༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་བྱང་ཕྱོགས་སུ་ཆགས་པའི་ཧི་མཱ་ཅལ་མངའ་སྡེ་ནང་ཆར་ཞོད་ཀྱི་གོད་ཆག་འོག་མི་རྒྱུ་གཉིས་ཀར་གནོད་སྐྱོན་ཕོག་པར་ཐུགས་གསོའི་གསུང་འཕྲིན་སྩལ་འདུགམགོན་པོ་༸གང་ཉིད་མཆོག་གིས་དེ་རིང་ཕྱི་ཚེས་ ༢༢ ཉིན་ལ་དྭགས་ཞི་བའི་ཚལ་ཕོ་བྲང་ནས་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Jai Ram Thakur མཆོག་གི་མཚན་ཐོག་ཏུ་སྩལ་བའི་གསུང་འཕྲིན་ནང་ཉེ་ལམ་མངའ་སྡེ་ནང་ཆར་ཞོད་ཆེན་པོ་བབས་པར་བརྟེན་ས་རུད་དང་ཆུ་ལོག་སོགས་བྱུང་སྟེ་གཞུང་ལམ་ལུག་པ་སོགས་རྨང་གཞི་འཛུགས་སྐྲུན་ལ་གནོད་སྐྱོན་ཕོན་ཆེ་ཕོག་ནས་མང་ཚོགས་ལ་ངལ་བ་ཆེས་ཆེར་འཕྲད་པ་དང་། ལྷག་དོན་གོད་ཆག་དེའི་ཁྲོད་ཁག་གཅིག་ཚེ་སྲོག་ཤོར་ཏེ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་བྱུང་ཡོད་སྟབས། ཁོང་རྣམ་པའི་ཤུལ་ལུས་ནང་མི་སྐུ་འཁོར་ཡོངས་ལ་ཐུགས་གསོ་དང་། རང་བྱུང་གོད་ཆག་འོག་འདས་གྲོངས་སུ་གྱུར་བ་རྣམས་ལ་ཐུགས་སྨོན་མཛད་འདུགལྷག་པར་མགོན་པོ་༸གང་ཉིད་མཆོག་གིས་ཧི་མཱ་ཅལ་ལྟ་བུ་མཚོན་ན་འདས་པའི་ལོ་ངོ་ ༦༠ ལྷག་རིང་མགོན་པོ་མཆོག་གི་བཞུགས་གནས་ཆགས་ཡོད་པར་བཀའ་སྩལ་བ་དང་འབྲེལ། ཀུན་གྱིས་མཁྱེན་གསལ་ལྟར་ཧི་མཱ་ཅལ་མངའ་སྡེའི་མང་ཚོགས་རྣམས་ནི་ངོས་དང་རང་བཞིན་གྱིས་དམིགས་བསལ་མཛའ་བརྩེ་ཟབ་མོ་ཡོད་པའི་ཚོར་སྣང་ཡོད་ཅེས་བཀའ་སྩལ་བ་དང་ཆབས་ཅིག གོད་ཆག་ཁྲོད་འདིར་ཧི་མཱ་ཅལ་མངའ་གཞུང་སོགས་ནས་ཛ་དྲག་ཉེན་སྐྱོབ་དང་ངལ་སེལ་གྱི་ལས་གཞི་སྤེལ་བཞིན་པར་ཡི་རང་བསྔགས་བརྗོད་མཛད་པ་མ་ཟད་ཧི་མཱ་ཅལ་མང་ཚོགས་ལ་གདུང་སེམས་མཉམ་བསྐྱེད་མཚོན་ཕྱིར་ཏཱ་ལའི་བླ་མའི་དགེ་རྩ་ནས་ངལ་སེལ་ཞལ་འདེབས་གསོལ་སྩལ་མཛད་རྒྱུ་ཡིན་ཞེས་འཁོད་འདུགགཞི་རྩའི་འདས་པའི་ཉིན་ཤས་ཁྲོད་ཧི་མཱ་ཅལ་ནང་ཆར་ཞོད་བསྟུད་མར་བབས་རྐྱེན་ས་ཁུལ་ཁག་གཅིག་ཏུ་ས་རུད་དང་ཆུ་ལོག་བྱུང་སྟེ་ད་བར་མི་གྲངས་ཉི་ཤུ་ལྷག་འདས་གྲོངས་དང་ཁག་གཅིག་རྨས་སྐྱོན་ཕོག་པ་དང་ཁག་གཅིག་གར་སོང་ཆ་མེད་དུ་གྱུར་ཡོད་པ་མ་ཟད། ད་ཆ་གཞུང་ལམ་མང་དག་ཅིག་ལ་འགྲོ་སྐྱོད་མི་ཆོག་པར་བཀག་སྡོམ་གནང་ཡོད་པ་རེད།ཧི་མཱ་ཅལ་མངའ་སྡེ་ནང་གི་མན་ཌི་དང་ཀང་གྷ་ར། ཅམ་བྷ་རྫོང་བཅས་ནི་ཆར་ཞོད་ཀྱི་གོད་ཆག་ཕོག་ཡུལ་སྡུག་ཤོས་ཀྱི་ས་ཚིགས་ཆགས་འདུག བཞུགས་སྒར་དྷརྨ་སཱ་ལཱར་མཚོན་ན་ཉེ་ལམ་དྷ་ཤོད་ནས་གངས་སྐྱིད་བར་གྱི་གཞུང་ལམ་ལུག་པའི་གནད་འཚེ་ཕོག་པ་མ་ཚད་པར་གངས་སྐྱིད་ནས་མེག་གྷན་བར་གྱི་གཞུང་ལམ་ལའང་ས་རུད་ཀྱི་གནད་དོན་བྱུང་ཡོད། ཆུ་ལོག་དང་འབྲེལ་བའི་པར་གྱི་བདག་དབང་། PTI

རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱི་ལྷན་ཚོགས་གཉིས་པ་བསྐྱངས་ཏེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་དགོན་འདུན་གྱི་ཞུ་སྙན་ཞིག་ཕུལ་འདུགརྒྱ་གར་གྱི་ The Economic Times གསར་ཤོག་གིས་དེ་འབྲེལ་གནས་ཚུལ་སྤེལ་བར་གཞིགས་ན། ཟླ་བ་འདིའི་ཟླ་འགོར་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱི་ལྷན་ཚོགས་གཉིས་པ་བསྐྱངས་ཏེ། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པ་དང་ལྷག་དོན་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་ཚོགས་གཙོ་སོ་སོའི་མཚན་ཐོག་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་ནང་ལ་ཞི་བདེ་དང་བྱམས་བརྩེའི་ཐོག་བཀའ་སློབ་སྩལ་གནང་ཡོང་བའི་གསོལ་འདེབས་ཞུ་དགོས་པའི་དགོན་འདུན་གྱི་ཕྱག་ཡིག་ཞུ་སྙན་ཞིག་ཕུལ་འདུག རྒྱ་གར་གྲོས་ཚོགས་འོག་མིའི་འཐུས་མི་སྐུ་ཞབས་ Tapir Gao ལགས་ཀྱིས་རྒྱ་གར་རྒྱལ་ཡོངས་སུ་བོད་ཀྱི་གནད་དོན་དང་འབྲེལ་བའི་གོ་རྟོགས་ཀྱི་ལས་འགུལ་རྒྱ་ཆེར་སྤེལ་དགོས་པ་མ་ཚད་པར་ཁྱད་པར་དུ་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་ནང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཞི་བདེ་དང་བྱམས་བརྩེའི་ཐོག་བཀའ་སློབ་སྩལ་གནང་ཡོང་བའི་གསོལ་འདེབས་ཞུ་དགོས་པའི་དགོན་འདུན་གྱི་གསུང་བཤད་གནང་འདུག