དེ་རིང་ཕྱི་ཚེས་ ༧ ཉིན་ལ་དྭགས་སུ་ Climate Cup ཞེས་གནམ་གཤིས་ཕོར་པའི་རྐང་སྤོལ་རྩེད་འགྲན་གྱི་ཆེས་མཐའ་མའི་འགྲན་བསྡུར་གནང་སྐབས་བོད་རྒྱལ་ཡོངས་རྐང་སྤོལ་རུ་ཁག་ཨང་རིམ་གཉིས་པ་སོན་ཡོད།
རྩེད་འགྲན་དེ་ཟླ་ ༩ ཚེས་ ༡ ནས་དབུ་འཛུགས་ཀྱིས་དེ་རིང་བར་ཉིན་གྲངས་བདུན་གྱི་རིང་གནང་ཡོད་པ་དང་། དེ་རིང་ཆེས་མཐའ་མའི་རྩེད་འགྲན་ཁྲོད་བོད་རྒྱལ་ཡོངས་རྐང་སྤོ་རུ་ཁག་དང་ལྡི་ལི་རྐང་སྤོལ་རུ་ཁག་གཉིས་དབར་རྩེད་འགྲན་གནང་སྟེ། སྤོ་ལོ་ ༦ དང་ ༠ བཅས་མཐའ་མའི་རྒྱལ་ཁ་དེ་ལྡི་ལི་རྐང་སྤོལ་རུ་ཁག་ལ་ཐོབ་ཡོད་པ་དང་། བོད་རྒྱལ་ཡོངས་རྐང་རྩེད་སྤོ་ལོ་རུ་ཁག་ཨང་གཉིས་པ་སོན་སྟབས་རུ་ཁག་ལ་ལེགས་གསོའི་བྱ་དགའ་ཧིན་སྒོར་འབུམ་གཉིས་གནང་ཡོད།
རྩེད་འགྲན་གྱི་ཉིན་མཐའ་མའི་མཛད་སྒོ་ཐོག་སྐུ་མགྲོན་གཙོ་བོ་མངའ་སྡེའི་སྲིད་སྐྱོང་གཞོན་པ་སྐུ་ཞབས་ Dr. B D Mishra མཆོག་དང་ལ་དྭགས་གླེ་རང་སྐྱོང་རི་ལྗོངས་ལྷན་ཚོགས་ཀྱི་སྡེ་དཔོན་བཀྲ་ཤིས་རྒྱལ་མཚན་ལགས། རྒྱ་གར་གྱི་རྐང་སྤོལ་རྩེད་འགྲན་པ་གྲགས་ཅན་ Bhaichung Bhutia ལགས། དེ་བཞིན་ཇམ་མུ་དང་ཀཤ་མིར། ལ་དྭགས་ཁུལ་དུ་ཕྱོགས་སྐྱོད་བོད་མི་མང་སྤྱི་འཐུས་གསུམ་གཙོས་ ཁུལ་དེའི་གནད་ཡོད་མི་སྣ་དང་རྩེད་འགྲན་པ། དེ་བཞིན་གཟིགས་མོ་བ་བཅས་ཕེབས་འདུག
སྐབས་དེར་སྐུ་མགྲོན་གཙོ་བོ་མངའ་སྡེའི་སྲིད་སྐྱོང་གཞོན་པ་སྐུ་ཞབས་ Dr. B D Mishra མཆོག་གིས་ལ་དྭགས་ཁུལ་དུ་གནམ་གཤིས་ཕོར་པ་ཞེས་ལོ་རྒྱུས་རང་བཞིན་ལྡན་པའི་རྩེད་འགྲན་ཞིག་འགོ་འཛུགས་གནང་ཡོད་པ་དང་འབྲེལ། གཞོན་སྐྱེས་ཚོའི་ངོས་ནས་རྩེད་རིགས་ལ་དོ་སྣང་གནང་དགོས་གལ་དང་། ཁུལ་དེར་གནས་སྡོད་མི་མང་ཚོའི་ངོས་ནས་སླད་མར་དེ་ལྟར་རྒྱབ་སྐྱོར་གནང་དགོས་པ་སོགས་གསུངས་སོང་།
