བོད་ཀྱི་སྐད་ཡིག་སྲུང་སྐྱོབ་ཀྱི་ལས་འགུལ་སྤེལ་མཁན་ལ་རྒྱལ་ཁབ་ཁ་བྲལ་གྱི་ངན་སྐུལ་བྱེད་པའི་ཉེས་འཛུགས་བྱས་འདུག

རྒྱ་ནག་གཞུང་གིས་བོད་མིའི་མི་རབས་རྗེས་མ་དེ་བོད་སྐད་མ་ཤེས་པའི་མི་རིགས་ཤིག་ཆགས་ཐབས་སུ་བྱུས་ངན་གྱི་སྲིད་བྱུས་སྣ་ཚོགས་ཤིག་བརྩམས་དང་རྩོམ་བཞིན་པ་རྣམས་ཐེར་འདོན་དང་སྐྱོན་བརྗོད་གནང་སྟེ་བོད་ཀྱི་སྐད་ཡིག་སྲུང་སྐྱོབ་གནང་རྒྱུའི་ཞུ་གཏུག་ལས་འགུལ་ཞིག་དབུ་འཛུགས་གནང་འདུགརྒྱལ་སྤྱིའི་བོད་དོན་འབྲེལ་མཐུད་ལས་ཁང་ (International Tibet Network ) གིས་ཁ་སང་རྒྱལ་སྤྱིའི་མ་སྐད་ཉིན་མོ་དང་བསྟུན་དྲྭ་རྒྱའི་ཐོག་རྒྱ་ནག་གཞུང་གིས་བོད་མི་རིགས་ཀྱི་སྐད་ཡིག་སློབ་གཉེར་གནང་ས་ཕལ་མོ་ཆེར་རྒྱ་ནག་གཞུང་གི་ཁྱད་ཆོས་ལྡན་པའི་རྒྱ་སྐད་སློབ་གཉེར་བྱ་ཡུལ་ཞིག་ཏུ་བཟོས་ཡོད་པར་མ་ཟད། ཕ་མ་རྣམས་ལ་བཙནདབང་གིས་རང་གི་བུ་ཕྲུག་རང་དང་ཐག་རིང་བའི་རྒྱ་སྐད་སློབ་གཉེར་བྱ་ཡུལ་ལ་ཆེད་གཏོང་དགོས་པའི་བཙན་བཀའ་སོགས་བཏང་བ་བརྒྱུད་དེ་བོད་མིའི་མི་རབས་རྗེས་མ་དེ་དག་བོད་སྐད་མ་ཤེས་པའི་མི་རིགས་ཤིག་ཆགས་ཐབས་སུ་བྱུས་ངན་གྱི་སྲིད་བྱུས་སྣ་ཚོགས་ཤིག་བརྩམས་དང་རྩོམ་བཞིན་ཡོད་སྟབས། དྲྭ་ཐོག་ནས་རྒྱ་ནག་གཞུང་གི་སྲིད་བློན་གཞོན་པ་ Sun Chunlan དང་ཤེས་རིག་བློན་ཆེན་ Chen Baosheng གཉིས་ཀྱི་མིང་ཐོག་བོད་ཀྱི་སྐད་ཡིག་རང་དབང་སྲུང་སྐྱོབ་ཅེས་འཕྲིན་གཏོང་གི་ལས་འགུལ་ཞིག་སྤེལ་དང་སྤེལ་མུས་ཁྲོད་ད་བར་མི་མང་ ༡༥༠༠ ལྷག་ནས་མཉམ་ཞུགས་གནང་ཡོད་ཀྱང་། ལས་འགུལ་ཀྱི་ཐོག་མའི་དམིགས་ཚད་ལྟར་མི་མང་ ༢༥༠༠ ལྷག་ནས་མཉམ་ཞུགས་གནང་དགོས་ཀྱི་ཡོད་པ་རེད། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གིས་རྒྱ་ནག་གཞུང་གིས་བོད་ཁུལ་དུ་སྐད་ཡིག་གཉིས་ལྡན་གྱི་སློབ་གསོ་སྤྲོད་ཀྱི་ཡོད་ཚུལ་བརྗོད་ཀྱི་ཡོད་ཀྱང་བོད་ཡིག་སློབ་གཉེར་གནང་སའི་སློབ་གྲྭ་ཁག་ཕྱིར་བཤོལ་བྱས་པ་དང་སྔོན་འགྲོའི་སློབ་གྲྭར་བཙན་དབང་གིས་རྒྱ་སྐད་སྦྱོང་འཇུག་བཞིན་ཡོད་པ་ནི་རྒྱ་ནག་གཞུང་གིས་བོད་མི་རིགས་ཀྱི་ངོ་བོ་མཚོན་ཆེད་སྐད་ཡིག་དང་རིག་གཞུང་དེ་དག་ཆེད་མངགས་རྩ་མེད་གཏོང་བཞིན་ཡོད་པ་རེད་ཅེས་འགྲེལ་བརྗོད་གནང་བ་དང་སྦྲགས། ལོ་ངོ་བཅུ་ཕྲག་ཁ་ཤས་ཀྱི་སྔོན་ལ་རྒྱ་ནག་གཞུང་གིས་བོད་ཕྲུག་སློབ་གཉེར་གནང་སའི་སློབ་གྲྭ་ཁག་ཏུ་བོད་ཀྱི་སྐད་ཡིག་སློབ་ཁྲིད་གནང་རྒྱུ་དེ་རྩ་བ་ནས་མེད་པ་བཟོ་ཐབས་ལ་འབད་བརྩོན་བྱས་ཡོད་ཀྱང་སྐབས་དེར་བོད་རིགས་སློབ་མ་གཙོས་མི་མང་སྟོང་ཕྲག་མང་པོ་ཐང་ལ་ཕྱིར་ཐོན་ནས་ང་ཚོར་སྐད་ཡིག་གི་རང་དབང་དགོས་ཞེས་པའི་སྐད་འབོད་གནང་སྟེ་ངོ་རྒོལ་ཤུགས་ཆེ་གནང་བར་བརྟེན་རྒྱ་གཞུང་གི་བྱུས་ངན་པ་དེ་ལམ་ལྷོང་བྱུང་མེད་སྟབས། ད་ཆ་སླར་ཡང་རྒྱ་ནག་གཞུང་གིས་བྱ་ངན་དེ་བརྩམས་དང་རྩོམ་བཞིན་ཡོད་རྐྱེན་ཐེངས་འདིའི་རྒྱལ་སྤྱིའི་མ་སྐད་ཉིན་མོ་དང་བསྟུན་ང་ཚོའི་ནུས་པ་མཉམམ་སྤུངས་ཀྱིས་ལས་འགུལ་དེ་སྤེལ་དགོས་པའི་གཞེན་སྐུལ་གནང་འདུག

དེ་སྔ་རྒྱ་ནག་གཞུང་ལ་བོད་ཀྱི་སྐད་ཡིག་བདག་དབང་ཆེད་ཞུ་གཏུག་གི་རྩོམ་ཡིག་སྤེལ་མཁན་བོད་མདོ་ཁམས་ཡུལ་ཤུལ་ཁུལ་གྱི་བོད་མི་བཀྲིས་དབང་ཕྱུག་ལགས་རྒྱ་ནག་གཞུང་གིས་འཛིན་བཟུང་བཀག་ཉར་བྱས་པ་དང་། ད་ཆ་རྒྱ་གཞུང་གིས་ཁོང་ལ་རྒྱལ་ཁབ་ཁ་བྲལ་གྱི་ངན་སྐུལ་བྱེད་པའི་ཉེས་འཛུགས་ཀྱང་བྱས་འདུག དེ་ཡང་ཁ་སང་ཨ་རིའི་ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བར་གཞིགས་ན། རྒྱ་ནག་གཞུང་གི་རྩ་ཁྲིམས་ནང་གསལ་མི་སུ་འདྲ་ཞིག་འཛིན་བཟུང་བྱ་རུང་ཚོུད་ ༢༤ ནང་ཚུད་དོ་བདག་གི་ནང་མིར་བརྡ་ལན་སྤྲད་དགོས་ཀྱི་ཡོད་པ་ལྟར། བཀྲིས་དབང་ཕྱུག་ལགས་ཕྱི་ཟླ་ ༡ པོའི་ཟླ་མཇུག་ཏུ་འཛིན་བཟུང་བྱས་ཟིན་རྗེས་ཟླ་གཅིག་གི་རྗེས་སུ་ནང་མིར་བརྡ་ལན་ཞིག་བྱས་འདུག་ཀྱང་། ཁོང་གི་ནང་མི་ཚོ་དང་ཐུག་འཕྲད་བྱ་བཅུག་མེད་པ་རེད་འདུག ཟླ་འདིའི་ཚེས་ ༢༤ ཉིན་རྒྱ་གཞུང་ཉེན་རྟོག་པས་ཁོང་གི་ནང་མི་རྣམས་ལ། བཀྲིས་དབང་ཕྱུག་ལགས་ད་ལྟ་ཡུལ་ཤུལ་ཁུལ་གྱི་ཉེན་རྟོག་ལས་ཁུངས་སུ་བཀག་བསྐྱིལ་བྱས་ཡོད་པ་མ་ཟད། ད་ཆ་ཁོང་ལ་རྒྱལ་ཁབ་ཁ་བྲལ་གྱི་ངན་སྐུལ་བྱེད་པའི་ཉེས་མིང་འོག་བཙོན་འཇུག་བྱས་ཡོད་སྐོར་གྱི་ཡི་གེ་ཞིག་ནང་མིར་སྤྲད་ཡོད་འདུག ཡི་གེ་དེའི་ཐོག་ཟླ་འདིའི་ཚེས་ ༤ འཁོད་ཡོད་པ་རེད་འདུག གནས་ཚུལ་ཐོན་ཁག་ལ་གཞིགས་ན་ཁོང་ལ་མི་ལོ་ ༡༥ བར་གྱི་བཙོན་འཇུག་ཁྲིམས་ཐག་བཅད་ངེས་ཡིན་འདུག འོན་ཀྱང་ད་ལྟའི་གཏུག་བཤེར་གྱི་ཟླ་ཚེས་གཏན་འཁེལ་མེད་པ་རེད། ད་ལྟའི་ཆར་ཁོང་གི་ནང་མི་ཚོར་ཁྲིམས་རྩོད་པ་མ་རག་པའི་དཀའ་ངལ་འཕྲད་བཞིན་ཡོད་འདུག བཀྲིས་དབང་ཕྱུག་ལགས་ཀྱི་གནད་དོན་ཐོག་རྒྱལ་སྤྱིའི་ཚོགས་སྡེ་ཁག་གི་དོ་སྣང་ཤུགས་ཆེ་བྱེད་བཞིན་ཡོད་པ་ལྟར། ཨ་རིའི་ཕྱི་སྲིད་ལས་ཁུངས་ནས་ཀྱང་ཁོང་གི་གནད་དོན་སྐོར་གསལ་པོ་ཤེས་ཀྱི་ཡོད་པ་དང་། ཁེ་ན་ཌའི་སྨྲ་བརྗོད་རང་དབང་གི་གསར་འགོད་པའི་ཚོགས་པའི་སྐུ་ཚབ་ཞིག་གིས་གསུངས་དོན། ཁོང་རྣམས་ནས་བཀྲིས་དབང་ཕྱུག་ལགས་འཕྲལ་དུ་ཀློད་བཀྲོལ་བཏང་དགོས་པའི་ཞུ་འབོད་ཀྱི་ལས་འགུལ་ཞིག་དབུ་འཛུག་གནང་ཟིན་ཡོད་པ་གསུངས་ཡོད། དེ་བཞིན་ད་རེས་རྒྱ་ནག་གི་སྲིད་འཛིན་ཞི་ཅིང་ཕིང་ཨ་རིར་སླེབས་ཀྱི་ཡོད་པ་དང་བསྟུན།...