྤྱིའི་ཐོག་གནོན་ཤུགས་སྤྲད་བཞིན་པ་དེ་ནི་རྒྱ་ནག་སྲིད་གཞུང་གི་འཆར་ཅན་བྱེད་སྒོ་ཞིག་རེད་ཅེས་བཀའ་གནང་པ་དང་ཆབས་ཅིག མགོན་པོ་གང་མཆོག་གིས་དབུས་པའི་བོད་མི་ཚོས་རང་བཙན་མི་རྩོད་པར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་རྩོད་བཞིན་ཡོད་སྐོར་བཀའ་ནན་མཛད་འདུག
མགོན་པོ་༸གང་ཉིད་མཆོག་ནས་དེ་སྔ་རྒྱ་ནག་གི་སྲིད་འཛིན་ཞི་ཅིང་ཕིང་ནས་ནང་ཆོས་དེ་རྒྱ་ནག་གི་རིག་གཞུང་ལ་གལ་ཆེ་ཞིག་ཡིན་ཅེས་བརྗོད་པ་ལུང་འདྲེན་དང་འབྲེལ། རྒྱ་ནག་དེ་འཛམ་བུ་གླིང་འདིའི་ཐོག་མུ་མཐུད་དམ་དྲག་དང་གནོན་ཤུགས་འོག་གནས་ཐབས་མེད་པ་དང་། དུས་ཚོད་རིང་ཐུང་ཙམ་གྱི་ཁྱད་པར་ལས་རིམ་པས་རྒྱ་ནག་ནང་འགྱུར་བ་ཞིག་འགྲོ་ངེས་ཡིན་པ་གསུངས་འདུག
གཞན་ཡང་སྐུ་ཞབས་ Bret Bair ལགས་ནས་མགོན་པོ་མཆོག་ལ་ཨ་རའི་འོས་བསྡུའི་ལས་རིམ་དང་ཨ་རི་ནང་ལ་ཞི་སྤོས་གནང་མཁན་མང་དུ་འགྲོ་བཞིན་པའི་སྐོར་ལ་བཀའ་འདྲི་ཞུས་པར་༸གོང་ས་མཆོག་ནས་རྩ་བའི་འོས་བསྡུའི་ཁྲོད་འོས་མི་ཕན་ཚུན་དབར་སྐྱོན་བརྗོད་ཁོ་ན་བྱེད་བཞིན་པ་དེ་ཅུང་ཡ་མཚན་ཆེ་ཡང་། ཨ་རི་མི་མང་རྣམས་ནས་རང་ཉིད་ཀྱི་རིག་རྩལ་བརྒྱུད་ མ་འོངས་པར་སྲིད་འཛིན་ཡག་པོ་ཞིག་འདེམས་ངེས་ཡིན་སྐོར་བཀའ་ལན་མཛད་པ་དང་སྦྲགས། མགོན་པོ་མཆོག་ནས་ཨ་རི་ནང་ཡོད་པའི་མི་རིགས་དཀར་པོ་ཚང་མ་ཞི་སྤོ་བ་རེད་ཅེས་ཞལ་ཤོབ་དང་འབྲེལ། ཨ་རི་ནང་ལོ་ལྟར་མི་ས་ཡ་ལྷག་གནས་སྤོ་བྱེད་བཞིན་ཡོད་ན་སེམས་འཚབ་བྱ་ཡུལ་གྱི་གནས་ཤིག་ཡིན་པ་ལས། གཞན་ད་ལྟའི་གནས་སྟངས་དེས་བཀའ་ངལ་དེ་ཙམ་འཕྲད་ཀྱི་མ་རེད་ཅེས་བཀའ་སྩལ་འདུག
དེ་བཞིན་༸གོང་ས་མཆོག་གིས་ཉེ་འཆར་ཕྱི་ཚེས་ ༡༣ ཉིན་ཨ་རིའི་ Florida མངའ་སྡེའི་གྲོང་ཁྱེར་ Orlando མཚན་ཚོགས་ཤིག་ཏུ་མི་གྲངས་ལྔ་བཅུ་ལྷག་ཙམ་གྱི་སྲོག་ཤོར་བ་དང་འབྲེལ། ཆོས་དང་འཇིགས་བསྐུལ་རིང་ལུགས་ཐད་བཀའ་འདྲི་ཞུས་པར་ ༸གང་ཉིན་མཆོག་ནས་རྩ་བའི་Muslim Terrorist འམ་ཁ་ཆེའི་འཇིགས་བསྐུལ་རིང་ལུགས་ཞེས་པའི་ཐ་སྙད་དེ་ཉིད་ནོར་བ་ཞིག་ཡིན་པར་འགྲེལ་བརྗོད་དང་། ཁ་ཆེའི་ཆོས་ལུགས་གཙོས་པའི་ཆོས་ཐམས་ཅད་ཀྱི་སླབ་བྱ་གཙོ་བོ་བྱམས་སྙིང་རྗེ་དང་སེམས་པ་བཟང་པོ་བྱ་རྒྱུ་དེ་རེད་བཅས་བཀའ་བསྩལ་མཛད་འདུག
གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཕྱི་ཚེས་བཅུ་གསུམ་ནས་ཨ་མི་རི་ཀའི་རྒྱལ་ས་Washington DC ནང་མང་ཚོགས་ལ་བཀའ་སློབ་དང་ཨ་རིའི་སྲིད་འཛིན་དང་གྲོས་ཚོགས་འཐུས་མི་མཇལ་འཕྲད་སོགས་ཀྱི་མཛད་འཕྲིན་ཁག་ལེགས་པར་གྲུབ་བསྟུན། ཁ་སང་ཨ་རིའི་ནུབ་ཕྱོགས་མངའ་སྡེ་ཀེ་ལི་ཕོར་ནིའི་གྲོང་ཁྱེར་ Orange Country ཕྱོགས་སུ་ཆིབས་ཞལ་སྒྱུར་གནང་གིས་ཁུལ་དེར་ཞབས་སོར་བདེ་བར་འཁོད་མཚམས། ས་གནས་བོད་རིགས་དང་དད་ལྡན་མང་ཚོགས་རྣམས་ནས་དགའ་སྤྲོའི་གླུ་གཞས་དང་སྦྲགས་ཕེབས་བསུ་གཟབ་རྒྱས་ཞུས་འདུག
སྲིད་འཛིན་ཨོ་བྷ་མ་མཆོག་གིས་༸གོང་ས་མཆོག་ལ་རྒྱ་ནག་དང་དོན་དམ་གྱི་གྲོས་མོལ་གནང་དགོས་གལ་ཡིན་པ་གསུངས་འདུག
ཁ་སང་ཟླ་ ༦ ཚེས་ ༡༥ ཉིན་ཨ་རིའི་སྔ་དྲོའི་ཆུ་ཚོད་ ༡༠།༡༥ ཙམ་ལ་ཨ་རིའི་ཕོ་བྲང་དཀར་པོའི་ས་ཁྲའི་ལས་ཁུངས་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་སྐུ་ཞབས་བྷ་རག་ཨོ་བྷ་མ་མཆོག་རྣམ་གཉིས་མཇལ་འཕྲད་མཛད་པ་དང་བསྟུན། སྲིད་འཛིན་མཆོག་གིས་༸གོང་ས་མཆོག་ལ་བོད་རྒྱ་དཀའ་རྙོག་སེལ་ཆེད་རྒྱ་ནག་ལྷན་དུ་དོན་དམ་གྱི་གྲོས་མོལ་གནང་དགོས་གལ་ཡིན་པ་གསུངས་འདུག
