རྒྱལ་སྤྱི།

ཨ་རིའི་ Philadelphia གྲོང་ཁྱེར་ནང་༸གོང་ས་སྐྱབས་མགོན་ཆེན་པོ་མཆོག་གི་མཛད་རྗེས་ལ་ཆེ་བསྟོད་ཞུ་སླད་གྲོང་ཁྱེར་དེའི་ནང་གཞུང་འབྲེལ་གྱི་བྱམས་བརྩེའི་ཉི་མོ་ཞེས་སྲུང་བརྩི་ཞུས་ཡོད་པ་རེད།   ཁ་སང་ཕྱི་ཚེས་ ༢༧ ཉིན་གྲོང་ཁྱེར་དེའི་ནང་ཨ་རིའི་རྒྱལ་ཡོངས་རྩ་ཁྲིམས་སྟེ་གནས་ཁང་ནས། ༢༠༡༥ལོའི་ཆེས་སྙན་པར་གྲགས་པའི་ཨ་རིའི་རང་དབང་གཟེངས་རྟགས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕུལ་ཟིན་གྲུབ་རྗེས། དེ་རིང་ཚེས་ ༢༨ ཉིན་ཨ་རིའི་ Pennsylvania’s མངའ་སྡེ་Philadelphia གྲོང་ཁྱེར་སྤྱི་ཁྱབ་ལས་ཁུངས་ཀྱིས་༸གོང་ས་མཆོག་གིས་བྱམས་པ་དང་བརྩེ་བ། དེ་བཞིན་སྐྱེ་འགྲོ་ཀུན་ལ་གཞན་ཕན་དང་སྙིང་རྗེ་ལམ་ནས་འགྲོ་བ་མིའི་སྤྱི་ཚོགས་ཁྱོན་ཡོངས་ལ་ཕན་བདེའི་མཛད་འཕྲིན་རླབས་པོ་ཆེ་སྐྱོང་བཞིན་པར་ཆེ་བསྟོད་ཞུ་རྒྱུའི་མཛད་སྒོ་ཞིག་ཚོགས་ཡོད་པ་དང། དེའི་ཐོག་ Philadelphia གྲོང་ཁྱེར་སྤྱི་ཁྱབ་ལས་ཁུངས་ཀྱི་ལས་བྱེད་རྣམ་པ་དང། ས་གནས་ཁག་གི་མཐོ་རིམ་སློབ་མ། དེ་བཞིན་ས་གནས་བོད་མི་དང་མང་ཚོགས་བཅས་ཁྱོན་མི་གྲངས་ ༡༠༠ ལྷག་འདུ་འཛོམས་ཀྱིས་ཉིན་འཁྱོངས་བྱམས་བརྩེའི་ཉི་མོ་ཞེས་སྲུང་བརྩི་ཞུས་ཡོད་པ་རེད།   དེ་མཚུངས་མི་འབོར་ས་ཡ་ལྔ་ལྷག་ཡོད་པའི་ཨ་རིའི་གྲོང་ཁྱེར་ཆེ་གྲས་ལྔ་པ་ Philadelphia ཁུལ་གྱི་གཞི་རིམ་སློབ་གྲྭ་ནས་མཐོ་རིམ་སློབ་གྲྭ་ཁག་ ༡༠༠ ལྷག་གི་སློབ་མ་ཚོས་བོད་ཀྱི་རླུང་རྟ་དར་ལྕོག་མཚོན་ལྔ་ཅན་གྱི་སྟེང་དུ་བྱམས་བརྩེ་དང་འབྲེལ་བའི་སྨོན་ཚིག་དང་འདི་བཞིན་འབོད་ཚིག་འདྲ་མིན་འཁོད་པའི་དར་ལྕོག་ ༣༠༠༠ ལྷག་གྲོང་ཁྱེར་གྱི་སྤྱི་ཁྱབ་ལས་ཁུངས་ཀྱི་ར་བའི་ནང་དཔྱང་པ་མ་ཟད། སློབ་གྲྭ་ཁག་གི་སློབ་མ་དང་མང་ཚོགས་ཚོས་བྱམས་བརྩེའི་བརྗོད་གཞིའི་ཐོག་བགྲོ་གླེང་དང་དགོངས་ཚུལ་བརྗེ་ལེན་མཚོན་ས་གནས་བོད་མི་ཚོས་གཞས་སྣ་འཁྲབ་སྟོན་དང་བདེན་ཚིག་སྨོན་ལམ་གསུང་འདོན་གནང་པ་སོགས་ཀྱིས་སྲུང་བརྩི་གཟབ་རྒྱས་ཞུས་འདུག   རྩ་བའི་ཁ་སང་ཕྱི་ཚེས་ ༢༧ ཉིན་མོ་སྟེ་ཨ་རིའི་ Philadelphia གྲོང་ཁྱེར་དབུ་བརྙེས་ནས་མི་ལོ་ ༣༣༣ འཁོར་བའི་དུས་ཆེན་ཞིག་ཀྱང་འཁེལ་གྱི་ཡོད་པ་དང། ད་ལན་༸གོང་ས་༸སྐྱབས་མགོན་ཆེན་པོ་མཆོག་ལ་གྲོང་ཁྱེར་དེའི་རྒྱལ་ཡོངས་རྩ་ཁྲིམས་བསྟེ་གནས་ཁང་གིས་རང་དབང་གཟེངས་རྟགས་འབུལ་ལམ་ཞུས་པ་དང་། བདུན་ཅིག་རིང་༸གོང་ས་མཆོག་གི་བཀའ་དགོངས་བཞིན་མཐོ་རིམ་སློབ་གྲྭ་ཁག་ཏུ་བྱམས་བརྩེའི་སྐོར་བགྲོ་གླེང་དང། མང་ཚོགས་ཁྲོད་ལ་བྱམས་བརྩེའི་གོ་རྟོགས་སྤེལ་གནང་གི་ཡོད་འདུག

