བོད་དོན་ལས་འགུལ།

སུད་སི་ནང་གི་གནས་སྡོད་བོད་མི་ཚོས་སྒྱུ་རྩལ་གཏམ་བརྗོད་ཀྱི་ལམ་ནས་རྒྱ་ནག་གཞུང་གིས་བོད་ནང་གི་བོད་མིའི་ཐོག་དྲག་གནོན་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་དངོས་ཡོད་གནས་སྟངས་མངོན་གསལ་གནང་བ་བརྒྱུད་ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩེད་འགྲན་ཚོགས་ལ་ངོ་རྒོལ་གྱི་ཞི་བའི་སྐད་འབོད་ལས་འགུལ་སྤེལ་སོང་། ཟླ་བའི་འདིའི་ཕྱི་ཚེས་ ༣༡ ཉིན་སུད་སི་དང་ལིག་ཏེན་སིཊཡན་བོད་རིགས་མི་མང་གི་ཁྱབ་ཁོངས་ Rapperswil དང་ Ruti ས་གནས་ཚོགས་ཆུང་གཉིས་ཀྱི་གོ་སྒྲིག་འོག་སུད་སི་གྲོང་ཁྱེར་ཛུ་རིག་ Helvetia Platz ཐང་ཆེན་དུ་བོད་མི་ལས་འགུལ་བ་ཚོས་བོད་ནང་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་སྒོས་རྒྱ་ནག་དམར་པོའི་གཞུང་གིས་བོད་མིའི་ཆོས་དད་དང་སྐད་ཡིག་རང་དབང་རྡོག་རོལ་དང་དམ་དྲག་ཆེན་པོ་བྱེད་བཞིན་པའི་ཐོག་བོད་མིའི་རང་དབང་འཐབ་རྩོད་གནང་མཁན་ཞི་རྒོལ་བ་ཚོའི་སྟེང་དྲག་གནོན་དང་འཛིན་བཟུང་བཙོན་འཇུག་བྱེད་བཞིན་པའི་དངོས་ཡོད་གནས་སྟངས་རྣམས་སྒྱུ་རྩལ་གཏམ་བརྗོད་ཀྱི་ལམ་ནས་ས་གནས་མང་ཚོགས་ལ་མངོན་གསལ་གནང་ཡོད་པ་རེད། བོད་མི་ཚོས་སྐབས་དེར་ད་བར་བོད་བསྟན་སྲིད་མི་རིགས་ཀྱི་ཆེད་དུ་སྐུ་སྲོག་བློས་བཏང་གནང་མཁན་རྒྱལ་གཅེས་པ་རྣམས་ལ་མྱ་ངན་གུས་འདུད་ཞུས་པ་དང་ལྷག་པར་དུ་ས་གནས་མང་ཚོགས་ཁྲོད་བོད་ནང་གི་དངོས་ཡོད་གནས་སྟངས་གསལ་བའི་ཡིག་ཆ་འགོད་འགྲེམས་དང། པེ་ཅིང་དགུན་དུས་ཨོ་རྩེད་འགྲན་ཚོགས་སུ་སུད་སི་གཞུང་འབྲེལ་མི་སྣ་མཉམ་ཞུགས་ལས་ཕྱིར་འཐེན་ཡོང་བ་སོགས་དང་འབྲེལ་ས་གནས་མང་ཚོགས་ཁྲོད་ནས་མཚན་རྟགས་བསྡུ་རུབ་དང་། དེ་བཞིན་ཉིན་དེར་བོད་མི་ལས་འགུལ་བ་ཚོས་བོད་ཀྱི་རྒྱལ་དར་འཕྱར་ཏེ་བོད་ལ་རང་དབང་དགོས། ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩེད་མགྲན་ཚོགས་ཕྱིར་འཐེན་དགོས་པ་སོགས་ཀྱི་ཞི་བའི་སྐད་འབོད་ལས་འགུལ་སྤེལ་ཡོད། སྤྱིར་ད་ལྟའི་སུད་སི་དང་ལིག་ཏེན་སིཊཡན་བོད་རིགས་ཁྱབ་ཁོངས་སུ་ཁྱོན་བོད་རིགས་ས་གནས་ཚོགས་ཆུང་ ༢༥ ཡོད་པ་དང་རིང་མིན་རྒྱ་ནག་ཏུ་འཚོགས་རྒྱུའི་ ༢༠༢༢ ལོའི་པེ་ཅིང་དགུན་དུས་ཨོ་རྩེད་མགྲན་ཚོགས་དང་འབྲེལ་ཏེ་སུད་སི་དང་ལིག་ཏེན་སིཊཡན་བོད་རིགས་མི་མང་ཡོངས་ནས་ཁྱབ་ཁོངས་བོད་རིགས་ཚོགས་ཆུང་ཁག་འཆར་འགོད་ཀྱིས་ཟླ་རེར་བོད་དང་འབྲེལ་བའི་ལས་འགུལ་མུ་མཐུད་ནས་སྤེལ་གཏན་ཁེལ་ཡོད་པ་རེད་འདུག

ཁེ་ན་ཌ་གནས་བཞུགས་བོད་མི་ལས་འགུལ་བ་སངས་རྒྱས་སྐྱབས་ལགས་ཀྱིས་ཉེ་ལམ་ཕྱི་ཚེས་ ༡༢ ཉིན་གྱི་སྔ་དྲོ་ཕྱག་ཚོད་ ༡༠ ཐོག་ཁེ་ན་ཌ་ཊོ་རོན་ཊོའི་རྒྱ་ནག་གཞུང་ཚབ་མདུན་ནས་རྒྱལ་ས་ཨོ་ཊ་ཝའི་རྒྱ་ནག་གཞུང་ཚབ་ཁང་བར་དང་དེ་ནས་ཕྱིར་ཊོ་རོན་ཊོའི་རྒྱ་ནག་གཞུང་ཚབ་མདུན་ངོས་བར་བཅས་ཁྱོན་རྒྱང་ཐག་སྤྱི་ལེ་ ༩༠༠ ཙམ་ཞིག་གི་བོད་དོན་ཞི་བའི་གོམ་བགྲོད་དབུ་འཛུགས་གནང་ཡོད་པ་རེད།གོམ་བགྲོད་དེའི་བརྒྱུད་ཁོང་གིས་གཙོ་བོ་ཁེ་ན་ཌའི་སྲིད་བློན་སྐུ་ཞབས་ Justin Trudeau མཆོག་དང་རྒྱལ་སྤྱིའི་ཚོགས་སྡེ་ཁག་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལ་ཆིབས་བསྒྱུར་བསྐྱང་རྒྱུའི་ཐོག་རྒྱབ་སྐྱོར་དང་བོད་རྒྱ་གཉིས་ཀྱི་དཀའ་རྙོག་སྟེ་ཕན་ཚུན་གྲོས་བསྡུར་དང་ཡིད་ཆེས་ཀྱི་ལམ་ནས་བསྐྱར་གསོ་བྱ་རྒྱུ། ༸ཀུན་གཟིགས་༸པཎ་ཆེན་རིན་པོ་ཆེ་མཆོག་དང་བོད་ཀྱི་ཆབ་སྲིད་བཙོན་པ་རྣམས་ངེས་པར་དུ་གློད་བཀྲོལ་དགོས་པ། རྒྱ་ནག་ཏུ་ ༢༠༢༢ ལོའི་རྒྱལ་སྤྱིའི་ཨོ་ལིམ་པིཀ་རྩེད་འགྲན་གནང་རྒྱུར་མཚམས་འཇོག་བྱེད་དགོས་པ། དེ་བཞིན་རྒྱ་ནག་གིས་བཟོས་པའི་ཏོག་དབྱིབས་ནད་ཡམས་ལ་འགན་ལེན་དང་རྒྱལ་སྤྱིས་ཐེར་འདོན་བྱེད་དགོས་བཅས་དོན་ཚན་ལྔ་འབོད་སྐུལ་ཞུས་འདུགགཞི་རྩའི་སངས་རྒྱས་སྐྱབས་ལགས་ཀྱིས་དེ་སྔ་གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དང་བསྟུན་ཁེ་ན་ཌའི་ Toronto གྲོང་ཁྱེར་ནས་རྒྱལ་ས་ Otawa བར་དང་དེ་རྗེས་སླར་ཊོ་རོན་ཊོ་བར་བོད་དོན་གོམ་བགྲོད་ཀྱི་ལས་འགུལ་སྤེལ་ཡོད་པ་མ་ཟད། ཨོ་ཝ་ཝ་བར་རྟེན་གཞི་བྱས་པའི་རྒྱ་ནག་གཞུང་ཚབ་མདུན་དུ་ཉིན་གཅིག་གི་རིང་ཟས་བཅད་ངོ་རྒོལ་གནང་ཡོད་པ་རེད།ལྷག་པར་ཁོང་གིས་ཕྱི་ལོ་ ༢༠༡༨ ལོ་ནས་བཟུང་སྟེ་རེས་གཟའ་ལྷག་པ་ནམ་ཡིན་ལ་ཁེ་ན་ཌར་རྟེན་གཞི་བྱས་པའི་རྒྱ་ནག་གཞུང་ཚབ་མདུན་དུ་༸གོང་ས་མཆོག་བོད་དུ་གདན་འདྲེན་ཞུས་དགོས་པ་དང་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གིས་གཙོས་པའི་བཀྲིས་དབང་ཕྱུག་ལགས་དང་བོད་མིའི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་དགོས་པ་སོགས་ཀྱི་དགོས་འདུན་འོག་བོད་དོན་ལས་འགུལ་སྤེལ་གྱི་ཡོད་པ་རེད།ངོ་དེབ་ཐོག་ཏུ་ད་ལན་ཁོང་གིས་བོད་དང་ཁེ་ན་ཌའི་རྒྱལ་དར་བསྣམས་པ་དང་བོད་དོན་ཞི་བའི་གོམ་བགྲོད་ Free Tibet...

དབྱིན་ཡུལ་གྱི་རྒྱལ་ས་ལོན་ཊོན་ནང་གི་རྒྱ་ནག་གཞུང་ཚབ་མདུན་དུ་ཕྱི་ལོ་ ༡༩༨༩ ལོ་ནས་བཟུང་སྟེ་ད་བར་སྤེལ་བཞིན་པའི་རེས་གཟའ་ལྷག་པའི་བོད་དོན་ལས་འགུལ་གྱི་རྒྱབ་ལྗོངས་སྐོར་ལ་རླུང་འཕྲིན་ཁང་གིས་ད་ལྟའི་ཆར་ལས་འགུལ་འདིའི་ནང་མཉམ་ཞུགས་ཀྱིས་ལས་འགུལ་རྒྱུན་སྐྱོང་གནང་བཞིན་པ་བོད་མི་བསྟན་འཛིན་དབྱིག་གཉེན་ལགས་སུ་བཅར་འདྲི་ཞུས་པ་ཞིག་ཕྱོགས་སྒྲིག་ཞུས་ཡོད་པས་གསན་གནང་ཡོང་བའི་དགོངས་འཇགས་ཞུ།།

