རྒྱ་གར་ Maharashtra མངའ་སྡེའི་ Solapur རྫོང་ཁོངས་སུ་ཆགས་པའི་ Paritewadi གྲོང་གསེབ་ཀྱི་གཞི་རིམ་འོག་མའི་དགེ་རྒན་ལོ་ན་ ༣༢ སོན་པ་སྐུ་ཞབས་ Ranjit Sinh Disale ལགས་ཀྱིས་བུད་མེད་ཀྱི་ཤེས་ཡོན་གོང་མཐོར་སླད་ཕྱག་ལས་གནང་བ་སོགས་ལ་བརྟེན་ཁོང་ལ་འདི་ལོའི་ Global Teacher Prize ཞེས་གོ་ལའི་ཁྱད་དུ་འཕགས་པའི་དགེ་བའི་བཤེས་གཉེན་གྱི་བྱ་དགའ་ཐོབ་ཡོད་སྟབས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་གི་ལས་དོན་དག་ལ་ཡི་རང་བསྔགས་བརྗོད་ཀྱི་འཚམས་འདྲིའི་གསུང་འཕྲིན་ཞིག་སྩལ་འདུག
༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་དེའི་ནང་སྐུ་ཞབས་ Ranjit ལགས་ལ་གོ་ལའི་ཁྱད་དུ་འཕགས་པའི་དགེ་བའི་བཤེས་གཉེན་གྱི་བྱ་དགའ་ཐོབ་པ་དང་བྱ་དགའི་དངུལ་འབོར་ཕྱེད་ཀ་འགྲན་བསྡུར་ཁོངས་སུ་ཡོད་པའི་དགེ་བའི་བཤེས་གཉེན་གཞན་ལ་ཕུལ་རྒྱུའི་ཐག་གཅོད་གནང་བར་ཡི་རང་བསྔགས་བརྗོད་མཛད་འདུག
མགོན་པོ་༸གང་ཉིད་མཆོག་གིས་གཞོན་སྐྱེས་ལ་སློབ་སྦྱོང་གནང་རྒྱུ་དང་ལྷག་པར་དུ་དབུལ་ཕོངས་དང་དཔལ་འབྱོར་ཞན་པ་ཚོར་དེ་འབྲེལ་གྱི་སློབ་ཁྲིད་གནང་རྒྱུ་ནི་ཁོང་ཚོར་རོགས་རམ་གནང་རྒྱུའི་ཐབས་ལམ་ལེགས་ཤོས་ཤིག་ཡིན་པ་དང་ཕྱོགས་མཚུངས་དེས་འཛམ་བུ་གླིང་བཟང་ཕྱོགས་སུ་སྐྲུན་ཐབས་ལའང་ལེགས་སྐྱེས་ཡག་ཤོས་ཡིན་པར་ལམ་སྟོན་བཀའ་སྩལ་འདུག
མགོན་པོ་༸གང་ཉིད་མཆོག་གིས་ཁོང་ནས་རྒྱ་གར་སྤྱི་ཚོགས་ནང་སློབ་སྦྱོང་གི་གོ་སྐབས་མ་ཐོབ་པའི་བུ་མོ་རྣམས་སློབ་གྲྭར་བསྐྱོད་བཅུག་རྒྱུ་དང་ཤེས་ཡོན་གྱི་མཐུན་རྐྱེན་སྦྱོར་རྒྱུ། དེ་བཞིན་རྒྱལ་ཁབ་ ༨༣ ལྷག་གི་སློབ་ཕྲུག་ལ་དྲ་ཐོག་བརྒྱུད་ཚན་རིག་སློབ་ཁྲིད། རྩོད་རྙོག་ཅན་གྱི་ས་ཁུལ་དུ་ཡོད་པའི་ན་གཞོན་དབར་འབྲེལ་ལམ་བཟོ་རྒྱུའི་ལས་འཆར་རྣམས་སྙིང་རྗེ་དངོས་སུ་ལག་བསྟར་གྱི་དཔེ་མཚོན་ཞིག་ཡིན་པར་བཀའ་སྩལ་འདུག་པ་མ་ཟད། སྐུ་ཞབས་ Ranjit ལགས་ཀྱིས་ང་ཚོ་མཉམ་རུབ་ཀྱིས་སྤྱི་ཚོགས་ནང་ཁྱད་པར་བཟོ་ཐུབ་ཀྱི་རེད་ཅེས་གསུངས་པ་ནི་དོན་དམ་གྱི་བཀའ་མོལ་ཞིག་ཡིན་པ་དང་། ཁོང་གི་ཁྱད་དུ་འཕགས་པའི་ཕྱག་ལས་དེས་གཞན་ལ་སེམས་འགུལ་ཐེབས་རྒྱུ་ཡིན་པ་བཀའ་སྩལ་འདུག
