པདྨ་ཚེ་བརྟན།

དེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། བོད་ཀྱི་གློག་བརྙན་བཟོ་སྐྲུན་པ་ཟོན་ཐར་རྒྱལ་གྱི་གློག་བརྙན་གསར་པ་ལྷ་མོ་དང་སྐལ་བྷེ་ཞེས་པ་འདི་ལོའི་སེ་པན་རྒྱལ་ཁབ་ཀྱི་རྒྱལ་སྤྱིའི་གློག་བརྙན་དུས་སྟོན་ཐེངས་ ༦༧ པ་ཐོག་བདམས་ཐོན་བྱུང་བ་ལྟར་ཕྱི་ཟླ་ ༩ ཚེས་ ༢༠ ཉིན་དངོས་སུ་གཟིགས་འབུལ་ཞུ་རྒྱུ་རེད་འདུག ལྷ་མོ་དང་སྐལ་བྷེ་ཞེས་པའི་གློག་བརྙན་འཁྲབ་གཞུང་གི་ནང་དོན་གཙོ་བོ་བོད་ཁུལ་གྱི་ཕོ་མོའི་བར་གྱི་བརྩེ་དུང་དང་བརྩེ་དུང་གི་གུད་ཆག་ཁྲོད་ཀྱི་སེམས་ཀྱི་རྨ་ཁ་སོགས་ཕྱིར་མངོན་པར་བྱས་པའི་གློག་བརྙན་ཞིག་རེད། ལྷ་མོ་དང་སྐལ་བྷེ་གཉིས་གཉེན་སྒྲིག་བྱེད་གྲབས་ཡོད་སྐབས་ལྷ་མོས་རང་གི་མཛའ་བོ་སྐལ་བྷེ་ལགས་སྔོན་ཆད་ཡང་གཉེན་སྒྲིག་ཐེངས་ཤིག་བྱེད་མྱོང་ཡོད་པ་ཤེས་རྟོགས་བྱུང་བར་བརྟེན་ཁོང་དང་ལྷན་དུ་གཉེན་སྒྲིག་གི་འདུན་པར་འགྱུར་བ་ཐེབས་ཏེ་རེ་ཞིག་ཕྱིར་འཐེན་བྱས་ཡོད་སྟབས་སྐལ་བྷེ་ལགས་ཀྱིས་ སྔར་གྱི་ཆུང་མ་མཚོ་ཡག་ལགས་འཚོལ་དུ་ཕྱིན་ཀྱང་། མཚོ་ཡག་ལགས་བཟའ་འཐོར་བྱུང་རྗེས་ཡིད་སེམས་སྐྱོ་བས་རབ་ཏུ་མནར་ནས་མཐར་དབེན་པའི་དགོན་གྲོང་ཞིག་ཏུ་བཙུན་མ་གནང་ཟིན་པ་རེད། དེ་བཞིན་ལྷ་མོ་ལགས་ཀྱིས་གནས་ཚུལ་དེ་ཤེས་རྟོགས་བྱུང་ནས་གཉེན་སྒྲིག་གནང་བར་དངངས་སྐྲག་སྐྱེ་བཞིན་པའི་བརྩེ་དུང་གི་གདུང་བ་ཕྱིར་མངོན་པའི་གློག་བརྙན་ཞིག་རེད། རྩ་བའི་བོད་ཀྱི་གློག་བརྙན་སྒྲིག་སྦྱོར་བ་ཟོན་ཐར་རྒྱལ་ལགས་ནི་ལོ་རབས་བདུན་ཅུ་པའི་སྟོད་དུ་བོད་མདོ་སྨད་ཐུན་ཏེ་རུ་སྐྱེས་ཤིང་