ཡོ་རོབ་རྒྱལ་ཁབ་སྦེལ་འཇམ་ནང་གནས་སྡོད་བོད་མི་མིག་དམར་ཚེ་རིང་ལགས་ཀྱིས་མ་སྐུལ་དང་བླངས་ཐོག་ཁུལ་དེའི་རྒྱ་ནག་གཞུང་ཚབ་མདུན་དུ་དགོས་འདུན་དོན་ཚན་ལྔ་ཅན་ཆེད་འདོན་གྱིས་རྒྱ་གཞུང་གིས་བྱ་སྤྱོད་ལ་ངོ་རྒོལ་གྱི་ཞི་བའི་ལས་འགུལ་དབུ་འཛུགས་གནང་འདུགཉེ་ཆར་བོད་རིགས་གནས་ཡུལ་འཛམ་གླིང་རྒྱལ་ཁབ་འདྲ་མིན་ནང་དུ་རྒྱ་གཞུང་གྱི་བྱ་སྤྱོད་ལ་མི་འདོད་པའི་ངོ་རྒོལ་གྱི་ལས་འགུལ་རྣམ་པ་འདྲ་མིན་བརྒྱུད་སྤེལ་བཞིན་ཡོད་པའི་ཁྲོད་འདིར་ཁ་སང་རེས་གཟའ་ལྷག་པ་སྟེ་༸སྐུའི་བླ་གཟའ་ལྷག་དཀར་ཉིན་མོར་སྦེལ་འཇམ་ནང་གནས་སྡོད་བོད་མི་མིག་དམར་ཚེ་རིང་ལགས་ཀྱིས་སྦེལ་འཇམ་གྱི་རྒྱལ་ས་སྦར་སིལ་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མདུན་ངོས་སུ་ལྷག་དཀར་གྱི་ལས་འགུལ་ཞིག་དབུ་འཛུགས་གནང་འདུག སྐབས་དེར་ཁོང་གིས་བོད་མིའི་ངོ་བོ་མཚོན་པའི་སྟོད་ཐུང་གྱོན་ནས་བོད་ཀྱི་རྒྱལ་དར་སྒྲེང་འཛུགས་དང་། དེ་བཞིན་རྒྱ་གཞུང་ནས་༸གོང་ས་མཆོག་དང་བོད་མིའི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་པ། ༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་མི་ཆབ་སྲིད་བཙོན་པ་འཕྲལ་མར་གློད་བཀྲོལ་དགོས་པ། ཏོག་དབྱིབས་ནད་ཡམས་ཁྱབ་གདལ་གྱི་རྒྱུ་རྐྱེན་ཡོངས་རྫོགས་རྒྱ་གཞུང་ནས་ངོས་ལེན་བྱེད་དགོས་པ། རྒྱ་གཞུང་ནས་ཁོར་ཡུག་གཏོར་བཤིག་གི་བྱ་སྤྱོད་མཚམས་འཇོག་དགོས་པ། དེ་བཞིན་རྒྱ་ནག་གི་ཅ་དངོས་ཉོ་ཚོང་མཚམས་འཇོག་དགོས་པ་སོགས་དགོས་འདུན་དོན་ཚན་ལྔ་ཅན་ཆེད་འདོན་གྱིས་ཞི་བའི་ལས་འགུལ་སྤེལ་ཡོད་པ་རེད།མིག་དམར་ཚེ་རིང་ལགས་ཀྱིས་རླུང་འཕྲིན་ཁང་ལ་ཁོང་ནས་རྒྱ་ནག་གཞུང་ཚབ་མདུན་ངོས་སུ་བོད་དོན་ལས་འགུལ་སྤེལ་བ་དེ་ནི་བོད་དོན་བདེན་མཐའ་མ་སེལ་བར་རེས་གཟའ་ལྷག་པ་ནམ་ཡིན་ལ་ལས་འགུལ་དེ་ལྟར་སྤེལ་ངེས་ཡིན་པ་གསུངས་སོང་། རྩ་བའི་རྒྱ་ནག་གཞུང་ཚབ་མདུན་དུ་ལྷག་དཀར་ཉིན་བོད་དོན་ལས་འགུལ་སྤེལ་བ་དེ་ས་གནས་སྦེལ་འཇམ་བོད་རིགས་ཚོགས་པ་དང་ས་གནས་བོད་དོན་རྒྱབ་སྐྱོར་ཚོགས་པའི་མཐུན་འགྱུར་འོག་མིག་དམར་ཚེ་རིང་ལགས་ཁེར་རྐྱང་གིས་དབུ་འཛུགས་གནང་བ་ཞིག་ཡིན་པ་རེད། ཁ་སང་ལས་འགུལ་དབུ་འབྱེད་སྐབས་སྦེལ་འཇམ་བོད་རིགས་ཚོགས་པའི་སྐུ་ཚབ་འཐུས་མི་སོགས་ནས་ནས་མཉམ་ཞུགས་གནང་ཡོད།

