ཁ་སང་ཕྱི་ཚེས་ ༢༥ ཉིན་སུད་སི་གྲོང་ཁྱེར་ Lucerne ནང་ཚོགས་པའི་ ༢༠༢༡ ལོའི་ Europa Forum ཚོང་འབྲེལ་གླེང་སྟེགས་སྐབས་དབྱིན་ཡུལ་ནང་གི་ལོན་ཊོན་དཔལ་འབྱོར་རིགས་གནས་སློབ་ཆེན་གྱི་དགེ་རྒན་ Keyu Jin གྱིས་ཚོགས་འདུའི་ཐོག་སུད་སི་དང་རྒྱ་ནག་དབར་གྱི་ཚོང་འབྲེལ་ཐོག་རྒྱ་ནག་གི་ལྟ་ཕྱོགས་ཞེས་པའི་བརྗོད་གཞིའི་ཐད་ལ་གཏམ་བཤད་གནང་བཞིན་པའི་སྐབས་སུ་ཡོ་རོབ་བོད་རིགས་གཞོན་ནུ་མཐུན་ཚོགས་ཀྱི་ལས་འགུལ་བ་བཞིས་ཚོགས་བཅར་བ་འདུ་འཛོམས་ཆེ་བའི་ཚོགས་ཁང་ནང་ཡར་བཞེངས་ཏེ་བོད་ཀྱི་རྒྱལ་དར་འཕྱར་བ་དང། ཕྲེད་དར་ཐོག་འགྲོ་བ་མིའི་ཐོབ་ཐང་མེད་ན་ཚོང་འབྲེལ་ཡོང་ཐབ་མེད། མི་གསོད་ལག་དམར་བ་དང་མཉམ་དུ་འབྲེལ་ལམ་མ་གནང་རོགས། བོད་ལ་རང་དབང་དགོས། ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩལ་འགྲན་ཚོགས་ཕྱིར་འཐེན་གནང་དགོས་ཞེས་སོགས་སྐད་འབོད་གནང་སྟེ་ཞི་བའི་ངོ་རྒོལ་གྱི་ལས་འགུལ་སྤེལ་འདུག
ཡོ་རོབ་བོད་རིགས་གཞོན་ནུ་མཐུན་ཚོགས་ཀྱི་ཚོགས་གཙོ་གཞིས་རྩེ་ཚང་བཀྲིས་ལགས་ཀྱིས་རླུང་འཕྲིན་ཁང་ལ་གླེང་སྟེགས་ཀྱི་དྲ་ཚིགས་འདིའི་སྟེང་ནས་འགྲོ་བ་མིའི་ཐོབ་ཐང་མཚོན་པའི་སུད་སི་རྒྱལ་ཁབ་ཀྱི་གཞི་རྩའི་ལྟ་གྲུབ་གསལ་འདོན་བྱས་ཡོད་ཀྱང། དོན་དངོས་ཐོག་ཉིན་གྲངས་གཉིས་རིང་གི་ཚོགས་འདུ་ཐོག་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་གྲོས་གཞི་ཚོགས་འདུའི་གཞི་ཁོངས་སུ་མེད་པར་བརྟེན་ང་ཚོའི་ངོས་ནས་གླེང་སྟེགས་གོ་སྒྲིག་ཚོགས་ཆུང་ལ་འགྲོ་བ་མིའི་ཐོབ་ཐང་གི་གནད་དོན་ནི་གུ་ཡངས་མེད་ཅེས་པའི་སུད་སི་རྒྱལ་ཁབ་གཞི་རྩའི་ལྟ་གྲུབ་དྲན་སྐུལ་ཞུ་རྒྱུ་དང་རྒྱ་ནག་གི་བཙན་གནོན་འོག་ཡོད་པའི་བོད་མི་གཙོས་མི་རིགས་གཞན་ཁག་གི་དངོས་ཡོད་གནས་སྟངས་ཇི་ཆགས་ཀྱི་གོ་རྟོགས་སྤེལ་ཆེད་ངོ་རྒོལ་གྱི་ལས་འགུལ་དེ་སྤེལ་ཡིན་པར་འགྲེལ་བརྗོད་གནང་སོང་། 
