བཀྲིས་དབང་ཕྱུག་ལགས་ལ་རྒྱལ་སྤྱིའི་ཁྲིམས་དང་མཐུན་པའི་ཁྲིམས་བཤེར་དགོས།

བོད་མིའི་སྐད་ཡིག་སྲུང་སྐྱོབ་ལས་འགུལ་བ་བཀྲིས་དབང་ཕྱུག་ལགས་རྒྱ་ནག་གཞུང་གི་བཙོན་ཁང་ནང་ལོ་ལྔ་རིང་བཙོན་འཇུག་གི་དུས་ཡུན་ཚང་ནས་བཙོན་གྲོལ་ཐོབ་པ་དང་འབྲེལ་ཉེ་ཆར་ཡོ་རོབ་མཐུན་ཚོགས་ཀྱིས་བསྒྲགས་གཏམ་ཞིག་སྤེལ་ཏེ་རྒྱ་ནག་གཞུང་གིས་བཀྲིས་དབང་ཕྱུག་ལགས་བཙོན་གྲོལ་ཐོབ་རྗེས་ཁོང་ལ་ཆ་རྐྱེན་གང་ཡང་མེད་པར་རང་དབང་ཆ་ཚང་ལོངས་སུ་སྤྱོད་འཇུག་དགོས་ཞེས་གསུངས་འདུག ཡོ་རོབ་མཐུན་ཚོགས་ཀྱིས་བཀྲིས་དབང་ཕྱུག་ལགས་བཙོན་གྲོལ་ཐོབ་པ་དང་འབྲེལ་ཟླ་བ་འདིའི་ཕྱི་ཚེས་ ༢༩ ཉིན་སྤེལ་བའི་བསྒྲགས་གཏམ་ནང་དུ་ཡོ་རོབ་མཐུན་ཚོགས་ཀྱི་ཕྱི་འབྲེལ་དང་བདེ་སྲུང་ལྷན་ཁང་གི་མགྲིན་ཚབ་པ་ Nabila MASSRALI ལགས་ཀྱིས་སྤྱིར་མི་རིགས་ཀྱི་ངོ་བོ་དང་རིག་གཞུང་སྲུང་སྐྱོབ་གནང་བར་མི་རིགས་དེའི་སྐད་ཡིག་སྲུང་སྐྱོབ་གནང་རྒྱུ་ནི་ཧ་ཅང་གལ་ཆེན་པོ་ཆགས་ཡོད་པ་དང། རྒྱ་ནག་གཞུང་གི་རྩ་ཁྲིམས་དང་རྒྱལ་སྤྱིའི་འགྲོ་བ་མིའི་ཐོབ་ཐང་ཁྲིམས་སྒྲིག་ནང་དུའང་གྲངས་ཉུང་མི་རིགས་ཚོར་རང་མི་རིགས་ཀྱི་སྐད་ཡིག་སྲུང་སྐྱོབ་ཀྱི་རང་དབང་དང་གོང་འཕེལ་བྱ་རྒྱུའི་ཐོབ་ཐང་ཡོད་ཅེས་གསལ་པོ་འཁོད་ཡོད་པ་དེ་ལྟར་ཡང། རྒྱ་ནག་གཞུང་གིས་དེ་ལས་ལྡོག་ནས་བོད་མིའི་སྐད་ཡིག་རང་དབང་སྲུང་སྐྱོབ་དང་རྩོད་ལེན་གནང་མཁན་གྱིས་མཚོན་པའི་ཆོས་དད་རང་དབང་སྲུང་སྐྱོབ་གནང་མཁན་ཐོག་ཏུ་དམ་དྲག་བྱེད་བཞིན་ཡོད་པར་མ་ཟད། ད་བར་དེ་འབྲེལ་མི་སྣ་མང་པོ་ཞིག་བཀག་ཉར་དང་གར་སོང་ཆ་མེད་དུ་གྱུར་བ། དེ་བཞིན་བཀག་སྐྱིལ་འོག་འདས་གྲོོངས་སུ་ཕྱིན་པའི་གནས་ཚུལ་རིམ་པ་འཐོན་བཞིན་ཡོད་ཅེས་རྒྱུ་གཞུང་ལ་སྐྱོན་བརྗོད་ནན་པོ་གནང་ཡོད། སྤྱིར་རྒྱ་ནག་གཞུང་གིས་དུས་རྒྱུན་བོད་མིའི་ཆབ་སྲིད་བཙོན་པ་སུ་འདྲ་ཞུ་བཙོན་གྲོལ་བཏང་རྗེས་ཁོང་རྣམ་པའི་འགྲོ་སྡོད་སྤྱོད་གསུམ་ཀྱི་རང་དབང་ལ་ཚོད་འཛིན་དང། ཉིན་རེའི་འཚོ་བར་རྒྱ་ནག་གཞུང་གིས་སྟངས་འཛིན་བྱས་དང་བྱེད་བཞིན་ཀྱི་ཡོད་པ་རེད། དེས་ན་ཡོ་རོབ་མཐུན་ཚོགས་ཀྱིས་ད་ལན་གྱི་བསྒྲགས་གཏམ་དེ་སྤེལ་ནས་རྒྱ་ནག་གཞུང་ལ་བཀྲིས་དབང་ཕྱུག་ལགས་གློན་བཀྲོལ་བཏང་བའི་རྗེས་སུ་ཆ་རྐྱེན་གང་ཡང་མེད་པར་ཁོང་ལ་འགྲོ་བ་མིའི་གཞི་རྩའི་རང་དབང་སྟེ་འགྲོ་སྡོད་སྤྱོད་གསུམ་གྱི་རང་དབང་ཆ་ཚང་ལོངས་སུ་སྤྱོད་བཅུག་དགོས་ཞེས་ནན་བརྗོད་གནང་བ་འདུག་པར་མ་ཟད། ཁོང་དེ་སྔ་བཀག་ཉར་བྱས་པའི་དུས་ཡུན་ཁྲོད་ཁོང་སྡུག་སྦྱོང་མནར་གཅོད་བཏང་བའི་གནད་དོན་ཐོག་རྒྱ་གཞུང་གི་འབྲེལ་ཡོད་འགོ་ཁྲིད་ཙོར་ཞིབ་འཇུག་ནན་པོ་བྱེད་དགོས་པའི་སྐུལ་མ་བསྐྱར་ནན་གནང་འདུག ཐེངས་འདིའི་བསྒྲམས་བརྒྱུད་ཡོ་རོབ་མཐུན་ཚོགས་ཀྱིས་རྒྱ་ནག་གཞུང་ལ་ད་ལྟའི་རྒྱ་གཞུང་གིས་འཛིན་བཟུང་བཙོན་འཇུག་བྱས་པའི་འགྲོ་བ་མིའི་ཐོབ་ཐང་སྲུང་སྐྱོབ་པ་ཚོ་ཆ་རྐྱེན་གང་ཡང་མེད་པར་འཕྲལ་དུ་གློད་བཀྲོལ་དགོས་པ་དང། བཀག་ཉར་བྱས་པ་ཚོ་ཁྲིམས་མཐུན་ཐོག་ཕྱི་གསལ་ནང་གསལ་གྱིས་ཁྲིམས་གཏུག་གནང་རྒྱུའི་རང་དབང་སྤྲོད་དགོས་པ། ལྷག་དོན་རང་རང་དབང་རྩོད་ལེན་པ་ཚོར་བཙོན་ཁང་དུ་ཁྲིམས་མཐུན་གྱི་ཁྲིམས་ཆད་བཏང་བ་ལས་མནར་གཅོད་དང་སྡུག་སྦྱོང་གི་བྱ་སྤྱོད་སྤེལ་མཚམས་འཇོག་དགོས་ཞེས་སྐུལ་མ་གནང་འདུག ཆབས་ཅིག་ཏུ་ཡོ་རོབ་མཐུན་ཚོགས་ཀྱི་ངོས་ནས་རྒྱ་ནག་དང་ལྷན་དུ་མུ་མཐུད་འགྲོ་བ་མིའི་ཐོབ་ཐང་གི་གནད་དོན་ཐོག་གླེང་སློང་གནང་རྒྱུ་ཡིན་ཞེས་བཀོད་འདུག རྩ་བའི་བོད་མིའི་སྐད་ཡིག་སྲུང་སྐྱོབ་ལས་འགུལ་བ་བཀྲིས་དབང་ཕྱུག་ལགས་རྒྱ་ནག་གཞུང་གི་འཛིན་བཟུང་བཙོན་འཇུག་སྔ་རྗེས་བརྒྱུད་རིམ་ནང་ཡོ་རོབ་མཐུན་ཚོགས་ཀྱི་ངོས་ནས་རྒྱ་གཞུང་ལ་ཁོང་གློད་བཀྲོལ་དགོས་པའི་སྐུལ་མ་ལས་མང་གནང་ཡོད་པར་མ་ཟད། དེ་བཞིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་རིམ་པར་བཀྲིས་དབང་ཕྱུག་ལགས་ཀྱི་གནད་དོན་གླེང་སློང་ཡང་གནང་ཡོད་པ་རེད།

