བོད་པའི་བེུད་ཅིག་༸གོང་ས་མཆོག་གི་༸སྐུ་པར་བཤམས་པའི་ཉེས་མིང་འོག་འཛིན་བཟུང་།

ཟླ་བ་སྔོན་མའི་ཟླ་སྐྱིལ་དུ་རྒྱ་གཞུང་ཉེས་རྟོག་པས་༸གོང་ས་མཆོག་གི་༸སྐུ་པར་སྒྲིག་གཤོམ་བའི་གནང་ཉེས་མིང་འོག་འཛིན་བཟུང་བཙན་ཁྲིད་བྱས་པའི་བོད་པའི་བུད་མེད་འཛུམ་དཀར་ལགས་ཀྱི་གཅུང་མོ་གཡུ་སྒྲོན་ལགས་ཀྱང་འཛིན་བཟུང་བཙན་ཁྲིད་བྱས་འདུགཁ་སང་བོད་ཀྱི་དུས་བབ་གསར་ཁང་གི་དྲ་གནས་ཐོག་གནས་ཚུལ་སྤེལ་བར་ཟླ་བ་འདིའི་ཕྱི་ཚེས ༡༡ ཉིན་རྒྱ་གཞུང་ཉེན་རྟོག་པས་བོད་ནག་ཆུ་ཨ་མདོ་རྫོང་རྩ་རིང་གྲོང་རྡལ་ནས་ཡིན་པའི་བོད་པའི་བུད་མེད་གཡུ་སྒྲོན་ལགས་རྒྱུ་མཚན་ཡིན་གསལ་ཁ་མེད་པར་འཛིན་བཟུང་བཙན་ཁྲིད་བྱས་ཡོད་པ་དང་། ཁོང་མོ་ནི་ཟླ་སྔོན་མའི་ཕྱི་ཚེས་ ༢༣ ཉིན་རང་ཁྱིམ་གྱི་མཆོད་ཁང་ནང་དུ་ ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་བཤམས་ཡོད་པའི་ཉེས་མིང་འོག་རྒྱ་གཞུང་ཉེས་རྟོག་པས་རང་ཁྱིམ་ནས་འཛིན་བཟུང་བྱས་པའི་འཛུམ་དཀར་ལགས་ཀྱི་ཕ་མ་གཅིག་པའི་གཅུང་མོ་ཡིན་པ་གསལ་འདུག འབྲེལ་ཡོད་གནས་ཚུལ་མཁོ་སྤྲོད་གནང་མཁན་ཞིག་གིས་གཡུ་སྒྲོན་ལགས་ཉེ་ཆར་ཕྱི་ཚེས ༡༡ ཉིན་གྱི་ཞོགས་པ་ཐོ་རེངས་ཙམ་ལ་རྒྱ་གཞུང་ཉེས་རྟོག་པས་འཛིན་བཟུང་བཙན་ཁྲིད་བྱས་ཏེ་ལྷ་སའི་བཀག་ཉར་ཁང་ཞིག་ཏུ་བཀག་ཉར་བྱས་ཡོད་ལུགས་དང་། ད་ཆ་གཡུ་སྒྲོན་ལགས་དང་ཁོང་གི་གཅེན་མོ་འཛུམ་དཀར་ལགས་འཛིན་བཟུང་བཙན་ཁྲིད་བྱས་ཏེ་ཉིན་གྲངས་ ༣ དང་ ༢༠ ལྷག་འགྲོ་བཞིན་ཡོད་ཀྱང་ཁོང་སྤུན་མཆེན་གཉིས་ཀྱི་གནས་སྟངས་ཇི་ཆགས་སོགས་ཤེས་རྟོགས་མེད་པར་གྱུར་ཡོད་སྐོར་འགྲེལ་བརྗོད་གནང་འདུག རྩ་བའི་རྒྱ་ནག་གཞུང་གིས་བོད་ཀྱི་ས་ཁུལ་གང་སར་ཆབ་སྲིད་ཀྱི་ཉེས་མིང་སྣ་ཐོག་ནས་བོད་མི་བཟུང་བཙན་ཁྲིད་བྱས་པའི་གནས་ཚུལ་མང་དག་ཅིག་ཐོན་ཡོད་པ་དང་། ལྷག་པར་དུ་ཉེ་ལམ་ཕྱི་ཟླ་ ༥ པ་ནས་བཟུང་བོད་ཀྱི་རྒྱལ་ས་ལྷ་ས་གཙོ་བོར་གྱུར་པའི་བོད་ཀྱི་ས་ཁུལ་ཁག་ཏུ་ས་གནས་ཡུལ་མི་དང་ཡུལ་སྐོར་སྤྲོ་འཆམ་པ་རྣམས་ཀྱི་ལག་ཐོགས་ཁ་པར་དང་། སྡོད་ཁྱིམ་སོགས་སུ་གང་བྱུང་དུ་སྔོག་གཤེར་བྱས་ཏེ་༸གོང་ས་མཆོག་གི་༸སྐུ་པར་ཡོད་མེད་དང་། བཙན་བྱོལ་དུ་སྤུན་མཆེད་དང་ངོ་ཤེས་པ། གྲོགས་ཕོ་མོ་སོགས་ཡོད་མེད་འདྲི་རྩད་དང་ཉེས་མིང་སྣ་ཚོགས་བཏགས་པ་མ་ཟད། སྲིད་གཞུང་གི་ལས་བྱེད་དང་སློབ་ཕྲུག་རྣམས་དགོན་སྡེ་ཁག་ཏུ་མཆོད་མཇལ་དང་གསུང་ཆོས་ཞུ་ཡུལ་སོགས་སུ་འགྲོ་མི་ཆོག་པའི་བཙན་བཀའ་བཏང་ཡོད་པ་རེད། ད་རེས་རྒྱ་གཞུང་ཉེས་རྟོག་པས་འཛིན་བཟུང་བཙན་ཁྲིད་བྱས་པའི་གཡུ་སྒྲོལ་ལགས་ནི་བོད་ཆུ་ས་ཁུལ་ཨ་མདོ་རྫོང་རྩ་རིང་གྲོང་བརྡལ་ནས་ཡིན་ཞིང་། ད་ཆ་རང་ལོ་ ༢༠ ཡས་མས་ཤིག་ཡིན་པ་དང་ཁོང་གི་གཅེན་མོ་འཛུམ་དཀར་ལགས་ནི་རང་ལོ་ ༢༧...

རྒྱ་གཞུང་གིས་དབྱེ་བའི་བོད་རང་སྐྱོང་ལྗོང་ཟེར་བའི་བོད་ནག་ཆུ་ཨ་མདོ་རྫོང་ཁོངས་ནས་ཡིན་པའི་བུད་མེད་འཛུམ་དཀར་ལགས་རང་ཁྱིམ་གྱི་མཆོད་ཁང་ནང་དུ་༸གོང་ས་མཆོག་གི་༸སྐུ་པར་བཤམས་ཡོད་པའི་ཉེས་མིང་འོག་ལྷ་སར་བཙན་ཁྲིད་བྱས་འདུགཉེ་སྔོན་ཨ་མདོ་རྫོང་རྩ་རིང་གྲོང་རྡལ་གྱི་ས་གནས་དཔོན་རིགས་ཁག་ཅིག་གིས་བོད་པའི་ཁྱིམ་ཚང་ཁག་ལ་སྔོག་གཤེར་བྱས་ཡོད་པ་ལྟར་ཟླ་བ་འདིའི་ཕྱི་ཚེས་ ༢༣ ཉིན་བེུད་འཛུམ་དཀར་ལགས་ཁོང་གི་ཁྱིམ་ཚང་དུ་མཆོད་ཁང་ཆེན་པོ་ཞིག་གསར་རྒྱག་གནང་ཡོད་པའི་ནང་དུ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་བཤམས་ཡོད་ལུགས་ཀྱི་ཉེས་མིང་འོག་ཁོང་རང་ཁྱིམ་ནས་འཛིན་བཟུང་བྱས་ཡོད་པ་དང་། ཁ་ཉིན་ཚེས་ ༢༨ ཉིན་ཨ་མདོ་རྫོང་ནས་ལྷ་སར་བཙན་ཁྲིད་བྱས་ཡོད་པ་རེད། ཁ་སང་བཞུགས་སྒར་དུ་རྟེན་གཞི་བྱས་པའི་བོད་ཀྱི་དུས་བབ་གསར་ཁང་གིས་གནས་ཚུལ་སྤེལ་བར་འཛུམ་དཀར་ལགས་ནི་ད་ལྟ་རང་ལོ་ ༢༧ ཡིན་པ་དང་། ཁོང་ནག་ཆུ་ས་ཁུལ་ཨ་མདོ་རྫོང་རྩ་རིང་གྲོང་རྡལ་ནས་ཡིན་ཞིང་། ཆུང་དུས་ནས་ཕ་མ་གཉིས་དང་ལྷན་དུ་འབྲོག་ལས་བྱས་ཏེ་འཚོ་བ་བསྐྱལ་ཡོད་པ་དང་། ཁྱིམ་ཚང་གི་གཞི་འཛིན་ཡང་ཡིན་འདུག  ཕྱི་ལོ་ ༢༠༡༦ ལོར་ཁོང་གིས་ནོར་ཚེ་ཞེས་པའི་སྐྱེས་པ་ཞིག་དང་གཉེན་སྒྲིག་གནང་ཡོད་པ་དང་ཁོང་གཉིས་ལ་ཕྲུ་གུ་གཉིས་འདུག སྤྱིར་ཕྱི་ཟླ་ ༧ ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་ཉིན་མོ་ཡིན་པ་དང་སྟབས་བསྟུན་འདི་ལོའི་ཕྱི་ཟླ་ལྔ་པ་ནས་བཟུང་བོད་ཀྱི་རྒྱལ་ས་ལྷ་ས་གཙོ་བོར་གྱུར་པའི་བོད་ཀྱི་ས་ཁུལ་མང་དག་ཅིག་ཏུ་མི་མང་གི་ཁ་པར་དང་ཁྱིམ་ཚང་སྔོག་གཤེར། དེ་བཞིན་བོད་མི་མཆོད་མཇལ་བ་དང་ཡུལ་སྐོར་བ་སོགས་ལ་༸གོང་ས་མཆོག་གི་༸སྐུ་པར་ཡོད་མེད་དང་བཙན་བྱོལ་བོད་མིར་འབྲེལ་བ་ཡོད་མེད་སོགས་ཀྱི་གནད་དོན་འདྲ་མིན་ཐོག་འདྲི་རྩད་བྱེད་བཞིན་ཡོད་པ་རེད། རྒྱ་ནག་གཞུང་གིས་བོད་ཐོག་དམ་དྲག་ཅན་གྱི་སྲིད་བྱུས་ཆེས་ཆེར་སྤེལ་བཞིན་པའི་ཁྲོད་སྔ་ལོར་ཁམས་དཀར་མཛེས་ཁུལ་གྱི་གསེར་ཤུལ་རྫོང་། རྫ་དབོན་པོ་ཁུལ་གྱི་དགོན་གྲོང་གཉིས་ཀར་སྔོག་གཤེར་ཐེངས་ཁ་ཤས་བྱས་ཡོད་པའི་ཁྲོད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་ཉར་ཚགས་བྱེད་མཁན་དང་། ཕྱི་ཕྱོགས་ལ་འབྲེལ་བ་ཡོད་མཁན། དེ་བཞིན་བོད་ཀྱི་སྐད་ཡིག་དང་ཁོར་ཡུག་སྲུང་སྐྱོབ་ཀྱི་ལས་དོན་གཉེར་མཁན་བཅས་ཁྱོན་བོད་མི་ ༡༠༠ ལྷག་འཛིན་བཟུང་བྱས་པའི་གནས་ཚུལ་རིམ་པ་ཐོན་ཡོད་པ་རེད།...