གཞོན་ནུའི་ལས་འགུལ་བ་ཁག་གཅིག་གིས་རྒྱལ་ས་ལྡི་ལིའི་རྒྱའི་གཞུང་ཚབ་ཏུ་རྒོལ་འཆོང་གནང་བ།

བོད་ཀྱི་དབུས་གཞོན་ནུ་ལྷན་ཚོགས་ཀྱིས་འདི་ལོའི་གསུམ་བཅུའི་དུས་དྲན་ཐེངས་ ༦༠ པ་དང་བསྟུན་རྒྱ་གར་གྱི་རྒྱལ་ས་ལྡིར་གཞི་རྒྱ་ཆེ་བའི་ལས་འགུལ་ཞིག་སྤེལ་རྒྱུར་ཐག་གཅོད་གནང་དོན་བཞིན་དེ་རི་སྔ་དྲོ་གཞོན་ནུའི་ལས་འགུལ་བ་མི་གྲངས་ ༡༥༠ ཡིས་རྒྱལ་ས་ལྡི་ལིའི་རྒྱའི་གཞུང་ཚབ་མདུན་དུ་རྒོལ་འཆོང་གི་ལས་འགུལ་སྤེལ་བ་མ་ཟད་ལས་འགུལ་བ་མི་གྲངས་ ༡༠༠༠ བརྒལ་བས་གཞུང་ཚབ་ཀྱི་ཉེ་འཁྲིས་ Teen Murti ཁུལ་དུའང་ངོ་རྒོལ་སྐད་འབོད་ཀྱི་ལས་འགུལ་སྤེལ་ཡོད་པ་རེད།ལྡི་ལི་ས་གནས་སྐོར་སྲུང་བས་ཐེངས་འདིའི་གསུམ་བཅུའི་དུས་དྲན་ཐོག་བོད་མི་ཚོས་གཞི་རྒྱ་ཆེ་བའི་ལས་འགུལ་སྤེལ་བར་སྔོན་ཚུད་ནས་ཚོད་དཔག་གནང་སྟེ་རྒྱའི་གཞུང་ཚབ་ཡོངས་རྫོགས་བཙོན་ར་ལྟ་བུར་ལྕགས་རིས་བསྐོར་ཡོད་པ་མ་ཟད། གཡས་གཡོན་ས་གནས་ཡོངས་ལ་སྐོར་སྲུང་བ་འགྲེམས་འཇོག་གནང་ཡོད་ཀྱང་། ལས་འགུལ་བ་ཚོས་དེར་ལྟོས་མེད་ཐོག་ནས་སྔ་དྲོ་ཚོུད་ ༡༡ ཡོལ་ཙམ་ལ་གློ་བུར་དུ་སོ་སོའི་ངོ་གདོང་ལ་བོད་ཀྱི་རྒྱལ་དར་དང་བོད་རང་བཙན་ཟེར་བ་སོགས་ཀྱི་འབོད་ཚིག་འདྲ་མིན་བྲིས་པའི་གཞོན་ནུའི་ལས་འགུལ་བ་ཕོ་མོ་གྲངས་ ༡༥༠  ཡིས་རྒྱའི་གཞུང་ཚབ་ཕྱོགས་སུ་རྒོལ་འཆོང་གནང་ཡོད་པ་རེད།བོད་ཀྱི་གཞོན་ནུ་ལྷན་ཚོགས་ཀྱི་ལས་འགུལ་བ་བོད་མི་དེ་དག་ནི་བལ་ཡུལ་དང་རྒྱ་གར་གྱི་ས་གནས་འདྲ་མིན་ནས་ཕེབས་པ་ཞིག་ཆགས་ཀྱི་ཡོད་པ་དང་། དེ་རྣམས་ཀྱི་དགོས་འདུན་གཙོ་བོ་བོད་ནང་བོད་མི་གྲངས་ ༡༦༠ ལྷག་གིས་རང་ལུས་མེར་བསྲེགས་གནང་ཡོད་པར་གདུང་སེམས་མཉམ་བསྐྱེད་དང་། ལྷག་པར་དུ་རྒྱ་ནག་གཞུང་གིས་བོད་བཙན་བཟུང་བྱས་ཏེ་གཞིས་ལུས་བོད་མི་ཚོ་དུས་ད་ལྟའང་མུ་མཐུད་མི་སྤྱོད་ལས་འདས་པའི་མནར་གཅོད་མྱོང་བཞིན་པ་ལ་མི་བཟོད་པའི་རྣམ་འགྱུར་ཆེད་བཏོན་གནང་བ་ཞིག་ཡིན་པ་རེད།རྒྱའི་གཞུང་ཚབ་ཏུ་རྒོལ་འཆོང་གནང་མཁན་གཞོན་ནུའི་ལས་འགུལ་བ་དེ་དག་གིས་ཆུ་ཚོད་ཕྱེད་ཀ་ཙམ་གྱི་རིང་ངོ་རྒོལ་གནང་མཐར་ས་གནས་སྐོར་སྲུང་བས་ལས་འགུལ་བ་ཕོ་མོ་ ༡༥༠ ཡོད་པ་ཚང་མ་ Chanakyapuri ས་གནས་སྐོར་སྲུང་ལས་ཁང་དང་།...