ད་ལྟའི་ཆར་བདམས་ཐོན་སྤྱི་འཐུས་རྣམ་པའི་ནང་མོལ་ཚོགས་འདུའི་ཐག་གཅོད་སྐོར་ཡོངས་གྲགས་གང་ཡང་གནང་མ་སོང་།

བོད་མིའི་སྒྲིག་འཛུགས་ཀྱི་བསྟི་གནས་གངས་སྐྱིད་དུ་རྟེན་གཞི་བྱས་པའི་སྲིད་སྐྱོང་ཚོགས་ཁང་དུ་སྐབས་ ༡༧ པའི་བདམས་ཐོན་བོད་མི་མང་སྤྱི་འཐུས་རྣམ་པའི་དམ་འབུལ་དང་འབྲེལ་བའི་དཀའ་རྙོག་ཁག་གསལ་ཐབས་སླད་དུ་བདམས་ཐོན་སྤྱི་འཐུས་རྣམ་པའི་དབར་ཉིན་གྲངས་གཉིས་དང་ཕྱེད་ཀ་ཙམ་གྱི་རིང་ནང་མོལ་ཚོགས་འདུ་འཚོགས་ཏེ་ཚོགས་འདུའི་གྲུབ་དོན་ཐག་གཅོད་ཅི་བྱུང་ད་ལྟའི་ཆར་ཡོངས་གྲགས་གནང་རྒྱུ་མིན་པར་ཐུགས་ཐག་བཅད་ཡོད་ཀྱང་། ཁུངས་བདེན་གནས་ཚུལ་ཤེས་རྟོགས་བྱུང་བར་གཞིགས་ཚེ་བདམས་ཐོན་སྤྱི་འཐུས་རྣམ་པའི་དབར་དམ་འབུལ་དང་འབྲེལ་བའི་ངལ་བ་དེ་ནང་འགྲིག་གནང་སྟེ་སེལ་རྒྱུའི་ཐབས་ལམ་ཞིག་གི་ཐོག་ཏུ་འབབ་མ་ཐུབ་སྟབས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་བཀའ་སློབ་ལམ་སྟོན་ཆེད་ལྷ་སྙན་སྒྲོན་འབུལ་ཞུ་རྒྱུར་གྲོས་འཆམ་བྱུང་དོན་ལྟར་ཁ་སང་ཉིན་རྒྱབ་ཏུ་བདམས་ཐོན་སྤྱི་འཐུས་རྣམ་པའི་སྐུ་ཚབ་ཁག་ཅིག་༸དཔལ་ལྡན་དགའ་ལྡན་ཕོ་བྲང་ཡིག་ཚང་ལ་ཆེད་བཅར་གྱིས་མཚན་འཁོད་ཞུ་སྙན་དེ་དངོས་སུ་ཕུལ་ཟིན་ཡོད་པ་རེད་འདུགནང་མོལ་གྱི་བཞུགས་མོལ་ཚོགས་འདུ་སྐབས་སུ་གནད་དོན་ཐད་ལ་ཐག་གཅོད་གནང་སྐབས་ཚོགས་འདུར་ཆེད་བཅར་ཞུས་པའི་བདམས་ཐོན་སྤྱི་འཐུས་ ༤༤ ནས་གསུམ་ཆ་གཉིས་ཀྱི་མོས་མཐུན་རྒྱབ་སྐྱོར་དགོས་པ་བཟོས་ཡོད་པ་ལྟར་ཉིན་གྲངས་གཉིས་ལྷག་གི་རིང་ཚོགས་འདུ་ཐོག་བདམས་ཐོན་སྤྱི་འཐུས་རྣམ་པས་ད་ལྟའི་དཀའ་རྙོག་དེ་གསལ་ཐབས་སུ་བར་བརྒལ་ཚོགས་གཙོའི་མདུན་ནས་དམ་འབུལ་བཞེས་མཁན་དང་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གི་༸སྐུ་པར་དང་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་མདུན་ནས་དམ་འབུལ་བཞེས་མཁན་གཉིས་ཀར་ངོས་ལེན་གནང་རྒྱུ་དང་། བདམས་ཐོན་སྤྱི་འཐུས་ཚང་མས་བཅའ་ཁྲིམས་དོན་ཚན་ ༤༧ དགོངས་དོན་ལྟར་བར་བརྒལ་ཚོགས་གཙོའི་མདུན་ནས་དམ་འབུལ་ཞུ་རྒྱུ་སོགས་ཁྱོན་ཐབས་ལམ་དང་དགོངས་འཆར་དོན་ཚན་བདུན་ཙམ་གྱི་ཐོག་གྲོས་བསྡུར་གནང་ཡོད་ཀྱང་མཐའ་མའི་ཐག་གཅོད་སྐབས་སུ་ཐབས་ལམ་དེ་དག་ལ་དགོས་ངེས་ཀྱི་རྒྱབ་སྐྱོར་ཐོབ་མེད་པ་རེད། དེ་དོན་བདམས་ཐོན་སྤྱི་འཐུས་རྣམ་པའི་དམ་འབུལ་དང་འབྲེལ་བའི་དཀའ་ངལ་གསལ་ཐབས་སུ་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་བཀའ་སློབ་ལམ་སྟོན་ཆེད་ལྷ་སྙན་སྒྲོན་འབུལ་ཞུ་རྒྱུའི་ཐོག་གྲོས་བསྡུར་གནང་མཐར་དེར་དགོས་ངེས་ཀྱི་མོས་མཐུན་རྒྱབ་སྐྱོར་བྱུང་འདུག་པ་ལྟར། ཐེངས་འདིའི་ནང་མོལ་ཚོགས་འདུ་གཙོ་སྐྱོང་གནང་མཁན་ཚོགས་ཟུར་མཁན་པོ་བསོད་ནམས་བསྟན་འཕེལ་ལགས་དང་སྒྲོལ་མ་ཚེ་རིང་ལགས། དེ་བཞིན་བར་བརྒལ་ཚོགས་གཙོ་ཟླ་བ་ཚེ་རིང་ལགས་བཅས་ཀྱིས་ཁ་སང་ཉིན་རྒྱབ་ཏུ་བཞུགས་སྒར་༸རྒྱལ་བའི་ཕོ་བྲང་དུ་ཆེད་བཅར་གྱིས་མཚན་འཁོད་ཞུ་སྙན་དེ་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་ལྷ་སྙན་སྒྲོན་འབུལ་ཞུས་ཟིན་ཡོད་པ་རེད། རྩ་བའི་འདས་པའི་ཉིན་གྲངས་གཉིས་དང་ཕྱེད་ཀ་ཙམ་གྱི་རིང་འཚོགས་པའི་ནང་མོལ་ཚོགས་འདུའི་སྐོར་ལ་བདམས་ཐོན་སྤྱི་འཐུས་རྣམས་ནས་གསར་འགྱུར་བརྒྱུད་ལམ་ཁག་ལ་ཡོངས་གྲགས་གང་ཡང་གནང་མེད་པ་མ་ཟད། ཁ་སང་ཚོགས་འདུ་གྲོལ་ལ་ཉེ་བའི་མཚམས་སུ་རླུང་འཕྲིན་ཁང་གི་གསར་འགོད་པ་ཚོགས་ཁང་དུ་ཆེད་བཅར་ཞུས་ཏེ་ཚོགས་འདུའི་ཐག་གཅོད་སོགས་དང་འབྲེལ་བཀའ་འདྲི་ཞུ་ཐབས་ཞུས་ཡོད་ཀྱང་། ཚོགས་འདུ་གཙོ་སྐྱོང་བ་བདམས་ཐོན་སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་ཀྱིས་ད་ལྟའི་ཆར་ནང་མོལ་ཚོགས་འདུའི་ཐག་གཅོད་སོགས་དང་འབྲེལ་གསར་འགྱུར་བརྒྱུད་ལམ་ཁག་ལ་གསུང་རྒྱུ་མེད་པར་ཐག་གཅོད་གནང་ཡོད་པ་ལྟར་གང་ཡང་གསུང་རྒྱུ་མེད་ཅེས་དང་། གལ་སྲིད་སླད་མར་དེ་འབྲེལ་གསར་འགྱུར་བརྒྱུད་ལམ་ཁག་ལ་ཞུ་དགོས་རིགས་ཆགས་ཚེ་འབྲེལ་བ་གནང་ངེས་ཡིན་པར་གསུངས་ཡོད།

