༸གོང་ས་མཆོག་ནས་ Better We Better World ཞེས་ཞི་བདེ་དང་ཁོར་ཡུག་ལས་འགུལ་ཚོགས་པའི་ཚོགས་མི་རྣམས་ལ་དམིགས་བསལ་མཇལ་ཁ་བསྩལ་བ།

དེ་རིང་ཟླ་ ༡༡ ཚེས་ ༢༩ ཉིན་སྔ་ཐོག་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་སྤྱིའི་ཁོར་སྲུང་སྐྱོབ་དང་རྒྱལ་སྤྱིའི་ཐོག་ཞི་བདེ་སྐྲུན་ཐབས་ཐད་ཕྱག་ལས་གནང་མཁན་གྱི་ཚོགས་པ་ Better We Better World ཡི་ཚོགས་མི་ ༥༠ ཙམ་ལ་དམིགས་བསལ་གྱི་མཇལ་ཁ་དང་བཀའ་སློབ་བཀའ་དྲིན་བསྩལ་འདུག སྐབས་དེར་ཚོགས་པ་དེས་༸གོང་ས་༸སྐྱབས་མགོན་ཆེན་པོ་མཆོག་ལ་ཚོགས་པའི་ལས་དོན་གནང་སྒོ་ཁག་སྙན་གསེང་ཞུས་ཡོད་པ་དང་། རྒྱུན་དུ་༸གོང་ས་༸སྐྱབས་མགོན་ཆེན་པོ་མཆོག་གིས་སྙིང་རྗེ་བསྐྱར་གསོ་གནང་དགོས་གལ་ཐོག་བཀའ་སློབ་ཕེབས་དོན་བཞིན་བཀའ་སློབ་བསྩལ་བ་རྣམས་ཕྱོགས་སྒྲིག་ཞུས་པའི་དཔེ་དེབ་ཞིག་མགོན་པོ་༸གང་ཉིད་མཆོག་ལ་ཕུལ་ཡོད་པ་མ་ཟད། དེབ་དེའི་ནང་བཀོད་པའི་བཀའ་སློབ་དེ་དག་ལག་བསྟར་གནང་ཕྱོགས་སོགས་ཀྱི་ཐད་ལམ་སྟོན་ཞུས་འདུགགཞི་རྩའི་ Better We Better World ཞེས་པའི་ཚོགས་པ་དེའི་ཚོགས་མི་རྣམས་ཆེད་མངགས་ཡུ་རོབ་རྒྱལ་ཁབ་ཕ་རན་སི་ནས་བཞུགས་སྒར་དྷ་རྨ་ས་ལར་ཕེབས་ཏེ་ཚེས་ ༢༤ ཉིན་ནས་དབུ་འཛུགས་ཀྱིས་སང་རེས་གཟའ་པ་སངས་བར་བཞུགས་སྒར་དུ་རྟེན་གཞི་བྱས་པའི་ཆོས་ནོར་གསོལ་མགྲོན་ཁང་དུ་བཀའ་ཁྲི་ཟུར་པ་མཁས་དབང་སློབ་དཔོན་ཟམ་གདོང་རིན་པོ་ཆེ་མཆོག་དབུ་བཞུགས་ཐོག་ཚད་མེད་བཞིའི་ཐོག་ཟབ་ཁྲིད་དང་བགྲོ་གླེང་གནང་བཞིན་ཡོད་པ་རེད། དེ་རིང་ཚོགས་པ་དེའི་ཚོགས་མི་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་གི་གསེར་ཞལ་མཇལ་ཞུའི་སྐབས་ལྷན་བཅར་ཡོད་པའི་བཀའ་ཁྲི་ཟུར་པ་མཁས་དབང་སློབ་དཔོན་ཟམ་གདོང་རིན་པོ་ཆེ་མཆོག་གིས་༸གང་ཉིད་མཆོག་གི་མཇལ་ཁ་ཞུ་དོན་དང་ཚོགས་པ་དེའི་དགོས་དམིགས་གང་ཡིན་སོགས་ངོ་སྤྲོད་གནང་སོང་། དེ་རིང་མཇལ་ཁ་གྲུབ་མཚམས་སུ་ཚོགས་པ་དེའི་ལས་འཆར་འགན་འཛིན་སྐུ་ཞབས་ Khoa  Nguyen ལགས་སུ་བཞུགས་སྒར་དུ་ཕེབས་དོན་ཇི་ཡིན་དང་འབྲེལ་བཀའ་འདྲི་ཁག་གཅིག་ཞུས་པར་ང་ཚོ་ཕ་རན་སི་ནས་ཡོང་བའི་ཚོགས་པ་འདིའི་ཚོགས་མིའི་ཁོངས་སུ་བཅོས་སྒྱུར་བཏང་ཐུབ་མཁན་དང་།...