མང་ཚོགས་ནས་རྡ་སའི་ས་གནས་འགོ་འཛིན་གྱི་འོས་བསྡུར་དོ་སྣང་ཆེན་པོ་གནང་བཞིན་འདུག

དེ་རིང་ཟླ་ ༥ ཚེས་ ༢༥ ཉིན་གྱི་སྔ་དྲོར་ཐེག་ཆེན་ཆོས་གླིང་གཙུག་ལག་ཁང་དང་གངས་ཅན་སྐྱིད་ཤོངས། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་སོགས་ས་ཚིགས་བཅུར་ཆ་བགོས་ལྟར། བཞུགས་སྒར་ཁུལ་གྱི་ས་གནས་མང་ཚོགས་ནས་རྡ་སའི་ས་གནས་འགོ་འཛིན་གསར་པའི་སྔོན་འགྲོ་འོས་བསྡུར་མང་ཚོགས་ནས་དོ་སྣང་ཆེན་པོས་འོས་འཕེན་བཞིན་འདུག ཐེངས་འདིའི་འོས་བསྡུའི་ནང་འོས་མི་རང་ངོས་ནས་དང་བླངས་ཐོག་དྲིལ་བསྒྲགས་གནང་མཁན་བཀྲིས་ལགས་དང་ཟླ་བ་རིན་ཆེན་ལགས། ཐུབ་བསྟན་འཇིགས་མེད་ལགས། བསྟན་འཛིན་རབ་རྒྱལ་ལགས་བཅས་བཞི་ཡོད་འདུག   ད་ལྟའི་རྡ་སའི་ས་གནས་འགོ་འཛིན་ལས་ཚབ་དང་ས་གནས་འོས་བསྡུའི་འགན་འཛིན་ཚེ་རིང་ལྷ་མོ་ལགས་ཀྱིས་གསུངས་པར། སྔོན་འགྲོ་འོས་བསྡུའི་གྲུབ་འབྲས་དེ་ཕྱི་ཚེས་ ༢༨ ཉིན་གནང་གཏན་འཁེལ་འདུག་པ་དང་། རྡ་སའི་འགོ་འཛིན་གྱི་དངོས་གཞི་འོས་བསྡུ་དེ་ཟླ་ ༦ ཚེས་ ༤ ཉིན་གནང་རྒྱུ་དང་ཚེས་ ༨ ཉིན་དངོས་གཞི་གྲུབ་འབྲས་གསལ་བསྒྲགས་གནང་རྒྱུུ་རེད་འདུག ལྷག་པར་དུ་ས་གནས་འོས་བསྡུའི་འགན་འཛིན་མཆོག་གིས་དངོས་གཞི་ནང་དུ་འོས་བསྡུའི་སྒྲིག་གཞི་དགོངས་དོན་འོས་གཞི་མི་གྲངས་ ༢ ལས་མ་ཉུང་བ་འདོན་རྒྱུའི་ཐག་གཅོད་བྱུང་འདུག གཞི་རྩའི་མང་ཚོགས་ནས་འོས་འདེམས་ཞུས་པའི་དེ་སྔའི་ས་གནས་འགོ་འཛིན་བསོད་ནམས་རྡོ་རྗེ་ལགས་ནས་སྐབས་གཉིས་པའི་ལོ་གསུམ་དུས་ཡུན་མ་ཚང་སྔོན་དུ་རྩ་དགོངས་ཞུས་རྗེས། འདས་པའི་ཟླ་ཤས་ནང་ལས་ཁུངས་ཀྱི་དྲུང་གཞོན་ལས་རོགས་ཚེ་རིང་ལྷ་མོ་ལགས་ཀྱིས་ས་གནས་འགོ་འཛིན་ལས་ཚབ་ཀྱི་ཐུགས་འགན་བཞེས་གནང་ཡོད་པ་རེད། རྡ་སར་གནས་སྡོད་བོད་མི་ཚོས་ས་གནས་འགོ་འཛིན་ནི་གཞུང་དང་མང་ཚོགས་དབར་གྱི་ཟམ་པ་ལྟ་བུ་གནད་ཆེ་ཞིག་ཡིན་སྟབས།...