རྒྱ་གཞུང་གིས་མནར་གཅོད་རྐྱེན་ནད་གཅོང་གྱུར་བའི་ཆབ་སྲིད་བཙོན་ཟུར་གྲགས་ཅན་འཇིགས་མེད་རྒྱ་མཚོ་ལགས་འདས་གྲོངས།

རྒྱ་གཞུང་གི་བཙོན་ཁང་ནང་དུ་སྡུག་སྦྱོང་མནར་གཅོད་ཚད་མེད་མྱངས་མྱོང་མཁན་བོད་མིའི་ཆབ་སྲིད་བཙོན་ཟུར་བླ་བྲང་འཇིགས་མེད་རྒྱ་མཚོ་ལགས་སམ་ཡོངས་གྲགས་སུ་འཇིགས་མེད་མགོ་རིལ་ཞུ་བ་ཁོང་ཕྱི་ལོ་ ༢༠༡༦ ལོར་བཙོན་གྲོལ་བཏང་བའི་རྗེས་སུ་ལུས་པོ་ནད་གཅོང་དུ་གྱུར་ནས་ཡུན་རིང་པོར་ནད་ཀྱིས་མནར་རྗེས་ཁ་ཉིན་ཚེས་ ༢ ཉིན་གྱི་བོད་ནང་གི་ཉིན་གུང་ཆུ་ཚོད་ ༡༢། ༡༥ ཡས་མས་སུ་སྐུ་གྲོངས་པའི་ཡིད་སྐྱོའི་གནས་ཚུལ་ཐོན་འདུགའབྲེལ་ཡོད་ཅིག་གིས་གནས་ཚུལ་མཁོ་སྤྲོད་གནང་བར་གཞིགས་ན། བོད་མདོ་སྨད་ཀན་ལྷོ་ཁུལ་བླ་བྲང་རྒྱུད་སྟོད་གྲྭ་ཚང་གི་དགེ་འདུན་པ་ཆབ་སྲིད་བཙོན་ཟུར་འཇིགས་མེད་རྒྱ་མཚོ་ལགས་དེ་སྔ་བཙོན་འཇུག་སྐབས་ལུས་པོར་ནད་གཞི་གང་ཡང་མེད་པར་བཙོན་གྲོལ་བཏང་བའི་རྗེས་སུ་གཅིན་སྙི་དང་སྙིང་ནད། མཆིན་ནད། དེ་བཞིན་མིག་ནད་དང་ཁྲག་ཤེད་སོགས་ཀྱི་ནད་གཞི་ཕོག་ཡོད་པ་དང་། ལུས་པོ་ནད་གཅོང་དུ་གྱུར་མཐར་ཟླ་བ་ཁ་ཤས་གོང་ལ་ཁོང་གི་གཟུགས་གཞིའི་གནས་སྟངས་ཛ་དྲག་ཆགས་སྟབས་སྨན་ཁང་དུ་བསྟེན་གཏུག་བྱེད་བཞིན་པའི་ཁྲོད། ཉེ་ཆར་ཟི་ལིང་སྨན་ཁང་དུ་བསྟེན་གཏུག་གནང་སྐབས་སྨན་པས་བཅོས་ཐབས་དཀའ་བའི་སྐོར་ཞུས་ཡོད་སྟབས། རང་ཁྱིམ་དུ་ཚུད་ཁྲིད་ནས་ཉིན་གཅིག་ཙམ་སོང་རྗེས་སུ་སྐུ་གྲོངས་ཡོད་འདུག ད་ལྟའི་ཆར་སྐུ་ཕུང་རང་ཁྱིམ་དུ་ཡོད་ཅིང་། ཕལ་ཆེར་བོད་ཚེ་ ༩ ལ་སྐུ་ཕུང་བཞུགས་འབུལ་གནང་སྲིད་པ་གསུངས་འདུག གཞི་རྩའི་གྲྭ་འཇིགས་མེད་རྒྱ་མཚོ་ལགས་ཐོག་མ་ཕྱི་ལོ་ ༢༠༠༦ ལོར་རྒྱ་གར་ལྷོ་ཕྱོགས་ཨམྲ་བཱ་ཏིར་༸གོང་ས་མཆོག་གི་སྩལ་གནང་པའི་དུས་འཁོར་དབང་ཆེན་ཞུས་པའི་ཉེས་མིང་འོག་འཛིན་བཟུང་བྱས་འདུག་པ་དང་། དེ་རྗེས་ཕྱི་ལོ་ ༢༠༠༨ ལོར་དགེ་འདུན་པའི་སྒེར་ལངས་བརྒྱུད་བསྐུལ་བྱས་པའི་ཉེས་མིང་འོག་སླར་འཛིན་བཟུང་བྱས་འདུག དེ་རྗེས་ཁོང་གིས་རྒྱ་གཞུང་གི་བཙོན་ནང་མི་སྤྱོད་ལས་འདས་པའི་མནར་གཅོད་ཚད་མེད་ཕོག་པའི་བརྙན་ཐུང་ཞིག་ཀྱང་འདོན་སྤེལ་གནང་པའི་ཉེས་མིང་འོག་འཛིན་བཟུང་གིས་ཟླ་བ་དྲུག་ཙམ་བཀག་ཉར་བྱས་ཡོད་པ་རེད།...