བོད་ཆབ་མདོ་ཁུལ་དུ་ས་འགུལ་བརྒྱས་པས་མི་ ༦༠ ཙམ་ལ་རྨས་སྐྱོན་ཕོག་འདུག

རྒྱ་ནག་གཞུང་གི་དབྱེ་བའི་བོད་རང་སྐྱོང་ལྗོངས་ཟེར་བའི་ཆབ་མདོ་བོད་རིག་ས་ཁུལ་གྱི་སྟེང་ཆེན་རྫོང་ནང་དུ་ཁ་སང་ཚེས་ ༡༡ ཉིན་ཤུགས་ཚད་ ༥་༥ ཅན་གྱི་ས་འགུལ་ཤུགས་ཆེ་བརྒྱབ་པའི་འོག་མི་ ༦༠ ཙམ་ལ་རྨས་སྐྱོན་ཕོག་འདུག་པ་དང་། དེའི་ཁོངས་ནས་མི་དྲུག་གི་གནས་སྟངས་ཛ་དྲག་གྱུར་འདུག དེ་ཡང་དེ་རིང་རྒྱ་ནག་གི་གཞུང་འབྲེལ་བརྒྱུད་ལམ་དང། སྟེང་ཆེན་རྫོང་གི་དྲ་གནས་སོགས་ཀྱི་ཐོག་ལ་གནས་ཚུལ་ཐོན་ཁག་ལ་གཞིགས་ན། ཁ་སང་སྔ་དྲོ་བོད་ནད་གི་ཚོུད་ ༩།༡༥ ཐོག་མཚོ་སྔོན་ཞིང་ཆེན་གྱི་ས་མཚམས་ཉེ་འཁྲིས་ཆབ་མདོ་ས་ཁུལ་སྟིང་ཆེན་རྫོང་ནང་དུ་ས་འགུལ་ཤུགས་ཆེ་བརྒྱབ་འདུག་པ་དང། དེའི་རྐྱེན་པས་ཁུལ་དེར་ས་རུས་དང། སྡོད་ཁང་། དེ་བཞིན་གཞུང་ལམ་དང་ཟམ་པ་ཞིག་པ་སོགས་ཀྱི་གནད་དོན་ཁག་ཅིག་བྱུང་བའི་ཁྲོད་ད་བར་མི་ ༦༠ ཙམ་ལ་རྨས་སྐྱོན་ཕོག་པ་དང། དེ་དག་ལས་མི་དྲུག་གི་གནས་སྟངས་ཛ་དྲག་ཆགས་ཡོད་པ་བཅས་འཁོད་འདུག འོན་ཀྱང་ད་བར་མིའི་ཚེ་སྲོག་ཤོར་བའི་གནས་ཚུལ་གང་ཡང་ཤེས་རྟོགས་ཐུབ་མེད།  ད་ལྟའི་ཆར་ཁུལ་དེར་མྱུར་སྐྱོབ་ཀྱི་ལས་གཞི་གཞི་རྒྱ་ཆེ་བ་ཞིག་སྤེལ་མུས་ཡིན་ཁར། རྨས་སྐྱོན་ཕོག་པ་རྣམས་མྱུར་སྐྱོབ་སླད་ཆབ་མདོ་ཁུལ་གྱི་སྨན་ཁང་དུ་སྐྱེལ་ཡོད་འདུག