ལ་དྭགས་གླེ་རང་སྐྱོང་རི་ལྗོངས་ལྷན་ཚོགས་ཀྱི་སྡེ་དཔོན་བཀྲིས་རྒྱལ་མཚན་ལགས་ཀྱིས་ Climate Cup ཞེས་གནམ་གཤིས་ཕོར་པའི་རྩེད་འགྲན་གོ་སྒྲིག་གནང་དོན་ནི། དེང་གི་འཆར་འཛམ་གླིང་ཁྱོན་ཡོངས་སུ་ཚ་དྲོད་རྒྱས་བཞིན་པ་དང་ལྷག་པར་ལ་དྭགས་སུ་དེའི་མཇུག་འབྲས་མངོན་གསལ་ཡོད་སྟབས། ཁུལ་འདི་ནས་གོ་ལའི་གནམ་གཤིས་འགྱུར་ལྡོག་ལ་བརྡ་ལན་དང་གོ་རྟོགས་སྤེལ་ཆེད་རྩེད་འགྲན་དེ་གོ་སྒྲིག་གནང་བ་ཞིག་ཆགས་ཡོད་ཅེས་དང་། གནད་དོན་དེའི་ཐོག་འཛམ་གླིང་གི་འགྲོ་བ་ཀུན་ནས་ཐུགས་སྣང་རྒྱ་ཆེར་གནང་དགོས་གལ་ཡིན་པར་གསུངས་སོང་།
ཁོང་གིས་ད་དུང་རྩེད་འགྲན་འདི་ནི་ལ་དྭགས་ཁུལ་གྱི་གཞོན་སྐྱེས་རྣམས་ལ་རྩེད་རིགས་གོ་སྐབས་དང་དོ་སྣང་བསྐྲུན་ཆེད་ཡིན་པ་དང་། ལྷག་པར་དུ་རྩེད་འགྲན་པ་རྣམས་ཀྱི་རྩེད་གོས་མཚོན་པའི་ཅ་དངོས་མང་པོ་ཞིག་བསྐྱར་བཟོ་གནང་བ་ཆགས་ཡོད་ཅེས་སོགས་གསུངས་ཡོད།
རྩ་བའི་ཐེངས་འདིའི་རྐང་སྤོལ་རྩེད་འགྲན་ནང་བོད་རྒྱལ་ཡོངས་རྐང་སྤོལ་རུ་ཁག་དང་། UT Ladakh ཞེས་དབུས་འཛིན་མངའ་ཁུལ་ལ་དྭགས་རུ་ཁག དེ་བཞིན་ལ་དྭགས་རྐང་སྤོལ་རུ་ཁག ལྡི་ལི་རྐང་སྤོལ་རུ་ཁག་བཅས་རུ་ཁག་བཞི་ནས་མཉམ་ཞུགས་གནང་ཡོད་པ་དང་། རྩེད་འགྲན་དེ་ནི་ལ་དྭགས་དབུས་གཞུང་མངའ་སྡེའི་འཛིན་སྐྱོང་དང་ལ་དྭགས་གླེ་རང་སྐྱོང་རི་ལྗོངས་ཡར་རྒྱས་ལྷན་ཚོགས་གཉིས་ནས་གོ་སྒྲིག་གནང་ཐོག་ལ་དྭགས་རྐང་སྤོལ་རྩེད་རིགས་ཚོགས་པའི་ཐུགས་འགན་བཞེས་ཏེ་གླེ་དཔེ་ཐུབ་རྩེད་རར་གོ་སྒྲིག་གནང་བ་ཞིག་ཆགས་ཡོད།
