༸གོང་ས་མཆོག་གིས་བཙུན་དགོན་བྱང་ཆུབ་ཆོས་གླིང་གི་ཆོས་ར་གསར་པ་དབུ་འབྱེད་རབ་གནས་མཛད་པ།

དེ་རིང་ཕྱི་ཟླ་ ༡༢ ཚེས་ ༢༢ ཉིན་སྔ་དྲོ་ཚོུད་ ༡༡།༠༠ ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་འགྱུར་རྙིང་མའི་གདན་ས་རྣམ་གྲོལ་གླིང་དུ་༸ཞབས་སོར ་བདེ་བར་འཁོད་གནང་སྟེ་སྔ་འགྱུར་བཤད་གྲྭ་དང་བཙུན་དགོན་བཤད་གྲྭ་གཉིས་ཀྱི་སྐབས་བདུན་པའི་བསླབ་པ་མཐར་སོན་གྱི་མཛད་སྒོར་དབུ་བཞུགས་ཀྱིས་ཕྱི་ལོ་ ༢༠༡༡ ནས་ ༡༧ བར་ལོ་ངོ་ ༦ ནང་བསླབ་པ་མཐར་སོན་པའི་རྣམ་གྲོལ་གླིང་གི་དགེ་འདུན་པ་དང་བཙུན་མ་ ༥༤༡ ཡོད་པའི་ཁྲོད་ནས་ ༣༠༠ ལྷག་ཙམ་ལ་ཕྱག་འཁྱེར་དང་བཀའ་སློབ་བསྩལ་ཡོད་པ་རེད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་རྣམ་གྲོལ་གླིང་དགོན་པ་ཕྱག་བཏབ་མཁན་གྲུབ་དབང་པདྨ་ནོར་བུ་རིན་པོ་ཆེ་མཆོག་གིས་བསྟན་པ་དང་འགྲོ་བའི་དོན་དུ་གནང་བའི་མཛད་རྗེས་དེ་དག་མི་རབས་ནས་མི་རབས་བར་དུ་གནས་རྒྱུ་ཡིན་པ་མ་ཟད། ཁོང་གི་ཡང་སྲིད་རིན་པོ་ཆེའི་ངོས་ནས་ཀྱང་བསྟན་པའི་དོན་མཛད་པར་བསླབ་པ་སློབ་གཉེར་ལེགས་པོ་གནང་ཐུབ་པར་ཐུགས་རེ་ཡོད་པ་བཀའ་བསྩལ་ཡོད་པ་རེད། གཞན་ཡང་རྣམ་གྲོལ་གླིང་དགོན་པ་ནི་སྔ་འགྱུར་རྙིང་མའི་གདན་ས་ཁག་ནས་བཤད་གྲྭ་ཤུགས་ཆེ་ཤོས་ཡིན་པས་དེ་ནི་སྤོབས་པ་བྱ་འོས་པ་ཞིག་ཡིན་པ་མ་ཟད་སྔོན་གྱི་སྐྱེས་བུ་དམ་པ་ཚོས་རྨང་གཞི་བརྟན་པོ་ཞིག་བཏིང་ཡོད་པ་དེའི་ཐོག་མུ་མཐུད་དུ་བསྐྱོད་དགོས་གལ་ཡིན་པར་ལམ་སྟོན་མཛད་ཡོད། ༸གོང་ས་མཆོག་དེ་རིང་རྣམ་གྲོལ་གླིང་དགོན་པར་ཉིན་དགུང་ལྗགས་སྨིན་བཞེས་རྗེས་རྣམ་གྲོལ་གླིང་དགོན་པའི་བཙུན་དགོན་མཚོ་རྒྱལ་གླིང་ལ་ཆིབས་སྒྱུར་མཛད་ཡོད་པ་རེད། གཞི་རྩའི་དེ་རིང་སྔ་ཐོག་ཚོུད་ ༨།༣༠ སྟེང་༸གོང་ས་༸སྐྱབས་མགོན་ཆེན་པོ་མཆོག་གིས་གདན་ས་སེ་ར་ཐེག་ཆེན་གླིང་གི་ཚོགས་ཆེན་འདུ་ཁང་ནང་བོད་ནས་གསར་དུ་ཕེབས་པ་དང་དགེ་རྒན་བཅས་ཁྱོན་མི་གྲངས་ ༧༠༠ ཙམ་ལ་མཇལ་ཁ་དང་ལམ་སྟོན་མཛད་ཡོད་པ་དང་།...