། བོད་ཁུལ་ནས་སློབ་གྲྭ་ཆེ་འབྲིང་ཆུང་གསུམ་ཐོན་རྗེས་ཕྱིར་ཕ་ཡུལ་དུ་ལོག་ནས་ལོ་འགའི་རིང་ལ་དགེ་རྒན་གྱི་ཕྱག་ལས་གནང་ཡོད་པ་དང་། རྗེས་སུ་ཁོང་གི་གྲོགས་པོ་པདྨ་ཚེ་བརྟན་ལགས་ཀྱི་ལམ་སྟོན་དང་རོགས་འདེགས་འོག་པེ་ཅིན་གྱི་གློག་བརྙན་སྒྲིག་སྦྱོར་གྱི་སློབ་གླིང་དུ་སློབ་ཞུགས་བྱས་ཡོད་པ་ལྟར་ཉེ་བའི་ལོ་ཤས་རིང་ཁོང་གིས་པདྨ་མ་ཚེ་བརྟན་དང་མཉམ་དུ་བོད་སྐད་ཀྱི་གློག་བརྙན་དབུས་ལམ་གྱི་ཉི་མ་དང་གཙང་བོ། དེ་བཞིན་ཁྱི་རྒན། ལྷིང་འཇགས་ཀྱི་མ་ཎི་རྡོ་འབུམ་སོགས་སྒྲིག་སྦྱོར་བྱས་ཏེ་རྒྱལ་སྤྱིའི་གློག་བརྙན་དུས་སྟོན་མང་པོའི་ཐོག་གཟིགས་འབུལ་ཞུས་ཡོད་པ་རེད། ཐེངས་འདིར་ཁོང་གིས་ལྷ་མོ་དང་སྐལ་བྷེ་ཞེས་པའི་གློག་བརྙན་སེ་པན་གྱི་རྒྱལ་སྤྱིའི་གློག་བརྙན་དུས་སྟོན་དུ་གཟིགས་འབུལ་ཞུ་རྒྱུ་རེད་འདུག  དེ་མཚུངས་སུ་བོད་ཀྱི་གློག་བརྙན་སྒྲིག་སྦྱོར་བ་དང་འཁྲབ་གཞུང་རྩོམ་པ་པོ་པདྨ་མ་ཚེ་བརྟན་ལགས་ཀྱི་གློག་བརྙན་དབུགས་ལྒང་ཞེས་པ་དེ་འདི་ལོའི་རྒྱལ་སྤྱིའི་གློག་བརྙན་དུས་སྟོན་རྙིང་གྲས་ Venice གློག་བརྙན་དུས་སྟོན་ཐེངས་ ༧༦ ཐོག་བདམས་ཐོན་བྱུང་ཡོད་པ་རེད།

བོད་ཀྱི་གློག་བརྙན་སྒྲིག་སྦྱོར་བ་དང་འཁྲབ་གཞུང་རྩོམ་པ་པོ་པདྨ་མ་ཚེ་བརྟན་ལགས་ཀྱི་གློག་བརྙན་དབུགས་ལྒང་ཞེས་པ་དེ་རྒྱལ་སྤྱིའི་གློག་བརྙན་དུས་སྟོན་རྙིང་གྲས་ Venice གློག་བརྙན་དུས་སྟོན་ཐེངས་ ༧༦ ཐོག་གཟིགས་འབུལ་ཞུ་རྒྱུ་རེད་འདུག