བོད་མིའི་སྒྲིག་འཛུགས་ཀྱི་བསྟི་གནས་གངས་སྐྱིད་དུ་རྟེན་གཞི་བྱས་པའི་སྲིད་སྐྱོང་ཚོགས་ཁང་དུ་སྐབས་ ༡༧ པའི་བདམས་ཐོན་བོད་མི་མང་སྤྱི་འཐུས་རྣམ་པའི་དམ་འབུལ་དང་འབྲེལ་བའི་དཀའ་རྙོག་གསལ་ཐབས་སླད་དུ་ནང་ཁུལ་དབར་བཞུགས་མོལ་ཚོགས་འདུ་ཞིག་ཚོགས་ཡོད་པ་དང་། ད་ལྟའི་ཆར་ཚོགས་འདུའི་ཐག་གཅོད་ཅི་བྱུང་སོགས་ཀྱི་སྐོར་ཡོངས་གྲགས་གང་ཡང་གནང་མ་སོང་།ཁ་སང་དང་ཁེ་ཉིན་བཅས་ཉིན་གྲངས་གཉིས་ཀྱི་རིང་ལ་ནང་མོལ་ཚོགས་འདུ་ཚོགས་ཏེ་ཁ་སང་ཉིན་རྒྱབ་ཚོགས་འདུ་གྲོལ་མཚམས་སུ་བདམས་ཐོན་སྤྱི་འཐུས་ཁག་ཅིག་ལ་འབྲེལ་བ་ཞུ་སྐབས་ཚོགས་དུས་ཐོག་མཐའ་མའི་ཐག་གཅོད་ཇི་བྱུང་དང་འབྲེལ་དེ་རིང་ཉིན་རྒྱབ་མུ་མཐུད་ལས་དོན་འཕྲོ་སྐྱོང་གནང་སྟེ་གསར་འགོད་གསལ་བསྒྲགས་ཤིག་སྤེལ་འཆར་ཡོད་སྐོར་གསུངས་བྱུང་ཡང་། དེ་རིང་ཉིན་རྒྱབ་གསར་འགོད་པ་རྣམས་ཚོགས་ཁང་གི་ཕྱི་ཕྱོགས་སུ་ཆུ་ཚོད་གཅིག་ཙམ་གྱི་རིང་ངང་སྒུག་གནང་སྟེ་ནང་མོལ་ཚོགས་འདུ་གྲོལ་ལ་ཉེ་བའི་མཚམས་སུ་ཚོགས་ཁང་དུ་ཆེད་བཅར་གྱིས་ཚོགས་འདུའི་ཐག་གཅོད་ཇི་བྱུང་སོགས་དང་འབྲེལ་གསར་འགོད་པ་ཚོར་བཀའ་མོལ་གནང་འཆར་ཡོད་མེད་ཐད་ལ་བཀའ་འདྲི་ཞུས་པར་ཐེངས་འདིའི་ནང་མོལ་ཚོགས་འདུ་གཙོ་སྐྱོང་གནང་མཁན་ཁོངས་སུ་ཡོད་པ་བདམས་ཐོན་སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་ཀྱིས་ད་ལྟའི་ཆར་ནང་མོལ་ཚོགས་འདུའི་ཐག་གཅོད་སོགས་དང་འབྲེལ་གསར་འགྱུར་བརྒྱུད་ལམ་ཁག་ལ་གསུང་རྒྱུ་མེད་པར་ཐག་གཅོད་གནང་ཡོད་པ་ལྟར་གང་ཡང་གསུང་རྒྱུ་མེད་ཅེས་དང་། གལ་སྲིད་སླད་མར་དེ་འབྲེལ་གསར་འགྱུར་བརྒྱུད་ལམ་ཁག་ལ་ཞུ་དགོས་རིགས་ཆགས་ཚེ་འབྲེལ་བ་གནང་ངེས་ཡིན་པར་གསུངས་ཡོད།ཁ་ཉིན་སྔ་ཐོག་ནས་དབུ་འཛུགས་གནང་བའི་ནང་མོལ་ཚོགས་འདུའི་ཐོག་ད་ལྟའི་དཀའ་རྙོག་དང་འབྲེལ་བའི་ཐོག་གྲོས་བསྡུར་དང་ཐབས་ལམ་ཇི་ཡོད་རྣམས་སྤུངས་ཏེ་གྲོས་ཆོད་གཏན་འབེབས་སོགས་ཀྱི་ལས་རིམ་ཐོག་ཕེབས་ཡོད་པ་དང་། ཚོགས་འདུ་འཚོགས་སྐབས་སུ་ཟུར་ཉན་པ་དང་ཕྱི་ནང་གི་གསར་འགོད་པ་རྣམས་དངོས་སུ་ཕེབས་བཅུག་མེད་པ་མ་ཟད། ཚོགས་བཅར་བ་བདམས་ཐོན་སྤྱི་འཐུས་རྣམས་ནས་ཀྱང