རྒྱ་ནག་གིས་སྐད་འཕྲིན་བརྒྱུད་ནས་ངན་པ་ཚར་གཅོད་ཟེར་བའི་གསལ་བསྒྲགས་སྤེལ་བ།

དེ་རིང་གསར་ལམ་ཁག་ཏུ་གནས་ཚུལ་ཐོན་པར་ཧྲང་ཧེ་ས་འོག་འགྲུལ་ལམ་ས་ཚིགས་ཤིག་ཏུ་རྒྱ་ནག་གི་ཉེན་རྟོག་པས་གང་བྱུང་དུ་མི་མང་བཀག་འགོག་གིས་ཐོབ་ཐང་ལག་འཁྱེར་དང་མཛུབ་རུས་སོགས་ཐོ་འགོད་བྱས་པ་མ་ཟད། མི་མང་གི་ལག་ནས་ཁ་པར་བླངས་ཏེ་ཁ་པར་ནང་དུ་ཝི་པི་ཨེན་  VPN ཡོད་མེད་གང་བྱུང་དུ་ཞིབ་བཤེར་བྱས་པའི་བརྙན་པར་དང་བཅས་ཏེ་སྤྱི་ཚོགས་དྲྭ་ལམ་དུ་ཐོན་འདུག རྒྱ་ཡིག་གི་ལམ་ནས་གནས་ཚུལ་བྲིས་པའི་པར་ཞིག་གི་ནང་འགྲེལ་བརྗོད་བྱེད་དོན་མི་འགའ་ལམ་བུར་དུ་འགྲོ་སྐབས་རྒྱ་ནག་གི་ཉེར་རྟོག་པས་བཀག་འགོག་བྱས་ནས་དེབ་སྐྱེལ་བྱེད་དུ་བཅུག་པ་དང་། ཁ་པར་ཞིབ་བཤེར་དགོས་ལུགས་བཤད་པར་བརྟེན་མི་དེས་གང་མགྱོགས་རང་གི་ཁ་པར་ནང་ VPN  ནག་གསུབ་བཏང་ནས་ཕར་སྤྲད་དུས་ཉེན་རྟོག་པས་ཁ་པར་ནང་དུ་གང་བྱུང་དུ་ཞིབ་བཤེར་བྱས་ཏེ་ཁོང་གི་ཁ་པར་གྱི་ནང་དུ་མཉེན་ཆས་ MFscoke ཞེས་པ་ཞིག་བླུགས་ནས་ཞིབ་བཤེར་བྱས་འདུགགོང་གི་མཉེན་ཆས་དེ་བླུགས་པ་ཡིན་ན་སྔོན་ཆད་ཁྱེད་ཀྱིས་ཁ་པར་གྱི་ནང་དུ་མཉེན་ཆས་ཀྱི་མ་ལག་ཅི་ཞིག་བླུགས་ཡོད་མེད་གསལ་པོར་མངོན་གྱི་འདུག་ཅེས་བྲིས་ཏེ། ཉེན་རྟོག་པས་གང་བྱུང་དུ་མི་མང་སྔོག་བཤེར་བྱས་ནས་བཙོན་པ་ལྟ་བུར་ངོས་འཛིན་བྱེད་ཀྱི་འདུག་ཅེས་བཀོད་འདུག ཁ་པར་གྱི་ནང་དུ་གྷོ་གྷལ་ཡོད་སྟབས་ཉེན་རྟོག་པས་ཁོང་ལ་གྷོ་གྷལ་བླུགས་ནས་ཝི་པི་ཨེན་དང་མཐུད་ཀྱི་ཡོད་མེད་སྐད་ཆ་དྲིས་སྐབས་ཁོང་ཞེ་སྣང་དང་བཅས་མ་རེད་ཅེས་ལན་འདེབས་བྱས་པར་ཁ་པར་ཉེན་རྟོག་པ་གཞན་ཞིག་ལ་སྤྲད་འདུག སྟབས་ལེགས་པ་ཞིག་ལ་ཉེན་རྟོག་པའི་མཉེན་ཆས་ MFscoke ཞེས་པ་དེ་ཁོང་གི་ཁ་པར་དུ་བླུག་མ་ཐུབ་པར་བརྟེན་དོན་དག་ཆེན་པོ་བྱུང་མེད་པ་བྲིས་འདུག