ཌར་ཅ་ (Dutch) གྱི་རྒྱལ་པོ་ Willེem Alexander མཆོག་གིས་ནེ་ཐར་ལན་ཌི་ (Netherland) རྒྱལ་ཁབ་དང་མི་སེར་ངོས་ནས་རྒྱ་ནག་ནང་གི་འགྲོ་མིའི་ཐོབ་ཐང་གི་གནས་སྟངས་དང་། དེའི་ཐོག་ལ་རྒྱ་གཞུང་གིས་འཛིན་བཞིན་པའི་སྲིད་བྱུས་ཁག་ལ་ངོས་ལེན་མེད་ཅེས་གསུངས་ཡོད་པ་རེད།  ཁ་སང་ཕྱི་ཚེས་ ༢༧ ཉིན་ཌར་ཅ་ (Dutch News) གསར་ཁང་གིས་དྲ་རྒྱ་ཐོག་སྤེལ་བའི་གནས་ཚུལ་ལ་གཞིགས་ན། ནེ་ཐར་ལན་ཌི་རྒྱལ་པོ་Willem Alexander ལགས་ཟླ་འདིའི་ཚེས་ ༢༥ ཉིན་ནས་དབུ་འཛུགས་ཀྱིས་རྒྱ་ནག་ནང་གཞུང་འབྲེལ་ཕྱོགས་བསྐྱོད་གནང་བཞིན་ཡོད་པ་རེད། དེ་ཡང་ཕྱི་ཚེས་ ༢༦ ཉིན་རྒྱ་ནག་མི་དམངས་ཚོགས་ཁང་ཆེན་མོའི་ནང་ལ་གཞུང་འབྲེལ་གསོལ་སྟོན་ཐོག་རྒྱལ་པོ་མཆོག་གིས་རྒྱ་ནག་དང་ ནེ་ཐར་ལན་ཌི་གཉིས་ཀྱི་དབར་ལ་དཔལ་འབྱོར་དང་ཚོང་འབྲེལ་སོགས་ཀྱི་ཐད་ལ་བསམ་བློ་མཐུན་པའི་ཆ་མང་པོ་ཡོད་ན་ཡང་། ནེ་ཐར་ལན་ཌིའི་རྒྱལ་ཁབ་དང་གཞུང་འཛིན་ངོས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་ལ་ངོས་ལེད་ནམ་ཡང་མེད་པ་གསུངས་འདུག  དེ་བཞིན་སྐབས་དེར་རྒྱལ་པོ་མཆོག་གིས་རྒྱ་ནག་རྒྱལ་ཁབ་ནས་རྒྱལ་སྤྱའི་ཐོག་ཚོང་དང་དཔལ་འབྱོར་གྱི་མཐུན་རྐྱེན་མང་དག་ཞིག་བསྐྲུན་བཞིན་པར་བསྔགས་བརྗོད་གནང་པ་མ་ཟད། ནེ་ཐར་ལན་ཌི་རྒྱལ་ཁབ་ངོས་ནས་ཀྱང་རྒྱ་ནག་ལྷན་དུ་ཚོང་དང་དཔལ་འབྱོར་གྱི་འབྲེལ་ལམ་ཐད་ལ་མུ་མཐུད་གྲོས་བསྡུར་དང་གྲོས་ཆོད་སོགས་འཇོག་རྒྱུར་གྲ་སྒྲིག་ཡོད་པ་གསུངས་འདུག ད་དུང་ཡུལ་གཉིས་ཀྱི་དབར་ལ་བསམ་ཚུལ་མི་མཐུན་པའི་གཞི་ནི་འགྲོ་བ་མིའི་ཐོབ་ཐང་གི་གནད་དོན་ཡིན་སྟབས། དེའི་ཐད་ངེས་པར་དུ་གླེང་སློང་གནང་གལ་ཡིན་པར་ངོས་འཛིན་གནང་གི་ཡོད་སྐོར་གསུངས་འདུག  གནས་ཚུལ་དེ་དང་འབྲེལ་རྒྱལ་སྤྱིའི་ཉེ་ཡངས་ཚོགས་པའི་ངེས་སྟོན་པ་སྐུ་ཞབས་ Eduard Nazarksi ལགས་ཀྱིས་ཀྱང་རྒྱལ་པོ་ Willem Alexander ལགས་ལ་ཆེ་བསྟོད་དང་སྦྲགས། ད་རེས་རྒྱལ་པོ་མཆོག་ནས་རྒྱ་ནག་ལྷན་དུ་ཚོང་གི་གནད་དོན་ཙམ་མ་ཡིན་པར་འགྲོ་བ་མིའི་ཐོབ་ཐང་གི་གནད་དོན་སྐོར་ལ་མང་ཚོགས་འདུ་འཛོམས་བྱུང་བའི་ཐོག་ཕྱི་གསལ་ནང་གསལ་ངང་གླེང་སློང་གནང་པར་དགའ་བསུ་ཡོད་ཅེས་བཞུས་གནང་འདུག  ཡང་དེ་བཞིན་སང་ཉིན་ནས་German སྲིད་བློན་ Angela Merkel མཆོག་རྒྱ་ནག་ནང་གཞུང་འབྲེལ་ཕྱོགས་བསྐྱོད་དུ་བསྐྱོད་གནང་པ་དང་བསྟུན། རྒྱལ་སྤྱིའི་ཉེ་ཡངས་ཚོགས་པ་དང་རྒྱལ་སྤྱིའི་བོད་དོན་ལས་འགུལ་ཁང་། དེ་བཞིན་རྒྱལ་སྤྱིའི་ཡུ་གུར་ World Uyghur Congress ཚོགས་པ་བཅས་ཚོགས་པ་གསུམ་གྱིས་སྲིད་བློན་མཆོག་ནས་རྒྱ་ནག་ལྷན་དུ་འགྲོ་བ་མིའི་ཐོབ་ཐང་གི་གནད་དོན་སྐོར་ལ་གླེང་སློང་གནང་དགོས་པའི་ཞུ་སྙན་ཕུལ་ཡོད་པ་རེད།

དབྱིན་ཡུལ་གྲོས་ཚོགས་སུ་དབྱིན་ཡུལ་གཞུང་འཛིན་མཆོག་ནས་ཉེན་རྟོག་པས་བོད་རིགས་ཞི་རྒོལ་བ་གཉིས་དང་རྒྱ་རིགས་མང་གཙོ་དོན་གཉེར་བ་གཅིག་བཅས་འཛིན་བཟུང་བྱས་པའི་གནད་དོན་ཐོག་གསལ་བཤད་དགོས་པའི་དྲིས་རྩད་ནན་པོ་གནང་ཡོད་འདུག  ཟླ་ ༡༠ ཕྱི་ཚེས་ ༢༡ ཉིན་རྒྱ་ནག་གི་སྲིད་འཛིན་ཞི་ཅིང་ཕིང་གི་དབྱིན་ཡུལ་ནང་གཞུང་འབྲེལ་ཕྱོགས་བསྐྱོད་སྐབས་དབྱིན་ཡུལ་ས་གནས་ཉེན་རྟོག་པས་བོད་རིགས་ཞི་རྒོལ་བ་གཉིས་དང་རྒྱ་རིགས་མང་གཅོ་དོན་གཉེར་བ་གཅིག་བཅས་ཁྱོན་ཞི་རྒོལ་བ་གསུམ་འཛིན་བཟུང་བཀག་ཉར་བྱས་པ་མ་ཟད། ཁོང་རྣམ་པའི་སྡོད་ཁང་ལ་གློ་བུར་དུ་རྔོག་བཤེར་བྱས་པ་སོགས་ཀྱི་གནས་ཚུལ་ཐོན་སྟབས། ཁ་སང་ཕྱི་ཚེས་ ༢༦ ཉིན་དབྱིན་ཡུལ་གྲོས་ཚོགས་སུ་དབྱིན་ཡུལ་གཞུང་འཛིན་མཆོག་གིས་གནད་དོན་ཐོག་གསལ་བཤད་དགོས་པའི་དྲིས་རྩད་ནན་པོ་གནང་ཡོད་པ་རེད།   དེ་ཡང་ཡུལ་དེའི་གྲོས་ཚོགས་འོག་མའི་ནང་དུ་དབྱིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Fabian Hamilton ལགས་ཀྱིས་ཉེ་ཆར་མཇུག་སྒྲིལ་ཟིན་པའི་ཞི་ཅིང་ཕིང་དབྱིན་ཡུལ་ནང་གཞུང་འབྲེལ་ཕྱོགས་བསྐྱོད་དེའི་ཁྲོད། བོད་རིགས་ཞི་རྒོལ་བ་བསོད་ནམས་ཆོས་སྒྲོན་ལགས་དང་འཇམ་དཔལ་ལྷ་མོ་ལགས། དེ་བཞིན་རྒྱ་རིགས་མང་གཙོ་དོན་གཉེར་བ་ Shao Jiang ལགས་བཅས་རྣམ་གསུམ་གྱིས་ལག་ཏུ་བོད་ཀྱི་རྒྱལ་དར་འཁྱེར་བ་དང་ཞི་ཅིང་ཕིང་ལ་འགྲོ་བ་མིའི་ཐོབ་ཐང་གི་གནད་དོན་ཐད་ལ་ངོ་རྒོལ་བྱས་པའི་ནག་ཉེས་འོག་འཛིན་བཟུང་བཀག་ཉར་བྱས་པ་མ་ཟད། ཁོང་ཚོའི་སྡོད་ཁང་དང་སྒེར་གྱི་གསང་བའི་གནས་ཚུལ་ཁག་ལ་རྔོག་བཤེར་བྱས་པའི་གནད་དོན་ཁག་གསལ་བཏོན་གནང་པ་དང་ཆབས་ཅིག དབྱིན་ཡུལ་གཞུང་གིས་ཞི་རྒོལ་བ་རྣམས་ལ་དྲང་བདེན་ཇི་ལྟར་བྱས་ཡོད་མེད་དང། གནད་དོན་དེ་ཐད་ལ་བདེན་པ་དག་སྐྱེལ་དང་ཁུངས་སྐྱེལ་བྱ་དགོས་པའི་དྲིས་རྩད་ནན་པོ་གནང་འདུག    དེ་བཞིན་སྐབས་དེར་གྲོས་ཚོགས་འཐུས་མི་སྐུ་ཞབས་Mathew Pennycook ལགས་དང་སྐུ་ཞབས་Jack Dromey ལགས་རྣམ་གཉིས་ཀྱིས་རྒྱ་ནག་དང་དབྱིན་ཡུལ་དབར་གྱི་ཚོང་དང་དཔལ་འབྱོར་གྱི་འབྲེལབ་དེ་གལ་ཆེན་པོ་ཞིག་ཡིན་ཀྱང། ང་ཚོ་རང་དབང་ཅན་གྱི་རྒྱལ་ཁབ་ཞིག་ཡིན་པའི་ཆ་ནས་མི་དམངས་ཀྱི་བདེ་འཇགས་དང་། མི་དམངས་ཀྱི་ཞི་རྒོལ་གནང་རྒྱུའི་རང་དབང་ཁག་ལ་སྲུང་སྐྱོབ་གནང་རྒྱུའི་འགན་དབང་ཆ་ཚང་ཡོད་པ་མ་ཟད། ད་ལན་གྱི་གནད་དོན་ཐད་ལ་ཞིབ་འཇུག་མཐིལ་ཕྱིན་པ་གནང་དགོས་པའི་འབོད་སྐུལ་ཤུགས་ཆེ་གནང་ཡོད་པ་རེད།  དབྱིན་ཡུལ་གཞུང་འཛིན་གྱི་ཁྲིམས་ལུགས་བློན་ཆེན་ Mike Penning ལགས་ཀྱིས་གྲོས་ཚོགས་སུ་གནད་དོན་དེ་དག་ས་གནས་ཉེན་རྟོག་པས་རང་ཉིད་ཀྱི་རྒྱལ་ཁབ་དང་ལས་འགན་གྱི་ཆ་ནས་ཐག་གཅོད་གནང་བ་ཞིག་ལ་ངོས་འཛིན་བྱས་ཀྱི་ཡོད་པ་མ་ཟད། གནད་དོན་དེ་དག་ད་ལྟའི་ཆར་བརྟག་དཔྱད་གནང་མུས་ཡིན་པ་གསུངས་ཡོད་པ་རེད།   དེ་མཚུངས་དེ་རིང་ཐའེ་ཝན་ནང་རྟེན་གཞི་བྱས་པའི་ Taiwan བོད་རིགས་ཚོགས་པ། ཐའེ་ཝན་འགྲོ་བ་མིའི་ཐོབ་ཐང་ཚོགས་པ་། Friends of Tibet དེ་བཞིན་Judicial Reform Foundation དང་། New School for Democracy བཅས་གཞུང་འབྲེལ་མ་ཡིན་པའི་ཚོགས་པ་ཁག་ལྔའི་གོ་སྒྲིག་འོག ཁུལ་དེར་ཡོད་པའི་དབྱིན་ཡུལ་གཞུང་ཚབ་ཁང་གི་མདུན་དུ་ས་གནས་ཉེ་རྟོག་པས་བོད་རིགས་གཉིས་དང་རྒྱ་རིགས་གཅིག་བཅས་འཛིན་བཟུང་བཀག་བྱས་པའི་གནད་དོན་དེའི་ཐོག་གསལ་བཤད་དག་སྐྱེལ་དགོས་པའི་ཞུ་འབོད་ཀྱི་ཞི་རྒོལ་གནང་འདུག

