དེ་རིང་ཕྱི་ཚེས་ ༢༡ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་རྒྱལ་བའི་ཕོ་བྲང་ནས་ཐའེ་ཝན་གྱི་སྲིད་འཛིན་གསར་པ་ Lai Ching-te མཆོག་ལ་འཚམས་འདྲི་སྩལ་འདུག
དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་ཐའེ་ཝན་གྱི་སྲིད་འཛིན་གསར་པ་མཆོག་གིས་ལས་ཁུར་བཞེས་པར་འཚམས་འདྲི་མཛད་པ་དང་འབྲེལ། མགོན་པོ་༸གང་ཉིད་མཆོག་གིས་ཐའེ་ཝན་ལ་མང་གཙོ་ས་བརྟན་གྱི་ལམ་ལུགས་ཤིག་ཡོད་པ་དེ་ནི་ངོ་མཚར་ཅན་ཞིག་ཡིན་པ་དང་། ལྷག་པར་ཐའེ་ཝན་མི་མང་གིས་མང་གཙོའི་ལམ་ལུགས་སྲ་བརྟན་གོང་འཕེལ་ཙམ་དུ་མ་ཟད། སྲོལ་རྒྱུན་གྱི་རིག་གཞུང་རྒྱུན་འཛིན་ཐོག་ཕུན་སུམ་ཚོགས་པའི་ཡར་རྒྱས་ཆེན་པོ་ཞིག་ཀྱང་བྱུང་ཡོད་ཅེས་བཀའ་སྩལ་ཏེ། སྲིད་འཛིན་མཆོག་ནས་ཐའེ་ཝན་མི་མང་གི་མངོན་འདོད་བསྒྲུབ་པར་དཀའ་ངལ་ལ་གདོང་ལེན་གྱི་ལམ་ལྷོང་ལེགས་གྲུབ་ཡོང་བའི་ཐུགས་སྨོན་མཚམས་སྦྱོར་མཛད་འདུག
གཞི་རྩའི་ཁ་སང་སྟེ། ཕྱི་ཚེས་ ༢༠ ཉིན་ཐའེ་ཝན་གྱི་སྲིད་འཛིན་གསར་པའི་དམ་འབུལ་མཛད་སྒོ་ཚོགས་ཡོད་པ་དང་། སྐབས་དེར་སྐུ་མགྲོན་ཁྲོད་བོད་མིའི་སྒྲིག་འཛུགས་ཀྱི་ཆེས་མཐོའི་སྐུ་ཚབ་ཁག་ཅིག་ཀྱང་ལྷན་ཞུགས་གནང་ཡོད་པ་རེད།