གནས་ཚུལ་དེ་དང་འབྲེལ་ནས་གོང་གི་ཡི་གེ་འབྲི་མཁན་དེས་མི་སྒེར་གྱི་བདེ་འཇགས་དགོས་ན་ཀུ་ཤུ་རྟགས་ཅན་གྱི་ཁ་པར་ཡག་པོ་ཡོད་པ་དང་། རབས་བྱུང་ན་རྒྱ་ནག་གི་ཁ་པར་བེད་སྤྱོད་མ་གནང་ན་བཟང་ཞེས་བྲིས་ཏེ་ཕྱི་ལོག་གི་ཁ་པར་ཉོ་བ་ཡིན་ན་མི་སྒེར་གྱི་བདེ་འཇགས་ལ་ཕན་ཐོགས་ཆེན་པོ་ཡོད་པ་ཆེད་བཀོད་གནང་འདུག Twitter སྟེང་དུ་གནས་ཚུལ་འདིའི་བརྙན་དང་བཅས་པ་ཁྱབ་བརྡལ་དུ་སོང་ཡོད་སྟབས། མི་མང་པོ་ཞིག་གིས་རྒྱ་ནག་གི་ཉེན་རྟོག་པའི་བྱེད་སྟངས་དེར་ཁ་རྡུང་གཏོང་མཁན་མང་པོ་བྱུང་བཞིན་པ་ལྟར། མི་ཁ་ཤས་ཀྱིས་རྒྱ་ནག་གི་གཉེན་རྟོག་པས་གང་བྱུང་དུ་མི་མང་གི་ཁ་པར་ལ་ཞིབ་བཤེར་བྱེད་དོན་ནི་ཧོང་ཀོང་དང་འབྲེལ་བའི་གནས་ཚུལ་ལ་རྟོག་དཔྱོད་བྱེད་བཞིན་ཡོད་པའི་དོགས་སློང་སོགས་མང་དག་ཅིག་གནང་ཡོད། རྩ་བའི་ VPN ཞེས་པ་ནི་བཀག་འགོག་བྱས་ཡོད་པའི་དྲྭ་རྒྱ་ཁག་ལ་གསང་བའི་སྒོ་ནས་ལྟ་བྱེད་ཀྱི་མཉེན་ཆས་མ་ལག་ཞིག་ཡིན་པ་རེད། རྒྱ་ནག་གི་ནང་དུ་ཕྱི་ཕྱོགས་ཀྱི་གནས་ཚུལ་ཡོད་ཚད་བཀག་ནས་ཡོད་སྟབས་མི་མང་པོ་ཞིག་གིས་ལྐོག་ནས་ཝི་པི་ཨེན་བརྒྱུད་ནས་གནས་ཚུལ་འཚོལ་ཞིབ་དང་རྒྱུས་ལོན་བྱེད་བཞིན་ཡོད་པ་རེད།

རྒྱ་གཞུང་གིས་སྐད་འཕྲིན་བརྒྱུད་ནས་ངན་པ་ཚར་གཅོད་ཟེར་བའི་ལས་འགུལ་འོག་བོད་ནང་གི་སྐད་འཕྲིན་ཚོགས་པ་སོ་སོས་གཟབ་ནན་དགོས་པའི་དོན་ཚན་བརྒྱད་ཅན་གྱི་གསལ་བསྒྲགས་ཤིག་བརྒྱུད་སྐུལ་བྱེད་བཞིན་འདུག དེའང་མཐོ་སྒང་གི་རེ་གསར་འཕྲིན་སྟེགས་ཐོག་སྒྲ་འཇུག་བྱས་པའི་གསལ་བསྒྲགས་དེའི་ནང་གསལ་ལྟར་ན། སྲིད་གཞུང་གི་ཚོགས་འདུའི་དགོངས་དོན་ལྟར།  