༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་གྱི་ཆོས་འབྲེལ་མཛད་འཕྲིན་ཁག་ལེགས་པར་གྲུབ་ཏེ་ཁུལ་དེར་རྟེན་གཞི་བྱས་པའི་དགའ་ལྡན་འཕེལ་རྒྱས་གླིང་དུ་སྐུ་བཞུགས་མཛད་མུས་ཡིན་པ་ལྟར། ཁ་སང་མགོན་པོ་༸གང་ཉིད་མཆོག་གིས་དད་ལྡན་ཆོས་ཞུ་བ་ ༢༥༠ ལྷག་ལ་མཇལ་ཁ་བསྩལ་སྐབས་འཚེ་བ་དང་ཟིང་འཁྲུག་ཆེ་སྐབས་འདིར་བོད་མིའི་བཟང་སྤྱོད་གོང་འཕེལ་རྒྱུན་འཛིན་བྱེད་དགོས་གལ་ཡིན་པའི་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་ནས་གནས་མཆོག་རྡོ་རྗེ་གདན་དུ་མགོན་པོ་༸གང་ཉིད་མཆོག་གི་བཀའ་ཆོས་དང་བཀའ་དབང་སོགས་ཞུ་བར་ཕེབས་པའི་བོད་མི་དང་སོག་པོ། ར་ཤི་ཡ། དེ་བཞིན་ཀོ་རི་ཡ་སོགས་ཀྱི་དད་ལྡན་ཁག་གཅིག་ལ་དམིགས་བསལ་མཇལ་ཁ་དང་སྦྲགས། དེ་སྔ་ནང་པ་སངས་རྒྱས་པའི་ཆོས་མ་དར་སའི་ས་གནས་ཁག་ཏུ་ནང་པའི་ཆོས་ལ་དམིགས་བསལ་གྱི་དོ་སྣང་ཆེན་པོ་བྱེད་བཞིན་པའི་དུས་འདིར་བོད་པ་དང་སོག་པོ། དེ་བཞིན་ཀོ་རི་ཡ་སོགས་ནི་དེ་སྔ་སོ་སོའི་ཕ་མེས་ནས་ནང་པ་སངས་རྒྱས་པའི་ཆོས་ཉམས་ལེན་བྱེད་མཁན་ཞིག་སྟབས་བསོད་ནམས་དང་སྐལ་པ་བཟང་པོ་རེད་ཅེས་བཀའ་བསྩལ་འདུག ལྷག་པར་དུ་མགོན་པོ་༸གང་ཉིད་མཆོག་ནས་ད་ཆ་བོད་མི་རྣམས་འཛམ་གླིང་གི་ས་ཕྱོགས་གང་སར་གཞིས་ཆགས་ཡོད་སྟབས། བོད་མི་རིགས་ཀྱི་ཕ་མེས་ནས་ཡོད་པའི་ཡ་རབས་བཟང་སྤྱོད་ཀྱི་གོམས་གཤིས་བཟང་པོ་དེ་དེང་གི་འཛམ་གླིང་ཐོག་གོང་འཕེལ་རྒྱུན་འཛིན་གནང་རྒྱུ་གལ་ཆེན་པོ་ཡིན་པ་དང་། དེ་ལྟར་ཐུབ་ཚེ་བོད་མིའི་ངོས་ནས་དམིགས་དཔེ་བཟང་པོ་ཞིག་བསྟན་ཐུབ་པ་མ་ཟད་བོད་མི་དོ་བདག་སོ་སོ་ས་ཕྱོགས་གང་དུ་ཕྱིན་ཀྱང་གཞན་གྱི་དགའ་མོས་བྱ་ཡུལ་ཞིག་ཆགས་ཀྱི་རེད་ཅེས་ལམ་སྟོན་མཛད་འདུག གཞན་ཡང་སྐབས་དེར་མགོན་པོ་མཆོག་ནས་བོད་མི་རིགས་ཞེས་པ་དེ་ནི་ཐུན་མོང་མ་ཡིན་པའི་ཆོས་དང་རིག་གཞུང་ཚད་མཐོ་པོ་ཡོད་པའི་མི་རིགས་ཤིག་ཡིན་པ་དང་། ལྷག་པར་དུ་བོད་ཀྱི་སྐད་ཡིག་རང་གི་ཐོག་ལ་ཡོད་པའི་ཆོས་དང་རིག་གཞུང་གཏིང་ཟབ་ཡོད་པ་དེས་མི་རིགས་གཞན་དང་ཐ་དད་ཡིན་པའི་མཚོན་རྟགས་ཤིག་ཀྱང་ཡིན་པས་རིག་གཞུང་དེ་དག་གཅེས་སྐྱོང་གནང་རྒྱུ་གལ་ཆེན་པོ་ཡིན་པར་མ་ཟད། བོད་མིས་ད་བར་བདག་གཅེས་གནང་བའི་༸དཔལ་ནཱ་ལེནྡཱའི་ཆོས་དེ་འཛམ་གླིང་སྤྱིའི་ཐོག་སྒོ་ཕྱེ་ཐུབ་པ་ཞིག་གནང་དགོས་སོགས་བཀའ་བསྩལ་འདུག   དེ་བཞིན་༸གོང་ས་མཆོག་གིས་ཁ་ཉིན་ཕྱི་ཚེས་ ༡༡ ཉིན་གནས་མཆོག་རྡོ་རྗེ་གདན་གྱི་བཞུགས་སྒར་དགའ་ལྡན་འཕེལ་རྒྱས་གླིང་ནས་དྲྭ་ལམ་ཐད་གཏོང་བརྒྱུད་ཨ་མི་རི་ཀའི་གྲོང་ཁྱེར་ New York དུ་རྟེན་གཞི་བྱས་པའི་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་འདུ་འཛོམས་གནང་བའི་རྒྱ་རིགས་དང་བོད་པའི་མཐོ་རིམ་སློབ་གྲྭའི་སློབ་ཕྲུག་སུམ་བརྒྱ་ཙམ་ལ་ཆོས་ལུགས་དང་མ་འབྲེལ་བའི་སྤྱོད་བཟང་དང་འཇིག་རྟེན་སྤྱི་སྨན་གྱི་འགན་ཁུར་ཞེས་པའི་བརྗོད་གཞིའི་ཐོག་བཀའ་སློབ་དང་དྲི་བ་དྲིས་ལན་གནང་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་ནས་འགྲོ་བ་མིའི་གཞི་རྩའི་རང་བཞིན་གཙོ་བོ་ནི་བྱམས་སྙིང་རྗེ་ཡིན་པ་དང་། གཞི་རྩའི་རང་བཞིན་གཙོ་བོ་དེ་གོང་འཕེལ་གཏོང་ཐབས་སུ་ཤེས་ཡོན་སློབ་གསོའི་ཐོག་ནས་གོང་འཕེལ་གཏོང་དགོས་གལ་ཡིན་པར་ལམ་སྟོན་མཛད་འདུག འཛམ་བུ་གླིང་འདིའི་ཐོག་འཕྲད་བཞིན་པའི་དཀའ་རྙོག་མང་དག་ཅིག་ང་དང་ཁོ་ཞེས་རང་གཅེས་འཛིན་གྱི་བསམ་བློ་དང་། འགྲན་རྩོད་ཀྱི་རྣམ་པ་ཆེ་གྲགས་པའི་དབང་གིས་བྱུང་བ་ཆགས་ཀྱི་ཡོད་སྟབས་ང་ཚོའི་སེམས་རྒྱུད་ལ་བྱམས་བརྩེ་གོང་འཕེལ་དང་འགྲོ་བ་མིའི་ཐུན་མོང་མ་ཡིན་པའི་ཤེས་རབ་ཀྱི་ནུས་པའི་ཐོག་ནས་ངལ་བ་དེ་དག་སེལ་ཐུབ་ངེས་ཡིན་པའི་ལམ་སྟོན་བསྩལ་ཡོད་པ་རེད། ལྷག་པར་དུ་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ནས་ཐེངས་འདིའི་འཛད་རིམ་ཐོག་རྒྱ་རིགས་དང་བོད་ཕྲུག་མཉམ་དུ་འདུ་འཛོམས་བྱུང་བར་ཐུགས་དགྱེས་ཚོར་ཆེན་པོ་བྱུང་ཞེས་བཀའ་བསྩལ་དང་། བོད་དང་རྒྱ་ནག་དབར་ལ་དུས་རབས་བདུན་པ་ཙམ་ནས་ཆོས་ཕྱོགས་ཀྱི་འབྲེལ་བ་ཡོད་པ་སོགས་ངོ་སྤྲོད་མཛད་པ་དང་ཆབས་ཅིག