པར་རིས་འགྲེམས་སྟོན་དང་རི་མོ་འགྲན་བསྡུར་བརྒྱུད་རྒྱལ་སྤྱིའི་མནར་གཅོད་འགོག་རྒོལ་ཉིན་མོ་སྲུང་བརྩི།

དེ་རིང་ཕྱི་ཟླ་ ༦ ཚེས་ ༢༦ ཉིན་རྒྱལ་ཚོགས་ནས་ International Day in Support of Victims of Torture འམ་རྒྱལ་སྤྱིའི་མནར་གཅོད་འགོག་རྒོལ་ཉིན་མོ་ཞེས་གཏན་འབེབས་གནང་བ་ལྟར། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་བོད་ཀྱི་དགུ་བཅུ་གསུམ་ལས་འགུལ་ཚོགས་པ་གཉིས་ཟུང་འབྲེལ་གྱིས་པར་རིས་འགྲེམས་སྟོན་དང་རི་མོ་འགྲན་བསྡུར་གནང་ཐོག་ཉིན་མོ་དེ་སྲུང་བརྩི་ཞུས་སོང་།བཞུགས་སྒར་དུ་རྟེན་གཞི་བྱས་པའི་དྷ་ཤོད་བོད་ཁྱིམ་སློབ་གྲྭའི་ཚོགས་ཁང་དུ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་བོད་ཀྱི་དགུ་བཅུ་གསུམ་ལས་འགུལ་ཚོགས་པ་གཉིས་ཟུང་འབྲེལ་གྱིས་གོ་སྒྲིག་འོག་བོད་རང་དབང་རང་བཙན་ གནས་བབ་མཚོན་པའི་ལོ་རྒྱུས་ཀྱི་དཔང་རྟགས་དང་རྒྱ་ནག་གིས་བོད་ལ་དབང་སྒྱུར་བྱེད་སྐབས། བོད་མིའི་ངོས་ནས་དེར་འགོག་རྒོལ་གནང་སྟངས། མ་ཟད།  རིག་གནས་གསར་བརྗེའི་གནས་སྟངས། ས་བྱི་ཞི་རྒོལ་ཆེན་མོ། རིམ་པས་ཉེ་བའི་ལོ་རབས་ནང་རང་ལུས་མེར་བསྲེགས་གནང་བའི་གནད་དོན་བཅས་ལོ་རྒྱུས་ཀྱི་འཕེལ་རིམ་ཕྱོགས་སྒྲིག་གནང་བའི་པར་རིས་འགྲེམས་སྟོན་དང་། དེ་རྗེས་དྷ་ཤོད་བོད་ཁྱིམ་སློབ་གྲྭའི་འཛིན་རིམ་དྲུག་པ་ནས་བཅུ་པ་བར་གྱི་སློབ་མ་ཁྱོན་ ༣༥ ཙམ་མཉམ་ཞུགས་ཀྱིས་ཉིན་མོ་དེ་འབྲེལ་རི་མོ་འགྲན་བསྡུར་བཅས་གནང་སྟེ་ཉིན་མོ་དེ་སྲུང་བརྩི་ཞུས་ཡོད་པ་རེད།སྐབས་དེར་གསར་འགོད་པས་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཟླ་བ་བཀྲ་ཤིས་ལགས་སུ་དུས་ཚིགས་དེ་འབྲེལ་བཅར་འདྲི་ཞུས་པར་སློབ་ཕྲུག་ཚོར་བོད་ནང་གི་བོད་མི་ཚོས་རྒྱ་གཞུང་གིས་དབང་སྒྱུར་འོག་མནར་གཅོད་དང་སྡུག་རྩུབ་ཧ་ཅང་མྱོང་བཞིན་པའི་ལོ་རྒྱུས་རིམ་པ་ངོ་སྤྲོད་དང་།...