དེ་ཡང་དབུ་ཁྲིད་རྣམ་གཉིས་མཆོག་གི་མཇལ་འཕྲད་གྲུབ་བསྟུན། ཨ་རིའི་ཕོ་བྲང་དཀར་པོའི་དྲ་གནས་ཐོག་ཐེངས་འདིའི་མཇལ་འཕྲད་ཁྲོད། སྲིད་འཛིན་ཨོ་བྷ་མ་མཆོག་དང་༸གོང་ས་མཆོག་རྣམ་གཉིས་དབར་བཀའ་མོལ་ཇི་བྱུང་སྐོར་ལ་སྤྱི་བསྒྲགས་ཤིག་སྤེལ་བའི་ནང་། ༸གང་ཉིད་མཆོག་གིས་ཉེ་ཆར་ཨ་རིའི་གྲོང་ཁྱེར་ Orlando ནང་མཚན་ཚོགས་ཤིག་ཏུ་མི་བསད་ཁྲག་སྦྱོར་གྱི་དོན་རྐྱེན་འོག་ཚེ་འདས་དང་རྨས་སྐྱོན་ཕོག་པའི་གནས་ཚུལ་བྱུང་བར་ཐུགས་ཕམ་དང་བཅས་སྲིད་འཛིན་མཆོག་ལ་ཐུགས་གསོ་མཛད་ཡོད་པ་དང་། སྲིད་འཛིན་ཨོ་བྷ་མ་མཆོག་གིས་ཀྱང་༸གོང་ས་མཆོག་ལ་ཐུགས་རྗེ་ཆེ་ཞུས་པ་དང་འབྲེལ། ༸གང་ཉིད་མཆོག་གིས་གཞན་ལ་བྱམས་བརྩེ་དང་གུས་བརྩི་སོགས་གོང་སྤེལ་གཏོང་ཐབས་མཛད་བཞིན་པར་ཡི་རང་བསྔགས་བརྗོད་ཞུས་འདུག བོད་ནང་གི་གནས་སྟངས་དང་འབྲེལ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག དེ་བཞིན་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་སླད་ཨ་རིའི་གཞུང་གིས་རྒྱབ་སྐྱོར་ཡོད་སྐོར་གསུངས་པ་མ་ཟད། ལྷག་དོན་སྲིད་འཛིན་མཆོག་གིས་མགོན་པོ་༸གང་ཉིད་མཆོག་གྱི་འདོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་ལ་བསྔགས་བརྗོད་ཞུས་པ་དང་སྦྲགས་རྒྱབ་སྐྱོར་ཤུགས་ཆེ་ཡོད་པ་ནན་བརྗོད་གནང་འདུག
སྲིད་འཛིན་ཨོ་བྷ་མ་མཆོག་གིས་བོད་ཀྱི་དཀའ་རྙོག་སེལ་ཆེད་༸གོང་ས་མཆོག་གི་སྐུ་ཚབ་དང་རྒྱ་ནག་གཉིས་དབར་དོན་དམ་གྱི་གྲོས་མོལ་གནང་དགོས་གལ་ཡིན་སྐོར་ཡང་གསུངས་ཡོད་པ་དང་། སྲིད་འཛིན་མཆོག་གིས་ད་དུང་ཨ་རིའི་གཞུང་གི་ངོས་ནས་བོད་དེ་རྒྱ་ནག་གི་ཆ་ཤས་ཡིན་པ་དང་། ཨ་རིའི་ངོས་ནས་བོད་རང་བཙན་ལ་རྒྱབ་སྐྱོར་བྱེད་ཀྱི་མེད་པ་དེ་ཨ་རིའི་གཞུང་གིས་ཡུན་རིང་ནས་འཛིན་པའི་སྲིད་བྱུས་རང་འཇག་ཡིན་སྐོར་གསུངས་པ་ལྟར། ༸གོང་ས་༸སྐྱབས་མགོན་ཆེན་པོ་མཆོག་གིས་ཀྱང་༸གང་ཉིད་ཀྱིས་ནམ་ཡང་རང་བཙན་རྩོད་ཀྱི་མེད་སྟབས། རྒྱ་ནག་གཞུང་ཕྱོགས་ནས་༸གང་ཉིད་ཀྱི་སྐུ་ཚབ་ལྷན་དུ་གྲོས་མོལ་མགྱོགས་མྱུར་བསྐྱར་གསོ་གནང་བའི་ཐུགས་རེ་གནང་བཞིན་ཡོད་པ་བཀའ་བསྩལ་འདུག
སྲིད་འཛིན་མཆོག་དང་༸གོང་ས་མཆོག་དབུ་ཁྲིད་རྣམ་པ་གཉིས་མཆོག་གིས་རྒྱ་ནག་དང་ཨ་མི་རི་ཀའི་དབར་འབྲེལ་ལམ་བཟང་པོ་དགོས་གལ་ཡིན་པའི་ངོས་འཛིན་གནང་བ་མ་ཟད། སྲིད་འཛིན་མཆོག་ནས་༸གོང་ས་མཆོག་གིས་གོ་ལའི་གནམ་གཤིས་འགྱུར་ལྡོག་དང་འབྲེལ་བའི་གནད་དོན་ལ་ཐུགས་འཁུར་ཆེ་བཞེས་གནང་བཞིན་པར་དགའ་སུ་དང་སྦྲགས། ༸གོང་ས་མཆོག་གིས་ཧི་མཱ་ལ་ཡའི་རི་རྒྱུད་དང་། ཁྱད་པར་དུ་བོད་མཐོ་སྒང་གི་འཁྱག་རོམ་མྱུར་ཚད་མཐོ་བོའི་ཐོག་ཞུར་བཞིན་པ་སོགས་གོ་ལའི་ཚ་དྲོད་དང་འབྲེལ་བའི་གནད་དོན་ཐོག་ཐུགས་འཁུར་ཆེན་པོ་བཞེས་བཞིན་པར་རྒྱབ་སྐྱོར་ཤུགས་ཆེ་ཞུས་ཡོད་པ་རེད།
༸གོང་ས་མཆོག་དབུ་བཞུགས་ཐོག་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་དེ་ཉིད་དང་བོད་མིའི་སྒྲིག་འཛུགས་ལ་ཆེ་བསྟོད་ཀྱི་གཟེངས་རྟགས་ཕུལ་འདུག
མང་གཙོ་གོང་སྤེལ་བསྟི་གནས་ཁང་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་དེ་ཉིད་དང་བོད་མིའི་སྒྲིག་འཛུགས་ལ་ཆེ་བསྟོད་ཀྱི་གཟེངས་རྟགས་ཕུལ་འདུག
དེ་ཡང་ཁ་སང་ཟླ་ ༦ ཚེས་ ༡༥ ཉིན་གྱི་སྔ་དྲོར་ཨ་རིའི་ཕོ་བྲང་དཀར་པོའི་ས་ཁྲའི་ལས་ཁུངས་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་སྐུ་ཞབས་བྷ་རག་ཨོ་བྷ་མ་མཆོག་རྣམ་གཉིས་མཇལ་འཕྲད་མཛད་ཟིན་པའི་ཉིན་རྒྱབ་ཏུ་མགོན་པོ་༸གང་ཉིད་མཆོག་ནས་ཁུལ་དེར་རྟེན་གཞི་བྱས་པའི་ National Endowment for Democracy ཞེས་མང་གཙོ་གོང་སྤེལ་བསྟི་གནས་ཁང་གི་ལས་ཁུངས་སུ་ཆིབས་སྒྱུར་དང་སྦྲགས མང་གཙོ་དང་རེ་བ་ཞེས་པའི་བགྲོ་གླེང་གི་ཚོགས་མགོན་དུ་དབུ་བཞུགས་མཛད་ཡོད་པ་དང་། སྐབས་དེར་ མང་གཙོ་གོང་སྤེལ་བསྟི་གནས་ཁང་དེས་བསྐལ་བཟང་གི་དུས་ཚོད་དམ་འཛིན་ཆེན་པོས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་དེ་ཉིད་དང་བོད་མིའི་སྒྲིག་འཛུགས་ལ་ཆེ་བསྟོད་ཀྱི་གཟེངས་རྟགས་ཕུལ་འདུག
མཛད་རིམ་གྱི་ཐོག་མར་ཚོགས་པ་དེའི་ཚོགས་གཙོ་ Carl Gershman ལགས་ནས་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག རྒྱ་གཞུང་གི་བཙོན་ཁང་ནང་གློ་བུར་དུ་༸སྐུ་འདས་གྲོངས་སུ་གྱུར་བའི་སྤྲུལ་སྐུ་བསྟན་འཛིན་བདེ་ལེགས་རིན་པོ་མཆེ་དམ་པ་ཁོང་གིས་བོད་མིའི་འཐབ་རྩོད་ཁྲོད་མི་རིགས་ཀྱི་ལ་རྒྱ་དང་རིག་གཞུང་སྲུང་སྐྱོབ་སོགས་ཀྱི་ཐད་ལ་རླབས་ཆེན་གྱི་མཛད་རྗེས་བསྐྱངས་པར་ཆེ་བསྟོད་དང་སྦྲགས། Democracy Service Medal འམ་མང་གཙོ་ཞབས་ཞུའི་གཟེངས་རྟགས་འབུལ་བཞེས་གནང་འདུག
