༸གོང་ས་མཆོག་གིས་ཨོ་ཌི་ཤ་མངའ་སྡེའི་སྤྱི་ཁྱབ་བློན་མཆོག་དང་མཇལ་འཕྲད་གནང་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་ཐོག་གྲོང་ཁྱེར་ Kolkata ནང་གི་བོད་རིགས་ཁ་ཆེ་བ་གཙོས་པའི་ཁུལ་དེར་སློབ་སྦྱོང་གནང་བཞིན་པའི་བོད་ཕྲུག་ན་གཞོན་སྐོར་ཞིག་ལ་བོད་ཀྱི་སྐད་ཡིག་སློབ་སྦྱོང་བྱ་རྒྱུ་ཤིན་ཏུ་ནས་གལ་ཆེ་ཡིན་པ་དང་། ལྷག་པར་བོད་མི་ཁ་ཆེ་བ་ཚོ་ལའང་བོད་མིའི་རང་དབང་རྩོད་ལེན་གྱི་འགན་གཅིག་མཚུངས་ཡོད་པ་བཀའ་གནང་འདུག བོད་རིགས་ཚོ་ལ་མཇལ་ཁ་དང་བཀའ་སློབ་ཀྱི་མཛད་རིམ་དེ་ནི་མགོན་པོ་མཆོག་གི་བཞུགས་གནས་Oberoi གསོལ་མགྲོན་ཁང་དུ་གནང་འདུག་པ་དང་། སྐབས་དེར་གྲོང་ཁྱེར་ཀལ་ཀཱ་ཊ་དང་། དེ་བཞིན་རྒྱ་གར་བྱང་ཤར་ཀ་སྦུག རྡོ་རྗེ་གླིང་གཞན་ཡང་འབྲས་ལྗོངས་སོགས་ནས་བོད་རིགས་ཁ་ཆེ་བ་སོགས་སློབ་ཕྲུག་བརྒྱ་ལྷག་བཅར་ཡོད་པ་རེད་འདུག མགོན་པོ་མཆོག་གིས་སྐབས་དེར་ཐོག་མར་མང་ཚོགས་ལ་༸གང་ཉིད་མཆོག་ ༡༩༥༦ ལོར་གྲོང་ཁྱེར་ཀལ་ཀཱ་ཊར་ཐེངས་དང་པོ་ཕེབས་མྱོང་ཡོད་པའི་སྐོར་གསུངས་པ་དང་འབྲེལ། དེའི་ཚེ་དེའི་དུས་སུ་གྲོང་ཁྱེར་དེའི་ Hawra ཟམ་པ་དང་གཅན་གཟན་ཁང་སོགས་སྐད་གྲགས་ཡོད་པ་ཐོས་མྱོང་ཡོད་སྐོར་བཀའ་གནང་པ་དང་། ༡༩༥༩ རྗེས་སུ་བོད་མི་རྣམས་བཙན་བྱོལ་ཆགས་རྗེས་ཕྱོགས་གཅིག་ནས་བཙན་བྱོལ་བ་ཞིག་ཆགས་ཡོད་ནའང་། ཕྱོགས་གཞན་ཞིག་ནས་ང་ཚོ་བཙན་བྱོལ་དུ་སླེབས་ནས་བོད་མི་རིགས་ཀྱི་རིག་གཞུང་དང་སྙིང་སྟོབས་བསྟན་ཐུབ་ཡོད་པ་མ་ཟད། དེ་རིང་སང་ཉིན་དེ་སྔ་དང་མི་འདྲ་བ་རང་ཉིད་བོད་པ་ཡིན་ཟེར་ན་སྤོབས་པ་སྐྱེས་དགོས་ཡག་ཆགས་ཡོད་རེད་ཅེས་དང་བཀའ་གནང་འདུག སྐབས་དེར་ཚོགས་བཅར་བའི་ཁྲོད་བོད་རིགས་ཁ་ཆེ་བ་ཁག་ཅིག་ཡོད་པ་རྣམས་ལས་འཕྲོས་ནས་༸གོང་ས་མཆོག་གིས་དེ་སྔ་བོད་ནང་རྒྱལ་མཆོག་ལྔ་པ་ཆེན་པོའི་༸སྐུ་དུས་དུས་སུ་བོད་པའི་ཁ་ཆེ་བ་ཚོར་གཟིགས་པ་ཡངས་པོ་ཡོད་སྐོར་གྱི་ལོ་རྒྱུས་ངོ་སྤྲོད་གནང་པ་དང་། དེ་བཞིན་དུས་ཕྱིས་རྒྱ་གར་བྱང་ཕྱོགས་ Srinagar