བོད་མི་སུད་ཚོང་བ་རྣམས་རང་ཁྱིམ་དུ་ཕྱིར་ལོག་མ་གནང་་གོང་ངེས་པར་བརྟག་དཔྱད་གནང་དགོས་པའི་ཞུ་སྐུལ།

རྒྱ་གར་ནང་འདས་པའི་ཚོུད་༢༤ ནང་ཏོགས་དབྱིབས་ཀྱི་ནད་གསར་དུ་ཕོག་མཁན་ ༩༡༠༠༠ ཙམ་དང་འདས་གྲོངས་སུ་གྱུར་བ་ ༣༢༥ དེ་བཞིན་བཙན་བྱོལ་བོད་མིའི་སྤྱི་ཚོགས་ལ་མཚོན་ན། འདས་པའི་གཟའ་འཁོར་གཅིག་ནང་ཏོག་དབྱིབས་ནད་ཕོག་མཁན་གྲངས་ ༡༠ ནས་ ༨༠ ལ་འཕར་ཡོད་པའི་ཁྲོད། དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཏོག་དབྱིབས་ནད་འབུ་དང་འཐབ་རྩོད་ཀྱི་རྒྱལ་ཁ་དེ་ང་ཚོར་ཐོབ་རྒྱུར་ཚང་མས་འགན་བཞེས་དགོས་པའི་འབོད་སྐུལ་གནང་བ་དང་ཆབས་ཅིག་བོད་མི་སུད་ཚོང་བ་རྣམས་རང་ཁྱིམ་དུ་ཕྱིར་ལོག་མ་གནང་གོང་ངེས་པར་དུ་བརྟག་དཔྱད་གནང་དགོས་པའི་ཞུ་སྐུལ་གནང་སོང་།དེའང་དེ་རིང་ཉིན་རྒྱབ་ཚོུད་ ༣།༣༠ འི་ཐོག་དྲ་ལམ་བརྒྱུད་ཚོགས་པའི་གསར་འགོད་ལྷན་ཚོགས་ཐོག སྲིད་སྐྱོང་མཆོག་གིས། རྒྱ་གར་ནང་རིང་མིན་ཕྱི་ཟླ་ ༢ པའི་ནང་ཏོག་དབྱིབས་ཀྱི་ནད་རླབས་གསུམ་པ་བསླེབ་རྒྱུར་ཚོད་དཔག་གནང་བཞིན་པ་མང་ཚོགས་ལ་སྙན་གསེང་དང་སྦྲགས། ད་ལྟའི་ཆར་རྒྱ་གར་གྱི་ས་ཁུལ་འདྲ་མིན་ ༢༥༠ ལྷག་གི་ནང་སུད་ཚོང་གཉེར་བཞིན་པའི་བོད་མི་ཁྱིམ་ཚང་ ༣༧༠༠ ལྷག་ཡོད་སྟབས། བོད་མི་དེ་དག་རང་ཁྱིམ་དུ་ཕྱིར་ལོག་མ་གནང་གོང་དུ་ངེས་པར་དུ་ཏོག་དབྱིབས་ཀྱི་བརྟག་དཔྱད་གནང་དགོས་པ་དང།...