འཛིན་རིམ་བཅུ་པ་དང་བཅུ་གཉིས་ཀྱི་རྒྱལ་ཡོངས་ཡིག་རྒྱུགས་རྩེར་སོན་ལ་བཅར་འདྲི།

བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་ཕྱི་ལོ་ ༢༠༢༡ ལོའི་རྒྱལ་ཡོངས་འཛིན་རིམ་བཅུ་གཉིས་པའི་ཡིག་རྒྱུགས་གྲུབ་གསལ་བསྒྲགས་གནང་བ་ལྟར་ན། འདི་ལོར་བཙན་བྱོལ་བོད་མིའི་སློབ་གྲྭ་ཁག་གི་ནང་༸དཔལ་ལྡན་དགའ་ལྡན་ཕོ་བྲང་གི་སློབ་ཡོན་གཟེངས་རྟགས་ཐོབ་མཁན་སློབ་མ་ ༡༠ དང་སྲིད་སྐྱོང་གཟེངས་རྟགས་ཐོབ་མཁན་སློབ་མ་ ༢༧ བྱུང་འདུག་པ་དང་། དེ་བཞིན་འདི་ལོར་བཙན་བྱོལ་བོད་མིའི་སློབ་གྲྭ་ཁག་གི་ནང་འཛིན་རིམ་བཅུ་པའི་སྲིད་སྐྱོང་གི་གཟེངས་རྟགས་ཐོབ་མཁན་མ་སུ་རི་བོད་ཁྱིམ་ནས་སློབ་མ་ ༤ དང་སྦེལ་ཀོབ་སམ་བྷོ་ཊ་ནས་ ༢ བཅས་བོད་རིགས་སློབ་མ་ ༦ བྱུང་ཡོད་པ་རེད། གསར་འགོད་པས་དེ་དག་གི་ཁོངས་ནས་འཛིན་རིམ་བཅུ་གཉིས་ནང་དུ་ཆ་སྙོམས་ཀྱི་བརྒྱ་ཆ་ ༩༩ ལེན་མཁན་མ་སུ་རིའི་བོད་ཁྱིམ་གྱི་སློབ་མ་བདེ་སྐྱིད་གཡང་འཛོམས་དང་འཛིན་རིམ་བཅུ་པའི་ཁོངས་ཆ་སྙོམས་ཀྱི་བརྒྱ་ཆ་ ༩༦༌༨ ལེན་མཁན་མ་སུ་རིའི་སློབ་མ་ཨོ་རྒྱན་བདེ་སྐྱིད་གཉིས་སུ་འདི་ལོའི་ཡིག་རྒྱུགས་ཀྱི་གྲུབ་འབྲས་སོན་སྐབས་ཀྱི་ཚོར་སྣང་དང་སློབ་སྦྱོང་བྱེད་ཕྱོགས། དེ་བཞིན་མ་འོངས་པའི་དམིགས་ཡུལ་སོགས་ཀྱི་ཐོག་ལ་བཀའ་འདྲི་ཞུས་ཡོད།