གསར་འགྱུར།

ཨ་རིའི་རྒྱལ་ས་ཝ་ཤིན་ཊོན་ནང་ཨ་རི་དང་རྒྱ་ནག་དབར་གྱི་འགྲོ་བ་མིའི་ཐོབ་ཐང་གི་གནད་དོན་སྐོར་ལོ་འཁོར་ལྷན་ཚོགས་ཤིག་ཚོགས་ཡོད་པ་དང། ཟླ་ ༨ ཕྱི་ཚེས་ ༡༣ ཉིན་ལྷན་ཚོགས་མཇུག་སྒྲིལ་དང་བསྟུན། ཨ་རིའི་མང་གཙོ་དང་འགྲོ་བ་མིའི་ཐོབ་ཐང་གི་འགན་འཛིན་ཕྱི་སྲིད་དྲུང་གཞོན་སྐུ་ཞབས་ Tom Malinowski ལགས་ཀྱིས་གསར་འགོད་ལྷན་ཚོགས་ཤིག་སྐོང་ཚོགས་ཐོག་བསྒྲགས་གཏམ་ཞིག་སྤེལ་བ་དང། ཨ་རི་དང་རྒྱ་ནག་དབར་གྱི་འགྲོ་བ་མིའི་ཐོབ་ཐང་སྐོར་གྱི་གྲོས་མོལ་དེ་བརྒྱུད་ཨ་རི་གཞུང་ནས་རྒྱ་ནག་ནང་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་སྐོར་རྒྱ་གཞུང་ལ་ཉེན་བརྡ་བཏང་ཞིག་བཏང་ནས་རྒྱ་གཞུང་གིས་རྒྱལ་ཁྲིམས་དང་རྒྱལ་སྤྱིའི་ཁྲིམས་ལུགས་ལ་བརྩི་སྲུང་གིས་འགྲོ་བ་མིའི་ཐོབ་ཐང་ཐད་ཡར་རྒྱས་གཏོང་དགོས་པའི་ནན་སྐུལ་བྱ་རྒྱུའི་གོ་སྐབས་ཞིག་བྱུང་ཡོད་སྐོར་གསུངས་འདུག ད་དུང་ཁོང་གིས་རྒྱ་ནག་གཞུང་ལ་བོད་ནང་གི་ཛ་དྲག་གི་དཀའ་ངལ་འཕྲད་བཞིན་པ་དེ་དག་སེལ་ཕྱིར་བོད་མིའི་དབུ་ཁྲིད་༧གོང་ས་༸སྐྱབས་མགོན་ཆེན་པོ་མཆོག་དང་ཡང་ན་མགོན་པོ་༸གང་ཉིད་མཆོག་གི་སྐུ་ཚབ་ལྷན་དུ་བོད་དོན་གྲོས་མོལ་གནང་དགོས་པ་དང་། བོད་མིའི་བླ་སྤྲུལ་རྣམ་པའི་ཡང་སྲིད་ངོས་འཛིན་བྱ་ཕྱོགས་ཀྱི་གནད་དོན་ལ་ཐེ་བྱུས་བྱ་རྒྱུ་མཚམས་འཇོག་དགོས་པ་དང། དེ་བཞིན་བོད་མིའི་ཆོས་ཕྱོགས་ཀྱི་འདས་མཆོད་གནང་ལུགས་ལ་བརྩི་འཇོག་དགོས་པ་སོགས་བོད་ནང་བོད་མིའི་ཆོས་དད་རང་དབང་ལ་བརྩི་སྲུང་དགོས་གསུངས་འདུག་པ་མ་ཟད། ཨ་རི་གཞུང་གིས་རྒྱ་ནག་གཞུང་ལ་རྒྱ་གཞུང་གི་གཞུང་ཚབ་དཔོན་རིགས་དང་། གསར་འགོད་པ་ཚོ་ཨ་རི་ནང་ས་ཁུལ་གང་སར་བཀག་སྡོམ་མེད་པར་བསྐྱོད་ཆོག་པ་ལྟར། རྒྱ་གཞུང་ངོས་ནས་ཀྱང་དེ་མཚུངས་ཨ་རིའི་གཞུང་ཚབ་དཔོན་རིགས་དང་གསར་འགོད་པ་ཚོ་བོད་མི་གནས་ཡུལ་ས་ཁུལ་ཁག་ཏུ་སྐོར་བསྐྱོད་བྱ་རྒྱུའི་ཐོབ་ཐང་རྒྱ་མི་ཆུང་བ་ཞིག་སྤྲོད་སྐོར་གསུངས་འདུག རྒྱ་གར་གྱི་གསར་འགོད་པ་གཅིག་ནས་ཨ་རི་གཞུང་ནས་བོད་ཀྱི་གནད་དོན་ལ་གལ་འགངས་ཆེ་ཆུང་ཇི་ཙམ་འཛིན་གྱི་ཡོད་མེད་བཅར་འདྲི་ཞུས་པའི་ལན་དུ། ཁོང་གིས་བོད་ཀྱི་གནད་དོན་དེ་ནི་ང་ཚོའི་གྲོས་མོལ་ཞུ་ཡུལ་གྱི་གནད་དོན་གལ་འགངས་ཆེ་ཤོས་ཡིན་པ་དང་། ང་ཚོས་བོད་ཀྱི་གནད་དོན་དེ་གལ་ཆེ་ཞིག་ལ་ངོས་འཛིན་གནང་ཐོག་གྲོས་མོལ་གྱི་སྔོན་ཚུལ་ཨ་རིའི་ཕྱི་སྲིད་ལྷན་ཁང་གི་འགྲོ་བ་མིའི་ཐོབ་ཐང་གི་སྙན་ཐོའི་ནང་གནད་དོན་དེ་ཛ་དྲག་ཅན་ཞིག་ཡིན་པར་མངོན་སྟོན་ཞུ་ཡོད་སྐོར་སོགས་གསུངས་འདུག ཨ་རི་དང་རྒྱ་གཞུང་དབར་འགྲོ་བ་མིའི་ཐོབ་ཐང་ཐོག་གྲོས་མོལ་གནང་བ་དེ་ནི་གྲོས་མོལ་ཐེངས་ ༡༩ པ་ཡིན་པ་དང་ དང་ལྷན་རྒྱ་ནག་གི་གྲོས་མོལ་སྐུ་ཚབ་དེ་ཕྱི་འབྲེལ་དཔོན་རིགས་བགྲེས་པ་ Li Junhua ཡིན་འདུག