བོད་ཀྱི་ཆབ་སྲིད་བཙོན་ཟུར་རྟའུ་བློ་བཟང་སྦྱིན་པ་ལགས་ཀྱིས་རྒྱ་ནག་གཞུང་དེ་ད་ལྟའི་ཆར་འཛམ་གླིང་འདིའི་ཐོག་ཉེན་ཁ་ཆེན་པོར་སླེབས་ཡོད་ཅེས་པའི་འབོད་ཚིག་དང་འབྲེལ་མངོན་འདོད་དོན་ཚན་བཞིའི་ཐོག་ཕྱི་ཚེས་ ༨ ཉིན་ཨ་རིའི་གྲོང་ཁྱེར་བྷོ་སི་ཊོན་ནས་དབུ་འཛུགས་ཀྱིས་རྒྱལ་ས་ཝ་ཤིང་ཊོན་བར་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་ཞིག་སྤེལ་མུས་རེད་འདུགཐེངས་འདིའི་བོད་དོན་ལས་འགུལ་དེའི་དགོས་དམིགས་གཙོ་བོ་ནི་༸གོང་ས་༸སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་དགོས་པ་དང་༸ཀུན་གཟིག་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གཙོས་སྐུ་འཁོར་དང་དགེ་རྒན་རྣམས་གློད་བཀྲོལ་དགོས། ཁམས་རྟའུ་ཁུལ་ནས་བཙན་ཁྲིད་བྱས་པའི་བོད་ཀྱི་ཆབ་སྲིད་བརྩོན་པ་གཙོས་བོད་ཀྱི་ཆབ་སྲིད་བརྩོན་པ་རྣམས་འཕྲལ་མར་གློད་དཀྲོལ་དགོས། དེ་བཞིན་ཏོག་དབྱིབས་གཉན་རིམས་དེས་མི་འབུམ་ཕྲག་མང་པོའི་ཚེ་སྲོག་འཕྲོག་པ་དང་འཛམ་གླིང་ཁྱོན་ལ་དཀའ་ངལ་ཆེན་པོ་འཕྲད་པའི་འགན་ཡོངས་རྫོགས་རྒྱ་གཞུང་ལ་ཁུར་འཇུག་དགོས་ཞེས་སོགས་དགོས་འདུན་དོན་ཚན་བཞི་ཆགས་ཀྱི་འདུག་པ་དང་། རྐང་འཁོར་སྐོར་སྐྱོད་ཀྱི་ལས་འགུལ་དེ་ཨ་རིའི་རྒྱལ་ས་ Washing ton  DC ཁུལ་དུ་མཇུག་སྒྲིལ་གནང་རྒྱུ་ཡིན་པ་རེད། རྟའུ་བློ་བཟང་སྦྱིན་པ་ལགས་ཀྱིས་རླུང་འཕྲིན་ཁང་ལ་ལས་འགུལ་ཁྲོད་ལམ་བར་ནས་ཁོང་གི་ཕྱག་རོགས་དཀོན་མཆོག་ལགས་དང་བོད་རིགས་སྤྱི་མཐུན་ཚོགས་པ་དང་ས་གནས་བོད་རིགས་བཅས་ནས་མཉམ་ཞུགས་གནང་ཡོད་པ་མ་ཟད། ནིའུ་ཡོག་ཁུལ་དུ་ས