རྒྱ་རིགས་ཚོའི་ངོས་ནས་ནང་པའི་ཆོ་ག་ཕྱག་ལེན་ཙམ་མིན་པར་རིགས་ལམ་ཐོག་དོ་སྣང་གནང་རྒྱུ་གལ་ཆེན་པོ་ཡིན་པ་ལམ་སྟོན་བསྩལ་འདུག་པ་མ་ཟད། ཆབ་སྲིད་དང་འབྲེལ་ཏེ་བཀའ་བསྩལ་བར་རྒྱ་ནག་གི་འགོ་ཁྲོད་ཚོའི་ནང་ལ་དེ་སྔ་རྒྱ་ནག་གཞུང་གིས་བོད་ཐོག་ལག་བསྟར་བྱས་པའི་སྲིད་བྱུས་དེ་དག་དངོས་ཡོད་དང་མི་མཐུན་པ་ཞིག་ཡིན་པ་དགོངས་ཚུལ་གསུང་མཁན་ཡང་ཇེ་མང་དུ་འགྲོ་བཞིན་ཡོད་པ་སོགས་བཀའ་བསྩལ་འདུག དྲི་བ་དྲིས་ལན་གྱི་མཛད་རིམ་ཐོག་མགོན་པོ་༸གང་ཉིད་མཆོག་ནས་ཆོས་ལུགས་དང་མ་འབྲེལ་བའི་བཟང་སྤྱོད་ཀྱི་བསླབ་གཞིའི་ཐོག་སློབ་གཉེར་གནང་ཐུབ་ཚེ་ཆོས་ལུགས་ཡོད་མེད་དང་། ཆོས་དད་ཡོད་མེད་སོགས་ཀྱི་དབྱེ་བ་གང་ཡང་མེད་པར་སོ་སོ་སྒེར་གྱི་ཉིན་རེའི་འཚོ་བའི་ཁྲོད་ཀྱི་སེམས་འཚོར་དྲག་པོའི་ཆ་རྣམས་བཅོམ་རྒྱུ་དང་། འགྲོ་བ་མི་གཅིག་གྱུར་གྱི་འདུ་ཤེས་གོང་འཕེལ་གཏོང་རྒྱུར་དགེ་མཚན་ཡོད་པ་དང་། གཞོན་སྐྱེས་ཚོས་དེང་གི་འཛམ་གླིང་ཐོག་འཕྲད་བཞིན་པའི་གནམ་གཤེས་འགྱུར་ལྡོག་གི་དཀའ་ངལ་དང་། དགོས་མཁོ་ཅན་གྱི་མི་སེར་ཉམས་ཐག་ཚོར་རོགས་རམ་གང་ཐུབ་གནང་དགོས་པ་སོགས་ཀྱི་ལམ་སྟོན་མཛད་འདུག  སྐབས་དེའི་དྲྭ་ཐོག་གི་བཀའ་སློབ་མཛད་རིམ་གྲུབ་མཚམས་སུ་མགོན་པོ་༸གང་ཉིད་མཆོག་ནས་ Stratnews Global ཞེས་པའི་གསར་ཁང་གི་རྩོམ་སྒྲིག་འགན་འཛིན་ Nitin Gokhale ལགས་ཀྱིས་བཅར་འདྲི་ཐོག་དབུ་བཞུགས་མཛད་དེ་ཕྱི་ལོ་ ༡༩༥༠ ཙམ་ནས་ད་བར་བོད་པའི་མི་རབས་ལ་བརྗེ་པོ་ཐེབས་ཡོད་ཀྱང་བོད་པའི་སེམས་ཤུགས་ནི་ནམ་ཡང་ཉམས་པ་མེད་པ་མ་ཟད་ད་ལྟའི་མི་རབས་གསར་པ་ཚོ་དེ་སྔའི་མི་རབས་ལྟར་སེམས་ཤུགས་ཞུམ་པ་མེད་པར་གནས་ཡོད་ཅེས་བཀའ་ལན་བསྩལ་འདུག དེང་སྐབས་རྒྱ་ནག་ནང་བོད་པའི་ཆོས་དང་རིག་གཞུང་ལ་དོ་སྣང་དང་རྗེས་སུ་འབྲང་མཁན་རྒྱ་རིགས་ཇེ་མང་དུ་འགྲོ་བཞིན་ཡོད་པ་དང་། རིམ་པས་བོད་ཀྱི་ཐུན་མོང་མ་ཡིན་པའི་རིག་གཞུང་བཟང་པོ་དེ་དག་གིས་རྒྱ་མིའི་སེམས་ཁམས་ལ་ཤུགས་རྐྱེན་སྤྲོད་ཐུབ་ངེས་ཡིན་སྟབས་མ་འོངས་པར་ཕུགས་རྒྱང་རིང་པོའི་ཐོག་རྒྱ་མིའི་གོ་མཚོན་གྱི་སྟོབས་ཤུགས་ལས་བོད་པའི་རིག་གཞུང་བཟང་པོ་དེ་དག་གི་ནུས་སྟོབས་ཆེ་བ་ཡོང་རྒྱུ་བརྒྱ་ཆ་བརྒྱ་ཐམ་པ་དེ་ལྟར་ངེས་པ་རེད་ཅེས་བཀའ་ནན་བསྩལ་འདུག དེ་བཞིན་ཕྱི་ཚེས་ ༩ དང་ ༡༠ ཉིན་མགོན་པོ་༸གང་ཉིད་མཆོག་ནས་བོད་རིགས་གཙོས་པའི་འབྲུག་ཡུལ། ལ་དྭགས་སོགས་ཧི་མཱ་ཡའི་ས་ཁུལ་ཕེབས་པའི་ཆོས་ཞུ་ཚོ་ཁག་གཅིག་ལ་དམིགས་བསལ་མཇལ་ཁ་དང་སྦྲགས། བོད་རིགས་གཞོན་སྐྱེས་ཚོ་ས་གནས་གང་དུ་བསྡད་མིན་ལ་བལྟོས་མེད་བོད་ཀྱི་སྐད་ཡིག་ཤེས་པ་བྱེད་རྒྱུ་གལ་ཆེན་པོ་ཡིན་པ་དང་། ནང་པའི་ཆོས་འདི་ཆོ་ག་ཕྱག་ལེན་ཙམ་དུ་མ་བཞག་པར་ལ་སློབ་གཉེར་གནང་རྒྱུ་གལ་ཆེན་པོ་ཡིན་པ་སོགས་ཀྱི་ལམ་སྟོན་བཀའ་དྲིན་ཆེ་བ་བསྩལ་འདུག   གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཕྱི་ཚེས་ ༢ ཉིན་ནས་ ༦ བར་གནས་མཆོག་རྡོ་རྗེ་གདན་གྱི་དུས་འཁོར་ཐང་ཆེན་དུ་དད་ལྡན་ཆོས་ཞུ་བ་སྟོང་ཕྲག་བརྒལ་བར་དུ་བཀའ་ཆོས་དང་བཀའ་དབང་སོགས་བསྩལ་ཏེ་ད་ལྟའི་ཆར་ཁུལ་དེར་སྐུ་བཞུགས་མཛད་མུས་ཡིན་པ་དང་། དེ་རིང་སྔ་དྲོ་མགོན་པོ་༸གང་ཉིད་མཅོག་ནས་ཕྱིའི་རྒྱལ་ཁབ་ཁག་ནས་ཆེད་བཅར་ཞུས་པའི་དད་ལྡ་ཁག་གཅིག་ལ་མཇལ་ཁ་དང་སྦྲགས་ཏེ་སེམས་པ་བཟང་པོ་བྱེད་རྒྱུ་དེ་ནི་བདེ་སྐྱིད་ཀྱི་རྩ་བ་ཡིན་པ་དང་ལྷག་པར་དུ་ང་ཚོ་སྤྱི་ཚོགས་སེམས་ཅན་ཞིག་ཡིན་སྟབས་གཞན་ཕན་གྱི་བསམ་བློ་གོང་འཕེལ་གཏོང་རྒྱུ་དེ་བས་ཀྱང་གནད་ཆེ་ཡིན་པ་སོགས་ཀྱི་ལམ་སྟོན་མཛད་འདུག

