༸གོང་ས་མཆོག་གིས་དྲྭ་ཐོག་བརྒྱུད་མཛད་འཆར་འཕྲིན་ཁག་ཅིག་བསྐྱང་གཏན་འཁེལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་ནས་བཞུགས་སྒར་༸རྒྱལ་བའི་གཟིམ་ཁང་ནས་དྲྭ་ཐོག་བརྒྱུད་དཔལ་ནཱ་ལེནྜའི་སློབ་མའི་ཚོགས་པའི་དགེ་སློབ་རྣམས་ལ་དཔལ་ལྡན་ཟླ་བ་གྲགས་པས་མཛད་པའི་དབུ་མ་འཇུག་པའི་བཀའ་ཆོས་བཀའ་དྲིན་སྩོལ་བཞིན་པ་ལྟར། དེ་རིང་བཀའ་ཚོས་ཉིན་མཐའ་མའི་ཐོག་མ་དེར་མགོན་པོ་༸གང་ཉིད་མཆོག་ནས་འཛམ་བུ་གླིང་འདིའི་ཐོག་ཡོད་པའི་ཆོས་ལུགས་ཚང་མ་འགྲོ་བ་མི་སོ་སོའི་བློ་དང་མཐུན་པའི་ཐོག་སྡུག་བསྔལ་ལ་གཉེན་པོ་བསྟེནཚུལ་དང་། གཞན་ཕན་བསྒྲུབ་རྒྱུ་སོགས་གསུང་མཁན་གཅིག་གྱུར་ཡིན་པར་བཀའ་འགྲེལ་དང་ཆབས་ཅིག སྟོན་པ་བཅོམ་ལྡན་འདས་ཀྱིས་གསུངས་པའི་ཆོས་འཁོར་རྣམ་པ་གསུམ་གྱི་སྐོར་ལ་ངོ་སྤྲོད་ཞིབ་རྒྱས་མཛད་ཐོག་བཀའ་ཆོས་འཕྲོ་སྐྱོང་མཛད་སོང་། སྐབས་དེར་མགོན་པོ་༸གང་ཉིད་མཆོག་གིས་དབུ་མ་འཇུག་པ་དང་དབུ་མ་རྩ་བ་ཤེས་རབ་སོགས་རྒྱ་གར་གྱི་མཁས་ཆེན་དཔལ་མགོན་ཀླུ་སྒྲུབ་དང་དཔལ་ལྡན་ཟླ་བ་གྲགས་པ་སོགས་ཀྱིས་མཛད་པའི་བཀའ་ཆོས་ཀྱི་རྩ་འགྲེལ་ཁག་ཉིན་རེ་བཞིན་དུ་ལྟ་ཀློག་གནང་ཐུབ་ན་དགེ་མཚན་ཆེན་པོ་ཡོད་པ་དང་། དེ་ཡང་ལེགས་པར་བཤད་པ་རིན་པོ་ཆེའི་གཏེར་ཞེས་བྱ་བའི་བསྟན་བཅོས་ལས། རིག་པ་ནང་པར་འཆི་ཡང་བསླབ། །ཚེ་འདིར་མཁས་པར་མ་གྱུར་ཀྱང་། ། སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་པ་འདྲ། །ཞེས་པ་ལྟར། རིག་གནས་དེ་དག་གིས་ཚེ་འདི་ལ་ཕན་པ་ཙམ་མ་ཟད། ཚེ་རབས་ནས་ཚེ་རབས་བར་དུ་བག་ཆགས་བཟང་པོ་བཞག་རྒྱུར་ཏན་ཏན་ཕན་གྱི་ཡོད་པ་སོགས་བཀའ་བསྩལ་ཡོད། ཐེངས་འདིའི་ཉིན་གྲངས་གསུམ་རིང་གི་བཀའ་ཆོས་མཇུག་སྒྲིལ་བའི་མཚམས་སུ་རྒྱ་གར་གྱི་ནང་པའི་ཚོགས་པའི་ཚོགས་མི་ཁག་ཅིག་ནས་བྱམས་ཆུབ་སེམས་ལ་བློ་སྦྱོང་སྟངས་དང་ལུས་པོའི་བདེ་སྡུག་ལ་གཉེན་པོ་བསྟེན་སྟངས་སོགས་དང་འབྲེལ་བའི་བཀའ་འདྲི་ཁག་ཅིག་ཞུས་པར་མགོན་པོ་༸གང་ཉིད་མཆོག་ནས་སྤྱིར་འཇིག་རྟེན་འདིའི་ཐོག་ཡོད་པའི་ཕྱིའི་རིག་གནས་ཀྱི་རྣམ་གཞག་མང་པོ་ཞིག་མིའི་བདེ་སྐྱིད་བསྒྲུབ་རྒྱུ་དང་འབྲེལ་བ་ཡོད་ཀྱང་། རིག་གནས་དེ་དག་མིའི་ཆགས་སྡང་གི་གཞན་དབང་དུ་སོང་སྐབས་སྡུག་བསྔལ་གྱི་རྒྱུར་འགྲོ་ཡི་ཡོད་སྟབས་རྟག་ཏུ་སེམས་ཆགས་སྡང་གི་གཞན་དབང་དུ་མ་སོང་བ་ཞིག་གནང་གལ་ཡིན་པར་ལམ་སྟོན་མཛད་ཡོད། རྒྱུན་དུ་སེམས་པ་བཟང་པོ་བྱེད་རྒྱུ་དང་ལྷག་པར་དུ་ཆོས་ཀྱི་རྣམ་གཞག་དེ་ཚོ་ལམ་སེང་ཤེས་རྒྱུ་ཁག་ཡིན་སྟབས་རྒྱུན་སྲིང་ནས་ཆོས་ལ་སློབ་གཉེར་གནང་དགོས་པའི་ལམ་སྟོན་བཀྲིན་ཆེ་བ་བསྩལ་སོང་། ལྷག་པར་དུ་སྐབས་དེར་རྒྱ་གར་གྱི་ནང་པའི་ཚོགས་པའི་སྐུ་ཚབ་ནས་མགོན་པོ་༸གང་ཉིད་མཆོག་གིས་ཐུགས་རྩེ་བ་ཆེན་པོའི་ཐོག་ནས་བཀའ་ཆོས་བསྩལ་བར་ཐུགས་རྗེ་ཆེ་ཞུས་སོང་བ་དང་། སྐབས་དེར་མགོན་པོ་༸གང་ཉིད་མཆོག་ནས་རྒྱ་གར་གི་ངོས་ནས་རང་ཉིད་ཀྱི་གནའ་བོའི་རིག་གནས་དེ་དག་ཤེས་ཡོན་གྱི་ངོ་བོའི་ཐོག་ནས་སློབ་ཁྲིད་ཐུབ་རྒྱུར་འབད་བརྩོན་གནང་དགོས་པར་ལམ་སྟོན་མཛད་ཡོད། ༸གོང་ས་མཆོག་གིས་ད་ལྟའི་ཆར་་ཏོག་དབྱིབས་རིམས་ནད་རྐྱེན་གྱིས་ས་གནས་ཁག་ཏུ་ཕེབས་རྒྱུ་ཁག་པོ་ཆགས་ཡོད་ཀྱང་ལོ་འདིའི་ལོ་མཇུག་ཙམ་ལ་གནས་མཆོག་རྡོ་རྗེ་གདན་དུ་ཆོས་འབྲེལ་ཞིག་སྩོལ་ཐུབ་རྒྱུའི་ཐུགས་རེ་ཡོད་པ་བཀའ་བསྩལ་སོང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་༸རྒྱལ་བའི་གཟིམ་ཁང་ནས་དྲྭ་ཐོག་བརྒྱུད་དཔལ་ནཱ་ལེནྜའི་སློབ་མའི་ཚོགས་པ་ཞེས་རྒྱ་གར་གྱི་ནང་པའི་ཚོགས་པའི་དགེ་སློབ་རྣམས་ལ་དཔལ་ལྡན་ཟླ་བ་གྲགས་པས་མཛད་པའི་དབུ་མ་འཇུག་པའི་བཀའ་ཆོས་དབུ་འཛུགས་མཛད་སོང་། དེ་རིང་ཕྱི་ཟླ་ ༧ ཚེས་ ༡༧ ཉིན་གྱི་སྔ་དྲོ་ཚོུད་ ༩ ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་དྲྭ་ཐོག་ཐད་གཏོང་བརྒྱུད་དཔལ་ནཱ་ལེནྜའི་སློབ་མའི་ཚོགས་པ་ཞེས་རྒྱ་གར་གྱི་ནང་པའི་ཚོགས་པས་ཇི་ལྟར་གསོལ་འདེབས་ཞུས་པ་བཞིན་དེ་རིང་ཟླ་ ༧ ཚེས་ ༡༧ ནས་ ༡༩ བར་ཉིན་གྲངས་གསུམ་རིང་བསྩལ་རྒྱུའི་དཔལ་ལྡན་ཟླ་བ་གྲགས་པས་མཛད་པའི་དབུ་མ་འཇུག་པའི་བཀའ་ཆོས་དབུ་འཛུགས་མཛད་པ་དང་སྦྲགས། ཚོགས་པའི་སྐུ་ཚབ་ཀྱིས་མགོན་པོ་༸གང་ཉིད་མཆོག་ནས་བཀའ་ཆོས་བསྩལ་རྒྱུའི་ཞལ་བཞེས་བཟང་པོ་སྨིན་བསྩལ་མཛད་པར་ཐུགས་རྗེ་ཆེ་ཞུས་པ་དང་༸མགོན་པོ་མཆོག་༸སྐུ་ཚེ་བསྐལ་