འདི་ལོའི་རྒྱལ་སྤྱིའི་པེན་གྱི་ཚོགས་ཆེན་ཐེངས་༨༡ པའི་ཐོག་གཞིས་བཞུགས་བོད་མིའི་བསམ་བརྗོད་རང་དབང་དང། རྩོམ་པ་པོའི་གནས་སྟངས་སྐོར་ལ་དོན་ཚན་ལྔ་ཅན་གྱི་གྲོས་ཆོད་ཅིག་བཞག་འདུག  དེ་ཡང་ཟླ་ ༡༠ ཕྱི་ཚེས་ ༡༣ ནས་ ༡༦ བཅས་ཉིན་གྲངས་བཞིའི་རིང་ཁེ་ན་ཊའི་གྲོང་ཁྱེར་ཁུ་བེཀ་ནང་དུ་རྒྱལ་སྤྱིའི་པེན་མཐུན་ཚོགས་མི་འདྲ་བ་ ༨༤ ལྷག་གི་སྐུ་ཚབ་ ༢༧༠ ལྷག་འདུ་འཛོམས་ཐོག་རྒྱལ་སྤྱིའི་པེན་མཐུན་ཚོགས་ཀྱི་ཚོགས་ཆེན་ཚོགས་ཡོད་པ་དང། ཚོགས་ཆེན་དེའི་ཐོག་ པེན་བོད་ཀྱི་རྩོམ་པ་པོ་མཐུན་ཚོགས་ཀྱི་ཚོགས་གཞོན་ཨ་རིག་དགེ་མཐོང་ལགས་དང་པེན་བོད་ཀྱི་རྩོམ་པ་པོ་མཐུན་ཚོགས་ཀྱི་ཤེས་ཡོན་འགན་འཛིན་སྨན་ཤར་བློ་གྲོས་ལགས་རྣམ་གཉིས་མཉམ་ཞུགས་གནང་ཡོད་པ་རེད། ཁོང་གཉིས་ཀྱིས་ཟླ་འདིའི་ཕྱི་ཚེས་ ༢༤ ཉིན་བཞུགས་སྒར་མེག་གྷན་ནོར་བུ་གསོལ་མགྲོན་ཁང་དུ་གསར་འགོད་ལྷན་ཚོགས་ཤིག་གི་ཐོག་གསུངས་དོན་ལ། རྒྱལ་སྤྱིའི་པེན་སྐུ་ཚབ་ལྷན་ཚོགས་ནས་བོད་ནང་སྨྲ་བརྗོད་རང་དབང་གི་ཐོབ་ཐང་དང་རྩོམ་པོའི་གནས་སྟངས་སྐོར་བཞག་པའི་དོན་ཚན་ལྔ་ཅན་གྱི་གྲོས་ཆོད་དེའི་ནང་འཁོད་དོན་ལ། རྒྱ་གཞུང་ལ་དཀོན་མཆོག་ཚེ་འཕེལ་གྱིས་གཙོས་པའི་ཞི་བའི་ལམ་ནས་སོ་སོའི་སྨྲ་བརྗོད་རང་དབང་གི་ཐོབ་ཐང་སྤྱད་པའི་རྒྱུ་མཚན་ཉག་གཅིག་ལ་བརྟེན་ནས་བཙོན་བཅུག་བྱས་པའི་བོད་ཀྱི་རྩོམ་པ་པོ་དང་བོད་མི་གཞན་ཡོངས་འཕྲལ་དུ་གློད་བཀྲོལ་ཐོངས་དགོས། བཙན་ཁྲིད་འོག་བཀག་ཉར་བྱས་པའི་བོད་ཀྱི་རྩོམ་པ་པོ་ལ་ཉེས་རྡུང་སོགས་སྡུག་སྦྱོང་མནར་གཅོད་བཟོད་པ་དཀའ་བའི་བྱ་སྤྱོད་དེ་དག་གཏོང་མཚམས་འཇོག་དགོས་པ། དེ་བཞིན་བོད་ནང་བསམ་བརྗོད་རང་དབང་གི་ཐོབ་ཐང་སྲུང་སྐྱོབ་བྱེད་དགོས་པ་དང། བོད་ནང་སྤྱི་ཚོགས་འབྲེལ་ལམ་དང་སློབ་ཁྲིད་ཆེད་བོད་ཀྱི་སྐད་ཡིག་སྤྱོད་མི་ཆོག་པའི་དམ་དྲག་ཤུགས་ཆེ་བྱེད་བཞིན་པ་ཁག་ཕྱིར་འཐེན་བྱེད་དགོས་པ་མ་ཟད། བོད་ཀྱི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་དང་ཡར་རྒྱས་གོང་འཕེལ་སླད་རྒྱ་གཞུང་གིས་ཐབས་ལམ་གང་འོས་སྤེལ་དགོས་པ་བཅས་དོན་ཚན་ལྔ་ཅན་ལ་དབྱིན་ཡུལ་དང་ཨོ་སི་ཊོ་ལི་ཡ་། དེ་བཞིན་ཕྱི་སྡོད་རྒྱ་རིགས་པེན་མཐུན་ཚོགས་ཀྱི་གཙོས་པའི་རྒྱལ་ཁབ་ ༨༡ ནས་རྒྱབ་སྐྱོར་གནང་ཐོག་སྤྱི་མོས་ཀྱིས་གྲོས་ཆོད་དུ་གཏན་འབེབས་གནང་འདུག   རྩ་བའི་ཚོསགས་ཆེན་དེའི་ཐོག་ལ་པེན་བོད་ཀྱི་རྩོམ་པ་པོ་མཐུན་ཚོགས་དང་རྒྱལ་ཁབ་གཞན་ཁག་གི་པེན་མཐུན་ཚོགས་དང་འབྲེལ་བ་སླར་གསོ་གནང་པ། དེ་དག་དང་མཉམ་འབྲེལ་ཐོག་ལས་འཆར་སྤེལ་ཕྱོགས་གྲོས་བསྡུར་གནང་པ་མ་ཟད། ལྷག་དོན་བོད་ནང་སྐད་ཡིག་བཀག་སྡོམ་གྱི་དཀའ་ངལ་དང། རྩོམ་བྲིས་རང་དབང་། པར་སྐྲུན་གྱི་དཀའ་ངལ། བཙོན་འོག་ཡོད་པའི་རྩོམ་པ་པོའི་དཀའ་ངལ་དང། དེ་བཞིན་རྒྱ་གཞུང་ནས་བོད་ཀྱི་རིག་གཞུང་ཐོག་དྲག་གནོན་དང། བོད་མི་ཚོས་སྐུ་ལུས་གཞུགས་འབུལ་གནང་པ་མཚོན་ཞི་རྒོལ་ཁག་ལ་དྲག་གནོན་བསྟུད་མར་བྱེད་མུས་ཡིན་པའི་པར་རིས་དང་རྩོམ་ཡིག་བཅས་བཤམ་སྟོན་དང་གསུང་བཤད་བཅས་གནང་ཡོད་པ་རེད།