ནང་གི་བོད་རིགས་ཁ་ཆེ་བ་ཚོས་བོད་སྐད་ཧ་ཅང་ཡག་པོ་སྐྱོན་བཞིན་པ་ལ་བསྔགས་བརྗོད་ཀྱིས་མགོན་པོ་མཆོག་གིས་བོད་རིགས་ཁ་ཆེ་བ་ཚོས་ཀྱང་བོད་ཀྱི་སྐད་ཡིག་ལ་དོ་སྣང་དང་སློབ་སྦྱོང་གནང་རྒྱུ་ཤིན་ཏུ་ནས་གལ་ཆེ་ཡིན་པ་དང་། སྒོས་སུ་བོད་རིགས་གཅིག་མཚུངས་ཤིག་ཡིན་སྟབས་བོད་མིའི་རང་དབང་གི་འགན་ཡང་གཅིག་མཚུངས་ཡོད་པ་བཀའ་སློབ་གནང་འདུག དེ་དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་དེ་གར་འདུས་པའི་གཞོན་སྐྱེས་རྣམས་ཀུན་ལའང་བོད་ཡིག་གི་ཐོུང་མིན་པའི་སྐོར་དང་འབྲེལ། དུས་རབས་ ༢༡ པའི་ནང་བོད་ཡིག་མ་ཤེས་ན་ཧ་ལམ་ནང་ཆོས་སྤྱི་དང་ཁྱད་པར་ནཱ་ལེནྡྲའི་ཆོས་བརྒྱུད་ཐོག་སློབ་སྦྱོང་བྱེད་ཐུབ་ཡག་ཁག་པོ་གཟིགས་གནང་གི་ཡོད་པ་བཀའ་བསྩལ་འདུག མགོན་པོ་མཆོག་གིས་ང་ཚོ་བོད་མི་ཚོས་ལོ་ངོ་ལོ་ཕྲག་རིང་ནས་བདག་གཅེས་གནང་པའི་དཔལ་ནཱ་ལེནྡྲའི་ཆོས་བརྒྱུད་དྲི་མ་མེད་པ་དེ་ནི་ང་ཚོ་སྤོབས་སྐྱེས་དགོས་ཡག་ཅིག་དང་།...

༸གོང་ས་མཆོག་ནས་དེ་རིང་ཉིན་རྒྱབ་ཨོ་རི་ས་ཕུན་ཚོགས་གླིང་བོད་མིའི་གཞིས་ཆགས་ཀྱི་མང་ཚོགས་རྣམས་ལ་ནང་པའི་ཆོས་ངོ་མ་དེ་ངོ་ཤེས་པ་བྱས་ནས་བདག་པོ་རྒྱག་དགོས་གལ་ཡིན་པར་ལམ་སྟོན་བཀའ་སློབ་བསྩལ་འདུག དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ནས་དེ་རིང་སྔ་དྲོ་  Kalinga Institute of Social Sciences བསྟི་གནས་ཁང་གིས་མགོན་པོ་མཆོག་ལ་འགྲོ་བ་མིའི་བཟང་སྤྱོད་ཀྱི་གཟེངས་རྟགས་ཐེངས་ ༡༠ དེ་འབུལ་བཞེས་ཀྱི་མཛད་རིམ་ཁག་ལེགས་པར་གྲུབ་རྗེས་བསྟི་གནས་ཁང་གི་ཚོགས་ཁང་དུ་ཨོ་རི་ས་ཕུན་ཚོགས་གླིང་བོད་མིའི་གཞིས་སྒར་མང་ཚོགས་རྣམས་ལ་བླང་དོར་བཀའ་སློབ་སྩལ་སྐབས་འཛམ་གླིང་འདི་མིའི་ལུང་པ་ཞིག་ཆགས་ཏེ་མི་ཕན་ཚུན་གསོད་རེས་དང་ཐུབ་ཚོད་བཏང་ནས་གནས་རྒྱུ་མིན་པར་མི་ཕན་ཚུན་དབར་བརྩེ་བ་དང་རོགས་ཕན་གནང་པའི་འཛམ་གླིང་ཞིག་བསྐྲུན་དགོས་གལ་ཡིན་པ་མ་ཟད། ང་ཚོར་དེ་ལྟར་བྱ་རྒྱུའི་ནུས་པ་དང་ཆ་རྐྱེན་དགོས་ངེས་ཁག་ཚང་ཡོད་པ་ལྟར་འགྲོ་བ་མི་ཚོས་དེ་བཞིན་གནང་བའི་ཐུགས་རེ་མཛད་ཀྱི་ཡོད་པ་བཀའ་ནན་བསྩལ་འདུག