གཞིས་བཞུགས་སྤུན་ཟླ་རྣམས་ལ་གདུང་སེམས་མཉམ་བསྐྱེད་ཀྱི་མཆོད་འབུལ་སྨོན་ལམ་ཚོགས་པ།

དེང་སྐབས་བོད་ཀྱི་རྒྱལ་ས་ལྷ་ས་གཙོས་བོད་ས་ཕལ་མོ་ཆེ་བའི་ནང་ཏོག་དབྱིབས་གཉན་རིམས་ཁྱབ་གདལ་ཤུགས་ཆེ་འགྲོ་བཞིན་པའི་ཛ་དྲག་གི་གནས་སྟངས་འོག་མང་ཚོགས་ལ་དཀའ་ངལ་མང་དག་ཅིག་འཕྲད་བཞིན་པའི་ཁྲོད་འདིར་དེ་རིང་སྔ་དྲོ་ཚོུད་ ༦ པ་ནས་དབུ་འཛུགས་ཀྱིས་ཉིན་རྒྱབ་བར་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་རྟེན་གཞི་བྱས་པའི་སེར་བྱེས་མཁས་སྙན་གྲྭ་ཚང་གི་༸སྐྱབས་རྗེ་མཁན་རིན་པོ་ཆེ་མཆོག་དབུ་བཞུགས་ཐོག་གདན་སའི་འདུས་མང་ཡོངས་ཀྱིས་གཞིས་བཞུགས་སྤུན་ཟླ་རྣམས་ལ་གདུང་སེམས་མཉམ་བསྐྱེད་མཚོན་ཕྱིར་སྒྲོལ་མའི་གཟུངས་སྔགས་གསོག་སྒྲུབ་བཅས་ཀྱི་མཆོད་འབུལ་སྨོན་ལམ་ཞིག་ཚོགས་འདུག སེར་བྱེས་མཁས་སྙན་གྲྭ་ཚང་གིས་དེང་སྐབས་བོད་ཀྱི་རྒྱལ་ས་ལྷ་ས་གཙོས་པའི་བོད་ཀྱི་ས་ཁུལ་ཁག་གཅིག་ཏུ་ཏོག་གསར་གློ་ཚད་ནད་ཡམས་ཁྱབ་གདལ་འགྲོ་བཞིན་པའི་ཛ་དྲག་གི་གནས་སྟངས་ཁྲོད་ནས་རྣམ་པར་རྒྱལ་ཕྱིར་མཆོད་འབུལ་སྨོན་ལམ་དང་ཞལ་འདོན་གསོག་སྒྲུབ་གནང་བཞིན་འདུག