ཆོས་ཚོགས།

འབྲས་ལྗོངས་ཀྱི་རྒྱལ་ས་སྒང་ཏོག་ཏུ་དཔལ་ས་སྐྱ་གོང་མ་ཁྲི་ཆེན་རྡོ་རྗེ་འཆང་མཆོག་དང་འབྲས་ལྗོངས་སྤྱི་ཁྱབ་བློན་ཆེན་ Prem Singh Tamang Golay མཆོག་ནས་ནྱི་ཡ་ནེ་རཱཏྨྱ་ Nyiya Nairatmya Centre ཞེས་པའི་ས་སྐྱའི་ཆོས་ཚོགས་ཤིག་དབུ་འབྱེད་གནང་འདུག དེ་ཡང་ཟླ་འདིའི་ཚེས་ ༡༦ ཉིན་རྒྱ་གར་གྱི་འབྲས་ལྗོངས་མངའ་སྡེའི་རྒྱལ་ས་སྒང་ཏོག་ཏུ་༸དཔལ་ས་སྐྱ་གོང་མ་ཁྲི་ཆེན་རྡོ་རྗེ་འཆང་མཆོག་ཆིབས་བསྒྱུར་བསྐྱངས་པ་དང་བསྟུན། འབྲས་ལྗོངས་ནང་གི་དགོན་སྡེ་དང་ཚོགས་སྡེ་ཁག་སོགས་ལ་བཀའ་སློབ་དང་དབུ་འབྱེད་ཀྱི་མཛད་པ་བསྐྱངས་དང་སྐྱོང་བཞིན་པའི་ཁྲོད། ཁ་སང་འབྲས་ལྗོངས་ཀྱི་རྒྱལ་ས་སྒང་ཏོག་ཏུ་༸དཔལ་ས་སྐྱ་གོང་མ་ཁྲི་ཆེན་རྡོ་རྗེ་འཆང་མཆོག་དང་འབྲས་ལྗོངས་སྤྱི་ཁྱབ་བློན་ཆེན་ Prem Singh Tamang Golay མཆོག་ནས་ནྱི་ཡ་ནེ་རཱཏྨྱ་ Nyiya Nairatmya Centre ཞེས་པའི་དཔལ་ས་སྐྱ་པའི་ཆོས་ཚོགས་ཀྱི་རྟེན་དང་རྟེན་པ་བཅས་པར་གསར་བཞེངས་ལེགས་པར་གྲུབ་ནས་རབ་གནས་དང་དབུ་འབྱེད་མཛད་འདུག་པ་དང་སྦྲགས། ཆོས་ཚོགས་ཀྱི་ལས་ཀྱི་སྣེ་མོ་བ་དང་མི་མང་སོགས་ལ་བཀའ་སློབ་བཀའ་དྲིན་སྩལ་གནང་མཛད་འདུག དབུ་འབྱེད་ཀྱི་མཛད་སྒོའི་ཐོག་༸དཔལ་ས་སྐྱ་གོང་མ་ཁྲི་ཆེན་རྡོ་རྗེ་འཆང་མཆོག་གིས་མང་ཚོགས་ལ་བཀའ་སློབ་གནང་བའི་ཁྲོད། ཆོས་ཚོགས་ཀྱི་རྟེན་དང་རྟེན་པ་བཅས་པར་གསར་བཞེངས་ལེགས་པར་གྲུབ་པར་འཚམས་འདྲི་དང་སྦྲགས། ཕྱག་ལས་གནང་མཁན་ཡོངས་ལ་ཐུགས་རྗེ་ཆེ་ཞུ་མཛད་འདུག་པ་དང་འབྲེལ། ནང་ཆོས་སློབ་གཉེར་གནང་བའི་རྗེས་སུ་རང་སོ་སོ་ནས་ཉམས་ལེན་བྱེད་དགོས་པ་དང་། དེ་ལྟར་བྱེད་ཐུབ་ན་མི་ཚེ་དོན་དང་ལྡན་པ་ཞིག་ཆགས་པ་རེད་ཅེས་བཀའ་སྩལ་འདུག