ལྷག་དོན་ཐུགས་རེ་དེ་ལྟར་གནང་ཡུལ་ནི་འཛམ་གླིང་འདིའི་ཐོག་མི་འབོར་ཐེར་འབུམ་བདུན་ཡོད་པ་རྣམས་ཡིན་པར་བཀའ་བསྩལ་ཡོད་པ་རེད། དེ་བཞིན་༸གོང་ས་མཆོག་ནས་བོད་མི་རྣམས་ས་གནས་གང་དུ་གནས་ཀྱང་བོད་བསྟན་སྲིད་ཀྱི་ལ་རྒྱ་འཁྱེར་ནས་ཧུར་ཐག་གནང་གི་ཡོད་པ་དང་། གཙོ་ཆེ་གཞིས་ལུས་རྒྱ་ཆེ་མི་མང་རྣམས་ཀྱིས་བོད་མི་རིགས་ལ་ཞེན་ཁོག་དང་། སྙིང་སྟོབས། ལྷག་བསམ་ཧ་ལས་པ་ཡོད་པ་དེ་བཙན་བྱོལ་ནང་དུ་གནས་པའི་བོད་མི་རྣམས་ནས་སྤོབས་པ་སྐྱེ་གཞི་ཆགས་ཡོད་པ་ལྟར་ཚང་མས་བོད་སྤྱིའི་བདེན་དོན་སླད་ཧུར་བརྩོན་གནང་དགོས་པ་བཀའ་སློབ་ནན་པོ་ཕེབས་འདུག བོད་ཀྱི་ནང་པ་སངས་རྒྱས་པའི་ཆོས་འདི་དེང་སྐབས་འཛམ་གླིང་འདིའི་ཐོག་སྙན་གྲགས་ཆེ་བའི་ཚན་རིག་པ་ཚོས་ཀྱང་གཅེས་ནོར་ལྟ་བུར་ངོས་འཛིན་གནང་མུས་ཡིན་པ་རེད། བོད་མི་རྣམས་ནས་རང་ཉིད་ཀྱི་ཆོས་དང་རིག་གཞུང་གཅེས་ཉར་གནང་གལ་ཡིན་པ་དང་། དེའང་ནང་པའི་ཆོས་ངོ་མ་དེ་ངོ་ཤེས་པ་བྱས་ནས་བདག་པོ་རྒྱག་དགོས་གལ་ཡིན་པར་ལམ་སྟོན་རྒྱ་ཆེ་བསྩལ་གནང་འདུག དེ་རྗེས་༸གོང་ས་མཆོག་གིས་བོད་མི་རྣམས་ལ་བྱང་ཆུབ་སེམས་བསྐྱེད་ཀྱི་བཀའ་ཆོས་ཤིག་ཀྱང་བསྩལ་ཡོད་པ་རེད། མཛད་འཆར་ལྟར་ན། ཨོ་ཌི་ཤ་ནང་གི་མཛད་འཆར་ཁག་ལེགས་པར་གྲུབ་རྗེས་༸གོང་ས་མཆོག་རྒྱ་གར་བྱང་ཤར་ནུབ་བྷན་གྷལ་མངའ་སྡེའི་རྒྱལ་ས་ཀལ་ཀཱ་ཊ་རུ་ཆིབས་བསྒྱུར་གནང་གི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་ཨོ་ཌི་ཤ་མངའ་སྡེའི་སྤྱི་ཁྱབ་བློན་མཆོག་དང་མཇལ་འཕྲད་གནང་བ་དང་འབྲེལ། རྒྱ་གར་གྱི་གནའ་བོའི་རིག་གནས་ནི་དེང་གི་འཛམ་གླིང་ཐོག་ཧ་ཅང་གི་འབྲེལ་བ་ཡོད་པ་ཞིག་ཆགས་ཡོད་ཅེས་བཀའ་བསྩལ་འདུག དེ་ཡང་༸གོང་ས་སྐྱབས་མགོན་ཆེན་པོ་མཆོག་རྒྱལ་ས་ལྡི་ལིའི་ནང་གི་མཛད་འཕྲིན་ཁག་ལེགས་གྲུབ་ཀྱིས་ཁ་སང་རྒྱ་གར་ཤར་ཕྱོགས་མངའ་སྡེའི་ Odisha འིས་གྲོང་ཁྱེར་Bhubaneswar ནང་དུ་༸ཞབས་སོར་བདེ་བར་འཁོད་བསྟུན་གནམ་ཐང་དུ་ཨོ་ཌི་ཤ་མངའ་སྡེའི་རིག་གཞུང་དང་ཡུལ་འཁོར་སྤྲོ་འཆམ་གྱི་བློན་ཆེན་སྐུ་ཞབས་ Ashok Panda མཆོག་དང་བློན་ཆེན་ Surya Naryana Patra