གཟེངས་རྟགས་དེ་བཞུགས་སྒར་གནས་སྡོད་རིན་པོ་ཆེ་མཆོག་གི་ཚ་བོ་དགེ་བཤེས་འཇམ་དབྱངས་ཉི་མ་ལགས་ནས་བཞེས་ཡོད་པ་དང་། སྐབས་དེར་དགེ་བཤེས་ཉི་མ་ལགས་ཀྱིས་ཚོགས་པ་དེའི་ངོས་ནས་རིན་པོ་ཆེའི་མཛད་རྗེས་ཁག་ལ་ངོས་འཛིན་གྱིས་གཟེངས་རྟགས་གནང་བར་རིན་པོ་ཆེའི་འབྲེལ་ཡོད་ནང་མི་དང་ཁོང་གི་རྗེས་འཇུག་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་བཀའ་དྲིན་ཆེ་ཞུས་པ་དང་སྦྲགས། གཟེངས་རྟགས་འདི་རིན་པོ་ཆེ་གཅིག་པུ་ཙམ་མ་ཡིན་པར་རིན་པོ་ཆེ་དང་འདྲ་བའི་རྒྱ་གཞུང་གིས་བཙོན་འོག་ཏུ་ཡོད་པའི་བོད་མི་ཡོངས་ལ་ཐོབ་པ་ཞིག་ཏུ་ངོས་འཛིན་ཞུ་ཡི་ཡོད་པ་གསུངས་འདུག
གཞན་ཡང་མང་གཙོ་གོང་སྤེལ་བསྟི་གནས་ཁང་ནས་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར་བཙན་བྱོལ་བོད་མིའི་སྒྲིག་འཛུགས་འདི་བཞིན་མང་གཙོའི་ལམ་ལུགས་ཚད་ལྡན་ཐོག་སྐྱོད་བཞིན་པར་ངོས་འཛིན་གྱིས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལ་ཆེ་བསྟོད་ཀྱི་གཟེངས་རྟགས་ཤིག་ཀྱང་འབུལ་བཞེས་གནང་ཡོད་པ་རེད།
སྐབས་དེར་སྲིད་སྐྱོང་མཆོག་གིས་ཐུགས་རྗེ་ཆེ་ཞུའི་གསུང་བཤད་དང་འབྲེལ། བཙན་བྱོལ་བོད་མིའི་སྒྲིག་འཛུགས་འདི་མང་གཙོ་ཚད་ལྡན་ཐོག་སྐྱོད་བཞིན་ཡོད་པ་མ་ཟད། མགོན་པོ་༸གང་ཉིད་མཆོག་གི་དགོངས་གཞི་ལྟར་བོད་ཀྱི་ཆོས་དང་རིག་གཞུང་སོགས་ཀྱི་ཐད་ལ་སྲུང་སྐྱོབ་བྱ་རྒྱུར་འབད་བརྩོ་ཤུགས་ཆེ་གནང་བཞིན་ཡོད་པ་ངོ་སྤྲོད་གནང་པ་དང་འབྲེལ། ད་རེས་ཀྱི་གཟེངས་རྟགས་འདི་༸གང་ཉིད་མཆོག་གི་༸སྐུ་མདུན་དུ་བཞེས་རྒྱུའི་གོ་སྐབས་བྱུང་བར་དམིགས་བསལ་གྱི་དགའ་སྤྲོ་ཆེན་པོ་བྱུང་ཞེས་གསུངས་འདུག
གཟེངས་རྟགས་འབུལ་བཞེས་ཀྱི་མཛད་རིམ་དེ་ལེགས་པར་གྲུབ་བསྟུན། ཚོགས་པ་དེའི་འགན་འཛིན་ Brian Joseph ལགས་ཀྱིས་གཙོ་སྐྱོང་འོག་༸གོང་ས་མཆོག་དང་ཆབ་སྲིད་ཀྱི་ཟིང་འཁྲུག་ཆེ་བའི་རྒྱལ་ཁབ་ཁག་ནས་བཅར་བའི་གཞོན་རྣམས་ཀྱི་དབར་ལ་མང་གཙོ་དང་རེ་བ་ཞེས་པའི་བརྗོད་གཞིར་གྲོས་མོལ་གནང་ཡོད་པ་དང་། ལས་རིམ་དེའི་ཐོག་ Cuba ནས་ Rosa Maria ལགས་དང་། Sudan ནས་ Azar Elshami ལགས། དེ་བཞིན་ Azerbaijan ནས་ Arzu Geybullayeva ལགས་དང་ Jordan ནས་ Rami Soud ལགས་སོགས་མཉམ་ཞུགས་གནང་འདུག
སྐབས་དེར་མགོན་པོ་མཆོག་གིས་དུས་རབས་ཉི་ཤུ་རྩ་གཅིག་འདི་མི་བསད་ཁྲག་སྦྱོར་གྱི་དུས་རབས་ཤིག་ཏུ་མི་འགྱུར་བའི་སླད་ཤེས་ཡོན་སློབ་གསོའི་ཁྲོད་ན་གཞོན་རྣམས་ལ་ཕྱི་དངོས་པོའི་གནས་ལུགས་ཙམ་མ་ཡིན་པར་འགྲོ་བ་མིའི་རིན་ཐང་དང་འབྲེལ་བའི་བཟང་སྤྱོད་ཀྱི་སློབ་གསོ་གང་མང་གནང་གལ་ཡིན་པ་དང་། ལྷག་པར་དུ་ཉེ་དུས་གང་ཟག་རེ་བཟུང་གིས་སྤེལ་བའི་བྱ་སྤྱོད་ལ་གཞིགས་ཏེ་ཆོས་ལུགས་དེ་ཡག་པོ་མ་རེད་སོགས་བརྗོད་པ་ནི་ནོར་འཕྲུལ་རེད་ཅེས་བཀའ་བསྩལ་འདུག
གཞི་རྩའི་མང་གཙོ་གོང་སྤེལ་བསྟི་གནས་ཁང་ནི་རྒྱལ་སྤྱིའི་ཐོག་མང་གཙོ་རྒྱ་སྐྱེད་གཏོང་ཐབས་སུ་དམིགས་ཏེ། ཐོག་མར་སྤྱི་ལོ་ ༡༩༨༣ ལོར་ཨ་རི་ནང་ཆེད་འཛུགས་གནང་པའི་གཞུང་འབྲེལ་མ་ཡིན་པའི་ཚོགས་པ་ཞིག་ཡིན་པ་དང་། ད་ལྟའི་འཆར་ཚོགས་པ་དེས་རྒྱལ་སྤྱིའི་ཡུལ་གྲུ་དུ་མའི་ནང་མང་གཙོ་དང་འབྲེལ་བའི་ཚོགས་པ་དང་ཤེས་ཡོན་བསྟི་གནས་སོགས་ལ་དཔལ་འབྱོར་གྱི་རོགས་རམ་མི་ཉུང་བ་ཞིག་གནང་བཞིན་ཡོད་པ་རེད།
རྒྱ་གཞུང་གིས་གནོན་ཤུགས་ལ་ལྟོས་མེད་སྲིད་འཛིན་ཨོ་བྷ་མས་༸གོང་ས་མཆོག་དང་མཇལ་འཕྲད་ཞུ་རྒྱུ།
རྒྱ་ནག་གཞུང་གིས་གནོན་ཤུགས་ལ་ལྟོས་མེད་ཨ་རིའི་སྲིད་འཛིན་སྐུ་ཞབས་བྷ་རག་ཨོ་བྷ་མ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུ་རྒྱུ་རེད་འདུག