དེ་མཚུངས་སུ་གྲོས་ཚོགས་ཀྱི་འཐུས་མི་གཞན་ཁག་གཅིག་གིས་རྒྱ་གར་གྱི་གྲོས་ཚོགས་ནང་ཙམ་མིན་པར་ཕྱི་རོལ་དུའང་བོད་གནད་གོ་རྟོགས་རྒྱ་གང་ཆེ་སྤེལ་དགོས་གལ་ཡིན་པ་སོགས་ཀྱི་སྐོར་ལ་གསུང་བཤད་དང་དགོངས་འཆར་གནང་འདུགཐེངས་འདིའི་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་སྤྱི་དམངས་ཀྱི་ཆེས་མཐོའི་གཟེངས་རྟགས་འབུལ་ལམ་ཞུ་དགོས་པའི་ཞུ་སྙན་ཕུལ་བའི་ལས་འགུལ་ནང་། རྒྱ་གར་ཆབ་སྲིད་ཚོགས་པ་ Bharatiya Janata Party (BJP) དང་།  Biju Janata Dal (BJD)  དེ་བཞིན་  Janata Dal (United) བཅས་གསུམ་གྱིས་གཙོས་པའི་ཚོགས་ཁག་གཞན་ཁག་གཅིག་ཟུང་འབྲེལ་མཉམ་ཞུགས་གནང་ཡོད་པར་མ་ཟད། ཆབ་སྲིད་ཚོགས་པ་ཆེ་ཁག་དེ་དག་གི་ཚོགས་མི་གཙོ་གྲས་གྲོས་ཚོགས་གོང་མའི་འཐུས་མི་སྐུ་ཞབས་ Sushil Modi ལགས་དང་ Ashok Bajpai ལགས།  Lahar Singh Siroya ལགས། Vinay Dinu Tendulkar ལགས། དེ་བཞིན་གྲོས་ཚོགས་འོག་མིའི་འཐུས་མི་སྐུ་ཞབས་ Tapir Gao ལགས་དང་Rajendra Agrawal ལགས་ལྷན་ཞུགས་གནང་ཡོད་པ་རེད། དེ་བཞིན་གྲོས་ཚོགས་འཐུས་མི་རྣམ་པས་ཨ་རིའི་གྲོས་ཚོགས་ཀྱི་ངོས་ནས་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་དོན་བཞིན་རྒྱ་གར་གྱི་གྲོས་ཚོགས་སུའང་དེ་མཚུངས་ངོ་སྤྲོད་གནང་དགོས་པར་གསུངས་འདུག་པ་དང་ཆབས་ཅིག ཁོང་རྣམས་ཀྱིས་རྒྱ་གར་གཞུང་ནས་བོད་མིར་མཐུན་རྐྱེན་སྦྱོར་སྤྲོད་གནང་ཕྱོགས་ཀྱི་ ༢༠༡༤ ལོའི་སྲིད་བྱུས་(Rehab policy 2014) ཞེས་པའི་སྐོར་དང་། ས་ཆ་བོགས་གཏོང་གནང་ཕྱོགས་ཀྱི་རྩ་འཛིན་ཡིག་ཆ་དུས་འགྱངས་གཏོང་དགོས་པའི་ཐད་ལ་བཀའ་བསྡུར་གནང་འདུག གཞན་ཡང་རྒྱ་གར་ནང་སྲིད་བློན་ཆེན་མཆོག་བཙན་བྱོལ་བོད་མིའི་གཞིས་སྒར་ཁག་ཏུ་ངེས་ཕེབས་དགོས་པའི་སྐུལ་འདེབས་ནན་པོ་གནང་འདུག་པ་དང་འབྲེལ་ཏེ། གྲོས་ཚོགས་འཐུས་མི་རྣམ་པས་རྒྱ་གར་གྱི་རྫོང་ཁག་དང་མངའ་སྡེའི་གཞུང་བཅས་ཀྱིས་བཙན་བྱོལ་བོད་མིར་ས་ཆ་དང་གཞུང་ལམ། གློག འཐུང་ཆུ་བཅས་དགོས་ངེས་ཀྱི་མཐུན་འགྱུར་ལེགས་པོ་བསྐྲུན་དགོས་པ་གསུངས་འདུག གཞི་རྩའི་འདི་ལོར་རྒྱ་གར་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་འོག་མིའི་འཐུས་མི་སྐུ་ཞབས་ BJD Sujeeth Kumar ལགས་ཀྱིས་གཙོ་འགན་བཞེས་ཏེ་གྲོས་ཚོགས་འཐུས་མི་རྣམ་པའི་དྲུང་ནས་མཚན་རྟགས་བསྡུ་རུབ་བརྒྱུད་དེ་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་དགོས་འདུན་བཏོན་པར་མ་ཟད། རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་མི་མང་དག་ཅིག་གིས་བརྙན་པར་བརྒྱུད་ནས་རྒྱ་གར་གྱི་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་ཞུ་སྐུལ་གནང་མྱོང་ཡོད་པ་རེད། དེ་སྔ་ཕྱི་ལོ་ ༢༠༢༠ ལོར་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམ་པས་མགྲིན་དབྱངས་གཅིག་གྱུར་ཐོག་ནས་དེ་འབྲེལ་དགོས་འདུན་ཆེད་བཏོན་གནང་ཡོད་པར་མ་ཟད། རྒྱ་གར་གྱི་ BJP ཆབ་སྲིད་ཚོགས་པའི་དབུ་ཁྲིད་རྒན་གྲས་དང་རྒྱ་གར་གྱི་ཕྱི་སྲིད་དྲུང་ཆེ་ཟུར་པ་གཙོས། ལ་དྭགས་ནང་པ་ཚོགས་པ། དེ་བཞིན་ལ་དྭགས་ཁྲིག་སེ་དགོན་པ་དང་བདེ་སྐྱིད་དགོན་པའི་དབུ་བླ་དང་རྒྱ་གར་གྱི་གྲོས་ཚོགས་གོང་མའི་འཐུས་མི་གནང་མྱོང་མཁན་ཁྲིག་སེ་རིན་པོ་ཆེ་མཆོག་བཅས་ཀྱིས་རྒྱ་གར་གྱི་སྲིད་བློན་མོ་ཌི་མཆོག་ལ་ཞུ་སྙན་ཞིག་ཀྱང་ཕུལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་ལྟའི་ཆར་ལ་དྭགས་ཞི་བའི་ཚལ་ཕོ་བྲང་དུ་༸སྐུ་ཞུགས་མཛད་དེ་ཁུལ་དེའི་ཉེ་འཁོར་གྱི་ས་གནས་ཁག་ཏུ་མཛད་འཕྲིན་ཁག་གཅིག་བསྐྱངས་དང་སྐྱོང་བཞིན་ཡོད་པ་ལྟར། ཁ་སང་མགོན་པོ་༸གང་ཉིད་མཆོག་གིས་ལ་དྭགས་ཁ་ཆེའི་འབྲེལ་མཐུད་ཚོགས་པས་ཇི་ལྟར་གསོལ་འདེབས་ཞུས་པ་བཞིན་རྒྱལ་ས་གླེའི་ཤལ་ཁུལ་དུ་རྟེན་གཞི་བྱས་པའི་སཱུ་ནིའི་ཁ་ཆེའི་ལྷ་ཁང་དུ་གནས་གཟིགས་དང་སྦྲགས་ཏེ་ཁ་ཆེའི་ཆོས་གྲོགས་རྣམས་ལ་བཀའ་སློབ་ལམ་སྟོན་སྩལ་བ་དང་དེ་བཞིན་ཆོས་གྲོས་ཚོས་བཀའ་འདྲི་དགོངས་སྐོར་ཞུས་པ་ཁག་ལ་བཀའ་ལན་སྩལ་ཡོད་པ་རེད།སྐབས་དེར་ས་གནས་ཀྱི་སློབ་གྲྭ་ཞིག་ཏུ་དགེ་རྒན་གྱི་ཕྱག་ལས་གནང་བཞིན་པ་ཁ་ཆེའི་བེུད་མེད་ཅིག་ནས་ཁྱིམ་དང་སྤྱི་ཚོགས་ཀྱི་ཟང་ཟིང་སྤངས་ཏེ་གྲྭ་བཙུན་སོགས་གནང་ཚེ་