རྒྱ་གཞུང་གི་བཙོན་ཁང་ནང་གློ་བུར་དུ་དོགས་གཞིའི་འོག་འདས་གྲོངས་སུ་གྱུར་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་མཆེ་མཆོག་གི་ཚ་བོ་ནས་ཡོ་རོབ་གྲོས་ཚོགས་ནང་རིན་པོ་ཆེའི་གདན་དོན་ཐོང་ཉན་ཞིབ་གནང་པ་མ་ཟད། རྒྱལ་སྤྱིའི་ངོས་ནས་འཕྲལ་མར་དྲང་བདེན་རྟོག་ཞོབ་དགོས་པའི་འབོད་སྐུལ་ཞུས་ཡོད་པ་རེད།  ཁ་སང་ཕྱི་ཚེས་ ༢༢ ཉིན་ཡུ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚན་པས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་ལ་ཉན་ཞིབ་གནང་པ་མ་ཟད། སྤྲུལ་སྐུ་བསྟན་འཛིན་བདེ་ལེགས་རིན་པོ་མཆེ་མཆོག་གི་ཚ་བོ་བློ་བཟང་ཚེ་རིང་ལགས་རྒྱ་ནག་གཞུང་གིས་རིན་པོ་ཆེ་ཁོང་ལ་ནག་ཉེས་གང་ཡང་མེད་པར་བཙོན་འཇུག་བྱས་པ་མ་ཟད། ལྷག་དོན་རིན་པོ་ཆེ་ཁོང་རྒྱའི་བཙོན་ཁང་ནང་སྡུག་སྦྱོང་མནར་སྤྱོད་འོག་སྐུ་བཀྲོངས་ཡོད་པ་འགྲེལ་བརྗོད་གནང་པ་དང་སྦྲགས། ཡོ་རོ་གྲོས་ཚོགས་དབུས་པའི་རྒྱལ་སྤྱིའི་ཚོགས་སྡེ་ཁག་ནས་རྒྱ་ནག་ལ་གནོན་ཤུགས་བརྒྱུད་རིན་པོ་ཆེ་མཆོག་གི་གནད་དོན་ཐད་དྲང་བདེན་རྟོག་ཞོབ་གནང་དགོས་ཀྱི་རེད་ཅེས་གསུངས་འདུག  བློ་བཟང་ཚེ་རིང་ལགས་ཀྱིས་མུ་མཐུད་གསུངས་དོན་ལ། རིན་པོ་ཆེ་མཆོག་ནི་བོད་མི་རིགས་ལ་ཤ་ཚ་ཆེ་ཞིང་བོད་མིའི་སྤྱི་ཚོགས་དང་དཔལ་འབྱོར། དེ་བཞིན་ཁོར་ཡུག་དང་ཆོས་དད་རང་དབང་གི་ཐོབ་ཐང་སྲུང་སྐྱོབ་སོགས་ཀྱི་ཐད་ལ་ཕྱག་ལས་རྒྱ་ཆེ་གནང་པ་མ་ཟད། ལྷག་དོན་དམ་པ་ཁོང་ནི་༸གོང་ས་མཆོག་ལ་དད་གུས་དང་བཀའ་གསུང་ཅི་སྒྲུབ་ཞུ་མཁན་ཞིག་ཡིན་སྟབས། རྒྱ་གཞུང་གིས་གཞི་རྩའི་བདེན་དཔང་གང་ཡང་མེད་པར་བཙོན་འཇུག་བཀག་ཉར་བྱས་མཐར་རྒྱལ་སྤྱིའི་ངོས་ནས་ཁོང་གི་འཕྲོད་བསྟེན་སླས་སྨན་བཅོས་དགོས་པའི་ཞུ་འབོད་བསྟུད་མ་བྱས་ཀྱང་ཕན་འབྲས་མ་སོན་པར་མ་ཉེས་ཁ་གཡོག་འོག་གློ་བུར་དུ་རྒྱའི་བཙོན་ནང་སྐུ་བཀྲོངས་པའི་གནས་ཚུལ་རྣམས་ནན་བརྗོད་གནང་པ་དང་འབྲེལ། གནད་དོན་དེའི་བརྒྱུད་རྒྱ་ནག་གི་བཙོན་ཁང་ནང་ཡོད་པའི་བོད་མིའི་ཆབ་སྲིད་བཙོན་པ་རྣམས་དཀའ་སྡུག་ཇི་ཙམ་མྱོང་གི་ཡོད་མེད་གསལ་པོ་རྟོགས་རྒྱུ་ཡོད་པ་རེད་ཅེས་གསུངས་ཡོད་འདུག  དེ་བཞིན་ཁོང་གིས་བོད་ནང་གི་ཆོས་དད་རང་དབང་གི་གནས་སྟངས་དང་སྐད་ཡིག་རང་དབང་སོགས་གླེང་སློང་ཞུས་པ་མ་ཟད། བོད་མི་ཞིང་འབྲོག་རྣམས་བཙན་དབང་གིས་གཞི་སྤོས་བྱ་རྒྱུ་མཚམས་འཇོག་དགོས་པ་མ་ཟད། བོད་རྒྱ་འབྲེལ་མོལ་འཕྲལ་དུ་སླར་གསོ་གནང་དགོས་པ་སོགས་ཀྱི་འབོད་སྐུལ་ཁག་གཅིག་ཞུས་འདུག  རྩ་བའི་ཁ་སང་ཉན་ཞིབ་ལས་རིམ་དེའི་སྐབས་སུ་བློ་བཟང་ཚེ་རིང་ལགས་གཅིག་པོ་མ་ཡིན་པར་ཡུ་རོབ་བོད་ཀྱི་སྐུ་ཚབ་དོན་གཅོད་དང་། རྒྱལ་སྤྱིའི་བོད་དོན་ལས་འགུལ་ཁང་སོགས གཞུང་འབྲེལ་མ་ཡིན་པའི་ཚོགས་ཁག་ལྔ་ཙམ་ནས་བོད་ནང་གི་འགྲོ་བ་མིའི་ཐོབ་ཐང་གི་དངོས་ཡོད་གནས་སྟངས་ཁག་ལ་གསལ་བཤད་དང་སྦྲགས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་དནད་དོན་ཐད་ལ་རྒྱལ་སྤྱིའི་ངོས་ནས་འཕྲལ་དུ་དྲང་བདེན་རྟོག་ཞོབ་དགོས་པའི་འབོད་བསྐུལ་ཞུས་གནང་འདུག  