ཕྱོགས་མཚུངས་འབྲས་ལྗོངས་སྤྱི་ཁྱབ་བློན་ཆེན་ Prem Singh Tamang Golay མཆོག་གི་སྒེར་གྱི་ངོ་དེབ་ཏུ་ནྱི་ཡ་ནེ་རཱཏྨྱ་ Nyiya Nairatmya Centre ཆོས་ཚོགས་ཀྱི་དབུ་འབྱེད་མཛད་སྒོའི་ཐོག་བཅར་ཐུབ་པ་དེ་ནི་སྐལ་པ་བཟང་པོ་ཞིག་ལ་ངོས་འཛིན་གནང་གི་ཡོད་ཅེས་བརྗོད་འདུག་པ་དང་འབྲེལ། ཆོས་ཚོགས་འདིའི་བརྒྱུད་ནས་འབྲས་ལྗོངས་ཀྱི་རིག་གཞུང་དར་སྤེལ་ལ་ཕན་ཐོགས་ཡོང་རྒྱུ་དང་ནང་པ་སངས་རྒྱས་པའི་ཆོས་ལ་མི་ཉམས་རྒྱུན་འཛིན་དང་ཉམས་པ་སོར་ཆུད་གནང་ཐུབ་རྒྱུ་ཡིན་པ་མ་ཟད། སྤྱི་ཚོགས་ནང་ཞི་བདེ་དང་བྱམས་བརྩེ། དེ་བཞིན་འཆམ་མཐུན་སོགས་ཡོང་ཐུབ་ངེས་ཡིན་པ་སོགས་བརྗོད་འདུག རྩ་བའི་ད་ལན་༸དཔལ་ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་འབྲས་ལྗོངས་སུ་ཕེབས་དགོས་དོན་གཙོ་བོ་ནི་ཕྱི་ཟླ་ ༡༡ ཚེས་ ༥ ཉིན་༸དཔལ་ས་སྐྱ་ཐེག་ཆེན་ཕུན་ཚོགས་གླིང་དུ་༸སྐྱབས་མཆོག་འཁོན་གདུང་ཨ་བི་ཀྲྀ་ཏ་བཛྲ་རིན་པོ་ཆེ་མཆོག་༸དཔལ་ས་སྐྱ་ཁྲི་འཛིན་ཞེ་བཞི་པའི་ཁྲི་ལ་འཁོད་པའི་ཁྲི་སྟོན་གྱི་མཛད་སྒོའི་ཐོག་ཆིབས་བསྒྱུར་བཀའ་དྲིན་མཛད་རྒྱུ་ཡིན་པ་བསྟུན། ༸དཔལ་ས་སྐྱ་ཐེག་ཆེན་ཕུན་ཚོགས་གླིང་གི་རྟེན་དང་བརྟེན་པ་བཅས་པར་རབ་གནས་དང་དབུ་འབྱེད། དེ་བཞིན་༸སྐྱབས་མགོན་གོང་མ་ཡབ་སྲས་རྣམས་ལ་བརྟན་བཞུགས་ཀྱི་མཛད་སྒོའི་ཐོག་ཆིབས་བསྒྱུར་གནང་རྒྱུ་ཡིན་པ་རེད་འདུག གཞན་ཡང་མཛད་འཆར་ལ་གཞིགས་ན་སང་ཉིན་༸དཔལ་ས་སྐྱ་གོང་མ་ཁྲི་ཆེན་རྡོ་རྗེ་འཆང་མཆོག་གི་གཙོས་པའི་ཁྲི་འཛིན་ཞེ་གཉིས་དང་ཞེ་གསུམ་པ་བཅས་ཀ་ལིམ་པོང་ས་སྐྱ་དགོན་པར་ཆིབས་བསྒྱུར་མཛད་རྒྱུ་དང་། ཟླ་འདིའི་ཕྱི་ཚེས་ ༣༠ ཉིན་ས་སྐྱ་ཐེག་ཆེན་ཕུན་ཚོགས་གླིང་ལྷ་སྡེ་མི་སྡེ་ཡོངས་ནས་༸དཔལ་ས་སྐྱ་གོང་མ་ཁྲི་ཆེན་རྗེ་འཆང་མཆོག་དང་ཁྲི་འཛིན་རྣམ་གཉིས་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་པ་རེད་འདུག

ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་དེ་ནི་ཕྱི་ལོ་ ༢༠༠༩ ལོར་ཐོག་མ་གསར་འཛུགས་གནང་བ་ཞིག་ཡིན་པ་དང་། ཐའེ་ཝན་རྒྱལ་ཡོངས་རང་བཞིན་གྱི་ཚད་ལྡན་དེབ་སྐྱེལ་ཡོད་པའི་ཁེ་མེད་ཚོགས་པ་ཞིག་ཡིན་ཞིང་། དེ་ནི་བོད་བརྒྱུད་ནང་བསྟན་གྱི་ཐུན་མིན་ཁྱད་ཆོས་དང་གནང་སྒོ་ཁག་རྒྱུན་འཛིན་ཙམ་མ་ཡིན་པར་རྒྱ་བརྒྱུད་ནང་བསྟན་དང་ལྷོ་བརྒྱུད་ནང་བསྟན་བཅས་དང་ལྷན་དུ་བགྲོ་གླེང་དང་བསྟན་པ་སྤྱི་ཚན་ལ་དམིགས་ནས་ཆོས་ཕྱོགས་ཀྱི་གནང་སྒོ་ཁག་སྤེལ་གྱི་ཡོད་པ་རེད་འདུག ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ལྟར་ཆོས་ལུགས་ནང་ཕན་ཚུན་འཆམ་མཐུན་དང་མཐུན་སྒྲིལ་ཐོག་ལས་དོན་སྤེལ་བཞིན་ཡོད་པ་དང་། ཚོགས་པ་དེའི་ནང་ཚོགས་མི་ལྟ་བུ་མཚོན་ན་བོད་ཀྱི་ཆོས་བརྒྱུད་ཆེན་པོ་བཞིའི་འཐུས་ཚབ་ཡོད་པ་ཞིག་ཆགས་ཀྱི་འདུག འདི་ག་རླུང་འཕྲིན་ཁང་ནས་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཚོགས་གཙོ་རྫོང་སར་མཁན་པོ་ཚེ་དབང་རིག་འཛིན་ལགས་སུ། ཚོགས་པ་དེ་ཐོག་མ་གསར་འཛུགས་གནང་བའི་བརྒྱུད་རིམ་དང་། དམིགས་ཡུལ། དེ་བཞིན་ལས་དོན་གལ་ཆེན་ཁག ལྷག་པར་ཁུལ་དེར་རྟེན་གཞི་བྱས་པའི་རྒྱ་བརྒྱུད་དང་ལྷོ་བརྒྱུད་ནང་བསྟན་ལྷན་དུ་མཉམ་ལས་གནང་ཕྱོགས། དེ་བཞིན་བོད་བརྒྱུད་ནང་བསྟན་དང་བརྒྱུད་པ་གཞན་བར་ཆོས་ཕྱོགས་ཀྱི་གནང་སྒོ་ལ་ཁྱད་པར། མ་ཟད་མ་འོངས་ལས་དོན་གནང་ཕྱོགས་བཅས་ཀྱི་སྐོར་ལ་བཀའ་འདྲི་ཞུས་ཡོད་པས་གོང་གི་སྒྲ་སྒམ་ནས་གསན་གནང་ཡོང་བ་ཞུ།