དབྱིན་ཇིའི་འོག་ནས་རྒྱ་གར་རང་བཙན་ཐོབ་པའི་ཉིན་མོ་སྲུང་བརྩི་ཞུས་པ་དང་སྦྲགས་ཏེ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱ་གར་རྒྱལ་དར་མཁའ་དབྱིངས་སུ་སྒྲེང་ནས་གཞུང་དམངས་གཉིས་ལ་འཚམས་འདྲི་གནང་འདུག དེ་རིང་ཕྱི་ཟླ་ ༨ ཚེས་ ༡༥ ཉིན་གྱི་སྔ་དྲོ་ཚོུད་ ༩།༠༠ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་ཕྱག་སྦྲེལ་བཀའ་བློན་རྣམ་པ་དང་ལྷན་ཁང་ཁག་གི་དྲུང་ཆེ་ཆུང་རྣམ་པ་བཅས་བཀའ་ཤག་ཏུ་ལྷན་འཛོམས་ཐོག་ཆེས་ཐོག་མར་རྒྱ་གར་གྱི་རྒྱལ་གླུ་བླངས་པ་དང་དུས་མཚུངས་སྲིད་སྐྱོང་མཆོག་གིས་རྒྱ་གར་གྱི་རྒྱལ་དར་མཁའ་དབྱིངས་སུ་སྒྲེང་གནང་ཡོད་པ་དང། མཛད་སྒོ་དེའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་རྒྱ་གར་རང་བཙན་ཐོབ་ནས་ལོ་ངོ་ ༦༩ འཁོར་བའི་དུས་ཆེན་ཁྱད་པར་བ་དེའི་སྐབས་རྒྱ་གར་གཞུང་དམངས་གཉིས་ལ་དགའ་བསུའི་འཚམས་འདྲི་གནང་བ་དང་སྦྲགས། ད་ལྟའི་རྒྱ་གར་གྱི་སྲིད་བློན་Narendra Modi མཆོག་གིས་ཕྱི་ནང་གི་ཕྱག་ལས་གནང་དོན་ཁག་ལ་རྒྱལ་སྤྱིའི་ཐོག་ནས་ཡི་རངས་ཀྱི་བསྔགས་བརྗོད་དང་མཐོང་ཆེ་ཞུ་བཞིན་པར་སྐུ་ཉིད་བོད་པ་གཅིག་ཡིན་པའི་ཆ་ནས་ཐུགས་དགྱེས་འཚོར་ཆེན་པོ་བྱུང་སྐོར་སོགས་གསུངས་སོང། དེ་བས་ཀྱང་སྲིད་སྐྱོང་མཆོག་གིས་གསར་འགོད་པས་བཅར་འདྲི་ཞུས་པར་བཀའ་ལན་གསུངས་དོན་ལ་ལོ་ལྟར་འདི་གར་རྒྱ་གར་གྱི་རྒྱལ་དར་མཁའ་དབྱེངས་སུ་སྒྲེང་འཛུགས་ཞུས་ནས་དུས་ཆེན་སྲུང་བརྩི་ཞུ་བཞིན་པ་ལྟར། སླད་མར་བོད་མིའི་མངོན་འདོད་ལྟར་བོད་ཀྱི་རྒྱལ་དར་དེ་ཡང་ཕོ་བྲང་པོ་ཏཱ་ལའི་སྟེང་དུ་སྒྲེང་འཛུགས་ཐུབ་པའི་ཉིན་མོ་ཞིག་མགྱོགས་མྱུར་འཆར་བའི་སྨོན་ལམ་ཡོད་པ་སོགས་གསུངས་ཡོད་པ་རེད། སྔ་ཐོག་མཛད་སྒོ་སྒྲུབ་བསྟུན། སྲིད་སྐྱོང་མཆོག་ས་གནས་ཀྱི་ཉེན་རྟོག་ཐང་ཆེན་དུ་རྒྱ་གར་གྱི་མཛད་སྒོར་ལྷན་ཞུགས་ཀྱིས་དཔོན་རིགས་ཁག་གཅིག་དང་མཇལ་འཕྲད་ཡང་གནང་འདུག

རྒྱ་གཞུང་གི་བཙོན་འོག་ཏུ་ཚུད་པའི་བླ་སྤྲུལ་དགེ་བཤེས་དང་བོད་མི་ཆབ་སྲིད་བཙོན་པ་རྣམས་ལ་སྡུག་སྦྱོང་ཚད་མེད་འོག་ལྐོག་བསད་བཏང་བ་སོགས་ཀྱི་རྐྱེན་པས་ཁོང་རྣམ་པའི་ཚེ་སྲོག་ལ་ཉེན་ཚབས་ཇེ་ཆེར་འགྲོ་བཞིན་པའི་གནས་སྟངས་དེའི་སྐབས་བོད་མི་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོ་ལགས་ཀྱིས་ཁོང་རྣམ་པའི་ཚེ་སྲོག་སྐྱོབ་སླད་རྒྱལ་སྤྱིའི་རྒྱབ་སྐྱོར་ཡོང་ཐབས་ཀྱི་བོད་དོན་ཞུ་གཏུག་ལས་འགུལ་ཞིག་སྤེལ་རྒྱུ་རེད་འདུག ཟླ་ ༨ ཕྱི་ཚེས་ ༡༢ ཉིན་གྱི་ཕྱི་དྲོ་ཚོུད་ ༣ ཐོག་དྷ་སར་རྟེན་གཞི་བྱས་པའི་ཐེག་ཆེན་ཆོས་གླིང་གཙུག་ལག་ཁང་གི་རྒྱལ་སྒོའི་ཉེ་འདབས་སུ་གསར་འགོད་ལྷན་ཚོགས་ཞིག་སྐོང་ཚོགས་གནང་སྟེ་ལས་འགུལ་དེ་རིང་མིན་ཟླ་འདིའི་ཕྱི་ཚེས་ ༡༦ ཉིན་འགོ་འཛུགས་ཞུ་རྒྱུ་ཡིན་པའི་ཡོངས་ཁྱབ་གསལ་བསྒྲགས་ཤིག་སྤེལ་སོང། རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ཡན་ལག་ལས་ཁུངས་དང་། རྒྱ་གར་གྱི་ཕྱི་སྲིད་ལས་ཁུངས་དང་། དེ་བཞིན་ཕྱི་རྒྱལ་གྱི་གཞུང་ཚབ་ཁག་ ༣༥ ཙམ་གྱི་ནང་དུ་ཕེབས་ནས་རྒྱ་གཞུང་གིས་བོད་ནང་བཙན་འཛུལ་བྱས་པ་ནས་བཟུང་བོད་ཞི་བའི་བཅིངས་གྲོལ་བཏང་ཡིན་ཟེར་གྱི་ཡོད་ཀྱང་། དོན་དངོས་ཐོག་རྒྱ་གཞུང་གིས་དབང་སྒྱུར་བྱས་པ་ནས་བཟུང་ད་བར་ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་དབུས་པའི་བོད་ཀྱི་བླ་སྤྲུལ་དགེ་བཤེས་ཆེ་ཁག་གསང་བའི་ངང་དམར་བསད་བཏང་བ་དང་། དེ་བས་ཀྱང་ཁོང་དང་འདྲ་བའི་བོད་མི་ཆབ་སྲིད་བཙོན་པ་མང་པོ་ཞིག་ནག་ཉེས་གང་ཡང་མེད་པར་བཙན་དབང་གིས་བཙོན་འཇུག་བྱས་ཡོད་པ་མ་ཟད། བོད་ནང་མེ་འཁོར་ལྕགས་ལམ་དང་གནམ་ཐང་སོགས་འཛུགས་སྐྲུན་བྱས་པའི་བརྒྱུད་རྒྱ་མི་རིགས་མང་དག་ཞིག་བོད་ནང་གནས་སྤོས་བྱས་པས་བོད་རིགས་ལས་རྒྱ་རིགས་གྲངས་འབོར་མང་བ་ཆགས་པས་བོད་ཡུལ་དེ་རྒྱ་ཡུལ་དུ་བསྒྱུར་རྒྱུའི་ལས་འགུལ་སྤེལ་བཞིན་ཡོད་པ་དང་། རྒྱ་ནག་གི་སྲིད་འཛིན་ཟུར་པ་ Hujin Tao དང་། ཅང་ཙེ་མིན། དེ་བཞིན་ལོ་ཕིན་དང་ཀྲང་ཅི་ལིན་མི་དེ་དག་བོད་མིར་མནར་གཅོད་ཚད་མེད་གཏོང་མཁན་ཉེས་ཅན་གཙོ་ཁྲིད་ཆགས་ཀྱི་ཡོད་སྟབས། དེ་དག་གི་པར་རིས་རྣམས་གཞུང་ཚབ་མི་སྣ་རྣམས་ཀྱི་མིག་ལམ་དུ་མངོན་བཏོན་གནང་བ་དང་སྦྲགས་ཏེ་ཕྱི་རྒྱལ་གཞུང་ཚབ་ཁག་ནས་བོད་དོན་རྒྱབ་སྐྱོར་ཡོང་ཐབས་ཀྱི་སྙན་ཞུ་འབུལ་འཆར་ཡོད་པ་རེད་འདུག གལ་ཏེ་ད་ལྟ་རྒྱ་གཞུང་གི་བཙོན་ནང་ཡོད་པའི་ཆབ་སྲིད་བཙོན་པ་རྣམས་བཙོན་ཁང་ནང་གྲོངས་པའམ་ཡང་ན་བཙོན་ཁང་ཕྱིར་གྲོངས་པ་སོགས་ཀྱི་གནད་དོན་བྱུང་ཚེ། དེའི་འགན་དབང་ཡོངས་རྫོགས་རྒྱ་གཞུང་རང་ནས་འཁུར་དགོས་པར་རྒྱལ་ཚོགས་ནས་ནན་བརྗོད་གནང་དགོས་པ་སོགས་གསུངས་ཡོད་པ་རེད།

རྒྱ་གཞུང་བཙོན་འཇུག་འོག་ཡོད་པའི་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་ནང་མི་ལྷན་ཐུག་འཕྲད་བྱུང་འདུག ཟླ་ ༨ ཕྱི་ཚེས་ ༤ ཉིན་ Hongkong Free Press དྲ་གནས་ཐོག་སྤེལ་བར་གཞིགས་ན་རྒྱ་ནག་གཞུང་ནས་ལོ་ངོ་གཅིག་དང་ཟླ་བ་གསུམ་ལྷག་བཙོན་འཇུག་བྱས་པའི་འགྲོ་བ་མིའི་ཐོབ་ཐང་འཐབ་རྩོད་པ་དང་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་རྒྱ་ནག་གི་ Liaoning བཙོན་ཁང་དུ་ཁོང་གི་སྤུན་མཆེད་ Liu Xiaoguang ལགས་གཙོས་པའི་ནང་མི་ཉེ་འབྲེལ་ལྷན་དུ་ཐུག་འཕྲད་གནང་རྒྱུའི་གོ་སྐབས་ཞིག་བྱུང་འདུག་ཀྱང། རྒྱ་གཞུང་གིས་ཁོང་གི་སྤུན་མཆེད་ཚོའི་མཉམ་དུ་ནང་འགྲེལ་བཀའ་མོལ་གནང་བ་ལས་དེ་མིན་སྤྱི་ཚོགས་དང་འབྲེལ་ཡོད་ཚོར་བ་རྣོ་བའི་ཆབ་སྲིད་སོགས་ཀྱི་ཐོག་བཀའ་མོལ་གནང་མིན་དམ་དྲག་ཤུགས་ཆེར་བྱས་འདུག ཁོང་གི་སྤུན་མཆེད་ Liu Xiaoguang ལགས་དང་ནང་མི་ཚོས་གསུངས་དོན་ལ་རྒྱ་གཞུང་གིས་ཁོང་བཙོན་ནང་དཔེ་ཀློག་དང་ལུས་སྦྱོང་སོགས་གནང་མུས་ཡིན་པས་གཟུགས་གཞིའི་འཕྲོད་བསྟེན་བདེ་ཐང་ཡིན་པར་འགྲེལ་བརྗོད་བྱས་ཡོད་ཀྱང་། དེ་ནི་རྫུན་གཏམ་ཞིག་ལས་མ་འདས་པའི་གནད་དོན་ཞིག་ཡིན་པར་གསུངས་པ་དང། ད་དུང་ Liu Xiaoguang ལགས་ནས་རྒྱ་ནག་གཞུང་གིས་ད་ལྟ་བར་ཁོང་གི་ནང་མི་གཙོས་པའི་སྤུན་གཉེན་སོགས་དང་ཐུག་ཕྲད་བྱ་རྒྱུར་བཀག་འགོག་བྱས་དང་བྱེད་མུས་ཡིན་པ་ནི་ཁྲིམས་འགལ་གྱི་བྱ་སྤྱོད་ཞིག་ཡིན་པར་སྐྱོན་བརྗོད་ནན་པོ་གནང་འདུག དེ་བས་ཀྱང་སྐུ་ཞབས་ Liu Xiaobo ཁོང་ནས་རྒྱ་ནག་གི་ཆབ་སྲིད་ཀྱི་སྲིད་བྱུས་ལ་ཉམས་ཞིབ་གནང་མུས་ཁར། རྒྱ་གཞུང་ནས་ཁོང་ལ་ཁྲིམས་གཅོད་ཡང་དུ་གཏོང་རྒྱུར་ཐེ་ཚོམ་ཆེན་པོ་གནང་བཞིན་ཡོད་པ་དང་། དུས་ད་ལྟའི་ཆར་སྲིད་འཛིན་ཞི་ཅིང་ཕིང་གིས་སྣེ་ཁྲིད་འོག་རྒྱ་ནག་གི་ཆབ་སྲིད་གནས་སྟངས་དང་མི་དམངས་ཀྱི་རང་དབང་ཐོག་འགྱུར་བ་ཆེན་པོ་ཞིག་ཡོང་རྒྱུའི་རེ་བཟང་བཅོལ་གནང་བཞིན་ཡོད་པར་འགྲེལ་བརྗོད་གནང་འདུག གཞི་རྩའི་སྐུ་ཞབས་ Liu Xiaobo ལགས་ནི་རྒྱ་ནག་ནང་འགྲོ་བ་མིའི་ཐོབ་ཐང་དང་མང་གཙོ་སོགས་ཀྱི་ཐད་ལ་ཕྱག་ལས་བསྟུད་མར་གནང་པ་རྒྱུད་ཕྱི་ལོ་ཉི་སྟོང་དགུའི་ལོར་རྒྱ་ནག་གཞུང་གིས་ཁོང་རྒྱལ་ཁབ་ཀྱི་སྲིད་དབང་མགོ་རྟིང་སློག་ཐབས་བྱས་པའི་ནག་ཉེས་འོག་ལོ་ངོ་བཅུ་གཅིག་རིང་བརྩོན་འཇུག་གི་ཁྲིམ་ཐག་བཅད་ཡོད་པ་དང་། ཕྱི་ལོ་ཉི་སྟོང་བཅུའི་ལོར་ཁོང་གི་བྱས་རྗེས་ཁག་ལ་རྒྱལ་སྤྱའི་ཐོག་ནས་ཆེ་བསྟོད་དང་སྦྲགས་ནོ་སྦེལ་བཞི་བདེའི་གཟེངས་རྟགས་འབུལ་ཡོད་པ་རེད། དེ་བཞིན་ཕྱི་ལོ་༢༠༠༨་ལོར་བོད་ཆོལ་གསུམ་ཡོངས་སུ་རྒྱ་གཞུང་ལ་ཞི་རྒོལ་བྱུང་རྗེས། ཁོང་གིས་རྒྱ་གཞུང་ནས་བོད་ཐོག་འཛིན་པའི་སྲིད་བྱུས་ལ་སྐྱོན་བརྗོད་དང་༸གོང་ས་མཆོག་གིས་འདོན་སྤེལ་མཛད་པའི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཡང་གནང་མྱོང་ཡོད་པ་མ་ཟད། མགོན་པོ་༸གང་ཉིད་ནས་ཀྱང་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་མི་སྣ་གཞན་ཁག་གཅིག་དང་ལྷན། ཁོང་བཙོན་ཁང་ནས་མགྱོགས་མྱུར་གློད་གྲོལ་དགོས་པའི་འབོད་སྐུལ་གནང་མྱོང་ཡོད་པ་རེད། ད་ལྟའི་ཆར་ཁོང་རྒྱ་ནག་ Jinzhou གྲོང་ཁྱེར་གྱི་བཙོན་ཁང་ནང་བཀག་ཉར་འོག་གནས་ཡོད་པ་མ་ཟད། ཁོང་གི་བཟའ་ཟླ་ Liu Xia ལགས་ཀྱང་ ༢༠༡༡ ནས་ཟུང་སྟེ་རྒྱ་ནག་གི་བཟང་བཙོན་འོག་བཞག་ཡོད་པ་རེད།

སུད་སི་ཇི་ནི་ཝ་ནང་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་ཁྱིམ་ཚང་ལྔས་བོད་དོན་ཞུ་གཏུག་གི་ལས་འགུལ་ཐེངས་ ༤༤ པ་སྤེལ་ཡོད་པ་རེད་འདུག ཟླ་ ༨ ཕྱི་ཚེས་ ༡༢ ཉིན་སུད་སིར་རྟེན་གཞི་བྱས་པའི་བོད་མི་བཀྲ་བསྟན་ཚང་པ་སངས་དང། ངག་དབང་ཚང་ངག་དབང་དཔལ་ལྡན། རྒྱལ་ཚང་བཀྲ་ཤིས་ལྷ་མོ། སྟག་ཚང་དཀོན་ཅོག ཡེ་ཤེས་ལྷ་མོ་ནང་མི་བཅས་ཁྱིམ་ཚང་ལྔས་སུད་སི་ཇི་ནི་ཝ་རྒྱལ་ཚོགས་ཀྱི་མདུན་ཐང་དུ་བོད་དོན་སླད་ཞུ་གཏུག་གི་ལས་འགུལ་ཐེངས་ ༤༤ པ་སྤེལ་ཡོད་པ་དང། ལས་འགུལ་དེའི་ནང་སུད་སི་བོད་མི་ཡར་ཀ་ཚང་བསྟན་པ་རིན་ཆེན་དང་། ཡར་ཀ་ཚང་ཚེ་རིང་མཚོ། ནོར་འཛིན། སྐལ་བཟང་ཚང་བདེ་མཆོག