རྒྱ་ནག་གི་སྲིད་འཛིན་ཞི་ཅིང་ཕིང་དབྱིན་ཡུལ་ནང་གཞུང་འབྲེལ་ཕྱོགས་བསྐྱོད་དུ་འབྱོར་བ་དང་བསྟུན། བོད་རིགས་དང་བོད་དོན་རྒྱབ་སྐྱོར་ཚོགས་པ། དེ་བཞིན་དེ་བཞིན་རྒྱ་རིགས་མང་གཙོ་དོན་གཉེར་པ་དང་རང་དབང་འཐབ་རྩོད་པ་རྣམས་ཀྱིས་ཟུང་འབྲེལ་ཐོག་ངོ་རྒོལ་སྐད་འབོད་གནང་སྟབས། བོད་པའི་བེུད་གཉིས་དང་རྒྱ་རིགས་མང་གཙོ་དོན་གཉེར་བ་བེུད་གཅིག་བཅས་འཛིན་བཟུང་ཐོག་བཀག་ཉར་བྱས་འདུག ཁ་སང་ཟླ་ ༡༠ ཕྱི་ཚེས་ ༢༠ ཉིན་སྲིད་འཛིན་ཞི་ཅིང་ཕིང་དབྱིན་ཡུལ་ནང་དབྱིན་ཡུལ་དང་རྒྱ་ནག་གི་ཚོང་འབྲེལ་ལྷན་ཚོགས་ཐོག་མཉམ་ཞུགས་གནང་ཕྱིར་ཁུལ་དེར་རྟེན་གཞི་བྱས་པའི་ Mansion House མདུན་དུ་ཞི་ཅི་ཕིང་འབྱོར་མ་ཐག་བོད་དོན་རྒྱབ་སྐྱོར་ཚོགས་པ་དང་འགྲོ་བ་མིའི་ཐོབ་ཐང་ཐད་ལ་ཕྱག་ལས་བསྟུད་མར་གནང་མཁན་གྱི་ཚོགས་ཁག་ཅིག་གི་གོ་སྒྲིག་འོག་བོད་དང་ཡུ་གུར་མི་རིགས། དེ་བཞིན་རྒྱ་རིགས་མང་གཙོ་དོན་གཉེར་པ་དང་རང་དབང་འཐབ་རྩོད་པ་རྣམས་ཀྱིས་ཟུང་འབྲེལ་ཐོག་བོད་ལ་རང་དབང་དགོས། འགྲོ་བ་མིའི་ཐོབ་ཐང་ལ་ཆ་འཛིན་བྱ་དགོས་སོགས་ཀྱི་འཕྲད་དར་བསྣམས་ཏེ་ངོ་རྒོལ་གྱི་སྐད་འབོད་ཤུགས་ཆེ་གནང་མཁན་ཁྲོད་ལས་ས་གནས་ཉེན་རྟོག་པས་བོད་པའི་བེུད་བསོད་ནམས་ཆོས་སྒྲོན་ལགས་དང་འཇམ་དཔལ་ལྷ་མོ་ལགས། དེ་བཞིན་རྒྱ་རིགས་མང་གཙོ་ལས་འགུལ་བ་ Shao Jiang ལགས་བཅས་འཛིན་བཟུང་གིས་ད་ཆ་ཁུལ་དེའི་བཀག་ཉར་ཁང་ཞིག་ཏུ་དོ་དམ་བྱས་འདུག  སླར་དེ་རིང་ཕྱི་ཚེས་ ༢༢ ཉིན་གྱི་སྔ་དྲོ་ཞི་ཅིང་ཕིང་དབྱིན་ཡུལ་དུ་རྟེན་གཞི་བྱས་པའི་ Madarin Oriental Hotel དུ་བསྐྱོད་འཆར་ཐོག་ Knightsbridge ཟམ་པའི་ཟུར་དུ་བོད་རང་བཙན་སློབ་ཕྲུག་ཚོགས་པའི་ཡོ་རོབ་ངེས་སྟོན་པ་པདྨ་སྒྲོལ་མ་ལགས་དང་ས་གནས་བོད་མི། དེ་བཞིན་བོད་དོན་རྒྱབ་སྐྱོར་བ་བཅས་ནས་སྲིད་འཛིན་ཞི་ཅིང་ཕིང་ལ་ཞི་བའི་ངོ་རྒོལ་གནང་འདུག  

རིང་མིན་ཟླ་བ་འདིའི་ཕྱི་ཚེས་ཉི་ཤུའི་ཉིན་རྒྱ་ནག་གི་སྲིད་འཛིན་ཞི་ཅིང་ཕིང་དབྱིན་ཡུལ་ནང་གཞུང་འབྲེལ་ཕྱོགས་བསྐྱོད་ཡོང་བ་དང་བསྟུན། དབྱིན་ཡུལ་གྱི་ Westminster གྲོས་ཚོགས་ཚོགས་ཁང་དུ་རྒྱལ་ཁབ་མེད་པའི་དགུང་ཚིགས་ཞེས་ཉིན་དགུང་གི་གསོལ་ཚིགས་ཤིག་གོ་སྒྲིག་བྱ་རྒྱུ་རེད་འདུག དེའང་རྒྱ་ནག་གི་སྲིད་འཛིན་ཁུལ་དེར་མ་འབྱོར་བའི་ཉིན་གཅིག་གི་སྔ་རོལ་ཏེ། ཟླ་བ་འདིའི་ཕྱི་ཚེས་ ༡༩ ཉིན་དབྱིན་ཡུལ་གྲོས་ཚོགས་ཀྱི་བོད་དོན་རྒྱབ་བསྐྱོར་ཚོགས་པའི་གོ་སྒྲིག་འོག ཁུལ་དེའི་གྲོས་ཚོགས་ཁང་དུ་རང་ཉིད་ཀྱི་རྒྱལ་ཁབ་དང་བྲལ་ཏེ་བཙན་བྱོལ་ནང་གྱར་བཞིན་པའི་བོད་རིགས་གཙོས་ཡུ་གུར་མི་རིགས། ཁུལ་དེར་ཡོད་པའི་རྒྱ་རིགས་མང་གཙོ་དོན་གཉེར་བ་དང་ཆབ་སྲིད་བཙོན་ཟུར་བ་རྣམས་ལ་ཆེ་བསྟོད་དང་སྦྲགས་ཉིན་དགུང་གསོལ་ཚོགས་ཤིག་འདེགས་འབུལ་བྱ་རྒྱུ་དང།  དེའི་སྐབས་རྒྱ་ནག་གཞུང་གིས་བོད་གཙོས་པའི་རྒྱལ་ཁབ་དེ་དག་གི་ནང་ལ་མུ་མཐུད་དྲག་གནོན་དང་། སྡུག་རྩུབ་ཅན་གྱི་སྲིད་བྱུས་མང་དག་ཞིག་ལག་བསྟར་བྱེད་བཞིན་པའི་སྐོར་ལ་གཏམ་བཤད་དང་གྲོས་བསྡུར་སྦྱང་བཤད་གནང་རྒྱུ་རེད་འདུག  དབྱིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Fabian Hamilton