ཨ་རིར་རྟེན་གཞི་བྱས་པའི་ Randolph སློབ་ཆེན་གྱིས་ནོ་སྦེལ་ཞི་བདེའི་གཟེངས་རྟགས་བཞེས་མཁན་ཨ་རིའི་བེུད་རྩོམ་པ་པོ་ལྕམ་ Pearl S. Buck ལགས་ཀྱི་མཚན་གནས་རྗེས་དྲན་གྱི་འདི་ལོའི་ཆེས་མཐོའི་གཟེངས་རྟགས་དེ་བཀའ་ཟུར་ལྷ་སྐུ་རྗེ་བཙུན་པདྨ་མཆོག་ལ་འབུལ་གཏན་ཁེལ་འདུག
ཕྱི་ལོ་ ༡༩༩༨ ནས་བཟུང་ཨ་རིར་རྟེན་གཞི་བྱས་པའི་ Randolph སློབ་ཆེན་གྱིས་རྒྱལ་སྤྱིའི་ཐོག་སྤྱི་ཚོགས་ཀྱི་བདེ་དོན་དང་བེུད་དང་ཕྲུ་གུའི་རང་དབང་སྲུང་སྐྱོབ། དེ་བཞིན་ཤེས་ཡོན་གོང་འཕེལ་སོགས་ཀྱི་ཐོག་ལ་གཟེངས་སུ་ཐོན་པའི་ཕྱག་ལས་གནང་མཁན་རྣམས་ལ་ Pearls S. Buck ཞེས་པའི་ཆེས་མཐོའི་གཟེངས་རྟགས་ཤིག་འབུལ་ལམ་ཞུ་སྲོལ་ཡོད་པ་ལྟར། འདི་ལོའི་ཆེས་མཐོའི་གཟེངས་རྟགས་འདི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་གིས་ད་བར་བཙན་བྱོལ་ནང་གི་བོད་ཕྲུག་ཚོའི་ཤེས་ཡོན་དང་བདེ་དོན་ཆེད་བློས་བཏང་ཆེན་པོས་ཕྱག་ལས་གནང་བར་ཆེ་བསྟོད་ཀྱིས་ཕྱི་ལོ་ ༢༠༢༤ ཕྱི་ཟླ་ ༤ ཕྱི་ཚེས་ ༡༨ ཉིན་དངོས་སུ་འབུལ་བཞེས་གནང་གཏན་ཁེལ་ཡོད་པར་མ་ཟད། ཉིན་དེར་བཀའ་ཟུར་རྗེ་བཙུན་པདྨ་མཆོག་གི་༸སྐུ་ཚེའི་མཛད་རྣམ་དང་འབྲེལ་བའི་དངོས་བྱུང་གློག་བརྙན་ཞིག་ཀྱང་གཟིགས་འབུལ་ཞུ་འཆར་འདུག
Randolph སློབ་ཆེན་གྱི་གཙོ་འཛིན་ལྕམ་ Sue Ott Rowlands ལགས་ཀྱིས་ཁོང་གི་སློབ་ཆེན་གྱི་ངོས་ནས་༸སྐུའི་གཅུང་མོ་རྗེ་བཙུན་པདྨ་མཆོག་ལ་འདི་ལོའི་གཟེངས་རྟགས་དེ་འབུལ་གཏན་ཁེལ་བ་ནི་གཟི་བརྗིད་ཅིག་ལ་ངོས་འཛིན་གནང་གི་ཡོད་པ་དང་ལྷག་དོན་གཟེངས་རྟགས་འདི་ཉིད་བཙན་བྱོལ་ནང་གི་བོད་ཕྲུག་སྟོང་ཕྲག་མང་པོའི་ཤེས་ཡོན་དང་བདེ་དོན་ཐོག་ལ་བློས་བཏང་ཆེན་པོས་ཕྱག་ལས་གནང་མཁན་༸སྐུའི་གཅུང་མོ་མཆོག་ལས་གང་ཟག་གཞན་སུ་ལའང་འོས་བབ་ཡོད་པར་གཟིགས་ཀྱི་མེད་ཅེས་གསུངས་འདུག