དེའང་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཕྱི་ཚེས་ ༡༣ ནས་དབུ་ཛུགས་ཀྱིས་ཨ་མི་རི་ཀའི་རྒྱལ་ས་ (Washington DC) ཝ་ཤིང་ཊོན་ཌི་སིར་མང་ཚོགས་ལ་བཀའ་སློབ་སྩལ་བ་དང་འདི་བཞིན་ཆེ་མཐོའི་མི་སྣ་ཁག་མཇལ་འཕྲད་མཛད་པ་བཅས་ཀྱི་མཛད་འཆར་སྐྱོང་བཞིན་པའི་ཁྲོད། ཁ་སང་ཚེས་ ༡༤ ཉིན་རྒྱ་ནག་གཞུང་གིས་ཨ་མི་རི་ཀར་གནོན་ཤུགས་སྤྲོད་པ་དང་སྦྲགས་ཨ་རི་གཞུང་ནས་དེ་སྔ་ཁས་ལེན་གནང་པ་རྣམས་དམ་འཛིན་བྱས་ཏེ། ཁ་བྲལ་རིང་ལུགས་པ་ལ་རྒྱབ་སྐྱོར་དང་མཇལ་འཕྲད་རིགས་མ་གནང་ན་ལེགས་པོ་ཡོད་སྐོར་བརྗོད་འདུག
འོན་ཏང་ཁ་སང་རྒྱ་གཞུང་གིས་གནོན་ཤུགས་སྤྲོད་པར་ལྟོས་མེད་ཀྱིས་ཨ་རིའི་ཕོ་བྲང་དཀར་པོས་གཞུང་འབྲེལ་གསལ་བསྒྲགས་ཤིག་སྤེལ་བའི་བརྒྱུད་ ༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་སྐུ་ཞབས་བྷ་རག་ཨོ་བྷ་མ་མཆོག་རྣམ་གཉིས་དེ་རིང་ཟླ་ ༦ ཚེས་ ༡༥ ཉིན་རྒྱ་གར་ནང་གི་དགོང་དྲོའི་ཚོུད་ ༨།༠༠ ཙམ་དང་། ཁུལ་དེའི་སྔ་དྲོའི་ཚོུད་ ༡༠།༡༥ ཐོག་ཨ་རིའི་ཕོ་བྲང་དཀར་པོའི་ནང་མཇལ་འཕྲད་མཛད་རྒྱུ་ཡིན་པ་དང་། སྐབས་དེར་གསར་འགོད་པ་སོགས་བརྒྱུད་ལམ་ཁག་མཉམ་ཞུགས་གནང་ཆོག་གི་མེད་པ་རེད་འདུག
གཞི་རྩའི་སྤྱི་ལོ་ ༡༩༩༡ ལོ་ནས་ཨ་མི་རི་ཀའི་སྲིད་འཛིན་རིམ་བྱོན་ཡོངས་ནས་༸གོང་ཉིད་མཆོག་དང་མཇལ་འཕྲད་གནང་ཡོད་པ་དང་། སྐུ་ཞབས་ཨོ་བྷ་མ་མཆོག་ནས་ཨ་རིའི་སྲིད་འཛིན་གྱི་ཐུགས་འགན་བཞེས་པ་ནས་བཟུང་སྟེ། ༸གོང་ས་༸སྐྱབས་མགོན་ཆེན་པོ་མཆོག་དང་ཕོ་བྲང་དཀར་པོའི་ནང་མཇལ་འཕྲད་གནང་པ་ད་ལན་འདི་ཐེངས་བཞི་པ་དེ་ཆགས་ཀྱི་ཡོད་པ་མ་ཟད། དེ་སྔའི་མཇལ་འཕྲད་སྐབས་སྲིད་འཛིན་མཆོག་ནས་མགོན་པོ་༸གང་ཉིད་མཆོག་གྱི་འདོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་། རྒྱ་གཞུང་གིས་རྩ་མེད་གཏོང་བཞིན་པའི་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་སོགས་སྲུང་སྐྱོབ་གནང་རྒྱུར་ཨ་རི་གཞུང་ནས་མུ་མཐུད་རྒྱབ་སྐྱོར་ཡོད་པ་སོགས་གསུངས་ཡོད།
ཐེངས་འདིའི་ཕོ་བྲང་དཀར་པོའི་ནང་གི་མཇལ་འཕྲད་དང་འབྲེལ། རྒྱལ་སྤྱིའི་ཆབ་སྲིད་པ་དང་གསར་འགོད་པ། དེ་བཞིན་དཔྱད་ཞིབ་དང་འབྲེལ་ཡོད་མི་སྣ་མང་དག་ཞིག་གིས་ཀྱང་དོ་སྣང་ཆེན་པོ་གནང་བཞིན་ཡོད་པ་མ་ཟད། ལ་ལ་གནས་ཚུལ་དེ་ཐོས་མ་ཐག་ཏུ་སྤྱི་ཚོགས་འབྲེལ་མཐུད་ཀྱི་དྲ་ལམ་ངོ་དེབ་དང་འཕྲུལ་བྱ་སོགས་ཀྱི་སྟེང་དུ་ད་ལན་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་སྐུ་ཞབས་བྷ་རག་ཨོ་བྷ་མ་མཆོག་རྣམ་གཉིས་མཇལ་འཕྲད་གནང་རྒྱུ་འདི་ནི་སྲིད་འཛིན་མཆོག་སྲིད་འཛིན་གྱི་ལས་ཡུན་ལས་འཁྱུར་ལ་ཉེ་བས་ཐོན་མཇལ་གྱི་འཚམས་འདྲི་ལྟ་བུ་ཞིག་ཡིན་པ་ལས། བོད་དང་རྒྱ་ནག་གི་ཆབ་སྲིད་གནད་དོན་ཐོག་བཀའ་མོལ་གང་ཡང་གནང་གི་མ་རེད་ཅེས་གང་ཟག་སོ་སོའི་དགོངས་ཚུལ་གནང་འདུག དེ་མཚུངས་སུ་འགའ་ཞིག་གིས་ཀྱང་ཨོ་བྷ་མ་མཆོག་གིས་དེ་སྔའི་མཇལ་འཕྲད་སྐབས་སུ་གསུངས་པ་ལྟར་དབུ་མའི་ལམ་དང་འགྲོ་བ་མིའི་ཐོབ་ཐང་སྐོར་གླེང་པ་ལས་དམིགས་བསལ་གསར་པ་གང་ཡང་གསུང་གི་མ་རེད་ཅེས་སོགས་བཀོད་འདུག
གཞན་ཁག་ཅིག་ནས་ཨོ་བྷ་མ་མཆོག་ནས་༸གོང་ས་མཆོག་དང་མཇལ་འཕྲད་གནང་པ་ཙམ་གྱིས་ཨ་རི་གཞུང་ནས་བོད་དོན་ལ་རྒྱབ་སྐྱོར་ཡོད་པ་མངོན་གསལ་ཡིན་པ་དང་། མ་འོངས་པར་ཨ་རི་གཞུང་ནས་མཇལ་འཕྲད་ཙམ་མ་ཡིན་པར་བོད་རྒྱའི་དཀའ་རྙོག་སེལ་ཐབས་སུ་ལག་ལེན་གྱི་ཐོག་ནས་རྒྱབ་སྐྱོར་གནང་གལ་ཡིན་པ་སོགས་བཀོད་ཡོད།
གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གི་ཨ་རི་ནང་གི་མཛད་འཆར་དང་འབྲེལ། ཁ་སང་མགོན་པོ་༸གང་ཉིད་མཆོག་ལ་རྒྱལ་སྤྱིའི་བོད་དོན་ལས་འགུལ་ཁང་ནས་ཇི་ལྟར་གསོལ་འདེབས་ཞུ་དོན་ལྟར། ཁུལ་དེའི་ཕོ་བྲང་དཀར་པོའི་ཉེ་འགྲམ་དུ་ཡོད་པའི་Willard གསོལ་མགྲོན་ཁང་དུ་བོད་དོན་ལ་རྒྱབ་སྐྱོར་གནང་མཁན་དང་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་མི་ཉི་བརྒྱ་ལྷག་གི་ལྷན་དུ་༸གང་ཉིད་མཆོག་གི་དགོངས་གཞི་དང་བོད་དོན་རྒྱབ་སྐྱོར་བ་རྣམས་ནས་ལས་དོན་གནང་ཕྱོགས་དང་འབྲེལ་གྲོས་མོལ་གནང་ཡོད་པ་རེད།