གྲོས་གཞི་དོན་ཚན་དྲུག་དང་གྲོས་ཆོད་ཁག་ ༣༠ ལྷག་གཏན་འབེབས་ཐོག་བོད་མིའི་ཆོས་ཚོགས་ཐེངས་ ༡༥ པ་མཇུག་བསྒྲིལ་གནང་སོང་།

ཡོ་རོབ་ཁུལ་གྱི་བོད་བརྒྱུད་ནང་བསྟན་ཆོས་ཚོགས་ཀྱི་ཚོགས་འདུ་ཐེངས་གསུམ་པའི་ཐོག རྒྱ་གཞུང་གི་བཟོས་པའི་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་དང་འབྲེལ་བའི་ཁྲིམས་སྒྲིག་ཁག་ལ་ངོས་ལེན་མེད་སོགས་ཀྱི་སྤྱི་མོས་ཀྱི་གྲོས་ཆོད་བཞག་འདུག དེ་ཡང། ཟླ་བ་འདིའི་ཕྱི་ཚེས་༧་དང་༨་བཅས་ཉིན་གྲངས་གཉིས་རིང་། སྦེལ་ཇམ་བོད་ཀྱི་སྐུ་ཚབ་དོན་གཅོད་ཁང་གི་གོ་སྒྲིག་འོག ཁུལ་དེར་རྟེན་གཞི་བྱས་པའི་ཡོན་ཏན་གླིང་ཆོས་ཚོགས་སུ། ཡོ་རོབ་རྒྱལ་ཁབ་ཁག་༡༠་ནས། བོད་བརྒྱུད་ནང་བསྟན་གྱི་ཆོས་ཚོགས་༣༠ལྷག་གི་སྐུ་ཚབ་འཐུས་མི་༤༠ ཙམ་གྱི་འདུ་འཛོམས་ཐོག ཡོ་རོབ་ཁུལ་གྱི་བོད་བརྒྱུད་ནང་བསྟན་གྱི་ཆོས་ཚོགས་ཐེངས་གསུམ་པ་དེ་སྐོང་ཚོགས་བྱས་འདུག ཉིན་གྲངས་གཉིས་རིང་གི་ཚོགས་འདུའི་ཐོག ཚོགས་བཅར་བ་རྣམས་ནས་གཙོ་བོ་༸གོང་ས་མཆོག་གི་མ་འོངས་པའི་ཡང་སྲིད་གནད་དོན་གཙོས་པས། རྒྱ་གཞུང་གིས་ཐེ་བྱུས་བྱེད་བཞིན་པའི་བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་ཞུ་ཕྱོགས་ཐོག་ལ་གོ་བསྡུར་གནང་འདུག ཁ་སང་ཚོགས་འདུ་མཇུག་སྒྲིལ་དང་འབྲེལ། འདི་ག་རླུང་འཕྲིན་ཁང་ནས། ཚོགས་འདུ་གོ་སྒྲིག་གནང་མཁན་སྦེལ་ཇམ་བོད་ཀྱི་སྐུ་ཚབ་དོན་གཅོད་བཀྲིས་ཕུན་ཚོགས་ལགས་སུ་བཀའ་འདྲི་ཞུས་སྐབས། ད་རེས་ཚོགས་འདུ་འདིའི་ཐོག་ཚོགས་བཅར་བ་རྣམས་ཀྱིས་སྤྱི་མོས་གྲོས་ཆོད་དོན་གསུམ་ཅན་ཞིག་བཞག་འདུག་པ་དང། དེ་ཡང། ཉེ་ཆར་བཞུགས་སྒར་དུ་བོད་ཀྱི་ཆོས་བརྒྱུད་ཁག་གི་ཚོགས་ཆེན་ཐེངས་༡༤པའི་ཐོག་བཞག་པའི་གྲོས་ཆོད་ཁག་ལ་བཀྲིན་ཆེ་ཞུ་རྒྱུ་དང་། རྒྱ་གཞུང་གི་བཟོས་པའི་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་དང་འབྲེལ་བའི་ཁྲིམས་སྒྲིག་ཁག་ལ་ངོས་ལེན་མེད་པ་དང་ངོ་རྒོལ་མཐའ་གཅིག་ཏུ་ཡོད་ཅེས་༸གོང་ས་མཆོག་གི་མ་འོངས་པའི་ཡང་སྲིད་དེ། སྔར་༢༠༡༡ ལོར་གང་ཉིད་མཆོག་ནས་མ་འོངས་ཡང་སྲིད་སྐོར་སྤེལ་བའི་གསལ་བསྒྲགས་གཞིར་བཟུང། སྐུའི་ཡང་སྲིད་ཐག་གཅོད་གནང་རྒྱུའི་༸སྐུ་དབང་རྒྱལ་བ་སྐུ་ཉིད་དང་དགའ་ལྡན་ཕོ་བྲང་ལ་མ་གཏོགས་གཞན་སུ་གང་ལའང་མེད་ཅེས་སྤྱི་མོས་གྱི་གྲོས་ཆོད་དོན་ཚན་གསུམ་ཅན་ཞིག་བཞག་འདུག རྩ་བའི་ཡོ་རོབ་ཁུལ་གྱི་བོད་བརྒྱུད་ནང་བསྟན་གྱི་ཆོས་ཚོགས་ཐེངས་དང་པོ་དང་གཉིས་པ་ནི། དེ་སྔ་༢༠༠༥དང། ༢༠༡༣བཅས་སུད་སི་ཁུལ་དུ་༸གོང་ས་མཆོག་གི་ཆིབ་བསྒྱུར་སྐབས་ཚོགས་གནང་ཡོད་པ་རེད་འདུག

བོད་མིའི་བླ་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་གངས་སྐྱིད་ཚོགས་ཁང་གསར་པར་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་ཞུས་པའི་བཙན་བྱོལ་བོད་མིའི་ཆོས་ཚོགས་ཐེངས་ ༡༤ པའི་ཚོགས་དུས་ཉིན་མཐའ་མིའི་ཚོགས་མགོན་དུ་དབུ་བཞུགས་བཀའ་དྲིན་བསྐྱངས་ཏེ་ས་དགེ་བཀའ་རྙིང་རིས་མེད་ཀྱིས་མུ་མཐུད་བསླབ་པ་སློབ་གཉེར་ཐོག་ལ་ཧུར་སྐྱེད་གནང་དགོས་པའི་ལམ་སྟོན་མཛད་སོང་། དེ་རིང་ཟླ་ ༡༡ ཚེས་ ༢༩ ཉིན་གྱི་སྔ་དྲོ་ཆུ་ཚོད་ ༩ པ་ཡོལ་ཙམ་ལ་མགོན་པོ་༸གང་ཉིད་མཆོག་ཆོས་ཚོགས་ཀྱི་ཚོགས་རིའི་སྡིངས་ཆའི་ཐོག་༸ཞབས་སོར་བདེ་བར་འཁོད་མཚམས་སུ་བོད་ཀྱི་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པས་དབུས་པའི་ཚོགས་བཅར་བ་ཡོངས་ལ་འཚམས་འདྲི་བསྩལ་གྲུབ་བསྟུན་ཆོས་རིག་བཀའ་བློན་གཡུ་ཐོག་ཀརྨ་དགེ་མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཎྜེལ་རྟེན་གསུམ་འདེགས་འབུལ་ཞུས་པ་དང་། དེ་བཞིན་རྟེན་འབྲེལ་མཚོན་བྱེད་གསོལ་ཇ་འབྲས་སིལ་འདེགས་འབུལ་ཞུ་ཐོག་མཛད་རིམ་ཁག་དབུ་འཛུགས་གནང་སོང་། སྐབས་དེར་༸གོང་ས་མཆོག་གིས་ནང་པ་སངས་རྒྱས་པའི་བསྟན་པ་ཐོག་མར་དར་འཕེལ་བྱུང་ཚུལ་ངོ་སྤྲོད་མཛད་པ་དང་སྦྲགས། སངས་རྒྱས་ཀྱི་བསྟན་པ་དེ་བོད་གངས་ཅན་ལྗོངས་ལ་དར་བ་ནས་བཟུང་སྐབས་དེའི་བོད་མི་ཚོས་གང་ཟག་དགོས་མཚན་དང་འབྲེལ་བའི་སྔགས་ཀྱི་ཆོ་གར་དོ་སྣང་ཆེན་པོ་བྱས་ཡོད་ཀྱང་། བསྟན་པ་སྤྱི་མཚན་དང་འབྲེལ་བའི་གཞུང་ཆེན་དག་ལ་བསླབ་པ་སློབ་གཉེར་གནང་སྟེ་གཟིགས་རྒྱུ་སོགས་ལ་དོ་སྣང་ཆུང་དྲག་པ་ལྟ་བུར་གྱུར་ཡོད་སྟབས། མགོན་པོ་༸གང་ཉིད་མཆོག་གིས་བོད་མི་རྣམས་བཙན་བྱོན་ནང་འབྱོར་རྗེས་ ༡༩༦༠ རེ་གྲངས་མཚམས་སུ་དགོན་སྡེ་ཁག་ཏུ་གཞུང་ཆེན་ཁག་ལ་སློབ་གཉེར་གནང་རྒྱུ་གལ་ཆེན་པོ་ཡིན་པའི་འབོད་སྐུལ་གནང་བ་ལྟར། ད་ཆ་དེ་སྔ་སྔགས་ཀྱི་ཆོ་ག་གཙོ་བོ་གནང་མཁན་གཙོ་གྱུར་དགོན་སྡེ་ཁག་མང་པོ་ཞིག་གིས་ཕྱག་དཔེ་གཟིགས་རྒྱུ་དབུ་འཛུགས་གནང་བ་མ་ཟད་བཙུན་མ་ཚོས་ཀྱང་གཞུང་ཆེན་ཁག་ལ་བསླབ་པ་སློབ་གཉེར་གནང་སྟེ་དགེ་བཤེས་མ་ཐོན་ཐུབ་པ་སོགས་ཀྱི་གནས་སྟངས་བཀའ་བསྩལ་བ་དང་ཆབས་ཅིག་ཏུ་དེང་གི་འཛམ་གླིང་ཐོག་བོད་མི་རྣམས་ཀྱིས་བདག་གཅེས་གནང་བའི་༸དཔལ་ནཱ་ལེནྡཱའི་ཆོས་བརྒྱུད་སྤྱི་དང་ཁྱད་པར་དུ་སེམས་ཁམས་རིག་པའི་རྣམ་གཞག་ཐོག་ལ་ཚན་རིག་མཁས་པ་དང་ཤེས་ཡོན་ཅན། དེ་བཞིན་ཆོས་དངོས་སུ་ཁས་ལེན་མི་བྱེད་མཁན་ཚོས་ཀྱང་དོ་སྣང་གནང་ཡུལ་གསར་པ་ཞིག་ཏུ་གྱུར་ཡོད་པ་བཀའ་བསྩལ་སོང་།  