ཐེངས་འདིའི་གཟེངས་རྟགས་དེ་ནི་དུས་རབས་ཉི་ཤུ་པའི་ལོ་རབས་སུམ་ཅུ་ནང་ནོ་སྦེལ་ཞི་བདེའི་གཟེངས་རྟགས་བཞེས་མཁན་ཨ་རིའི་བེུད་རྩོམ་པ་པོ་ལྕམ་ Pearl S. Buck ལགས་ཀྱི་མཚན་གནས་རྗེས་དྲན་ཆེད་ཡིན་པ་དང་། དེ་སྔ་གཟེངས་རྟགས་དེ་བྷང་ལ་དེ་ཤའི་སྲིད་བློན་ལྕམ་ Sheikh Hasina ལགས་དང་ཕི་ལི་པི་ནིས་ཀྱི་སྲིད་འཛིན་ཟུར་པ་ལྕམ་ Corazon Aquino ལགས། དེ་བཞིན་ཨིར་ལན་ཌིའི་སྲིད་འཛིན་ཟུར་པ་ལྕམ་ Mary Robinson ལགས་སོགས་བེུད་དང་ཕྲུག་གུ། སྤྱི་མང་ཐོབ་ཐང་སོགས་ཀྱི་སྡེ་ཚན་སྣ་ཚོགས་ནང་གཟེངས་སུ་ཐོན་པའི་ཕྱག་ལས་གནང་མཁན་རྣམས་ལ་ཕུལ་ཡོད་ཅིང་། ༸སྐུའི་གཅུང་མོ་བཀའ་ཟུར་ལྷ་སྐུ་རྗེ་བཙུན་པདྨ་མཆོག་ནི་གཟེངས་རྟགས་དེ་བཞེས་མཁན་མི་སྣ་ ༧ པ་ཆགས་ ཡོད།
༸སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་ནི་ཕྱི་ལོ་ ༡༩༤༠ ལོར་བོད་ཀྱི་རྒྱལ་ས་ལྷ་སར་འཁྲུངས་ཤིང་། ཆུང་དུས་རྒྱ་གར་ནང་སློབ་གཉེར་གནང་སྟེ་རིམ་པས་དབྱིན་ཡུལ་དང་སུད་སི་སོགས་སུ་ཆེད་ཕེབས་ཀྱིས་སློབ་གཉེར་གནང་བའི་རྗེས། ཕྱི་ལོ་ ༡༩༦༤ ལོར་རྒྱ་གར་ལ་ཕྱིར་ཕེབས་ཀྱིས་བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་གྱི་ཐུགས་འགན་བཞེས་པ་དང་། དེ་རྗེས་ཕྱི་ལོ་ ༡༩༨༠ ལོར་བཀའ་ཟུར་རྗེ་བཙུན་པདྨ་མཆོག་གིས་དབུ་ཁྲིད་ནས་བོད་ནང་དངོས་དོན་རྟོག་ཞིབ་ཀྱི་གཟིགས་སྐོར་སྐུ་ཚབ་ཐེངས་གསུམ་པ་ཕེབས་ཡོད་པར་མ་ཟད། དེ་སྔ་ཤེས་རིག་བཀའ་བློན་གྱི་ཐུགས་འགན་བཞེས་མྱོང་ཡོད་པ་རེད།
ལྷག་དོན་བཀའ་ཟུར་རྗེ་བཙུན་པདྨ་མཆོག་གིས་ད་བར་རྒྱལ་སྤྱིའི་གཟེངས་རྟགས་མང་དག་ཅིག་བཞེས་མྱོང་ཡོད་པའི་ཁྲོད་སུད་ཌན་གྱི་ཕྲུག་གུའི་རང་དབང་དང་འབྲེལ་བའི་སྙན་གྲགས་ཆེ་བའི་གཟེངས་རྟགས་དང་། བུད་མེད་ནུས་སྟོབས་གོང་འཕེལ་དང་འབྲེལ་བའི་གཟེངས་རྟགས། དེ་བཞིན་རྒྱ་གར་གཞུང་གི་བེུད་ནུས་སྟོབས་གོང་འཕེལ་དང་འབྲེལ་བའི་གཟེངས་རྟགས་སོགས་བཞེས་མྱོང་ཡོད་པ་རེད། པར་kurier