དེ་བཞིན་སྐབས་དེར་མགོན་པོ་མཆོག་གིས་བོད་དོན་ལ་རྒྱབ་སྐྱོར་གནང་མཁན་གཞུང་དང་ཚོགས་པ་ཁག་གི་སྐུ་ཚབ་ཡོངས་ལ་ཐུགས་རྗེ་ཆེ་ཞུས་པ་དང་སྦྲགས། མུ་མཐུད་བོད་དོན་ལ་རྒྱབ་སྐྱོར་ཡོང་བའི་འབོད་བསྐུལ་དང་། ཉེ་འཆར་བོད་མིའི་སྒྲིག་འཛུགས་ནས་བསྐོ་གཞག་གནང་པའི་ཨ་རིའི་སྐུ་ཚབ་དོན་གཅོད་གསར་པ་བོད་མི་མང་སྤྱི་འཐུས་ཚོགས་ཟུར་སྤེན་པ་ཚེ་རིང་མཆོག་མང་ཚོགས་ལ་ངོ་སྤྲོད་མཛད་ཡོད་པ་རེད།
རྩ་བའི་དེ་རིང་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་རྣམ་གཉིས་དབར་མཇལ་འཕྲད་མཛད་རྒྱུ་དང་། ཁུལ་དེར་རྟེན་གཞི་བྱས་པའི་ National Endowment for Democracy ཞེས་མང་གཙོ་གོང་སྤེལ་བསྟི་གནས་ཁང་གིས་གོ་སྒྲིག་ཞུས་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་དང་། བོད་མིའི་སྒྲིག་འཛུགས་འདི་བཞིན་ཚད་ལྡན་མང་གཙོའི་ལམ་ལུགས་སུ་ཤར་སྐྱོད་བྱེད་བཞིན་པ་བཅས་ལ་ཆེ་བསྟོད་ཀྱི་གཟེངས་རྟགས་འབུལ་བཞེས་ཀྱི་མཛད་སྒོ་དང་། འགྲོ་བ་མིའི་ཐོབ་ཐང་གོང་འཕེལ་གཏོང་ཐབས་ཀྱི་བགྲོ་གླེང་བཅས་ཀྱི་ཐོག་དབུ་བཞུགས་མཛད་རྒྱུའི་མཛད་འཆར་ཡོད་པ་རེད།
༸གོང་ས་མཆོག་གིས་བཙན་བྱོལ་བོད་མི་རྣམས་ནས་རང་མགོ་གང་ཐོན་ཙམ་མ་ཡིན་པར་གཞིས་ལུས་རྒྱ་ཆེ་མང་ཚོགས་ཀྱི་ཚབ་བྱས་ནས་ཧུར་ཐག་གནང་གལ་ཡིན་པ་བཀའ་བསྩལ་འདུག
བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་ལྟའི་དུས་སྐབས་བཙན་བྱོལ་བོད་མི་རྣམས་ནས་རང་མགོ་གང་ཐོན་བྱ་རྒྱུ་ཙམ་མ་ཡིན་པར་གཞིས་ལུས་རྒྱ་ཆེ་མང་ཚོགས་ཀྱི་ཚབ་བྱེད་ནས་ཧུར་ཐག་གནང་རྒྱུ་གལ་ཆེ་ཡིན་པའི་བཀའ་སྩལ་འདུག
དེ་ཡང་ཁ་སང་ཚེས་ ༡༣ ཉིན་མགོན་པོ་༸གང་ཉིད་མཆོག་ཨ་རིའི་རྒྱལ་ས་ཝ་ཤིང་ཊོན་ཌི་སིའི་བོད་རིགས་སྤྱི་མཐུན་ཚོགས་པས་ཇི་ལྟར་གསོལ་འདེབས་ཞུ་དོན་ལྟར། ཁུལ་དེའི་རྟེན་གཞི་བྱས་པའི་ཨ་རིའི་གཙུག་ལག་སློབ་གྲྭ་ Bender Arena ཆེན་མོའི་རྩེད་རར་བོད་རིགས་དང་མང་ཚོགས་ ༣༠༠༠ ལྷག་ལ་དེང་དུས་ཀྱི་འཛམ་གླིང་ནང་སེམས་ཀྱི་ཞི་བདེ་སྐྲུན་ཐབས་ཞེས་པའི་བརྗོད་གཞི་ཐོག་བཀའ་སློབ་བཀའ་དྲིན་སྩལ་བ་དང་འབྲེལ། སྐབས་དེར་ཕེབས་པའི་ས་གནས་བོད་མི་རྣམས་ལ་༸གང་ཉིད་མཆོག་གིས་བོད་རང་དབང་རང་བཙན་ཤོར་ནས་མི་ལོ་མང་པོ་སོང་ཡང་། ད་བར་བོད་མིའི་མི་རབས་རྒན་པ་རྣམས་ཀྱིས་བཀའ་དྲིན་ལ་བརྟེན་ནས་བོད་མི་རྣམས་རང་ཉིད་བོད་མི་ཞིག་ཡིན་བསམ་པའི་འདུ་ཤེས་མ་བརླག་པར་གནས་ཐུབ་པ་བྱུང་ཡོད་སྐོར་བཀའ་སྩལ་ཏེ། ད་ལྟའི་ཆར་བཙན་བྱོལ་བོད་མི་རྣམས་ནས་རང་མགོ་གང་ཐོན་ཙམ་མིན་པར་གཞིས་ལུས་རྒྱ་ཆེ་མང་ཚོགས་ཀྱི་ཚབ་བྱས་ནས་ཧུར་ཐག་གནང་རྒྱུ་གལ་ཆེ་ཡིན་པའི་ལམ་སྟོན་བསྩལ་འདུག
དེ་བཞིན་མགོན་པོ་མཆོག་གིས་བོད་ཀྱི་སྐད་ཡིག་འདི་ནི་རང་ཉིད་ནང་པ་སངས་རྒྱས་པའི་ཆོས་ལ་སློབ་སྦྱོང་གནང་བྱ་རྒྱུར་གཞི་མ་ལྟ་བུ་ཡིན་པ་མ་ཟད། སྐད་ཡིག་འདིའི་བརྒྱུད་རྒྱལ་སྤྱིའི་སྤྱི་ཚོགས་ཐོག་ཞབས་འདེགས་རླབས་པོ་ཆེ་ཞུ་ཐུབ་ངེས་ཡིན་སྟབས། བོད་རིགས་གཞོན་སྐྱེས་རྣམས་ནས་བོད་ཡིག་ལ་དོ་སྣང་དང་སློབ་སྦྱོང་གནང་གལ་ཆེ་བའི་བཀའ་བསྩལ་འདུག
ལྷག་དོན་༸གོང་ས་མཆོག་གིས་བཙན་བྱོལ་བོད་མིའི་ཆབ་སྲིད་ཀྱི་གནས་བབ་དང་འབྲེལ་བོད་མིའི་སྒྲིག་འཛུགས་དེ་བཞིན་དུས་ཚོད་དང་མཐུན་པའི་མང་གཙོའི་ལམ་ལུགས་ཐོག་འགྲོ་བཞིན་པ་ཡོད་པ་དང་། མ་འོངས་པར་དུས་ཀྱི་འགྱུར་ལྡོག་ལ་གཞིགས་ཏེ་གོམ་པ་མདུན་བསྐྱོད་གནང་སྟེ་བོད་ཀྱི་རིག་གཞུང་དང་སྲོལ་རྒྱུན་གང་འདྲ་ཞིག་ཡིན་ཡང་འཛམ་བུ་གླིང་འདིའི་ཐོག་ཕན་ཐོག་ཡོད་ན་མུ་མཐུད་བདག་གཅེས་གནང་དགོས་པའི་བཀའ་སྩལ་ཡོད་པ་རེད།
སྐབས་དེའི་མཛད་རིམ་ཐོག་བོད་དོན་ལ་རྒྱབ་བསྐྱོར་གནང་མཁན་དང་མགོན་པོ་༸གང་མཆོག་དང་ཐུགས་ཉེ་བའི་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་ Nancy Pelosi མཆོག་གིས་དབུས་པའི་ཨ་རིའི་གྲོས་ཚོགས་ཀྱི་འཐུས་མི་དང་ས་གནས་རྫོང་དཔོན། དེ་བཞིན་མགོན་པོ་མཆོག་གི་མཛའ་གྲོགས་སྐུ་ཞབས་ Richard Gere ལགས་སོགས་གནད་ཡོད་མི་སྣ་མང་དག་ཞིག་ཀྱང་ལྷན་ཞུགས་གནང་འདུག