གཞི་རྩའི་ཁྱད་དུ་འཕགས་པའི་དགེ་རྒན་གྱི་བྱ་དགའ་དེ་དབྱིན་ཡུལ་དུ་ཡོད་པའི་ Varkey Foundation ཐེབས་རྩ་ཁང་གིས་གོ་སྒྲིག་གནང་དོན་ལྟར་ཐེངས་འདིའི་ཁྱད་དུ་འཕགས་པའི་དགེ་རྒན་གྱི་བྱ་དགར་འགྲན་ཞུགས་གནང་མི་ཁོངས་སུ་རྒྱལ་ཁབ་ ༡༤༠ ཁྲོད་དགེ་རྒན་གྱི་ལས་རིགས་གཉེར་མཁན་མི་གྲངས་ ༡༢༠༠༠ ཡོད་པ་རེད། 
ད་རེས་སྐུ་ཞབས་རན་ཇིཏ་ལགས་སུ་བྱ་དགའ་དང་ལྷན་དུ་ཨ་སྒོར་ས་ཡ་གཅིག་ཐོབ་ཡོད་པ་རེད། ཁོང་ལ་བྱ་དགའ་དེ་ལྟར་ཐོབ་པ་ནི་རྒྱ་གར་ནང་ནས་ཆེས་ཐོག་མར་ཆགས་ཀྱི་འདུག སྐུ་ཞབས་ཁོང་གིས་བྱ་དགའི་དངུལ་འབོར་ཕྱེད་ཀ་དེ་ཁོང་གི་ཕྱག་སྦྲེལ་དགེ་རྒན་གཞན་ཚོར་ཕུལ་ཚེ་དེས་ཁོང་རྣམ་པས་ཕྱག་ལས་འཕར་མ་གཉེར་རྒྱུར་ཐུགས་ཕན་གསོས་ངེས་རེད་ཅེས་ཐུགས་རེ་གནང་གི་འདུག
སྐུ་ཞབས་ Ranjitsinh Disale ལགས་ལ་ཁྱད་འཕགས་དགེ་རྒན་གྱི་བྱ་དགའ་ཐོབ་པར་འཚམས་འདྲི་སྩལ་བ།
Tibetan News Headlines
- Dalai Lama arrives in New York City for a knee treatment
- Tibetan spiritual leader commends PM Modi on inauguration of new Nalanda university campus
- Tibetans mark World Music Day with celebration of banned music in Tibet
- CTA organizes inaugural Tibetan Arts and Craft Festival in Dharamshala
- Governing body meetings of Sambhota Tibetan schools society convenes in Mussoorie
- Taiwan unites to reject China’s dangling of death sentence threat before ‘hardline separatists’
རེས་གཟའ་ཟླ་བ། ༢༠༢༤།༠༦།༢༤
- ༸གོང་ས་མཆོག་ཞབས་པུས་སྨན་བཅོས་སླད་ཨ་རིར་ཞབས་སོར་བདེ་བར་འཁོད་པ།
- ༸གོང་ས་མཆོག་གིས་སྲིད་བློན་མོ་དྷི་མཆོག་ལ་ Nalanda གཙུག་ལག་སློབ་གཉེར་ཁང་གསར་པ་དབུ་འབྱེད་ཐོག་འཚམས་འདྲི་མཛད་པ།
- བོད་ནང་གི་གཞས་པ་རྣམས་ལ་གདུང་སེམས་མཉམ་བསྐྱེད་བརྒྱུད་འཛམ་གླིང་རོལ་དབྱངས་ཉིན་མོ་སྲུང་བརྩི།
- བཞུགས་སྒར་དྷ་རམ་ས་ལར་བོད་ཀྱི་བཟོ་རིག་སྒྱུ་རྩལ་འགྲེམས་སྟོན་ཐེངས་དང་པོ་ཚོགས་པ།
- སཾ་བྷོ་ཊ་བོད་སློབ་ཚོགས་པའི་འགན་འཛིན་ལྷན་ཚོགས་ཐེངས་དགུ་པ་དང་བཅུ་བདུན་གཉིས་སྐོང་ཚོགས།
- རྒྱ་ནག་གིས་ཐའེ་ཝན་རང་བཙན་རྩོད་ལེན་པར་སྲོག་ཁྲིམས་གཅད་རྒྱུའི་ཁྲིམས་ཡིག་ལམ་སྟོན་སྤེལ་བར་ཐའེ་ཆབ་སྲིད་ཚོགས་པ་དབྱེས་མེད་ཀྱིས་རྐྱེོན་བརྗོད་གནང་བ།