་ཚོགས་དུས་སྐབས་སུ་ལག་ཐོགས་ཁ་པར་ངེས་པར་དུ་སྒོ་རྒྱག་དགོས་པ་དང་། སྒྲ་འཇུག་དང་བརྙན་ལེན་རིགས་མི་ཆོག་པ། སོ་སོའི་འདོད་མོས་དང་མཐུན་མིན་བྱུང་ཚེ་ཚོགས་ཁང་ནས་ཕྱིར་ཐོན་པའམ་རྣམ་འགྱུར་ངན་པའི་རིགས་སྟོན་མི་ཆོག་པ། དེ་བཞིན་ཚོགས་འདུ་མཇུག་མ་སྒྲིལ་བར་དུ་སྒེར་སོ་སོ་ནས་སྤྱི་ཚོགས་དྲ་རྒྱ་དང་བརྒྱུད་ལམ་ཁག་ལ་གང་བྱུང་བཤད་མི་ཆོག་པ་སོགས་ངེས་པར་དུ་བརྩི་སྲུང་ཞུ་དགོས་པའི་སྒྲིག་ལམ་ཁག་ཅིག་གཏན་འབེབས་གནང་དོན་ལྟར་ཉིན་གྲངས་གཉིས་ཀྱི་རིང་ཚོགས་པའི་ནང་མོལ་སྐབས་སུ་བདམས་ཐོན་སྤྱི་འཐུས་རྣམས་ཀྱིས་བརྒྱུད་ལམ་ཁག་གི་བཅར་འདྲིར་ཞལ་བཞེས་གནང་མེད་པ་རེད།རྩ་བའི་ཐོག་མའི་མཛད་རིམ་གཏན་འབེབས་ནང་ནང་མོལ་ཚོགས་འདུ་འདི་ཁ་སང་དང་ཁ་ཉིན་བཅས་ཉིན་གྲངས་གཉིས་ཀྱི་རིང་འཚོགས་རྒྱུ་དང་། ཚོགས་འདུ་མུ་མཐུད་འཚོགས་དགོས་བྱུང་ཚེ་གནས་སྟངས་ལ་གཞིགས་ཏེ་ཐག་གཅོད་གནང་རྒྱུ་ཡིན་ཞེས་བཀོད་ཡོད་པ་དང་། ཁ་སང་ཚོགས་འདུ་གྲོལ་མཚམས་སུ་དེ་རིང་གསར་འགོད་ལྷན་ཚོགས་ཤིག་གནང་འཆར་ཡོད་སྐོར་གསུངས་པ་དང་འབྲེལ། སྤྱི་ཚོགས་དྲ་ལམ་ཁག་ཏུ་བོད་མི་མི་ཉུང་བ་ཞིག་ནས་བདམས་ཐོན་སྤྱི་འཐུས་རྣམ་པས་ཐག་གཅོད་ཡག་པོ་ཞིག་གནང་བའི་རེ་བ་གནང་བཞིན་སྐོར་དང་། ཁག་ཅིག་ནས་ཁྲིམས་མཐུན་གྱི་ཐག་གཅོད་ཞིག་ཡོང་རྒྱུའི་རེ་བ་ཡོད། ཡང་ལ་ལས་ད་རེས་ཐག་གཅོད་གང་བྱུང་བ་དེ་ལ་མི་མང་ཚང་མས་ངོས་ལེན་གནང་དགོས་པ་དང་ནང་མོལ་ཚོགས་འདུ་འདི་ནས་གཏམ་བཟང་ཞིག་ཡོང་བའི་རེ་བ་ཡོད་སྐོར་སོགས་ཀྱི་མཆན་བཀོད་མཁན་འདུགད་ལྟའི་ཆར་བདམས་ཐོན་སྤྱི་འཐུས་རྣམ་པའི་དམ་འབུལ་དང་འབྲེལ་བའི་དཀའ་རྙོག་ཁག་གསལ་ཐབས་སུ་ཐག་གཅོད་ཅི་བྱུང་ཡོངས་གྲགས་གང་ཡང་གནང་མེད་པ་དང་། ད་ལྟའི་དཀའ་ངལ་འདི་ནི་འདི་ལོའི་ཕྱི་ཟླ་ ༦ ཕྱི་ཚེས་ ༨ ཉིན་སྤྱི་འཐུས་གྲོས་ཚོགས་སུ་བདམས་ཐོན་བྱུང་བའི་སྐབས་ ༡༧ པའི་བོད་མི་མང་སྤྱི་འཐུས་རྣམ་པའི་དམ་འབུལ་གྱི་མཛད་རིམ་སྐབས་བདམས་ཐོན་སྤྱི་འཐུས་ ༢༡ ནས་བཙན་བྱོལ་བོད་མིའི་བཅའ་ཁྲིམས་དོན་ཚན་...