བརྒྱར་བརྟན་པའི་ཐུགས་སྨོན་གསོལ་འདེབས་ཞུས་སོང་བ་དང་། སྐབས་དེར་༸གོང་ས་མཆོག་གིས་ངོས་རང་ད་ཆ་ལོ་བརྒྱད་ཅུ་གྱ་ལྔ་གྱ་དྲུག་ལ་སོན་ཡོད་ཀྱང་ལུས་ཁམས་བདེ་ཐང་ཡིན་པས་ད་དུང་ལོ་བཅོ་ལྔ་ཉི་ཤུ་བར་བསྡད་རྒྱུར་ཐག་བཅད་ཡོད་ཅེས་བཀའ་བཞེས་བཟང་པོ་བསྩལ་སོང་། དེ་བཞིན་མགོན་པོ་༸གང་ཉིད་མཆོག་གིས་བཀའ་ཆོས་སྤྱི་བཤད་དང་འབྲེལ་ནས་སངས་རྒྱས་པའི་ཆོས་ཀྱི་འགྲོ་ལུགས་ལྟར་ན་ངེད་ཅག་ཚང་མ་སྡུག་བསྔལ་མི་འདོད་པ་འབའ་ཞིག་ཡིན་པ་དང་སྒོས་སྡུག་བསྔལ་གྱི་རྩ་བ་ནི་ཉོན་མོངས་པ་ཡིན་པ་དང་། ཉོན་མོངས་ཀྱི་རྩ་བ་དེ་གཏི་མུག་བདེན་འཛིན་ཡིན་སྟབས་བདེན་འཛིན་གྱི་གཉེན་པོར་བདག་མེད་རྟོགས་པའི་ཤེས་རབ་བསྒོམ་དགོས་སྐོར་བཀའ་བསྩལ་བ་དང་ཆབས་ཅིག སྟོང་ཉིད་རྟོགས་པའི་ལྟ་བའི་གལ་གནད་སྐོར་ལམ་སྟོན་བཀྲིན་ཆེ་བ་མཛད་ཡོད།བཀའ་ཆོས་ལས་འཕྲོས་ཏེ་༸གོང་ས་མཆོག་གིས་བྱང་ཆུབ་སེམས་དང་འབྲེལ་སངས་རྒྱས་ཀྱི་གོ་འཕང་ཐོབ་པའི་རྒྱུ་གཙོ་བོ་དེ་ནི་སྙིང་རྗེའི་བསམ་པ་ཡིན་པ་དང་སྒོས་རང་དོན་བསྒྲུབ་དགོས་ན་དེ་རེད་ཅེས་བཀའ་བསྩལ་དང་སྦྲགས། གཞན་དོན་བསྒྲུབ་རྒྱུ་ནི་བྱང་ཆུབ་སེམས་བསྒོམ་པ་དང་གཉིས་སུ་མེད་པ་དང་། ལྷག་པར་དུ་བྱང་ཆུབ་སེམས་བསྒོམ་ཚེ་སེམས་སྐྱིད་པ་དང་ལུས་བདེ་བ་ཡོང་གི་ཡོད་པ་མ་ཟད། སེམས་ཅན་ཀུན་དང་མཛའ་བཤེས་ཆགས་ཐུབ་སྐོར་བཀའ་བསྩལ་སོང་།  དེ་རིང་ཉིན་དང་པོའི་བཀའ་ཆོས་ལེགས་པར་གྲུབ་མཚམས་སུ་ཚོགས་པའི་ཚོགས་མི་ཁག་ཅིག་གིས་༸གོང་ས་མཆོག་ལ་བཀའ་འདྲི་དགོངས་སྐོར་ཞུས་པའི་ཁྲོད་གཞན་ཕན་སྒྲུབ་སྐབས་སོ་སོར་དཀའ་ངལ་ཡོང་གི་འདུག་པས་དེ་ལྟར་མི་ཡོང་བ་དང་། གཞན་ཕན་བསྒྲུབ་པར་ཐབས་ལམ་དབུ་མ་ཇི་ལྟར་བསྟེན་དགོས་སམ་ཞེས་པར་མགོན་པོ་༸གང་ཉིད་མཆོག་གིས་སྙིང་རྗེ་བློ་དེ་ཤུགས་ཆེན་པོ་ཡོད་ན་གཞན་ཕན་སྒྲུབ་སྐབས་རང་ཉིད་ཀྱི་སེམས་ལའང་བདེ་སྐྱིད་ཡོང་བ་དང་གྲོགས་པོ་ཡང་མང་པོ་བྱུང་ངེས་ཡིན་སྟབས་རང་དོན་བསྒྲུབ་རྒྱུ་ཐབས་ལེགས་ཤོས་དེ་གཞན་དོན་བསྒྲུབ་རྒྱུ་ཡིན་པར་༸སྐུའི་མྱོང་བ་དང་འབྲེལ་ནས་ལམ་སྟོན་མཛད་ཡོད།དེ་བཞིན་མགོན་པོ་༸གང་ཉིད་མཆོག་གིས་སྟོང་ཉིད་ཀྱི་ལྟ་བ་དང་འབྲེལ་ངོས་ནས་ལོ་ངོ་...