སྟག་ཚང་རིག་འཛིན་བཅས་མཉམ་ཞུགས་གནང་ནས་རྒྱལ་ཚོགས་ཀྱི་དྲུང་ཆེ་དང་། རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས། དེ་བཞིན་སུད་སིར་རྟེན་གཞི་བྱས་པའི་ཨེ་ཤི་ཡའི་རྒྱལ་ཁབ་ ༣༨ ཀྱི་གཞུང་ཚབ་བཅས་ལ་ལས་འགུལ་གོ་སྒྲིག་པས་ཆེད་དུ་བཏོན་པའི་བོད་ཀྱི་བདེན་དོན་ཐད་རྒྱབ་སྐྱོར་དགོས་པའི་ཞུ་སྙན་དང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་འདོན་སྤེལ་གནང་པའི་བོད་ནང་གི་འགྲོ་བ་མིའི་ཐོབ་ཐང་གི་སྙན་ཐོའི་ཡིག་ཆ་ཁག་ཅིག་ཀྱང་ཟུར་འཛར་ཐོག་ཕུལ་ཡོད་པ་དང་། དེ་བཞིན་རྒྱ་ནག་དང་ཡུ་རོབ་ཁུལ་གཙོས་པའི་འཛམ་གླིང་གི་ཡུལ་སྐོར་སྤྲོ་འཆམ་པ་མང་དག་ཞིག་ནས་བོད་གནས་ཡིག་ཆ་འགྲེམས་སྤེལ་གྱིས་བོད་དོན་དྲིལ་བསྒྲགས་དང་རྒྱབ་སྐྱོར་ཤུགས་ཆེས་ཞུ་འབོད་གནང་འདུག སྐབས་དེར་རྒྱལ་ཚོགས་གྱི་དྲུང་ཆེ་བྷན་ཁེ་མོན་ལགས་ཀྱི་མཚན་ཐོག་ལ་ཕུལ་བའི་ཞུ་སྙན་ནང་མཉམ་འབྲེལ་རྒྱལ་ཚོགས་ཀྱི་ངོས་ནས་བོད་ཐོག་གྲོས་ཆོད་སྔ་ཕྱི་འཇོག་པ་དེ་དག་ལ་བདག་སྐྱོང་གནང་དགོས་པ་དང། བོད་ནང་ཞི་བདེ་དང་རང་དབང་སླར་གསོ་གནང་དགོས་པ། ༸གོང་ས་༸སྐྱབས་མགོན་ཆེན་པོ་མཆོག་ལ་ཆ་རྐྱེན་གང་ཡང་མེད་པར་བོད་ནང་ཕྱིར་ཕེབས་གནང་ཆོག་པ། བོད་རྒྱ་འབྲེལ་མོལ་བསྐྱར་མཐུད་བྱ་དགོས་པ་དང། དེ་བཞིན་འདི་ལོ་རྒྱའི་བཙོན་ཁང་ནང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གློ་བུར་དུ་རྒྱ་གཞུང་གི་བཙོན་ཁང་ནང་སྐུ་བཀྲོངས་པའི་གནས་ཚུལ་སོགས་གཙོས་བོད་མིའི་ཆབ་སྲིད་བཙོན་པ་རྣམས་ཀྱི་ཚེ་སྲོག་ལ་སྲུང་སྐྱོབ་གནང་དགོས་སྐོར་སོགས་འཁོད་ཡོད་པ་རེད། ལས་འགུལ་དེ་སུད་སི་ནང་རྟེན་གཞི་བྱས་པའི་བོད་མི་ཁྱིམ་ཚང་གཉིས་ནས་ཆེས་ཐོག་མར་་ཕྱི་ལོ་ ༢༠༡༢ ལོའི་ཕྱི་ཟླ་ ༡༢ ཚེས་ ༡༠ ནས་འགོ་འཛུགས་ཐོག་མཉམ་འབྲེལ་རྒྱལ་ཚོགས་ལས་ཁུངས་ཀྱི་མདུན་དུ་བོད་དོན་ཞུ་འབོད་ཀྱི་ལས་འགུལ་སྤེལ་ནས་ད་ཆ་ལོ་གསུམ་ཙམ་ཕྱིན་ཟིན་པ་དང་། དེ་ནས་རིམ་བཞིན་སུད་སི་ནང་གཏན་སྡོད་བོད་མི་ཁྱིམ་ཚང་གཞན་ཁག་ཅིག་ནས་ལས་འགུལ་དེའི་ནང་མཉམ་ཞུགས་གནང་ནས་ད་བར་བོད་དོན་ལས་འགུལ་ཐེངས་ ༤༤ པ་དེ་ཆགས་ཀྱི་ཡོད་པ་རེད།

ཕྱི་ཟླ་དགུ་པའི་ཚེས་ ༡ སྟེ་རྒྱ་གཞུང་གི་དབྱེ་བའི་བོད་རང་སྐྱོང་ལྗོངས་ཟེར་བ་དབུ་བརྙེས་ནས་ལོ་ ༥༠ འཁོར་བའི་ཉིན་མོ་ཁེལ་གྱི་ཡོད་པ་དང། དེའི་ཐོག་རྒྱ་ནག་གི་སྲིད་འཛིན་ཞི་ཇིན་པིང་གཙོས་པའི་དཔོན་རིག་ཆེ་གྲས་མང་དག་ཅིག་ཡོང་གི་ཡོད་སྟབས། བོད་ཀྱི་ས་ཁུལ་ཁག་ཅིག་ཏེ་ལྷ་ས་དང་ཞི་རྒ་རྩེ། རེབ་སྒོང་སོགས་ས་ཁུལ་ཁག་ཅིག་གི་ནང་དུ། དྲག་ཆས་དམག་མི་སྟོང་ཕྲག་མང་པོ་དང་འཐབ་འཁོར་ཐན་ཁེ་སོགས་དམག་གི་གོ་ཚོན་ཕོན་ཆེན་པོ་ཁྱེར་བའི་མོ་ཊ་བརྒྱ་ཕྲག་མང་པོ་འབྱོར་བཞིན་པ་རེད་འདུགཁ་སང་ཕྱི་ཚེས་ ༡༢ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་དྲ་གནས་ཐོག་ཏུ་དེ་འབྲེལ་གནས་ཚུལ་སྤེལ་ལ་གཞིགས་ན། ཕྱི་ཟླ་ ༧ པའི་ཟླ་འཇུག་ནས་ལྷ་ས་དང་ཞི་རྩེ། དེ་བཞིན་མདོ་སྨད་རེབ་གོང་སོགས་ཀྱི་ནང་དུ་བོད་ཀྱི་བདེ་འཇགས་དང་བརྟན་ལྷིང་སྲུང་སྐྱོབ། ཞི་བདེ་ལྡན་པའི་སྤྱི་ཚོགས་ནི་མང་ཚོགས་ཀྱི་རེ་བ་ཡིན། དེ་བཞིན་དམར་ཤོག་ཚོགས་པར་བློ་དད་རྩེ་གཅིག་དང་ཚོགས་པའི་ལས་དོན་གྲུབ་རྒྱུའི་བློ་སེམས་བརྟན་པོ་ཡོད་སྐོར་སོགས་རས་གཞི་དམར་པོའི་ཐོག་བྲིས་པའི་དམག་མིའི་མོ་ཊ་བརྒྱ་ཕྲག་ཁ་ཤས་འབྱོར་བཞིན་པའི་བརྙན་པར་ཐུང་ངུ་ཁག་ཅིག་ཀྱང་འདོན་སྤེལ་གནང་འདུག མོ་ཊ་དེ་དག་ནང་དུ་དྲག་ཆས་དམག་མི་དང་དམག་གི་གོ་མཚོན་ཕོན་ཆེན་འོར་འདྲེན་བྱེད་བཞིན་པ་མངོན་རྒྱུ་ཡོད་པ་མ་ཟད། ས་གནས་བོད་མི་ཚོས་ད་བར་དེ་འདྲ་བྱུང་མྱོང་མེད་པའི་གནད་དོན་ཞིག་ཡིན་པར་འགྲེལ་བརྗོད་གནང་འདུག རྒྱ་གཞུང་དམག་མི་སླེབས་ཐེངས་རེ་རེའི་ནང་རླང་འཁོར་ ༢༠༠ ཙམ་ཡོད་པ་དང། དེ་དག་ལྷ་ས་བརྒྱུད་བོད་རྒྱ་ས་མཚམས་དང་ཐག་ཉེ་བའི་དམག་སྒར་ཆེ་ཤོས་ཉང་ཆུའི་སྟོད་རྒྱུད་ཀོང་པོ་ཁུལ་གྱི་བྲག་གཡབ་གྲོང་སྡེ་ཕྱོགས་སུ་བསྐྱོད་བཞིན་ཡོད་པ་རེད་འདུག རྩ་བའི་དམག་དཔུང་ཕོན་ཆེན་དེ་འདྲ་ཞིག་གློ་བུར་དུ་སླེབས་དགོས་པའི་རྒྱུ་མཚན་གསལ་ཁ་མེད་ཀྱང། གནད་དོན་དབྱེ་ཞིབ་པ་འགས་དེ་དག་དམར་ཤོག་ཚོགས་པས་ཟླ་ ༩ ཚེས་ ༡ སྟེ་རྒྱ་གཞུང་གི་དབྱེ་བའི་བོད་རང་སྐྱོང་ལྗོངས་ཟེར་བ་དེ་དབུ་བརྙེས་ནས་ལོ་ ༥༠ འཁོར་བའི་ཉིན་མོ་ཁེལ་གྱི་ཡོད་པ་དང་བསྟུན། ཤོག་ཚོགས་པའི་ཁྱབ་བསྒྲགས་དང་སྟོབས་ཤུགས་ངོམ་རྒྱུ། དེ་བཞིན་དམག་སྦྱོང་བཅས་ཀྱི་སླད་ཡིན་སྲིད་པའི་ཚོད་དཔག་གནང་བཞིན་འདུག ཟླ་བ་འདིའི་ཚེས་༡༡ ཉིན་རྒྱ་ནག་གཞུང་འབྲེལ་བརྒྱུད་ལམ་ Xinhua ཡི་དྲ་གནས་ཐོག་གནས་ཚུལ་སྤེལ་བའི་གསར་གནས་ལ་གཞིས་ན། རྒྱ་གཞུང་གིས་དབྱེ་བའི་ཟི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་ཁུལ་དུ་ཡོད་པའི་རྒྱ་ནག་བཅིང་གྲོལ་དམག་སྒར་ཆེ་ཤོས་ཀྱིས་གོ་སྒྲིག་འོག དམག་གི་དངོས་བྱུང་སྦྱོང་བརྡར་ཁག་ལྔ་ཙམ་སྤྲད་ཆར་ཡོད་པ་དང། དེའི་ནང་རྒྱ་ནག་བཅིང་གྲོལ་དམག་གི་རུ་ཁག་ ༡༤༠ ཙམ་ནས་དམག་མི་ཁྱོན་འབུམ་གཅིག་དང་སྟོང་ཕྲག་ ༤༠ ཙམ་ནས་མཉམ་ཞུགས་བྱེད་རྒྱུ་ཡིན་སྐོར་འཁོད་པ་མ་ཟད། དེ་བས་ཀྱང་བོད་རང་སྐྱོང་ལྗོངས་དབུ་བརྙེས་ནས་ལོ་ ༥༠ འཁོར་བའི་ཉིན་མོ་སྲུང་བརྩི་བྱ་འཆར་དང་འབྲེལ། རྒྱ་གཞུང་བརྒྱུད་ལམ་ཁག་གི་ནང་དུ་བདེ་འཇགས་དང་བརྟན་ལྷིང་སྲུང་སྐྱོབ་སོགས་ཀྱི་ཐོག་ལ་འགྲེལ་བརྗོད་ཤུགས་ཆེར་བྱེད་བཞིན་པ་རེད།

སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དབུས་པའི་ཕྱག་སྦྲེལ་རྣམ་མགཉིས་དང་རྒྱ་གར་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམ་པ་ལྷན་དུ་བོད་གནད་དོན་སྐོར་ལྷན་ཚོགས་གནང་འདུག ཁ་སང་ཟླ་ ༨ ཕྱི་ཚེས་ ༡༢ ཉིན་རྒྱ་གར་གྱི་རྒྱལ་ས་ལྡི་ལི་ཧི་མཱ་ཅལ་དོན་གཅོད་ཁང་དུ་རྒྱ་གར་གྲོས་ཚོགས་ཀྱི་ཆབ་སྲིད་དོན་ཚོགས་ཁག་དྲུག་གིས་གོ་སྒྲིག་འོག་ བོད་མིའི་སྐུ་ཚབ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དབུས་པའི་ཕྱག་སྦྲེལ་སྤྱི་འཐུས་ཀརྨ་ཡེ་ཤེས་ལགས་དང་ཨཙྱཱ་ཡེ་ཤེས་ཕུན་ཚོགས་ལགས་རྣམ་པ་གཉིས་དང་། རྒྱ་གར་གྲོས་ཚོགས་ཀྱི་སྲིད་དོན་ཚོགས་ཁག་དྲུག་གྱི་འཐུས་མི་བཅས་ལྷན་འཛོམས་ཀྱིས་བོད་དོན་ཐད་གླེང་སློང་གནང་འདུག ལྷན་ཚོགས་དེའི་གཙོ་སྐྱོང་བ་སྐུ་ཞབས་ Shri. Shanta Kumar མཆོག་གིས་ལྷན་ཚོགས་ཐོག་ཆེད་ཕེབས་གནང་བའི་ཚོགས་མི་རྣམས་ལ་འཚམས་འདྲིའི་གསུང་བཤད་གནང་བ་དང་སྦྲགས་ཏེ་བོད་མི་མང་སྤྱི་འཐུས་ཚོགས་གཙོ་མཆོག་ལ་ཚོགས་མི་རྣམས་ལ་རྒྱ་གཞུང་གིས་ད་ལྟའི་ཆར་བོད་ནང་ལག་བསྟར་བྱེད་བཞིན་པའི་སྲིད་བྱུས་ཐོག་འགྲེལ་བརྗོད་གནད་བསྡུས་ཤིག་གནང་རྒྱུའི་རེ་སྐུལ་ཞུས་དོན་ལྟར། ཚོགས་གཙོ་མཆོག་ནས་ཀྱང་ད་ལྟའི་ཆར་གཞིས་བཞུགས་བོད་མི་ཚོར་བོད་མིའི་ངོ་བོ་རྩ་མེད་བཟོ་ཐབས་ཀྱི་སྲིད་བྱུས་ལག་བསྟར་བྱེད་མུས་ཡོད་སྐོར་སོགས་ངོ་སྤྲོད་གནང་འདུག ད་ལན་གྱི་ལྷན་ཚོགས་དེའི་ཐོག་རྒྱ་གར་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་སྐུ་ཚབ་ལྷན་ཚོགས་ཀྱི་གཙོ་སྐྱོང་བ་སྐུ་ཞབས། Shri Shanta Kumar (BJP), ལགས་གཙོས། Smt. Maneka Gandhi (BJP), Shri Bashista Narain Singh (JDU), Shri. Ninong Ering (INC), Smt. Kavita Kalvakuntla (TRS), Shri Bhagat Singh Koshyari (BJP), Dr.Udit Raj (BJP), Smt.Kanak Lata Singh (SP) and Dr. Arun Kumar (RLSP) མཆོག་བཅས་ཆེད་ཕེབས་གནང་ཡོད་པ་མ་ཟད། ཚོགས་བཅར་བ་དེ་དག་ནས་རྒྱ་གཞུང་གིས་བོད་ནང་འགྲོ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་ཡོད་པ་དང་འགྱུར་ལྡོག་ཆེ་བའི་དུས་རབས་ ༢༡ དེའི་ནང་དུའང་བོད་མི་ཚོའི་ངོ་བོ་བརླག་ཐབས་ཀྱི་སྲིད་བྱུས་ལག་བསྟང་བྱེད་དང་བྱེད་མུས་ཡིན་པར་བློ་འཚབ་ཆེན་པོ་ཡོད་པའི་དགོངས་ཚུལ་གསུངས་པ་དང་། དེ་བས་ཀྱང་ཁོང་རྣམ་པས་སླད་མར་བོད་ཀྱི་གནད་དོན་ཐད་གླེང་སློང་དང་རྒྱབ་སྐྱོར་མུ་མཐུད་གནང་རྒྱུའི་ཞལ་བཞེས་གནང་ཡོད་པ་རེད་འདུག

བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་གོ་སྒྲིག་འོག་དྷ་ཤོད་བོད་ཁྱིམ་སློབ་གྲྭར་རྒྱ་གར་དང་བལ་ཡུལ་ནང་གི་བོད་མིའི་སློབ་གྲྭ་ཁག་གི་ནང་སློབ་གཉེར་གནང་བཞིན་པའི་བོད་རིགས་སློབ་ཕྲུག་ཚོའི་ཕ་མའི་ཚོགས་ཆེན་ཐེངས་དང་པོ་ལེགས་གྲུབ་ངང་མཇུག་སྒྲིལ་གནང་ཡོད་པ་རེད། དེ་རིང་ཟླ་ ༨ ཕྱི་ཚེས་ ༡༣ ཉིན་ཚོགས་འདུ་མཇུག་སྒྲིལ་བའི་མཛད་སྒོ་ཐོག་སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་དང་ཤེས་རིག་བཀའ་སློན་དངོས་གྲུབ་ཚེ་རིང་མཆོག་རྣམ་གཉིས་ཆེད་ཕེབས་ཐོག་རྒྱ་གར་དང་བལ་ཡུལ་གཉིས་ནང་ཡོད་པའི་གཞིས་ཆགས་ཁག་ ༤༣ གི་བོད་ཕྲུག་ཚོའི་ཕ་མའི་ཚོགས་ཆུང་གི་སྐུ་ཚབ་ ༢༥༠ ལྷག་ཚོགས་བཅར་ཞུས་ཐོག་ལེགས་གྲུབ་ངང་མཇུག་སྒྲིལ་གནང་སོང། སྲིད་སྐྱོང་བློ་བཟང་སེང་གེ་མཆོག་གིས་སྐབས་དེར་༸གོང་ས་མཆོག་ནས་དུས་རྟག་ཏུ་ང་ཚོ་བོད་མི་རྣམས་ཡ་རབས་བཟང་སྤྱོད་ལྡན་པའི་མི་རིགས་ཤིག་ཡིན་སྐོར་བཀའ་སློབ་བསྩལ་བཞིན་པའི་ཁྲོད་ང་ཚོ་གཞོན་རབས་ཚོས་ནང་ཕན་ཚུལ་བཀའ་མོལ་གནང་སྐབས་མི་སྙན་པའི་བཀའ་མོལ་ཚེ་མགོན་པོ་༸གང་ཉིད་མཆོག་གི་བཀའ་དགོངས་དང་འགལ་སྡུར་ཆགས་སྟབས། ཕ་མ་ཚོས་ཉིན་རེ་ནས་ཉིན་རེ་བཞིན་ཕྲུ་གུའི་ ཤེས་ཡོན་དང་ལྷག་དོན་བཟང་སྤྱོད་ཐད་དམིགས་བསལ་གྱི་འགན་འཁུར་བཞེས་ཏེ་སློབ་ཕྲུག་ཚོའི་གྲོགས་པོ་དང་གྲོགས་མོ་ལྟ་བུའི་བློ་ཐག་ཉེ་བའི་ཕ་མ་ཞིག་ཆགས་ཐབས་གནང་གལ་ཆེ་བར་གསུངས་པ་དང། དེ་བས་ཀྱང་ཁོང་གིས་མུ་མཐུད་གསུངས་དོན་ལ་ད་ལྟ་བར་དུ་བོད་མི་ཚོའི་གནས་སྟངས་ཕྲན་བུ་བཟང་དུ་ཕྱིན་པ་དང་བསྟུན། བོད་པའི་ཕྲུ་གུ་མང་དག་ཞིག་དབྱིན་ཇི་སློབ་གྲྭར་བརྫངས་པའི་དཀའ་ངལ་འཕྲད་ཀྱི་ཡོད་པ་དེ་སེལ་ཐབས་སུ་བོད་སློབ་ཁག་གི་ནང་སློབ་ཕྲུག་ཚོའི་ཤེས་ཚད་དང་ཡིག་རྒྱུགས་ཀྱི་གྲུབ་འབྲས་སྔར་ལྷག་ལེགས་པོ་སོན་ཐུབ་པ་གནང་དགོས་གལ་དང་དེ་ལྟར་ལག་ལེན་ཐུབ་ན་མ་འོངས་པར་ད་ལྟའི་ཆར་དབྱིན་ཇི་སློབ་གྲྭའི་ནང་སློབ་སྦྱོང་གནང་བཞིན་པའི་བོད་པའི་སློབ་ཕྲུག་དེ་རྣམས་བོད་སློབ་ནང་ཚུར་ཞུགས་ཐུབ་ངེས་ཡིན་པ་སོགས་གསུངས་སོང།

གཤམ་འཁོད་གསུང་འཕྲིན་འདི་ནི་དཔལ་ལྡན་དགའ་ལྡན་ཕོ་བྲང་གི་དྲ་གནས་ཐོག་འདོན་སྤེལ་གནང་འདུག དེ་ཡང་༸གོང་ས་མཆོག་གིས་ ( འདི་ལོ་ཕྱི་ཟླ་དྲུག་པ་བདུན་པའི་ནང་ངོས་རང་ལོ་བརྒྱད་ཅུར་སོན་པའི་སྐྱེས་ཚེས་ཀྱི་དུས་སྟོན་གྱི་སྐབས་འཇིག་རྟེན་འདིའི་ཡུལ་ལུང་སྣ་ཚོགས་སུ་བཞུགས་པའི་མཆེད་གྲོགས་རྣམས་པས་འཚམས་འདྲི་དང་།ལེགས་བརྗོད་སྨོན་འདུན་གནང་སོན་བྱུང་བར་སྙིང་ནས་ཐུགས་རྗེ་ཆེ་ཞེས་བརྗོད་རྒྱུ་ཡིན། ཀུན་གྱིས་མཁྱེན་གསལ་བཞིན་ངོས་ཀྱི་མི་ཚེ་སེམས་ཅན་ཐམས་ཅད་ཀྱི་ཕན་བདེ་སྒྲུབ་པའི་དོན་དུ་དམིགས་ཤིང། ལྷག་པར་འགྲོ་བ་མིའི་སྤྱི་ཚོགས་ལ་ཞབས་འདེགས་ཅི་ནུས་སྒྲུབ་པའི་ལྷག་བསམ་བཅངས་བཞིན་པ་ཡིན། བདེ་བ་འདོད་ལ་སྡུག་བསྔལ་མི་འདོད་པ་ནི་སྲོག་ཆགས་ཀུན་གྱི་རང་གཤིས་ཡིན་པ་དང་། དེ་ནི་སེམས་ཅན་ཐམས་ཅད་གཅིག་མཐུན་འདྲ་མཉམ་ཡིན་པའི་རྒྱུ་མཚན་ཡང་ཡིན། དེར་བརྟེན་འགྲོ་བ་ཡོངས་ཀྱི་ཕན་བདེ་སྒྲུབ་པ་དང་། སྡུག་བསྔལ་སེལ་བའི་མཉམ་འདུས་ཀྱི་ལས་འགན་ཡང་ཀུན་ལ་ཡོད་པས་འགྲོ་བ་མིའི་བྱམས་བརྩེ་སྙིང་པོ་ཅན་གྱི་བཟང་སྤྱོད་གོང་འཕེལ་དང་། འཐབ་རྩོད་དང་འཚེ་བ་སྤོང་ཐབས། ཆོས་ལུགས་ཕན་ཚུན་གུས་བརྩིའི་མཐུན་ལམ། རང་བྱུང་ཁོར་ཡུག་སྲུང་སྐྱོབས་བཅས་ལ་ཚང་མས་ཐུགས་ཁུར་ཆེ་བསྐྱེད་གནང་བའི་རེ་སྨོན་དང་འབོད་བསྐུལ་བྱེད་ཀྱི་ཡོད། ཤཱཀྱའི་དགེ་སྦྱོང་ཆོས་སྨྲ་བ་ཏཱ་ལའི་བླ་མ་སྐྱེ་ཕྲེང་བཅུ་བཞི་པས། རབ་བྱུང་བཅུ་བདུན་པའི་ཤིང་ལུག་ཟླ་ ༦ ཚེས་ ༢༨ ཕྱི་ལོ ༢༠༡༥ ཟླ་ ༨ ཚེས་ ༡༢ ལ། ། ) ཞེས་བཀའ་བསྩལ་འདུག