ཁ་སང་བོད་མིའི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་རྒྱ་གཞུང་གིས་འཛིན་བཟུང་བཀག་ཉར་བྱས་ནས་ལོ་བཞི་འཁོར་བ་དང་བསྟུན་ཨ་རིའི་པེན་ཚོགས་པའི་རྩོམ་སྒྲིག་པ་སོགས་སྐད་ཡིག་ཐོབ་ཐང་ཐོག་དོན་གཉེར་བ་མི་ཆིག་སྟོང་ཙམ་གྱིས་མཚན་རྟགས་བསྡུ་རུབ་གནང་སྟེ་ཁོང་འཕྲལ་མར་གློད་བཀྲོལ་དགོས་པའི་སྤྱི་བསྒྲགས་ཤིག་སྤེལ་འདུག ཨ་རིའི་པེན་རྩོམ་སྒྲིག་ཚོགས་པའི་རྩོམ་སྒྲིག་པ་དང་སྐད་རིགས་སྨྲ་བ་པོ། དེ་བཞིན་ཡིག་སྒྱུར་བ་དང་སྐད་ཡིག་ཐོབ་ཐང་རྩོད་ལེན་པ་ཆིག་སྟོང་གིས་མཉམ་འབྲེལ་ཐོག་རྒྱ་ནག་སྲིད་འཛིན་ཞི་ཅིན་ཕིང་ལ་འབོད་སྐུལ་ཞུ་སྙན་ཞིག་བཏང་སྟེ་བོད་ཀྱི་སྐད་ཡིག་སྲུང་སྐྱོབ་ལས་འགུལ་བ་བཀྲིས་དབང་ཕྱུག་ལགས་འཕྲལ་དུ་གློད་བཀྲོལ་གཏོང་དགོས་པའི་སྐོར་སྤྱི་བསྒྲགས་ཤིག་སྤེལ་འདུག་པ་དང་། འབོད་སྐུལ་སྙན་ཞུ་དེ་ནི་ཁ་ཉིན་ཕྱི་ལོ་ ༢༠༢༠ ལོའི་ཕྱི་ཟླ་ ༡ ཚེས་ ༢༦ ཉིན་རྒྱ་གཞུང་གིས་བཀྲིས་དབང་ཕྱུག་ལགས་ནས་བོད་མི་རིགས་ཀྱི་སྐད་ཡིག་རང་དབང་བརྩོད་པའི་རྐྱེན་གྱིས་གསང་བའི་སྒོ་ནས་འཛིན་བཟུང་བཀག་ཉར་བྱས་ཏེ་ལོ་བཞི་འཁོར་བའི་ཉིན་མོར་སྤྱི་བསྒྲགས་དེ་སྤེལ་ཡོད་པ་རེད། འབོད་སྐུལ་གྱི་སྤྱི་བསྒྲགས་དེའི་ནང་ཞུ་སྐུལ་བ་ཡོངས་ཀྱིས་རྒྱ་གཞུང་ནས་དེ་སྔོན་བཀྲིས་དབང་ཕྱུག་ལགས་འཛིན་བཟུང་བྱས་པ་དང་ཁོང་ཁྲིམས་བཤེར་ཆེད་དུ་མ་འཁྲིད་གོང་ཉེས་རྡུང་ཚད་མེད་བཏང་ནས་མཐར་ཁོང་ལ་ཁྲིམས་བཤེར་གྱི་བརྒྱུད་རིམ་ཁག་ཡོངས་རྫོགས་དྲང་པོ་མེད་པའི་བྱ་སྤྱོད་སྤེལ་ཁག་ལ་བློ་འཚབ་གནང་བ་དང་སྦྲགས། ལྷག་དོན་སྔ་ལོ་ཁོང་ལ་རང་ཉིད་ཀྱི་ཁྲིམས་རྩོད་པ་དང་ཐུག་འཕྲད་གནང་འཇུག་མེད་པ་མ་ཟད་ཁོང་ནས་རང་ཉིད་ཀྱི་ཁྲིམས་རྩོད་པ་བརྒྱུད་ཁྲིམས་ཁང་གོང་མར་ཞུ་གཏུག་མུ་མཐུད་གནང་རྒྱུའི་གཞི་རྩའི་ཐོབ་ཐང་གི་ཁེ་དབང་སོགས་ཀྱང་རྒྱ་གཞུང་གིས་འཕྲོག་ཡོད་པ་རེད་ཅེས་འཁོད་འདུག སྤྱི་བསྒྲགས་དེའི་ནང་ཁོང་རྣམས་ཀྱིས་ད་དུང་བཀྲིས་དབང་ཕྱུག་ལགས་ནས་རང་མི་རིགས་ཀྱི་སྐད་ཡིག་རང་དབང་བརྩོད་པ་དེ་ནི་རྒྱལ་སྤྱིའི་ཁྲིམས་དང་འགལ་མེད་པ་མ་ཟད། རྒྱ་ནག་རྒྱལ་ཁབ་ཀྱི་ཁྲིམས་ལུགས་དང་འགལ་མེད་ཅེས་འགྲེལ་བརྗོད་གནང་བ་དང་ཆབས་ཅིག