ཕ་རན་སི་གྲོས་ཚོགས་གོང་མའི་ནང་གི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་འཐུས་མི་ Michel Raison ལགས་ཀྱིས་ཕྱིའི་སྟོབས་ཤུགས་ཀྱི་ཐེ་བྱུས་གང་ཡང་མེད་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་གནད་དོན་དང་འབྲེལ་བའི་བོད་ཀྱི་ཐུན་མིན་ལམ་སྲོལ་ལ་གུས་བརྩིས་དང་ཕ་རན་སི་གཞུང་ལ་༸སྐུའི་ཡང་སྲིད་གནད་དོན་ཐོག་བཞེངས་ཕྱོགས་གསལ་པོ་འཛིན་དགོས་པའི་ཞུ་སྐུལ་གནང་འདུག ཁ་སང་ཕྱི་ཚེས་ ༩ ཉིན France གྲོས་ཚོགས་གོང་མའི་གཞུང་འབྲེལ་དྲྭ་གནས་ཐོག་གྲོས་ཚོགས་འཐུས་མི་ Michel Raison ལགས་ཀྱིས་ཡུལ་དེའི་ཡུ་རོབ་དང་ཕྱི་སྲིད་ལས་དོན་ལྷན་ཁང་གི་བློན་ཆེན་མཆོག་གི་མཚན་ཐོག་ལ་ཕུལ་བའི་ཕྱག་བྲིས་ཤིག་འདོན་སྤེལ་གནང་བར་ཕྱི་ལོ་ ༢༠༡༩ ཟླ་ ༣ ནང་དུ་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པས་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་དང་སྒོས་༸གོང་ས་མཆོག་གིས་མ་འོངས་པའི་ཡང་སྲིད་བདམ་ཕྱོགས་རྣམས་རྒྱ་ནག་གཞུང་ནས་སྤྲུལ་སྐུ་ཡང་སྲིད་བདམ་ཕྱོགས་དང་འབྲེལ་བའི་ཁྲིམས་སྒྲིག་གཏན་འབེབས་བྱས་ཡོད་པ་གཞིར་བཟུང་བྱེད་དགོས་པ་དང། དེ་རྗེས་ཕྱི་ཟླ་ ༨ ནང་དུ་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་དགེ་འདུན་པ་ ༡༠༠ ཙམ་ལ་རྒྱ་ནག་གཞུང་གིས་སྤྲུལ་སྐུ་ཡང་སྲིད་བདམ་ཕྱོགས་ཀྱི་ཁྲིམས་སྒྲིག་དང་རྒྱ་ནག་དམར་ཤོག་ཚོགས་པའི་ངོས་ལེན་ཡོད་པའི་ཡང་སྲིད་བདམ་ཕྱོགས་ཀྱི་ལམ་སྲོལ་བཅས་ཀྱི་སྐོར་ལ་ཟབ་སྦྱོང་སྤྲད་པ་རྣམས་ལུང་འདྲེན་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༡ ལོར་ཆབ་སྲིད་ཀྱི་སྐུ་དབང་ཡོངས་རྫོགས་མང་ཚོགས་ཀྱིས་བདམས་པའི་འགོ་ཁྲིད་ལ་རྩིས་སྤྲོད་གནང་ཟིན་པ་དེ་ལྟར་ཡང། རྒྱ་ནག་གཞུང་ཕྱོགས་ནས་མགོན་པོ་༸གང་ཉིད་མཆོག་གི་༸སྐུའི་ཡང་སྲིད་གནད་དོན་ཐོག་ཆབ་སྲིད་ཀྱི་ངན་བྱུས་སྤེལ་ཏེ་༸སྐུའི་ཡང་སྲིད་ཀྱི་བདག་དབང་༸གོང་ས་མཆོག་ལ་མེད་པ་བཟོ་རྒྱུའི་འདུན་པ་ཤུགས་ཆེ་ཡོད་པ་མངོན་གསལ་ཡོད་སྐོར་གསུངས་འདུག ཁོང་གི་ད་དུང་ཉེ་ཆར་་ཨ་རིའི་གྲོས་ཚོགས་འོག་མའི་ནང་དུ་བོད་དོན་རྒྱབ་སྐྱོར་གྱི་ཁྲིམས་འཆར་འདོན་སྤེལ་དང་འབྲེལ། གལ་ཏེ་ཁྲིམས་འཆར་དེ་གཏན་འབེབས་བྱུང་ཚེ་དེའི་བརྒྱུད་ནས་ཨ་རིའི་གཞུང་གིས་༸སྐུའི་ཡང་སྲིད་ཀྱི་གནད་དོན་ཐོག་བཞེངས་ཕྱོགས་ཇི་ཡིན་གསལ་པོ་བཟོ་ཐུབ་ངེས་ཡིན་སྐོར་གསུངས་པ་མ་ཟད། Netherlands ཕྱི་སྲིད་བློན་ཆེན་གྱི་ངོས་ནས་ཀྱང་བོད་ཐོག་འཛིན་པའི་སྲིད་བྱུས་དང་འབྲེལ་བའི་གཞུང་འབྲེལ་ཡིག་ཆ་ཞིག་གི་ནང་༸གོང་ས་མཆོག་གི་༸སྐུའི་ཡང་སྲིད་བདམ་རྒྱུའི་བདག་དབང་བོད་མི་རང་ལ་ཡོད་པ་མངོན་གསལ་གནང་བ་སོགས་ལུང་འདྲེན་གྱིས་ཕ་རན་སི་གཞུང་གིས་༸སྐུའི་ཡང་སྲིད་དང་འབྲེལ་བའི་བོད་མིའི་ཐོུང་མ་ཡིན་པའི་རིག་གཞུང་ལ་གུས་བརྩི་ཞུ་བཞིན་ཡོད་ཚེ་བོད་མི་རྣམས་ལ་ཕྱི་ཕྱོགས་ཀྱི་ཐད་བྱུས་མེད་པར་རང་ཉིད་ཀྱི་ཆོས་ཕྱོགས་ཀྱི་དབུ་ཁྲིད་བདམ་པར་མཐུན་འགྱུར་གནང་དགོས་པ་དང་ཕ་རན་སི་གཞུང་གི་ངོས་ནས་དེའི་ཐོག་བཞེངས་ཕྱོགས་གཙང་མ་ཞིག་འཛིན་དགོས་པའི་ཞུ་སྐུལ་གནང་འདུག

ཨོ་སི་ཊོ་ལི་ཡའི་ནང་མེའི་འཇིག་པའི་གོད་ཆག་ཚབས་ཆེན་བྱུང་རྐྱེན་ཁུལ་དེར་གནས་བཞུགས་མང་ཚོགས་མང་པོའི་ཚེ་སྲོག་དང་རྒྱུ་ནོར། དེ་བཞིན་རི་དྭགས་སྲོག་ཆགས་སོགས་ལ་གནོད་འཚེ་ཐེབས་ཡོད་པར་བརྟེན་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཟླ་ ༡ ཚེས་ ༨ རེས་གཟའ་ལྷག་པའི་ཉིན་ཡུལ་དེའི་སྲིད་བློན་སྐུ་ཞབས་ Scott Morrison མཆོག་གི་མཚན་ཐོག་ཏུ་གསུང་འཕྲིན་ཞིག་བསྩལ་གནང་སྟེ་ས་གནས་མང་ཚོགས་ཀུན་ལ་གདུང་སེམས་མཉམ་བསྐྱེད་གནང་ཡོད་པ་དང་འབྲེལ། གོ་ལའི་ཚ་དྲོད་རྒྱས་བཞིན་པའི་ཛ་དྲག་གི་ངལ་བ་དེ་དག་སེལ་ཕྱིར་དོན་དམ་གྱི་ཐབས་ལམ་ཞིག་འཚོལ་དགོས་པར་ལམ་སྟོན་བཀྲིན་ཆེ་བ་མཛད་འདུག མགོན་པོ་༸གང་ཉིད་མཆོག་གིས་གསུང་འཕྲིན་དེའི་ནང་དུ་ད་རེས་ཀྱི་གོད་ཆག་ཚབས་ཆེན་དེའི་འོག་ ཨོ་སི་ཊོ་ལི་ཡའི་སྲིད་བློན་སྐུ་ཞབས་ Scott Morrison མཆོག་གཙོ་གྱུར་དེ་གའི་མངའ་སྡེ་དང་ས་གནས་གཞུང་བཅས་ཀྱིས་མེ་སྐྱོན་གྱིས་གནོད་འཚེ་ཕོག་པ་རྣམས་ལ་དུས་ཐོག་ཉེན་གཡོལ་གྱི་ལས་གཞི་སྤེལ་བ་གཙོས་པའི་དགོས་ངེས་ཅན་གྱི་མཐུན་འགྱུར་རོགས་རམ་གནང་བར་ཡི་རང་བསྔགས་བརྗོད་མཛད་འདུག