པདྨ་ཚེ་བརྟན་ལགས་ནི་མཚོ་སྔོན་དུ་སྐྱེས་པ་དང་། སློབ་གྲྭ་ཆེ་འབྲིང་ཆུང་གསུམ་བརྒྱུད་ནས་སློབ་མཐར་ཕྱིན་རྗེས་བོད་ཁུལ་དུ་དགེ་རྒན་གྱི་ཕྱག་ལས་གནང་ཞིང་། ཕྱིས་སུ་སླར་རྒྱ་ནག་གི་རྒྱལ་ས་པེ་ཅིན་དུ་གློག་བརྙན་ཕབ་སྐྲུན་ཐོག་སློབ་སྦྱོང་གནང་ནས་སློབ་མཐར་སོན་རྗེས་རིམ་བཞིན་བོད་ཀྱི་རིག་གཞུང་དང་ཡུལ་ལུང་སོགས་མཚོན་པའི་གློག་བརྙན་ཆེད་བཟོའི་ཐོག་ཞུགས་ཏེ་ད་ཆ་རྒྱལ་སྤྱིའི་སྟེང་སྐད་གྲགས་ཡོད་པའི་བོད་ཀྱི་གློག་བརྙན་འཁྲབ་ཁྲིད་པ་ཐོག་མ་དེ་ཆགས་ཡོད་པ་མ་ཟད། ཁོང་གི་གློག་བརྙན་ལྷིང་འཇགས་ཀྱི་མ་ཎི་རྡོ་འབུམ་དང་འཚོལ། ཁྱི་རྒན། དེ་བཞིན་ཐར་ལོ་དང་ལག་དམར་སོགས་ལ་འཛམ་གླིང་གི་གློག་བརྙན་དུས་སྟོན་མང་པོའི་ཐོག་བྱ་དགའ་མི་ཉུང་བ་ཐོབ་ཡོད་པ་རེད།  ཐེངས་འདིའི་གློག་བརྙན་དབུགས་ལྒང་ཞེས་པའི་གློག་བརྙན་དེ་ནི་བོད་མིའི་ཕལ་པའི་ཁྱིམ་ཚང་ཞིག་གི་ནང་འཁྲིག་སྤྱོད་ཀྱི་སྲུང་ཤུབས་ཤིག་ཕྱི་ལ་ཐོན་རྗེས། ཁྱིམ་མི་ཕན་ཚུན་ངོ་ཚ་ཞིང་དོགས་པའི་རང་བཞིན་ཅན་གྱི་བསམ་བློ་མང་པོ་འཁོར་ཡོད་པ་མངོན་པར་གནང་སྟེ་བོད་མིའི་ཉིན་རེའི་འཚོ་བའི་ཁྲོད་ཀྱི་གནའ་དེང་ཟུང་གི་འགལ་འདུའམ། སྲོལ་རྒྱུན་གྱི་ཆོས་ལུགས་ཀྱི་ཡིད་ཆེས་དང་དེང་རབས་ཀྱི་འཚོ་བ་གཉིས་གཞི་གཅིག་ཏུ་འདྲིས་བས་རང་བཞིན་གྱིས་བསམ་བློའི་དཔུང་འཇུག་བྱེད་སྟངས་ཁྲོད་ཀྱི་གདོང་ལེན་བྱེད་དགོས་པ་མང་པོ་ཞིག་ཡོད་པ་མཚོན་པར་གནང་ཡོད་པའི་གློག་བརྙན་ཞིག་ཡིན་པ་འགྲེལ་བརྗོད་གནང་འདུག   གཞི་རྩའི་ Venice རྒྱལ་སྤྱིའི་གློག་བརྙན་དུས་སྟོན་དེ་ནི་ཕྱི་ལོ་ ༡༩༣༢ ལོར་ཡོ་རོབ་ཀྱི་རྒྱལ་ཁབ་ Italy ནང་འགོ་འཛུགས་གནང་བ་ཞིག་ཡིན་པ་དང། ཕྱི་ཟླ་ ༨  ཚེས་ ༢༨ ནས་ཟླ་ ༩ ...

