༸གོང་ས་མཆོག་ལ་རི་བོ་དགེ་ལྡན་པ་ཡོངས་ཀྱིས་རྗེ་ཙོང་ཁ་པ་ཆེན་པོའི་གཟེངས་རྟགས་འབུལ་བཞེས་མཛད་སོང་།

དེའང་དེ་རིང་ཕྱི་ཟླ་ ༡༡ ཚེས་ ༢༤ ཉིན་འཇམ་མགོན་རྒྱལ་བའི་རྒྱལ་ཚབ་༸སྐྱབས་རྗེ་དགའ་ལྡན་ཁྲི་རིན་པོ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དབུ་བཞུགས་ཐོག ཤར་བྱང་གི་ཆོས་རྗེ་རྣམ་གཉིས་གཙོས་གདན་ས་ཁག་གི་མཁན་རིན་པོ་ཆེ་རྣམ་པ། བགྲོ་གླེང་གི་གསུང་བཤད་གནང་མཁན་བཅས་དྲ་ཐོག་བརྒྱུད་ནས་ལྷན་ཞུགས་ཀྱིས་མངོན་པ་ཀུན་བཏུས་ཀྱི་བགྲོ་གླེང་ཆེན་མོ་དབུ་འཛུགས་གནང་ཡོད་པ་རེད།བགྲོ་གླེང་དེའི་ཐོག་མར་འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་དགའ་ལྡན་ཁྲི་རིན་པོ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གིས་དབུ་འབྱེད་ཀྱི་མཛད་སྐོར་ད་རེས་བགྲོ་གླེང་གི་ཆ་ཤས་བཞེས་མཁན་ཚོའི་ངོས་ནས་རང་ཉིད་ཀྱི་དཔྱད་རྩོམ་དེའི་ཐོག་ནས་གསན་གཟིགས་གནང་མཁན་ཚོར་ཐུགས་ཕན་སོས་པ་ཞིག་དང་ལྷག་པར་དུ་ནང་པའི་གཞུང་ཆེན་དག་ལ་བློ་ལྷག་པར་སྐྱེ་ཐབས་ཐོག་བགྲོ་གླེང་ལྷུག་པོ་གནང་རོགས་ཞེས་གཞེན་སྐུལ་གནང་བ་དང་། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་བརྒྱུད་རིས་མེད་ཀྱི་གཞུང་ཆེན་དག་ལ་བགྲོ་གླེང་ལྷུག་པོ་གནང་གལ་ཡིན་པར་ལམ་སྟོན་བཀའ་སྩལ་ཕེབས་དོན་བཞིན་གནང་དགོས་པར་ལམ་སྟོན་གནང་འདུག རྩ་བའི་ཐེངས་འདིའི་དྲ་ཐོག་བརྒྱུད་ནས་མངོན་པ་ཀུན་བཏུས་ཀྱི་བགྲོ་གླེང་ཆེན་མོའི་ཐོག་ལ་རྒྱལ་སྤྱིའི་ཙོང་ཁ་པའི་ལོར་རྩོམ་རྩལ་འགྲན་བསྡུར་གྱི་དཔྱད་རྩོམ་དང་སྙན་རྩོམ་ཕྱོགས་བསྒྲིགས་ཕྱག་དེབ་གཉིས་དབུ་འབྱེད་གནང་བ་དང་། དེ་རྗེས་རིམ་བཞིན་གསུང་བཤད་གནང་མཁན་ཚོས་བགྲོ་གླེང་གི་ཆ་ཤས་བཞེས་ཡོད་པ་རེད།གསར་འགོད་པས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་བགྲོ་གླེང་གོ་སྒྲིག་ཚོགས་ཆུང་གི་ཚོགས་གཙོ་༸དཔལ་ལྡན་འབྲས་སྤུངས་སྒོ་མང་མཁན་རིན་པོ་ཆེ་བློ་བཟང་རྒྱལ་མཚན་མཆོག་ལ་སྤྱིར་ད་བར་བགྲོ་གླེང་ཐེངས་ ༦ ཚོགས་པའི་དགོས་དམིགས་དང་ད་རེས་མངོན་པ་ཀུན་བཏུས་ཀྱི་བགྲོ་གླེང་ཆེན་མོ་དེ་གནང་བའི་དགོས་དམིགས་གང་ཡིན་དང་བསྟན་བྱ་གཙོ་བོ་ཇི་ཆགས་སོགས་ཀྱི་སྐོར་ལ་བཀའ་འདྲི་ཁག་ཅིག་ཞུས་ཡོད།

