ཉམ་ཐག་དང་གསར་འབྱོར་ལ་སྡོད་ཁང་ཐད་ནང་སྲིད་བཀའ་བློན་མཆོག་ལ་དྲི་རྩད་ནན་པོ་གནང་སོང་།

ཁ་སང་ཉིན་རྒྱབ་ཀྱི་གྲོས་ཚོགས་ཚོགས་དུས་ཐོག་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ནང་སྲིད་བཀའ་བློན་གཅིག་ལྕོག་སྐུ་ཞབས་སྤེན་པ་ཚེ་རིང་མཆོག་གིས་བཀའ་ཤག་གོང་མའི་ཕྱི་ལོ་ ༢༠༢༠ ནས་ ༢༠༢༡ བར་གྱི་ལས་བསྡོམས་སྙན་སྒྲོན་དང་དེ་འབྲེལ་སྤྱི་འཐུས་རྒྱུན་ལས་ཀྱིས་དྲི་བ་ཕེབས་ཁག་ལ་ལན་འདེབས་གསལ་བཤད་གནང་བ་དང་སྦྲགས།  དེ་རྗེས་ནང་སྲིད་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་འཐུས་རྣམ་པས་བགྲོ་གླེང་གི་ཆ་ཤས་བླངས་ཡོད་པ་དང་།   བགྲོ་གླེང་ལས་རིམ་ཐོག་སྤྱི་འཐུས་རྣམ་པས་ཉམ་ཐག་དང་གསར་འབྱོར་ལ་སྡོད་ཁང་སོགས་ཀྱི་ཐད་ནང་སྲིད་བཀའ་བློན་མཆོག་ལ་དྲི་རྩད་ནན་པོ་གནང་སོང་།དེ་ཡང་ཁ་སང་གྲོས་ཚོགས་ཚོགས་དུས་གཉིས་པའི་ལས་ཉིན་གཉིས་པའི་ཉིན་རྒྱབ་དང་དེ་རིང་ལས་ཉིན་གསུམ་པའི་སྔ་དྲོའི་དུས་ཡུན་རིང་ནང་སྲིད་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་འཐུས་ ༡༤ ཙམ་ནས་བགྲོ་གླེང་གི་ཆ་ཤས་བླངས་ཏེ་བགྲོ་གླེང་ལྷུག་པོ་གནང་ཡོད།  སྤྱི་འཐུས་ཁག་ཅིག་གིས་བོད་མིའི་སྤྱི་ཚོགས་ཁྲོད་ཉམ་ཐག་ཞིབ་འཇུག་ཚད་ལྡན་ཞིག་གནང་དགོས་པའི་སྐོར་དགོངས་ཚུལ་དང་།  དེ་བཞིན་སྒྲིག་འཛུགས་ནས་ཉམ་ཐག་གི་ཚད་འཛིན་ས་དེ་ག་རེ་ཆགས་མིན་གྱི་དྲི་བ་སོགས་ཕུལ སོང་བ་དང་།  སྐབས་དེར་ནང་སྲིད་བཀའ་བློན་མཆོག་གིས་ཉམ་ཐག་ཞིབ་འཇུག་སླད་སྒྲིག་འཛུགས་ནས་ནང་འཕྲོད་ཤེས་གསུམ་གྱི་གནས་རིམ་མཐོ་བའི་ལས་བྱེད་རེར་ས་གནས་ནང་ཕེབས་ནས་ཞིབ་འཇུག་གནང་དགོས་པར་མངགས་པ་ལྟར།  ད་བར་ལྷོ་ཕྱོགས་གཞིས་ཆགས་ལྔ་དང་ཧི་མ་ཅལ་ཁུལ་དུ་ཕེབས་ཟིན་པ་དང་། རིང་མིན་བྱང་ཤར་ཁུལ་དུ་ཕེབས་རྒྱུ་ཡིན་པས།   རིམ་བཞིན་དེར་འབྲེལ་ཐད་ཞིབ་འཇུག་ཟིན་པའི་རྗེས་ཉམ་ཐག་ཞིབ་འཇུག་གི་སྙན་ཐོ་གྲོས་ཚོགས་ལ་འབུལ་ཐུབ་པ་གནང་གི་ཡིན་ཞེས་གསུངས་སོང་།དེ་བཞིན་གསར་འབྱོར་ཚོར་སྡོད་ཁང་དང་འབྲེལ་བགྲོ་གླེང་ཁག་ཅིག་བྱུང་བ་དང་སྐབས་དེར་སྤྱི་འཐུས་རྣམ་པས་ལྡེ་ར་ལྡུན་དུ་ཆོལ་གསུམ་གསར་འབྱོར་སྐྱིད་སྡུག་ཚོགས་པའི་མཚན་གཞུང་ནང་ཡོད་པའི་མི་གྲངས་ ༡༠༨ ལ་སྡོད་ཁང་གི་སྐུ་ངལ་འཕྲད་པ་དེར་དགོངས་པ་བཞེས་སྐྱོང་ཡོང་བ་དང་།  ཕྱོགས་མཚུངས་ནོར་བུ་གླིང་ཁའི་ཆོལ་གསུམ་གསར་འབྱོར་ཚོའི་བདེ་སྡུག་སྙན་གསེང་དང་། ལྷག་པར་འཛིན་སྐྱོང་ནས་རྗེས་འབྱོར་ཚོར་དམིགས་སུ་བཀར་ནས་སྡོད་ཁང་གནང་རོགས་ཞེས་གསུངས་སོང་།  སྐབས་དེར་ནང་སྲིད་བཀའ་བློན་མཆོག་གིས་སྡོད་ཁང་དང་འབྲེལ་ལས་དོན་གནང་ཟིན་པ་ཁག་འགྲེལ་བརྗོད་དང་སྦྲགས།  སྐབས་ ༡༦ ནས་སྡོད་ཁང་དང་འབྲེལ་རྒྱ་ཆེ་ས་ནས་འཆར་གཞི་ལྡན་པའི་ཐོག་ནས་ལས་གཞི་སྒྲིག་རྒྱུ་ཡིན་པ་མ་ཟད།  ...