གཞི་རྩའི་༸གོང་ས་མཆོག་གིས་ཁ་སང་བོད་མི་ཚོར་བཀའ་སློབ་མ་སྩལ་སྔ་རོལ་དུ་ཝ་ཤིང་ཊོན་ཌི་སིར་རྟེན་གཞི་བྱས་པའི་ཨ་རིའི་ཞི་བདེ་བསྟི་གནས་ཁང་གི་གོ་སྒྲིག་འོག་ཨ་མི་རི་ཀའི་ན་གཞོན་ཁག་ཅིག་དང་ལྷན་དུ་དྲག་པོའི་ལས་གཞི་མཚམས་འཇོག་བྱེད་རྒྱུར་ན་གཞོན་གྱི་ཆ་ཤས་ལེན་ཐབས་ཀྱི་བགྲོ་གླེང་གི་ཚོགས་མགོན་དུ་དབུ་བཞུགས་མཛད་ཡོད་པ་དང་། སྐབས་དེར་༸གང་ཉིད་མཆོག་གིས་ཉེ་ཆར་ཨ་རིའི་གྲོང་ཁྱེར་ Orlando མཚན་ཚོགས་ཤིག་ཏུ་མི་བསད་ཁྲག་སྦྱོར་གྱི་དོན་རྐྱེན་འོག་ཚེ་འདས་དང་རྨས་སྐྱོན་ཕོག་པའི་མི་སེར་རྣམས་ལ་མྱ་ངན་མཚོན་ཆེད་སྐར་མ་གཅིག་རིང་ངག་བཅད་གྲུབ་བསྟུན། བགྲོ་གླེང་ཐོག་ཕེབས་པའི་ཚོགས་བཅར་བའི་དྲི་བར་བཀའ་ལན་མཛད་འདུག
མགོན་པོ་མཆོག་ནས་ཨ་རིས་ལག་བསྟར་བྱས་པའི་དམག་དོན་སྲིད་བྱུས་ཀྱི་ཐོག་ནས་འཁོན་འཛིན་མི་ཉུང་བ་ཞིག་བཟོས་སྟབས། ཕན་ཚུན་དབར་ངལ་བ་དེ་དག་བྱུང་ཡོད་པ་གསུངས་པ་དང་འབྲེལ། དཀའ་རྙོག་དང་འཁོན་འཛིན་གང་འདྲ་ཞིག་ཡིན་ཡང་གྲོས་མོལ་དང་མཐུན་སྒྲིལ། དེ་བཞིན་བརྩེ་སེམས་དང་དྲང་བདེན་གྱི་ལམ་ནས་སེལ་ཐབས་གནང་དགོས་པ་ལས། དྲག་པོའི་དམག་ཤུགས་ཀྱིས་འགྲོ་བ་མིའི་དཀའ་ངལ་དང་སེམས་ཚོར་ལ་འགྱུར་བ་ནམ་ཡང་གཏང་ཐུབ་ཀྱི་མ་རེད་ཅེས་བཀའ་བསྩལ་འདུག
མཛད་འཆར་ལྟར་ན། དེ་རིང་ཕྱི་ཚེས་ ༡༤ ཉིན་ཨ་རིའི་གྲོས་ཚོགས་ཀྱི་ཚོགས་གཙོ་སྐུ་ཞབས་ Paul Ryan མཆོག་དང་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་ Nancy Pelosi མཆོག་གི་སྣེ་འཁྲིད་པའི་ཨ་རིའི་གྲོས་ཚོགས་ཀྱི་འཐུས་མི་ཁག་ཅིག་ནས་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེའི་གྲོས་ཚོགས་སུ་ཕེབས་བསུ་དང་སྦྲགས་ཉིན་དགུང་གསོལ་ཚིགས་ཤིག་འདེགས་འབུལ་ཞུ་རྒྱུ་རེད་འདུག
སྐབས་དེར་ཨ་རིའི་ཆབ་སྲིད་ཚོགས་པ་ཁག་གི་སྐུ་ཚབ་མཚོན་པའི་གྲོས་ཚོགས་ཀྱི་འཐུས་ ༣༠ ཙམ་དང་། དེ་བཞིན་སྐུ་ཞབས་ Richard Gere ལགས་བཅས་ནས་མཉམ་ཞུགས་གནང་གི་འདུག
ཨ་རིའི་གྲོས་ཚོགས་ཀྱི་ཚོགས་གཙོ་སྐུ་ཞབས་ Paul Ryan མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེའི་གྲོས་ཚོགས་ནང་གདན་ཞུའི་གོ་སྐབས་བྱུང་བ་དེ་ནི་སྐལ་བཟང་ཞིག་ལ་ངོས་འཛིན་དང་སྦྲགས། ༸གོང་ས་མཆོག་ནི་མི་མང་པོར་བཟང་ཕྱོགས་ཀྱི་སེམས་སྐུལ་གནང་ཐུབ་མཁན་གྱི་གང་ཟག་ཁྱད་དུ་འཕགས་བ་ཞིག་རེད་ཅེས་གསུངས་འདུག
གཞན་ཡང་ལྕམ་Nancy Pelosi མཆོག་གིས་ད་རེས་སླར་༸གོང་ས་མཆོག་ཁུལ་དེའི་གྲོས་ཚོགས་ནང་གནད་ཞུ་ཐུབ་པ་དེ་ནི་ཨ་རིའི་ཆབ་སྲིད་ཚོགས་པ་ཡོངས་ཀྱིས་མགོན་པོ་མཆོག་གིས་ད་བར་འཛམ་གླིང་ཞི་བདེ་དང་བྱམས་སྙིང་རྗེ་སོགས་ཀྱི་ཐོག་སྐུ་ངལ་ཚད་མེད་བསྐྱོན་པར་ཆེ་བསྟོད་ཀྱི་གུས་འདུག་ཞུ་རྒྱུ་དང་། ༸གོང་ས་མཆོག་ཁུལ་དེའི་གྲོས་ཚོགས་དུ་ནམ་ཕེབས་ཀྱང་གྲོས་ཚོགས་ཀྱི་འཐུས་མི་རྣམས་ལ་སེམས་འགུལ་འཕར་མ་ཞིག་ཐེབས་ཀྱི་འདུག་ཅེས་གསུངས་པ་དང་འབྲེལ། ཨ་རིའི་རྒྱལ་ཡོངས་གྲོས་ཚོགས་ཀྱིས་ཀྱང་བོད་ཀྱི་རྩ་དོན་དང་ཆོས་དང་རིག་གཞུང་སྲུང་སྐྱོབ་སོགས་ཀྱི་ཐད་ལ་རོགས་རམ་གང་ཐུབ་གནང་དགོས་པའི་འབོད་སྐུལ་ཡང་ཞུས་འདུག
རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཚེས་ ༡༣ ནས་དབུ་འཛུས་ཀྱིས་ཚེས་ ༢༥ བར་ཁྱོན་བདུན་ཕྲག་གཉིས་ལྷག་ཙམ་རིང་ཨ་རིའི་རྒྱལ་ས་གཙོས་པའི་ California དང་། Uttah དེ་བཞིན་ Colorado དང་། Indiana བཅས་ཨ་རིའི་མངའ་སྡེ་ཆེ་ཁག་ལྔའི་ནང་རིམ་པས་མཛད་འཕྲིན་བསྐྱང་གནང་གི་ཡོད་པ་མ་ཟད། སང་ཉིན་ཕྱི་ཚེས་ ༡༥ ཉིན་ཁུལ་དེར་རྟེན་གཞི་བྱས་པའི་ National Endowment for Democracy ཞེས་མང་གཙོ་གོང་སྤེལ་བསྟི་གནས་ཁང་གིས་གོ་སྒྲིག་ཞུས་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་ཆེ་བསྟོད་ཀྱི་གཟེངས་རྟགས་འབུལ་བཞེས་མཛད་སྒོ་དང་། འགྲོ་བ་མིའི་ཐོབ་ཐང་གོང་འཕེལ་གཏོང་ཐབས་ཀྱི་བགྲོ་གླེང་ཐོག་དབུ་བཞུགས་མཛད་རྒྱུ་རེད་འདུག
