མྱོས་རྫས་ངན་གོམས།

དེ་རིང་སྔ་དྲོ་ཚོུད་ ༡༠ ཐོག་བཞུགས་སྒར་དུ་རྟེན་གཞི་བྱས་པའི་ཀུན་ཕན་ཚོགས་པས་གོ་སྒྲིག་འོག་ཡོངས་གླིང་སློབ་གྲྭའི་སློབ་ཕྲུག་དང་རྒྱ་གར་གྱི་དཔའ་བོའི་གྲོང་ཚོའི་སློབ་གྲྭ་གཉིས་ཀྱི་སློབ་ཕྲུག་མང་པོས་དྷ་སའི་ཁྲོམ་གཞུང་དུ་མྱོས་རྫས་ངལ་གོམས་མཚམས་འཇོག་དགོས་པའི་འབོད་ཚིག་བསྒྲགས་ཏེ་རྒྱལ་སྤྱིའི་མྱོས་རྫས་ཉིན་མོ་སྲུང་བརྩི་ཞུས་སོང་།ཀུན་ཕན་ཚོགས་པའི་འགན་འཛིན་སྤྱི་འཐུས་ཟླ་བ་ཚེ་རིང་ལགས་ཀྱིས་གཙོས་པའི་ཀུན་ཕན་ཚོགས་པའི་ལས་བྱེད་དང་མྱོས་རྫས་ངན་གོམས་ནས་དྲག་སྐྱེད་བྱུང་བའི་མི་ཁག་གཅིག གཞན་ཡང་ཡོངས་གླིང་སློབ་གྲྭ་དང་དཔའ་བོའི་གྲོང་ཚོའི་སློབ་གྲྭའི་སློབ་ཕྲུག་སོགས་ཁྱོན་མི་མང་ལྔ་བཅུ་ལྷག་གིས་ཁྲོམ་སྐོར་གྱི་སྐད་འབོད་ལས་འགུལ་གནང་སྟེ་སྤྱི་ཚོགས་ཁྱོན་ཡོངས་ཀྱི་ངོས་ནས་མྱོས་རྫས་ངན་གོམས་ལ་གདོང་ལེན་གནང་དགོས་པའི་སྦྱར་ཚིག་དང་འབོད་སྒྲ་སྒྲོག་བཞིན་ཁྲོམ་སྐོར་གནང་ཡོད། གསར་འགོད་པས་སྔོན་ཆད་མྱོས་རྫས་ལངས་ཤོར་དུ་ཕྱིན་མྱོང་མཁན་ད་ཆ་དྲག་སྐྱེད་བྱུང་ནས་ཀུན་ཕན་ཚོགས་པར་ཕྱག་ལས་གནང་བཞིན་པ་རིན་ཆེན་ལགས་སུ་བོད་པའི་སྤྱི་ཚོགས་ནང་མྱོས་རྫས་ལངས་གོམས་ཀྱི་གནས་བབ་གང་འདྲ་ཆགས་ཡོད་མེད་ཐོག་བཅར་འདྲི་ཞུས་པར་སྔོན་ཆད་དང་བསྡུར་ན་དྷ་སའི་སྤྱི་ཚོགས་ནང་བོད་མི་མྱོས་རྫས་ལངས་ཤོར་གྱི་གྲངས་འབོར་དེ་ཉུང་དུ་ཕྱིན་ཡོད་ཀྱང་། དེང་སང་ཆང་རག་སྤྱོད་མཁན་གང་མཚམ་ཞིག་ཡོད་སྐོར་ངོ་སྤྲོད་གནང་བ་དང་སྦྲགས། མི་མང་པོ་ཞིག་མྱོས་རྫས་ངན་གོམས་དང་ལངས་ཤོར་གྱི་རྐྱེན་གྱིས་མི་སྒེར་གྱི་འཕྲོད་བསྟེན་ཙམ་མ་ཡིན་པར་ཚེ་སྲོག་ལ་ཡང་ཉེན་ཁ་ཡོད་སྟབས་དེ་རིང་མྱོས་རྫས་མཚམས་འཇོག་དགོས་པའི་ལས་འགུལ་སྤེལ་བ་བརྒྱུད་ནས་དམངས་ལ་གོ་རྟོགས་སྤེལ་རྒྱུ་གལ་ཆེན་པོ་ཡིན་པ་གསུངས་ཡོད།རྩ་བའི་ཀུན་ཕན་ཚོགས་པ་ནི་ཁེ་མེད་སྤྱི་ཚོགས་ཞབས་ཞུ་གཉེར་བའི་ཚོགས་པ་ཞིག་ཡིན་པ་དང་། ཚོགས་པ་དེས་རྣམ་ཀུན་མྱོས་རྫས་ལངས་ཤོར་བ་དང་། ཆང་རག་ངོན་གོམས་པ། དེ་བཞིན་གཉན་ནད་རེག་དུག་གིས་མནར་བའི་བོད་མི་ཉམ་ཐག་ལ་རོགས་པ་བྱེད་བཞིན་ཡོད་པ་མ་ཟད། བོད་པའི་སྤྱི་ཚོགས་ཀྱི་སློབ་གྲྭ་སོགས་གཙོས་པའི་འདུས་སྡོད་ཀྱི་བོད་རིགས་ས་ཁུལ་མང་པོར་མྱོས་རྫས་དང་ཆང་རག་སོགས་ཀྱི་ཐད་གོ་རྟོགས་སྤེལ་གྱི་ཡོད་པ་རེད། ད་ལྟའི་ཆར་ཀུན་ཕན་ཚོགས་པའི་རོགས་རམ་དང་སློབ་སྟོན་འོག་ནས་བོད་མི་ཉེར་ལྔ་ཙམ་མྱོས་རྫས་ལངས་ཤོར་གྱི་ལམ་ཁ་ནས་སྐྱབས་ཏེ་བདེ་སྐྱིད་ཀྱི་འཚོ་བ་གསར་པ་ཞིག་གི་མདུན་ལམ་བསྐྲུན་ཡོད་པ་རེད།