བཙན་བྱོལ་བོད་མིའི་དགོན་སྡེ་ཁག་ཏུ་བོད་པའི་གྲྭ་བཙུན་ཉུང་དུ་འགྲོན་བཞིན་ཡོད་སྐོར་ཚོར་བ་ཆེན་པོས་གླེང་སློང་གནང་པ།

བོད་མི་མང་སྤྱི་འཐུས་ལྷན་ཚོགས་སུ་ཆོས་རིག་ལས་ཁུངས་ཀྱི་སྔོན་རྩིས་ལས་འཆར་སྐབས་ཚོར་ཤུགས་ཆེན་པོས་བཙན་བྱོལ་བོད་མིའི་དགོན་སྡེ་ཁག་ཏུ་བོད་པའི་གྲྭ་བཙུན་ཉུང་དུ་འགྲོན་བཞིན་ཡོད་སྐོར་གླེང་སློང་གནང་སོང། དེ་རིང་ཟླ་ ༣ ཚེས་ ༢༦ ཉིན་གྱི་གྲོས་ཚོགས་ལས་ཉིན་དྲུག་པའི་ཐོག་གྲོས་ཚོགས་སུ་ཆོས་རིག་ལས་ཁུངས་ཀྱི་སྔོན་རྩིས་གཏན་འབེབས་དང་འབྲེལ། གྲོས་ཚོགས་འཐུས་མི་རྣམས་ཚོར་ཤུགས་ཆེན་པོས་ཆོས་རིག་ལས་ཁུངས་དང་ཐད་ཀར་འབྲེལ་ཡོད་བོད་མིའི་གཞིས་ཁག་ཏུ་ནང་ཆོས་ངོ་སྤྲོད་ཀྱི་ལས་འཆར། དེ་བཞིན་དགེ་བཤེས་མའི་ལས་འཆར། ཁྱད་པར་དུ་བཙན་བྱོལ་བོད་མིའི་དགོན་སྡེ་ཁག་ཏུ་བོད་པའི་གྲྭ་བཙུན་ཉུང་དུ་འགྲོ་བཞིན་ཡོད་པའི་གནད་དོན་ཐད་ལ་དགོངས་འཆར་དང་གླེང་སློང་གནང་སོང། སྐབས་དེར་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་གསུངས་དོན། ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པའི་ཚོགས་འདུ་སྐབས་དེར་ད་ལྟ་འཕྲད་བཞིན་པའི་དཀའ་ངལ་དེ་སེལ་ཐབས་ཡོད་མེད་ཐད་བཀའ་བསྡུར་གནང་ཡོད་པ་རེད། འོན་ཀྱང་སྐབས་དེར་དཀའ་ངལ་དེ་སེལ་ཐབས་སུ་འདི་འདྲ་ཞིག་བྱ་དགོས་ཀྱི་རེད་ཅེས་མར་བཀའ་གང་ཡང་གནང་མ་སོང་། དེ་རིང་འདིར་ཁྲིམས་བཟོ་ལྷན་ཚོགས་ཀྱིས་ཁྲིམས་བཟོ་བྱས་ནས་གྲྭ་བཙུན་མང་དུ་གཏོང་དགོས་ཀྱི་འདུག་ཅེས་ཁྲིམས་བཟོ་གནང་པ་ཡིན་ན། དེའང་ལག་བསྟང་ཞུ་ཐུབ་ཀྱི་རེད་དམ་མ་རེད་བཅས་ལ་དགོངས་པ་བཞེས་དགོས་གལ་ཡིན་སྟབས། ཆོས་རིག་ལས་ཁུངས་ཀྱི་ངོས་ནས་ཞུ་ཚོད་ཐིག་གི་མི་འདུག་ཅེས་གསུངས་པ་མ་ཟད། ད་དུང་སྤྱི་འཐུས་རྣམ་པས་ཐབས་ལམ་ཚོལ་རྒྱུ་ཡོད་པ་དང་གྲོས་ཆོད་བཞག་རྒྱུ་ཡོད་པ། གྲུབ་འབྲས་འཐོན་པ་གནང་རྒྱུ་ཡོད་ན་གནང་རོགས། དེ་འདྲ་ཞིག་བྱེད་ཤོག་ཅེས་ཆོས་རིག་ལས་ཁུངས་ལ་མར་བཀའ་གནང་རོགས་ང་ཚོ་འབྲེལ་ཡོད་ཀྱིས་དེ་ལྟར་ལག་བསྟར་ཞུ་ཆོག་ཅེས་གསུངས་ཡོད། གཞི་རྩའི་ཁ་སང་གྲོས་ཚོགས་ལས་ཉིན་ལྔ་པའི་ཉིན་རྒྱབ་ཏུ་གྲོས་ཚོགས་སུ་བོད་མིའི་དགོན་སྡེ་ཁག་གི་ནང་དུ་དེང་སྐབས་བོད་རིགས་གྲྭ་བཙུན་རྒྱུན་ཉུང་དུ་འགྲོ་བཞིན་པའི་གནད་དོན་ཐད་ལ་ཆོས་རིགས་ལས་ཁུངས་ཀྱི་ངོས་ནས་གནད་དོན་འདིར་ཞིབ་འཇུག་གནང་ཡོད་མེད་ཀྱི་བཀའ་འདྲི་ཞུས་པར་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ང་ཚོས་དགོན་སྡེ་ཁག་དང་བཙུན་དགོན་ཁག་ལ་ཞིབ་འཇུག་བྱས་པའི་བརྒྱུད། ད་ལྟ་བཙན་བྱོལ་ནང་གི་དགོན་ཁག་ཏུ་ཁྱོན་བསྡོམས་གྲྭ་བཙུན་ ༤༠༠༠༠ ལྷག་ཡོད་པ་རེད། དེ་དག་ཁྲོད་ལས་བརྒྱ་ཆ་ ༥༥།༨ ཙམ་ཧི་མཱ་ལ་ཡའི་རི་རྒྱུད་ཆགས་ཚར་འདུག དགེ་ལུགས་ནང་འོ་ཙམ་ཡོད་པ་ལས་དེ་མིན་ཆོས་བརྒྱུད་གཞན་ཚོའི་ནང་མང་ཆེ་བ་ཧི་མཱ་ལ་ཡའི་རི་རྒྱུད་ཆགས་ཚར་འདུག་སྟབས། དེར་ཚང་མས་ཐུགས་འཚབ་གནང་གི་ཡོད་པ་རེད་ཅེས་གསུངས་ཡོད། རྩ་བའི་དེ་རིང་སྔ་དྲོའི་གྲོས་ཚོགས་སུ་སྤྱི་འཐུས་རྣམ་པས་དེང་སྐབས་ཀྱི་སྤྱི་ཚོགས་འགྱུར་གྲོས་ལ་གཞིགས་ན་བོད་པའི་གྲྭ་བཙུན་གྱི་གྲངས་འབོར་མང་དུ་གཏོང་ཐབས་དཀའ་བའི་གནས་དང།...