དེ་རིང་གསར་ལམ་ཁག་ཏུ་གནས་ཚུལ་ཐོན་པར་ཁ་སང་ཕ་རན་སིར་བསྡུས་བའི་ཨེ་ཤ་ཡའི་གློག་བརྙན་དུས་སྟོན་ཐེངས་ ༢༥ ཐོག་བོད་ཀྱི་གློག་བརྙན་འཁྲབ་ཁྲིད་པ་པདྨ་ཚེ་བརྟན་ལགས་ཀྱིས་འཁྲབ་ཁྲིད་གནང་བའི་ལག་དམར་ཞེས་པའི་གློག་བརྙན་དེར་གསེར་གྱི་གཟེངས་རྟགས་གསུམ་ཐོབ་འདུག ལག་དམར་ཞེས་པའི་གློག་བརྙན་དེ་ནི་ཁོང་གི་འཁྲབ་གཞུང་། ལུག་གཅིག་ལྔ་ལམ་དུ་བརྫངས་པ་ཞེས་པ་དང་རྩོམ་པ་པོ་ཚེ་རིང་ནོར་བུ་ལགས་ཀྱི་སྒྲུང་གཏམ་ལག་དམར་ཞེས་པ་གཉིས་མཉམ་བསྲེས་གནང་ནས་གྲུབ་པ་ཞིག་ཡིན་པ་དང་། འཁྲབ་གཞུང་གི་ནང་དོན་དངོས་ནི་ཁམས་ཁུལ་དུ་དགྲ་ཤ་ལེན་པའི་ལུགས་སྲོལ་ལ་གཞི་བྱས་ཏེ་དགེ་འདུན་ཕུན་ཚོགས་དང་བསོད་ནམས་དབང་མོ་སོགས་ཀྱིས་འཁྲབ་སྟོན་གནང་བ་ཞིག་ཡིན་པ་རེད།པདྨ་ཚེ་བརྟན་ནི་བོད་ཁུལ་དུ་ཆེས་སྐད་གྲགས་ཆེ་བའི་གློག་བརྙན་འཁྲབ་ཁྲིད་པ་ཐོག་མ་དེ་ཡིན་ཞིང་། ཁོང་གིས་ཕབ་སྐྲུན་ཞུས་ཟིན་པའི་མིང་གྲགས་ཅན་གྱི་གློག་བརྙན་བརྩམས་ཆོས་ནི། ལྷིང་འཇགས་ཀྱི་མ་ཎི་རྡོ་འབུམ་དང་འཚོལ། ཁྱི་རྒན། ཐར་ལོ་སོགས་ཡིན་པ་དང་། ཁོང་གི་གློག་བརྙན་བརྩམས་ཆོས་དག་ལ་འཛམ་གླིང་གི་གློག་བརྙན་དུས་སྟོན་མང་པོའི་ཐོག་བྱ་དགའ་ཐོབ་མྱོང་ཡོད་པ་རེད། རྩ་བའི་གློག་བརྙན་འཁྲབ་ཁྲིད་པ་པདྨ་ཚེ་བརྟན་ལགས་ནི་མཚོ་སྔོན་དུ་སྐྱེས་པ་དང་། སློབ་གྲྭ་ཆེ་འབྲིང་ཆུང་གསུམ་བརྒྱུད་ནས་སློབ་མཐར་ཕྱིན་རྗེས་བོད་ཁུལ་དུ་དགེ་རྒན་གྱི་ཕྱག་ལས་གནང་ཞིང་། ཕྱིས་སུ་སླར་ཡང་རྒྱ་ནག་པེ་ཅིན་དུ་གློག་བརྙན་ཕབ་སྐྲུན་གྱི་ཐད་སློབ་སྦྱོང་གནང་ནས་སློབ་མཐར་སོན་རྗེས་རིམ་བཞིན་བོད་ཀྱི་རིག་གཞུང་དང་ཡུལ་ལུང་སོགས་མཚོན་པའི་གློག་བརྙན་ཆེད་བཟོའི་ཐོག་ཞུགས་ཏེ་ད་ཆ་རྒྱལ་སྤྱིའི་སྟེང་སྐད་གྲགས་ཡོད་པའི་བོད་ཀྱི་གློག་བརྙན་འཁྲབ་ཁྲིད་པ་ཐོག་མ་དེ་ཆགས་ཡོད་པ་རེད།