དེང་སྐབས་འཛམ་གླིང་ཁྱོན་དུ་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་ནད་ཡམས་ཀྱི་དཀའ་ངལ་ཆེན་པོ་འཕྲད་བཞིན་པའི་དུས་སྐབས་འདིར་བོད་མི་ཚོགས་སྒེར་ཁག་ནས་རང་རེའི་གནས་ཡུལ་རྒྱལ་ཁབ་གཞུང་མང་ལ་གདུང་སེམས་མཉམ་བསྐྱེད་མཚོན་ཆེད་དུ་རོགས་དངུལ་ཞལ་འདེབས་ཕུལ་བ་དང་ཟས་གོས་སྦྱིན་གཏོང་སོགས་ཀྱི་ལས་འགུལ་སྣ་མང་ཞིག་སྤེལ་བཞིན་ཡོད་པ་ལྟར། ཡོ་རོབ་རྒྱལ་ཁབ་ཁུལ་དུ་གནས་སྡོད་བོད་རིགས་ཚོགས་ཁག་ཅིག་གིས་རང་རེའི་གནས་ཡུལ་རྒྱལ་ཁབ་ནང་གི་འཕྲོད་བསྟེན་དང་སྤྱི་ཚོགས་ཞབས་ཞུའི་ལས་དོན་གཉེར་མཁན་གྱི་གཞུང་འབྲེལ་མིན་པའི་ཚོགས་པ་སོགས་དངུལ་ཞལ་འདེབས་ཕུལ་བའི་ཐོག་ནས་ནད་ཡམས་ཁྲོད་ཕྱག་ལས་གནང་མཁན་ཡོངས་ལ་ལ་ཆེ་བསྟོད་དང་དེ་བཞིན་ཚེ་སྲོག་ཤོར་བའི་མང་ཚོགས་ལ་གདུང་སེམས་མཉམ་བསྐྱེད་ཞུས་འདུག
སུད་སི་དང་ལིག་ཏེན་སིཊཡན་བོད་རིགས་མི་མང་ནས་རང་རེའི་གནས་ཡུལ་ཡུལ་རྒྱལ་ཁབ་ནང་དུ་ཐེངས་འདིའི་ཏོག་དབྱིབས་ནད་ཡམས་སྔོན་འགོག་དང་འབྲེལ་བའི་འཕྲོད་བསྟེན་ཞབས་ཞུ་བ་དང་དེ་བཞིན་སྤྱི་ཚིགས་ཀྱི་ཕན་བདེར་ལས་དོན་གཉེར་མཁན་གྱི་གཞུང་འབྲེལ་མིན་པའི་ཚོགས་པ་ཁག་མི་འདྲ་བ་གསུམ་ལ་སུད་སྒོར་ཁྱོན་ ༡༢༥༦༧ ཞལ་འདེབས་ཕུལ་འདུག་ཅིང། ཡོ་རོབ་ཨོ་སི་ཀྲི་ཡ་བོད་རིགས་ཚོགས་པས་ཁུལ་དེའི་ནང་གི་ནད་ཡམས་ངལ་སེལ་རོགས་སྐྱོར་ལས་དོན་གཉེར་མཁན་གྱི་གཞུང་འབྲེལ་མིན་པའི་ཚོགས་པར་ཡོ་རོབ་སྒོར་ ༧༩༤༧ ཞལ་འདེབས་ཕུལ་བ་དང། དེ་བཞིན་ཨི་ཊ་ལི་བོད་རིགས་ཚོགས་པས་ཁུལ་དེའི་རྒྱ་གྲམ་དམར་པོ་ཚོགས་པར་ཡོ་རོབ་སྒོར་ ༡༤༦༥ བཅས་ཕུལ་ཏེ་གོང་གསལ་བོད་རིགས་ཚོགས་པ་དེ་དག་གིས་གནས་ཡུལ་གཞུང་གི་ད་བར་བོད་མི་སྐྱབས་བཅོལ་བ་ཚོར་བདག་སྐྱོང་གནང་བར་བཀྲིན་ཆེ་ཞུས་པ་དང། ནད་ཡམས་ཁྲོད་གཡུལ་སའི་མདུན་དུ་སྐྱོད་མཁན་འཕྲོད་ལས་ཞབས་ཞུ་བ་ཚོར་ཆེ་བསྟོད་དང། ད་བར་ནད་ཡམས་ཁྲོད་འདས་གྲོངས་སུ་གྱུར་བ་རྣམས་ལ་གདུང་སེམས་བསྐྱེད་ཞུས་ཡོད་པ་རེད།
སུད་སི་དོན་གཅོད་འཆི་མེད་རིག་འཛིན་ལགས་སུ་བཅར་འདྲི་ཞུས་པར་དོན་ཁང་ཁྱབ་ཁོངས་བོད་མི་གནས་སྡོད་བྱེད་ཡུལ་རྒྱལ་ཁབ་དྲུག་པ་ཡོད་པས་ཐེངས་འདིའི་ནང་རྒྱལ་ཁབ་བཞིའི་ནང་གི་བོད་མི་ཚོས་མཉམ་ཞུགས་གནང་ཡོད་པ་གསུངས་སོང་། དེ་མཚུངས་སུ་དབྱིན་ཡུལ་དོན་ཁང་ཁྱབ་ཁོངས་བོད་རིགས་ཚོགས་པ་ཁག་གིས་ནད་ཡམས་ཁྱབ་གདལ་ཁྲོད་དངོས་སུ་གནས་ཡུལ་གཞུང་ལ་དངུལ་གྱི་ཞལ་འདེབས་ཕུལ་བར་ས་གནས་ཀྱི་གནས་བབ་དང་ཁ་ཐོར་བོད་མིའི་གནས་སྟངས་བཅས་ཀྱི་ཐོག་ནས་བྱུང་མེད་ཀྱང། དབྱིན་ཡུལ་བོད་རིགས་ཚོགས་པའི་ངོས་ནས་འཕྲོད་བསྟེན་ཞབས་ཞུ་བར་ཐུགས་རྗེ་ཆུ་ཞུའི་མཛད་སྟོན་གཉེར་རྒྱུ་ཡིན་པ་སོགས་གསུངས་སོང་།
རྩ་བའི་བོད་མིའི་སྒྲིག་འཛུགས་བཀའ་ཤག་ནས་ཉེ་སྔོན་ནད་ཡམས་དང་འབྲེལ་ནས་གཞུང་གི་ཁྱབ་ཁོངས་མཛད་གཙོ་རྣམ་པ་དང་ལས་བྱེད་པའི་ཉིན་གཅིག་གི་ཕོགས་ཐོབ་རྒྱ་གར་གྱི་སྲིད་བློན་གི་མཚན་ཐོག་ཛ་དྲག་ངེལ་སེལ་མ་དངུལ་ལ་ཞལ་འདེབས་གནང་དགོས་པའི་བཀོད་ཁྱབ་གནང་ཡོད་པ་མ་ཟད། དེ་བཞིན་དོན་གཅོད་ཁག་གིས་གནས་ཡུལ་རྒྱལ་ཁབ་གཞུང་མང་ནས་རང་རེའི་སྤྱི་ཚོགས་ལ་གནང་བའི་བཀྲིན་ལ་བསམ་ཤེས་ཀྱིས་ནད་ཡམས་ཁྱབ་གདལ་འགྲོ་བཞིན་པའི་དཀའ་ངལ་སེལ་བར་ཕན་ཆེད་དོན་ཁང་ཁག་གི་ལས་བྱེད་དང་ཁྱབ་ཁོངས་བོད་རིགས་མི་མང་ལས་ཞལ་འདེབས་བསྡུ་རུབ་ཀྱིས་སོ་སོའི་རྫོང་ངམ་འབྲེལ་ཡོད་ལས་ཁུངས་ལ་དེ་ལྟར་གནང་དགོས་པའི་བཀོད་ཁྱབ་བཏང་ཡོད་པ་རེད།