ལགས་ཀྱིས་དགུང་ཚིགས་ཤིག་གོ་སྒྲིག་ཞུ་པའི་དགོས་དམིགས་གཙོ་བོ་ནི། སྲིད་འཛིན་ཞི་ཅིང་ཕིང་གྱི་སྲིད་གཞུང་འོག་མནར་གཅོད་མྱོང་བཞིན་པའི་བོད་མི་དང་ཡུ་གུར་མི་རིགས། དེ་བཞིན་རྒྱ་ནག་མང་གཙོ་དོན་གཉེར་བ་བཅས་ཀྱི་མངོན་འདོད་རྣམས་ལ་གྲོས་བསྡུར་གནང་སྟེ་རྒྱལ་སྤྱིའི་ཐོག་ཏུ་མངོན་གསལ་གནང་རྒྱུ་ཡིན་པ་གསུངས་འདུག དེ་མཚུངས་ཁ་སང་དབྱིན་ཡུལ་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་ནས་སྲིད་འཛིན་ཞི་ཅིང་ཕིང་གི་གཞུང་འབྲེལ་ཕྱོགས་བསྐྱོད་དང་འབྲེལ་གསར་འགོད་ལྷན་ཚོགས་ཤིག་བསྐོང་ཚོགས་བྱས་པའི་སྐབས་རྒྱ་ནག་གི་གཞུང་ཚབ་པ་ Liu Xiaoming ཡིས་སྲིད་འཛིན་ཞི་ཅིང་ཕིང་གི་གཞུང་འབྲེལ་ཕྱོགས་བསྐྱོད་ཐད་དབྱིན་གཞུང་དང་གཞུང་འབྲེལ་མིན་པའི་ཚོགས་ཁག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་ཐད་ལ་གླེང་སློང་གནང་རྒྱུ་མེད་པ་མ་དང། གལ་སྲིད་དེ་ལྟར་གླེང་ཚེ་ཞི་ཅིང་ཕིང་ལ་སུན་གཙེར་བྱ་གཞི་ལས་མ་འདས་པས་ཡུལ་གཉིས་ཀྱི་འབྲེལ་ལམ་ལ་དོ་ཕོག་ཡོང་རྒྱུ་ཡིན་པར་བརྗོད་འདུག  འོན་ཀྱང་དབྱིན་ཡུལ་ཕྱོགས་འགལ་ཚོགས་པའི་འགོ་ཁྲིད་Jeremy Corbyn ལགས་ཀྱིས་གཟའ་འཁོར་རྗེས་མའི་ནང་ཞི་ཅིང་ཕིང་ཁུལ་དེར་འབྱོར་ཚེ། ཁོང་གིས་གཞུང་འབྲེལ་གསོལ་སྟོན་དང་མཇལ་འཕྲད་སྐབས་སུ་འགྲོ་བ་མིའི་གནད་དོན་ཐད་ངེས་པར་དུ་གླེང་སློང་གནང་རྒྱུའི་དམ་བཅའ་འཇོག་གནང་པ་མ་ཟད། རྒྱལ་སྤྱི་ཉེ་ཡང་ཚོགས་པས་སྐབས་དེར་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་སྲིད་འཛིན་ཞི་ཅིང་ཕིང་ལ་ངོ་རྒོལ་སྐད་འབོད་གནང་གཏན་འཁེལ་ཡོད་འདུག

ཡོ་རོབ་རྒྱལ་ཁབ་ཕ་རན་སིའི་གྲོས་ཚོགས་འཐུས་མི་རྣམ་པ་གཙོས་གཞུང་འབྲེལ་གནད་ཡོད་མི་སྣ་ ༦༦ གིས་བོད་དང་མཉམ་དུ་ཡོད་ཅེས་པའི་བོད་དོན་རྒྱབ་སྐྱོར་གྱི་ཞུ་སྙན་ཐོག་མཚན་རྟགས་བསྐྱོན་འདུག འདི་ལོའི་གསུམ་བཅུ་དུས་དྲན་ཉིན་མོར་ཡོ་རོབ་ཁུལ་དུ་བོད་མི་དང་བོད་དོན་རྒྱབ་སྐྱོར་ཚོགས་ཁག་གིས་དགོས་འདུན་དོན་ཚན་གསུམ་ཅན་གྱི་ཐོག་ནས་ཡོ་རོབ་བོད་ཀྱི་རྩ་དོན་ཆེད་རྒྱབ་སྐྱོར་ཡོད་ཅེས་པའི་ལོ་འཁོར་མོ་གཅིག་རིང་ཡོ་རོབ་རྒྱལ་ཁབ་ནང་གྲོས་ཚོགས་འཐུས་མི་དང་གཞུང་འབྲེལ་གནད་མི་སྣས་བོད་དོན་རྒྱབ་སྐྱོར་ཡོང་ཐབས་སུ་མཚན་རྟགས་བསྡུ་རུབ་ཀྱི་ཞུ་གཏུག་ལས་འགུལ་ཞིག་སྤེལ་མུས་ཡིན་པ་རེད། རྩ་བའི་ཕ་རན་སིའི་ནང་འདས་པའི་ཟླ་བ་དྲུག་ནང་ས་གནས་བོད་རིགས་ཚོགས་པ་གཙོས་པའི་གཞུང་འབྲེལ་མིན་པའི་བོད་རིགས་ཚོགས་ཁག་དང་བོད་དོན་རྒྱབ་སྐྱོར་བ་བཅས་ཟུང་འབྲེལ་གྱིས་བོད་དོན་ཞུ་གཏུག་ལས་འགུལ་དེའི་བརྒྱུད་ནས་ཡུལ་དེའི་དབུས་གྲོས་ཚོགས་གོང་འོག་དང་། ས་གནས་ཀྱི་གྲོས་ཚོགས་འཐུས་མི། དེ་བཞིན་གྲོང་ཁྱེར་སྤྱི་ཁྱབ་བཅས་ཁྱོན་གཞུང་འབྲེལ་གནད་ཡོད་མི་སྣ་ ༦༦ གིས་བོད་ཀྱི་རྩ་དོན་ཆེད་རྒྱབ་སྐྱོར་ཡོད་པའི་མཚན་རྟགས་བཀོད་ཡོད་པ་རེད་འདུག དེ་བཞིན་བོད་དོན་ཞུ་གཏུག་གི་ལས་འགུལ་དེ་དང་བསྟུན། ཁ་སང་ཕྱི་ཚེས་ ༡༥ ཉིན་སྐུ་ཚབ་དོན་ཁང་གི་དྲུང་ཆེ་ཚེ་རིང་དོན་གྲུབ་ལགས་དང། རྒྱལ་སྤྱིའི་བོད་དོན་ལས་འགུལ་ཁང་གི་སྐུ་ཞབས་ Vincent Metten ལགས་རྣམ་པ་གཉིས་ནས། ཕ་རན་སིའི་གྲོས་ཚོགས་གོང་མའི་འཐུས་མི་ Michal Raison ལགས། Annick billion ལགས་དང་ Maurice Antiste ལགས་བཅས་མཇལ་འཕྲད་ཀྱིས་བོད་དོན་ཞུ་གཏུགས་ཀྱང་གནང་འདུག

