འགྲོ་བ་མིའི་ཐོབ་ཐང་ལ་གུས་བརྩི་གནང་མཁན་ཚོས་བོད་ཐོག་དོ་སྣང་གནང་རོགས་ཞེས་འབོད་སྐུལ།

སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་ཚ་མོ་ཉི་མ་ལྷོ་མོགས་ཀྱིས་ཇི་ནི་ཝ་འགྲོ་བ་མིའི་ཐོབ་ཐང་དང་མང་གཙོའི་ལྷན་ཚོགས་ཐེངས་ ༩ ཐོག་བོད་དོན་གསུང་བཤད་གནང་པ་དང་འབྲེལ། འགྲོ་བ་མིའི་ཐོབ་ཐང་ལ་གུས་བརྩི་གནང་མཁན་ཚོས་ངེས་པར་དུ་བོད་ཐོག་དོ་སྣང་གནང་རོགས་ཞེས་ཞུས་པ་དང་སྦྲགས། ལྷག་དོན་རིན་པོ་ཆེ་དམ་པའི་གནད་དོན་ལ་ཁྲིམས་ཐོག་ནས་ཞིབ་འཇུག་མཐིལ་ཕྱིན་ཞིག་ཡོང་ཐབས་སུ་རྒྱ་གཞུང་ལ་འདྲི་རྩད་གནང་རོགས་ཞེས་འབོད་སྐུལ་ཞུས་འདུག དེའང་ཟླ་ ༢ ཚེས་ ༢༠ ཉིན་རྒྱབ་ནས་དབུ་འཛུགས་ཀྱིས་ཁ་སང་བར་སུད་སི་གྲོང་ཁྱེར་ཇི་ནི་ཝ་ནང་བསྐོང་ཚོགས་གནང་ཡོད་པ་དང་། ལྷན་ཚོགས་དེའི་ཐོག་འཛམ་གླིང་རྒྱལ་ཁབ་ཁག་འདྲ་མིན་གྱི་མང་གཙོ་དང་འགྲོ་བ་མིའི་ཐོབ་ཐང་ལས་འགུལ་བ། གསར་འགོད་པ། ཆབ་སྲིད་བཙོན་ཟུར། དེ་བཞིན་གཞུང་འབྲེལ་མིན་པའི་སྐུ་ཚབ་སོགས་ཁྱོན་མི་གྲངས་ ༥༠༠ ལྷག་ཙམ་ལྷན་ཞུགས་གནང་ཡོད་པའི་ཁོངས། ཨུ་རུ་སུ། ཨི་རན། ཊར་ཀི་དང་ཝི་ཏི་ནམ་ལ་སོགས་པའི་རྒྱལ་ཁབ་འདྲ་མིན་ ༡༤ འི་འགྲོ་བ་མིའི་ཐོབ་རྩོད་ལེན་པ་དང་ཆབ་སྲིད་བཙོན་ཟུར་བཅས་ཀྱིས་རང་ཉིས་ཀྱི་ནང་མིར་འཕྲད་པའི་ངལ་བ་རྣམས་ཀྱི་ཐོག་ལ་གསུང་བཤད་གནང་ཡོད་པ་དང་། དེ་བཞིན་བོད་མིའི་ཕྱོགས་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་དམ་པའི་ཚ་མོ་ཉི་མ་ལྷ་མོ་ལགས་ཀྱང་ལྷན་ཞུགས་ཀྱིས་གསུང་བཤད་གནང་ཡོད་པ་རེད། སྐབས་དེར་ཉི་མ་ལྷ་མོ་ལགས་ཀྱིས་ཁོ་མོ་རང་གི་ཨ་ཞང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་དངོས་ཡོད་གནས་ཚུལ་ཁག་འཛམ་གླིང་མང་ཚོགས་ལ་བདེན་པ་ར་འཕྲོད་ཡོང་ཕྱིར་ངལ་བ་དུ་མ་བརྒྱུད་ནས་རང་དབང་ལུང་པ་རྒྱ་གར་དུ་བྲོས་བྱོལ་ཕེབས་སྐོར་ངོ་སྤྲོད་དང་འབྲེལ། རྒྱ་གཞུང་གིས་རིན་པོ་ཆེ་མཆོག་ལ་ཕྱི་ལོ་ ༢༠༠༢ ལོར་མ་ཉེས་ཁ་གཡོག་འོག་འཛིན་བཟུང་གིས་ལོ་ངོ་...