ལྷག་པར་དུ་༸གོང་ས་མཆོག་གིས་༸དཔལ་ནཱ་ལེནྡཱ་ནས་དར་པའི་སངས་རྒྱས་ཀྱི་ཆོས་འདི་ནི་ང་ཚོས་རིག་པའི་ཐོག་ནས་དཔྱད་རྒྱུ་ཡོད་པའི་ཐུན་མིན་གྱི་ཁྱད་ཆོས་ལྡན་ཡོད་པ་བཀའ་བསྩལ་བ་དང་སྦྲགས། རྒྱ་གར་གྱི་མཁན་ཆེན་ཞི་འཚོས་ལམ་སྟོན་མཛད་པ་ལྟར་དཔལ་ནཱ་ལེནྡཱའི་ཆོས་བརྒྱུད་དེ་བོད་བསྒྱུར་ཞུས་ཏེ་དེ་དག་ལ་བསླབ་པ་སློབ་གཉེར་གནང་བ་མ་ཟད་བོད་མི་ཚོས་ཆོས་བརྒྱུད་དེ་བདག་ཉར་འཐུས་སྒོ་བ་ཞིག་བྱས་ཡོད་པ་དང་། བྱེས་སུའང་ས་དགེ་བཀའ་རྙིང་རིས་མེད་ཀྱིས་སློབ་གཉེར་ཐོག་ལ་ཐུགས་སྣང་ཆེན་པོ་གནང་བར་ཡི་རང་བསྔགས་བརྗོད་མཛད་པ་མ་ཟད་ས་དགེ་བཀའ་རྙིང་རིས་མེད་ཀྱིས་མུ་མཐུད་དེ་དག་ལ་ཧུར་སྐྱེད་ཀྱིས་སློབ་གཉེར་གནང་དགོས་པ་དང་དེ་ཡང་སེམས་ཁམས་རིག་པ་གཙོ་བོར་གྱུར་པའི་ཚད་མ་རིག་པའི་རྣམ་གཞག་དེ་དག་ཤེས་ཡོན་གྱི་སྡེར་བཞག་ནས་སློབ་སྦྱོང་སྤྲོད་རྒྱུར་ཤུགས་སྣོན་རྒྱག་དགོས་གལ་ཡིན་པའི་ལམ་སྟོན་བཀྲིན་ཆེ་བ་བསྩལ་ཡོད། དེ་བཞིན་༸གོང་ས་མཆོག་གིས་ང་ཚོ་བོད་མི་རྣམས་བཙན་བྱོལ་བ་ཆགས་པ་དེ་ནི་རྐྱེན་ངན་གྲོགས་ཤར་ལྟ་བུར་གྱུར་ཡོད་པ་དང་གཞིས་ལུས་རྒྱ་ཆེ་མང་ཚོགས་ཚོས་ལྷག་བསམ་དང་སྙིང་སྟོབས་གཡོ་བ་མེད་པར་བཞུགས་པ་དེས་བཙན་བྱོལ་བོད་མི་རྣམས་ལ་སེམས་ཤུགས་འཕར་མ་ཞིག་བསྐྲུན་ཐུབ་པ་དང་། བཙན་བྱོལ་ནང་གི་བོད་མི་ཚོས་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་གནང་སྟེ་གཞིས་བཞུགས་བོད་མི་དག་ལ་སྤྲོ་བ་འཕེལ་ཐུབ་པ་ཞིག་བྱུང་ཡོད་སྐོར་བཀའ་བསྩལ་སོང་། རྩ་བའི་བཙན་བྱོན་བོད་མིའི་ཆོས་ཚོགས་ཐོག་ཐེངས་ ༡༤ པ་འདི་རེས་གཟའ་ལྷག་པ་ཉིན་དབུ་འཛུགས་གནང་སྟེ་དེ་རིང་བར་ཁྱོན་ཉིན་གྲངས་གསུམ་གྱི་རིང་ཚོགས་ཡོད་པ་དང་། ཚོགས་དུས་ཉིན་གཉིས་པའི་ཐོག་བོད་ཀྱི་དགོན་སྡེ་རྣམས་སུ་དུས་བསྟུན་བཤད་སྒྲུབ་ཆོས་སྤྱོད་རྒྱུན་འཛིན་དང་གོང་སྤེལ་གནང་ཕྱོགས། ཆོས་ལུགས་གཞན་དང་མཐུན་འབྲེལ་དང་མཉམ་ལས་ཡར་རྒྱས་གཏོང་ཕྱོགས། གཞུང་ཆེན་རིགས་གཅིག་རྐང་འཛིན་གྱི་ལས་གཞི་རྒྱུན་སྐྱོང་དང་གོང་སྤེལ་གནང་ཕྱོགས། དགོན་སྡེ་ཁག་གི་གྲྭ་བཙུན་རྣམ་ཀྱི་འཕྲོད་བསྟེན་ཐོག་གཟིགས་སྐྱོང་དང་འགན་འཁུར་གནང་ཕྱོགས་བཅས་གྲོས་གཞི་གཙོ་བོ་བཞི་དང་གནད་དོན་གཞན་བཅས་ཀྱི་ཐོག་གྲོས་ཆོད་དོན་ཚན་ ༣༢ གཏན་འབེབས་གནང་ཡོད་པ་མ་ཟད། ཁྱད་པར་དུ་ཆོས་ཚོགས་ཉིན་དང་པོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཕེབས་ཕྱོགས་དང་འབྲེལ་བའི་སྤྱི་མོས་ཀྱིས་གྲོས་ཆོད་དོན་ཚན་གསུམ་ཅན་ཞིག་གཏན་འབེབས་གནང་ཡོད་ཀྱང་། དེ་རིང་༸གོང་ས་མཆོག་གིས་མགོན་པོ་༸གང་ཉིད་མཆོག་གི་༸སྐུའི་ཡང་སྲིད་ཐད་ཁྱེད་རང་ཚོས་ཐུགས་སྣང་གནང་བར་ཐུགས་རྗེ་ཆེ་ཞེས་བཀའ་བསྩལ་བ་ལས་༸སྐུའི་ཡང་སྲིད་ཕེབས་ཕྱོགས་དང་འབྲེལ་བའི་དམིགས་བསལ་བཀའ་སློབ་གང་ཡང་བསྩལ་མེད་པ་རེད། དེ་རིང་སྔ་དྲོའི་མཛད་རིམ་གྲུབ་རྗེས་ཉིན་རྒྱབ་ཚོུད་ ༡ ཐོག་ཆོས་ཚོགས་ཐེངས་ ༡༤ པའི་མཇུག་སྡོམ་མཛད་སྒོ་ཚོགས་ཡོད་པ་དང་མཛད་སྒོའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་ཐེངས་འདིའི་ཆོས་ཚོགས་ཐོག་བོད་ཀྱི་ཆོས་བརྒྱུད་ཁག་གི་བླ་ཆེན་བསྟན་བདག་རྣམ་པས་དབུས་པའི་སྐུ་ཚབ་དང་ཚོགས་བཅར་བ་རྣམས་མཉམ་འཛོམས་ཐུབ་པ་འདིས་ཆིག་སྒྲིག་གི་རྣམ་པ་མངོན་གསལ་གནང་ཐུབ་ཡོད་པ་དང་། ལྷག་པར་དུ་ཆོས་ཚོགས་ཐོག་༸གོང་ས་མཆོག་གི་༸སྐུའི་ཡང་སྲིད་དང་འབྲེལ་བའི་གྲོས་ཆོད་ཅིག་སྤྱི་མོས་ཀྱིས་གཏན་འབེབས་གནང་བར་བསྔགས་བརྗོད་སོགས་གནང་བ་དང་ཆབས་ཅིག ཆོས་ཚོགས་རིམ་ཚོགས་ཐོག་གྲོས་ཆོད་གཏན་འབེབས་གནང་ཁག་དང་ལྷག་པར་དུ་ཆོས་ཚོགས་ཐོག་༸གོང་ས་མཆོག་གི་བཀའ་སློབ་ལམ་སྟོན་ཇི་ཕེབས་ཁག་ཕྱག་བསྟར་གནང་གནད་ཡིན་པ་གསུངས་ཡོད།