ཁོང་གིས་མུ་མཐུད་ནས་སྐད་ཡིག་སྲུང་སྐྱོབ་དགོས་པའི་དགོས་འདུན་འདོན་པ་དེ་ནི་རྒྱ་གཞུང་གི་རྩ་ཁྲིམས་ནང་འཁོད་པའི་སྐད་ཡིག་རང་དབང་རྩོད་པ་ཞིག་ཆགས་ཀྱི་ཡོད་སྟབས། ཁོང་ནས་མཐོང་ཆོས་སུ་གྱུར་བའི་ནག་ཉེས་གང་ཡང་བསགས་མེད་ཅེས་ནན་བརྗོད་གནང་འདུག པེན་རྩོམ་སྒྲིག་ཚོགས་པས་འགྲོ་བ་མི་ཚང་མར་རང་ཉིད་ཀྱི་ཕ་མེས་ནས་བརྒྱུད་པའི་སྐད་ཡིག་སློབ་གཉེར་དང་སློབ་ཁྲིད། དེ་བཞིན་ཡར་རྒྱས་གཏོང་པའི་ཐོབ་ཐང་ངེས་པར་དུ་སྲུང་སྐྱོབ་བྱེད་དགོས་པའི་ཡིད་ཆེས་གནང་གི་ཡོད་པ་ལྟར། བཀྲིས་དབང་ཕྱུག་ལགས་ནི་རྒྱ་ནག་ནང་བོད་ཀྱི་སྐད་ཡིག་རང་དབང་ངང་ལོངས་སུ་སྤྱོད་འདོད་ཡོད་མཁན་ཚོའི་ཆེད་དུ་སྐད་ཡིག་སྲུང་སྐྱོབ་གནང་བར་རྒྱ་གཞུང་གིས་དྲང་བདེན་མེད་པར་འཛིན་བཟུང་དང་དོ་དམ་བྱས་པ་ཞིག་ཡིན་སྟབས། ང་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་བཀྲིས་དབང་ཕྱུག་ལགས་འཕྲལ་དུ་གློད་བཀྲོལ་གཏོང་དགོས་པ་དང་ཁོང་གི་དགོས་འདུན་རྣམས་བསྒྲུབ་དགོས་པའི་འབོད་སྐུལ་ཞུ་ཡི་ཡོད་ཅེས་གསུངས་འདུག རྩ་བའི་ཡུལ་ཤུལ་ནང་རྒྱུན་དུ་ཚོང་ལས་གཉེར་མཁན་བོད་མི་བཀྲིས་དབང་ཕྱུག་ལགས་ནས་རང་ཉིད་ཀྱི་ཚ་མོས་གཙོས་པའི་བོད་ས་ཁྱོན་ཡོངས་ཀྱི་བོད་ཕྲུག་རྣམས་ལ་བོད་ཀྱི་སྐད་ཡིག་སློབ་གཉེར་གྱི་གོ་སྐབས་མེད་པ་གཟིགས་ཏེ་བོད་ཀྱི་སྐད་ཡིག་བདག་དབང་རྩོད་ལེན་སླད་ས་གནས་སྲིད་གཞུང་དང་། རྗེས་སུ་རྒྱ་ནག་གི་རྒྱལ་ས་པེ་ཅིང་དུ་ཕེབས་ནས་ཁྲིམས་ཁང་དང་དབུས་བརྙན་འཕྲིན་ལས་ཁང་བཅས་ལ་ཞུ་གཏུག་ལན་མང་གནང་བ་མ་ཟད་གནད་དོན་དེ་དང་འབྲེལ་ཨ་རིའི་ནིའུ་ཡོག་དུས་བབ་ཀྱི་དམིགས་བསལ་བཅར་དྲིའི་ལས་རིམ་ཞིག་གི་ཐོག་ལྷན་ཞུགས་གནང་རྗེས་རྒྱ་ནག་གཞུང་གིས་ ༢༠༡༦ ལོ་འགོར་ཁོང་འཛིན་བཟུང་གིས་ལོ་གཉིས་ཙམ་བཀག་ཉར་རྗེས་ལོ་དེའི་ཕྱི་ཟླ་དང་པོ་ནང་ཁོང་གི་གྱོད་གཞིའི་ཐོག་ཞིབ་དཔྱོད་དང་ཕྱི་ཟླ་ ༥ པའི་ནང་ཁོང་ལ་རྒྱལ་ཁབ་ཁ་བྲལ་བརྒྱུད་སྐུལ་གྱི་ཉེས་མིང་འོག་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་པ་རེད།

ཡོ་རོབ་ Baltic རྒྱལ་ཁབ་ལ་ཊི་ཝི་ཡའི་གྲོས་ཚོགས་བོད་དོན་རྒྱབ་སྐྱོབ་ཚོགས་པའི་འཐུས་མི་གཙོས་གྲོས་ཚོགས་འཐུས་མི་ ༢༠ ནས་རྒྱ་གཞུང་ལ་བོད་མི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་ལ་རྒྱལ་སྤྱིའི་ཁྲིམས་དང་མཐུན་པའི་ཁྲིམས་བཤེར་དགོས་པའི་རེ་སྐུལ་གནང་འདུག དེ་ཡང་ཁ་ཉིན་ཚེས་ ༦ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་དྲ་གནས་ཐོག་གནས་ཚུལ་སྤེལ་བར་ཉེ་ཆར་ཕྱི་ཟླ་ ༡ ཚེས་ ༢༥ ཉིན་ Saeima འམ་ལ་ཊི་ཝི་ཡའི་གྲོས་ཚོགས་འཐུས་མི་ ༡༠༠ ཡོད་པའི་ཁོངས་ནས་བོད་དོན་རྒྱབ་སྐྱོར་ཚོགས་པའི་ཚོགས་མི་གཙོས་གྲོས་འཐུས་ ༢༠ ཐུན་མོང་ཐོག་བཀྲིས་དབང་ཕྱུག་ལགས་ཀྱི་གནད་དོན་དང་འབྲེལ་རྒྱ་གཞུང་ལ་མཚན་རྟགས་བཀོད་པའི་ཞུ་ཡིག་ཞིག་ཕུལ་འདུག་པ་དང་། དེའི་ནང་གྲོས་ཚོགས་འཐུས་མི་རྣམས་ཀྱིས་བཀྲིས་དབང་ཕྱུག་ལགས་ལ་ཕྱི་གསལ་ནང་གསལ་དང་དྲང་བདེན་གྱི་ཁྲིམས་བཤེར་དགོས་པ། རྒྱ་གཞུང་གི་ངོས་ནས་བཀྲིས་དབང་ཕྱུག་ལགས་ལ་རྒྱལ་སྤྱིའི་ཁྲིམས་ལུགས་དང་མཐུན་པའི་ཁྲིམས་གཏུག་སྐབས་ཟུར་ཉན་བཞུགས་ཆོག་པ་སོགས་རྒྱལ་སྤྱིའི་ཁྲིམས་བཤེར་གྱི་བརྒྱུད་རིམ་དང་མཐུན་པ་གནང་དགོས་པའི་རེ་སྐུལ་གནང་ཡོད། དེ་བཞིན་གྲོས་ཚོགས་འཐུས་མི་རྣམས་ནས་སྤེལ་བའི་བསྒྲགས་གཏམ་ནང་ཉེ་སྔོན་ཡོ་རོབ་མཐུན་ཚོགས་དང་ཧྥ་རན་སི། འཇར་མ་ནི་གྲོས་འཐུས་ཚོས་ཀྱང་བཀྲིས་དབང་ཕྱུག་ལགས་ཀྱི་གནད་དོན་ཐོག་གྲོས་ཆོད་བཞག་པ་རྣམས་ལུང་འདྲེན་གནང་ཐོག་རྒྱ་གཞུང་ལ་གནོན་ཤུགས་ཇེ་ཆེར་བཏང་ཐབས་གནང་འདུག རྩ་བའི་ Latvia གྲོས་ཚོགས་བོད་དོན་རྒྱབ་སྐྱོར་ཚོགས་པས་རྣམ་ཀུན་བོད་མིའི་འགྲོ་བ་མིའི་ཐོབ་ཐང་གི་གནད་དོན་ཐད་ལ་རྒྱ་གཞུང་ལ་འབོད་སྐུལ་དང་གནོན་ཤུགས་རིམ་པ་སྤྲོད་ཐབས་གནང་བའི་ཁྲོད།ཕྱི་ལོ་ ༢༠༠༥ དང་...