བོད་ཀྱི་རི་སྐྱེས་སྲོག་ཆགས་ཀྱི་འདྲ་པར་ཞིག་ལ་ཕྱི་ལོ་ ༢༠༡༩ ལོའི་འདྲ་པར་རྩེ་ཕུད་ཀྱི་བྱ་དགའ་ཐོབ་པ།

རྒྱ་གཞུང་གིས་དབྱེ་བའི་བོད་མདོ་སྨད་མཚོ་སྔོན་ནས་ཡིན་པ་པར་ལེན་པ་ Yongqing Bao ལགས་ཀྱིས་མཚོ་སྔོན་དང་ཀན་སུའི་ས་མཚམས་སུ་ཆགས་པའི་མདོ་ལ་རིང་མོ་རི་བརྒྱུད་ནས་ལེན་པའི་ཝ་མོས་སྡེར་ཤད་ཀྱིས་འཕྱི་བ་ཁ་གདངས་མིག་བགྲད་བྱས་པའི་སྐད་ཅིག་ཞེས་པའི་འདྲ་པར་ལ་ཕྱི་ལོ་ ༢༠༡༩ ལོའི་རི་སྐྱེས་སྲོག་ཆགས་ཀྱི་འདྲ་པར་རྩེ་ཕུད་ཀྱི་བྱ་དགའ་ཐོབ་འདུག དབྱིན་ཡུལ་གྱི་རྒྱལ་ས་ལོན་ཌོན་དུ་རྟེན་གཞི་བྱས་པའི་ Natural History Museum ཞེས་འགྲེམས་སྟོན་ཁང་གིས་གོ་སྒྲིག་ཞུས་པའི་འདི་ལོའི་རི་སྐྱེས་སྲོག་ཆགས་ཀྱི་འདྲ་པར་འགྲན་བསྡུར་ཐེངས་ ༥༥ ཐོག་རྒྱལ་ཁབ་ ༡༠༠ ལྷག་ཙམ་ནས་འཛུལ་ཞུགས་པ་ ༤༨༠༠༠ ལྷག་བྱུང་བའི་ཁོངས་སུ་འདི་ལོའི་རི་སྐྱེས་སྲོག་ཆགས་ཀྱི་འདྲ་པར་རྩེ་ཕུད་དེ་མཚོ་སྔོན་ནས་ཡིན་པ་པར་ལེན་པ་ Yongqing Bao ལགས་ཀྱིས་ལེན་པའི་ཝ་མོས་སྡེར་ཤད་ཀྱིས་འཕྱི་བ་ཁ་གདངས་མིག་བགྲད་བྱས་པའི་ཆེས་མཐོང་དཀའ་བའི་རྣམ་པ་མཚོན་པའི་འདྲ་པར་ལ་བྱ་དགའ་ཐོབ་ཡོད་པ་རེད། འདྲ་པར་དེའི་ཐོག་འགྲེམས་སྟོན་ཁང་གི་ངེས་སྟོན་པ་ Michael Dixon ལགས་ཀྱིས་འདྲ་པར་དེས་འཚོ་བའི་ཆེད་གདོང་ལེན་གྱིས་རང་བྱུང་ཁམས་ཀྱི་ཆོས་ཉིད་ཞིག་བསྟན་པ་དང་འདྲ་པར་ལེན་ས་བོད་ས་ཁུལ་མཚོན་པ་ཡིན་ན་འཛམ་བུ་གླིང་གི་ལྷོ་སྣེ་གསུམ་པར་འབོད་ཀྱི་ཡོད་པ་དང་ཕྱོགས་མཚུངས་ད་ཆ་གོ་ལའི་ཚ་དྲོད་རྐྱེན་གྱིས་བོད་ཀྱི་ཁོར་ཡུག་གི་གནས་སྟངས་ཆེས་ཉེན་ཁར་ལྷུང་ཡོད་སྟབས་དེར་ཡོད་པའི་སྲོག་ཆགས་དག་ལའང་གནམ་གཤིས་འགྱུར་ལྡོག་གི་ཤུགས་རྐྱེན་ཐེབས་ཀྱི་ཡོད་པས་འདྲ་པར་དེ་བརྒྱུད་ནས་ང་ཚོས་སྲུང་སྐྱོབ་དགོས་པའི་གནད་དོན་ཁག་གཅིག་དྲན་སྐུལ་བྱེད་ཀྱི་ཡོད་པ་གསུངས་འདུག དེ་བཞིན་ཐེངས་འདིའི་འདྲ་པར་རྩེ་ཕུད་གདམས་མཁན་ཚོགས་ཆུང་གི་ཚོགས་གཙོ་ཡིན་པའི་སྐུ་ཞབས་ Roz Kidman...