དེ་རིང་རྗེ་ཙོང་ཁ་པ་ཆེན་པོ་མཆོག་གི་དགོངས་རྫོགས་མཆོད་འབུལ་དགའ་ལྡན་ལྔ་མཆོད་དང་བསྟུན།  འཇམ་མགོན་རྒྱལ་བའི་གདུང་ཚབ་དགའ་ལྡན་ཁྲི་རིན་པོ་ཆེ་་མཆོག་གིས།  དགེ་ལྡན་པ་ཡོངས་ཀྱི་ཚབ་མཛད་དེ་རི་བོ་དགེ་ལྡན་པ་སྤྱིའི་ཐོག་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་བའི་བསྟན་པ་སྤྱི་དང་། ཁྱད་པར་དུ་འཇམ་མགོན་བླ་མའི་བསྟན་པར་མཛད་རྗེས་དང་བཀའ་དྲིན་འགྲན་ཟླ་མེད་པར་ངོས་འཛིན་གྱིས་རྗེ་ཙོང་ཁ་པ་ཆེན་པོའི་གཟེངས་རྟགས་ཤིག་འབུལ་ལམ་ཞུས་ཡོད་པ་རེད།  དེ་རིང་སྔ་དྲོ་རྒྱ་གར་ལྷོ་ཕྱོགས་མོན་གྷོ་བོད་མིའི་གཞིས་ཆགས་སུ་རྟེན་གཞི་བྱས་པའི་དགའ་ལྡན་བླ་སྤྱི་རུ་༸འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་།  ཤར་བྱང་ཆོས་རྗེ་རྣམ་པ་གཉིས།  དགའ་ལྡན་ཁྲི་ཟུར་རིན་པ་ཆེ།  ཇོ་ནང་བསྟན་བདག་རིན་པོ་ཆེ།  བླ་སྤྲུལ་དགེ་བཤེས་དང་དགེ་འདུན་འདུས་མང་། དེ་བཞིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་། སྤྱི་འཐུས་ཚོགས་གཙོ་མཆོག    ཁྲིམས་ཞིབ་པ་ཆེ་བ་མཆོག  ད་རེས་ཀྱི་དུས་དྲན་ཁྱད་པར་ཅན་དེར་ཆེད་མངགས་ཕེབས་པའི་ཕྱི་རྒྱལ་གྱི་བོད་རིག་པའི་མཁས་དབང་དང་གཞན་ཡང་སྐུ་མགྲོན།   བོད་མི་མང་ཚོགས་བཅས་མི་གྲངས་སྟོང་ཕྲག་འགའ་ཤས་བརྒལ་བ་ཞིག་འདུ་འཛོམས་བྱུང་བའི་ཁྲོད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རི་བོ་དགེ་ལྡན་ཡོངས་ཀྱི་ཚབ་མཛད་དེ་དགའ་ལྡན་ཁྲི་རིན་པོ་ཆེ་མཆོག་གི་དབུས་པའི་ཤར་བྱང་གི་ཆོས་རྗེ་རྣམ་གཉིས་བཅས་ཀྱིས་རྗེ་ཙོང་ཁ་པ་ཆེན་པོ་མཆོག་སྐུ་མྱ་ངན་ལས་འདས་ཏེ་མི་ལོ་དྲུག་བརྒྱ་འཁོར་བ་དང་། ༸གང་ཉིད་ཀྱིས་ཕྱག་བཏབ་པའི་དགའ་ལྡན་རྣམ་པར་རྒྱལ་བའི་གླིང་བཅས་དུས་ཚིགས་ཁྱད་པར་ཅན་དེ་དང་བསྟུན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྗེ་ཙོང་ཁ་པ་ཆེན་པོའི་གཟེངས་རྟགས་འབུལ་བཞེས་མཛད་སོང་། མཛད་སྒོའི་ཐོག་དགའ་ལྡན་ཤར་རྩེའི་མཁན་པོ་བྱང་ཆུབ་སངས་རྒྱས་མཆོག་གིས་དེ་རིང་གི་དུས་དྲན་ཁྱད་པར་ཅན་དང་འབྲེལ་བའི་དགའ་བསུའི་གསུང་བཤད་ནང་རྗེ་ཙོང་ཁ་པའི་གདན་སའི་ཁྱད་ཆོས་དང་གང་ཉིད་ཀྱི་མཛད་རྣམ་སྙིང་བསྡུས་བཅས་པ་ངོ་སྤྲོད་གནང་ཡོད་པ་མ་ཟད།   ༸གོང་ས་༸སྐྱབས་མགོན་ཆེན་པོ་མཆོག་གིས་རྗེ་ཙོང་ཁ་པའི་རྣམ་ཐར་དང་མཛད་པ་བཅས་ཀྱི་ཕྱག་དེབ་ཁག་གཅིག་དབུ་འབྱེད་མཛད་པ་དང་འབྲེལ།  