མཆོག་སོགས་ནས་གཞུང་འབྲེལ་གྱི་ཕེབས་བསུའི་སྣེ་ལེན་གཟབ་རྒྱས་ཐོག་མགོན་པོ་མཆོག་ལ་མངའ་སྡེའི་སྤྱི་ཁྱབ་བློན་ཆེན་གྱིས་བཞུགས་གནས་སུ་ཕེབས་སྐྱེལ་ཞུས་འདུག དེ་བཞིན་སྐབས་དེར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Naveen Patnaik མཆོག་གིས་མགོན་པོ་མཆོག་ལ་ཕེབས་བསུ་སྣེ་དང་བཅས་བློན་ཆེན་མཆོག་གི་བཞུགས་གནས་སུ་དབུ་ཁྲིད་རྣམ་གཉིས་དབར་མཇལ་མོལ་གནང་ཡོད་པ་དང་དེ་རྗེས་༸གང་ཉིད་མཆོག་གི་ཐེངས་འདིའི་ཆིབས་བསྒྱུར་དང་འབྲེལ་བའི་གསར་འགོད་པའི་བཅར་འདྲི་ཁག་ལ་བཀའ་ལན་སྩལ་བའི་ཁྲོད་ཨོ་ཌི་ཤ་མངའ་སྡེའི་ནི་གནའ་བོའི་དུས་ནས་བོད་དང་འབྲེལ་བ་ཡོད་པའི་ས་ཁུལ་ཞིག་ཡིན་པ་དང། ད་རེས་སླར་༸གང་ཉིད་མཆོག་ས་གནས་སུ་ཆིབས་བསྒྱུར་མཛད་ཐུབ་པ་ནི་སྐལ་བ་བཟང་པོ་བྱུང་ཞེས་བཀའ་བསྩལ་བ་མ་ཟད། ལྷག་པར་དུ་མགོན་པོ་མཆོག་གིས་འདས་པའི་ལོ་ངོ་ ༣༠ ལྷག་གི་རིང་འཛམ་གླིང་ནང་གི་ཤེས་ཡོན་ཅན་དང་ཚན་རིག་པ་ཚོ་དང་མཇལ་འཕྲད་གནང་བའི་སྐུ་མྱོང་ཁྲོད། བོད་མི་ཚོས་ད་བར་གཅེས་ཉར་བྱས་པའི་རྒྱ་གར་གྱི་གནའ་བོའི་རིག་གཞུང་དེ་དག་ནི་གནའ་བོའི་རིག་གཞུང་ལྟ་བུ་ཞིག་མ་ཡིན་པར་དེང་གི་འཛམ་གླིང་ཐོག་ཧ་ཅང་གི་འབྲེལ་བ་ཡོད་པ་ཞིག་ཆགས་ཡོད་ཅེས་བཀའ་བསྩལ་འདུག ད་དུང་མགོན་པོ་༸གང་ཉིད་མཆོག་གིས་འཛམ་གླིང་ཐོག་ཡིད་སྐྱོ་དགོས་པ་དང་བློ་ཡུལ་ལས་འདས་པའི་ཐབས་སྡུག་གི་ངལ་བ་དུ་མ་འཕྲད་བཞིན་ཡོད་པ་དེ་དག་ནི་དོན་དངོས་ཀྱི་དེང་གི་འཛམ་ གླིང་གི་རྣམ་པ་ཞིག་ཡིན་པ་དང། དེ་ལྟ་བུའི་འཁྲུགས་འཛིངས་དང་མི་གསོད་རེས་ཀྱི་རྣམ་པ་འདི་ནི་འགྲོ་བ་མིའི་ལྷན་སྐྱེས་ཀྱིས་བཟོས་པ་ཞིག་ཡིན་མིན་དྲི་བ་ཆེན་པོ་ཞིག་ཆགས་ཀྱི་ཡོད་པ་དང། ངལ་བ་དེ་དག་འགྲོ་བ་མིའི་གཞི་རྩའི་རང་བཞིན་ལས་བྱུང་བ་ཞིག་ཡིན་ཚེ་དེར་འགྱུར་བ་གང་ཡང་གཏང་རྒྱུ་མེད་པ་དེ་ལྟར་ཡང་། ཚན་རིག་པ་ཚོས་མིའི་རང་བཞིན་དེ་བྱམས་པ་དང་སྙིང་རྗེའི་རང་བཞིན་ཡིན་པ་ར་སྤྲོད་བྱས་ཡོད་ཅེས་བཀའ་བསྩལ་འདུག གཞན་ཡང་༸གོང་ས་མཆོག་གིས་ལུས་ཁམས་བདེ་ཐང་ནི་སྨན་གཅིག་པོར་བརྟེན་ནས་ཡོང་རྒྱུ་ཞིག་མིན་པར་གཙོ་བོ་སེམས་ནང་ཞི་བདེ་དགོས་གལ་ཡིན་པར་ལམ་སྟོན་རྒྱ་ཆེ་བསྩལ་བ་དང་ཆབས་ཅིག་...