དབྱིན་ཇིའི་རྒྱས་སྲས་Charles མཆོག་ནས་སྲིད་འཛིན་ཞི་ཅིང་ཕིང་དང་གཞུང་འབྲེལ་གྱི་གསོལ་སྟོན་ཐོག་ཕེབས་རྒྱུ་མིན་པའི་ཡོངས་ཁྱབ་གནང་འདུག  དབྱིན་ཡུལ་གྱི་རྒྱལ་མོ་Elizabath མཆོག་གིས་སྲིད་འཛིན་ཞི་ཅིང་ཕིང་ལ་མགྲོན་འབོད་གནང་པ་ལྟར། ཞི་ཅིང་ཕིང་ཟླ་བ་འདིའི་ཚེས་ ༢༠ ནས་དབུ་འཛུགས་ཀྱིས་ཉིན་གྲངས་བཞིའི་རིང་ཁུལ་དེར་རྒྱལ་དོན་སྐོར་བསྐྱོད་བྱ་རྒྱུ་ཡིན་པ་དང་། དེ་ནི་འདས་པའི་ལོ་ངོ་༡༠ ནང་གི་རྒྱ་ནག་གི་ཆེས་མཐོའི་དབང་འཛིན་པས་དབྱིན་ཡུལ་ནང་རྒྱལ་དོན་སྐོར་བསྐྱོད་བྱས་པ་ཐོག་མ་དེ་ཆགས་ཀྱི་ཡོད་པ་མ་ཟད། སྐོར་བསྐྱོད་དེའི་ཁྲོད་ཞི་ཅིང་ཕིང་ལ་དབྱིན་ཇིའི་རྒྱལ་མོ་དང་ཁོ་མོའི་ཚ་བོ་དང་ཚ་བོའི་བཟའ་ཟླ་བཅས་དབུ་བཞུགས་ཐོག Buckingham  ཕོ་བྲང་ནང་གཞུང་འབྲེལ་གསོལ་སྟོན་ཞིག་གཤམ་སྟོན་གནང་རྒྱུ་ཡོངས་བསྒྲགས་གནང་འདུག་ཀྱང་། སྐབས་དེར་དབྱིན་ཇིའི་རྒྱལ་སྲས་Charles མཆོག་ནས་གསོལ་སྟོན་དེའི་ཐོག་མཉམ་ཞུགས་གནང་རྒྱུ་མིན་པར་བརྗོད་འདུག  ད་ལན་ཞི་ཅིང་ཕིང་གི་སྐོར་བསྐྱོད་དེའི་ཁྲོད། ཁོང་ནས་ལོན་ཊོན་དང་མན་ཆེ་སི་ཊར་སོགས་གྲོང་ཁྱེར་ཁག་ཅིག་ནང་སྐོར་བསྐྱོད་ཀྱིས། གཙོ་བོ་དབྱིན་ཇིའི་རྒྱལ་མོས་སྣེ་ལེན་ཞུས་པའི་གསོལ་སྟོན་ཐོག་གཙོ་བཞུགས་གནང་རྒྱུ་དང་། དེ་བཞིན་དབྱིན་ཇིའི་སྲིད་བློན་David Cameron དང་ཕྱོགས་འགལ་ཚོགས་པའི་གྲོས་ཚོགས་འཐུས་མིར་མཇལ་འཕྲད་བྱས་ཏེ། གྲོས་ཚོགས་ནང་གཏམ་བཤད་བྱ་རྒྱུ་མ་ཟད། རྒྱལ་ཁབ་གཉིས་ཀྱི་ཆེས་མཐོའི་གྲོས་མོལ་སྣ་ཚོགས་དང་འཕྲུལ་ལས་བཟོ་རིགས་གོང་སྤེལ། དེ་བཞིན་ཚོང་འབྲེལ་དང་མ་དངུལ། གཞན་ཡང་དཔལ་འབྱོར་དང་རིག་གཞུང་སོགས་ཀྱི་ཐོག་མཉམ་འབྲེལ་བྱ་རྒྱུ་ཡིན་པ་རེད།  རྒྱལ་སྲས་ Charles ལགས་ནི་བོད་མིའི་བླ་ན་དབུ་ཁྲིད་སྤྱི་ནོར་༸གོང་ས་མཆོག་དང་ཐུགས་འབྲེལ་ཧ་ཅང་ཉེ་པོ་ཡོད་མཁན་ཞིག་ཡིན་པ་དང་། ཁོང་གིས་ད་བར་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་བོད་དོན་ཐད་རྒྱབ་སྐྱོར་མཚོན་ཆེད། རྒྱ་ནག་གི་དཔོན་རིགས་རྣམས་དབྱིན་ཇིའི་རྒྱལ་ས་ལོན་ཊོན་དུ་ནམ་ཞིག་འཚམས་གཟིགས་སུ་ཕེབས་སྐབས་གཡོལ་ཐབས་གནང་ཡོད་པ་མ་ཟད། ལྷག་དོན་ཐེངས་འདིའི་གཞུང་འབྲེལ་གྱི་སྣེ་ལེན་ཞུ་རྒྱུའི་མཛད་རིམ་གཞན་ཁག་ཅིག་གི་ཐོག་ཕེབས་རྒྱུ་ཡིན་འདུག  རྩ་བའི་སྲིད་འཛིན་ཞི་ཅིང་ཕིང་ལ་གསོལ་སྟོན་གཤམ་རྒྱུའི་མཛད་རིམ་དེའི་ཐོག་གཞུང་འབྲེལ་གནད་ཡོད་མི་སྣ་མང་པོ་མཉམ་ཞུགས་གནང་གི་ཡོད་པ་ལྟར། དེ་དག་ཁོངས་སུ་དབྱིན་ཡུལ་ངལ་རྩོལ་ཆབ་སྲིད་ཚཽགས་པའི་ཚོགས་གཙོ་སྐུ་ཞབས་Jeremy Corbyn ལགས་ནས་གསོལ་སྟོན་དེ་དང་བསྟུན། སྐབས་དེར་ཁོང་ནས་ཞི་ཅིང་ཕིང་ལ་རྒྱ་གཞུང་གིས་ཡུལ་དེའི་མི་རིགས་ཀྱི་རང་དབང་ཐོིག་དམ་དྲག་དང་ལྷག་པར་བརྒྱུད་ལམ་ཁག་ལ་སྟངས་འཛིན་ནན་མོ་བྱས་བཞིན་པའི་གནད་དོན་སྐོར་གླེང་སློང་བྱ་རྒྱུ་ཡིན་སྐོར་ནན་བརྗོད་གནང་འདུག