མཛད་སྒོའི་ཐོག་ད་དུང་སོག་པོའི་དགའ་ལྡན་མགོན་པའི་མཁན་པོ་བླ་མ་ཆོས་ཀྱི་རྒྱ་མཚོ་མཆོག་གིས་ལོ་རྒྱུས་ཁྲོད་ཀྱི་བོད་སོག་བར་གྱི་འབྲེལ་བ་དང་།  ལྷག་པར་སོག་ཡུལ་དུ་བར་སྐབས་ཤིག་ལ་ཆབ་སྲིད་དབང་གིས་ནང་པའི་བསྟན་པ་དང་རིག་གཞུང་ལ་དཀའ་ངལ་འཕྲད་ཡོད་ཀྱང་ད་ཆ་སོག་ཡུལ་ནང་བསྐྱར་གསོ་བྱུང་སྟེ་སློབ་གཉེར་ཡར་ཐོན་འགྲོ་བཞིན་པ་སོགས་ཀྱི་གསུང་བཤད་བགན་ཡོད་པ་རེད། དྲུག་བརྒྱའི་དུས་དྲན་མཛད་སྒོ་དེའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་དེ་རིང་ཚོགས་འདུ་དེའི་གལ་གནད་སོགས་ཀི་སྐོར་གསུང་བཤད་གནང་བ་མ་ཟད་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཀྱང་སྐབས་དེར་བོད་བརྒྱུད་ནང་བསྟན་གྱི་གལ་གནད་དང་ད་ལྟའི་འཛམ་གླིང་སྤྱིའི་འགྱུར་འགྲོས་ལ་གཞིགས་པའི་བོད་བརྒྱུད་ནང་བསྟན་གྱི་མིའི་བདེ་དོན་ཐོག་ཕན་རླབས་བསྒྲུབ་པའི་ནུས་པ་ཡོད་སྐོར་སོགས་ཀྱི་གསུང་བཤད་གནང་ཡོད། སྐབས་དེར་༸འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་༸རྗེ་ཙོང་ཁ་པ་ཆེན་པོ་མཆོག་གི་མདོ་བསྔགས་ཀྱི་བསྟན་པ་སྤྱི་དང་ལྷག་པར་དུ་ལྟ་གྲུབ་ཀྱི་མཛད་རྗེས་བཅས་ཀྱི་སྐོར་གསུང་སྟེ་རྒྱུན་དུ་ནས་ང་ཚོ་ཚང་མས་ཆོས་ལ་དད་མོས་བྱས་པ་ཙམ་མིན་པར་ཉམས་ལེན་ཡོང་ཐབས་སོགས་ཀྱི་ལམ་སྟོན་བསྩལ་སོང་། དེ་རྗེས་དེ་རིང་གི་དྲུག་བརྒྱའི་དུས་དྲན་མཛད་སྒོིའི་སྐུ་མགྲོན་གཙོ་བོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གི་དུས་དྲན་དང་འབྲེལ་བའི་གསུང་བཤད་གནང་མཁན་ཡོངས་དང་ལྷག་པར་དུ་ད་རེས་ཡུལ་ཁག་འདྲ་མིན་ནས་སོ་སོའི་ཕ་མེས་ཀྱི་ཆོས་བརྒྱུད་ལ་ལྟོས་མེད་སྤྱིར་སངས་རྒྱས་པའི་ཆོས་དང་ཡང་སྒོས་སུ་ཙོང་ཁ་ཆེན་པོའི་ལེགས་བཤད་ལ་དོ་སྣང་གནང་བར་ཐུགས་རྗེ་ཞུས་པ་དང་འབྲེལ་དེ་རིང་དགའ་ལྡན་ལྔ་མཆོད་ཀྱི་དུས་ཆེན་དང་བསྟུན་རྗེ་དགེ་འདུན་གྲུབ་ཀྱི་མཛད་པའི་ཤར་གངས་རི་མའི་བཀའ་ཆོས་བཀའ་དྲིན་བསྩལ་གནང་མཛད་ཡོད་པ་དང་། དེ་རྗེས་དེ་རིང་གི་དྲུག་བརྒྱའི་དུས་དྲན་དང་འབྲེལ་བའི་དགའ་ལྡན་ལྔ་མཆོད་ཀྱི་གཟེངས་རྟགས་འབུལ་བཞེས་མཛད་སྒོ་དེ་ལེགས་གྲུབ་བྱུང་ཡོད་པ་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ནས་ཉིན་གྲངས་གསུམ་རིང་དགའ་ལྡན་བྱང་རྩེ་གྲྭ་ཚང་དུ་སྐུ་བཞུགས་མཛད་རྒྱུ་ཡིན་པ་རེད།