དུས་ཚོད་དང་ས་གནས་གང་དུ་ཡིན་རུང་ཏང་དང་རྒྱལ་ཁབ་ལ་གནོད་པ་དང་། ཡང་ན་ཁྲིམས་འགལ་གྱི་ཆ་འཕྲིན་སྐུར་མི་ཆོག་པར་དོ་དམ་དགོས་པ་མ་ཟད། གལ་སྲིད་སྐད་འཕྲིན་ནང་དུ་ཏང་དང་རྒྱལ་ཁབ། སྤྱི་ཚོགས་སོགས་ལ་གནོད་པའི་ཆ་འཕྲིན་སོགས་བསྐུར་ཚེ་ངན་པ་ཚར་གཅོད་ཀྱི་ལས་འགུལ་ནང་ཐག་གཅོད་ནན་པོ་བྱས་ཏེ་སྐད་འཕྲིན་ཚོགས་པ་དང་མི་སྒེར་ལ་ཁྲིམས་ཆད་ཕོག་རྒྱུ་ཡིན་སྐོར་བརྗོད་པ་དང་འབྲེལ། སྐད་འཕྲིན་ཚོགས་ཁག་སོ་སོས་རང་གི་ཚོགས་མི་ཡོངས་ལ་བླང་བྱ་ནན་པོའི་ངང་ནས་རང་རང་གི་ཁ་དང་ལག་པ་བདག་པོ་བརྒྱབ་ནས་གཏམ་འཆལ་ལ་ཡིད་ཆེས་མི་བྱེད་པ་དང་། དཀྲོག་གཏམ་བཟོ་སྐུར་མི་ཆོག ཅི་སྟེ་དེ་ལས་འགལ་ན་མཇུག་འབྲས་ལ་རང་ཉིད་ཀྱིས་འགན་ཁུར་དགོས་པ་མ་ཟད་རྒྱལ་ཁབ་ཀྱི་ཁྲིམས་ལས་འགལ་མཁན་ཚོ་ལོ་ངོ་ ༡ ནས་ ༨ བར་དུས་བཀག་བཙོན་འཇུག་བྱ་རྒྱུ་དང་། ཚོགས་པ་དེའི་ཚོགས་གཙོས་འགན་འཁྲི་མཉམ་ཁུར་དགོས་ཞེས་བཀོད་འདུག གསལ་བསྒྲགས་དེའི་ནང་ད་ནས་བཟུང་དྲྭ་རྒྱ་དང་འབྲེལ་བའི་བདེ་འཇགས་ལ་ཞིབ་བཤེར་ནན་པོ་བྱས་ཏེ་མི་གྲངས ༡༠ ལས་གྲུབ་པའི་སྐད་འཕྲིན་ཚོགས་པར་དྲྭ་རྒྱའི་ཉེན་རྟོག་པས་རང་འགར་ཞིབ་བཤེར་གྱིས་དོ་དམ་བྱེད་བཞིན་པར་བརྗོད་ཡོད་པ་མ་ཟད། སྲིད་གཞུང་གི་དྲིལ་བསྒྲགས་དེ་བོད་སྐད་ནང་ཕབ་བསྒྱུར་ཀྱིས་སྒྲ་སྒམ་བཟོས་ནས་བོད་རིགས་ནང་ཁུལ་དུ་བརྒྱུད་སྐུར་དགོས་པའི་སྐུལ་མ་བཏང་འདུག མི་མང་གིས་བརྒྱུད་སྐུར་མི་ཆོག་པའི་དོན་ཚན་བརྒྱད་ནི་ཆབ་སྲིད་ཐད་ཀྱི་ཚོར་སྐྱེན་གླེང་གཞི་མི་སྐུར་བ་དང་། གཏམ་འཆལ་ལ་ཡིད་ཆེས་དང་བརྒྱུད་སྐུར་མི་བྱེད་པ། རྒྱ་ནག་ནང་ལོགས་ཀྱི་དཔྱད་གཞིའི་ཡིག་ཆ་མི་སྐུར་བ། འཆལ་གཏམ་དང་གཏུམ་སྤྱོད། འཇིགས་སྐུལ་སོགས་ཀྱི་འཕྲིན་མི་སྐུར་བ། ཧོང་ཀོང་དང་ཨའོ་མན། ཐེ་ཝན་སོགས་ཀྱི་གསར་འགྱུར་སྐོར་གཞུང་ཕྱོགས་ཀྱི་དྲྭ་ཚིགས་ཐོག་ཡོངས་བསྒྲགས་མ་བྱས་གོང་མི་སྐུར་བ་དང་། དམག་དོན་དཔྱད་གཞིའི་གསར་འགྱུར་དང་རྒྱལ་ཁབ་ཀྱི་གསང་བའི་འབྲེལ་ཡོད་ཡིག་ཆ་སོགས་མི་སྐུར་བ།...