རྒྱ་གར་ལྷོ་ཕྱོགས་སུ་བཙན་བྱོལ་བོད་མིའི་ཁྲིམས་ལུགས་རིག་པ་བའི་ཚོགས་ཆེན་འཚོགས་བཞིན་འདུག

  བོད་མི་ཁྲིམས་རྩོད་པ་དང་ཁྲིམས་ལུགས་སློབ་མ་ ༣༡ ཙམ་ལྷན་ཞུགས་ཀྱིས་བཙན་བྱོལ་བོད་མིའི་ཁྲིམས་ལུགས་རིག་པ་བའི་ཚོགས་ཆེན་ཐེངས་དང་པོ་སྐོང་ཚོགས་གནང་འདུག དེའང་བཙན་བྱོལ་བོད་མིའི་ཁྲིམས་ལུགས་རིག་པ་བའི་ཚོགས་པས་གོ་སྒྲིག་འོག་རྒྱ་གར་ལྷོ་ཕྱོགས་མེ་སོར་དུ་རྟེན་གཞི་བྱས་པའི་ Quorum གསོན་མགྲོན་ཁང་གི་ཚོགས་ཁང་དུ་ཀ་སྦུག་གནས་སྡོད་ཁྲིམས་རྩོད་པ་ཚེ་རིང་དངོས་གྲུབ་ལགས་དང་ལྡི་ལིའི་ཆེས་མཐོའི་ཁྲིམས་ཁང་དུ་ཁྲིམས་རྩོད་པའི་ཕྱག་ལས་གནང་བཞིན་པ་བསྟན་འཛིན་ཚེ་རིང་ལགས། བཙན་བྱོལ་བོད་མིའི་ཁྲིམས་ལུགས་རིག་པ་བའི་ཁྲིམས་རྩོད་པ་རྣམ་རྒྱལ་ཚེ་སྐྱིད་ལགས་དང་ཀུན་བཟང་སྟོབས་ལྡན་ལགས། དེ་བཞིན་བོད་མིའི་ཁྲིམས་རྩོད་པ་དང་ཁྲིམས་ལུགས་སློབ་མ་སོགས་ཁྱོན་མི་གྲངས་ ༣༡ ཆེད་ཕེབས་ཀྱིས་ཚོགས་ཆེན་འཚོགས་བཞིན་འདུག་པ་དང་། ཚོགས་ཆེན་དེ་དེ་རིང་དང་སང་ཉིན་བཅས་ཉིན་གྲངས་གཉིས་རིང་ཚོགས་གནང་གི་འདུག བཙན་བྱོལ་བོད་མི་ཁྲིམས་ལུགས་རིག་པ་བའི་ཚོགས་གཙོ་བོད་མི་མང་སྤྱི་འཐུས་བློ་བཟང་གྲགས་པ་ལགས་ཀྱིས་གསུངས་པར། ཐེངས་འདིའི་ཚོགས་ཆེན་ཐོག་རྐང་ཁྲིམས་ལུགས་ཚོགས་པའི་ད་བར་གྱི་ལས་དོན་དང་མ་འོངས་འཆར་གཞི་སོགས་ཀྱི་ཐད་བགྲོ་གླེང་དང་གྲོས་ཆོད་ཁག་ཅིག་གཏན་འབེབས་གནང་རྒྱུ་མ་ཟད། ལྷག་དོན་གྲོང་ཁྱེར་སྦེང་ལོར་དང་མཱཨི་སོར་ས་གནས་གཉིས་སུ་ཡན་ལག་གསར་འཛུགས་ཞུ་རྒྱུ་དང་། ཉེ་བའི་ཆར་ཁྲིམས་ལུགས་ཚོགས་པ་ངོས་ནས་ལྷོ་ཕྱོགས་གཞིས་ཆགས་ཁག་དང་དགོན་སྡེ་ཁག་ལ་ཁྲིམས་དོན་དཀའ་ངལ་དང་འབྲེལ་བའི་རྟོག་ཞིབ་སོང་བའི་སྐོར་དང་། རྟོག་ཞིབ་ལས་བྱུང་བའི་ས་གནས་མི་མང་ཚོའི་དཀའ་ངལ་སེལ་ཐབས་སྐོར་ལ་བགྲོ་གླེང་གནང་རྒྱུ་ཡིན་པ་གསུངས་སོང་། ད་དུང་ཁོང་གིས་གཞུང་འབྲེལ་མ་ཡིན་པའི་བོད་མིའི་ཁྲིམས་ལུགས་རིག་པ་བའི་ཚོགས་པ་དེ་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གིས་བཙན་བྱོལ་བོད་མིའི་སྤྱི་ཚོགས་ནང་ཁྲིམས་རིག་པ་བའི་ཚོགས་པ་ཞིག་དགོས་གལ་ཆེ་བའི་བཀའ་སློབ་ལམ་སྟོན་ཡང་ཡང་ཕེབས་པའི་དགོངས་དོན་ལྟར་ཆེད་འཛུགས་གནང་བ་ཞིག་ཡིན་སྐོར་འགྲེལ་བརྗོད་དང་སྦྲགས། ཚོགས་པ་དེ་མ་འོངས་པར་སྲ་བརྟན་དང་བཙན་བྱོལ་ནང་གི་ཁྲིམས་ལུགས་རིག་པ་བ་ཚང་མ་རྡོག་རྩ་ཆིག་སྒྲིག་ངང་བོད་མིའི་སྒྲིག་འཛུགས་ལ་ནུས་པ་ཐོན་པའི་ཞབས་ཞུ་བསྒྲུབ་སླད། ད་ལན་གྱི་ཚོགས་ཆེན་དེ་གོ་སྒྲིག་ཞུ་སྐོར་གསུངས་ཡོད། གཞི་རྩའི་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་སྣེ་འཁྲིད་འོག བོད་མིའི་ཁྲིམས་ལུགས་རིག་པ་བའི་ལྷན་ཚོགས་ཐེངས་དང་པོ་སྐོང་ཚོགས་གནང་ཟིན་རྗེས། ༢༠༡༣ ལོར་བོད་མིའི་ཁྲིམས་ལུགས་རིག་པ་བའི་ཚོགས་པ་ཞེས་གསར་འཛུགས་གནང་པ་ཞིག་ཡིན་པ་རེད།  ཚོགས་པ་དེའི་ཚོགས་གཙོ་བོད་མི་མང་སྤྱི་འཐུས་བློ་བཟང་གྲགས་པ་ལགས་གཙོས་རྒྱུན་ལས་བདུན་ཡོད་པ་དང་ཚོགས་མི་ཁྱོན་ ༡༠༠ མ་ཟིན་ཙམ་ཡོད་པ་རེད།