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་སྐྱོང་བཞིན་པའི་ཆོས་འབྲེལ་མཛད་འཆར་ཉིན་མཐའ་མ་ཕྱི་ཚེས་ ༡༦ དང་༡༧ ཉིན་གཉིས་རིང་གདན་ས་དགའ་ལྡན་རྣམ་པར་རྒྱལ་བའི་གླིང་དུ་དགེ་འདུན་པར་བསྙེན་རྫོག་སྒྲུབ་གནང་རྒྱུའི་མཛད་འཆར་ཡོད་ཀྱང་། ཁ་སང་ཕྱི་ཚེས་ ༡༥ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་གདན་ས་དགའ་ལྡན་ཚོགས་ཆེན་དུ་ཕེབས་སྟོན་མཛད་སྒོའི་སྐབས་༸གང་ཉིད་མཆོག་༸སྐུ་ཐང་ཧ་ཅང་ཆད་བཞིན་ཡོད་སྟབས་དགའ་ལྡན་དུ་བསྙེན་རྫོགས་སྒྲུབ་རྒྱུ་དེ་ཕྱིར་འཐེན་གནང་སྟེ་དེའི་ཚབ་ཏུ་ཚེས་ ༡༦ ཉིན་སྔ་ཐོག་དགའ་ལྡན་རྣམ་པར་རྒྱལ་བའི་གླིང་དུ་ལམ་གཙོ་རྣམ་གསུམ་གྱི་ཆོས་འབྲེལ་ཞིག་གནང་རྒྱུའི་ཞལ་བཞེས་ཐོབ་ཡོད་པ་རེད། འོན་ཀྱང་༸སྐུའི་བླ་སྨན་པས་༸གང་ཉིད་མཆོག་ལ་༸སྐུའི་འཕྲོད་བཞེས་རྟག་དཔྱད་གནང་རྗེས་༸སྐུ་ངལ་གསོ་བཞུགས་མཛད་དགོས་པར་གསོལ་འདེབས་ཞུས་པ་བཞིན་ཁ་སང་ཕྱི་དྲོ་གློ་བུར་དུ་ཆོས་འབྲེལ་མཛད་རྒྱུ་དེ་ཡང་ཕྱིར་འཐེན་གནང་འདུག ཁ་སང་ཕྱི་དྲོ་གདན་ས་འབྲས་སྤུངས་དང་དགའ་ལྡན་གྱི་གྲྭ་ཚང་སོ་སོ་དང་ལྷག་པར་དུ་བླ་སྤྱིའི་ངོས་ནས་༸རྒྱལ་བའི་༸སྐུ་ཕྱྭའི་ཛ་དྲག་གི་ཞབས་རིམ་ཁག་ཅིག་སྒྲུབ་གནང་མུས་ཡོད་པ་དང་། གདན་ས་འབྲས་སྤུངས་ཚོགས་ཆེན་མདུན་ཐང་དུ་མཁན་ལས་ཟུར་དང་བླ་སྤྲུལ་དགེ་འདུན་ཡོངས་ནས་འཕགས་བསྟོད་སོགས་དམིགས་བསལ་ཞབས་རིམ་ཁག་ཅིག་གསོག་སྒྲུབ་གནང་བཞིན་འདུག དེ་དང་ཕྱོགས་མཚུངས་དགའ་ལྡན་བྱང་རྩེ་གྲྭ་ཚང་གི་ངོ་ནས་ཀྱང་ལྷ་མོའི་སྤྲོས་གསོལ་དང་གྲྭ་མང་ནས་སྒྲོལ་མ་མཚན་འདོན་གནང་ཡོད་པ་མ་ཟད། ཤར་རྩེ་གྲྭ་ཚང་འདུས་མང་ནས་གནས་བརྟན་ཕྱག་མཆོད་དང་རྣམ་རྒྱལ་ཚེ་མཆོག་གི་ཆོ་གའི་སྒོ་ནས་ཞབས་རིམ་སྒྲུབ་གནང་ཡོད་པ་དང་། དེ་བཞིན་རྭ་སྟོད་གྲྭ་ཚང་ནས་འཕགས་བསྟོད་དང་༸རྒྱལ་བའི་ཞབས་བརྟན་སོགས་ཞབས་རིམ་སྒྲུབ་གནང་ཡོད་པ་རེད། རྩ་བའི་ད་ལྟའི་ཆར་སང་ཉིན་ཚེས་ ༡༧ སྔ་དྲོ་ཚོུད་ ༩༌༣༠ ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་དགའ་ལྡན་ཚོགས་ཆེན་འདུ་ཁང་ནང་སེར་སྐྱ་མང་ཚོགས་ལ་༸རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་བཤད་ལུང་གནང་རྒྱུའི་ཞལ་བཞེས་ཐོབ་འདུག་པ་ལྟར་མཛད་འཆར་བསྐྱང་གཏན་འཁེལ་འདུག གནངས་ཚེས་ ༡༨ ཉིན་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་མོན་གྷོ་འདོད་རྒུ་གླིང་ནས་ཆིབས་གྲུ་བརྒྱུད་ལམ་བར་དུ་མཚན་གཅིག་བཞུགས་ཞག་མཛད་དེ་ཕྱི་ཚེས་ ༡༩ ཉིན་སྦེལ་ཀོབ་བོད་མིའི་གཞིསས་ཆགས་སུ་རྟེན་གཞི་བྱས་པའི་སེ་ར་ཐེག་ཆེན་གླིང་དུ་༸ཞབས་སོར་བདེ་བར་འཁོད་གནང་གི་འདུག

དེ་རིང་ཕྱི་ ༡༢ ཚེས་ ༡༥ ཉིན་སྔ་དྲོ་ཕྱག་ཚོད་ ༩༌༣༠ ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཁུལ་དུ་ཡོད་པའི་བཙུན་དགོན་བྱང་ཆུབ་ཆོས་གླིང་གི་ཆོས་ར་གསར་པ་དབུ་འབྱེད་རབ་གནས་མཛད་པ་དང་འདི་བཞིན་མཇལ་ཞུར་བཅར་བའི་རྒན་གསོ་ཁང་གི་བགྲོས་སོང་རྣམས་དང་གཞིས་གྲོང་ཁག་གི་རྒན་ཁོགས་དང་ནད་གཅོང་ཚོར་ཕེབས་ལམ་དུ་མཇལ་ཁ་གནང་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་ཞབས་སྟེགས་ཐོག་༸ཞབས་སོར་བདེ་བར་འཁོད་མཚམས་སུ་བཙུན་དགོན་བྱང་ཆུབ་ཆོས་གླིང་གི་མཁན་པོ་མཆོག་ནས་མཎྜལ་རྟེན་གསུམ་འདེགས་འབུལ་སོགས་ཞུས་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིསབཙུན་དགོན་བྱང་ཆུབ་ཆོས་གླིངདགོན་པ་དེ་ནི་བཙུན་མ་དགོན་ནང་གི་སློབ་གཉེར་དྲག་གྲས་ཤིག་ཆགས་ཡོད་པས་༸གང་ཉིད་མཆོག་ད་རེས་ཕེབས་རྒྱུ་བྱུང་བར་ཐུགས་དགྱེས་ཚོར་ཆེན་པོ་བྱུང་ཞེས་བཀའ་བསྩལ་དང་སྦྲགས། ཕྱི་ལོ་ ༡༩༥༩ ལོར་བོད་མི་རྣམས་རང་དབང་བྲལ་རྗེས་བོད་རྒྱ་གཉིས་ཐ་དད་ཡིན་པའི་དཔང་རྟགས་གཙོ་བོ་བོད་མི་རིགས་ཀྱིི་འབྱུང་རབས་ལོ་རྒྱུས་དང་སྐད་ཡིག