༸དཔལ་ལྡན་འབྲས་སྤུངས་བློ་གསལ་གླིང་གི་དགེ་འདུན་པ་ ༩༥ ལྷག་ལ་ཏོག་དབྱིབས་ནད་རྟགས་ཐོན་འདུག

རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་༸དཔལ་ལྡན་འབྲས་སྤུངས་བློ་གསལ་གྲྭ་ཚང་དུ་འདས་པའི་གཟའ་མཇུག་ཁྲོད་དགེ་འདུན་པ་ཁྱོན་ ༣༥༠ ལྷག་ཙམ་ལ་བརྟག་དཔྱད་གནང་རྗེས་དགེ་འདུན་པ་ཁྱོན་ ༩༥ ལྷག་ལ་ཏོག་དབྱིབས་རིམས་ནད་ཀྱི་ནད་རྟགས་ཐོན་ཡོད་པ་རེད།དེ་རིང་ཉིན་རྒྱབ་༸དཔལ་ལྡན་འབྲས་སྤུངས་བློ་གསལ་གླིང་གི་༸སྐྱབས་རྗེ་མཁན་རིན་པོ་ཆེ་མཆོག་གིས་དགོན་པའི་ངོ་དེབ་བརྒྱུད་གནད་དོན་དེའི་ཐོག་གསལ་བཤད་དང་འབྲེལ། ཟླ་ ༡༠ ཚེས་ ༢ སྟེ་རྒྱ་གར་གྱི་མེས་པོ་དམ་པ་གྷཱན་དྷཱི་མཆོག་གི་འཁྲུངས་སྐར་ཉིན་མོར་དགོན་པའི་དཔེ་ཁྲིད་དགེ་བཤེས་ཤིག་ལ་གློ་བུར་དུ་ལུས་ཀྱི་ཚ་བ་རྒྱས་པ་སོགས་ཀྱི་གནས་ཚུལ་ཐོན་འཕྲལ་དགོན་པ་རང་གིས་བརྟག་དཔྱད་གནང་འབྲས་སུ་ཁོང་ལ་ཏོགས་དབྱིབས་རིམས་ནད་ཀྱི་ནད་རྟགས་ཐོན་པ་དང་། དེའི་ཕྱི་ཉིན་གཞིས་ཆགས་ཀྱི་འཕྲོད་བསྟེན་སྨན་ཁང་ནས་སླར་ཡང་བརྟག་དཔྱད་གནང་སྐབས་སུའང་ནད་རྟགས་ར་འཕྲོད་བྱུང་བ་བཞིན། དགོན་པ་དང་ས་གནས་འགོ་འཛིན་ལས་ཁུངས་གཉིས་ཀྱིས་དགེ་བཤེས་ལགས་ཀྱི་འབྲེལ་ཡོད་ཁང་མཚན་དང་། འབྲེལ་འདྲིས་ཡོད་པའི་དགེ་འདུན་པ་ཁྱོན་ ༣༥༠ ལྷག་ལ་བརྟག་དཔྱད་གནང་རྗེས་ཁ་སང་དགོང་དྲོའི་བར་དགོན་པའི་དགེ་འདུན་པ་ཁྱོན་ ༩༥ ལྷག་ལ་ཏོག་དབྱིབས་རིམས་ནད་ཀྱི་ནད་རྟགས་ཐོན་ཡོད་པ་ར་འཕྲོད་བྱུང་འདུག མཁན་རིན་པོ་ཆེ་མཆོག་གིས་དགོན་པའི་ངོས་ནས་ད་རེས་ཀྱི་གནས་ཚུལ་དེ་ཐོན་མ་ཐག་ཏུ་དགོན་པའི་ནང་ཆོས་ར་འཚོགས་རྒྱུ་དང་སྤྱི་ཐབས། དཔེ་མཛོད་ཁང་སོགས་ཡོངས་རྫོགས་སྒོ་བརྒྱབ་ནས་ནད་རྟགས་ཐོན་པའི་དགེ་འདུན་པ་རྣམས་འགོག་དབྱེ་ཟུར་འཇོག་ཁང་དུ་བཞག་རྒྱུ་དང་ཁོང་རྣམ་པར་དགོས་ངེས་ཅན་གྱི་མཐུན་འགྱུར་གང་དགོས་འཐུས་ཚང་གནང་བཞིན་ཡོད་པར་མ་ཟད། ཕྱི་ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གནད་དོན་སྙན་སེང་དང་འབྲེལ་ནད་ཡམས་དེ་ཞི་བར་ཐུགས་བརྟག་ས་བོན་ཞིག་སྩལ་རྒྱུའི་གསོལ་འདེབས་ཞུས་དོན་ལྟར་༸གོང་ས་མཆོག་གིས་ཐུགས་སྨོན་དང་འབྲེལ་དགོན་པའི་འདུས་མང་ཡོངས་ནས་སྒྲོལ་མའི་མཚན་སྔགས་གསོག་སྒྲུབ་དགོས་པའི་ལམ་སྟོན་ཕེབས་པ་བཞིན་དགེ་འདུན་པ་སྒེར་སོ་སོ་བསྙེན་མཚམས་ལ་བཞུགས་ཏེ་སྒྲོལ་མ་དང་སྨན་ལྷ། དཔལ་ལྡན་ལྷ་མོའི་གཟུངས་སྔགས། འཕགས་པ་ཡངས་པའི་གྲོང་ཁྱེར་དུ་འཇུག་པའི་མདོ་སོགས་གསོག་སྒྲུབ་དགོས་པའི་སྐུལ་མ་མཛད་འདུག མཁན་རིན་པོ་ཆེ་མཆོག་གིས་ད་དུང་འཛམ་གླིང་ཡོངས་ལ་ནད་ཡམས་དེ་ཁྱབ་གདལ་འབྱུང་བཞིན་པའི་ཁྲོད་འདིར་ཕྱི་གསལ་ནང་གསལ་གྱི་སྒོ་ནས་མང་ཚོགས་ལ་གནད་དོན་དེ་སྙན་སེང་དང་འབྲེལ། ནད་ཡམས་དེས་མནར་བའི་མི་མང་སྤྱི་དང་སྒོས་དགོན་པའི་ནང་ནད་རྟགས་ཐོན་པའི་དགེ་འདུན་པ་རྣམས་མགྱོགས་མྱུར་དྲག་སྐྱེད་ཡོང་བར་ཐུགས་སྨོན་དང་།...