དེ་བཞིན་༸གོང་ས་མཆོག་གིས་ཐེངས་འདིའི་བྱུང་བའི་གོད་ཆག་ཁྲོད་ནགས་ཚལ་མེ་སྐྱོན་ཤོར་བའི་རྐྱེན་གྱིས་ས་གནས་ཀྱི་མཛེས་སྡུག་ལྡན་པའི་ཡུལ་ལྗོངས་དེ་རྣམས་རྩ་གཏོར་ཆེན་པོ་བྱུང་བར་མ་ཟད། དེ་བཞིན་ཚེ་སྲོག་ཤོར་བའི་མང་ཚོགས་དང་དེ་དག་གི་ཤུལ་ལུས་ནང་མི་སྤུན་མཆེད། རྒྱུ་ནོར། རི་དྭགས་སྲོག་ཆགས་དག་ལ་གནོད་སྐྱོན་ཐེབས་པ། སྒོས་སུ་འཇིག་པ་དེའི་རྐྱེན་པས་ཆགས་ས་རྟེན་ས་མེད་པའི་མི་མང་དུ་མར་དཀའ་ངལ་འཕྲད་པར་གདུང་སེམས་མཉམ་བསྐྱེད་གནང་བ་དང་སྦྲགས། ལྷག་དོན་རྒྱལ་སྤྱིའི་སྤྱི་ཚོགས་ཁྲོད་ནས་མེའི་འཇིག་པས་གནོད་འཚེ་ཕོག་མཁན་ཚོར་དགོས་ངེས་གྱི་མཐུན་འགྱུར་རོགས་རམ་གནང་སྟེ་གདུང་སེམས་མཉམ་བསྐྱེད་ཞུས་དང་ཞུ་བཞིན་པ་དེས་མགོན་པོ་༸གང་ཉིད་མཆོག་ལ་ཐུགས་འགུལ་ཆེན་པོ་ཐེབ་ཡོད་པ་དང་། ལས་དོན་འདི་ལྟ་བུ་ནི་འགྲོ་བ་མི་གཅིག་གྱུར་དང་བྱམས་སྙིང་རྗེའི་རང་བཞིན་གྱི་དཔེ་མཚོན་ཞིག་ཡིན་སྐོར་བཀའ་བསྩལ་བ་མ་ཟད། ཁྱད་པར་དུ་ང་ཚོ་མི་རེ་ངོ་རེ་ངོས་ཀྱིས་ད་ལྟའི་ཆར་གོ་ལའི་ཚ་དྲོད་རྒྱས་བཞིན་པའི་ཛ་དྲག་གི་ངལ་བ་དེ་དག་སེལ་ཕྱིར་དོན་དམ་གྱི་ཐབས་ལམ་ཞིག་འཚོལ་དགོས་པར་ལམ་སྟོན་བཀྲིན་ཆེ་བ་མཛད་འདུག ༸གོང་ས་མཆོག་གིས་ད་རེས་ཀྱི་གསུང་འཕྲིན་དེའི་བརྒྱུད་དེ་དེ་སྔ་མགོན་པོ་༸གང་ཉིད་མཆོག་ཨོ་སི་ཊོ་ལི་ཡའི་ནང་ཡང་ཡང་ཕེབས་ཀྱི་ཡོད་པ་བཞིན། ས་གནས་མང་ཚོགས་ཚོས་གང་ཉིད་ལ་ལྷད་མེད་ཀྱི་བརྩེ་སེམས་རྣམ་པ་ཆེད་བཏོན་དང་། ལྷག་དོན་མགོན་པོ་མཆོག་གིས་བསྟན་འགྲོ་སྤྱིར་སྨན་པའི་འགྲོ་བ་མིའི་རིན་ཐང་དང་སེམས་ཀྱི་ཞི་བདེ་གོང་འཕེལ་མཛད་རྒྱུའི་ཕྱག་ལས་དག་ལ་ཐུགས་སྣང་ཆེན་པོ་གནང་བ་དེས་ཐུགས་འགུལ་ཆེན་པོ་ཐེབས་སྐོར་ཡང་བཀའ་བསྩལ་འདུག གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་གནས་མཆོག་རྡོ་རྗེ་གདན་དུ་འཇམ་དབྱངས་ཆོས་འཁོར་ལས་ཆོས་རྒྱལ་ཕྱི་ནང་གསང་གསུམ་གྱི་རྗེས་གནང་བཀའ་དྲིན་སྩོལ་བཞིན་པའི་ཁྲོད་འཛམ་བུ་གླིང་འདིའི་ཐོག་དཀའ་ངལ་མང་དག་ཅིག་མིས་བཟོས་པ་ཞིག་ཡིན་པ་དང། དེའི་ཁྲོད་གོ་ལའི་ཚ་དྲོད་འཕེལ་བའི་རྐྱེན་གྱིས་ས་ཆ་ཁ་ཤས་ནང་དུ་ཆུའི་འཇིག་པའི་དབང་གིས་ཆུ་ལོག་གི་ངལ་བ་དང་། ལྷག་པར་ད་ལྟ་ཨོ་སི་ཊོ་ལི་ཡ་ལྟ་བུར་ཚ་དྲོད་རྒྱས་ཏེ་མེ་སྐྱོན་གྱི་དཀའ་ངལ་ཆེས་ཛ་དྲག་འཕྲད་བཞིན་པའི་འོག་མི་དང་སྲོག་ཆགས་ས་ཡ་མང་པོའི་ཚེ་སྲོག་ཤོར་བར་ཐུབས་འཚབ་ཡོད་པའི་བཀའ་བསྩལ་བ་དང་སྦྲགས་ཏེ་ཚང་མས་བསྔོ་སྨོན་གསུང་འདོན་གནང་དགོས་པ་མ་ཟད་སླད་མར་ངལ་བ་དེ་ལྟར་མི་འཕྲད་པའི་ཆེད་དུ་ཁོར་ཡུག་ཐོག་ཐུགས་སྣང་གནང་གནད་ཡིན་པའི་ལམ་སྟོན་བཀྲིན་ཆེ་བ་བསྩལ་ཡོད་པ་རེད། དེའི་བར་ན་འབྲེལ་ཡོད་གནས་ཚུལ་གཞན་ཞིག་གི་ནང་གསལ་ལྟར་ན་དེ་རིང་ཕྱི་ཚེས་ ༩ ཉིན་༸སྐྱབས་རྗེ་ཡོངས་འཛིན་གླིང་རིན་པོ་ཆེ་མཆོག་གིས་ཀྱང་རང་བྱུང་གི་གནོད་འཚེ་མེའི་འཇིག་པ་བྱུང་ནས་མི་དང་སྲོག་ཆགས་མང་པོའི་ཚེ་སྲོག་ཤོར་ནས་དུས་མིན་འཆི་རྐྱེན་དུ་སོང་བ་དང་། བསམ་ཡུལ་ལས་འདས་པའི་སྡུག་བསྔལ་བཟོད་གླགས་མེད་པར་བྱུང་བ་རྣམས་ལ་གསོལ་འདེབས་སྨོན་ལམ་དང་དང་དཀའ་སྡུག་གྲངས་ལས་འདས་པ་མྱོང་བཞིན་པའི་སྐྱེ་འགྲོ་རྣམས་འཇིགས་པ་དེ་ལས་མྱུར་དུ་ཐར་ཏེ་ཆོས་འབྱོར་བདེ་དགེས་འཚོ་བའི་སྨོན་འདུན་ཤུགས་དྲག་གིས་སྐྱབས་སྨོན་མཛད་འདུག གཞི་རྩའི་ཨོ་སི་ཊོ་ལི་ཡ་ནང་གི་མངའ་སྡེ་འདྲ་མིན་དྲུག་ཙམ་ནང་གི་ས་ཁོངས་ཁྱོན་ Acre ས་ཡ་ ༡༤ ཙམ་ཚུད་པའི་འོག་མིའི་སྡོད་ཁྱིམ་ ༢༠༠༠ ལྷག་མེས་འཚིགས་ཟིན་པ་དང་། མི་ ༢༦ རྐྱེན་འདས་སུ་གྱུར་བ་དང་མང་པོ་ཞིག་གར་སོང་ཆ་མེད་དུ་གྱུར་འདུག དེ་བཞིན་རི་དྭགས་སྲོག་ཆགས་ཐེར་འབུལ་གཅིག་ཙམ་གྱི་ཚེ་སྲོག་ཤོག་བའི་ཆེས་ཛ་དྲག་གི་གནས་སྟངས་གྱུར་ཡོད་པ་རེད།