་གནས་བོད་མི་རྣམས་ཀྱིས་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་ཞི་བའི་སྐད་འབོད་ཀྱི་ལས་འགུལ་སོགས་སྤེལ་ཡོད་སྐོར་ངོ་སྤྲོད་གནང་སོང་།རྩ་བའི་ད་ལྟའི་ཆར་རྒྱལ་སྤྱིའི་ཁྲོད་ཕྱོགས་གང་སར་ནས་རྒྱ་ནག་གཞུང་ལ་ངོ་རྒོལ་བྱེད་བཞིན་པའི་དུས་ཚིགས་འདིར་བོད་མིའི་ཚོགས་སྒེར་ཁག་ནས་ཞུ་གཏུག་གི་ལས་འགུལ་རབ་དང་རིམ་པར་སྤེལ་བཞིན་ཡོད་ཀྱང་།  རྟའུ་བློ་བཟང་ལགས་ཀྱིས་ང་ཚོའི་མི་རིགས་དེ་འཐབ་རྩོད་ཀྱི་མི་རིགས་ཤིག་ཡིན་པ་དང་བོད་མི་མི་རེ་ངོ་རེས་འགན་བཞེས་ནས་ཆིག་སྒྲིལ་གྱི་ནུས་པ་མཉམ་སྤུངས་དང་གོ་སྐབས་དམ་འཛིན་གྱི་སྒོ་ནས་ལས་འགུལ་མུ་མཐུད་སྤེལ་དགོས་པའི་འབོད་སྐུལ་གནང་ཡོད།

ཉེ་ཆར་འཛམ་གླིང་ཁྱོན་ཡོངས་ལ་རྒྱ་ནག་གི་ཏོག་དབྱིབས་གཉན་རིམས་ཁྱབ་གདལ་དང་འབྲེལ་ནས་བོད་མི་གནས་སྡོད་ས་ཁུལ་གང་སར་གཅིག་རྗེས་གཉིས་མཐུད་ཀྱིས་བོད་དོན་ལས་འགུལ་འདྲ་མིན་སྤེལ་བཞིན་པའི་ཁྲོད་འདིར་དེ་རིང་སུད་སི་ནང་སླར་བོད་མི་དང་བླངས་པ་ལྔས་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་པས་གོ་ལ་ཧྲིལ་པོའི་མང་ཚོགས་སྟོང་ཕྲག་དུ་མའི་ཚེ་སྲོག་ཤོར་བའི་འགན་ཡོངས་རྫོགས་རྒྱ་གཞུང་ནས་འཁྱེར་བཅུག་དགོས་ཞེས་པའི་འབོད་སྐུལ་འོག་དེ་རིང་ཕྱི་ཚེས་ ༤ ཉིན་གྱི་སྔ་དྲོ་ས་གནས་ Zug ནས་ཇི་ནི་ཝའི་མཉམ་འབྲེལ་རྒྱལ་ཚོགས་བར་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་དབུ་འཛུགས་གནང་ཡོད་པ་རེད། སྤྱིར་ད་རེས་ཀྱི་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་ནང་བོད་མི་མིག་དམར་ལགས་ཀྱིས་གཙོས་པའི་སྦན་ནས་ཡིན་པ་པདྨ་ལགས་དང། ཉེ་ཆར་བོད་དོན་གོམ་བགྲོད་ལས་འགུལ་སྣེ་ཁྲིད་གནང་མཁན་བོད་མི་བློ་བཟང་ལགས། དེ་བཞིན་སྦར་སིལ་ནས་ཡིན་པ་བློ་བཟང་ལགས། བསོད་ནམས་ལགས་བཅས་བོད་མི་དང་བླངས་པ་ལྔས་དེ་རིང་ས་གནས་ཛུག་ནས་དབུ་འཛུགས་ཀྱིས་ལུ་ཛན་དང་ཨརའོ། སྦན། ཕྷིར་སྦུག