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་རྒྱུ་ལས་སླ་པོ་ཡོད་དམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་ནང་ཆོས་ལ་མཚོན་ན་སྟོན་པ་བཅོམ་ལྡན་འདས་གཙོ་བོར་གྱུར་པའི་ནང་པའི་མཁས་པ་བསམ་གྱིས་མི་ཁྱབ་པ་མང་པོ་ཞིག་གྲྭ་སར་ཞུགས་ཏེ་དགེ་སློང་སོགས་ཀྱི་སྡོམ་པ་ཞུས་ཡོད་པ་དང་། ནང་ཆོས་ཉམས་ལེན་གནང་བར་ངེས་པར་དུ་གྲྭ་བཙུན་སོགས་གནང་དགོས་པའི་ཁྱབ་པ་གང་ཡང་མེད་པ་དང་། དེ་ཡང་ང་ཚོ་འཇིག་རྟེན་འདིར་ཐོག་མ་སྐྱེས་པའི་སྐབས་སུ་གྲྭ་བཙུན་གྱི་ཀླད་པ་དང་མི་སྐྱའི་ཀླད་པ་ཞེས་དབྱེ་བ་གང་ཡང་མེད་སྟབས། གཙོ་བོ་རང་ཉིད་ལ་ཡོད་པའི་ཀླད་པ་འདི་བེད་སྤྱོད་ཚད་ལྡན་ཞིག་བཏང་སྟེ་ཆོས་ལ་དད་པ་ཙམ་མིན་པར་རིག་པས་དཔྱད་ནས་སློབ་གཉེར་གནང་རྒྱུ་དེ་གལ་ཆེན་པོ་རེད་ཅེས་བཀའ་ལན་སྩལ་ཡོད།    ལྷག་པར་དུ་སྐབས་དེར་བཅར་བའི་ས་གནས་ཀྱི་མཐོ་སློབ་སློབ་དཔོན་ཞིག་གིས་མང་ཚོའི་རྒྱལ་ཁབ་ནང་ལ་སྤྱི་ཚོགས་འཆམ་མཐུན་ཡོང་ཐབས་སུ་གསར་འགོད་པས་འགན་གང་བཞེས་དགོས་སམ་ཞེས་བཀའ་འདྲི་ཞུས་སྐབས་ང་ཚོ་ལ་གནས་ཚུལ་སྣ་ཚོགས་དང་ཕྱོགས་ཡོངས་ཀྱི་གནས་ཚུལ་དགོས་རྒྱུ་གལ་ཆེན་པོ་ཡིན་པ་དང་། ལྷག་དོན་སྤྱི་ཚོགས་འཆམ་མཐུན་སྐོར་ཟེར་སྐབས་སུ་ཆོས་ལ་དད་པ་དང་ཡིད་ཆེས་ཡོད་མེད་ཅེས་པ་དེ་ནི་གང་ཟག་སྒེར་གྱི་གནད་དོན་ཞིག་ཡིན་པ་དང་། ང་ཚོས་རྒྱ་ཆེ་ས་ནས་དགོངས་པ་བཞེས་དགོས་པ་ནི་འཛམ་གླིང་ཐོག་ཡོད་པའི་འགྲོ་བ་མི་ཐེར་འབུམ་བདུན་རྣམས་ལ་ཐུན་མོང་གི་ཆ་ཞིག་ཡོད་པ་དེ་ནི་ང་ཚོ་ཚང་མ་གོ་ལ་འདིའི་ཐོག་གཅིག་གིས་གཅིག་བརྟེན་ནས་འཚོ་གནས་བྱེད་དགོས་སྟབས་འགྲོ་བ་མི་ཕན་ཚུན་དབར་ལ་གཅེན་པོ་དང་གཅེན་མོ། དེ་བཞིན་འགྲོ་བ་མི་གཅིག་འགྱུར་གྱི་འདུ་ཤེས་གོང་འཕེལ་ཐོག་ནས་མཉམ་གནས་གནང་སྟེ་སྤྱི་ཚོགས་འཆམ་མཐུན་དང་འཛམ་གླིང་ཞི་བདེ་ལྡན་པ་ཞིག་བསྐྲུན་རྒྱུར་འབད་བརྩོན་གནང་དགོས་ཞེས་བཀའ་སྩལ་བ་དང་ཆབས་ཅིག འཛམ་གླིང་ཞི་བདེ་ནི་གློ་བུར་དུ་ཡོང་རྒྱུ་ཡོད་པ་ཞིག་མིན་པར་ང་ཚོའི་འབད་བརྩོན་ལ་རྟེན་ནས་ཡོང་དགོས་ཀྱི་རེད་ཅེས་ལམ་སྟོན་བཀའ་དྲིན་ཆེ་བ་སྩལ་གནང་མཛད་ཡོད།སྐབས་དེར་༸གོང་ས་མཆོག་གིས་སྟོང་ཉིད་དང་མི་རྟག་པ་སོགས་སྒོམ་པའི་ཕན་ཡོན་སྐོར་ལ་བཀའ་ལན་སྩོལ་སྐབས་ཆོས་ཉམས་ལེན་བྱེད་སྐབས་གཙོ་བོ་རང་རྒྱུད་ལ་ཡོད་པའི་ཉོན་མོངས་པའི་སེམས་ཚོར་དྲག་པོའི་ཆ་དེ་དག་ལ་གཉེན་པོ་རྟེན་ཐབས་གནང་དགོས་པ་དང་། ལྷག་པར་དུ་ང་ཚོའི་རྒྱུད་ལ་ཡོད་པའི་སེམས་ཚོར་དྲག་པོའི་ཆ་དེ་དག་དང་རྒྱུན་དུ་སེམས་མི་སྐྱིད་པའི་གནས་སྟངས་བྱུང་སྐབས་ཀྱི་རྒྱུ་རྐྱེན་གཙོ་བོ་ཞིག་ནི་རང་གཅེས་འཛིན་གྱི་བསམ་བློ་ཤུགས་ཆེ་དྲག་པའི་དབང་གིས་ཡོང་ཡོད་པ་སོགས་བཀའ་ལན་མཛད་འདུགགཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཆེའི་ཆོས་གྲོགས་ཁག་གཅིག་གིས་བཀའ་འདྲི་དགོངས་སྐོར་ཞུས་པ་ཁག་ལ་བཀའ་ལན་མ་མཛད་གོང་དུ་དེ་སྔ་མགོན་པོ་༸གང་ཉིད་མཆོག་ལྷ་སར་བཞུགས་སྐབས་ཁ་ཆེའི་ངོ་ཤེས་པ་ཚོ་དང་འབྲེལ་འདྲིས་ཆེན་པོ་ཡོད་པ་སོགས་བཀའ་སྩལ་བ་དང་སྦྲགས། དེང་དུས་ཤེས་ཡོན་ལམ་ལུགས་ནང་ལ་བྱམས་བརྩེ་དང་འབྲེལ་བའི་བསླབ་གཞི་གསར་འཇུག་གནང་རྒྱུའི་གནད་འགག་དང་ཆོས་ལུགས་མཐུན་སྒྲིལ་གྱི་གལ་གནད་སོགས་ཀྱི་ཐོག་ལམ་སྟོན་བཀའ་སློབ་བཀའ་དྲིན་སྩལ་ཡོད་པ་རེད།

དེ་རིང་ཞོགས་པ་ཕྱག་ཚོད་ ༡༠ ཐོག་ Ladakh Muslim Coordination Committee ཞེས་ལ་དྭགས་ཁ་ཆེའི་འབྲེལ་མཐུད་ཚོགས་པས་ཇི་ལྟར་གསོལ་འདེབས་ཞུས་པ་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ཀྱི་རྒྱལ་ས་གླེའི་ཤལ་ཁུལ་དུ་རྟེན་གཞི་བྱས་པའི་སུ་ནིའི་ཁ་ཆེའི་ལྷ་ཁང་དུ་ཆིབས་བསྒྱུར་དང་བཀའ་སློབ་བཀྲིན་སྩལ་གནང་མཛད་འདུགདེ་ཡང་༸གོང་ས་སྐྱབས་མགོན་ཆེན་པོ་མཆོག་གི་ལ་དྭགས་ཟངས་དཀར་ཁུལ་གྱི་མཛད་འཆར་ཁག་ལེགས་པར་གྲུབ་ནས་སླར་རྒྱལ་ས་གླེའི་ཁུལ་གྱི་མཛད་འཆར་མུ་མཐུད་མཛད་བཞིན་པའི་ཁྲོད་དེ་རིང་མགོན་པོ་༸གང་ཉིད་མཆོག་ Masjid Sharif ཞེས་ཕྱི་ལོ་ ༡༣༨༢ ལོར་ཕྱག་བཏབ་པའི་ཁ་ཆེའི་ལྷ་ཁང་དུ་ཆིབས་བསྒྱུར་བཀྲིན་བསྐྱངས་ཏེ་ཐུགས་སྨོན་མཛད་པ་དང་། ཁ་ཆེའི་མང་ཚོགས་ལ་བླང་དོར་བཀའ་སློབ་སྩལ་བ་མ་ཟད། ལ་དྭགས་ཁ་ཆེའི་འབྲེལ་མཐུད་ཚོགས་པ་ནས་མགོན་པོ་༸གང་ཉིད་ལ་ཁ་ཆེའི་མཐུན་མོང་མ་ཡིན་པའི་དགུང་ཚིགས་འདེགས་འབུལ་ཞུས་འདུག༸གོང་ས་མཆོག་གིས་ཁ་ཆེའི་མང་ཚོགས་ལ་སྐབས་དེར་དབྱིན་སྐད་ནང་བཀའ་སློབ་སྩལ་བའི་ཁྲོད། མགོན་པོ་༸གང་ཉིད་༸སྐུ་ན་ཆུང་དུས་མདོ་སྨད་སྟག་འཚེར་ཁུལ་དུ་སྐུ་བཞུགས་མཛད་སྐབས་དང་། དེ་རྗེས་ལྷ་སར་ཆིབས་བསྒྱུར་མཛད་པའི་རིང་ལ་ཁ་ཆེའི་ངོ་ཤེས་མང་པོ་ཡོད་ལ་དེ་དག་ནི་གཞི་རྩའི་ཆ་ནས་ཧ་ཅང་ཞི་བདེ་དང་ལྡན་པ་ཞིག་ཡིན་པའི་ལོ་རྒྱུས་ཁག་གཅིག་ཐུགས་དྲན་གསོ་དང་འབྲེལ། སྤྱིར་ལྷ་སའི་ནང་ཡོད་པའི་ཁ་ཆེའི་མི་རིགས་མང་ཆེ་བ་ཚོང་པ་ཡིན་པ་དང་། ཁོང་རྣམ་པས་ཚོང་ལས་ཁྲོད་རྒྱ་གར་གཙོས་པའི་ཕྱིའི་རྒྱལ་ཁབ་ཀྱི་གནས་ཚུལ་ཁྱེར་ནས་ཡོང་སྟབས། བོད་མི་རྣམས་ཀྱིས་ཁོ་ཚོར་ངང་སྒུག་ཆེན་པོ་བྱས་ཀྱི་ཡོད་པ་དྲན་གསོ་མཛད་དེ་ཁ་ཆེ་མི་སྣ་དེ་དག་ནི་སྐབས་དེའི་དུས་ཀྱི་གནས་ཚུལ་ཡོང་ཁུངས་གཙོ་བོ་ཞིག་ཆགས་ཡོད་པར་བཀའ་གནང་འདུག༸གོང་ས་མཆོག་གིས་སྐབས་དེར་ད་དུང་ཁ་ཆེའི་མང་ཚོགས་རྣམས་ལ་དེང་གི་ཤེས་ཡོན་ཐོག་ནས་ Karuna འམ་བྱམས་བརྩེ་སྤེལ་རྒྱུ་ནི་ཧ་ཅང་གནད་ཆེ་ཡིན་པ་དང་དེའང་ཚན་རིག་པ་རྣམས་ཀྱིས་མིའི་རང་བཞིན་དེ་བྱམས་བརྩེ་ཡིན་པའི་གྲུབ་དོན་རྙེད་པ་ལྟར་གནང་གནད་ཡིན་པའང་བཀའ་བསྩལ་འདུགམ་ཟད་༸གོང་ས་མཆོག་གིས་ལ་དྭགས་གཙོས་ཧཱི་མ་ལ་ཡའི་རི་བརྒྱུད་ཀྱི་མི་རིགས་རྣམས་དང་བོད་དབར་འདས་པའི་ལོ་ངོ་སྟོང་ཕྲག་རིང་ནས་འབྲེལ་ལམ་ཧ་ཅང་ཟབ་མོ་ཡོད་པ་བཞིན་མགོན་པོ་༸གང་ཉིད་རྒྱ་གར་གྱི་བྱང་ཕྱོགས་ས་ཁུལ་དེ་དག་ནང་ག་དུས་ཆིབས་བསྒྱུར་མཛད་ཀྱང་ས་གནས་མང་ཚོགས་ནས་༸གང་ཉིད་ལ་ཧ་ཅང་དད་གུས་ཆེ་བའི་སྒོ་ནས་ཕེབས་བསུ་ཞུ་གི་ཡོད་པར་བསྔགས་བརྗོད་མཛད་པ་དང་འབྲེལ། བོད་དེ་བཞིན་འདས་པའི་ལོ་ངོ་བཅུ་ཕྲག་མང་པོའི་རིང་རྒྱ་ནག་གི་དབང་སྒྱུར་འོག་གནས་ཡོད་ཀྱང་། བོད་མི་རྣམས་ཀྱིས་ལོ་ངོ་སྟོང་ཕྲག་ལྡན་པའི་བྱམས་བརྩེའི་རིག་གཞུང་དེ་གསོ་གནས་ཐུབ་ཡོད་པ་དང་། ཡང་སྒོས་ལ་དྭགས་གཙོས་པའི་ཧཱི་མ་ལ་ཡའི་མི་རིགས་ནས་ཀྱང་བྱམས་བརྩེའི་རིག་གཞུང་འདི་བཞིན་རྒྱུན་འཛིན་ཐུབ་ཡོད་པར་དམིགས་བསལ་གྱི་བསྔགས་བརྗོད་མཛད་ཡོད།མ་ཟད་ཆོས་ལུགས་མཐུན་སྒྲིལ་གྱི་གལ་གནད་སྐོར་ལའང་བཀའ་སློབ་ནན་པོ་སྩལ་བ་དང་འབྲེལ། ཆོས་ལུགས་ཇི་འདྲ་ཞིག་ཡིན་རུང་ལྟ་གྲུབ་འདྲ་མིན་ཡོད་ཀྱང་། དོན་དག་ཡང་སྙིང་བྱམས་བརྩའི་བསླབ་བྱ་གཅིག་གྱུར་ཡིན་སྟབས། ལ་དྭགས་ནང་ཁ་ཆེ་དང་ནང་པའི་སྤྱི་ཚོགས་གཉིས་འཆམ་མཐུན་ངང་གནས་ཡོད་པ་དེ་ནི་ཧ་ཅང་གུས་པར་འོས་པ་ཞིག་ཡིན་པར་བཀའ་སྩལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཕྱི་ཚེས་ ༡༥ ཉིན་རྒྱ་གར་རང་བཙན་ཐོབ་ནས་མི་ལོ་ ༧༥ འཁོར་བའི་ཉིན་མོ་དང་བསྟུན་དཔྱད་རྩོམ་སྤེལ་བའི་ནང་རྒྱ་གར་གྱི་རྒྱལ་ཁབ་འདི་ཉིད་ལོ་ངོ་བཅུ་ཕྲག་མང་པོའི་རིང་མང་གཙོའི་ལམ་བུར་བསྐྱོད་པར་བརྟེན་མང་གཙོའི་ལམ་ལུགས་ཀྱི་སྒྲོམ་གཞི་ཆེས་བརྟན་པོ་ཡོད་སྐོར་བཀའ་སྩལ་འདུགདེ་ཡང་ཁ་སང་༸གོང་ས་༸སྐྱབས་མགོན་ཆེན་པོ་མཆོག་གིས་ཀེ་ར་ལའི་གསར་ཁང་ ONMANORAMA ཐོག་དཔྱད་རྩོམ་ཞིག་སྤེལ་བའི་ནང་མགོན་པོ་༸གང་ཉིད་མཆོག་གིས་ལོ་ཤས་སྔོན་༸གང་ཉིད་མཆོག་ཝ་ཤིང་ཊོན་གྱི་མཛད་རིམ་ཞིག་གི་ནང་འབྱུང་འགྱུར་འཛམ་གླིང་ནང་རྒྱ་ནག་དམར་ཤོག་ཚོགས་པ་དང་མང་གཙོའི་རྒྱལ་ཁབ་རྒྱ་གར་གཉིས་ནས་དོ་སྣང་བྱ་ཡུལ་གཙོ་བོ་དང་གལ་འགངས་ཆེ་བ་དེ་སུ་ཆགས་མིན་བཀའ་འདྲི་ཞུས་པར་༸གང་ཉིད་མཆོག་གིས་སྐབས་དེར་ཐེ་ཚོམ་མེད་པར་དེ་རྒྱ་གར་རྒྱལ་ཁབ་ཡིན་པ་བཀའ་ལན་སྩལ་བ་དང་། ལྷག་པར་༸གང་ཉིད་མཆོག་གིས་བཀའ་ལན་དེ་ཡང་རྒྱ་གར་གྱི་ཡིད་མགུ་རུ་འཇུག་ཆེད་མིན་པར་ཡང་སྒོས་རྒྱ་གར་དེ་རྒྱལ་སྤྱིའི་སྤྱི་ཚོགས་ལ་ག་རེ་མཚོན་ཐུབ་མིན་དེ་མངོན་གསལ་གནང་རྒྱུ་ཆེད་ཡིན་པ་བཀའ་སྩལ་འདུག ༸གང་ཉིད་མཆོག་གིས་ངོས་རང་ལོ་མང་རིང་ནས་རྒྱ་གར་སྤྱི་ཚོགས་ཀྱི་ཆ་ཤས་ཞིག་ལ་ངོས་འཛིན་མཁན་ཞིག་ཡིན་པའི་ཆ་ནས་དེ་རིང་རྒྱ་གར་རང་བཙན་ཐོབ་ནས་མི་ལོ་ ༧༥ འཁོར་བའི་དུས་ཆེན་ཐོག་དགོངས་ཚུལ་ཞིག་འདིར་བཀོད་ཐུབ་པར་དགའ་ཚོར་དཔག་མེད་བྱུང་བ་དང་།  སྤྱིར་རྒྱ་གར་རྒྱལ་ཁབ་འདི་བཞིན་ཕྱི་ལོ་ ༡༩༤༧ ནས་ངལ་བ་གང་འཕྲད་པར་གདོང་ལེན་གྱིས་ཡར་རྒྱས་ཀྱི་ལམ་བུར་བསྐྱོད་པ་ནི་སེམས་འགུལ་ཐེབས་གཞི་ཞིག་དང་། ཆབས་ཅིག་རྒྱ་གར་གྱི་མང་གཙོའི་སྒྲོམ་གཞི་ལ་བསྔགས་བརྗོད་མཛད་དེ།   རྒྱ་གར་གྱི་རྒྱལ་ཁབ་འདི་ཉིད་ལོ་ངོ་བཅུ་ཕྲག་མང་པོའི་རིང་མང་གཙོའི་ལམ་བུར་བསྐྱོད་པར་བརྟེན་མང་གཙོའི་ལམ་ལུགས་ཀྱི་སྒྲོམ་གཞི་ཆེས་བརྟན་པོ་ཡོད་སྐོར་བཀའ་སྩལ་འདུག དེ་བཞིན་༸གང་ཉིད་མཆོག་གིས་རྒྱ་གར་ནང་ལོ་ངོ་སྟོང་ཕྲག་ལྷག་གི་རིང་ཆོས་ལུགས་འདྲ་མིན་ཡོད་པ་རྣམས་ཞི་བདེ་ངང་མཉམ་གནས་གནང་གི་ཡོད་པ་དང་འབྲེལ།  ད་རེས་ཀྱི་དཔྱད་རྩོམ་དེ་ཡང་ད་ཆ་ལ་དྭགས་སུ་ཡོད་པའི་སྐབས་བཀོད་པ་ཞིག་ཡིན་པ་དང་ཕྱོགས་མཚུངས་ས་ཁུལ་འདི་ལྟ་བུར་མཚོན་ན་ནང་པ་དང་ཁ་ཆེ། ཡེ་ཤུ། དེ་བཞིན་ཧིན་རྡུ་བ་རྣམས་ཞི་བདེ་ངང་མཉམ་གནས་གནང་བ་དངོས་སུ་གཟིགས་པ་བྱུང་བས་རྒྱ་གར་དེ་བཞིན་ཡར་རྒྱས་ཀྱི་ཁ་ཕྱོགས་ལ་མུ་མཐུད་བསྐྱོད་བཞིན་པ་མ་ཟད།   ལྷག་པར་རྒྱ་གར་འདི་བཞིན་འཛམ་གླིང་ནང་མང་གཙོའི་རྒྱལ་ཁབ་ཆེ་ཤོས་ཞིག་ཡིན་པའི་ཆ་ནས་འཛམ་གླིང་མང་གཙོའི་ལམ་དུ་སྣེ་ཁྲིད་ཐུབ་པའི་གནས་བབས་ཡོངས་སུ་ལྡན་ཡོད་ཅེས་ལམ་སྟོན་བཀྲིན་ཆེ་བ་སྩལ་འདུག གཞན་ཡང་མགོན་པོ་༸གང་ཉིད་མཆོག་གིས་རྒྱ་གར་གྱི་གནའ་བོའི་རིག་གནས་དང་འབྲེལ།  ༸གང་ཉིད་མཆོག་གི་ཐུགས་བསྐྱེད་དམ་བཅའ་བཞི་ལས་གཅིག་རྒྱ་གར་གྱི་གནའ་བོའི་རིག་གནས་གོང་མཐོར་གཏོང་རྒྱུ་ཡིན་པ་འགྲེལ་བརྗོད་དང་།  ཆབས་ཅིག་རྒྱ་གར་གྱི་ལྟ་གྲུབ་ནང་གི་སེམས་ཁམས་རིག་པ་དང་། བློ་སྦྱོང་གི་ཐབས་ལམ་སོགས་ཀྱིས་འཛམ་གླིང་སྤྱི་ཡོངས་ལ་ལེགས་སྐྱེས་འབུལ་ཐུབ་སྐོར་བཀའ་སྩལ་བ་མ་ཟད།  ལྷག་པར་རྒྱ་གར་གྱི་གནའ་བོའི་ལེགས་བྱང་དང་དེང་རབས་ཀྱི་ཤེས་ཡོན་གཉིས་ཟུང་དུ་འབྲེལ་བའི་ཐོག་ནས་སློབ་ཁྲིད་གནང་བར་འབད་བརྩོན་གནང་གལ་ཡིན་པ་དང་ཆབས་ཅིག རྒྱ་གར་གྱི་མངའ་སྡེ་ཁག་གཅིག་ནས་དེའི་ཐད་ཐུགས་འཁུར་བཞེས་མུས་ལྟར་སླད་མར་རྒྱ་གར་རྒྱལ་ཡོངས་ཀྱི་ལས་འགུལ་ཞིག་ཏུ་ཆགས་ཐུབ་པའི་ཐུགས་རེ་ཡོད་ཅེས་བཀའ་སྩལ་མཛད་འདུག གཞི་རྩའི་མགོན་པོ་༸གང་ཉིད་མཆོག་ཕྱི་ཟླ་ ༧ པའི་ཚེས་ ༡༤ ཉིན་བཞུགས་སྒར་༸རྒྱལ་བའི་ཕོ་བྲང་ནས་ལ་དྭགས་སུ་ཆིབས་ཐོན་མཛད་ཡོད་པ་དང་ད་ལྟར་ལ་དྭགས་སུ་༸སྐུ་ལྷོད་བཞུགས་མཛད་མུས་ཡིན་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཟངས་དཀར་ཁུལ་གྱི་ཆིབས་སྒྱུར་ཁྲོད་དེ་རིང་ལ་དྭགས་དཔལ་ལྡུམ་ཁུལ་གྱི་ཁ་ཆེའི་ལྷ་ཁང་དུ་གནས་གཟིགས་མཛད་ནས་ཁུལ་དེའི་ཁ་ཆེའི་ཆོས་གྲོགས་རྣམས་ལ་བཀའ་སློབ་བཀའ་དྲིན་སྩལ་བ་དང་དེ་བཞིན་དཔལ་ལྡུམ་ཆོས་རར་ས་གནས་ཀྱི་སློབ་ཕྲུག་རྣམས་ལ་བཀའ་སློབ་སྩལ་ཡོད།དེ་རིང་༸དཔལ་ལྡན་དགའ་ལྡན་ཕོ་བྲང་གི་དྲ་བར་གནས་ཚུལ་སྤེལ་བར་གཞིགས་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་ཕྱག་ཚོད་ ༨ པ་ཡོལ་ཙམ་ལ་ཁུལ་དེའི་ཁ་ཆེའི་ལྷ་ཁང་དུ་གནས་གཟིགས་མཛད་པ་དང་འབྲེལ་ཁ་ཆེའི་མང་ཚོགས་རྣམས་ལ་༸སྐུའི་ཐུགས་བསྐྱེད་ཆེན་པོ་བཞི་ལས་གཅིག་ནི་ཆོས་ལུགས་མཐུན་འབྲེལ་གོང་འཕེལ་མཛད་ཐབས་ཡིན་པར་བཀའ་སྩལ་ཏེ་དེང་སྐབས་ཨཧྥ་གྷ་ནིས་ཏན་ནང་དུ་ཁ་ཆེའི་ཆོས་ལུགས་གཅིག་པ་ཡིན་ནའང་། ཤཱི་ཡ་དང་སཱི་ནི་ནང་ཁུལ་དབར་མི་མཐུན་པའི་རྩོད་རྙོག་འབྱུང་བཞིན་པ་ལུང་འདྲེན་མཛད་དེ་ཆོས་ལུགས་ཚང་མས་བྱམས་པ་དང་བརྩེ་བ། གཞན་ཕན། སེམས་པ་བཟང་པོ་བྱེད་དགོས་པའི་བསླབ་བྱ་གཅིག་མཚུངས་གནང་གི་ཡོད་སྟབས། མགོན་པོ་༸གང་ཉིད་མཆོག་འཛམ་གླིང་གི་ས་ཕྱོགས་གང་དུ་ཆིབས་བསྒྱུར་མཛད་ཀྱང་ཆོས་ལུགས་འདྲ་མིན་ཁག་གི་ལྷ་ཁང་དུ་ཆིབས་སྒྱུར་མཛད་ནས་ཐུགས་སྨོན་སོགས་མཛད་ཀྱི་ཡོད་པ་དང་། ཆོས་ལུགས་ཁག་གི་བསླབ་བྱ་དེ་དག་ད་ལྟའི་མིའི་སྤྱི་ཚོགས་ལ་ཆེས་ཉེར་མཁོ་ཆགས་ཡོད་ཅེས་ལམ་སྟོན་བཀའ་དྲིན་སྩལ་ཡོད།༸གོང་ས་མཆོག་གིས་དེ་སྔ་མགོན་པོ་མཆོག་ལ་དྭགས་ཟངས་དཀར་ཁུལ་དུ་ཆིབས་བསྒྱུར་མཛད་མྱོང་ཡོད་སྐོར་བཀའ་སྩལ་ཏེ། དེང་སྐབས་ཟངས་དཀར་གཙོས་འཛམ་གླིང་ཁྱོན་ཡོངས་སུ་ཕྱིའི་དངོས་པོ་ཡར་རྒྱས་ཕྱིན་པ་མངོན་གསལ་ཆགས་ཡོད་པ་དེ་ལྟར་ནའང་། ད་ལྟའི་དུས་སུ་ང་ཚོའི་ཤུགས་རྒྱག་དགོས་ས་གཙོ་བོ་ནི་ནང་སེམས་ཀྱི་ཞི་བདེ་དང་བྱམས་བརྩེ་སོགས་ཆགས་ཀྱི་ཡོད་པར་བཀའ་སྩལ་འདུགདེ་བཞིན་མགོན་པོ་མཆོག་གིས་བྱིས་པ་ཆུང་ཆུང་ཞིག་ལ་ཆ་མཚོན་ན་ཆོས་ལུགས་དང་རིགས་རུས་ཀྱི་དབྱེ་བ་གང་ཡང་མེད་པར་ཕན་ཚུན་དབར་དགའ་མོས་བྱེད་ཀྱི་ཡོད། དེས་ན་འགྲོ་བ་མི་ཕན་ཚུན་དབར་གཅིག་གྱུར་གྱི་འདུ་ཤེས་འཛིན་དགོས་པ་དང་། ཆོས་ལུགས་དང་རིགས་རུས། དེ་བཞིན་དབུལ་ཕྱུག་གི་དབྱེ་བ་ནི་རྙོག་གྲའི་རྩ་བ་ཡིན་པ་སོགས་ལམ་སྟོན་མཛད་ཡོད།དེ་རིང་སྔ་དྲོའི་མཛད་རིམ་ཁག་ལེགས་པར་གྲུབ་མཚམས་སུ་མགོན་པོ་༸གང་ཉིད་མཆོག་གིས་མཐོ་སློབ་ཀྱི་སློབ་མ་རྣམས་དང་ལྷན་དུ་དཔལ་ལྡུམ་གྱི་ཆོས་རར་མཇལ་འཕྲད་དེ་བླང་དོར་གྱི་བཀའ་སློབ་བཀའ་དྲིན་སྩལ་བར་མ་ཟད་སློབ་ཕྲུག་རྣམས་ནས་བཀའ་འདྲིའི་དགོངས་སྐོར་ཞུས་ཁག་ལ་བཀའ་ལན་མཛད་ཡོད།མཛད་འཆར་ལ་གཞིགས་ན། སང་ཉིན་ཕྱི་ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ཀྱི་རྒྱལ་ས་གླེར་ཆིབས་བསྒྱུར་མཛད་ཀྱི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་ལ་དྭགས་ཟངས་དཀར་དུ་རྟེན་གཞི་བྱས་པའི་དཔལ་ལྡུམ་གསུང་ཆོས་ར་བར་ས་གནས་མི་མང་གཙོས་ཕྱི་ནང་གི་དད་ལྡན་ཆོས་ཞུ་བ་སྟོང་ཕྲག་ལྷག་ལ་སེམས་བསྐྱེད་ཀྱི་ཆོ་ག་དང་། ཐམས་ཅད་རྣལ་འབྱོར་གྱི་སེམས་བསྐྱེད་ཀྱི་སྒོ་ནས་བཀའ་ཆོས་སྩལ་འདུག སྐབས་དེར་མགོན་པོ་༸གང་ཉིད་མཆོག་གིས་ང་རང་ཚོ་སྟོན་པའི་རྗེས་འབྲང་པ་ཞིག་ཡིན་པའི་ཆ་ནས་ང་ཚོའི་དམིགས་ཡུལ་དེ་སྟོན་པ་བཅོམ་ལྡན་འདས་ལྟར་ནམ་མཁའི་མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ་འབད་བརྩོན་བྱ་རྒྱུ་ཡིན་བསམ་པའི་བློ་སྦྱོང་དགོས་པ་དང་། དེའང་ཉིན་རེ་བཞིན་དུ་བློ་ཇི་ཙམ་སྦྱངས་པ་དེའི་ཚོད་ཀྱིས་སྙིང་སྟོབས་དང་སྤྲོ་བ་འཕེལ་བ་ཞིག་ཡོད་གལ་ཡིན་པ་སོགས་བཀའ་སྩལ་བ་དང་སྦྲགས། མགོན་པོ་༸གང་ཉིད་མཆོག་ལ་དད་པ་དང་ཡིད་ཆེས་ཡོད་མཁན་ཚོས་སྐྱབས་སུ་མཆི་ཟེར་བ་ཙམ་མིན་པར་དོན་དམ་གྱི་ལག་ལེན་ནང་མགོན་པོ་མཆོག་གིས་ཇི་ལྟར་བཀའ་སྩལ་མཛད་དོན་བཞིན་གནང་གལ་ཡིན་པའི་ལམ་སྟོན་བཀའ་དྲིན་ཆེ་བ་སྩལ་ཡོད། སངས་རྒྱས་པའི་ཆོས་ལ་རིགས་རུས་དང་ལུས་རྟེན་སོགས་གང་གི་ཆ་ནས་ཁྱད་པར་མེད་པར་ཆོས་རབ་ཏུ་རྣམ་འབྱེད་ཀྱི་ཤེས་རབ་དང་ལྡན་པའི་མི་ཞིག་ཡིན་པའི་ཆ་ནས་སངས་རྒྱས་ཀྱི་ཆོས་ལ་བསམ་བློ་གཏང་རྒྱུའི་ནུས་པ་ལྡན་ཡོད་པར་བཀའ་སྩལ་བ་དང་ཆབས་ཅིག ད་རེས་མི་ལུས་རིན་ཆེན་ཞིག་ཐོབ་ཡོད་སྟབས་གཙོ་བོ་སྐྱོན་གྱི་འབྱུང་རྩ་གང་ཡིན་དང་འབྲེལ་བའི་ཡིད་བློའི་ཤེས་པའི་ཐོག་ལ་འགན་སྤྲད་དེ་དགོངས་པ་བཞེས་གནད་ཡིན་པའི་ལམ་སྟོན་བཀའ་དྲིན་སྩལ་འདུག དེ་བཞིན་མགོན་པོ་༸གང་ཉིད་མཆོག་གིས་དད་ལྡན་མང་ཚོགས་རྣམས་ལ་བྱང་ཆུང་སེམས་པའི་སྡོམ་པ་འབོག་ཆོག་དང་སྦྲགས་དད་ལྡན་ཆོས་ཞུ་བ་ཡོངས་ནསད་རེས་སྡོམ་པ་ཞུས་ཟིན་པའི་རྗེས་སུ་ཉིན་རེ་བཞིན་དུ་བྱང་ཆུབ་སེམས་ཀྱི་ཐོག་དགོངས་པ་བཞེས་ཐུབ་ཚེ་ཇི་སྲིད་འཚོ་བའི་བར་དུ་སེམས་སྐྱིད་པ་དང་ལྷག་པར་དུ་མཐར་ཐུག་སངས་རྒྱས་ཀྱི་གོ་འཕང་མ་ཐོབ་ཀྱི་བར་དུ་སེམས་པ་བཟང་པོ་དང་མ་བྲལ་བ་ཞིག་ཡོང་གི་རེད་ཅེས་བཀའ་སྩལ་མཛད་ཡོད། དེ་རིང་ཟངས་དཀར་ཁུལ་གྱི་ཉིན་དང་པོའི་བཀའ་ཆོས་རེ་ཞིག་ལེགས་གྲུབ་ཟིན་མཚམས་སུ་ས་གནས་ཀྱི་འབྲེལ་ཡོད་ཚོགས་པ་ཁག་གི་སྐུ་ཚབ་ཚོས་མགོན་པོ་༸གང་ཉིད་མཆོག་༸སྐུ་ཚེ་བརྟན་པར་བཞུགས་ཕྱིར་བརྟན་བཞུགས་བསྟར་འབུལ་ཞུས་ཡོད་པ་རེད། མཛད་འཆར་ལ་གཞིགས་ན། སང་ཉིན་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ནས་མུ་མཐུད་བཀའ་ཆོས་འཕྲོ་སྐྱོང་མཛད་རྒྱུ་དང་། ཕྱི་ཚེས་ ༡༤ ཉིན་རྒྱལ་ས་གླེར་ཆིབས་བསྒྱུར་མཛད་ཀྱི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལིང་དགོན་སྐུ་འབུམ་བཀྲ་ཤིས་འོད་འབར་དགོན་གྱི་དབྱར་ཆོས་ཆེན་མོའི་མཛད་འཆར་ཁག་ལེགས་པར་གྲུབ་རྗེས་དེ་རིང་ཞོགས་པ་ཕྱག་ཚོད་ ༩༌༤༠ ཐོག་ཐད་འཕར་གནམ་གྲུ་བརྒྱུད་ཟངས་དཀར་གྱི་རྒྱལ་ས་པ་ལྡུམ་ཁུལ་དུ་༸ཞབས་སོར་བདེ་བར་འཁོད་གནང་མཛད་འདུགདེ་རིང་ཞོགས་པ་ཟངས་དཀར་ཁུལ་གྱི་རྒྱལ་ས་པ་ལྡུམ་ཁུལ་དུ་ཆགས་པའི་གྲུ་འཛིན་ཕོ་བྲང་ལ་ཆིབས་བསྒྱུར་བཀྲིན་བསྐྱངས་སྐབས་མགོན་པོ་༸གང་ཉིད་མཆོག་གིས་སང་དང་གནངས་ཉིན་བཅས་ཉིན་གྲངས་གཉིས་རིང་ལ་དད་ལྡན་ཆོས་ཞུ་བ་ཚོར་ཐམས་ཅད་རྣམ་ལ་འབྱོར་གྱི་སྒོ་ནས་བྱང་ཆུབ་སེམས་བསྐྱེད་ངོ་སྤྲོད་མཛད་རྒྱུ་ཡིན་ཞེས་བཀའ་སྩལ་བ་དང་འབྲེལ། ཟངས་དཀར་ཁུལ་དུ་ཆགས་པའི་དགོན་ཁག་རྣམས་ལ་གནས་གཟིགས་མཛད་རྒྱུའི་ཐུགས་བློ་ཡོད་ཀྱང་དུས་ཚོད་དང་དགུང་ནའི་བབས་ཀྱི་ཆ་ནས་༸སྐུའི་ཞབས་པུས་ལ་སྐུ་ངལ་ཕྲན་བུ་འདུག་སྟབས། ༸སྐུ་ལྷོད་བཞུགས་ཀྱི་ཐོག་ནས་བཀའ་ཆོས་མཛད་རྒྱུ་ཡིན་པར་བཀའ་སྩལ་ཡོད།༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ལ་དྭགས་པ་གཙོས་ཧི་མཱ་ལ་ཡིའི་མི་རིགས་རྣམས་གཙོ་བོ་༸དཔལ་ནཱ་ལེནྡྲ་ནས་མཆེད་པའི་སངས་རྒྱས་པའི་ཆོས་དང་ལྷག་པར་དུ་བོད་མི་རིགས་ཀྱིས་ལོ་ངོ་སྟོང་ཕྲག་ནས་བདག་གཉེར་གནང་བའི་ནང་པ་སངས་རྒྱས་པའི་ཆོས་འདི་ཉིད་བདག་གཉེར་གནང་རྒྱུ་ཙམ་མ་ཟད། ལ་དྭགས་མི་མང་རྣམས་ཆོས་ལ་དད་པ་ཧ་ཅང་ཆེན་པོ་ཡོད་སྟབས་དད་པ་བྱ་ཡུལ་གྱི་ཆོས་ལ་སློབ་གཉེར་གནང་རྒྱུ་དེ་ཧ་ཅང་གལ་ཆེན་པོ་ཆགས་ཡོད་པར་ལམ་སྟོན་བཀྲིན་ཆེ་བ་སྩལ་བ་དང་ཆབས་ཅིག བོད་དེ་ཆབ་སྲིད་ཀྱི་གནས་སྟངས་ཤིག་གི་རྐྱེན་གྱིས་དཀའ་ངལ་མང་པོ་འཕྲད་བཞིན་པའུ་དུས་སྐབས་འདིར་ཧི་མཱ་ལ་ཡ་བ་ཚོས་བསྟན་པ་འཛིན་སྐྱོང་སྤེལ་གསུམ་བྱ་རྒྱུར་དམིགས་བསལ་འགན་འཕར་མ་ཞིག་ཡོད་སྟབས་ཁྱེད་རང་ཚོས་ཧུར་ཐག་བྱེད་དགོས་ཞེས་བཀའ་སྩལ་འདུགདེ་བཞིན་ཁ་སང་ཕྱི་ཚེས་ ༡༠ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ལིང་དགོན་སྐུ་འབུམ་བཀྲ་ཤིས་འོད་འབར་དགོན་གྱི་དབྱར་ཆོས་ཆེན་མོའི་མཇུག་སྡོམ་མཛད་སྒོའི་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས་ཏེ་བློ་སྦྱོང་ཚིགས་བརྒྱད་མའི་བཀའ་ཆོས་བཀའ་དྲིན་སྩལ་སྐབས་འཛམ་གླིང་ཞི་བདེ་ནི་ནང་སེམས་ཀྱི་ཞི་བདེའི་རྒྱུད་ནས་ཡོང་དགོས་པ་དང་ཆགས་སྡང་གི་གཞན་དབང་དུ་ཕྱིན་པ་ཡིན་ན་སེམས་ཀྱི་ཞི་བདེ་དཀྲུག་གི་ཡོད་པ་རེད་ཅེས་བཀའ་སྩལ་བ་དང་འབྲེལ་ཏེ་ཞི་བདེ་ནི་སྨོན་ལམ་རྒྱབ་ནས་ཡོང་རྒྱུ་ཁག་པོ་ཡིན་སྟབས། སེམས་པ་བཟང་པོ་བྱ་རྒྱུ་དང་ཕན་སེམས་བྱ་རྒྱུ། དེ་བཞིན་ཀུན་ལ་བརྩེ་བ་བྱ་རྒྱུ་ནི་དངོས་གནས་ཞི་བདེའི་རྩ་བ་ཆགས་ཡོད་སྟབས། འཛམ་གླིང་འདིའི་སྟེང་གི་མི་དུང་ཕྱུར་བདུན་ཅུ་ཚང་མས་མི་གཅིག་མཚུངས་ཡིན་བསམ་པའི་ཐོག་ནས་ཕན་ཚུན་ལ་བརྩེ་བ་དང་རོགས་རམ་བྱེད་དགོས་པར་བཀའ་སློབ་སྩལ་འདུག༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་གི་ཁོར་ཡུག་ལ་ཉེན་ཁ་གསར་པ་ཞིག་སླེབས་ཀྱི་ཡོད་པར་བཀའ་སྩལ་བ་དང་སྦྲགས། ཤིང་སྣ་འདེབས་འཛུགས་བྱེད་པ་སོགས་ཀྱི་ཐོག་ལ་ཏོག་ཙམ་ཤུགས་རྒྱག་དགོས་པ་དང་། དེས་མི་ཚང་མར་ཕན་རྒྱུ་ཙམ་མ་ཟད་གནམ་གཤིས་ལའང་ཕན་གྱི་ཡོད་སྟབས། ང་ཚོ་ཚང་མས་སྤྱི་སེམས་ཁོག་ལ་བཅངས་ཏེ་སྤྱི་བའི་དོན་དུ་བསམ་བློ་མང་ཙམ་བཏང་ན་སོ་སོའི་སྒེར་དོན་ཞོར་ལ་འགྲིག་རྒྱུ་དང་། མི་ཚེ་ལྷག་ལུས་དེ་དོན་སྙིང་ལྡན་པ་ཞིག་འབྱུང་ན་ཧ་ཅང་སྐྱིད་པོ་ཡོང་གི་རེད་ཅེས་བཀའ་སློབ་སྩལ་རྗེས་བློ་སྦྱོང་ཚིགས་བརྒྱད་མའི་ལྗགས་ལུང་མཛད་ཡོད། ༸སྐུ་པར་ཁག་གི་བདག་དབང་༸དཔལ་ལྡན་དགའ་ལྡན་ཕོ་བྲང་ཡིག་ཚང་།

ཁ་སང་ཕྱི་ཚེས་ ༡༠ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་གླེ་ཞི་བའི་ཚལ་ཕོ་བྲང་ནས་ཐད་འཕུར་གནམ་གྲུ་བརྒྱུད་ལ་དྭགས་ལིང་དགོན་སྐུ་འབུམ་བཀྲ་ཤིས་འོད་འབར་དགོན་གྱི་དབྱར་ཆོས་ཆེན་མོའི་མཇུག་སྡོམ་མཛད་སྒོའི་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས་ཏེ་བློ་སྦྱོང་ཚིགས་བརྒྱད་མའི་བཀའ་ཆོས་ཀྱང་སྩལ་གནང་མཛད་ཡོད།དབྱར་ཆོས་གོ་སྒྲིག་ཚོགས་ཆུང་གིས་གཙོས་པའི་དད་ལྡན་སེར་སྐྱ་མི་མང་ཚོས་༸གོང་ས་༸སྐྱབས་མགོན་ཆེན་པོ་མཆོག་ལ་སྤོས་སྣེའི་སྤྱན་འདྲེན་གཟབ་རྒྱས་ཞུས་པ་དང་། མགོན་པོ་༸གང་ཉིད་མཆོག་ལིང་ཤེད་དགོན་གྱི་ གསུང་ཆོས་ར་བའི་གདོང་ལྔས་གཏེགས་པའི་གསེར་གྱི་ཁྲི་འཕང་མཐོན་པོར་༸ཞབས་སོར་བདེ་བར་འཁོད་མཚམས་སུ་ལིང་ཤེད་དབྱར་ཆོས་ཆེན་མོའི་གོ་སྒྲིག་ཚོགས་ཆུང་གི་ཚོགས་མི་རྣམས་ཀྱིས་མཎྜལ་རྟེན་གསུམ་འདེགས་འབུལ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གཟེངས་རྟགས་ཤིག་འབུལ་ལམ་ཞུས་པ་དང་ཆབས་ཅིག་ཏུ་མགོན་པོ་༸གང་ཉིད་མཆོག་གིས་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་བཀའ་ཆོས་བཀྲིན་སྩལ་ཡོད་པ་རེད།༸གོང་ས་མཆོག་གིས་སྐབས་དེར་༸དཔལ་ནཱ་ལེནྡྲའི་ཆོས་བརྒྱུད་ཀྱི་ཕྱག་སྲོལ་ཐུན་མོང་མ་ཡིན་པ་རིགས་པའི་ལམ་དེ་ཉམས་པ་སོར་ཆུད་དང་མི་ཉམས་གོང་འཕེལ་མཛད་རྒྱུ་ངོས་ཀྱི་ལས་འགན་ཆེན་པོ་ཞིག་ཡིན་ཞེས་བཀའ་སྩལ་བ་དང་འབྲེལ། ཁུལ་དེར་ཡོད་པའི་དགོན་པ་གྲྭ་ཚང་ཚོས་སོ་སོའི་འཆར་ཅན་གྱི་ཁ་ཏོན་འདོན་པ་ཙམ་མ་ཡིན་པར་དཔེ་ཆར་ཏོག་ཙམ་སློབ་སྦྱོང་བྱ་རྒྱུ་ནི་ཧ་ཅང་གལ་ཆེན་པོ་ཡིན་པ་དང་། ལྷག་པར་དུ་སློབ་ཕྲུག་ཕོ་མོ་ཚོ་ཡིན་ནའང་རིགས་ལམ་ལ་དོ་སྣང་བྱ་རྒྱུ་ནི་ཆོས་ཀྱི་སྐད་ཆ་ཙམ་མ་ཡིན་པར་མིའི་རྣམ་དཔྱོད་གོང་འཔེལ་གཏོང་རྒྱུ་མ་ཟད། བློ་གསལ་དུ་འགྲོ་བར་ཁྱད་པར་ཆེན་པོ་ཡོད་ཅེས་བཀའ་སྩལ་འདུགའཛམ་གླིང་ཞི་བདེ་ནི་ནང་སེམས་ཀྱི་ཞི་བདེའི་རྒྱུད་ནས་ཡོང་དགོས་པ་དང་ཆགས་སྡང་གི་གཞན་དབང་དུ་ཕྱིན་པ་ཡིན་ན་སེམས་ཀྱི་ཞི་བདེ་དཀྲུག་གི་ཡོད་པ་རེད་ཅེས་བཀའ་སྩལ་བ་དང་འབྲེལ་ཏེ་ཞི་བདེ་ནི་སྨོན་ལམ་རྒྱབ་ནས་ཡོང་རྒྱུ་ཁག་པོ་ཡིན་སྟབས། སེམས་པ་བཟང་པོ་བྱ་རྒྱུ་དང་ཕན་སེམས་བྱ་རྒྱུ། དེ་བཞིན་ཀུན་ལ་བརྩེ་བ་བྱ་རྒྱུ་ནི་དངོས་གནས་ཞི་བདེའི་རྩ་བ་ཆགས་ཡོད་སྟབས། འཛམ་གླིང་འདིའི་སྟེང་གི་མི་དུང་ཕྱུར་བདུན་ཅུ་ཚང་མས་མི་གཅིག་མཚུངས་ཡིན་བསམ་པའི་ཐོག་ནས་ཕན་ཚུན་ལ་བརྩེ་བ་དང་རོགས་རམ་བྱེད་དགོས་པར་བཀའ་སློབ་སྩལ་འདུག༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་གི་ཁོར་ཡུག་ལ་ཉེན་ཁ་གསར་པ་ཞིག་སླེབས་ཀྱི་ཡོད་པར་བཀའ་སྩལ་བ་དང་སྦྲགས། ཤིང་སྣ་འདེབས་འཛུགས་བྱེད་པ་སོགས་ཀྱི་ཐོག་ལ་ཏོག་ཙམ་ཤུགས་རྒྱག་དགོས་པ་དང་། དེས་མི་ཚང་མར་ཕན་རྒྱུ་ཙམ་མ་ཟད་གནམ་གཤིས་ལའང་ཕན་གྱི་ཡོད་སྟབས། ང་ཚོ་ཚང་མས་སྤྱི་སེམས་ཁོག་ལ་བཅངས་ཏེ་སྤྱི་བའི་དོན་དུ་བསམ་བློ་མང་ཙམ་བཏང་ན་སོ་སོའི་སྒེར་དོན་ཞོར་ལ་འགྲིག་རྒྱུ་དང་། མི་ཚེ་ལྷག་ལུས་དེ་དོན་སྙིང་ལྡན་པ་ཞིག་འབྱུང་ན་ཧ་ཅང་སྐྱིད་པོ་ཡོང་གི་རེད་ཅེས་བཀའ་སློབ་སྩལ་རྗེས་བློ་སྦྱོང་ཚིགས་བརྒྱད་མའི་ལྗགས་ལུང་མཛད་ཡོད།གཞི་རྩའི་ལིང་དགོན་སྐུ་འབུམ་བཀྲ་ཤིས་འོད་འབར་ནི་རི་བོ་དགེ་ལྡན་པའི་གཞི་དགོན་ཞིག་དང་ལ་དྭགས་རི་ལྗོངས་ཡར་རྒྱས་རྫོང་གི་ཤམས་ཕྱོགས་ལྷོ་ནུབ་ཀྱི་ཉེ་འདབས་སུ་ཆགས་ཡོད། འདི་ནི་ལ་དྭགས་ཀྱི་དགོན་རྙིང་གྲགས་ཅན་ཞིག་ཞིག་ཡིན།  ཕྱི་ལོ་ ༡༤༤༠ ལོར་ལོ་ཙཱ་བ་རིན་ཆེན་བཟང་པོ་ས་ཆ་འདིར་ཕེབས་ཏེ་ས་གཞི་བྱིན་གྱིས་རླབས་ཡོད་པ་དང་། ཕྱིས་སུ་རྗེ་ཙོང་ཁ་པ་ཆེན་པོའི་དངོས་སློབ་སྟོད་བྱང་སེམས་ཤེས་རབ་བཟང་པོ་མཆོག་གིས་དཀར་ཆ་དང་ཕུག་ཐར་དགོན་པ་གཉིས་ཕྱག་བཏབ་ནས་ལྷོ་ཕྱོགས་བརྒྱུད་ཏེ་ལིང་ཤེད་ཕྱོགས་སུ་ཕེབས་ཏེ་ཧ་ནུ་མ་ལ་Hanuma-la ཞེས་པར་བཞུགས་ཞག་གིས་ལིང་ཤེད་ཕྱོགས་སུ་གཟིགས་སྐབས་ཕ་བོང་ཞིག་ལ་འོད་འབར་འཕྲོ་བ་གཟིགས་ཤིང་། དེར་མ་འོངས་པར་དགོན་པ་གྲགས་ཅན་ཞིག་ཆགས་པར་གཟིགས་ནས་ཕ་བོང་དེར་མཆོད་རྟེན་ཞིག་བཞེངས་པ་དེ་དུས་ད་ལྟའང་མཇལ་རྒྱུ་ཡོད་པར་མ་ཟད། ཕྱི་ལོ་ ༡༧༧༩ ལོར་ལ་དྭགས་རྒྱལ་པོ་ཚེ་དབང་རྣམ་རྒྱལ་གྱིས་ལིང་ཤེད་དང་། དེ་ཡི་ཉེ་འཁོར་གྱི་ས་གཞི་མང་པོ་ཞིག་མངའ་རིས་རིན་པོ་ཆེ་སྐུ་ཕྲེང་གསུམ་པ་བླ་ོབཟང་དགེ་ལེགས་ཡེ་ཤེས་གྲགས་པ་མཆོག་ལ་ཕུལ་ཞིང་། དེ་ནས་བཟུང་དགོན་པ་འདི་མངལ་རིས་རིན་པོ་ཆེའི་ཆོས་གཞིའི་ཁུངས་སུ་གཏོགས་པ་ཞིག་ཡིན་པ་དགོན་པའི་ལོ་རྒྱུས་སུ་གསལ་བ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༠༩ ལོར་དགོན་པ་འདིར་ཆིབས་བསྒྱུར་གྱིས་དད་ལྡན་མི་མང་ལ་སེམས་བསྐྱེད་དང་སྒྲོལ་དཀར་ཚེ་དབང་སོགས་ཀྱི་བཀའ་ཆོས་བཀའ་དྲིན་སྩལ་ཡོད།༸གོང་ས་མཆོག་གི་ལིང་དགོན་སྐུ་འབུམ་བཀྲ་ཤིས་འོད་འབར་དགོན་གྱི་དབྱར་ཆོས་ཆེན་མོའི་མཛད་འཆར་ཁག་ལེགས་པར་གྲུབ་ནས་དེ་རིང་ཞོགས་པ་ཕྱག་ཚོད་ ༩༌༤༠ ཡོལ་ཙམ་ལ་ཐད་འཕུར་གནམ་གྲུ་བརྒྱུད་ཟངས་དཀར་གྱི་རྒྱལ་ས་པ་ལྡུམ་ཁུལ་དུ་༸ཞབས་སོར་བདེ་བར་འཁོད་གནང་མཛད་འདུགམཛད་འཆར་ལ་གཞིགས་ན། སང་ཕྱི་ཚེས་ ༡༢ དང་ ༡༣ བཅས་ཉིན་གྲངས་གཉིས་རིང་གྲུ་འཛིན་ཕོ་བྲང་དུ་ཆོས་འབྲེལ་དང་ཕྱི་ཚེས་ ༡༤ ཉིན་གླེར་ཆིབས་སྒྱུར་མཛད་ཀྱི་ཡོད་པ་རེད། ༸སྐུ་པར་ཁག་གི་བདག་དབང་༸དཔལ་ལྡན་དགའ་ལྡན་ཕོ་བྲང་ཡིག་ཚང་།