༸གོང་ས་༸སྐྱབས་མགོན་ཆེན་པོ་མཆོག་ཨ་རི་ནང་༸ཞབས་སོར་བདེ་བར་འཁོད་པ།
ཁ་སང་ཟླ་ ༦ ཕྱི་ཚེས་ ༡༢ ཉིན་རྒྱབ་ཚོུད་ ༣།༣༠ སྟེང་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་༸གང་ཉིད་མཆོག་གི་བཞུགས་གནས་ Park Hyatt གསོལ་མགྲོན་ཁང་དུ་༸ཞབས་སོར་བདེ་བར་འཁོད་བསྟུན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་ཨ་རི་སྐུ་ཚབ་དོན་གཅོད་སྐལ་རྡོ་ལགས་ཀྱིས་གཙོས་ས་གནས་བོད་རིགས་སྤྱི་མཐུན་ཚོགས་པ། བོད་དོན་རྒྱབ་སྐྱོར་བ། དེ་བཞིན་དད་ལྡན་མང་ཚོགས་རྣམས་ཀྱིས་ཕྱག་ཏུ་དྭངས་གཙང་མཇལ་དར་གཙོས་བདུག་སྤོས་བསྣམས་ཤིང། བཀྲིས་ཞོལ་པ་འཁྲབ་སྟོན་དང་གྲོ་སོ་ཕྱེ་མར་ཆང་ཕུད་བཅས་འདེགས་འབུལ་གྱིས་སྲོལ་རྒྱུན་ལམ་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་རེད།
༸གང་ཉིད་མཆོག་གིས་དེ་རིང་ཚེས་ ༡༣ ནས་དབུ་འཛུགས་ཀྱིས་ཚེས་ ༢༥ བར་ཁྱོན་གཟའ་འཁོར་གཉིས་ཙམ་རིང་མཛད་འཕྲིན་བཀྲིན་ཆེ་བ་བསྐྱང་རྒྱུ་ཡིན་པ་རེད།
མཛད་འཆར་གཞིགས་ན། ཕྱི་ཚེས་ ༡༣ ཉིན་རྒྱབ་ཚོུད་ ༡།༣༠ ནས་དབུ་འཛུགས་ཀྱིས་ཨ་རིའི་གཙུག་ལག་སློབ་གྲྭ་ཆེན་མོར་དེང་དུས་ཀྱི་འཛམ་གླིང་ནང་སེམས་ཀྱི་ཞི་བདེ་སྐོར་བཀའ་སློབ་བསྩལ་རྒྱུ་དང་། མཛད་རིམ་དེའི་ཐོག་བོད་དོན་རྒྱབ་སྐྱོར་བ་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་ Nancy Pelosi མཆོག་གིས་གཙོས་ཨ་རིའི་གྲོས་ཚོགས་ཀྱི་འཐུས་མི་ཁག་ཅིག་དང་། གློག་བརྙན་ཁྲབ་སྟོན་པ་གྲགས་ཅན་ Richard Gere ལགས་སོགས་གནད་ཡོད་མི་སྣ་མི་ཉུང་ཞིག་ནས་མཉམ་ཞུགས་གནང་གི་ཡོད་པ་རེད་འདུག
དེ་རྗེས་ཚེས་ ༡༤ ཉིན་ཨ་རི་གྲོས་ཚོགས་ནང་ནང་མོལ་མཛད་འཆར་ཁག་ཅིག་དང་། རྒྱལ་སྤྱིའི་བོད་དོན་ལས་འགུལ་ཁང་གི་མཛད་འཆར་དུ་ཨ་རིའི་ཕོ་བྲང་དཀར་པོ་དང་ཆེས་ཉེ་བའི་ Willard Hotel ཞེས་པའི་སྐུ་མགྲོན་ཁང་དུ་༸ཞབས་སོར་འཁོད་གནང་མཛད་རྒྱུ། ཕྱི་ཚེས་ ༡༥ ཉིན་ཨ་རི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་ National Endowment for Democracy ཞེས་པའི་མང་གཙོ་གོང་སྤེལ་བསྟི་གནས་ཁང་གིས་གོ་སྒྲིག་ཞུས་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་ཆེ་བསྟོད་ཀྱི་གཟེངས་རྟགས་འབུལ་བཞེས་མཛད་དང་འགྲོ་བ་མིའི་ཐོབ་ཐང་གོང་འཕེལ་གཏོང་ཐབས་ཀྱི་བགྲོ་གླེང་ཐོག་བཅས་སུ་དབུ་བཞུགས་མཛད་རྒྱུ་རེད་འདུག
དེ་བཞིན་ཚེས་ ༡༨ སྔ་དྲོ་༸གང་ཉིད་མཆོག་ཨ་རིའི་ཀེ་ལི་ཕོར་ནི་ཡ་མངའ་སྡེ་ནང་ཆིབས་བསྒྱུར་གྱིས་ཁུལ་དེར་གསར་འཛུགས་ཞུས་པའི་ཝི་ཏི་ནམ་ཆོས་ཚོགས་སུ་བྱམས་བརྩེ་སྐོར་བཀའ་སློབ་བཀྲིན་བསྩལ་རྒྱུ་དང་། ཉིན་རྒྱབ་ཏུ་སངས་རྒྱས་སྨན་ལྷའི་བཀའ་དབང་བསྩལ་བ་དང་འབྲེལ་ནང་ཆོས་ངོ་སྤྲོད་མཛད་རྒྱུ་ཡིན་པ་རེད། ཕྱི་ཚེས་ ༡༩ ཉིན་༸གོང་ས་མཆོག་གིས་ཝི་ཏི་ནམ་ཆོས་ཚོགས་ཀྱི་ལྷ་ཁང་གསར་པ་དབུ་འབྱེད་ཀྱི་རབ་གནས་བཀྲིན་ཆེ་རྒྱུ་ཡིན་པ་རེད། ཕྱི་ཚེས་ ༢༡ ཉིན་ Utah གཙུག་ལག་སློབ་གྲྭ་ཆེན་མོར་བྱམས་བརྩེ་དང་ཀུན་ཁྱབ་འགན་འཁུར་ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ། གཞན་ཡང་ཕྱི་ཚེས་ ༢༣ སྔ་དྲོ་ Colorado མངའ་སྡེའི་ Boulder ས་གནས་སུ་ཕྱི་ནང་གི་མང་ཚོགས་ལ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་ཆོས་འབྲེལ་དང་། དེ་རྗེས་ཚེས་ ༢༥ ཉིན་ Indiana ནང་པའི་ཆོས་ཚོགས་དང་ Interfaith Cooperation and Compassionate Indy ཚོགས་གཉིས་ཟུང་འབྲེལ་གྱིས་གོ་སྒྲིག་འོག མང་ཚོགས་ལ་བྱམས་བརྩེ་ནི་འཛམ་གླིང་ཞི་བདེའི་ཀ་བ་ལྟ་བུ་ཡིན་ཅེས་པའི་བརྗོད་གཞིའི་ཐོག་བཀའ་སློབ་བཀྲིན་ཆེ་རྒྱུ་བཅས་ཀྱི་མཛད་འཆར་ཡོད་པ་རེད།
རྩ་བའི་༸གོང་ས་མཆོག་ད་ལན་གྱི་མཛད་འཆར་ཁྲོད་ཨ་རིའི་རྒྱལ་ས་ཝ་ཤིང་ཊོན་ཌི་སི་གཙོས་པའི་ California དང་། Uttah དེ་བཞིན་ Colorado དང་། Indiana བཅས་ཨ་རིའི་མངའ་སྡེ་ཆེ་ཁག་ལྔའི་ནང་ནང་པའི་ཆོས་ཚོགས་དབུ་འབྱེད་དང་བཀའ་ཆོས། དེ་བཞིན་མང་ཚོགས་ལ་བླང་དོར་གྱི་བཀའ་སློབ་བསྩལ་རྒྱུ་སོགས་ཀྱི་མཛད་འཆར་སྣ་མང་ཞིག་བང་སྒྲིག་གནང་འདུག
༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ནས་ཨ་རིར་ཆིབས་སྒྱུར་བསྐྱངས་པ།
དེ་རིང་ཟླ་ ༦ ཕྱི་ཚེས་ ༡༠ ཉིན་དགུང་ཚོུད་ ༡༢།༢༠ ཙམ་ལ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དྷ་ས་བཞུགས་སྒར་ནས་ཨ་རིར་ཆིབས་སྒྱུར་བསྐྱངས་གནང་མཛད་སོང་།
དེ་ཡང་མགོན་པོ་༸གང་ཉིད་མཆོག་དང་སྟོན་འཁོར་ལྷན་རྒྱས་ལྗགས་སྨིན་གྲུབ་རྗེས་བཞུགས་སྒར་༸རྒྱལ་བའི་ཕོ་བྲང་ནས་ཕེབས་ཐོན་གྱིས་གྷ་གལ་གནམ་ཐང་དང་དེ་ནས་མཁའ་ལམ་བརྒྱུད་ལྡི་ལིར་ཆིབས་སྒྱུར་བསྐྱངས་ཀྱི་ཡོད་པ་དང་། ཕྱི་ཚེས་ ༡༢ ཉིན་ཨ་རིའི་རྒྱལ་ས་ཝ་ཤིང་ཊོན་དུ་ཞབས་སོར་བདེ་བར་འཁོད་གནང་གི་ཡོད་པ་རེད། དེ་རྗེས་༸གང་ཉིད་མཆོག་གིས་ཚེས་ ༡༣ ནས་དབུ་འཛུགས་ཀྱིས་ཚེས་ ༢༥ བར་ཁྱོན་གཟའ་འཁོར་གཉིས་ཙམ་རིང་མཛད་འཕྲིན་བཀྲིན་ཆེ་བ་བསྐྱང་རྒྱུ་རེད་འདུག
དེ་ཡང་ཁུལ་དེའི་ཨ་རིའི་གཙུག་ལག་སློབ་གྲྭ་ཆེན་མོར་དེང་དུས་ཀྱི་འཛམ་གླིང་ནང་སེམས་ཀྱི་ཞི་བདེ་སྐོར་བཀའ་སློབ་བསྩལ་རྒྱུ་དང་། ལྷག་དོན་ཕྱི་ཚེས་ ༡༥ ཉིན་ཨ་རི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་ National Endowment for Democracy ཞེས་པའི་མང་གཙོ་གོང་སྤེལ་བསྟི་གནས་ཁང་གིས་གོ་སྒྲིག་ཞུས་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་ཆེ་བསྟོད་ཀྱི་གཟེངས་རྟགས་འབུལ་བཞེས་མཛད་དང་འགྲོ་བ་མིའི་ཐོབ་ཐང་གོང་འཕེལ་གཏོང་ཐབས་ཀྱི་བགྲོ་གླེང་ཐོག་བཅས་སུ་དབུ་བཞུགས་མཛད་རྒྱུ་རེད་འདུག
དེ་བཞིན་ཚེས་ ༡༨ སྔ་དྲོ་༸གང་ཉིད་མཆོག་ཨ་རིའི་ཀེ་ལི་ཕོར་ནི་ཡ་མངའ་སྡེ་ནང་ཆིབས་བསྒྱུར་གྱིས་ཁུལ་དེར་གསར་འཛུགས་ཞུས་པའི་ཝི་ཏི་ནམ་ཆོས་ཚོགས་སུ་བྱམས་བརྩེ་སྐོར་བཀའ་སློབ་བཀྲིན་བསྩལ་རྒྱུ་དང་། ཉིན་རྒྱབ་ཏུ་སངས་རྒྱས་སྨན་ལྷའི་བཀའ་དབང་བསྩལ་བ་དང་འབྲེལ་ནང་ཆོས་ངོ་སྤྲོད་མཛད་རྒྱུ་ཡིན་པ་རེད། ཕྱི་ཚེས་ ༡༩ ཉིན་༸གོང་ས་མཆོག་གིས་ཝི་ཏི་ནམ་ཆོས་ཚོགས་ཀྱི་ལྷ་ཁང་གསར་པ་དབུ་འབྱེད་ཀྱི་རབ་གནས་བཀྲིན་ཆེ་རྒྱུ་དང་། ཚེས་ ༢༡ ཉིན་ Utah གཙུག་ལག་སློབ་གྲྭ་ཆེན་མོར་བྱམས་བརྩེ་དང་ཀུན་ཁྱབ་འགན་འཁུར་ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ། གཞན་ཡང་ཕྱི་ཚེས་ ༢༣ སྔ་དྲོ་ Colorado མངའ་སྡེའི་ Boulder ས་གནས་སུ་ཕྱི་ནང་གི་མང་ཚོགས་ལ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་ཆོས་འབྲེལ་དང་། ཉིན་རྒྱབ་ཏུ་མང་ཚོགས་ལ་བྱམས་བརྩེ་ནི་འཛམ་གླིང་ཞི་བདེའི་ཀ་བ་ལྟ་བུ་ཡིན་ཅེས་པའི་བརྗོད་གཞིའི་ཐོག་བཀའ་སློབ་བཀྲིན་ཆེ་རྒྱུ་བཅས་ཀྱི་མཛད་འཆར་ཡོད་པ་རེད།
གཞི་རྩའི་༸གོང་ས་མཆོག་ད་ལན་གྱི་མཛད་འཆར་ཁྲོད་ཨ་རིའི་རྒྱལ་ས་ཝ་ཤིང་ཊོན་ཌི་སི་གཙོས་པའི་ California དང་། Uttah དེ་བཞིན་ Colorado དང་། Indiana བཅས་ཨ་རིའི་མངའ་སྡེ་ཆེ་ཁག་ལྔའི་ནང་ནང་པའི་ཆོས་ཚོགས་དབུ་འབྱེད་དང་བཀའ་ཆོས། དེ་བཞིན་མང་ཚོགས་ལ་བླང་དོར་གྱི་བཀའ་སློབ་བསྩལ་རྒྱུ་སོགས་ཀྱི་མཛད་འཆར་སྣ་མང་ཞིག་བང་སྒྲིག་གནང་འདུག
རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ཨ་རི་ནང་ཆིབས་བསྒྱུར་མ་མཛད་གོང་འདས་པའི་ཉིན་གྲངས་གསུམ་ནང་Nalanda Shiksha འམ་ནཱེནྡྲའི་སློབ་གཉེར་ཁང་ཞེས་པའི་རྒྱ་གར་ནང་པའི་ཚོགས་པས་ཇི་ལྟར་གསོལ་འདེབས་ཞུ་དོན་བཞིན། ༸གང་ཉིད་མཆོག་ནས་ཟླ་འདིའི་ཕྱི་ཚེས་ ༧ ནས་དབུ་འཛུགས་ཀྱིས་ཚེས་ ༩ བར་ཉིན་གྲངས་གསུམ་རིང་ཐེག་ཆེན་ཆོས་གླིང་གཙུག་ལག་ཁང་དུ་ཆེད་དུ་བྱ་བའི་འདུལ་བྱ་ནཱ་ལེནྡྲའི་སློབ་གཉེར་ཁང་གི་རྒྱ་གར་སློབ་ཕྲུག་དང་ཝི་ཏི་ནམ། ཀོ་རི་ཡ། ཕྱི་ནང་དད་ལྡན་ཆོས་ཞུ་བ། དེ་བཞིན་རྡ་སའི་སེར་སྐྱ་མང་ཚོགས་ ༧༠༠༠ སྟོང་བརྒལ་བར་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ལེའུ་ལྔ་པ་ཤེས་བཞིན་བསྲུང་བའི་བར་ཁ་སང་བཀའ་ཆོས་རེ་ཞིག་མཇུག་སྒྲིལ་མཛད་ཡོད་པ་རེད།