ཁ་སང་ཟླ་ ༡ ཚེས་ ༨ རེས་གཟའ་ལྷག་པ་སྟེ་༸གོང་ས་མཆོག་གི་༸སྐུའི་བླ་གཟའ་དང་བསྟུན་ཏཱ་ལའི་བླ་མའི་དགེ་རྩ་ནས་ངན་སློང་ལ་ཟས་དང་དངུལ་གྱི་སྦྱིན་པ་གནང་ཡོད་པ་རེད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་གནས་མཆོག་རྡོ་རྗེ་གདན་དུ་ནམ་ཆིབས་བསྒྱུར་མཛད་རིང་ལ་ཏཱ་ལའི་བླ་མ་དགེ་རྩས་༸གོང་ས་མཆོག་༸སྐུ་ཚེ་ཞབས་པད་བརྟན་ཕྱིར་དང་བོད་ཀྱི་བདེན་མཐའ་མྱུར་དུ་སེལ་སླད་རེས་གཟའ་ལྷག་པའི་ཉིན་ས་གནས་འདིར་ཡོད་པའི་ངན་སློང་ལ་ཟས་དང་དངུལ་ གྱི་སྦྱིན་པ་གནང་གི་ཡོད་པ་རེད། ཁ་སང་སྔ་དྲོ་ཚོུད་ ༡༡ ཡོལ་ཙམ་ལ་དུས་འཁོར་ཐང་ཆེན་དུ་ངན་སློང་དང་དབུལ་ཕོངས་སྟོང་ཕྲག་ལ་ཞལ་ལག་དང་ཧིན་སྒོར་བརྒྱ་རེ་དང་དེ་བཞིན་དབང་པོ་སྐྱོན་ཅན་ཚོར་ཧིན་སྒོར་ ༢༠༠ རེ་སྦྱིན་གཏོང་གནང་ཡོད་པ་རེད། གཞི་རྩའི་ཏཱ་ལའི་བླ་མ་དགེ་རྩ་ནས་༸གོང་ས་མཆོག་རྡོར་གདན་དུ་བཞུགས་ཞག་མཛད་རིང་ལ་༸སྐུའི་བླ་གཟའ་ནམ་འཁེལ་དང་བསྟུན་ངན་སློང་ལ་ཟས་དངུལ་གྱི་སྦྱིན་གཏོང་གནང་བར་ཙམ་མ་ཟད་ལོ་འཁོར་མོར་ཚེས་བཟང་དུས་བཟང་སྐབས་རྡོར་གདན་དུ་རྟེན་གཞི་བྱས་པའི་རྣམ་རྒྱལ་གྲྭ་ཚང་བརྒྱུད་དེ་ངན་སློང་དང་དབུལ་ཕོངས་ལ་གསོལ་ཆས་དང་།  སྐབས་རེ་ཉིན་དགུང་ཞལ་ལག དེ་བཞིན་ཕྱག་དངུལ་སོགས་གནང་གི་ཡོད་པ་རེད།  

བྷི་ཧར་མངའ་སྡེའི་སྤྱི་ཁྱབ་བློན་ཆེན་མཆོག་གིས་དེ་རིང་ཉིན་རྒྱབ་གནས་མཆོག་རྡོ་རྗེ་གདན་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་མཇལ་འཕྲད་ཞུས་འདུག དེའང་༸གོང་ས་མཆོག་གནས་མཆོག་རྡོ་རྗེ་གདན་དུ་ཆིབས་བསྒྱུར་ནམ་བྱུང་སྐབས་བྷི་ཧར་མངའ་སྡེའི་བློན་ཆེན་སྐུ་ཞབས་Nitish Kumar མཆོག་གིས་མགོན་པོ་གང་ཉིད་གི་མཆོག་ལ་མཇལ་ཁ་ཞུ་སྲོལ་ཡོད་པ་ལྟར། དེ་རིང་ཉིན་རྒྱབ་ཆུ་ཚོད་ ༢།༥༠ ཙམ་གྱི་ཐོག་སྤྱི་ཁྱབ་བློན་ཆེན་མཆོག་གནས་མཆོག་རྡོ་རྗེ་གདན་དུ་ཡོད་པའི་རྒྱལ་བའི་བཞུགས་གནས་ཕོ་བྲང་དུ་ཆེད་ཕེབས་དང་འབྲེལ། ༸གོང་ས་མཆོག་ལ་མཇལ་བཅར་ཞུས་ཡོད་པ་རེད། ༸གོང་ས་མཆོག་གིས་སྐབས་དེར་སྤྱི་ཁྱབ་བློན་ཆེན་མཆོག་ནི་རྒྱ་གར་གྱི་དཔལ་ནཱ་ལེནྡཱའི་གནའ་བོའི་རིག་གནས་ལ་དོ་དབྱིངས་ཆེན་པོ་གནང་མཁན་གྱི་སྐུའི་མཛའ་གྲོགས་རྙིང་པ་ཞིག་ཡིན་པའི་དགའ་བསུ་ཞུས་པ་དང་སྦྲགས། དབུ་ཁྲིད་རྣམས་གཉིས་དབར་གྱི་མཇལ་མོལ་དེའི་ཁྲོད་གཙོ་བོ་མགོན་པོ་མཆོག་གི་སྐུའི་ཐུགས་བསྐྱེད་དམ་བཅའ་བཞིའི་སྐོར་དང་། དེའི་ནང་གསལ་དཔལ་ནཱ་ལེནྡཱའི་གནའ་བོའི་རིག་གནས་བསྐྱར་གསོའི་སྐོར་ལ་བཀའ་བསྡུར་མཛད་འདུགགང་ཉིད་དང་བློན་ཆེན་གྱི་མཇལ་མོལ་དེའི་སྐབས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཀྱང་ཆེད་བཅར་ཞུས་ཡོད་པ་རེད་འདུག གཞི་རྩའི་བྷེ་ཧཱར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Nitish Kumar མཆོག་གིས་༸གོང་ས་སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དུ་ཆིབས་བསྒྱུར་ནམ་བྱུང་སྐབས། མགོན་པོ་གང་ཉིད་དང་ལྷན་མཇལ་འཕྲད་ཞུ་སྲོལ་ཡོད་པ་ལྟར། སྔ་ལོའི་ཕྱི་ཟླ་ ༡༢ པའི་ལོ་མཇུག་ཏུའང་༸གོང་ས་མཆོག་ཁུལ་དེར་ཆིབས་བསྒྱུར་མཛད་སྐབས། ཁོང་གིས་མགོན་པོ་གང་ཉིད་ཀྱི་མཇལ་ཁ་ཞུས་ཡོད་པ་མ་ཟད། ༸གོང་ས་མཆོག་ལ་ཡུལ་དེའི་ སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་དགོས་འདུན་ལ་རྒྱབ་སྐྱོར་ཞུ་མྱོང་ཡོད་པ་རེད།

ཁ་སང་ཟླ་ ༡ ཚེས་ ༧ ཉིན་གནས་མཆོག་རྡོ་རྗེ་གདན་དགའ་ལྡན་འཕེལ་རྒྱས་གླིང་གཟིམ་ཆུང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྷོ་ཤར་ཨེ་ཤ་ཡའི་དད་ལྡན་ཆོས་ཞུ་བའི་རུ་ཁག་གཅིག་ལ་མཇལ་ཁ་བསྩལ་བ་དང་སྦྲགས། དུས་རབས་ཉི་ཤུ་རྩ་གཅིག་པའི་ནང་དད་པ་ཙམ་བྱ་རྒྱུ་ནི་དུས་ཚོད་ཡོལ་བའི་སྐད་ཆ་ཞིག་ཡིན་པ་ལས་རྒྱུ་མཚན་གྱི་ཐོག་ནས་དཔྱད་པ་གནང་བའི་བརྒྱུད་སརྒྱས་པའི་ཆོས་ལ་དད་པ་རྙེད་རྒྱུ་དང་། ཚན་རིག་དང་མཐུན་པར་དཔྱད་ཞིབ་གནང་རྒྱུ་ནི་ནཱ་ལེནྡཱའི་ཆོས་བརྒྱུད་ངོ་མ་རེད་ཅེས་བཀའ་བསྩལ་འདུག སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རབས་ཉེར་གཅིག་པའི་ནང་ཚན་རིག་ཡར་རྒྱས་ཆེན་པོ་ཕྱིན་ཡོད་པ་ལྟར་ད་བར་ལོ་ངོ་ ༤༠ ཙམ་གྱི་རིང་ལ་མགོན་པོ་མཆོག་གིས་ཚན་རིག་པ་དང་ལྷན་དུ་བཀའ་བསྡུར་མང་དག་ཅིག་གནང་བའི་བརྒྱུད་རིམ་ཁྲོད་ཚན་རིག་པ་མང་དག་གིས་སརྒྱས་པའི་ཆོས་དང་སེམས་ཁམས་རིག་པའི་ལྟ་གྲུབ་ལ་བསྔགས་བརྗོད་ཆེན་པོ་གནང་གི་ཡོད་པ་བཀའ་གནང་བ་དང་སྦྲགས། ནཱ་ལེནྡཱའི་ཆོས་ཆོས་བརྒྱུད་དེ་ཚན་རིག་དང་བར་ཐག་ཉེ་བར་གྱུར་ཡོད་པ་དང་། སརྒྱས་པའི་ཆོས་དེ་དད་པ་ཙམ་གྱི་སྒོ་ནས་ཁ་འདོན་བྱས་ནས་བསྡད་པ་ཡིན་ན་སརྒྱས་པའི་ཆོས་བརྒྱུད་དེ་མི་རབས་གཅིག་གཉིས་ཀྱི་རྗེས་སུ་ཡལ་ངེས་ཡིན་པ་དང་། རྒྱུ་མཚན་དང་རིགས་པའི་ལམ་ནས་དཔྱད་ཞིབ་དང་སློབ་སྦྱོང་གནང་ཚེ་མ་འོངས་པའི་དུས་རབས་གཉིས་དང་གསུམ་གྱི་རིང་ལ་སརྒྱས་པའི་ཆོས་གནས་ཐུབ་ངེས་ཡིན་པ་བཀའ་བསྩལ་བ་དང་ཆབས་ཅིག དུས་ཡུན་དེའི་རྗེས་སུ་གོ་ལའི་ཚ་དྲོད་འཕེལ་བའམ་ཁོར་ཡུག་གིས་རྐྱེན་པས་ཆོས་བརྒྱུད་ལྟ་ཞོགས་འགྲོ་བ་གནས་དང་མི་གནས་ནི་འདྲི་གཞི་ཞིག་རེད་ཅེས་ཞལ་ཤོབ་བཅས་བཀའ་བསྩལ་མཛད་འདུག མགོན་པོ་༸གང་ཉིད་མཆོག་གིས་ཡི་ཤུའི་ཆོས་བརྒྱུད་གཙོས་པའི་འཇིག་རྟེན་བཀོད་པ་པོ་འདོད་མཁན་གྱི་ཆོས་ལུགས་མང་དག་ཅིག་གིས་ང་ཚོ་ཚང་མ་དཀོན་མཆོག་གིས་བཟོས་པ་ཞིག་ཏུ་འདོད་ཀྱི་ཡོད་པ་གཞིགས། འཛམ་བུ་གླིང་འདིའི་ནང་དུ་ཡོད་པའི་མི་ཐེར་འབུམ་བདུན་པོ་དེ་དག་དཀོན་མཆོག་གཅིག་གམ་ཕ་གཅིག་ལས་ཆས་པའི་གཅེན་གཅུང་ཤ་སྟགས་ཡིན་པ་མཚོན་ཀྱི་ཡོད་ཀྱང་ང་ཚོ་དང་ཁོང་ཚོ་ཞེས་ཕྱོགས་ཞེན་རྐྱེན་པས་ཕན་ཚུལ་གསོད་རེས་དང་བརྙས་བཅོས་གཏོང་རེས་བྱེད་བཞིན་པའི་བྱ་སྤྱོད་དེ་དག་ནི་དཀོན་མཆོག་ཅེས་ཁ་ཙམ་ལས་ཕན་ཐོགས་མ་བྱུང་བ་ཞིག་ཡིན་པ་བཀའ་བསྩལ་བ་དང་འབྲེལ། སརྒྱས་པའི་ཆོས་བརྒྱུད་ནང་འཇིག་རྟེན་བཀོད་པ་པོ་དང་དཀོན་མཆོག་འདོད་ཀྱི་མེད་པ་དང་། སྟོན་པ་སངས་རྒྱས་བཅོམ་ལྡན་འདས་ནི་ང་ཚོའི་དགེ་རྒན་ཞིག་ཡིན་པར་མ་ཟད་སརྒྱས་ཀྱི་གསུང་ལ་བརྟེན་ནས་དེར་སློབ་སྦྱོང་དང་བརྟག་དཔྱད་གནང་བའི་བརྒྱུད་འགྲོ་བའི་སྡུག་བསྔལ་དང་མ་རུང་བའི་སེམས་དེ་བཅོས་ཐབས་བྱེད་དགོས་པ་ནི་གལ་ཆེན་ཞིག་ཡིན་པར་ལམ་སྟོན་མཛད་འདུག དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ནས་ཆས་པའི་བོད་བརྒྱུད་ནང་བསྟན་གྱིས་རྒྱུ་མཚན་ལ་དཔྱད་དེ་བརྒྱུད་མ་རུང་བའི་སེམས་དེ་འདུལ་ཐབས་གནང་གི་ཡོད་པ་ནི་དམིགས་བསལ་བ་ཅིག་ཡིན་པ་དང་། མགོན་པོ་༸གང་ཉིད་མཆོག་གིས་དུས་རྟག་ཏུ་སརྒྱས་པའི་ཆོས་བརྒྱུད་ཀྱི་གཞི་མ་ནི་པཱ་ལིའི་ཆོས་བརྒྱུ་ཡིན་པ་དང་། ནཱ་ལེནྡཱའི་ཆོས་བརྒྱུད་ནི་རྒྱུ་མཚན་ལ་བརྟེན་ནས་ཉམས་ལེན་བྱ་རྒྱུ་དེ་ཡིན་སྐོར་བཀའ་བསྩལ་བ་དང་ཆབས་གཅིག  ནཱ་ལེནྡཱའི་ཆོས་ཆོས་བརྒྱུད་འཛིན་མཁན་ཞིག་གི་ངོས་ནས་དུས་ནམ་ཡང་རེད་རེད་ཅེས་པའི་སྒོ་ནས་ཁས་ལེན་མི་བྱེད་པར་ཅིའི་ཕྱིར་ཞེས་རྒྱུ་མཚན་དང་རིགས་པའི་ལམ་ནས་འཇུག་དགོས་གལ་ཡིན་པ་བཀའ་བསྩལ་ཡོད་པ་རེད། མགོན་པོ་༸གང་ཉིད་མཆོག་གིས་མཇུག་ཏུ་བཇལ་བཅར་བ་རྣམས་ལ་༸དཔལ་མགོན་འཕགས་པ་ཀླུ་གྲུབ་ཀྱིས་མཛད་པའི་རྩ་བ་ཤེས་རབ་དང་དབུ་མ་འཇུག་པ་རྣམས་རྒྱ་སྐད་ཏུ་ཡོད་པ་ལྟར། དེ་དག་ཁ་འདོན་བྱ་རྒྱུ་ཙམ་མིན་པར་སློབ་སྦྱོང་བྱེད་དགོས་པ་དང་། སློབ་གཉེར་གནང་སྐབས་དང་ཐོག་མཁྲེགས་པོ་ཚོར་སྲིད་ཀྱང་ཡང་ནས་ཡང་ཏུ་ལྟ་ཀློག་དང་སློབ་སྦྱོང་གནང་བ་དེས་རིམ་བཞིན་གོ་བ་རྙེད་རྒྱུ་ཡོད་པ་དང་དེ་བཞིན་ཕན་ཐོགས་ཀྱང་ཆེན་པོ་ཡོད་པ་བཀའ་བསྩལ་བ་དང་སྦྲགས། སརྒྱས་པའི་ཆོས་ལ་སློབ་སྦྱོང་བྱེད་མཁན་ཞིག་ཡིན་ཕྱིན་ཆད་རང་ཉིད་ཀྱི་སྟོན་པ་སརྒྱས་བཅོམ་ལྡན་འདས་དང་དཔལ་ནཱ་ལེནྡཱའི་མཁས་པ་རྣམས་ཀྱི་སློབ་མ་ཞིག་ཡིན་བསམ་དགོས་པར་བཀའ་བསྩལ་མཛད་ཡོད།

ཨོ་སི་ཊོ་ལོ་ཡའི་ནང་དུ་ལོ་རྒྱུས་ཁྲོད་མེའི་གོད་ཆག་ཚབས་ཆེན་ཕོག་པའི་རྐྱེན་གྱིས་མི  ༢༠ ལྷག་གི་ཚེ་སྲོག་ཤོར་བ་མ་ཟད་རི་དྭགས་སྲོག་ཆགས་ས་ཡ་ ༥༠༠ ལྷག་གི་ཚེ་སྲོག་ཤོག་བའི་ཆེས་ཛ་དྲག་གི་གནས་སྟངས་ཆགས་ཡོད་པ་ལྟར། དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་བཀའ་ཆོས་ཉིན་མཐའ་མའི་ཐོག་མེའི་འཇིག་པའི་གོད་ཆག་ཚབས་ཆེན་ཕོག་པར་ཐུགས་འཚབ་ཡོད་པའི་བཀའ་སློབ་བསྩལ་འདུག ༸གོང་ས་མཆོག་གིས་དེ་རིང་འཇམ་དབྱངས་ཆོས་འཁོར་ལས་ཆོས་རྒྱལ་ཕྱི་ནང་གསང་གསུམ་གྱི་རྗེས་གནང་བཀའ་དྲིན་སྩོལ་བཞིན་པའི་ཁྲོད་འཛམ་བུ་གླིང་འདིའི་ཐོག་དཀའ་ངལ་མང་དག་ཅིག་མིས་བཟོས་པ་ཞིག་ཡིན་པ་དང། དེའི་ཁྲོད་གོ་ལའི་ཚ་དྲོད་འཕེལ་བའི་རྐྱེན་གྱིས་ས་ཆ་ཁ་ཤས་ནང་དུ་ཆུའི་འཇིག་པའི་དབང་གིས་ཆུ་ལོག་གི་ངལ་བ་དང་། ད་ལྟ་ཨོ་སི་ཊོ་ལི་ཡ་ལྟ་བུར་ཚ་དྲོད་རྒྱས་ཏེ་མེ་སྐྱོན་གྱི་དཀའ་ངལ་ཆེས་ཛ་དྲག་འཕྲད་བཞིན་པའི་འོག་མི་དང་སྲོག་ཆགས་ས་ཡ་མང་པོའི་ཚེ་སྲོག་ཤོར་བར་ཐུབས་འཚབ་ཡོད་པའི་བཀའ་བསྩལ་བ་དང་སྦྲགས་ཏེ་ཚང་མས་བསྔོ་སྨོན་གསུང་འདོན་གནང་དགོས་པ་མ་ཟད་སླད་མར་ངལ་བ་དེ་ལྟར་མི་འཕྲད་པའི་ཆེད་དུ་ཁོར་ཡུག་ཐོག་ཐུགས་སྣང་གནང་གནད་ཡིན་པའི་ལམ་སྟོན་བཀྲིན་ཆེ་བ་བསྩལ་ཡོད། དེ་རིང་རྒྱལ་སྤྱིའི་བརྒྱུད་ལམ་ཁག་གིས་གནས་ཚུལ་སྤེལ་བར་སྤྱིར་ལོ་ལྟར་ཨོ་སི་ཊོ་ལི་ཡ་ནང་དུ་ད་ལྟའི་དུས་ཚོད་སྐབས་སུ་མེའི་འཇིག་པ་གོད་ཆག་འཕྲད་ཀྱི་ཡོད་ཀྱང། ཐེངས་འདིའི་མེ་སྐྱོན་ནི་རྣམ་ཀུན་མེའི་འཇིག་པ་དང་མི་འདྲ་བར་དུས་ཚོད་གང་ཙམ་སྔོན་དུ་བྱུང་བ་དང་། ཨོ་སི་ཊོ་ལི་ཡ་ནང་གི་མངའ་སྡེ་འདྲ་མིན་དྲུག་ཙམ་ནང་གི་ས་ཁོངས་ཁྱོན་ Acre ས་ཡ་ ༡༤ ཙམ་ཚུད་པའི་འོག་མིའི་སྡོད་ཁྱིམ་ ༡༥༠༠ ལྷག་མེས་འཚིགས་ཡོད་པ་མ་ཟད། མི་ ༢༠ ལྷག་རྐྱེན་འདས་སུ་གྱུར་བ་དང་མང་པོ་ཞིག་གར་སོང་ཆ་མེད་དུ་གྱུར་འདུག དེ་བཞིན་རི་དྭགས་སྲོག་ཆགས་ས་ཡ་ ༥༠༠ ལྷག་གི་ཚེ་སྲོག་ཤོག་བའི་ཆེས་ཛ་དྲག་གི་གནས་སྟངས་གྱུར་ཡོད་པ་རེད། ལོ་ཤས་སྔོན་ནས་དབུ་འཛུགས་གནང་བའི་བོད་མི་ཆབ་སྲིད་བཙོན་པ་དང་དེ་དག་གི་འབྲེལ་ཆགས་ནང་མི་གཞིས་སྤོས་ཀྱི་ལས་ཆར་སོགས་ཀྱི་ཁྲོད་དེང་སྐབས་ཨོ་སི་ཊོ་ལི་ཡ་ནང་དུ་བོད་མི་མང་དག་ཅིག་བཅའ་སྡོད་གནང་བཞིན་ཡོད་སྟབས། རླུང་འཕྲིན་ཁང་གིས་དེ་རིང་ཨོ་སི་ཊོ་ལི་ཡའི་སྐུ་ཚབ་དོན་གཅོད་ལྷག་པ་མཚོ་སྒོ་ལགས་སུ་ཞལ་པར་བརྒྱུད་དེ་ད་ལྟའི་མེ་སྐྱོན་གྱི་གནས་སྟངས་དང་ལྷག་པར་དུ་བོད་མི་རྣམས་ལ་གནོད་སྐྱོན་ཕོག་ཡོད་མེད་སོགས་དང་འབྲེལ་བའི་བཀའ་འདྲི་ཁག་གཅིག་ཞུས་པར་ཁོང་གིས་ད་ལྟའི་ཆར་ Victoria ས་ཁུལ་ནང་དུ་བོད་པའི་ཁྱིམ་ཚང་གཅིག་ལ་མེ་སྐྱོན་ཤོར་བ་མ་གཏོགས་དེ་མིན་བོད་མི་རྣམས་ལ་མེའི་གོད་ཆག་གང་ཡང་ཕོག་མེད་སྐོར་གསུངས་སོང་། རྩ་བའི་དེང་སྐབས་ America ནང་གི་དང་བླངས་མེ་གསོད་རུ་ཁག་ Australia ནང་དུ་ཕྱག་རོགས་གནང་བར་ཆེད་སྐྱོད་གནང་བཞིན་ཡོད་པར་མ་ཟད་འཛམ་གླིང་གི་ཡུལ་གྲུ་གང་ས་ནས་ཨོ་སི་ཊོ་ལི་ཡར་གདུང་སེམས་མཉམ་བསྐྱེད་དང་དཔལ་འབྱོར་གྱི་རོགས་རམ་སོགས་གནང་ཐབས་གནང་མུས་རེད་འདུག

དེ་རིང་ཕྱི་ལོ་ ༢༠༢༠ ལོ་ཟླ་ ༡ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་གྱི་བཀའ་ཆོས་དང་བཀའ་དབང་མཇུག་སྒྲིལ་མཛད་བསྟུན་ངོས་ལ་དགའ་མོས་བྱེད་མཁན་ཚོས་ངོས་ཀྱིས་བཤད་པ་རྣམས་སེམས་ལ་བཟུང་སྟེ་ལག་བསྟར་བྱེད་དགོས་ཞེས་བཀའ་བསྩལ་སོང་། ༸གོང་ས་མཆོག་གིས་དེ་རིང་འཇམ་དབྱངས་ཆོས་འཁོར་ལས་ཆོས་རྒྱལ་ཕྱི་ནང་གསང་གསུམ་གྱི་རྗེས་གནང་བསྩལ་བ་དང་སྦྲགས་ཏེ་བསྟན་པ་སྤྱི་མཚན་དང་གང་ཟག་དགོས་ཚན་གྱི་ངོ་སྤྲོད་བསྩལ་བ་མ་ཟད་ང་ཚོ་ཚང་མས་དུས་ནས་དུས་སུ་སེམས་ཅན་ཐམས་ཅད་ལ་ཕན་བཏགས་ཕྱིར་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བ། དེ་བཞིན་བསྟན་པ་སྤྱི་མཚན་ཉམས་ལེན་གནང་དགོས་པ་དང་། ལྷག་པར་དུ་རིམ་བཞིན་ཤེར་རབ་ཀྱི་གྲོགས་དང་སྟོང་རྟེན་འབྱུང་གི་ལྟ་བར་བསམ་བློ་བཏང་ནས་གཞན་ཕན་བསྒྲུབ་དགོས་པའི་ལམ་སྟོན་མཛད་ཡོད། ༸གོང་ས་མཆོག་གིས་གོ་ལའི་ཚ་དྲོད་ཇེ་ཆར་འཕེལ་བཞིན་པའི་ཁྲོད་འགྲོ་བ་མི་དང་དུད་འགྲོ་སེམས་ཅན་དག་ལ་དཀའ་ངལ་མང་དག་ཅིག་འཕྲད་བཞིན་པའི་གནད་དོན་ཁག་ལ་ཐུགས་འཚབ་ཡོད་པ་བཀའ་བསྩལ་བ་དང་ཆབས་ཅིག་ཏུ་ང་ཚོས་དེ་འབྲེལ་འཕྲད་པའི་ངལ་བ་ཁག་མི་བྱུང་བར་རྣམ་ཀུན་ནས་ཁོར་ཡུག་ཐོག་ལ་ཐུགས་སྣང་གནང་གནད་ཡིན་པའི་ལམ་སྟོན་བཀྲིན་ཆེ་བ་བསྩལ་ཡོད། མགོན་པོ་༸གང་ཉིད་མཆོག་གིས་ང་ཚོས་རྒྱུན་དུ་རང་ཉིད་ཀྱི་སེམས་རྒྱུད་མ་ཞི་བ་དེ་རིམ་པས་ཞི་བར་བཟོ་ཐབས་དང་། ལྷག་པར་དུ་མགོན་པོ་༸གང་ཉིད་མཆོག་ལ་དགའ་མོས་བྱེད་མཁན་ཚོས་ངོས་ཀྱིས་བཤད་པ་རྣམས་སེམས་ལ་བཟུང་སྟེ་ལག་བསྟར་བྱེད་དགོས་པ་ལས་༸གོང་ས་མཆོག་གི་༸སྐུ་པར་ལ་སྐྱབས་སུ་མཆིས་ཞེས་བརྗོད་པ་ཙམ་ལས་དེ་མིན་བཀའ་གང་བསྩལ་བ་རྣམས་ལ་ཉམས་ལེན་མ་གནང་ཚེ་ཕན་ཐོགས་དེ་ཙམ་མེད་སྐོར་བཀའ་ནན་བསྩལ་སོང་། ༸གོང་ས་མཆོག་གིས་ད་དུང་བོད་གངས་ཅན་ལྗོངས་འདིར་སངས་རྒྱས་ཀྱི་མདོ་སྔགས་ཟུང་འབྲེལ་གྱི་བསྟན་པ་དར་ཁྱབ་བྱུང་བ་ཅིག་ཆགས་ཡོད་པ་དང་སྒོས་ནང་པ་མིན་པ་རྣམ་དཔྱོད་ཅན་གྱི་མི་མང་པོས་དེར་ཡིད་དབང་འཕྲོག་ནས་དོ་སྣང་གནང་གི་ཡོད་པ་ལྟར། བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་དེ་བོད་ཙམ་མ་ཡིན་པར་ནང་པའི་ཡུལ་གྲུ་ཡོངས་ལ་ཁྱབ་ཐུབ་པའི་ནུས་པ་ལྡན་ཡོད་པ་དང་བསྟན་པ་དེ་ཡུན་རིང་གནས་ནས་འགྲོ་བ་ཡོངས་ལ་ཕན་པའི་ཐུགས་སྨོན་མཛད་ཀྱི་ཡོད་པ་ལྟར་ཆོས་ཞུ་བ་ཚོས་ཀྱང་དེ་ལྟར་སྨོན་ལམ་གནང་དགོས་པ་བཀའ་བསྩལ་ཡོད། གཞི་རྩའི་༸གོང་ས་མཆོག་གིས་རྡོར་གདན་གྱི་ཆོས་འབྲེལ་དེ་ཟླ་ ༢ ཚེས་ ༢ ནས་དབུ་འཛུགས་གནང་བ་དང་། སྐབས་དེར་མགོན་པོ་༸གང་ཉིད་མཆོག་གིས་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་དང་། ཕྱི་ཚེས་ ༣ ཉིན་སྤྱན་རས་གཟིགས་ཀྱི་བཀའ་དབང་དེ་བཞིན་ཕྱི་ཚེས་ ༤ ཉིན་འདས་ལོར་བསྩལ་བའི་འཇམ་དབྱངས་ཆོས་འཁོར་གྱི་འཕྲོ་སྐྱོ་འཇམ་དཔལ་ནང་སྒྲུབ་དང་། སྒྲོལ་དཀར་རྗེ་གནང་། ཁ་སང་ཚེས་ ༥ ཉིན་༸རྗེ་བཙུན་མ་ནག་མའི་བཀའ་དབང་བསྩལ་ཡོད་པ་རེད། གནས་ཚུལ་ཤེས་རྟོགས་བྱུང་བར་གཞིགས་ན་༸གོང་ས་མཆོག་ཕྱི་ཚེས་ ༡༦ འམ་ ༡༧ ཉིན་གྷ་ཡ་ནས་བྷི་ཧཱར་གྱི་གྲོང་ཁྱེར་པཊ་ན་དང་། དེ་བཞིན་པཊ་ན་ནས་མཁའ་ལམ་བརྒྱུད་རྒྱལ་ས་ལྡི་ལི་དང་། དེ་རྗེས་བཞུགས་སྒར་དུ་ཆིབས་༸ཞལ་བསྒྱུར་གནང་མཛད་རྒྱུ་རེད་འདུག

དེ་རིང་སྔ་དྲོ་ཚོུད་ ༨ ཡོལ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་གྱི་དུས་འཁོར་ཐང་ཆེན་དུ་ཕྱི་ནང་གི་དད་ལྡན་ཆོས་ཞུ་བ་ ༣༠༠༠༠ ལྷག་ལ་འདས་ལོར་བསྩལ་བའི་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་འཕྲོ་སྐྱོང་མཛད་སོང་། ༸གོང་ས་མཆོག་གི་བཀའ་ཆོས་འདིའི་ཐོག་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་བྱེས་ཀྱི་གདན་ས་ཆེན་པོ་གསུམ་གྱིས་གཙོས་པའི་དགོན་སྡེ་གྲྭ་ཚང་ཁག་གི་གྲྭ་བཙུན་དང་འདི་བཞིན་ཁྱིམ་པ་ཕོ་མོ་མང་དག་ཅིག་བཀའ་ཆོས་ཞུ་བར་ཆེད་བཅར་ཞུས་ཡོད་པ་དང་བསྟུན་མགོན་པོ་༸གང་ཉིད་མཆོག་གིས་རྡོ་རྗེ་གདན་གྱི་གནམ་གཤིས་ཧ་ཅང་གྲང་ངར་ཆེ་བ་འདིས་ལྷོ་ཕྱོགས་ནས་བཅར་བའི་ཆོས་ཞུ་བ་ཚོར་ཆེད་མངགས་དགའ་བསུ་ཞུ་གི་ཡོད་ཅེས་ཞལ་ཤོབ་མཛད་པ་དང་སྦྲགས་ཏེ་ད་རེས་རྗེས་གནང་བསྩལ་བ་འདི་དྲྭ་རྒྱ་བརྒྱུད་དེ་ཡུལ་ལུང་མང་པོ་ཞིག་ཏུ་ཐད་སྲིང་འགྲོ་བཞིན་ཡོད་སྟབས་མི་རིགས་འདྲ་མིན་མང་པོས་ཐུགས་སྣང་ཆེན་པོས་གསན་གཟིགས་གནང་གི་ཡོད་པས་བླ་མའི་ངོས་ནས་ཕན་སེམས་ཀྱི་འདུན་པ་བཏང་བ་བཞིན་ཆོས་དད་ཅན་རྣམས་ཀྱིས་ཀུན་སློང་དྲགས་པོས་གསན་གཟིགས་གནང་ཚེ་དེ་དག་ལ་བྱིན་རླབས་འཐོབ་ངེས་ཡིན་པའི་བཀའ་བཞེས་བཟང་པོ་སྨིན་བསྩལ་མཛད་ཡོད། དེ་བཞིན་༸གོང་ས་མཆོག་གིས་ཆོས་ཞུ་བ་སུམ་ཁྲི་ལྷག་ལ་རྗེས་གནང་གི་སྤྱི་བཤད་དང་འབྲེལ་ཏེ་རང་ཚོའི་རྒྱུད་ལ་ཡོད་པའི་བློ་འདི་ཐོག་མ་ཉིད་ནས་སྡུག་བསྔལ་མི་འདོད་པ་དང་བདེ་བ་འདོད་པ་ཞིག་ཡིན་ཀྱང་སྡུག་བསྔལ་སེལ་ཐབས་ལ་དོ་སྣང་གནང་གི་མེད་པ་དང་སྒོས་བདེ་སྡུག་མྱོང་མཁན་གཙོ་བོ་དེ་ཡིད་བློ་ཡིན་པར་བཀའ་བསྩལ་སོང་བ་མ་ཟད། ང་ཚོའི་ངོས་ནས་སྟོན་པ་བཅོམ་ལྡན་འདས་དང་དཔལ་མགོན་ཀླུ་སྒྲུབ་ཡབ་སྲས་སོགས་ལ་སྐྱབས་སུ་འགྲོ་གྱི་ཡོད་པ་ལྟར་སྐྱབས་སུ་འགྲོ་ས་དེ་དག་དག་པའི་གཞན་གཅེས་པའི་བྱང་ཆུབ་སེམས་ཉམས་བཞེས་གནང་སྟེ་སྤངས་རྟོགས་མཐར་ཕྱིན་པ་གྱུར་ཡོད་སྟབས་གནས་ཁྱད་པར་ཅན་འདིར་ཆོས་གྲོགས་མང་པོ་ཞིག་འདུས་ཡོད་པ་ཁྱེད་རང་ཚོས་དུས་དེ་རིང་ནས་བཟུང་སྟེ་བྱང་ཆུབ་ཀྱི་སེམས་བསྐྱེད་ཐོག་མི་ཚེ་འདི་ནས་ས་ལམ་གྲོལ་རྒྱུར་འབད་གནད་ཡིན་པ་ལམ་སྟོན་བཀྲིན་ཆེ་བ་བསྩལ་ཡོད། རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ནས་དབུ་འཛུགས་ཀྱིས་གནངས་ཕྱི་ཚེས་ ༦ བར་འཇམ་དབྱངས་ཆོས་སྐོར་འཕྲོ་སྐྱོང་མུ་མཐུད་མཛད་རྒྱུ་ཡིན་པ་རེད།