ཁ་སང་གི་གླེང་སྟེགས་ཐོག་ཡོ་རོབ་གཞོན་ནུ་མཐུན་ཚོགས་ཀྱི་ལས་འགུལ་བ་འཇིགས་མེད་ལགས་ཀྱིས་སྐབས་དེར་ཚོགས་བཅར་བ་འདུ་འཛོམས་བྱུང་བའི་གླེང་སྟེགས་ཚོགས་རར་ཡར་བཞེངས་ཏེ་རྒྱ་ནག་གཞུང་གིས་བོད་མི་ཐོག་མནར་གཅོད་དང་འཆར་གཞི་ལྡན་པའི་དྲག་གནོན་སྤེལ་བཞིན་ཡོད་པར་མ་ཟད་ཡུ་གུར་མང་ཚོགས་ས་ཡ་གཅིག་ལྷག་ངལ་རྩོལ་བསྒྱུར་བཀོད་ར་བར་བཅུག་པ་དང་། དེ་བཞིན་ཧོ་ཀོང་གི་ཞི་རྒོལ་བའི་ཐོག་དྲག་གནོན་བྱེད་བཞིན་པ་བཅས་ལུང་འདྲེན་གྱིས་དེ་ལྟ་བུའི་དྲག་གནོན་ཅན་གྱི་རྒྱ་ནག་དང་ལྷན་ཚོང་འབྲེལ་གནང་བ་དེ་ནི་བཟང་སྤྱོད་ཀྱི་ཐོག་ནས་དྲང་བདེན་ཞིག་མ་རེད་ཅེས་གསུངས་པ་དང་ཆབས་ཅིག ངེས་པར་དུ་ཐེངས་འདིའི་གླེང་སྟེགས་ཐོག་འགྲོ་བ་མིའི་ཐོབ་ཐང་གི་གནད་དོན་གླེང་སླེང་གནང་དགོས་པའི་འབོད་སྐུལ་ཞུས་ཡོད་པ་རེད།
གཞི་རྩའི་འདི་ལོའི་ ༢༠༢༡ ལོའི་ Europa Forum ཚོང་འབྲེལ་གླེང་སྟེགས་དེ་ཟླ་ ༡༡ ཚེས་༢༤ དང་ ༢༥ བཅས་ཉིན་གཉིས་རིང་སུད་སི་དང་ཡོ་རོབ་གཉིས་ནས་རྒྱ་ནག་དང་ལྷན་ཚོང་འབྲེལ་དང་ཆབ་སྲིད་ཀྱི་འབྲེལ་ལམ་སྤེལ་ཕྱོགས་ཀྱི་གླེང་བརྗོད་ཐོག་ཚོགས་ཡོད་ཅིང། ཚོགས་འདུ་ཐོག་སུད་སི་གཞུང་འབྲེལ་མཐོ་རིམ་མི་སྣ་གཙོས་དཔལ་འབྱོར་དང་ཆབ་སྲིད་རྒྱབ་ལྗོངས་མི་འདྲ་བའི་འབྲེལ་ཡོད་མི་སྣ་ ༧༠༠ ནས་མཉམ་ཞུགས་གནང་ཡོད་པ་རེད།
ཚོགས་འདུའི་ཉིན་དང་པོ་ཐོག The Society for Threatened Peoples ཞེས་པའི་ཚོགས་པའི་སྣེ་ཁྲིད་འོག་བོད་མི་དང་ཡུ་གུར་བ། ཧོང་ཀོང། དེ་བཞིན་ཐེ་ཝན་མང་ཚོགས་བཅས་ཀྱིས་རྒྱ་ནག་མི་མང་སྤྱི་མཐུན་རྒྱལ་ཁབ་ལ་ངོ་རྒོལ་དང་འབྲེལ། གླེང་སྟེགས་ཐོག་མཉམ་ཞུགས་གནང་མཁན་གྱི་ཆབ་སྲིད་དང་དཔལ་འབྱོར་འབྲེལ་ཡོད་མི་སྣ་རྣམས་ནས་རྒྱ་ནག་དང་མཉམ་དུ་འབྲེལ་མོལ་ནམ་གནང་ཡིན་ལ་ངེས་པར་དུ་འགྲོ་བ་མིའི་ཐོབ་ཐང་གི་གནད་དོན་གཙོར་བཟུང་དགོས་པའི་སྤྱིར་བསྒྲགས་ཤིག་སྤེལ་འདུག་པ་མ་ཟད། གླེང་སྟེགས་ཚོགས་ཡུལ་ཕྱི་ཕྱོགས་སུའང་ལས་འགུལ་བ་ཚོས་སུད་སི་དང་རྒྱ་ནག་སྲིད་འཛིན་ཞི་ཅིན་ཕིང་གཉིས་ངན་པ་ལག་འབྲེལ་བྱས་པའི་ཟུར་སའི་རི་མོ་བྲིས་པའི་ཕྲེད་དར་ཐོག་འགྲོ་བ་མིའི་ཐོབ་ཐང་མེད་ན་ཚོང་འབྲེལ་ཡོང་ཐབ་མེད། མི་གསོད་ལག་དམར་བ་དང་མཉམ་དུ་འབྲེལ་ལམ་མ་གནང་རོགས། བོད་ལ་རང་དབང་དགོས། ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩལ་འགྲན་ཚོགས་ཕྱིར་འཐེན་གནང་དགོས་ཞེས་སོགས་སྐད་འབོད་གནང་སྟེ་ཞི་བའི་ངོ་རྒོལ་གྱི་ལས་འགུལ་སྤེལ་འདུག