རིག་གཞུང་བཅས་ཐོུང་མ་ཡིན་པ་ཞིག་ཡོད་པ་དེ་དག་རྒྱ་ནག་གཞུང་གིས་འཆར་གཞི་ལྡན་པའི་སྒོ་ནས་རྩ་མེད་བཟོ་ཐབས་ཇི་ལྟར་བྱས་ཀྱང་གཙོ་བོ་གཞིས་བཞུགས་བོད་མི་ཚོའི་ལྷག་བསམ་དང་ཞུམ་པ་མེད་པའི་སྙིང་སྟོབས་ལ་བརྟེན་ནས་དེ་དག་མི་ཉམས་པར་གནས་ཡོད་པ་མ་ཟད་བཙན་བྱོལ་ནང་ལ་ཡང་གདན་ས་ཁག་དང་བཙུན་དགོན་ཚོས་རྒྱུན་འཛིན་གནང་ཡོད་པར་བཀའ་བསྩལ་ཡོད། ལྷག་པར་དུ་༸གང་ཉིད་མཆོག་གིས་རྒྱ་གར་ནང་བཙུན་མ་ཚོའི་ངོས་ནས་ཕྱག་དཔེ་གཟིགས་གལ་ཡིན་པར་འབོད་སྐུལ་གནང་བ་བཞིན་འདས་པའི་དུས་ཡུན་ནང་བཙུན་མ་ཚོས་སློབ་གཉེར་ཐད་ལ་གཟེངས་སུ་ཐོོན་པ་གནང་ནས་སྔ་ལོ་བཙུན་མ་ ༢༠ ཐམ་པར་དགེ་བཤེས་མའི་མཚན་རྟགས་བཞེས་ཐུབ་ཡོད་སྟབས། སླད་མར་མུ་མཐུད་དེ་ལྟར་གནང་གལ་ཡིན་པར་ལམ་སྟོན་མཛད་སོང་། ལྷག་དོན་༸གོང་ས་༸སྐྱབས་མགོན་ཆེན་པོ་མཆོག་གིས་རྒས་ཁོགས་རྣམས་ལ་དམིགས་ཏེ་རྒས་ཁོགས་རྣམས་ཡིད་ཞུམ་ནས་མ་བསྡད་པར་ནང་པའི་གཞུང་ཆེན་ཁག་གི་ཐོག་དོ་སྣང་དང་བསམ་བློ་གཏོང་ཚེ་སེམས་ལ་ཞི་བདེ་ཡོང་བར་ཕན་ཐོགས་ཡོད་ཅེས་བཀའ་ནན་བསྩལ་ཡོད། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་བཙུན་དགོན་བྱང་ཆུབ་ཆོས་གླིང་ནས་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ་༸ཞབས་སོར་འཁོད་གནང་ཡོད་པ་མ་ཟད་ཐོག་མར་དགའ་ལྡན་ཚོགས་ཆེན་དུ་ཕེབས་སྟོན་མཛད་སྒོ་ཞིག་གནང་སོང་། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཐོག་མའི་འཆར་གདན་ས་དགའ་ལྡན་དུ་ཕྱི་ཚེས་ ༡༦ དང་ ༡༧ ཉིན་གཉིས་རིང་བསྙེན་རྫོགས་སྒྲུབ་གནང་འཆར་ཡོད་ཀྱང་༸གང་ཉིད་མཆོག་༸སྐུ་ཐང་ཧ་ཅང་ཆད་ཀྱི་ཡོད་སྟབས་དགའ་ལྡན་དུ་བསྙེན་རྫོགས་སྒྲུབ་རྒྱུ་དེ་ཕྱིར་འཐེན་གནང་སྟེ་དེའི་ཚབ་ཏུ་སང་ཉིན་སྔ་དྲོ་འབྲས་སྤུངས་ཚོགས་ཆེན་འདུ་ཁང་ནང་ལམ་གཙོ་རྣམ་གསུམ་གྱི་ཆོས་འབྲེལ་ཞིག་གནང་རྒྱུ་ཡིན་པ་དེས་འཐུས་པ་བྱ་རྒྱུ་དང་ཕྱི་ཚེས་ ༡༧ ཉིན་ཆིབས་གྲོ་བརྒྱུད་ནས་སེ་ར་ཐེག་ཆེན་ཆོས་གླིང་ཕྱོགས་སུ་ཆིབས་ཞལ་བསྒྱུར་རྒྱུ་ཡིན་པ་བཀའ་བསྩལ་ཡོད།