༸གོང་ས་མཆོག་གིས་མ་ལ་ཤི་ཡའི་སྲིད་བློན་གསར་པ་མཆོག་ལ་འཚམས་འདྲི་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་མ་ལ་ཤི་ཡའི་རྒྱལ་ཡོངས་འོས་བསྡུ་ཆེན་མོའི་ཁྲོད་སྐུ་ཞབས་ Dr. Mahathir Mohamad མཆོག་ལ་རྒྱལ་ཁ་ཐོབ་ནས་སྲིད་བློན་ཐེངས་བདུན་པར་འོས་འདེམས་བྱུང་བར་འཚམས་འདྲིའི་གསུང་འཕྲིན་བསྩལ་འདུག ༸གོང་ས་མཆོག་གིས་འཚམས་འཕྲིན་དེའི་ནང་༸གོང་ས་མཆོག་ནས་སྐུ་ཞབས་ Dr. Mahathir Mohamad མཆོག་གི་ Pakatan Harapan ཆབ་སྲིད་ཚོགས་པར་རྒྱལ་ཁབ་ཀྱི་འོས་བསྡུ་ཆེན་མོ་ལས་ལོ་རྒྱུས་ཀྱི་རང་བཞིན་ལྡན་པའི་རྒྱལ་ཁ་ཐོབ་པ་དང་འདི་བཞིན་སྐུ་ཞབས་ཁོང་སླར་ཡང་སྲིད་བློན་དུ་འདེམས་ཐོན་བྱུང་བར་འཚམས་འདྲི་གནང་བ་དང་འབྲེལ། མི་མང་ཚོས་འོས་འཕེན་པ་དེས་འགྱུར་ལྡོག་དང་མ་ལ་ཤི་ཡའི་ནང་མང་གཙོའི་ལམ་ལུགས་སྲ་བརྟན་ཇི་ཙམ་ཡོད་པ་མིག་སྟོན་གནང་བ་ཞིག་མཚོན་སྐོར་བཀའ་བསྩལ་འདུག ད་དུང་༸གོང་ས་མཆོག་གིས་དེ་སྔ་ཕྱི་ལོ་ ༡༩༨༢ ལོར་མགོན་པོ་༸གང་ཉིད་མཆོག་མ་ལ་ཤི་ཡའི་ནང་ཆིབས་བསྒྱུར་མཛད་མྱོང་ཡོད་པ་བཀའ་བསྩལ་བ་དང་སྦྲགས། ཉེ་དུས་སུ་༸གང་ཉིད་མཆོག་ནས་མ་ལ་ཤི་ཡའི་མང་ཚོགས་མང་དག་ཞིག་རྒྱ་གར་ནང་གནས་མཇལ་དུ་ཕེབས་མཁན་གྲོགས་ཕོ་མོ་རྣམས་དང་མཇལ་མོལ་ཡོང་གི་ཡོད་པ་བཀའ་བསྩལ་འདུག ལྷག་དོན་༸གོང་ས་མཆོག་གིས་མང་ཚོགས་དེ་དག་ནས་ངོས་ཀྱིས་འབད་བརྩོན་ཞུ་བཞིན་པའི་འགྲོ་བ་མིའི་གཞི་རྩའི་བཟང་སྤྱོད་དང་ཆོས་ལུགས་མཐུན་སྒྲིལ་ཐོག་དགའ་མོས་དང་རྒྱབ་སྐྱོར་གནང་བར་ཡི་རང་བསྔགས་བརྗོད་ཡོད་པ་བཀའ་བསྩལ་བ་མ་ཟད། སྲིད་བློན་མཆོག་གི་ལས་ཡུན་དེའི་ནང་གདོང་ལེན་གནང་སྒོ་ཁག་ལ་འགེགས་མེད་ལམ་ལྷོང་ཡོང་བ་དང་། མ་ལ་ཤི་ཡའི་མང་ཚོགས་ཀྱི་རེ་བ་དང་མངོན་འདོད་མཐའ་དག་ལེགས་གྲུབ་ཡོང་བར་ཐུགས་སྨོན་མཛད་འདུག