༸གོང་ས་མཆོག་གིས་ལྕམ་སྐུ་ Nancy Pelosi མཆོག་ལ་དགའ་བསུའི་འཚམས་འདྲི་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་སླར་ཡང་མདང་དགོང་སླར་ཡང་ཐེངས་བཞི་པར་ཨ་རིའི་གྲོས་ཚོགས་འོག་མའི་ཚོགས་གཙོར་བསྐོ་བཞག་བྱུང་བར་དགའ་བསུའི་འཚམས་འདྲི་མཛད་འདུགའཚམས་འཕྲིན་དེའི་ནང་དུ་མགོན་པོ་༸གང་ཉིད་མཆོག་གིས་ལྕམ་སྐུ་ Nancy Pelosi མཆོག་གིས་སླར་ཡང་གྲོས་ཚོགས་ཀྱི་ཚོགས་གཙོའི་ངོ་བོའི་ཐོག་ནས་མུ་མཐུད་ཨ་རིའི་མི་མང་གི་རེ་བ་དང་མངོན་འདོན་ཁག་བསྒྲུབ་རྒྱུ་མ་ཟད། འཛམ་གླིང་ཞི་བདེ་དང་འཆམ་མཐུན་སྐྲུན་རྒྱུར་གལ་གནད་ཆེ་བའི་གོ་བབ་ཅིག་འཛིན་རྒྱུར་མགོན་པོ་༸གང་ཉིད་མཆོག་ལ་ཐུགས་དོགས་རྩ་བ་ནས་མེད་ཅེས་བཀའ་སྩལ་འདུག དེ་བཞིན་ལྕམ་སྐུ་མཆོག་གིས་ལོ་མང་གི་རིང་ལ་བོད་དོན་རྒྱབ་སྐྱོར་དང་མགོན་པོ་༸གང་ཉིད་མཆོག་ལ་མཛའ་གྲོགས་ཀྱི་འདུ་ཤེས་བཅིངས་པ་སོགས་ལ་༸གོང་ས་མཆོག་ནས་དུས་རྟག་ཏུ་བཀའ་དྲིན་ཆེན་པོར་ཚོར་བཞིན་ཡོད་སྐོར་བཀའ་སྩལ་བ་དང་འབྲེལ། ལྕམ་སྐུ་མཆོག་ལ་ཕྱི་ལོ་གསར་ཚེས་ཀྱི་འཚམས་འཕྲིན་དང་སྨོན་འདུན་མཛད་འདུགབོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ལྕམ་སྐུ་མཆོག་སླར་ཡང་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བར་དགའ་བསུའི་འཚམས་འདྲི་ཞུས་པ་དང་སྦྲགས། ལྕམ་སྐུ་མཆོག་གི་འཇིགས་ཞུམ་བྲལ་བའི་དབུ་ཁྲིད་ཀྱིས་དཀའ་ངལ་ལ་ལྟོས་མེད་ཀྱིས་འཛམ་གླིང་ནང་གི་གལ་གནད་ཆེ་བའི་གནད་དོན་ཡོངས་ཀྱིས་མཚོན་པའི་འགྲོ་བ་མིའི་ཐོབ་ཐང་སོགས་ལ་དྲང་བདེན་ཐོག་རྒྱབ་སྐྱོར་བླ་མེད་གནང་ཡོད་སྐོར་སོགས་གསུངས་འདུག ལྷག་དོན་སྲིད་སྐྱོང་མཆོག་གིས་ང་ཚོ་བོད་མི་རྣམས་ནས་ལྕམ་སྐུ་མཆོག་གིས་དུས་རྒྱུན་ནས་རྒྱ་ནག་གིས་བོད་ནང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་བཏང་ཁག་གཙོས་པའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་ཡོང་བར་རྒྱབ་སྐྱོར་ཤུགས་ཆེར་གནང་བར་ཐུགས་རྗེ་ཆེ་ཞེས་ཞུས་པ་དང་ཆབས་ཅིག་ཏུ་རྒྱལ་ཁབ་གཞན་རྣམས་ཀྱིས་ཀྱང་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་དོན་ལྟར་དེ་མཚུངས་གནང་སྐྱོང་ཡོང་བའི་རེ་སྐུལ་ཡང་ཞུས་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་ལ་ཨ་རིའི་ National Democracy Institute འམ་ཨ་རིའི་རྒྱལ་ཡོངས་མང་གཙོ་གོང་འཕེལ་ལྟེ་གནས་ཁང་གིས་འདི་ལོའི་མང་གཙོའི་གཟེངས་རྟགས་འབུལ་ལམ་ཞུ་གཏན་འཁེལ་བར་དགའ་བསུའི་འཚམས་འདྲི་མཛད་འདུག ཡོངས་གྲགས་སུ་ NDI ཞེས་ཨ་རིའི་རྒྱལ་ཡོངས་མང་གཙོ་གོང་འཕེལ་ལྟེ་གནས་ཁང་གིས་ལོ་ལྟར་རྒྱལ་སྤྱིའི་ཐོག་མང་གཙོ་གོང་འཕེལ་གནང་ཐབས་ཐོག་ཕྱག་ལས་གཟེངས་སུ་ཐོན་པར་གནང་མཁན་ཚོགས་སྒེར་ཁག་ལ་ཆེ་བསྟོད་ཞུ་ཕྱིར་  Democracy Award ཞེས་མང་གཙོའི་གཟེངས་རྟགས་ཤིག་འབུལ་ལམ་ཞུ་སྲོལ་ཡོད་པ་ལྟར། འདི་ལོའི་གཟེངས་རྟགས་དེ་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Pelosi མཆོག་ལ་དེ་རིང་གནང་གཏན་འཁེལ་ཡོད་སྟབས། དེ་རིང་སྔ་དྲོ་མགོན་པོ་༸གང་ཉིད་མཆོག་གིས་ལྕམ་སྐུ་མཆོག་ལ་སྩལ་བའི་འཚམས་འདྲིའི་བརྙན་ཐུང་དེའི་ནང་ལྕམ་སྐུ་མཆོག་གིས་འདས་པའི་མི་ལོ་མང་པོའི་རིང་བོད་ཀྱི་བདེན་དོན་ཐོག་ཆོད་སེམས་བརྟན་པོས་རྒྱབ་སྐྱོར་རྒྱ་ཆེ་གནང་བ་མ་ཟད་ཨ་རི་ནས་གྲོས་ཚོགས་འཐུས་མི་ཁག་ཅིག་ཁྲིད་དེ་བཞུགས་སྒར་དང་ལྷག་དོན་བོད་ལ་ཆེད་ཕེབས་གནང་ཡོད་པའི་མཛད་རྗེས་ཁག་ལ་བསྔགས་བརྗོད་མཛད་འདུགདེ་བཞིན་མགོན་པོ་༸གང་ཉིད་མཆོག་གིས་ལྕམ་ནེན་སི་མཆོག་ནི་བོད་མིར་ཤ་ཚ་དང་སྙིང་རྗེ་ཡོད་མཁན་ཞིག་ཡིན་པར་མ་ཟད་དྲང་དེན་ཐོག་ཕྱི་གསལ་ནང་གསལ་གྱིས་བཞེངས་རྒྱུའི་བློ་སྟོབས་ཡོད་པའི་དབུ་ཁྲིད་ཅིག་ཡིན་སྟབས། ད་ལན་སྐུ་ཉིད་མཆོག་ལ་ཨ་རིའི་མང་གཙོའི་གཟེངས་རྟགས་དེ་འབུལ་བཞེས་གནང་གཏན་འཁེལ་བར་སྙིང་དབུས་ནས་འཚམས་འདྲི་ཞུ་རྒྱུ་ཡིན་ཞེས་བཀའ་སྩལ་འདུག་པ་དང་ཆབས་ཅིག ཁོང་གིས་ད་བར་བོད་མིའི་ཐུན་མོང་མ་ཡིན་པའི་ཆོས་རིག་སྲུང་སྐྱོབ་སླད་ཕྱག་རོགས་རྒྱ་གང་ཆེ་གནང་བ་བཅས་ལ་བརྟེན་ནས་ལྕམ་སྐུ་མཆོག་གི་སྐུ་ཚེ་ནི་བོད་མིར་གལ་འགངས་ཆེན་པོ་ཆགས་ཡོད་སྟབས་སྐུ་ཚེ་རིང་པོ་བཞུགས་ཐུབ་པར་ཐུགས་སྨོན་མཚམས་སྦྱོར་མཛད་འདུག