ལའོ་ཛན། དེ་ནས་མཐར་ཇི་ནི་ཝ་བཅས་སུ་སུད་སིའི་གྲོང་ཁྱེར་ཆེ་ཁག་དྲུག་ནང་སྐོར་སྐྱོད་གནང་རྒྱུ་རེད་འདུགལམ་བར་དུ་ཁོང་རྣམས་གཙོ་བོ་སུད་སི་གཙོས་རྒྱལ་སྤྱིའི་གཞུང་མང་ལ་རྒྱ་ནག་གི་ཏོག་དབྱིབས་གཉན་རིམས་རྐྱེན་པས་འཛམ་གླིང་ཀུན་ལ་དོ་ཕོག་བཏང་བའི་འགན་ཡོངས་རྫོགས་རྒྱ་གཞུང་ནས་འཁྱེར་དགོས་པ་བཟོ་རྒྱུ་གཙོས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་དང། ༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་ནང་གི་ཆབ་སྲིད་བཙོན་པ་གློད་བཀྲོལ། ༸གོང་ས་མཆོག་བོད་ལ་གདན་འདྲེན་ཞུ་དགོས་པ་བཅས་ཀྱི་དགོས་འདུན་དོན་ཚན་བཞི་ཅན་ཞིག་བརྒྱུད་བསྒྲགས་གནང་རྒྱུ་རེད་འདུགལྷག་པར་དུ་ཐེངས་འདིའི་ལས་འགུལ་སྣེ་ཁྲིད་གནང་མཁན་མིག་དམར་ཚེ་རིང་ལགས་ཀྱིས་ རྒྱ་ནག་ནས་ཁྱབ་གདལ་བྱུང་བའི་གཉན་རིམས་འདིས་འཛམ་གླིང་ཁྱོན་ཡོངས་སུ་མང་ཚོགས་སྟོང་ཚོ་མང་པོའི་ཚེ་སྲོག་འཕྲོག་པ་དང། དཔལ་འབྱོར་ལ་དོ་ཕོག་བཏང་བའི་གནད་དོན་འདི་འཛམ་གླིང་ས་ཕྱོགས་གང་སར་གནས་སྡོད་བོད་མི་ཚོགས་སྒེར་ཁག་རྒྱལ་སྤྱིའི་རང་བཞིན་ལྡན་པའི་གནད་དོན་ཞིག་བཟོ་ཐུབ་པ་གནང་དགོས་ཞེེས་གསུངས་ཡོད་པ་རེད།  སྤྱིར་སུད་སི་ནང་རྒྱལ་ཡོངས་སུ་ཁྱིམ་སྡོད་བཀའ་རྒྱ་ལྷོད་ཡངས་སུ་བཏང་རྗེས་ཐོག་མར་སུད་སི་གནས་སྡོད་བོད་མི་ཚེ་རིང་དབང་འདུས་ལགས་ཀྱིས་བོད་དོན་ལས་འགུལ་དབུ་འཛུགས་གནང་བ་དང་། དེ་རྗེས་ཉེ་ཆར་བོད་མི་བློ་བཟང་ལགས་ཀྱིས་སྣེ་ཁྲིད་འོག་བོད་དོན་གོམ་བགྲོད་ཀྱི་ལས་འགུལ་སྤེལ་ཡོད་པ་མ་ཟད། དེ་བཞིན་སླར་ཡང་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་བཅས་བོད་མི་སྒེར་ནས་སྤེལ་བའི་བོད་དོན་ལས་འགུལ་ཐེངས་གསུམ་པ་དེ་ཆགས་ཀྱི་ཡོད་པ་རེད།